Од 1 јануари 2026 година, Словенија воведе нов модел на работа наречен „80-90-100“, кој носи значајни промени за постарите работници и оние со долго работно искуство. Тоа е дел од поширока реформа на пазарот на трудот, чија цел е да се задржат искусните вработени на работа, со подобра рамнотежа помеѓу работата и приватниот живот.

Новиот систем вклучува три клучни ставки: 80% од работното време – вработениот работи пократко работно време (на пр. четири дена во неделата или шест часа на ден), 90% од платата – добива речиси целосна плата и покрај тоа што работи помалку време и 100% од придонесите – пензиското и здравственото осигурување се плаќаат како да е вработен со полно работно време.

Новина е тоа што државата покрива дел од придонесите за овие работници.

Право да ги користат овие поволности имаат работници постари од 58 години или оние со најмалку 35 години стаж.

Мерката предвидува работниците да потпишат договор со работодавачот, што овозможува прилагодување кон потребите на компаниите и спецификите на работните места. Притоа работниците имаат право да изберат: еден слободен ден во неделата, долг викенд, или пократок работен ден во текот на целата недела.

Оваа флексибилност е особено важна за физички понапорни работни места и сектори со големо оптоварување за вработените.

Словенечката влада наведе дека мерката ја воведува поради  стареење на работната сила и недостиг на квалификувани работници, потребата да се задржи искуството на постарите вработени подолго во компаниите, намалување на боледувањата и отсуството од работата и зголемување на целокупната продуктивност.

Моделот „80-90-100“ беше замислен како компромис помеѓу интересите на работниците, работодавачите и јавните финансии.

Проценките покажуваат дека новата мерка ќе има и буџетски трошок, бидејќи државата покрива дел од разликата во придонесите. Сепак, властите веруваат дека дел од трошоците ќе бидат компензирани преку подолг престој на работниците во работен однос и помал притисок врз пензискиот систем.

The post СЛОВЕНИЈА ВОВЕДЕ НОВ МОДЕЛ НА РАБОТА Што предвидува моделот „80-90-100“? appeared first on plusinfo.mk.