Апликацијата „МојДДВ“, преку која граѓаните остваруваат поврат на дел од платениот ДДВ, веќе петти ден е недостапна за голем број корисници.

При обид за најава се појавува порака дека нема конекција со Управата за јавни приходи, поради што корисниците не можат да ги скенираат фискалните сметки.

Проблемите започнале на 10 јуни, а два дена откако институцијата соопшти дека работи на надминување на пречките, апликацијата сè уште не функционира нормално.

„Ве информираме дека апликацијата ‘МојДДВ’ моментално функционира со повремени забавувања. Нашите тимови активно работат на утврдување на причините и на надминување на предизвиците, со цел што поскоро да се обезбеди нејзино непречено функционирање“, соопшти УЈП.

Проблемот доаѓа токму во последниот месец од кварталот, кога граѓаните најинтензивно ги скенираат сметките за поврат на данок.

Преку мерката „МојДДВ“, граѓаните можат да добијат поврат до 2.100 денари за едно тримесечје.

УЈП претходно потсети дека исплатата на повратот се врши во рок до 60 дена по завршувањето на кварталот, согласно законските одредби.

The post „МОЈ ДДВ“ ЗАГЛАВИ НЕКОЛКУ ДЕНА ПО РЕД Граѓаните чекаат УЈП да го реши проблемот appeared first on plusinfo.mk.

Службата за општи и заеднички работи на Владата (СОЗР) не води редовна евиденција на имотот што го поседува Владата, па се случува дел од продадениот имот уште да се води за државен. На списокот на вработени има голем број привремени ангажирања, дел и без соодветно образование, а набавката на автомобили преку лизинг не е добро планирана и регулирана. Ова се дел од забелешките на Државниот ревизор во извештајот за финансиското работење на СОЗР во 2024 година.

Ревизорите утврдиле и дека голем дел од годината во владиното бифе не се издавани фискални сматки, а дневниот промет не се уплаќал дневно туку на период од повеќе месеци, а во одделни периоди е регистриран значително низок износ. Од извршените услуги во угостителските објекти (ресторани и бифеа со кои управува Службата) во текот на 2024 година остварени се приходи наплатени во готово во износ од 18.146 евра.

„Забележан е низок износ на уплатен дневен пазар поради прекин во одржувањето на фискалната апаратура, а за јуни 2024 година не се издавани фискални сметки, ниту парагон блокови за остварен промет во готово што е спротивно на законот за регистрирање готовинско плаќање“, констатираат ревизорите.

Ревизорите утврдиле и дека по извршениот попис за 2024 година, утврдена е разлика помеѓу сметководствената и фактичката состојба на залихите на прехранбени производи во главниот магацин, во износ од 4.187.000 денари  (околу 68.000 евра) без предложени мерки за решавање на состојбите.

Проблеми има и со ситниот инвентар кој го поседува Владата. Ревизорите утврдиле дека во пописот за 2024 година, утврден е кусок на ситен инвентар во употреба од 4.208.000 денари (околу 68.400 евра) за кој не се преземени мерки за утврдување на одговорност кај вработените лица.

– Причина за тоа е што не може да се потврди дали кусокот произлегува од несоодветно управување на задолжените лица или поради утврдени недоследности на софтверската апликација за евидентирање на промените кај залихите – велат ревизорите.

Забелешка има и за набавката на 45 автомобили на лизинг, практика која СОЗР ја има повеќе години.

„Недостасуваат процедури или упатства со кои ќе се уреди планирањето на потребата од набавка на возила, не се обезбедени информации од институциите дали во меѓувреме се сменила потребата за натамошно обезбедување со возило по пат на лизинг, односно дали за набавката постои реална потреба.

Според ревизорите, нема практика да се врши детална и сеопфатна анализа на економската оправданост од лизингот, односно да се земат предвид сите трошоци во однос на сите користи кои произлегуваат од истиот или Cost-benefit анализа.

Службата за општи и заеднички работи на Владата (СОЗР) не води редовна евиденција на имотот во земјиште во вредност од 19.970.454.000 денари (околу 325 милиони евра) што го поседува Владата, па во нејзината евиденција се нашла парцела која одамна е продадена. Одделни продадени парцели сѐ уште се водат во евиденцијата. Такво е и земјиштето на улица Јордан Мијалков (стари бараки на СОЗР) во износ од 439.734.000 денари кое одамна е продадено и се изградени објекти на приватен правен субјект.

„За земјиштето во Струмица, Кичево, Куманово, Велес, Штип и во Дојран, СОЗР нема податоци и информации дали и за што се користи или за евентуални промени во сопственоста иако истото е со проценета вредност од 130.201.000 денари (2,2 милиони евра)“, се наведува во извештајот.

