Од ВМРО-ДПМНЕ соопштија дека најавеното одземање на предметите од одредени обвинители отвора прашања за нивната досегашна работа, при што упатија серија критики кон поранешни членови на Специјалното јавно обвинителство.

Во партиското соопштение се наведува дека обвинителите поврзани со периодот на владеење на Зоран Заев, меѓу кои се споменуваат Гаврил Бубевски, Ленче Ристоска и Лиле Стефанова, треба да одговорат на повеќе прашања поврзани со нивната работа во изминатите години.

Од партијата прашуваат дали треба да се утврди одговорност за, како што наведуваат, „злоупотреба на средства“ и за наводен политички прогон. Дополнително, во соопштението се споменуваат изјави на обвинителката Лејла Кадриу, во кои се тврди дека поранешниот премиер Заев и тогашната вицепремиерка Радмила Шекеринска наводно имале влијание врз изборот на предмети.

Во реакцијата се споменува и поранешната специјална обвинителка Катица Јанева, за која од ВМРО-ДПМНЕ велат дека го предводела системот кој, според нив, бил политички мотивиран.

Од партијата додаваат дека дел од обвинителите биле дел од „ист апарат“ кој, според нив, придонел за нарушување на правдата.

The post ПРЕД ДА СЕ НАВРЕДАТ ЗА ОДЗЕМЕНИТЕ ПРЕДМЕТИ Од ВМРО-ДПМНЕ прашуваат дали обвинителите ќе одговараат за работата во СЈО appeared first on plusinfo.mk.

„Најостро ги демантирам клеветите и измислените наводи изнесени од адвокатката Лејла Кадриу во интервју во емисијата „Вечерното шоу на Богдан Илиевски” на ТВ Алфа, емитувано на 07.02.2026 година“, вели јавниот обвинител Гаврил Бубевскки во своето писмено обраќање до јавноста.

„Наводите кои се однесуваат на моето постапување и на работата на поранешното СЈО се невистинити и креирани со цел да наштетат на мојот личен и професионалениот углед, за што веднаш по емисијата иницирав постапка со која од неа побарав извинување за јавно изнесените лаги. Доколку не добијам извинување во законски предвидениот рок, ќе поднесам граѓанска тужба за клевета и во суд ќе се докаже дека се што беше кажано во наведената емисија е апсолутна невистина.

Иако сметав дека изнесените клевети не заслужуваат да им се дава јавно внимание, сфаќам дека нашето општество веројатно не е доволно отпорно на лаги.

Вистината е дека јас никогаш во мојот живот не сум имал 4 мобилни телефони. Додека бев јавен обвинител во СЈО имав еден телефонски број кој го користев за цело време додека бев во тоа обвинителство. По враќањето во ОЈО Скопје исто така користам само еден телефон. Мојот единствен, во моментов приватен телефонски број го знаат сите новинари и многу граѓани, бидејќи вистински верувам во начелото на транспарентност и на тој телефон секогаш сум бил и останувам отворен и достапен за сите прашања.

Ги отфрлам сите наводи за какво било влијание и стојам зад секоја одлука која сум ја донел.

Во голем дел од ситуациите кои беа претставени, како што е предавањето на прислушуваните материјали во СЈО, јас лично воопшто не сум бил присутен, за што имам и соодветни докази.

На страна од тоа, записник за тие материјали постои и тој е дел од доказите во предметот Таргет-Тврдина.

Од позиција на поранешна јавна обвинителка за чие оддалечување најпрвин од СЈО, а потоа и од редовното обвинителство, причините се многу добро познати во јавнообвинителската организација, каде и се водени и соодветни постапки за одговорност, Кадриу се обидува да го загрози мојот професионален интегритет и да влијае врз моето извршување на јавнообвинителската функција.

Мотивите за овој и други вакви слични настапи мене ми се јасни, но немам намера во ниту еден момент да им подлегнам на тие лаги и манипулации. Ќе ги искористам сите законски механизми за заштита, како што веќе направив и поднесов тужба и за лагите изнесени од уште еден адвокат – поранешен обвинител кој јавно настапува со истите намери и мотиви.

Очекувам во судска постапка да се докаже вистината наспроти лагите со кои „храбрите” поединци ја манипулираат јавноста подолг временски период, а со тоа да се утврди и нивната кредибилност како извори за информации во медиумите по однос на вистинските состојби во правосудството“ – се вели во јавното обраќање на обвинителот Бубевски.

The post ГАВИЛ БУБЕВСКИ БАРА ИЗВИНУВАЊЕ ОД ЛЕЈЛА КАДРИУ Во спротивно ќе тужи за клевета appeared first on plusinfo.mk.

Екс-обвинителката од Специјалното јавно обвинителство, Лејла Кадриу, во вчерашното издание на емисијата ВЕЧЕРНОТО ШОУ со Богдан Илиевски, излезе со лични сведоштва од работата во СЈО. Како тоа многу повеќе делувало на штаб на СДСМ, отколку на обвинителство.

Инаку Кадриу била избркана од СЈО лично од Катица Јанева, со образложение дека „не била тимски играч“.

