Контроверзиите по четвртфиналниот дуел меѓу Англија и Норвешка на Светското првенство добија нова димензија откако се огласи поранешниот светски шампион во шах Гари Каспаров.

Англија победи со 2:1 и обезбеди место во полуфиналето. Сепак, најмногу реакции предизвика израмнувачкиот погодок на Џуд Белингам, постигнат длабоко во судиското продолжение од првото полувреме.

Норвежаните тврдат дека непосредно пред акцијата топката остварила контакт со кабел од камера поставена над теренот. Според нив, токму тоа влијаело врз нејзината траекторија.

ФИФА соопшти дека сензорот вграден во топката не регистрирал никаков допир со кабелот. Светската куќа на фудбалот наведе и дека нема докази оти летот на топката бил променет.

Таквото објаснување не ги смири реакциите, а во расправата се вклучи и Каспаров со саркастична објава на платформата Икс.

„ФИФА мора отсега сите кабли за камери да ги прави од хрватска коса“, напиша Каспаров.

Шегата на Каспаров се однесува на претходната контроверзија од осминафиналето меѓу Хрватска и Португалија.

Тогаш на Хрватска ѝ беше поништен погодок поради офсајд во акција во која, според објаснувањето на ФИФА, технологијата регистрирала минимален контакт меѓу топката и косата на Игор Матановиќ.

Поради тој допир беше утврдена нова фаза на игра. Како последица, голот што подоцна го постигна Јошко Гвардиол беше поништен.

The post ПОЗНАТИОТ ШАХИСТ СЕ ПОШЕГУВА СО ФИФА ЗА СПОРНИТЕ ГОЛОВИ Отсега сите кабли да се прават со хрватска коса appeared first on plusinfo.mk.

Руските истражни органи распишаа меѓународна потерница по поранешниот светски шампион во шах Гари Каспаров, под обвинение за јавно оправдување на тероризмот и за два случаи на кршење на правилата за дејствување на странски агенти.

Каспаров, кој веќе е прогласен за странски агент во својата татковина и внесен во официјалниот регистар на терористи, претходно се соочи со одлука на Окружен суд во Москва, кој на 22 декември 2025 година му одреди мерка притвор во траење од два месеци. Оваа мерка треба да стапи во сила од моментот на неговото евентуално екстрадирање, депортирање или фактичко апсење на територијата на Руската Федерација.

Првичното обвинение против него се заснова на член од Кривичниот законик на Русија за јавно оправдување на тероризам преку информатичко-телекомуникациски мрежи, вклучувајќи го и интернетот, за што е предвидена затворска казна од пет до седум години, како и забрана за вршење одредени дејности. Дополнително, тој во отсуство е обвинет и за две кривични дела поврзани со непочитување на обврските наметнати со статусот странски агент, каде што законот предвидува парична казна или затвор до две години.

Руското Министерство за правда го вклучи Каспаров во списокот на странски агенти во мај 2022 година, со образложение дека извршувал политички активности во корист на Украина и американската невладина организација „Хјуман рајтс воч“. Руските судови досега неколку пати го повикуваа Каспаров на административна одговорност за слични прекршоци. Познатиот шахист во моментов живее надвор од границите на Русија.

The post РУСИЈА РАСПИША МЕЃУНАРОДНА ПОТЕРНИЦА ПО ГАРИ КАСПАРОВ Славниот шахист е прогласен за терорист во Москва appeared first on plusinfo.mk.

Двајца познати Руси, шахистот Гари Каспаров и уредникот Дмитриј Муратов денеска изјавија дека рускиот режим е одговорен за смртта на најголемиот критичар на Кремљ Алексеј Навални, додека познатиот писател Борис Акунин рече дека Навални станал бесмртен.

Противникот на Кремљ и поранешен светски шампион во шах Гари Каспаров рече дека Владимир Путин го убил Навални „СПОРО и јавно“.

„Путин не успеа брзо и тајно да го убие Навални со труење, па полека и јавно го уби во затвор. Навални беше убиен затоа што ги разоткри Путин и неговата мафија како измамници и крадци какви што се тие“ – напиша славниот руски шахист.

Рускиот новинар и добитник на Нобеловата награда за мир Дмитриј Муратов ја прогласи смртта на Навални за „убиство“ и нагласи дека затворските услови довеле до тоа.

