Кандидатот за градоначалник на Град Скопје од ВМРО-ДПМНЕ, Орце Ѓорѓиевски, вечерва во емисијата „На дуел со Иван“ на Канал 5 најави големи инфраструктурни и енергетски проекти кои, како што рече, ќе го подобрат квалитетот на живот на скопјани.

Најважниот проект, според него, е изградбата на две гасни централи, со што ќе се овозможи проширување на топлификационата мрежа и намалување на зависноста од старите системи за греење.

– Проширување на мрежата на топлификација, постапување, две гасни централи ќе има, едната во Охис, во соработка со Владата, а втората на излезот од Ѓорче Петров, за да може да се покријат делови каде што нема градска топлификација и да се бајпасират тие зони – изјави Ѓорѓиевски.

Тој објасни дека за високите зони во Скопје, како што се Црниче, Пржино и делови од Водно, каде што технички не е можно вклучување во мрежата, ќе се понудат субвенции за домаќинствата кои ќе постават топлотни пумпи.

– Во тие зони ќе одиме со конкретни субвенции од страна на Градот Скопје, затоа што мора да обезбедиме енергетска рамнотежа и за граѓаните кои живеат во високи делови – додаде кандидатот на ВМРО-ДПМНЕ.

Освен за енергетиката, Ѓорѓиевски зборуваше и за сообраќајниот метеж во главниот град, потенцирајќи дека решението не е во брзи, туку во плански и координирани мерки.

– Прво треба да се заврши проектот Лимак, за да им дадеме алтернатива на граѓаните, па потоа да воведеме нови мерки. Јас секогаш сум за тоа прво да има решение, па дури потоа рестрикција. Ад хок одлуките само создаваат дополнителен хаос – истакна тој.

Кандидатот на ВМРО-ДПМНЕ најави и воведување на нов транспортен систем со три линии – БРТ (Bus Rapid Transit), дополнет со кракови кон Драчево и Радишани, како и набавка на 80 еколошки автобуси до март наредната година.

– Градот има капацитет и буџет, само треба рационално и домаќински да се управува. Скопје мора да добие модерен, чист и функционален јавен транспорт – заклучи Ѓорѓиевски.

The post „ЌЕ ГО ИСЧИСТАМЕ ВОЗДУХОТ ВО СКОПЈЕ“ Ѓорѓиевски со план за еколошко греење и нов транспорт во главниот град appeared first on plusinfo.mk.

Владата ги прецизира локациите за изградба на гасни централи со турслата компанија „Казанџи груп”, изјави премиерот Христијан Мицкоски.

Тој рече дека по потпишување на Меморандумот со компанијата процесот на преговори продолжува.

-Во игра се неколку локации – во Скопје се неколку локации во оптек, исто така и Куманово е во потег, Тетово, Гостивар, поголемите градски средини. Нормално, тука се исто така и останатите, имајќи предвид дека Битола, веќе ќе се затвори проблемот со затоплување, бидејќи се завршува проектот за топлификација од РЕК Битола- рече Мицкоски.

За инвестирање во ваков тип на проекти премиерот најави дека Владата е веќе во преговори со уште неколку странски инвеститори.

-Ни остануваат Прилеп, Велес, Штип, Струмица, Кавадарци итн. Да, да не ми замерат останатите коишто нема да ги споменам. Но, покрај „Казанџи”, веќе сме во преговори со уште неколку други потенцијални инвеститори за инвестирање во ваков тип на проекти – рече Мицкоски.

The post „КАЗАНЏИ ГРУП“ РАЗГЛЕДУВА ЛОКАЦИИ ВО СКОПЈЕ, ТЕТОВО И ВО КУМАНОВО ЗА ГАСНИ ЦЕНТРАЛИ За централите во другите градови се бараат нови инвеститори appeared first on plusinfo.mk.

Приоритет на Владата предводена од ВМРО-ДПМНЕ е создавање услови за нов циклус на економски раст. Се поттикнува економската слобода на инвеститорите преку креирање на фер услови за сите стопански субјекти, велат од ВМРО-ДПМНЕ во денешното соопштение.

– Се враќа довербата на странските инвеститори за своите инвестиции да ги пласираат во државата, да отворат нови или да ги прошират своите капацитети. За разлика од минатото кога имаше недостаток на доверба кај инвеститорите во владата на СДСМ и ДУИ сега домашните и странските инвеститори имаат партнер во владата на ВМРО-ДПМНЕ – велат оттаму.