– Имавме кујна и еден ден отидов да си земам кафе. Излегувам од канцеларијата и ги гледам Зоран Заев и Шеќеринска, така на колена нешто со некои хартии. Ги гледам Ленче (Ристовска, нз.), Фатиме (Фетаи, н.з.), беа и Лиле (Стефанова, н.з.) и Гаврил (Бубевски, нз.). Велам, луѓе, што прават овие овде, што прават Заев и Шеќеринска тука?. Што бараат да влезат во Обвинителството. Ни шефот на Обвинителство, Јанева, не е тука, ниту останатите обвинители не се тука. Што бараат овие двајца тука? Ленче ми рече дека ги донеле материјалите. Молам? А, ја прашувам, кој ќе пишува записник за примопредавање и како ќе ги примите тие материјали кога шефот не е тука. Но, очигледно овие четворица беа шефови. Па, ми вели Ленче, нема да пишуваме записник за примопредавање. Значи, држава паѓа. Цел свет слуша муабети со кои Зоран Заев мавта на плоштадот, а во Обвинителство се внесуваат без записник за примопредавање. Нечуено – вели Кадриу.

– Не, не. Ниту обвинители не смеат да се согласат на тоа, зашто единствен кој имаше право на потпис на сите акти што ги донесуваат обвинителите беше Катица. Значи ние не потпишувавме наши акти што ги работевме. Ние ќе изработиме, она ќе става потпис. И како сега овие четворица и искусни, демек, обвинители, значи газат по закон – вели Кадриу.

На прашањето како тие знаеле дека треба да дојдат на работа, кога Јанева рекла тој ден да не се доаѓа и како знаеле дека тука ќе бидат Заев и Шеќеринска, Кадриу вели:

– Па очигледно дека Катица не морала да доаѓа, бидејќи изгледа не била некој фактор таму. Испаѓа дека важно било овие четворица да бидат таму. После тоа не поминаa ни две недели, бев категорична и цело време инсистирав на тоа како може да се примаат материјали без записник Тоа значеше компромитирање на цела држава со тие глупости. Компромитираме цела држава, примаме материјали без записник. Значи во секое време може секој да додаде, да одземе и никому ништо – зборува за хаосот во СЈО, Кадриу.

Според Кадриу, таа четворка, Фетаи, Бубевски, Стефанова и Ристовска, секогаш го наметнувала своето мислење, а Бубевски се заканувал дека без него ништо не може да помине. И тоа го кажувал пред другите обвинители.

– Тој доаѓаше на колегиум со четири телефони на маса. Внимавајте, за сите нас се проверуваше да немаме камери и да немаме микрофони, да не се снимаат нашите меѓусебни разговори, а тој доаѓаше со 4 телефони на маса. На среде колегиум ќе му заѕвони еден телефон, другите три остануваат. Излегува и доаѓа, кажува што да правиме. Значи, на крај се покажа дека тоа повеќе личеше на штаб на СДСМ, отколку на СЈО кое треба да се занимава со некој висок криминал – вели Кадриу.

За трошењето пари од четирите милиони евра годишно, истакнува дека имало листи за тоа кој се земал плата, а на тие листи имало роднини на политичари, нивни деца или, како што опишува со еден збор – „чуда“.

А еден ден, во нејзината канцеларија влегол некој човек.

– Добар ден, обвинителке, ми вели, јас сум советник на министерот за внатрешни работи, Оливер Спасовски. Го прашувам што бара тука. Тој знаеше кој предмет го работам, а таа информација ја имаше само Катица. И пак го прашувам што бара кај мене во канцеларија. А, тој ми вели: Знаете обвинителке, вие го работите тој и тој предмет, ама треба да се прошири“. И ми ги кажува лицата против со кои тој предмет треба да се прошири. Му велам, ти си советник таму на политички поставена личност, а доаѓаш кај мене, јавен обвинител под заклетва, да ми кажуваш што да правам со моите предмети. Надвор да те нема. Надвор да те нема од канцеларија. И го избркав – тврди Кадриу.

Таа смета дека советникот на Спасовски тоа го правел и кај другите обвинители, само што тие си молчеле.

– Тоа беше лов на вештерки. Значи се донесоа тие материјали и беа предадени без записници, ама требаше да се врши притисок и врз судиите за да напишат тоа што мора да помине. Материјалите да станат доказ и да се прифат обвиненијата да се создадат услови да се врши притисок на сите судии што да напишат глупо за тоа мора да помине. Сите беа под лупа, да се соработува. Значи, тоа не беше обвинителско и професионално однесување, тоа беше каубојско однесување – вели Кадриу.

Според неа, самото СЈО и Законот за СЈО биле спротивни на Уставот и на законите на нашата држава.

– И на Уставот и на законите. Се донесе некој  специјален закон за тоа Обвинителство, за нелегално прислушуваните разговори. Се донесе таков еден „лекс специјалис“ кој имаше неколку членови, што уредуваа со кои материјали може да се занимава тоа Специјалното јавно обвинителство. Значи, само што ќе произлезе од тие нелегално прислушувани разговори и ништо друго. Требаше да се види и да се најде дали може да се докаже кривично дело. А самите разгвоори не покажуваа крининал зашто вербален делик не постои. И само беше прашање да се провери дали од тие нелегално прислушуваните разговори, може да произлезе некое кривично дело – вели Кадриу.

Таа тврди дека и содржински самиот Закон беше „накрвиво“ поставен, бидејќи обвинетите немаа право на жалба на одлуките на обвинител од СЈО што е спротивно на Уставот, како и на самиот Закон за СЈО.

– Тоа што тие што беа предмет на СЈО немаа право на жалба беше спротивно на Законот. Општите правила велат дека некој мора да ги проверува одлуките на обвинителот. Тука немаше такво нешто. Катица се ставаше над законот. Во еден случај, јас донесов такво решение со право на жалба пред Вишото јавно обвинителство. Таа ми рече дека тоа не доаѓа во предвид, нема каде да се жалат, „ние сме алфа и омега“ – ги цитира зборовите на Катица Јанева, Кадриу.