Муратов беше уредник на независниот медиум Новаја Газета, кој престана да се објавува по руската инвазија на Украина, а тој во Русија беше прогласен за „странски агент“. Муратов ја продаде Нобеловата награда на аукција за 103,5 милиони долари, велејќи дека тие средства ќе ги донира на децата бегалци во Украина.

Писателот Борис Акуњин рече дека Навални „станал бесмртен“ и дека тој сега е уште поопасен за Путин.

„Убиениот Алексеј Навални ќе биде поголема закана за диктаторот од живиот Алексеј Навални. Диктаторот веќе не може ништо против него, Навални стана бесмртен. На крајот, тој ќе го закопа Путин“ – напиша Акуњин, кој е во егзил од 2014 година.

Леонид Волков, еден од најголемите сојузници на Навални, во петокот предупреди да не се верува во државна пропаганда.

„Навални не само што умре. Путин го уби. Тие лажеа, лажат и ќе лажат“ – напиша Волков на Телеграм.

Тимот на Навални соопшти дека не добил потврда за неговата смрт и виделе само општи соопштенија од локалните судски власти, пренесува Ројтерс.

Адвокатот на Навални објави дека тој бил на пат за затворската колонија ИК-3 во Арктичкиот круг, каде што починал неговиот клиент.

The post „ПУТИН ГО УБИ НАВАЛНИ ПОЛЕКА И ЈАВНО“ Двајца познати Руси го обвинија рускиот режим  appeared first on plusinfo.mk.

– Трошоците се огромни, но Украина ја плаќа цената. Зошто луѓето кои живеат во удобноста на своите куќи во Силиконската долина да им кажуваат на Украинците како да ги водат своите работи? Тоа е морален идиотизам и геополитичко слепило – изјави познатиот шахист, коментирајќи го предлогот како би можел да се постигне мировен договор меѓу Русија и Украина. Тој се вклучи во програма на американската телевизија додека зад него стоеше натпис „Слава на Украина“.

Американскиот бизнисмен, очигледно засегнат од овој коментар, му одговори на Русинот на Твитер.

– Иако е точно тоа дека Каспаров е речиси исто толку добар во шах колку и мојот ‘Ајфон’, тој е идиот во секој друг поглед. Немам ни куќа, а камоли ’вила’, лигуш еден – напиша Маск.

Претходно компанијата Спејс-Икс“, која е во сопственост на Илон Маск, соопшти дека ќе продолжи да го финансира „Старлинк“-сателитскиот интернет за Украина.

The post ЕЛОН МАСК И ГАРИ КАСПАРОВ СИ РАЗМЕНИЈА НАВРЕДИ Американскиот милионер се препозна во коментарите на шахистот appeared first on plusinfo.mk.

Терминот „странски агент“, што во превод значи „непријател на народот“ од советската ера, нашироко се користи во Русија против опозиционерите, новинарите и активистите за човекови права обвинети дека спроведуваат политички активности финансирани во странство.

Со назначувањето странски агент, едно лице или ентитет подлежи на голем број ограничувања и процедури под закана од строги казни. Меѓу другото, тие треба да го наведат статусот на сите свои објави.

Во ажурираниот список објавен на веб-страницата на министерството се наведува дека Михаил Ходорковски (58) и Гери Каспаров (59) имаат „извори“ во Украина за да ги финансираат своите активности.

Каспаров долго време му се спротивставува на Владимир Путин и речиси десет години живее во егзил во САД. Ходорковски беше еден од најмоќните руски бизнисмени во текот на 1990-тите пред да му се спротивстави на Кремљ кога Путин дојде на власт во 2000 година. Тој мина десет години во затвор, меѓу 2003 и 2013 година, и оттогаш живее во егзил. Со години ја финансираше опозициската организација Отворена Русија, која се самораспушти во мај 2021 година поради растечките репресии во земјата.

The post КОНФЛИКТОТ ВО УКРАИНА НЕ Е ПАРТИЈА ШАХ Путин го стави Гари Каспаров на списокот „непријатели на Русија“ appeared first on plusinfo.mk.

