Довербата кај граѓаните се гради со работа и со резултати, а се потврдува со отчетност и со преземање одговорност и токму на тие принципи Движењето ЗНАМ го темели своето дејствување, порача претседателот Максим Димитриевски на настанот посветен на отчетот на избраните и именуваните функционери од редовите на ЗНАМ во Скопје.

Димитриевски истакна дека ЗНАМ не е реприза на политичките модели што граѓаните веќе ги имаат видено и дека секој еден функционер мора да биде свесен дека функцијата е доверена од граѓаните и подлежи на нивна оценка.

– Секој еден функционер од ЗНАМ, почнувајќи од сите вас овде во салата, завршувајќи до мене – секој еден е менлив. Граѓаните даваат и граѓаните земаат власт. Но, притоа ЗНАМ не смее да биде една реприза од она што е веќе видено во Македонија – истакна тој.

Осврнувајќи се на обвинувањата од страна на СДСМ, Димитриевски им упати директна порака, порачувајќи дека Движењето ЗНАМ нема да дозволи обидите за политички пресметки да го променат начинот на кој движењето ја гради довербата со граѓаните.

„Се јавил ЗНАМ 1, па сега и ЗНАМ 2.0, па обвинуваат за наводни афери. Во ЗНАМ афери нема.
Нас нè краси чесност, отчетност, одговорност и транспарентност. И ние сме различни од сите нив останати. Но, притоа ќе им кажам да внимаваат да не им се јави и ЗНАМ 3.0 – рече Димитриевски.

На крајот на денот, додаде тој, еден е ЗНАМ – Движење ЗНАМ за НАША МАКЕДОНИЈА и еден ден ќе биде ЗНАМ политичка партија која ќе преземе одговорност да ја води државата.

Отчетот на избраните и именуваните функционери од редовите на ЗНАМ продолжува во повеќе градови низ Македонија до крајот на годината, како дел од континуираниот процес на претставување на сработеното и на резултатите од работењето на функционерите во изминатите две години.

The post 🎥 СДСМ, ВНИМАВАЈТЕ ДА НЕ ВИ СЕ ПОЈАВИ И ЗНАМ 3.0! Максим Димитриевски ја предупреди Бихаќка appeared first on plusinfo.mk.

Две години работа на функционерите на ЗНАМ ќе бидат ставени на отчет пред граѓаните, прво утре во Скопје, а потоа во 14 градови низ Македонија. Партијата најавува дека нема да остане само на промоција на публикација, туку секој викенд до крајот на годината нејзините функционери ќе излегуваат на директни средби со граѓаните.

Централниот отчет е закажан за 19 септември во 13 часот во киното „Фросина“ во МКЦ, каде што ќе биде претставена публикацијата „Две години работа. Две години резултати. Една љубов – Македонија!“. Во неа, според најавата на ЗНАМ, треба да бидат опфатени одлуките, реформите, започнатите проекти и резултатите на партиските кадри во институциите.

„Отчетот не е за нас. Отчетот е за граѓаните. Пред две години граѓаните ни дадоа доверба и мандат да преземеме одговорност. Денес сметаме дека е наша обврска јасно и отворено да покажеме што е направено“, порачува ЗНАМ.

По скопскиот настан следува значително подолгиот дел од отчетот. Во наредните 14 недели функционерите на ЗНАМ треба да одржат 14 панел-дискусии во исто толку градови, по една секој викенд до крајот на годината.

На средбите ќе се презентира работата на институциите со кои раководат кадри на партијата, но ЗНАМ најавува и директни прашања од публиката, критики и предлози.

„За нас отчетот не значи само да кажеш што си направил. Отчет значи да застанеш пред граѓаните и да одговориш зошто си го направил тоа, што е постигнато и што допрва треба да се направи“, се наведува во соопштението.

Од партијата најавуваат дека нема да ги прескокнуваат ниту неисполнетите планови.

„Во политиката лесно е да се даде ветување. Многу потешко е по две години да застанеш пред граѓаните и да кажеш „Ова го ветивме. Ова го направивме. Ова не успеавме да го направиме. А ова ќе го направиме понатаму“, се вели во написот.

The post ЗНАМ ЌЕ ПОЛАГА ДВЕГОДИШНА СМЕТКА ПРЕД ГРАЃАНИТЕ По отчетот во Скопје функционерите тргнуваат на 14 панели низ Македонија appeared first on plusinfo.mk.