Пример за тоа, според партијата, е инвестицијата на турската компанија „Казанџи груп” во гасни централи и на секундарна гасноводна мрежа.

– Се официјализираше меморандум за соработка со компанијата „Казанџи груп” којашто е светски гигант во енергетиката. „Казанџи Холдинг”, е водечка турска компанија со преку 25 години искуство, оперира со инсталиран капацитет од над 3,500 MW во осум држави и е активна во 22 земји на четири континенти.Во Македонија „Казанџи груп” ќе инвестира 1 милијарда евра за изградба на секундарна гасоводна мрежа, топловодна мрежа и когенеративните централи со 500 MW инсталиран капацитет кои произведуваат 4,1 TWh електрична енергија и 720 GWh топлинска енергија на годишно ниво- велат од ВМРО-ДПМНЕ.

Придобивка од оваа инвестиција, велат оттаму, што покрај енергетската стабилност, трајно се решава загадениот воздух.

– Со оваа и останатите инвестиции во енергетиката државата ќе стане енергетски независна – велат од ВМРО-ДПМНЕ.

The post ИНВЕСТИЦИЈА ОД 1 МИЛИЈАРДА ЕВРА НА „КАЗАНЏИ ГРУП“ ВО ГАСНИ ЦЕНТРАЛИ Трајно решение за аерозагадувањето appeared first on plusinfo.mk.

Премиерот Христијан Мицкоски смета дека досега речиси ништо не е направено во борбата за почист воздух и почиста животна средина, но вели дека Владата презема драстични мерки за почиста животна средина.

Во обраќањето на денешната надзорна расправа за аерозагадувањето рече дека проблем не е само загадениот воздух, туку и одлагањето на отпадот, и обезбедувањето питка вода за пиење, а како решенија ги наведе далечинското затоплување на домовите изградбата на когенеративни гасни централи и гасификацијата.

– Што се однесува до Владата, можам да се согласам со најголемиот дел од тезите кои што ги кажавте и можам да се согласам со тоа дека изминатите децении малку или речиси ништо не е направено во делот на борбата за почист воздух. Но, исто така и во делот на средување на животната средина во која што живеат граѓаните, тука пред сѐ мислам на организирано одлагање на отпад. Но, не само тоа, тука мислам на прочистување на отпадните води, тука мислам на обезбедување питка вода за пиење за населението, организирани системи за одведување отпадни води и кога целосно би се организирала државата тогаш можеме да заклучиме дека станува збор за навистина акутен проблем кој што е децении стар и преку ноќ не може да се реши – рече тој.

Во однос на загадениот воздух Мицкоски истакна дека најголем причинител за таквата состојба е системот на затоплување на домаќинствата, јавните и индустриски објекти, а решение е далечинското затоплување.

– Можам да кажам дека ова е еден од главните приоритети и ќе продолжиме во таа насока да се бориме, посебно во делот на обезбедување централизиран систем за затоплување на домовите, јавните објекти и дел од индустриските капацитети. И како тоа ќе го правиме најчесто тоа може да се реши со изведба на таканаречени когенеративни гасни централи кои што можат да служат и за производство на електрична енергија и за производство на топлина. Но, за сето тоа да се случи потребна е и подземна инсталација за да може таа топла вода да дојде до домаќинствата, до јавните објекти и до индустриските објекти – дециден е Мицкоски.

Мицкоски како една од можностите за намалување на загадувањето на воздухот ја посочи и гасификацијата која предвидува да се донесе гас до секој дом и да се користи за затоплување на домовите.

– Како можеме да го направиме тоа? Само со организиран настап. Вториот начин е, ако гледаме парцијално на проблемите, за што не сум голем поборник, е да субвенционираме инсталирање на инвертер клима уреди, или пак субвенционирање на топлински пумпи, кои што би ги вградиле во своите домови, а со кои што тие понатаму би продуцирале затоплување и ладење на домот. Кога станува збор за затоплувањето, јас сум повеќе за далечинско затоплување, можеби ќе треба повеќе време но кога тоа ќе се заврши тоа значи дека сигурно имаме далечинско затоплување и сигурно имаме најевтин ресурс за затоплување на нашите домови – рече тој.

Според премиерот, акутен проблем кој влијае на загадувањето на животната средина и воздухот е одлагањето на отпадот.