Да се ​​биде интелигентен не е исто како и да се користи таа интелигенција за да создадете нешто што никој друг не успеал, да се унапреди човештвото, да се биде „попаметен од сите“…

Многу луѓе не го исполнуваат својот потенцијал. Вистина е и дека предрасудите и немањето можности спречуваат некои брилијантни луѓе да го остварат својот целосен потенцијал и да бидат препознаени како генијалци, пишува порталот Big Think.

Сепак, користејќи ги сите критериуми коишто се на располагање, направена е листа на најпаметните луѓе во историјата.

Напомена: Иако тестирањето на коефициентот на интелигенција е развиено дури на почетокот на 20 век, последователните студии го процениле коефициентот на интелигенција на некои значајни луѓе од минатото.

Генерално, секој кој на тестирањето има коефициент на интелигенција над 140 на тестирање се смета за гениј.

Еве ја листата:

24. Вилијам Сидис (1898-1944)

Американското чудо од дете, чиј коефициент на интелигенција, наводно, бил помеѓу 250 и 300, е можеби највисокиот измерен досега. Имал извонредни способности во математиката, се запишал на Харвард на 11-годишна возраст и тврдел дека знае 40 јазици. Професорите предвидувале дека младиот Сидис ќе стане најголемиот математичар на 20 век.

Меѓутоа, како возрасен, Вилијам се „скршил“, се занимавал со услужен бизнис и имал проблеми со законот.

23. Џудит Полгар (1976)

Унгарска шаховска велемајсторка која важи за најдобра шахистка на сите времиња. Го соборила рекордот на светскиот шампион во шах Боби Фишер и стана велемајстор на 15 години. Нејзиниот коефициент на интелигенција е забележан како 170.

22. Филип Емагвали (р. 1954)

Нигерискиот пронаоѓач и научник, наводно со коефициент на интелигенција 190, е прогласен за „најголемиот африкански научник на сите времиња“.

21. Теренс Тао (р. 1975)

Кинезот, роден во Австралија, е поранешно чудо од дете чии резултати на коефициент на интелигенција се движат од 220 до 230. Во моментов е професор по математика на Универзитетот во Калифорнија, Лос Анџелес.

20. Клеопатра (68-30 п.н.е.)

Како последен фараон на птоломејскиот Египет, таа владеела со земјата речиси 30 години. Течно зборувала пет јазици и имала коефициент на интелигенција околу 180. Клеопатра била позната и по врските со Јулиј Цезар и Марк Антониј.

19. Сриниваса Раманујан (1887-1920)

Индиски математичар кој дал голем придонес во областите како што се теоријата на броевите, континуираните дропки и бесконечните низи и покрај тоа што немал никакво формално образование по математика. Неговиот проценет коефициент на интелигенција бил 185.

18. Гари Каспаров (р. 1963)

Ерменски Евреин, многумина го сметаат за најдобриот шахист на сите времиња, чиј коефициент на интелигенција наводно бил 190. Тој беше играч број еден во светот речиси две децении, освојувајќи го првпат светското првенство на само 22 години.

17. Аријабхата (476-55)

Веројатно најраниот индиски математичар и астроном. Ја пресметал вредноста на бројот π (pi) и ја развил употребата на нулата.

16. Волтер (1694 – 1778)

„Волтер“ всушност бил неговиот псевдоним бидејќи бил роден како Франсоа-Мари Ару. Водечка фигура на француското просветителство со коефициент на интелигенција од 190 до 200. Бил духовит писател, историчар и филозоф.

15. Хипатија (350-70 – 415)

Грчки астроном, филозоф и математичар кој живеел во Египет, а подоцна и во Источното Римско Царство. Таа била првата жена математичар за која знаеме, со проценет коефициент на интелигенција од 170-190. Била обвинета за вештерство и брутално убиена од група христијански фанатици.

14. Јохан Гете (1749-1832)

Германски ерудит со забележителни достигнувања во науката, кој се смета за еден од најголемите таленти во западната литература. Неговиот проектиран коефициент на интелигенција бил 213.

13. Авицена наречен Ибн Сина (980 – 1037)

Персиски ерудит кој се смета за еден од најважните мислители на златното доба на исламот. Пишувал за филозофија, медицина, астрономија, алхемија, логика, математика, физика, психологија и други предмети.

