Во посебни соби под клуч се ставени фрижидерот и комората во Институтот за јавно здравје (ИЈЗ) каде се чуваат реагенсите за детекција на голем број болести, изјави денеска за ТВ Сител директорката на ИЈЗ Марија Андоновска, посочувајќи дека ќе се врши постојана контрола, односно евиденција кој влегува во тие соби, кој зема и колку зема од тие реагенси, откако пред нееколку дена овие апарати беа исклучени од струја.

– Барав евиденција кој може да зема од тие реагенси. Тие не воделе таква евиденција. Не можам да тврдам дали се земало и се злоупотребувало, затоа моја работа е сега да се воведе ред и отсега точно ќе се знае кој зема, колку зема и од она што имаме како реагенси каде ќе заврши и за што – истакна директорката на ИЈЗ.

Земањето материјали за докажување на голема кашлица, правење антибиограм или уринокултура ќе биде детално евидентирано.

– Ги ставивме под клуч, постојат луѓе што се посебно овластени со реверс за тие клучеви. Воедно ќе се врши постојана контрола, односно постојана евиденција кој влегува во тие соби, кој зема и колку зема од тие реагенси, онака како што практично требало да биде досега – вели Андоновска.

Пред да ги воведе овие мерки, според Андоновска, фрижидерот што беше исклучен од струја се наоѓал во ходник каде поминувале голем број на лица и никој не бил задолжен за негово чување.

Од ИЈЗ вчера соопштија дека готов е и стручниот извештај кој покажал дека и покрај прекинот на струја, сите реагенси во фрижидерите се функционални.

Настанот се случи во средата, во одделението за бактериологија, кога непосредно по истекот на работното време вработени ја известиле директорката дека исклучени од струја се фрижидер и една комора со реагенси.

The post ФРИЖИДЕРИТЕ ВО ИЈЗ СЕ СТАВЕНИ ПОД КЛУЧ Претходно стоеле во ходник, вели Андоновска appeared first on plusinfo.mk.

Раководството на Институтот за јавно здравје ИЈЗ ќе ги имплементира сите работни процедури во насока на подобрување на безбедноста како и унапредување на квалитетот на услугите кои ги дава ИЈЗ, се вели во соопштението од оваа институција, откако деновиве таму се случи инцидент, односно беше навремено забележано дека некој ги исклучил фрижидерите во кои се чувале реагенсите.

„На ден 31.07.2024 година, беше востановено дека комора и фрижидер на одделението бактериологија во ИЈЗ беа оставени без електрично напојување поради исклучен осигурувач. После реакцијата истите да се стават во употреба, веднаш е направен увид на подлогите за работа, реагенсите и антибиотиците за антибиограм, од комората и фрижидерот кои беа исклучени од електрично напојување. На ден 01.08.2024 беа направени сите неопходни микробиолошки анализи за проверка на квалитетот и исправноста на истите, а за добивање на резултат беа потребни 24 часа. На ден 02.08.2024, прочитани се добиените резултати и согласно истите се установи дека молекуларните тестови за детекција на голема кашлица, како и подлогите за култивација на бактерии, антибиотиците за изготвување на антибиограми и сите реагенси кои се наоѓаа во исклучените фрижидери, се функционални и може да се продолжи со нормално функционирање на одделението за бактериологија. Воедно преземени се дополнителни мерки за унапредување на биолошката сигурност“, се вели во соопштението.

The post СИТЕ РЕАГЕНСИ ВО ИЈЗ СЕ ИСПРАВНИ, НО КОЈ ГИ ИСКЛУЧИЛ ФРИЖИДЕРИТЕ? Направени се микробиолошки анализи, резултатите се добри appeared first on plusinfo.mk.

Кога лекарот отпловил во Шпанија, во 1803 година за да ги вакцинира жителите на шпанските колонии против сипаници, тој немал начин да ја зачува свежината на вакцините, па затоа ги користел децата како „ладилници“, пишува „Гардијан“.

Во генералната архива на Индија во Севилја е отворена изложба на документи за патувањето на Балмис, а ќе бидат изложени до 15 септември, за прв пат ги набројуваат имињата и годините на децата кои ја овозможиле, најверојатно, првата хумана мисија во историјата.

Раководителот на изложбата, Мануел Алварез, ја опиша изложбата како „посвета за сите здравствени работници кои се бореле и се борат против ковид-19“.