– Тие се многу важни и многу значајни, бидејќи во државата би рекол имаме стотици или илјадници диви депонии во кои за жал на несовесен начин се одлага сметот, наместо да имаме еден организиран или неколку организирани системи кои што ќе ги користиме за да го одлагаме тој смет – рече Мицкоски.

Мицкоски посочи дека Владата презема драстични мерки за почиста животна средина.

– Како Влада преземаме драстични мерки во таа насока, посебно тука би сакал да го споменам проектот кој се однесува на финансирање и реалокација на средства од централниот буџет кон општините за финансирање проекти кои што би значеле токму ваков начин на обезбедување поздрава животна средина, меѓу кои и обезбедување вода за пиење преку водоснабдителни системи, посебно од руралните населени места. Ретко каде имаме обезбедена вода за пиење, а речиси и никаде немаме организиран систем за одведување на отпадните води, а да не зборам за нивен третман – рече Мицкоски.

The post ПРИОРИТЕТ Е ЦЕНТРАЛИЗИРАН СИСТЕМ ЗА ЗАТОПЛУВАЊЕ НА ДОМОВИТЕ И НА ОБЈЕКТИТЕ Мицкоски сака да го реши и одлагањето на отпадот appeared first on plusinfo.mk.

Станува збор за изградба на гасни когенеративни централи со капацитет од 500 MW електрична моќност и соодветно производство на топлинска енергија. Во проектот е предвидена и изградба на топловодна мрежа за топлификација како и секундарна мрежа на гас која ќе стигнува до домаќинствата по исклучително поволни услови. Имено, приклучоците за топловодната мрежа и за гасната мрежа ќе бидат бесплатни.

И во минатото и сега премиерот Христијан Мицкоски изјави дека проблемот со загадување на воздухот во градовите ќе се решава со изградба на гасни когенеративни централи, дека тоа е единственото трајно решение и дека сè друго би значело ставање на проблемот под тепих. Премиерот нагласи дека инвестициите во ова поле се гаранција и зацврстување на нашата енергетска независност која во 21 век е всушност и зацврстување на сувереноста на државата

Но да ги погледаме работите подетално и да видиме дали со оваа најавена инвестиција ќе имаме големи придобивки.

1) „ … зацврстување на нашата енергетска независност …“

Познато е дека на Република Македонија (РМ) ѝ недостига електрична енергија во текот на грејната сезона, најчесто во периодите кога нема сонце (ноќе или при облачно време), кога ќе откаже некој блок во РЕК Битола, а купуваме по берзанска цена која е најчесто повисока. Со изградба на новите гасни когенеративни централи од странски инвеститор нема да добиеме енергетска независност бидејќи тој ќе ја продава произведената електрична енергија на отворен пазар. За да се избегне ова, државата треба да гради сопствени електроцентрали, или најмалку со 51% сопственост.

2) „ … приклучоците за топловодната мрежа и за гасната мрежа ќе бидат бесплатни “

Инвеститорот ќе има трошоци за изградба на приклучоци за топловодната и гасната мрежа и тие треба некој да ги плати.

Ако корисниците не плаќаат директно за приклучоците, тогаш инвеститорот ќе ги наплати тие трошоци подоцна при пресметката на потрошената топлинска енергија, односно гас.

3) „ … загадувањето на воздухот во градовите ќе се решава со изградба на гасни когенеративни централи, тоа е единственото трајно решение и сè друго би значело ставање на проблемот под тепих“

Ова тврдење е едно од решенијата. Во стручната јавност е потврдено дека топлинските пумпи овозможуваат ефикасни и чисти решенија за греење, а со тоа и избегнување на аерозагадување на градовите. Ги има со мали, средни и големи капацитети и во разни варијанти (од воздух, вода и земја). Нивната примена е можна веднаш, а државата треба да ја промовира нивната употреба.

Кај најавената странска инвестиција на „Казанчи Холдинг“ како позитивна придобивка е изградба на нови системи за топлификација на градовите со што сигурно би се намалило аерозагадувањето. А има и некои други позитивни аспекти ако се гледа како и на другите странски инвестиции, а тоа се: нови вработувања, плаќање даноци на државата, соработка со домашни фирми итн.

Мој совет, а ова го потврдуваат и многу други експерти, е државата да гради гасни когенеративни централи во нејзина сопственот или најмалку 51%. Само така ќе се постигне енергетска независност на земјата, а ќе има и некои други придобивки.

