Македонија веќе во првата половина на следната година треба да добие ново гасно поврзување со Грција, а паралелно се планира и дополнителна електроенергетска интерконекција со Бугарија.

Премиерот Христијан Мицкоски очекува јужниот гасен интерконектор да биде пуштен во употреба во првата половина на 2027 година.

– Во меѓувреме се забрза и интензивира изградбата на гасниот интерконектор со нашиот јужен сосед. Очекувам некаде во првата половина на следната година истиот да биде синхронизиран и пуштен во употреба – изјави Мицкоски денеска на презентацијата на новиот извештај на Светската банка за Македонија.

Премиерот најави дека истовремено се работи и на северниот гасен интерконектор, со цел гасното поврзување по Коридорот 10 да продолжи кон Централна Европа.

– За северниот интерконектор очекувам да биде целосно синхронизиран на целата територија кај нас до крајот на 2028 година, со што гасниот терминал во Александруполис можеме да го поврземе со Централна Европа – рече Мицкоски.

Според неговите процени, со зголемување на притисокот капацитетот би можел да достигне од 4,5 до шест милијарди кубни метри гас, додека Македонија моментално троши околу половина милијарда кубни метри.

– Ќе бидеме транзитна земја и ќе можеме од таа услуга да имаме дополнителни приходи – изјави премиерот.

Изградбата на гасниот интерконектор со Грција веќе е во напредна фаза. Министерката за енергетика, рударство и минерални суровини Сања Божиновска соопшти дека се заварени 30 од вкупно 67 километри.

Интерконекторот треба да има почетен капацитет од 1,5 милијарди кубни метри годишно и да обезбеди пристап до нови извори на снабдување и до инфраструктурата за течен природен гас во Грција.

Паралелно со гасното поврзување, Македонија и Бугарија разговараат за дополнително поврзување на своите електропреносни системи. Темата била отворена на средбата на Божиновска со бугарската министерка за енергетика Ива Петрова на министерскиот самит во Белград.

Во рамките на Иницијативата Исток–Запад е предвидена изградба на дополнителна интерконекција меѓу македонскиот и бугарскиот електропреносен систем, како и идни надградби на постојната интерконекција меѓу Македонија и Грција. Целта е зголемување на преносните капацитети и поголема прекугранична размена на електрична енергија.

Енергетските проекти Мицкоски ги поврза и со пошироките планови за економски развој, по презентацијата на новиот извештај на Светската банка „Македонија: Излез од стапицата на среден доход“.

„Во изминатите 27 месеци македонската економија бележи просечен реален раст од над 3,5 проценти, во период кога растот во Европската Унија и еврозоната се движи околу 1 до 1,2 проценти“, објави Мицкоски на Фејсбук.

Според него, посебен потенцијал за идниот раст имаат новите технологии, вештачката интелигенција и податочните центри, за кои, како што наведе, веќе постои интерес од повеќе инвеститори.

СВЕТСКА БАНКА НУДИ ДВЕ СЦЕНАРИЈА ЗА ПОБРЗ РАЗВОЈ Мицкоски најавува дека со дата центри извозот ќе се мери во стотици милиони евра

The post ГАСНО ПОВРЗУВАЊЕ СО ГРЦИЈА СЛЕДНАТА ГОДИНА, СО СРБИЈА ДО 2028 Се планира и електроенергетска врска со Бугарија appeared first on plusinfo.mk.

 Министерката за енергетика, рударство и минерални суровини, Сања Божиновска, учествуваше на панелот “Engineering the Infrastructure of Energy Security” во рамки на „Delphi Economic Forum“, каде заедно со високи владини претставници и лидери од енергетскиот сектор се дискутираше за иднината на енергетската безбедност во регионот.

Во своето обраќање, министерката Божиновска нагласи дека земјата влегува во нова фаза на енергетско позиционирање:

– Денес, ние свесно се позиционираме како регионален енергетски јазол што ги поврзува пазарите, изворите и партнерите.

Таа ја претстави стратегијата базирана на три клучни столба:

– Интерконекторот со Грција, како директен пристап до алтернативни извори на гас и LNG терминали

– Соработката со Србија, која отвора северен коридор и овозможува двонасочен проток

– Партнерството со САД преку ЛНГ иницијативата, со што се зајакнува енергетската независност

Божиновска вели дека енергетската политика без инфраструктура останува само декларација.

– Со изградбата на овие коридори ја амалуваме ранливоста, создаваме поконкурентни цени и се позиционираме како транзитна земја што додава вредност.

Министерката потенцираше дека новата улога на земјата не е само транзитна, туку стабилизирачка за поширокиот регион:

– Не сакаме да бидеме периферен пазар – туку сигурен партнер во европската енергетска мрежа.

Во однос на енергетската транзиција, Божиновска истакна дека пристапот на државата е прагматичен и насочен кон сигурност:

– Нема енергетска транзиција без сигурност – и нема сигурност без диверзификација. Географијата сама по себе не е предност ако не се претвори во политика. Нашата цел е да станеме фактор на стабилност на регионалниот пазар на електрична енергија.

Со зајакнувањето на јужните и северните енергетски коридори, Северна Македонија се позиционира како активен учесник во стабилизирањето на енергетските текови во регионот.

Клучната порака која Божиновска ја испрати од Делфи е јасна:

– Градиме енергетски систем кој е диверзифициран, поврзан и стратешки релевантен – со улога што ќе го дефинира нашето место во Европа во децениите што следат.

The post НЕ ПЕРИФЕРЕН ПАЗАР, ТУКУ СИГУРЕН ПАРТНЕР НА ЕУ Македонија се позиционира како регионален енергетски јазол appeared first on plusinfo.mk.