Сипаниците убиле милиони луѓе во 18 век пред англискиот лекар Едвард Џенер во 1796 година да открие дека сипаниците кои го напаѓаат добитокот функционираат како вакцина.

Балмис, кој бил лекар во Армијата, а воедно и судски преведувач за медицински прашања, го убедил шпанскиот крал Карлос IV, чија ќерка починала од вариола, да финансира кралска филантропска експедиција во шпанските колонии, за да го вакцинира локалното население против сипаници.

Целта на таа визионерска мисија била да се вакцинира населението, но и да се формираат центри за вакцинација со цел да се контролира секоја идна пандемија, пишува британскиот весник.

Експедицијата започнала со брод од пристаништето Коруна во северозападна Шпанија, со 22 сирачиња. Меѓу нив бил и 9 годишниот син на Изабел Зендал, која го водела локалното сиропиталиште. Зендал се грижела за децата, но работела и како медицинска сестра.

Бидејќи вакцината против сипаници може да издржи најмногу 12 дена без да се расипе, Балмис на секои 10 дена инфицирал по 2 деца со говедскиот сој на сипаници, за потоа од нивните пликови заразувал други две деца и сè така додека не пристигнале на дестинација со свеж и употреблив серум за вакцинирање луѓе.

Децата се разболеле по примањето на ваквиот вирус, но не умреле. Иако од денешна перспектива, ваквиот метод за чување на вакцината изгледа варварски, во тоа време тоа било нормално. Џенер својата вакцина ја тестирал на осумгодишно момче.

Во Мексико останале 22 деца кои биле вакцинирани, додека Балмис регрутирал други 26 деца. Документите покажуваат дека станува збор за момчиња од Мексико на возраст од 4 до 14 години, кои родителите му ги предале на Балмис во замена за пари. Некои се опишани како „Шпанци“, а други пак како „местизоси“ (од мешана крв).

Кога Балмис ја завршил својата експедиција, околу 300.000 луѓе на Канарските острови, Перу, Еквадор, Колумбија, Венецуела, Мексико, Филипини и Кина биле вакцинирани бесплатно.

– Стратегијата која ја користел Балмис, бил евтин, генијален и пионерски начин за вакцината да се однесе во добра состојба до Америка. Таквата стратегија веројатно денес би била критикувана како неетичка, но влијанието и придобивките од експедицијата на Балмис не може да се негираат – вели Алберто Гарсија-Бастеиро, епидемиолог и професор на Универзитетот во Барселона.

Болницата во Мадрид која играше клучна улогаво борбата против ковид-19 го носи името Изабел Зендал, а Владата во Мадрид ја нарече „Операција Балмис“ операцијата за дезинфекција на домовите на старите лица, во која учествуваа 2.500 воени лица.

The post Лекар користел деца како фрижидери за вакцини – генијална идеја од 19 век која спасила илјадници животи appeared first on plusinfo.mk.

Овие преносливи фрижидери, како што соопштија од „Ин Тиме МК“, се дел од стратешките вакцинални планови на многу развиени земји, бидејќи ги исполнуваат највисоките стандарди за транспорт и чување на вакцини во изолирани и рурални средини. Поради малите димензии тие се идеални за клинички испитувања, чување и транспорт на лекови и препарати.

„УПС“ и неговиот локален партнер „Ин Тиме МК“ преку својот единствен ланец за испорака редовно вршат достава на вакцините на „Фајзер“/„Бионтек“ до Институтот за транфузиона медицина во Република Северна Македонија.

Стеван Пановски, директорот на „Ин Тиме МК“, му ја предаде донацијата на директорот на Институтот за трансфузиона медицина, Садула Усеини, во присуство на раководителот д-р Рада Грубовиќ и лаборантот трансфузист Елица Јовановска.

– Здравствените работници веќе втора година се борат секојдневно за спас на човечки животи кои се загрозени поради ковид-19. Крајот на епидемијата почна да се наѕира со почетокот на вакцинацијата. Сега здравствени работници се ангажирани и во обид да вакцинираат што поголем дел од населението. „УПС“ и „Ин Тиме МК“ им се заблагодаруваат на сите вклучени во справувањето и спречувањето на кризата предизвикана од ковид-19 и верувам дека оваа наша донација ќе биде од мала помош за тие обиди – рече Пановски.