Во овој контекст ќе се осврнам на гасната когенеративна централа „ТЕ-ТО“ која е изградена и работи во Скопје уште од 2012 година. Случајот е ист или многу сличен со новата најавена инвестиција. И „ТЕ-ТО“ е странска инвестиција при што електричната енергија (моќност 220 MW) ја продава на слободен пазар, а топлинската енергија (моќност 160 MW) ја продава на градската топлификација бидејќи постои взаемен интерес. Во суштина нема некоја голема разлика со новата странска инвестиција?!

Во врска со изградба на секундарни гасоводни мрежи до домаќинствата, моја препорака е тие да не се инсталираат. Природниот гас не е еколошко гориво бидејќи припаѓа во групата на фосилни горива кои се главни причинители на климатските промени. Многу држави воведоа забрана на примена на природниот гас за греење во новите згради. На природниот гас треба да се гледа како на транзиционо гориво што треба да се исфрли од употреба најдоцна до 2050 година.

Со оглед на фактот што моментално се гради магистрална гасоводна мрежа меѓу градовите во Македонија, моја препорака е веднаш на таа мрежа да се приклучат објекти што користат мазут и нафта, и тоа комерцијални и индустриски објекти, како и разни јавни установи.

The post Енергетска независност, ама само со државни гасни централи appeared first on plusinfo.mk.

Тоа значи дека такви термоцентрали ќе се градат во Скопје и во другите градови во РМ коишто се најзагадени, а тоа се Тетово, Битола, Струмица, Кавадарци и др. Не верувам дека во планот се вклучени сите загадени градови. Покрај изградба на когенеративни централи, предвидено е да се градат и градски цевководни мрежи што е исто така комплексна работа.

Едно битно прашање: дали државата е сигурна дека ќе има доволен број граѓани што ќе се приклучат на новите градски цевководни системи? Ако нема, тоа би биле промашени инвестиции. Да наведам дека во Битола имаше градска топлификација, но пред околу 10 години престана да работи поради финансиски загуби (веројатно и мал број на корисници).

Но најнапред би сакал да укажам дека решението за изградба на гасни КГЦ и соодветни градски цевководни мрежи заради избегнување на аерозагадувањето е едностран и застарен приод. За да се согледа ова тврдење ќе направам краток опис на историјата на градските топлификации во светот и содветните технолошките еволуции класирани во 5 генерации.

1-ва генерација, 1880-1930: Температура до 200^оС. Гориво: јаглен. Пареа во цевководната мрежа.

2-ра генерација, 1930-1980: Температура над 100^оС. Јаглен, нафта. Врела вода во цевководната мрежа. Когенеративни централи (КГЦ).

3-та генерација, 1980-2020: Температура под 100^оС. Јаглен, нафта,гас, биомаса. КГЦ. Отпадна топлина од индустрија. Фабрички пред-изолирани цевки. Инсталирање на калориметри.

4-та генерација, 2020-2050: Температура 50-60^оС. Биомаса, цврст отпад, геотермална енергија, отпадна топлина од индустрија. КГЦ (со еколошко гориво). Соларни термални колектори, топлински пумпи. Складирање на топлина. Пред-изолирани цевки. Калориметри. Помали капацитети на потрошувачите.

5-та генерација, во развој. Доминантна улога: обновливи извори на енергија и топлински пумпи.

Како што се гледа од горниов список, во најновите генерации на системи за топлификации нема гасни КГЦ  бидејќи природниот гас не е еколошко гориво, а на него се гледа како транзиционо решение.

При составување на решение за централниот систем за греење претходно треба да се направи т.н.топлински атлас (мапа) на градот (или населбата) во кој треба да бидат означени сите згради и соодветните потреби за греење. Како пример ќе ја наведам Данска која го има тоа направено за сите градови во државата. Исто така, во тој атлас треба да бидат внесени сите потенцијални извори на топлина: отпадна топлина од индустрија, биогас, биомаса, цврст отпад (incineration), отпадна (комунална) вода, геотермални извори, нискотемпературни извори за топлински пумпи, локации за соларни колектори итн.

Главна цел е да нема загадување и емисии на стакленички гасови или тие да бидат минимални. Исто така, треба да се гледа на висината на почетната инвестиција и на експолоатационите трошоци. Во некои случаи пожелно е државата да дава субвенции при вложувања во еколошки решенија.