Таа истакнува дека по изборот на првиот тим на обвинители во СЈО, седум од нив, тие не смееле да положат заклетва се додека во тимот на Катица Јанева не биде не биде донесен и Гаврил Бубевски, доскорешен раководител на скопското ОЈО.

– Катица велеше дека мора да биде Гаврил. Како може да се почне без Гаврил. Мораме тоа да го направиме, нема да одеме на заклетва, велеше. Не верувам дека се знаеле од порано, бидејќи тој е од Берово, а таа од Гевгелија, така што немаа допирни точки. Но, веројатно е дека некој и го сугерирал Бубевски, бидејќи потоа се покажа дека тие заедно направија некои работи кои можеби некому друг не му паѓаа в очи, но мене ми пречеа.

При почетокот на основањето и постоењето на СЈО, таа вели дека ништо не се работело. Имале обуки со странци, како што вели, „од некои служби“. Ништо друго.

– Знаете, Јанева велеше дека таа е девојка од милион долари. И бидејќи веќе беше 15 октомври 2015 година, а СЈО имаше на сметка милион евра, мораше да се потрошат тие пари, зашто на крајот од годината, ако останеа непотрошени, државата ќе ни ги земеше назад во буџетот. Така, за два ипол месеци мораше да се потрошат милион евра, инаку ќе ни ги земат – вели Кадриу.

Годишниот буџет на СЈО беше четири милиони евра, но на почетокот, на 15 октомври 2015 г. имале еден милион евра и за два ипол месеци морале да ги потрошат, иако ништо не работеле.

– Не знам како, но најдоа начин да ги потрошат. И тоа трошење треба да се провери. Тука треба да се направи добра финансиска истрага. Не е чесно кон граѓаните на нашата држава“ истакнува таа, додавајќи дека само за кафе, за лешници, за бадеми и сл. се трошеле по две илјади евра месечно.

Кадриу денес е адвокат. За себе таа вели:

– Имам завршено два правни факултети, на Тетовскиот и на Приштинскиот универзитет. Магистер сум по форензички науки. Тој дел го завршив на Факултетот за безбедност, тука во Скопје. Мотив за магистратурата за форензика, беше токму тоа што бев обвинител, и сакав да знам и да бидам сигурна како да се наоѓаат трагите, како да се докаже кривичното дело, за да можеш во судница да влезеш, што се вели, со чист образ и со докази. Новиот Закон за кривична постапка предвидува една законска норма која вели дека сè што е сомнително оди во полза на обвинетиот. Во многу случаи се влегува во судница со несигурни докази. Со такви докази никогаш не сум сакала да влезам во судница. Инаку мајка на четири, факултетски образовани деца, со докторати. Значи, една горда мајка.

The post НА РАКА ИМ ДАВАА ЗАПИСНИЦИ ВО СЈО, ТОА ЛИЧЕШЕ НА ШТАБ НА СДСМ! Екс-обвинителката Кадриу изнесе шокантни детали од работата на некогашната институција appeared first on plusinfo.mk.

Советот на јавни обвинители денеска треба да ја одржи 36. седница, на чиј дневен ред, меѓу другото е и донесување на одлука за избор на основен јавен обвинител на Основното јавно обвинителство Скопје.

Во трка за нов шеф на скопското ОЈО се петмина кандидати, меѓу кои и досегашниот прв човек на ова обвинителство Гаврил Бубевски. Тој е поранешен член на СЈО кое се распушти поради корумпираност, а во ЈО има предмет и за бонусите делени во СЈО во милионски износи, поради што во судир со екс јавниот обвинител Љупчо Коцевски, дојдоа вишите обвинители Мустафа Хајрулахи и Јован Цветановски.

Освен Бубевски, кандидати на шеф на ОЈО Скопје се и Тања Трајчевска, Анел Фидоски, Дејан Петрески и Спасенка Андонова.

The post ПЕТМИНА КАНДИДАТИ ЗА ШЕФ НА СКОПСКОТО ЈАВНО ОБВИНИТЕЛСТВО Советот на јавни обвинители денеска ќе избира appeared first on plusinfo.mk.

Владејачката партија ВМРО-ДПМНЕ денеска остро го обвини поранешниот министер за здравство, Венко Филипче, нарекувајќи го „најлошиот министер за здравство во Македонија“.

Во соопштението на партијата се наведува дека времето додека Филипче раководел со здравствениот ресор било обележано со, како што велат од ВМРО-ДПМНЕ, бројни скандали, злоупотреби и системски хаос, чија кулминација бил случајот со Клиниката за онкологија.

„Додека Филипче бил министер за здравство, оштетен е Буџетот на државата преку измама, од над 2,2 милијарди денари или над 35 милиони евра. Со одлуката на ОЈО за завршување на истрагата за случајот Онкологија, поднесени се две обвиненија, но дали и зошто Филипче е изземен од случајот Онкологија? Според членот 295 од Законот за здравствена заштита, каде што стои ‘Надзор над законитоста на работата на здравствените установи врши Министерството за здравство’, што значи дека Филипче бил директно одговорен за истото“, се посочува во соопштението на владејачката партија.

Од ВМРО-ДПМНЕ прашуваат дали Филипче знаел дека на Клиниката за онкологија не се давала терапија на пациентите и дека лекови биле крадени и завршувале на црниот пазар во Косово. Понатаму, тие ги обвинуваат јавниот обвинител Гаврил Бубевски и судиите дека не обезбедуваат правда, туку опструираат предмети и го продлабочуваат клиентелизмот.