Усеини се заблагодари за донацијата и посочи дека за Институтот за трансфузиона медицина, кој е активен во процесот на чување и дистрибуција на вакцини, кои бараат и соодветен транспорт т.е. ладен ланец, оваа донација ќе овозможи соодветен транспорт на вакцините кои се чуваат на гореспоменатиот температурен транспортен опсег. Со ова, како што нагласи, се зголемува сигурноста на нивниот транспорт и се почитуваат стандардите за квалитет.

Мобилните транспортни фрижидери во иднина Институтот за трансфузиона медицина ќе ги користи за транспорт на свежо смрзната плазма. Оваа донација се совпадна со 25-годишното постоење на „Ин Тиме МК“ кој постојано и успешно го опслужува пазарот во доменот на експресни курирски и карго испораки, стои во соопштението

The post Американска компанија ни подари фрижидери за транспорт и чување вакцини, лекови, крвна плазма appeared first on plusinfo.mk.

Покрај своето богатство и репутација дека е ефикасна, Холандија заостанува во рангирањето на Европската унија за вакцинација, попречена од лошото планирање и конзервативната стратегија, со складирани повеќе од 40 проценти од вакцините во земјата, наместо да ги примаат граѓаните.

Холандија започна да ги вакцинира своите граѓани дури на 6 јануари, со што стана последната земја членка на ЕУ што го стори тоа, објави „Ројтерс“.

Погрешно претпостави дека првата вакцина што ќе биде одобрена нема да бара синџир на снабдување со длабоко замрзнување и реагираше полека кога тоа се случи.

Земјата нарача 85 милиони дози од осум производители на лекови и сега има за цел да им ја понуди вакцината на сите возрасни граѓани од 17 милиони жители до крајот на септември.

Но, досега се дадени само 3,6 дози на 100 лица, со што е само пред Летонија, Хрватска и Бугарија во ЕУ, според публикацијата на Оксфорд – „Наш свет во податоците“.

The post Покрај богатството и угледот, земја во срцето на ЕУ заостанува во вакцинацијата! appeared first on plusinfo.mk.

Ова денеска го соопшти опозициската ВМРО-ДПМНЕ додавајќи дека кон средината на декември министерот Филипче изјавил оти фрижидерите ќе стигнат кон средината на јануари, а викендов рече дека два се веќе обезбедени.

– Повторно лаже! Фрижидери уште нема! Филипче рече дека ќе има околу милион и двесте илјади вакцини или 800 илјади дози од „Фајзер“, по отприлика исто толку од „КОВАКС“ механизмот и преку Европската делегација. Ама и нив ги нема. Освен лаги од Филипче нема ништо друго. Нема ни трага ни глас и од долгонајавуваните вакцини. Филипче вели не стигнале доволно колични на вакцини од Фајзер во земјите челенки на ЕУ, затоа немало и за нас. Си кажа и дека нема се уште ни договор со Фајзер или „за кратко време договорот ќе биде склучен“. А според Филипче целосно е подготвен системот во однос на складирање, план на дистрибуција, идентификување на критични групи според приоритет. А како тоа се е подготвено кога нема доволно фрижидери за складирање, а нема ни што да складира – нема вакцини! Филипче ниту го подгототви здравствениот систем да одговори на пандемијата, не набави соодветни лекови, лаже за вакцините, лаже за фрижидерите во кои треба да се скалидираат истите – стои во соопштението.

Оттаму додаваат дека цената за неспособноста и лагите на Филипче е многу голема и ја плаќаат граѓаните со својот живот. Поради тоа бараат одговорност и оставка од Филипче.

The post ВМРО-ДПМНЕ: Филипче повторно лаже! Фрижидери нема! appeared first on plusinfo.mk.

– Целосно е подготвен системот за вакцинација во однос на складирањето, во однос на планот на дистрибуција, идентификувањето на критичните групи според приоритет. Направен е тој план, тоа се три групи – во првата лекарите, медицинските сестри, здравствените работници кои работат со Ковид пациенти, вработените во лабораториите. Понатаму штитениците на домовите за лица со посебни потреби и најстарите лица од возрасните групи над 70 години кои имаат коморбидитети – рече Филипче.