Со оглед на карактерот на потенцијалните извори на топлина за систем на топлификација, во голем број случаи треба да се изврши зонирање на делови од градот и во секоја зона да се направи соодветен систем (децентрализирано производство на топлина), значи избегнување на еден централен систем за снабдување со топлина на цел град од едно место.

Ако претходниов осврт се примени за Скопје, тогаш во новиот систем за топлификација треба да се разгледа вклучување на потенцијални нови извори на топлина од индустријата. Ова особено се однесува за населбите Железара и Автокоманда кои се наоѓаат во самиот град. Понатаму, да се земе предвид користење на отпадна вода од пречистителни станици која има температура од околу 20^оС и е идеална за топлински пумпи. Вакви станици веќе има во неколку градови во РМ, а во Скопје во тек се подготовки за изградба на голема пречистителна станица. Би можело пречистена вода од околу 20 ^оС да се транспортира до неколку зони во кои ќе бидат инсталирани големи топлински пумпи, а топлински загуби од цевната мрежа речиси ќе нема. Во земјава има подземна вода скоро во сите места, а тоа се потенцијални извори на топлина за геотермални топлински пумпи.

Во овој напис не е вклучен концептот за централно греење и ладење на градовите (district heating and cooling) бидејќи таков систем е тешко применлив за Скопје, а уште помалку за другите градови во РМ. Сепак овој систем е погоден за некои поголеми градови во светот, особено за оние со потопла клима и каде што има голема густина на згради.

Како и во неколку написи објавени порано и сега ќе нагласам дека топлинските пумпи овозможуваат ефикасни и чисти решенија за греење, а со тоа и избегнување на аерозагадување на градовите. Нивната примена е можна веднаш, но државата треба да ја промовира нивната употреба и да дава субвенции во рамките на своите можности.

Погоре се дадени базични размислувања кои се засноваат на современи меѓународни извори на информации. Тие се доста реални, но сепак треба да се направи подетална натамошна анализа од стручен тим. Значи избегнување на аерозагадување со изградба на гасни КГЦ не е единствено и оптимално решение. Од друга страна, во РМ е потребна изградба на две гасни КГЦ најмногу заради обезбедување базна електрична енергија која на земјата ѝ е многу потребна под итно.

The post Гасни централи или обновливи извори – што е подобро? appeared first on plusinfo.mk.

И покрај последното зголемување на цената на природниот гас на светските берзи не се намалува интересот за изградба на гасни централи кај нас, зашто Скопје и земјава имаат голем пазар за топлина и за електрична енергија кој е недоволно искористен, изјави премиерот Христијан Мицкоски, на денешната пес конференција.

Тој информира дека има повеќе компании кои се заинтересирани за изгрдба на комбинирани гасни централи во земјава.

-Кога станува збор за изградба на когенеративни гасни централи кај нас има повеќе компании кои се заинтересирани. На оваа тема разговараме на Влада и со ресорното министерство и кога ќе има нешто попрецизно ќе ја информираме јавноста – рече Мицкоски.

Мицкоски рече дека новата влада не ги протнува еергетските инвстиции како стратешки проекти, туку се  разговара за пазарно ориентирани инвестиции.

-Може да се создаде добар бизнис модел кој е исплатлив за секој инвеститор. И тоа го правиме -рече Мицкоски.

The post ГОЛЕМ ИНТЕРЕС ЗА ИЗГРАДБА НА ГАСНИ ЦЕНТРАЛИ Се разговара за пазарен модел на инвестирање appeared first on plusinfo.mk.

Темата за загадување на воздухот во градовите во Република Македонија (РМ), особено во Скопје, е многу актуелна и така ќе биде уште најмалку неколку години. Последиците од ваквата состојба се алармантни бидејќи аерозагадувањето е причина за релативно голем број смртни случаи и за предизвикување разни болести со трајни последици. Се разбира дека јавноста бара од надлежните органи да го решат овој проблем.

Од Владата на РМ изјавија дека се обврзува на долгорочна и системска стратегија која реално ќе го намали загадувањето, а за тоа е потребно да се промени начинот на затоплување на домовите. Тоа подразбира наместо фосилни повеќе да се користат еколошки горива, меѓу кои и централно затоплување кое треба да биде достапно за сите граѓани. Потребно е да се изградат гасни централи и веќе има заинтересиран инвеститор, а за реализација се потребни неколку години.

