Почна санацијата на мостот естакада, кој е важна сообраќајна врска за Гази Баба и за цело Скопје, соопшти градоначалникот на Скопје Орце Ѓорѓиевски.

– Денеска, заедно со мојот колега Бобан Стефковски, го означивме почетокот на санацијата на мостот естакада во Гази Баба, проект кој со години беше барање на илјадници жители и една од најважните сообраќајни точки во овој дел од градот. Овој мост има особено значење, затоа што се наоѓа на еден од најфреквентните излези од Скопје и претставува важна врска за граѓаните кои секојдневно се движат кон и од општините што гравитираат во овој дел. Тука минуваат работници, ученици, семејства, компании, транспорт и затоа нашата обврска е оваа сообраќајна артерија да биде безбедна, функционална и достоинствена – рече Ѓорѓиевски.

Санацијата опфаќа пристапни рампи на вкупна површина од 10.000 м², од кои 3.800 м² ќе бидат целосно обработени со гребење и вградување два нови слоја асфалт, додека на делот од мостот ќе се постави нов асфалтен слој. Ќе се изврши замена на рабници, изработка на асфалтни тротоари, чистење, санација и бојадисување на заштитната пешачка ограда, како и замена на постоечките капаци за шахти. Вкупната должина на делот што се санира изнесува 1,5 километри коловоз.

Градоначалникот Ѓорѓиевски најави дека Градот ќе продолжи со санација на сите мостови во градот каде што има потреба.

Мост-естакада (или само естакада) е специфичен вид долг мост составен од голем број столбови (распони), кој се користи за премостување на сувоземен терен, рамнини, мочуришта или густо населени градски средини, наместо за премостување на големи водни површини.

The post СЕ САНИРА МОСТОТ ЕСТАКАДА ВО ГАЗИ БАБА Тоа е еден од најфреквентните излези од Скопје appeared first on plusinfo.mk.

На вечерашната седница на ЦК на ВМРО-ДПМНЕ беа потврдени одлуките за новите претседатели на ОК на ВМРО-ДПМНЕ, дополнително беа усвоени нови 3 членови на ИК на ВМРО-ДПМНЕ.

„Нови членови на ИК на ВМРО-ДПМНЕ се Миле Лефков, Бобан Стефковски и Зоранчо Јованчев. Миле Лефков е пратеник во македонското собрание, кој доаѓа од Кочани и претходно беше дел од извршниот комитет, искусен и докажан кадар на ВМРО-ДПМНЕ. Бобан Стефковски е актуелен градоначалник на општина Гази Баба, кој донесе историски најдобар резултат на ВМРО-ДПМНЕ како кандидат за градоначалник и претседател на општинскиот комитет.

Човек од збор кој има реализирани голем број на проекти во интерес на граѓаните. Зоранчо Јованчев е пратеник во собранието и поранешен претседател на ОК Кавадарци. Докажан кадар кој со своето искуство ќе придонесе кон нови победи на партијата. ВМРО-ДПМНЕ се реструктуира и реорганизира за да донесе нови успеси за Македонија“, соопшти ВМРО-ДПМНЕ.

The post ЛЕФКОВ, СТЕФКОВСКИ И ЈОВАНЧЕВ ВЛЕГУВААТ ВО ПРВАТА ПОСТАВА Извршниот комитет на ВМРО-ДПМНЕ доби нови членови appeared first on plusinfo.mk.

Полицијата приведе 46-годишен скопјанец откако при обид за легитимирање извадил пиштол и испукал куршум кон полициски службеници на подрачјето на Гази Баба.

Инцидентот се случил во раните утрински часови, кога полициски службеници од СВР Скопје се обиделе да го легитимираат мажот. Наместо да постапи по наредбата, тој извадил огнено оружје и испукал еден куршум во нивна насока.

По пукањето осомничениот побегнал, но по преземени оперативни мерки бил лоциран и приведен.

Од МВР информираат дека по целосното документирање на случајот ќе биде поднесен соодветен поднесок.