Постои неизвесност при користење и располагање со земјиштето и околу и под зградите, а исто така останува неуредно прашањето за тековно и инвестициско одржување на објектите кога во нив се сместени повеќе институции.

Ревизорите утврдиле дека 92% од вредноста на опремата што ја поседува СОЗР е отпишана што укажува дека СОЗР располага со стара опрема. Дел од опремата е дадена на институции и општини, но за тоа нема документација.

„Евидентирани се 865 пумпи за вода и 18 генератори од кои мал дел се наоѓаат во СОЗР. Опремата е набавена во 2016 година за справување со поплавите во селото Стајковци за што се потрошени 19.592.000 денари, најголем дел се дадени на Министерството за одбрана – АРМ, дел на општините Шуто Оризари, Аеродром, Илинден, Арачиново без да биде поткрепено со соодветна документација“, се наведува во извештајот.

СОЗР чува и залихи во вредност од 11.587.000 денари (околу 190.000 евра) од кои 95% се застарени и неупотребливи залихи, за кои по спроведениот попис за 2023 и 2024 година иако е даден предлог за нивно расходување истите до моментот на ревизијата сѐ уште не се расходувани.

Забелешки има и за начинот на ангажирање на 21 привремено ангажирани лица во текот на 2024 година за кои се исплатени 3.274.000 денари согласно договори со приватни агенции за вработување.

„Дел од лицата се ангажирани за вршење редовни работни задачи за работни места од категорија Б, односно раководители и помошник-раководители на сектори и одделенија, кои согласно член 24 од Законот за административни службеници се обврзани да поседуваат високо ниво на знаење, компетенции, искуство и сертификати. Дел од нив не го исполнуваат условот образование“, додаваат ревизорите.

Тие утврдиле дека во дел од набавките за обезбедување на објектите се фаворизирани одредени фирми.

„За физичко обезбедување на објектите на државната управа, по која склучен е договор во септември 2021 година утврдивме фаворизирачки елементи во делот на докажување на техничка и професионална способност, односно понудувачот да има најмалку 3 договори од ист тип со предметната набавка склучени и реализирани во последните 3 години, од кои минимум еден договор да е со вредност од најмалку 50.000.000 денари“, се наведува во Извештајот.

Забелешки има и за избор на оператор за сервисирање на моторните возила со кои располага Службата.

„Склучена е Рамковна спогодба со три економски оператори, со вкупна вредност од 10.620.000. Кај два економски оператори, 50% од набавените услуги и резервни делови во 2024 година не се предвидени во техничката спецификација и листа на цени што упатува на несоодветно планирање на потребни делови“, се наведува во извештајот.

The post БИФЕТО ВО ВЛАДАТА НЕРЕДОВНО ИЗДАВАЛО ФИСКАЛНИ СМЕТКИ ВО 2024 ГОДИНА Ревизорите утврдиле дека владината служба била неажурна околу државниот имот appeared first on plusinfo.mk.

Матични гинеколози наплаќале за ПАП-тест, ЕХО, колпоскопија, земање брис и други услуги што ги покрива Фондот за здравствено осигурување, додека некои не издавале ниту фискални сметки, откри директорот на Фондот за здравствено осигурување Сашо Клековски на прес-конференција со директорката на УЈП.

Ова се резултатите од заедничките контроли извршени во ноември од страна на Фондот и Управата за јавни приходи.

Контролата покажала дека речиси половина од проверените 49 установи работеле спротивно на правилата. Неуредни збирно се вкупно 23 ординации, дел поради наплаќање спротивно на законот, дел поради неуредна документација. Од нив неправилности само кон ФЗО имаат 3 установи, само кон УЈП имаат 11, а кон двете институции има кај 9 установи.

Во Скопје, од 16 контролирани установи, 9 се неуредни.

– Кај 35 отсто, односно 16 установи утврдивме неправилности во евидентирањето на готовинскиот промет и веднаш се изречени прекршочни санкции – кажа директорката на УЈП, Елена Петрова и најави уште засилени контроли.

ФЗО има договор со вкупно 149 приватни здравствени ординации за примарна заштита во гинекологија.

The post МАТИЧНИ ГИНЕКОЛОЗИ НАПЛАЌАЛЕ ЗА УСЛУГИ ПОКРИЕНИ ОД ФЗО Некои не издавале ниту фискални сметки appeared first on plusinfo.mk.

Управата за јавни приходи (УЈП) ја информира јавноста дека во следниот период, а во пресрет на новогодишните празници, ќе се спроведуваат засилени и проширени контроли на евидентирањето на готовинскиот промет.