„Зошто омилениот обвинител на СДСМ и ДУИ, Гаврил Бубевски, не покренува истрага против Филипче, иако Филипче самиот директно или индиректно, дозволил системски хаос и непочитување на шеесетина законски одредби? Последиците од Филипче и од СДСМ во здравството се катастрофални и штетни. Судиите, избрани во Струмица и од Зајас, наместо да обезбедат правда, тие опструираат предмети и го продлабочуваат клиентелизмот. Обвинителите и судиите не го санкционираат криминалот и ги штитат политичките елити блиски до СДСМ, со што предизвикуваат ерозија на судскиот систем и недоверба во јавните институции“, се наведува во соопштението на ВМРО-ДПМНЕ.

Македонија мора да функционира како правна држава, а за тоа неопходни се реформи во правосудството, се додава во соопштението.

„Неопходно е независно судство и неопходно е судството да е растоварено од политички влијанија. СДСМ останува синоним за криминал корупција и предавства“, посочуваат од владејачката партија.

The post ЗОШТО ОБВИНИТЕЛОТ БУБЕВСКИ ГО ШТИТИ ВЕНКО ФИЛИПЧЕ? Поранешниот министер е директно одговорен за случајот Онкологија, обвинува владејачката партија appeared first on plusinfo.mk.

Финансиската полиција до Основното јавно обвинителство – Скопје поднелa кривична пријава за режисерот Милчо Манчевски и за неговата фирма „Банана филм“, во врска со неговото и со финансиското работење на неговата фирма.

Според порталот НоваТВ, кој ја лиферува веста, славниот режисер Манчевски се гони за потрошени 950.000 евра државни пари, за кои тој не доставил извештај во Агенцијата за филм.

Истрагата во УФП почнала по поднесена кривична пријава од Агенцијата за филм на РСМ доставена во Основното јавно обвинителство. Финансиската полиција, по наредба на ОЈО и во координација со обвинителството, скоро две години водела истрага за сомнителни трансакции на на „Банана филм“. Според извор на Плусинфо од обвинителски кругови, пријавата на Финансиската полиција е поднесена во ОЈО Скопје, во одделот што го води обвинителот Гаврил Бубевски.

Истрагата покажала сериозни индиции за проневерени буџетски средства, тврди порталот Нова ТВ и додава дека за УФП биле спорни и паричните трансакции на „Банана филм“, продукцијата на Манчевски, која парите ги насочувала кон неговата компанија во Њујорк, за што, и за овој случај, биле известени сите надлежни инстанци, меѓу кои и Државната комисија за спречување корупција.

Во меѓувреме,  во февруари, Милчо Манчевски објави дека ја тужел Агенцијата за филм. затоа што, како што тврди, незаконски одбивала да го исполни потпишаниот договор и да ја исплати екипата за филмот „Кајмак“, кој бил завршен пред две и пол години.

The post ФИНАНСИСКАТА ПОЛИЦИЈА ГО „СПАКУВАЛА“ МИЛЧО МАНЧЕВСКИ?! Одделот што го води обвинителот Бубевски ќе реши дали имало финансиски малверзации appeared first on plusinfo.mk.

Што и како работи Одделението за сериозен и сложен криминал во ОЈО Скопје, со кое раководи обвинителот Гаврил Бубевски, поранешен прв соработник на Чарлиевата ангелка Катица Јанева од СЈО?

Оние што внимателно ги следат состојбите во македонското правосудство, се сеќаваат дека на 14 септемрв 2024 година, прес-центарот на Јавното обвинителство соопшти дека во координација со Јавниот обвинител на РСМ и со Основниот јавен обвинител, во скопското Основното јавно обвинителство беше донесено дополнение на Годишниот распоред за работа на јавните обвинители во тоа обвинителство. Со тоа дополнение беше формирано посебно одделение за сериозен и сложен криминал.

Според соопштеното, одделението треба да постапува по предмети за кривични дела за кои е пропишана казна доживотен затвор, сложени предмети со поголем број крибични дела, повеќе обвинети и поголем обем на докази, предмети во кои се спроведуваат финансиски истраги и предмети „од исклучителен интерес на јавноста“.

Патот поплочан со добри намери…

Тогаш беше наведено дека потребата од ваква организациска промена во работата на ОЈО Скопје се наметнала поради забележаните состојби и приливот на предмети во текот на 2024 година, кои опфаќаат сериозни и сложени облици на криминал. Сложеноста на состојбата педантно е измерена преко неколку „индикатори“, меѓу кои се и измените на Кривичниот законик (особено во однос на кривичното дело Злоупотреба на службената положба и овластување од член 353), кои предизвикале промени во однос на стварната надлежност на Основното јавно обвинителство за гонење на организиран криминал и корупција (ОЈО ГОКК), со кое раководи Ислам Абази. Имено, голем дел од предметите во претходна постапка за член 353 став 5 од Кривичниот законик сега се доставуваат на стварна и месна надлежност на ОЈО Скопје.

Формирањето на новото одделение се оправдува и со измената на членот 98-а од истиот закон, за проширена конфискација, што бара зголемен ангажман на јавните обвинители уште во предистражната постапка, заради навремени финансиски истраги.

Исто така, при тековното предметно работење и следење на состојбите со криминалитетот, забележани се облици на сериозен и сложен криминалитет, првенствено кривични дела против животот и телото, против здравјето на луѓето, против службената должност и против јавните финансии на територијата под надлежност на ОЈО Скопје. Главна одлика кај овие кривични дела се големиот број инволвирани лица и правни субјекти, сложеноста на дејствијата кои треба да се испитаат и утврдат и да се детектираат во целина настапените штетни последици, како законско обележје на кривичните дела. Сторителите се почесто користат разни механизми за прикривање и на кривично-правни дејствија, а тоа ја усложнува истражувачката активност и бара дополнителни познавања и посебна посветеност на јавните обвинители за истражување и гонење на овие облици криминал.