Јас би сакал да се осврнам на изјавата во делот „Тоа подразбира наместо фосилни повеќе да се користат еколошки горива …“ при тоа се кажува дека „Потребно е да се изградат гасни централи…“. За да биде јавноста коректно информирана веднаш да кажам дека природниот гас е фосилно гориво, значи не е еколошко гориво. Со неговото согорување се ослободува јаглерод диоксид (СО2) кој не ја загадува локалната средина, но припаѓа на групата стакленички гасови кои се главни причинители на глобалното затоплување, односно климатските промени.

Во врска со информацијата дека Владата веќе има заинтересиран инвеситор (веројатно од странство) би сакал да поставам прашање зошто надворешен инвеститор? Па во сите стратегии за енергетски развој на РМ од 2000 година наваму е предвидено државата да гради когенеративни гасни централи во нејзина сопственост, а јас би рекол дека може и најмалку 51% сопственост. На тој начин ќе може да произведува базна електрична енергија која во овој момент ни е многу драгоцена бидејќи плаќаме од увоз по берзанска цена.

Понатаму, во изјавите се спомнува дека со изградбата на гасни централи ќе се обезбеди „… централно затоплување кое треба да биде достапно за сите граѓани“. Ова е многу комплексно прашање кое зависи од многу фактори. Дали се работи за Скопје или за другите градови? Ако греењето со дрва е поевтино, тешко дека ќе има многу потенцијални корисници на градска топлификација, особено во другите градови. Се наметнува потребата од правење претходна анкета кај граѓаните дали би се приклучиле на градска топлификација при точно одредени услови.

Да претпоставиме дека во некој град е изградена гасна централа и соодветна топловодна мрежа за градска топлификација. Се поставува прашање колку треба да плати корисникот за приклучувањето на мрежата (бетонски канал, цевки со топлински изолација, топлинска подстаница и др.). Ако државата не покрие дел од овие трошоци, за многу корисници приклучувањето веројатно нема да биде прифатливо. Во врска со ова да го наведам случајот со Битола каде што пред неколку децении имаше градска топлификација, но поради нерантабилно работење (меѓу другото и мал број корисници) беше прекината работата и денес веројатно не постои.

Но да одиме понатаму со анализа на плановите на Владата дека ќе се градат гасни централи и соодветна инфраструктура за приклучување на населението на градски топлификациони мрежи за што е потребно време од најмалку три години. Дојдов на идеја да го контактирам ЕСМ Снабдување со топлина https://esm-snabduvanje.mk/ за да се информирам дали може мојот дом да се приклучи на градската топлификација како нов корисник. Ми одговорија во рок од 24 часа со детално објаснување за постапката за приклучување и приложен формулар (барање) што треба првин да се поднесе.

Веднаш се наметнува прашањето: зошто да се чека изградба на нови когенеративни гасни централи за снабдување со топлина ако денес има слободен топлински капацитет за да се приклучи населението уште денес? Колкав е тој капацитет, односно колку корисници би можеле уште денес да се приклучат? Ако се работи за значителен број, државата треба веднаш да спроведе промоција преку јавни медиуми и да го поттикне населението да се приклучи на централниот систем за топлификација со давање субвенции или други бенефиции. Истовремено, треба да се испитаат причините зошто досега немало помасовно приклучување за да се искористи тој слободен капацитет? Од друга страна, колку што ми е мене познато, во Скопје се изградија (и уште се градат) многу нови големи згради кои што немаат вградено централен систем за греење, па според тоа не може ниту да се приклучат на градскиот систем. А сега дополнително да се дупчат ѕидови и бетонски плочи на ново наместени станови е тешко прифатливо.

Бидејќи природниот гас не е еколошко гориво, на него се гледа како транзиционо решение кое постепено ќе се исфрла од употреба најдоцна до 2050 година. Тоа значи дека оние што планираат да градат когенеративни гасни централи ќе треба веднаш да почнат со изградба бидејќи работниот век на овие постројки е околу 25 години. Некои од побогатите држави планираат изградба на нови гасни централи кај кои по работа на извесен број години природниот гас ќе се замени со водород. Инаку, водород може да се користи и денес, но неговата цена е многу висока, а се претпоставува дека цената ќе опаѓа и по извесен период ќе биде конкурентно гориво. Се разбира, ова е претпоставка и постои ризик за исплатливост што за РМ е тешко прифатливо.