Во втората група, најави, се останатите здравствени работници, вработени во критична инфраструктура – наставниците, вработените во градинките, новинарите, и понатаму според приоритетите кои треба да се заштитат и другите пациенти од другите возрасни групи кои имаат хронични болести. Додаде дека целосно се подготвени и здравствените домови и центрите за јавно здравје ширум државата за да  ги преземат и ги аплицираат вакцините по овој редослед.

Во однос на тоа дали ќе се вакцинираат лицата кои веќе имаат прележано, вели дека засега препораката е да не се вакцинираат.

– Ги следиме порепораките и трендовите, гледаме какви промени се случуваат за некои препораки во согласност со политиката на производителите, но засега нема потреба тие лица кои прележале да бидат вакцинирани – истакна министерот.

Додаде оти претходно ќе треба тие лица да ги проверат своите параметри во однос на тоа дали прележале, но и за тоа, вели, ќе има пристап за критичните групи кои ќе треба да се вакцинираат.

Во врска со воведувањето на т.н. ковид пасоши, Филипче вели дека нема консензус во ЕУ за тоа дали треба или не треба да го има и оти дискусиите по тоа прашање течат како во Европската комисија така и на ниво на Светската здравствена организација.

– Засега нема консензус по тоа прашање, но не значи дека ние не треба да размислуваме и затоа и ние разговаравме, секој еден што ќе биде вакциниран ќе добие соодветен документ од соодветната здравствена институција. Ние ќе бидеме подготвени со таква форма на сертификат – рече Филипче.

Во однос на пристигнувањето на вакцините и дали се доцни, министерот вели дека уште на почетокот кажале дека вакцинацијата ќе почне во февруари или март и оти реагирале и комуницирале навремено по сите три механизми за набавка на вакцини.

Вели дека земјава има услови за пречекување, складирање и дистрибуција на вакцините и оти од СЗО е оценета како подготвена по тоа прашање.

– Имаме и сега фрижидерите стигнаа и тие што беа најавувани како донација се веќе тука, уште три во текот на следните три недели, еден фрижидер може да собере 100.000 дози на вакцини, значи имаме сосема доволно капацитети и во овој момент и Ковакс механизмот најави дека во февруари исто така ќе стигнат тие вакцини за кои што ние направивме уплата и обезбедивме соодветна гаранција – рече тој.

Во овој контекст додаде дека добро одат преговорите и со компанијата „Фајзер“, за што на вечерашната владина седница, како што во меѓувреме соопшти владината прес-служба седница, ги запознал членовите на Владата со најновите информации за набавката на мРНА (мРНК) вакцини од производителот „Фајзер“, односно информирал за продолжувањето на интензивните контакти за набавка и испорака на оваа вакцина, вклучувајќи ги аспектите на постапката за набавка која треба да се спроведе, како и аспекти на регистрација на вакцината во земјава.

– Компанијата „Фајзер“ на глобално ниво има свои политики што бараат и некакво прилагодување и на сите земји, во овој момент се разговара со сите земји во регионот, така што за кратко време ќе го склучиме договорот и резервирани се дозите со таа динамика како што од „Фајзер“ беше најавено тоа се 5.850 дози во февруари, 17.500 во март и април, меѓутоа гледаме дека тоа е едно прашање е што е на некој начин проблематично и за сите земји во Европа, сите земји и од ЕУ добија значајно помалку од тоа што беше планирано и тоа е причината зошто тој трет механизам на солидарност на некој начин доцни заради тоа што тие не можат да си дозволат да одделат сега во оваа фаза одредена количина и затоа најавија дека тоа ќе се случи во следните месеци по месец март – рече Филипче.

Повтори дека преку Ковакс механизмот ќе добиеме 833.000 дози за цела 2021 година, а првата количина дози, чија бројка се уште не е позната, се очекува да пристигне во февруари.

Во врска со најавата на премиерот Зоран Заев за можност за набавка на 200.000 кинески вакцини, Филипче рече дека нашиот комитет за имунизација одлучил да даде приоритет на вакцината која е одобрена од ЕМА и ФДА.

– Тоа се сепак значајни тела на контрола на целокупниот процес на давање на вакцината, на клиничките студии, тоа не значи дека вакцините кои го немаат поминато тој процес не се безбедни но ние приоритет дадовме на токму таа вакцина што ги заокружува сите процеси – рече Филипче

The post Оние кои прележале ковид-19 засега не треба да се вакцинираат, вели Филипче appeared first on plusinfo.mk.