The post ПУКАЛ КОН ПОЛИЦАЈЦИ ВО ГАЗИ БАБА Осомничениот приведен по потера appeared first on plusinfo.mk.

Инцидент со закани и физички напад на сточен пазар во скопската општина Гази Баба бил пријавен во полиција, откако, според пријавата, 46-годишен скопјанец и неговиот татко биле нападнати поради наводни долгови.

Случајот во СВР Скопје го пријавил Д.Г.(46), кој навел дека инцидентот се случил утрото околу 08:45 часот, на сточниот пазар во Гази Баба.

Според пријавеното, лицето Н.А. прво упатило закани со пиштол, а потоа физички ги нападнало Д.Г. и неговиот татко. Во нападот двајцата се здобиле со повреди.

Од полицијата информираат дека се преземаат мерки за целосно расчистување на случајот и утврдување на сите околности околу инцидентот.

The post ДРАМА НА СТОЧЕН ПАЗАР ВО СКОПЈЕ Закани со пиштол и напад врз татко и син appeared first on plusinfo.mk.

Билтенот на МВР за сабота, 16 мај изобилува со пријави за семејно насилство, како и за физички пресметки меѓу соседи со наѓушени семејни односи, како и кавги меѓу станодавци и кираџии. МВР известува дека работи на расчистување на случаите и дека по нивно целосно документирање ќе поднесе соодветни пријави.

Татко пријавил напад и закани од сопствениот син во Гази Баба

Педесет и седумгодишен скопјанец вчера (петок) попладне пријавил во полиција дека бил нападнат и му биле упатувани закани од неговиот син.
Според пријавата, инцидентот се случил завчера (четврток) околу 18:30 часот во семејниот дом во населбата Гази Баба. Случајот е пријавен во СВР Скопје и се работи на негово расчистување.

Приведен скопјанец по напад врз партнерката во Центар

Триесет и осумгодишен жител на Скопје ноќеска бил приведен откако бил пријавен за физички напад врз својата партнерка.

Според информациите од полицијата, случајот се случил вчера (петок) околу 22:30 часот на подрачјето на Центар, а приведувањето било извршено по полноќ.

Нападнатата е 46-годишна жена, а по случајот постапува СВР Скопје.

Жена од Аеродром пријавила долгогодишно малтретирање од сопругот

Четириесет и едногодишна скопјанка пријавила дека со години трпела психичко и физичко насилство од сопругот, но досега не го пријавувала случајот.

Во полицијата вчера (петок) бил повикан на разговор 43-годишен маж од Скопје, по пријава дека завчера (четврток) околу 22:30 часот физички ја нападнал сопругата во нивниот дом во населбата Аеродром.

Од МВР велат дека се преземаат мерки за расчистување на случајот.

Уапсен беровец кој прекршил судска забрана и ја истерувал сопругата од домот

Полицијата во Берово привела 47-годишен маж откако, според пријавата, ја прекршил мерката издадена од суд и барал сопругата и ќерката да го напуштат семејниот дом.

Инцидентот се случил завчера (четврток) вечерта, а по случајот бил известен и јавен обвинител од Основното јавно обвинителство во Берово.

Според информациите, станува збор за прекршување на решение издадено од Основниот суд во Берово.

Млад скопјанец полил ходник со запалива течност и му се заканувал на татко си

Дваесет и четиригодишен скопјанец бил приведен ноќеска по инцидент во домот „Ранка Милановиќ“ во Скопје.

Според пријавата, вчера (петок) околу 22:30 часот, по расправија со татко му, тој со запалива течност го полил ходникот од објектот и упатувал закани.

Полицијата интервенирала кратко по полноќ на подрачјето на Гази Баба, а случајот се расчистува.

Приведена скопјанка по расправија околу изнајмување стан во Кисела Вода

Шеесет и петгодишна жена од Скопје била приведена по нарушување на јавниот ред и мир во станбена зграда во Кисела Вода.