Во соопштението тогаш беше нагласено дека новото одделение, со квалитативен и квантитативен капацитет за гонење на сериозен и сложен криминал, треба да им даде соодветен стимул и на правосудната полиција во нејзината откривачка функција, како и на сопствените истражителски капацитети во истражниот центар, преку ефективно насочување на дејствијата и мерките во предистражна постапка.

Но, како што вели поговорката, патот до пеколот често е поплочан со добри намери…

Нова инсталација на поранешниот Јавен обвинител Љубомир Јовевски?

Многумина тогаш забележаа дека Одделениете формирано во рамките на ОЈО Скопје е пандан на Основното јавно обвинителство за гонење на организиран криминал и корупција. Похрабрите го поставија прашањето што значи ова двојство и дали можеби се бара тајна замена за шефот на ОЈО ГОКК Ислам Абази, кој важеше за човек под директна контрола на ДУИ.

Други, пак, се посомневаа дека скриена намера со формирањето на новото Одделение е да се оствари целосна контрола над предметите кои ќе се водат главно против функционери од поранешната власт. Според овие стравувања, идејата беше тие предмети да се кријат по фиоки, да се забошотуваат или да се насочуваат во погрешна насока, за луѓето против кои се водат истраги да имаат доволно време и можности да влијаат врз сведоците, да ги средуваат „папирите“, да влијаат врз обвинителите и на крајот да остваруваат предност во судските постапки.

Доказ дека во целата работа има некаква „квака“ е фактот што ова одделение набрзина се пополни со обвинители со недоволно искуство, а остана нејасно и тоа што точно се подразбира под поимот „сложен и сериозен криминал“. Законот не познава таква терминологија.

Во оваа оделение, на пример, е „прекомандувана“ и Ирина Спасова, ќерката на поранешната обвинителка Лиле Спасова. Без да ги оспоруваме квалитетите на Спасова јуниор, само ќе потсетиме дека во јавнообвинителските кругови незјината мајка Лиле Спасова беше позната како „десна рака“ на поранешниот државен јавен обвинител Љубомир Јовевски, за чија блискост со поранешната извршна власт на чело со Зоран Заев не треба да се трошат многу зборови.

Ирина Спасова за јавен обвинител во ОЈО Скопје е избрана во јули 2023 година. Една година подоцна, таа е распоредена во „елитната единица“ на ова обвинителство. Добрите познавачи велат дека таа има и законска пречка да биде дел од ова одделение, бидејќи во Законот за јавно обвинителство, во членот 62 став 2 се вели: ,,Јавен обвинител во основно јавно обвинителство со јавнообвинителски стаж до три години, може да постапува во основното јавно обвинителство во кое е избран само по предмети за кои е пропишана надлежност за постапување на основните судови со основна надлежност“. Тоа значи дека обвинителите со работен стаж до 3 години можат да постапуваат по предмети каде предвидената казна затвор е максимум до 5 години.

Голема дилема е дали ќерката на поранешната обвинителка Лиле Спасова, поранешен прв заменик на продолжената рака на СДСМ во Јавното обвинителство, Љубомир Јовевски, со неполни 3 години стаж во јавнообвинителското работење, може да постапува во предмети кои се под „надлежност“ на новоформираното одделение во ОЈО Скопје. Како таа ќе постапува по предмети за кривични дела за кои е пропишана казна доживотен затвор, на пример? Како ќе се справува со предмети со поголем број обвинети и голем обем на докази, со предмети во кои се спроведуваат финансиски истраги и слично?

Во новоформираното одделение на ОЈО Скопје има обвинител со стаж од одвај една година и неколку месеци. Човекот можеби не е виновен што влегол на голема врата таму каде што не му е местото, но неговиот избор ја засилува дилемата која е вистинската намера на креаторите на оваа „специјална единици“ во скопското ОЈО. Дали со поставување некомпетентни и недоволно спремни обвинители се сака, всушност, да се компромитират предметите кои ќе се „сработат“?

Дали идејата е така „сработените“ предмети да бидат испраќани во надлежните судови, каде што ќе се соочуваат со бескрајни одолговлекувањата на постапките до застареност, или со неквалитетни осудителни пресуди во прв степен, кои потоа ќе ги укинува Апелација?

За сложени предмети сложени луѓе – како се „прославија“ Бубевски и Спасовска?

Според одребите од постоечките законски решенија, Јавното обвинителство ја следи судската надлежност. Тоа е основно правило во јавнообвинителската работа.

Апелациониот суд Скопје, на 8 април 2024 година, донел Решение (КОКЖ бр.4/24), со кое одлучил дека за кривични дела поврзани со членот 353 од Кривичниот законик е надлежно Специјализираното одделение за судење на кривични дела од областа на организираниот криминал и корупција Скопје. Логично, пандан на ова судско одделение е Основното јавно обвинителство за гонење на организиран криминал и корупција (ОЈО ГОКК). Од каде тогаш потребата да се формира ново, посебно одделение во склоп на ОЈО Скопје, за да се гонат кривични дела поврзани со фамозниот член 353?