На крај да резимирам дека во изјавата на Владата дека аерозагадувањето во градовите ќе го отстранува со изградба на гасни централи и централно градско затоплување достапно за сите граѓани е многу комплексно прашање со многу недефинирани и неизвесни работи. Не знам зошто не се спомнуваат други еколошки алтернативи за затоплување достапни веднаш, а за кои сум пишувал многу пати.

The post Решение за аерозагадувањето со изградба на гасни централи е комплексно прашање appeared first on plusinfo.mk.

„Владата предводена од ВМРО-ДПМНЕ се обврзува на долгорочна и системска стратегија која реално ќе го намали загадувањето. За да се направи тоа, меѓу другото, потребно е да се промени на начинот на затоплување на домовите. Тоа подразбира наместо фосилни повеќе да се користат еколошки горива, меѓу кои и централно затоплување. За да се смени начинот на загревање на домовите, потребно е да се изградат гасни централи. Новиот начин на затоплување на домовите, истовремено, треба да биде достапен за сите граѓани“, соопшти ВМРО-ДПМНЕ.

Владата предводена од ВМРО-ДПМНЕ, додава партијата, интензивно работи на изградба на такви гасни централи.

„Веќе има и заинтересиран инвеститор. Тоа е инвестиција за чија реализација се потребни неколку години, за да профункционира. Гасната централа ќе обезбеди топлинска енергија и значително и драстично ќе ја намали загаденоста. Тоа ќе обезбеди, меѓу другото, и зголемена енергија која ќе се користи во стопанството“, соопшти ВМРО-ДПМНЕ.

Партијата упати критика до ретходната власт дека не презела ништо за да се намали аерозагадувањето во Македонија.

„Жално е што поранешната 7-годишна влада предводена од СДСМ и од ДУИ не водеше сметка за амбиенталниот воздух и не направи ништо за да се намали загадувањето. Барем нешто да направеа, сега, по 7 години, веќе ќе ги чувствувавме првите резултати и Скопје немаше да биде лидер на неславните европските и светски листи по загаден воздух“, додава ВМРО-ДПМНЕ.

The post ЦЕНТРАЛНОТО ГРЕЕЊЕ ЌЕ СЕ ВОВЕДУВА НЕКОЛКУ ГОДИНИ, АМА ПОТОА ВОЗДУХОТ ЌЕ БИДЕ ЧИСТ Владејачката ВМРО-ДПМНЕ се обврзува системски да го реши аерозагадувањето appeared first on plusinfo.mk.

ВМРО-ДПМНЕ во своето последно соопштение го обвини СДСМ за целосна неспособност и незаинтересираност за намалување на загадувањето на воздухот во земјата за време на нивното седумгодишно владеење. Според партијата, тогашната власта повеќе се грижела за, како што наведуваат, „местење матни тендери“, отколку за обезбедување чист амбиентален воздух.

„СДСМ за седум години власт да се грижеа за амбиенталниот воздух и животната средина колку што се грижеа за местење матни тендери од кои профитираа милиони, до сега ќе се видеа првите резултати“, стои во соопштението на ВМРО-ДПМНЕ.

Од партијата објаснуваат дека загадувањето на воздухот е проблем кој не може да се реши со „магично стапче,“ туку бара долгорочни и системски решенија.

„Загадувањето не е проблем кој се решава од денес за утре, туку е предизвик кој бара стратегија на среден и долг рок“, велат од ВМРО-ДПМНЕ, додавајќи дека нивната стратегија е насочена кон долгорочна борба со овој проблем.

Според опозицијата, намалувањето на загадувањето треба да почне со промена на начинот на затоплување на домовите. Тие се залагаат за користење еколошки горива и централно затоплување, како дел од системските решенија.

„Потребно е промена на начинот на затоплување на домовите, што подразбира повеќе користење на еколошки горива, меѓу кои и централно затоплување“, нагласуваат од партијата.

Од ВМРО-ДПМНЕ истакнуваат дека нивната влада веќе работи на проекти за изградба на гасни централи и дека за ова имаат заинтересиран инвеститор.

„Владата предводена од ВМРО-ДПМНЕ интензивно работи на изградба на гасни централи, а веќе има и заинтересиран инвеститор“, потенцираат од партијата.

The post „САМО МАТНИ ТЕНДЕРИ И НИКАКВА ГРИЖА ЗА ВОЗДУХОТ“ Седум години СДСМ ништо не направи, обвинуваат од ВМРО-ДПМНЕ appeared first on plusinfo.mk.