Според полицијата, таа недолично се однесувала кон 52-годишен сопственик на стан со кого требало да склучи договор за закуп, но одбивала да го направи тоа.

Инцидентот се случил вчера (петок) вечерта, а од МВР најавуваат соодветен поднесок по целосното документирање на случајот.

Браќа од Тетово завршија со кривични пријави по семејна тепачка

СВР Тетово поднесе кривична пријава против П.С.(26) и В.С.(21), двајцата од Тетово, поради постоење основи на сомнение за сторено кривично дело „телесна повреда“.

На 22.03.2026 во семејниот дом, по претходно нарушени семејни односи, пријавените започнале меѓусебна физичка пресметка.

The post СЕМЕЈНОТО НАСИЛСТВО „ПУШТЕНО НА НАЈЈАКО“ Насилни синови, татковци, партнери, па дури и кираџии appeared first on plusinfo.mk.

Полицијата трага по две малолетни лица кои во петокот вечерта се обиделе да предизвикаат пожар во Парк шумата Гази Баба.

Случајот во полиција го пријавил граѓанин, кој со помош на уште неколку лица успеал да го изгасне опожарениот дел од летниковецот.

„Денеска (15.05.2026) во 19:47 часот во СВР Скопје А.В. пријавил дека во парк шума Гази Баба од страна на две малолетни лица бил опожарен дел од летниковец. Пожарот е локализиран од страна на граѓани. Се преземаат мерки за пронаоѓање на сторителите“, соопшти МВР.

The post 🎥 МАЛОЛЕТНИЦИ ЗАПАЛИЛЕ ЛЕТНИКОВЕЦ Вандализам во Прак шумата Гази Баба appeared first on plusinfo.mk.

Момчето прободено во основното училиште „25 мај“ во скопската населба Ченто е во критична состојба, изјави директорот на Ургентен центар, д-р Игор Мерџаноски, за весникот „Вечер“.

Тој потврдил дека 15-годишниот ученик бил опериран и дека лекарите се борат за неговиот живот.

Полицијата уапси врсник кој се сомничи за нападот.

„На 11.5.2026 во 14:50 часот, во Скопје, полициски службеници од СВР Скопје лишија од слобода 15-годишник од Скопје, постапувајќи по претходна пријава од општинско основно училиште на подрачјето на Гази Баба, дека пријавениот влегол во училиштето и со остар предмет му нанел тешки телесни повреди на 15-годишен ученик во училиштето“, соопштија од МВР.

УЧИЛИШТАТА КАКО БОЈНИ ПОЛИЊА Групни тепачки, напад со нож, тепачки меѓу ученици, меѓу ученички…

The post УЧЕНИКОТ ПРОБОДЕН ВО ЧЕНТО Е ВО КРИТИЧНА СОСТОЈБА Врсник е уапсен по нападот appeared first on plusinfo.mk.

Четири лица се приведени поради семејно насилство во изминатото деноноќие, а полицијата регистрирала вкупно седум случаи низ државата, соопшти Министерство за внатрешни работи.

Најсериозниот инцидент се случил во скопската населба Гази Баба, каде 53-годишен маж со секира ги кршел прозорците од домот, а потоа со нож му се заканувал на својот син. Кога пристигнала полицијата, тој замавнувал со ножот и им упатувал закани, по што бил лишен од слобода.

Во друг случај, 32-годишна жена пријавила дека била физички нападната од сопругот во семејниот дом во скопско. Уште една 23-годишна жена пријавила дека во населбата Драчево била нападната од својот вонбрачен партнер, при што навела дека подолг период трпела физичко и психичко малтретирање и од него и од членови на неговото семејство.

Семејно насилство било пријавено и во Куманово, каде 33-годишна жена пријавила напад од сопругот, а полицијата подоцна привела 53-годишен маж кој физички ја нападнал својата 77-годишна мајка.

Во Битола, 40-годишен маж бил приведен откако упатувал закани кон сопругата со која бил во бракоразводна постапка.