Новоформираното одделение треба да постапува и по предметите поврзани со членот 98-а за проширена конфискација. Сите знаеме дека токму обвинителиот Гаврил Бубевски, кој сега е шеф на ова одделение, постапуваше по предметот „Трансмет“ и сите знаеме како неславно заврши конфискацијата во тој предмет. Од каде тогаш надежта дека новото одделение, во кое сега се распоредени само 7 обвинители, од кои најмалку половината не можат да постапуваат по предмети поврзани со „сложен и сериозен криминал“, ќе биде поуспешно од шефот Бубевски?

Самите сме сведоци како неславно заврши и предметот „Лотарија на Македонија“, каде обвинителка беше токму спомнатата ќерка на поранешната јавна обвинителка Лиле Спасовска. Предметот неславно заврши токму во оној „сложен“ период, кога неколку обвинители од ОЈО Скопје има проблеми со дигестивниот тракт, па му се даде доволно време на првоосомничениот Прпарим Бајрами да ја напушти државата.

Патем речено, во ОЈО Скопје, покрај оние 7 „специјалците“ на Бубевски, има 50 други обвинители, голем број од нив со солидно и долгогодишно искуство во својата работа. Сите тие сега се потценети и практично се третирани како второкласни обвинители, кои треба да се занимаваат со „поедноставни“ и „полесни“ предмети. Каде е тука рационалноста?

Одделението на Бубевски е формирано спротивно на Законот?

Има сериозни мислења дека формирање на Одделението за сериозен и сложен криминал во ОЈО Скопје е спротивно и на законот. Во Законот за јавното обвинителство (ЗЈО) е регулирана организацијата на јавните обвинителства и е утврдена нивната стварна и месна надлежност.

Формирањето на новото одделение во ОЈО Скопје е спротивно на член 32 од Законот за јавното обвинителство и на членот 9 од Правилникот за внатрешно работење на јавните обвинителства.
Така, во членот 32 од ЗЈО е предвидена надлежноста за постапување во прв степен на Основното јавно обвинителство за гонење на организиран криминал и корупција (ОЈО ГОКК). Во тој член од Законот таксативно се наведени кривичните дела за кои е надлежно – ако се споредат тие дела со делата за кои сега треба да поставува новоформираното одделение во ОЈО Скопје, ќе се забалежи дека за многу од нив има дупла надлежност.

Новото одделение е спотивно и на членот 9 од Правилникот, во кој е предвидено јавните обвинителства кои имаат поголем обем на истородни предмети, заради подобра ефикасност и специјализација во работењето, да формираат сектори, одделенија и отсеци како внатрешни организациони единици.

Накусо, по формирањето на Специјалното јавно обвинителство (СЈО) на чело со Катица Јанева и по неславниот крај на таа Франкештајн јавнообвинителска институција, еве, сведоци сме на две нејзини реинкарнации. Прво се формираше ОЈО за ГООК, а сега и Одделението за сериозен и сложен криминал во ОЈО Скопје. По цена на конфузија, неефикасност и дуплирање на надлежностите, а во иднина и по цена на процесни пречки со кои би се оспорувале судските постпаки, на тие што ги контролираат обвинителствата сепак им е најважно да го сочуваат своите обвинителски маши, за да можат и понатаму да ја бранат неказнивоста за криминалот.

Затоа, како и во повеќе прилики до сега, авторот на оваа анализа ќе повтори уште еднаш: само итни и радикални промени во раководствата на правосудните институции, а потоа и генерален резибор на судиите и на обвинителите, може да доведе до независно и непристрасно правосудство какво што посакуваме. Оваа е гангрена во напредна фаза, кога животот може да се спаси само ако се исече гангренозното ткиво.

The post КАКО СЕ ФОРМИРАНИ НОВИ ИНСТАЛАТИ НА ПОРАНЕШНАТА ВЛАСТ ВО СКОПСКОТО ОБВИНИТЕЛСТВО Старо-нови маши во втората инкарнација на СЈО на Катица Јанева appeared first on plusinfo.mk.

Постапката што се води против Васил Јованов кој на пешачки премин ја усмрти Фросина Кулакова, е проширена и со постапка за испитување на влијанието и дејствата на неговите родители. Шефот на скопското Обвинителство, Гаврил Бубевски, вели дека се издадени наредби да се испита како му е овозможено на В.Ј. да има средство кое може да се толкува како општо опасно за предизвикување на несреќата, објави Дојче веле.

„Васил очигледно располага со некое возило (…) Проширена е постапката и кон родителите и дадени се соодветни наредби и до Министерството за внатрешни работи, односно до Секторот за внатрешни работи Скопје – да ги испитаат овие околности во однос на тоа кој му давал средства за бензин на возилото, од кога е возилото, кога го употребувал, кога е купено… Значи сето тоа ќе биде предмет на анализа. И евентуално, ако може да се стават тие дејства во насока дека му се става општо опасно средство со кое е извршено кривичното дело, тоа би подлегнало на некаква одговорност“, изјави Бубевски на ТВ Телма.

Според Бубевски, таа постапка може да оди и во друга насока, бидејќи во моментов не се знае кои други факти би можеле да произлезат од испитувањето на околностите како тоа возило дошло во рацете на обвинетиот.

Кој му овозоможувал?

Во овој контекст беа и најбројните реакции во јавноста, со оглед дека В.Ј. и во февруари 2023 година предизвикал сообраќајна незгода, во која едно лице се здобило со полесни повреди. Како што соопшти ОЈО Скопје, тогаш јавниот обвинител спровел постапка и со изјавена согласност на оштетената донел Решение со кое не се презема кривично гонење согласно чл.43 од ЗКП, а осомничениот се согласил да постапи по напатствијата на јавниот обвинител и да уплати паричен износ од 18.000 денари во корист на Буџетот на РСМ.