Особено е познат по неговата работа на аристотеловата филозофија и неговите медицински книги, кои станале стандард на средновековните универзитети.

12. Галилео Галилеј (1564-1642)

Еден од најважните научни херои на сите времиња. Дека дал значаен придонес во различни области, од астрономија преку физика до математика и филозофија.

Поради посветеноста на хелиоцентризмот, т.е. теоријата дека Земјата се врти околу Сонцето, а не обратно, римската инквизиција го означила како еретик. Неговиот опсег на коефициент на интелигенција: 180-200.

11. Готфрид Вилхелм Лајбниц (1646-1716)

Уште еден германски ерудит – филозоф и математичар. Неговиот филозофски труд е познат по заклучокот дека сме живееле во најдобриот можен универзум кој Бог можел да го создаде.

Проценките на коефициентот на интелигенција на Лајбниц се движат од 182 до 205.

10. Никола Тесла (1856-1943)

Пронаоѓач и футурист, познат по наизменична струја, калемот на Тесла, безжичниот пренос на енергија, „зрак на смртта“, како и по предвидувањето на паметни телефони, дронови и други технологии. Проценет коефициент на интелигенција – 195.

9. Сатиендра Нат Бозе (1894-1974)

Индиски физичар чија брилијантна работа на квантната механика со Алберт Ајнштајн резултираше со статистика на Бозе-Ајнштајн. Хипотетичката елементарна честичка бозон го добила називот по нему.

8. Марија Кири (1867-1934)

Полска физичарка и хемичарка. Таа беше првата жена што ја доби Нобеловата награда и тоа двапати. Ја развила теоријата за радиоактивност (го измислила терминот) и открила два елементи (полониум и радиум). Нејзиниот проценет коефициент на интелигенција бил 180-200.

7. Конфучиј (551 п.н.е. – 479 п.н.е.)

Влијателен кинески филозоф и учител, познат по своите популарни афоризми. Неговите морални и политички учења имале големо влијание ширум источна Азија. Некои понови научници тврдат дека многу од тоа што знаеме за Конфучие е мит.

6. Алберт Ајнштајн (1879-1955)

Веројатно најпознатиот научник кој некогаш живеел. Ајнштајн ја развил општата теорија на релативноста,  добил Нобелова награда за физика во 1921 година и имал револуционерно влијание врз науката.

Неговиот коефициент на интелигенција се проценува на некаде помеѓу 160-190.

5. Вилијам Шекспир (1564-1616)

Тој се смета за најголемиот писател на англиски јазик и еден од најпопуларните и најпочитуваните светски драматурзи.

Со приближен коефициент на интелигенција од 210, Шекспир пишувал класични драми кои се изведуваат и ден – денес, како што се „Ромео и Јулија“, „Хамлет“ и „Магбет“.

3-4. Платон (427 – 347 п.н.е.) и Аристотел (384 – 322 п.н.е.)

Грчки филозофи кои имале големо научно влијание врз средниот век. Платон бил клучна фигура во западната наука, математика и филозофија, пишувајќи преку познати дела како „Република“.

Аристотел бил ученик на Платон, бидејќи тој бил дел од Атинската академија на Платон повеќе од 20 години.

Аристотел имал големо влијание врз развојот на западната филозофија и наука, пишувајќи за физика, биологија, метафизика, логика, театар, естетика и други теми.

Коефициентот на интелигенција на грчките мислители е проектиран на 180-190.

2. Сер Исак Њутн (1642-1726)

Англиски физичар и математичар најпознат по откривањето на гравитацијата. Еден од најславните и највлијателните научници на сите времиња, Њутн имал проценет коефициент на интелигенција од 193.

Неговата книга „Philosophia Naturalis Principia Mathematica“ била основен текст на класичната механика и влијаел на научната мисла повеќе од 300 години.

1. Леонардо да Винчи (1452-1519)

Италијански ренесансен човек кој се истакнал во различни области – од наука, преку сликарство и скулптура, до пронајдок.

Неговата слика „Мона Лиза“ е веројатно најпознатото уметничко дело во светот.

Коефициентот на интелигенција на човек кој бил можеби најталентираната личност некогаш бил околу 200.

The post 24 ВЕЛИКАНИ Ова е листата на најпаметните луѓе на сите времиња! appeared first on plusinfo.mk.