Полицијата интервенирала и во Росоман, каде 46-годишна жена била приведена поради закани кон нејзината 81-годишна свекрва.

Од полицијата информираат дека се преземаат мерки за расчистување на сите случаи и по нивното документирање ќе бидат поднесени соодветни пријави.

The post СЕДУМ СЛУЧАИ НА СЕМЕЈНО НАСИЛСТВО Четири лица приведени во последното деноноќие appeared first on plusinfo.mk.

Екипи на секторот за инспекциски работи на Општина Гази Баба утрово урнаа дивоградба во населбата Керамидница, изградена на државно земјиште. Акцијата беше спроведена со присуство на надлежните служби, со цел да се заштити јавниот интерес и да се воспостави урбан ред.

Градоначалникот Бобан Стефковски порача дека институциите нема да прават компромиси кога станува збор за бесправното градење.

– Урната е уште една дивоградба и испраќаме јасна порака дека бесправното градење нема да се толерира. Законот важи подеднакво за сите и ќе се применува доследно и без исклучоци – изјави Стефковски.

Тој нагласи дека во изминатиот период биле реализирани повеќе акции за отстранување бесправно изградени објекти во различни населени места низ општината, додавајќи дека станува збор за континуирана стратегија за заштита на јавните површини и обезбедување планска изградба.

– Апелирам до граѓаните да не започнуваат градежни активности без одобрение за градење, бидејќи секоја бесправна градба ќе биде санкционирана согласно закон – истакна градоначалникот.

Од општината најавуваат дека ваквите активности ќе продолжат и во наредниот период, со цел спречување на узурпација на државно земјиште и воспоставување ред во просторот.

The post БАГЕРИТЕ ИЗЛЕГОА НА ТЕРЕН ОД РАНО УТРО Урната дивоградба на државно земјиште во Гази Баба appeared first on plusinfo.mk.

Општина Гази Баба се соочува со сериозен финансиски удар од 127 милиони денари, откако Апелациониот суд во Скопје донесе правосилна пресуда со која општината е задолжена да врати средства за поништени одобренија за градење кај локацијата на поранешниот Скопски саем.

Градоначалникот Бобан Стефковски информира дека проблемот е директна последица на, како што рече, неодговорното работење на претходното раководство во периодот од 2017 до 2021 година.

Според неговото објаснување, повеќе правни лица кои имале важечки одобренија за градба и уредно платиле надомест за уредување на градежно земјиште, на 27 октомври 2020 година поднеле тужба против Општината, откако претходното раководство ги поништило нивните одобренија и издало нови за друго правно лице.

Иако Општината била должна да им ги врати уплатените 73.460.330 денари, тоа не било направено, по што следувала долга судска постапка. Апелациониот суд, со пресуда донесена на 30 октомври 2025 година, наложил враќање на средствата заедно со законска казнена камата, со што вкупниот износ што треба да се исплати достигнал околу 127 милиони денари.

– Оваа пресуда е јасен доказ дека во периодот од 2017 до 2021 година се работело неодговорно, без визија и без почитување на законите. Наместо во 2020 година да се вратат 73 милиони денари, денес општината мора да плати дури 127 милиони – изјави градоначалникот Стефковски.

Тој призна дека станува збор за сериозен товар за општинскиот буџет, но порача дека граѓаните немаат причина за загриженост.

– Со одговорно, домаќинско и транспарентно работење ќе го надминеме овој предизвик и општината ќе продолжи стабилно да функционира во интерес на јавноста – нагласи Стефковски.

Градоначалникот најави дека за целиот случај ќе бидат информирани надлежните институции, со цел да се разгледа можноста за утврдување на одговорност согласно законите.

– Правдата, отчетноста и заштитата на јавниот интерес мора да бидат темел на секое институционално работење – порача Стефковски.

The post ТЕЖОК ФИНАНСИСКИ УДАР ЗА ГАЗИ БАБА Општината мора да плати над 2 милиони евра за поништени дозволи appeared first on plusinfo.mk.