За среќа, тогашната сообраќајна незгода била без смртен исход, но остана прашањето: дали фактот што и тогаш В.Ј. го управувал возилото без возачка дозвола – требало да биде причина да се постапи за истите прашања – кој му дал возило на располагање, кој му давал средства за бензин и кој на таков начин му овозможил средство како општо опасно за предизвикување на незгодата.

Истите прашања се однесуваа и во однос на неправосилната воспитна мерка за Јованов изречена од судот, по кривичната пријава за член 215 од Кривичниот законик – производство и пуштање во промет наркотични дроги психотропни супстанции и прекурсори. И таму е изоставено прашањето за улогата на родителите  – од занемарување, до тоа кој му давал средства за набавка на дроги и чиј бил станот во кој се одвивале дејства поврзани со нивен промет.

Расветлувањето на причинско-последичната поврзаност на евентуалните дејства на родителите (чинење или нечинење) во контекст на делата извршени од нивниот син, беше во епицентарот на прашањата и реакциите на јавноста, но и на семејството на жртвата.

Но, дали таков каузалитет има и за тезата дека сообраќајната несреќа немала да се случи ако возачот добиел затворска казна, а не воспитна мерка. Според професорот Гордан Калајџиев, таа теза е неточна.

„Тезата дека сообраќајката немала да се случи ако возачот добил затворска казна е неточна и лаичка! Тој сѐ уште не е правосилно осуден и се чека одлука од Апелација. Тоа значи дека и да добиел затвор ништо немало да се промени“, напиша тој на социјалните мрежи.

Нови протести

Со тоа што поминал на црвено светло, возел под дејство на алкохол и со брзина поголема од дозволената, В.Ј. практично си ја испишал правната квалификација за кривичното дело – дека е сторено со умисла.

– Значи стигнуваш на пешачки премин, каде што е црвено, и тука веќе се согласуваш со последицата што може да настане. И тука нема место за друга правна квалификација во однос на тој дел – рече обвинителот Бубевски.

Обвинителството во моментот ги прибира доказите за овој случај, како видеоматеријали, а било контактирано и вешто лице, кое има сопствен лиценциран софтвер кој ќе ја утврди брзината на движење на возилото.

За делото за кое се товари В.Ј. максималната казна е 20 години затвор. Таткото на Фросина, Тодор Кулаков, го соопшти нивното барање.

– Бараме казна доживотен затвор – изјави тој на ТВ Сител.

Најави и нови протести со кои ќе се реагира против неказнивоста.

– Протести ќе има, и уште поголеми ќе бидат. Ќе ги организираме од цела Македонија, ќе се организираме и пред сите институции од сабајле до вечер ќе им стоиме – најави Кулаков.

Веќе е најавен протестен марш кој ќе се одржи в сабота во Неготино, под мотото „Стоп за сообраќајното насилство“. Како што е наведено во известувањето, другарките на Фросина Кулакова организираат бесплатен автобуски превоз од Скопје до Неготино.

The post ПОСТАПКАТА Е ПРОШИРЕНА И ЗА РОДИТЕЛИТЕ НА ВАСИЛ Обвинителството испитува дали има умислена одговорност appeared first on plusinfo.mk.

Може човек да биде дилер на дрога, може да се случи да биде фатен, може да биде и обвинет и осуден, а пак да не одлежи ниту еден ден во затвор.

Каде го има тоа?

Па во Македонија, нормално. Во Основното јавно обвинителство Скопје и во Основниот кривичен суд Скопје.

Плусинфо ги објавува деталите за еден таков скандалозен случај, кој покажува како скопски обвинители и судии здружено работат да им го олеснат животот на криминалците.

На 31 август 2023 година, ден четврток, против Д.Ц. од Скопје, била поднесена кривична пријава за сторено кривично дело по чл. 215 ст.1 од Кривичниот законик. Станува збор за кривичното дело Неовластено производство и пуштање во промет на наркотични дроги, психотропни супстанции и прекурсори. За ова кривично дело е запретена затворска казна од 3 до 10 години.

При претрес кај пријавениот била пронајдена наркотична дрога марихуана, со нето маса од 992 грамови.

Истиот ден, значи на 31 август 2023 година, од страна на Јавниот обвинител, на Записник КО бр. 2708/23, обвинетиот бил сослушан.

Јавен обвинител кој постапува по предметот КО бр. 2708/23 е Спасенка Андоновска, од Основното јавно обвинителство Скопје.

Јавниот обвинител, истиот ден, четврток (што значи дека не било во време на викенд или државен празник), со знаење на јавниот обвинител на ОЈО Скопје Гаврил Бубевски, до Основниот кривичен суд Скопје поднесува предлог за определување на мерката куќен притвор.

Зошто куќен, а не ефективен притвор? Ќе видиме после. Постапувањето во овој случај е внимателно испланирано, во интерес на обвинетиот.

Кривичниот суд Скопје, по поднесениот предлогот од ОЈО Скопје, истот ден, значи на 31 август 2023 година, носи Решение II КПП бр. 678/23, за определување куќен притвор.

Јавниот обвинител Спасенка Андоновска на 14 септември 2023 година поднесува Известување за завршување на истрагата до бранителот на обвинетиот.

На 25 септември 2023 година, од страна на ОЈО Скопје, од јавниот обвинител Спасенка Андоновска, до Основниот кривичен суд Скопје, е поднесен обвинителен акт КО бр. 2708/23, со предлог за продолжување на мерката куќен притвор спрема обвинетиот Д.Ц.

Зошто сега обвинителката не бара ефективен притвор? Бидејќи, овој предмет очигледно се води според испланиран календар.

Кривичниот суд Скопје, на 22 февруари 2024 година, носи Решение КСП бр. 93/24 за продолжување на мерката куќен притвор.

На 29 февруари 2024 година, Основниот кривичен суд Скопје (XV К бр. 2142/24) пак на обвинетиот му го продолжува куќниот притвор до правосилност на пресудата.

Во завршницата на оваа судско-обвинителска патрдија, Основниот кривичен суд Скопје, врз основа на признание на вина, на обвинетиот Д.Ц. му определува казна затвор во траење од 1 година.

Но, обвинетиот, преку неговиот бранител, на 18 јуни 2024 година, поднесува жалба до Апелациониот суд Скопје.

За работата уште повеќе да се заплетка, а неправосилно осудениот дополнително да добие на време, предметот сега му се дава на друг јавен обвиннител за одговор на жалба.

Уште посимптоматично е што Основното јавно обвинителство не вложило жалба за изречената првостепена кривична санкција.

Во финишот, на 27 јуни 2024 година, со одлука КЖ бр. 663/24, Апелациониот суд Скопје ја потврдува првостепената пресуда.

И сега, ајде малку математика…

За речиси 1 килограм марихуана, осудениот Д.Ц. завршил во куќен притвор на 31 август 2023 година. Тој „лежи“ во куќен притвор се до правосилноста на пресудата, односно до 27 јуни 2024 година. Тоа е базмалку една година или попрецизно, нешто помалку од 10 месеци. А куќниот притвор се смета исто како да бил во ефективен притвор, што ќе рече му се смета како да лежел и во затвор.

Со други зборови, обвинители и судии, со здружени сили, успеале Д.Ц. да биде осуден за тргување со 992 грама марихуана, но да не одлежи ниту еден ден ниту во ефективен притвор, а најверојатно ни еден ден во затвор. Тој својата казна веќе си ја „одлежал“ – дома.

Е тоа е таа лажна правда што ја делат нашите обвинители и судови, кога сакаат или кога се „мотивирани“, се разбира.

За 150 ќебапи некој лежи во затвор 3 години (случајот во Велес), а за дилање 1 килограм дрога друг си „лежи“ дома, покрај софра и телевизор, а веројатно патува и на годишен одмор, на викенди и ужива секакви други удопства.

Претседателе на Судскиот совет, Александар Камбовски, се слушаме ли?

ЕДИТ

Поради ненамерна грешка, во текстот бепе погрешно „пресметано“ дека од определувањето на куќниот притвор на 31 август 2023 година до правосилноста на пресудата на 27 јуни 2024 година има „повеќе од една година“. Станува збор за нешто помалку од 10 месеци. Во таа смисла, извршена е исправјка на текстот.

The post НОВ СКАНДАЛ ВО СКОПСКОТО ОБВИНИТЕЛСТВО И ВО КРИВИЧНИОТ СУД Дилер фатен со 992 грама марихуана осуден на 1 година затвор, но целата казна си ја одлежал – дома! appeared first on plusinfo.mk.

Кои се десетте обвинители моќници, кои суспендираниот шеф на скопското Вишо јавно обвинителство Мустафа Харулахи ги смета за мафијашка организација, кои ги штитат моќниците од претходната власт и нивната корупција?

Ова е клучната тема за која говори Хајрулахи во интервјуто со уредникот Бранко Героски, во поткастот на Плусинфо:

Хајрулахи тврди дека државниот јавен обвинител Љупчо Коцевски е политички октроиран од претходната власт и дека е под целосна контрола на групата од десетте обвинители, од кои повеќето се од поранешното Специјално јавно обвинителство, кое заврши неславно.

Во разговорот, Хајрулахи отвора интересни прашања и презентира сознанија за повеќе случаи.

Една од дилемите што ја отвора е дали Прпарим Бајрами, поранешниот директор на Државна лотарија, осомничен за малверзации заедно со Артан Груби, избегал од Македонија баш во периодот кога обвинителот Гаврил Бубевски имал дијареја?

Зошто од 2021 година до бегството на Васко Ковачевски од земјата, упорно бил кочен, запиран и шетан од едно до друго обвинителство активен обвинителски предмет за РЕК Битола против него?

Што е со случајот „Крмзов“, зошто државниот обвинител Коцевски прејудицира дека во тој предмет немало докази?

Како било можно Лиле Стефанова, која повеќе пати постапувала во случајот „Поштенска банка“, во улога на член на комисијата за надзор над работата на Вишото јавно обвинителство, да го инспектира истиот случај?

Како е можно цели три месеци по покренатата истрагата против него од Јавното обвинителство во Штип, за наводен мобинг, Хајрулахи и неговиот бранител да бараат, а да не добијат ниту една информација за истрагата?

И секако, прашања поврзани со клучниот случај „Бонусите на СЈО“, најважната причина поради кој, како што вели Хајрулахи, тој е на удар на државниот обвинител Љупчо Коцевски.

Во интервјуто, освен за Коцевски, за Бубевски и за Стефанова, Хајрулахи зборува и за Фатиме Фетаи и за другите обвинители од „славната десетка“, која тој ја нарекува мафијашка организација во обвинителскиот систем.

The post 🎥 КОИ ДЕСЕТ ОБВИНИТЕЛИ СЕ МАФИЈА ВО ЈАВНОТО ОБВИНИТЕЛСТВО? Мустафа Хајрулахи тврди дека тие го контролираат државниот обвинител Љупчо Коцевски appeared first on plusinfo.mk.