Како што соопштија од УЈП, фокусот ќе биде насочен кон сите угостителски објекти – ресторани, кафе-барови, дискотеки, сендвичари и други субјекти кои работат со готовински плаќања.

Од УЈП информираа дека пред отпочнување со подетални контроли и изрекување санкции, УЈП спроведе 3.500 советодавни посети на продавници и угостителски објекти.

„Во текот на посетите беа утврдени состојби како: фискални апарати кои немаат налепници од овластен сервисер, кај некои се појавуваат оштетени пломби, а кај одреден број обврзници беше детектирано дека адресата на која е регистриран фискалниот апарат не соодветствува со реалната локација на работењето. Утврдено беше и неуплаќање на дневниот промет во банка, како и неводење книга на дневни финансиски извештаи“, се наведува во соопштението.

Паралелно со советодавните посети, Управата за јавни приходи спроведе детални анализи врз основа на податоците од ГПРС системот, теренските контроли и ДДВ-пријавите. Анализите укажуваат на ризични состојби кај дел од обврзниците кои континуирано евидентираат низок или идентичен дневен промет, кај други има отстапки меѓу капацитетот на објектот и пријавениот промет, неусогласеност меѓу прометот евидентиран во фискалните каси и прометот пријавен во ДДВ пријавите и сл.

Покрај советодавните посети, до крајот на ноември годинава Управа за јавни приходи (УЈП) веќе спроведе околу 4.000 контроли за регистрирање на готвинскиот промет, што претставува зголемување за 2,5 пати во однос на истиот период минатата година.

Притоа се изречени над 2.500 глоби, а за 113 даночни обврзници изречени се мерки за забрана за вршење дејност, односно запечатување објект.

„Фактот дека секоја четврта контрола завршува со утврдена неправилност во делот на неиздавање фискални сметки укажува на широка појава на неевидентирање на готовинскиот промет. Во поширок контекст, овој факт укажува и на користење на неевидентираниот промет за плаќања во готовина меѓу фирми и исплата на плати во плик, практики кои се спротивни на законот и претставуваат облици на сивата економија, создаваат нелојална конкуренција и предизвикуваат загуби за буџетот“, велат од УЈП.

Оттаму апелираат да се почитуваат законите.

The post АЛАРМАНТНИ ПОДАТОЦИ ЗА НЕИЗДАВАЊЕ ФИСКАЛНИ СМЕТКИ Во 4.000 контроли даночните инспектори изрекоа 2.500 казни и затворија 113 објекти appeared first on plusinfo.mk.

Управата за јавни приходи (УЈП) утврдила неправилности кај 52 од 154 фирми во кои извршила контрола во периодот од 21 до 27 јули 2025 година.

Управата спровела вкупно 154 теренски контроли за фискализација, насочени кон различни типови деловни субјекти, меѓу кои: ресторани, кафе барови, слаткарници, колонијали, продавници за облека и накит, месарници, цвеќарници, рибници, туристички агенции, хотел и други трговски објекти за продажба на мало.

Контролите биле реализирани низ државата во повеќе градови, меѓу кои и туристичките места каде во летниот период има зголемена фреквенција на туристи. Од 154 контролирани субјекти, кај 34%, односно кај 52 од контролираните се утврдени неправилности согласно Законот за регистрирање на готовински промет.

За утврдените неправилности донесени се 52 прекршочни санкции – глоби, кои ќе бидат одмерени согласно големината на субјектот. Кај пет даночни обврзници, поради повторено неиздавање фискални сметки во рок од две години, изречена е мерка за привремена забрана за вршење дејност. Привремено затворање на објекти е изречено за три субјекти во Охрид, еден во Гостивар и еден во Струга.

Анализата на спроведените контроли и утврдените неправилности по градови е следна:

– Во Скопје извршени се 43 контроли и утврдени се 9 неправилности;

– Во Струга, Охрид и во Ресен извршени се 64 контроли, а утврдени се 10 неправилности во Струга, Охрид – 14, Ресен – 2;

– Во Прилеп извршени се 5 контроли, a утврдени се 3 неправилности;

– Во Струмица и во Дојран извршени се 12 контроли, а утврдени се 2  неправилности во Дојран.

– Во Тетово, Гостивар и во Кичево извршени се 15 контроли, а утврдени се 6 неправилности од кои 4 во Тетово, и по една во Гостивар и Кичево;

– Во Штип, Македонска Каменица и во Берово извршени се 15 контроли и утврдени се по 3  неправилности во Македонска Каменица и во Берово.

– Апелираме до сите даночни обврзници да постапуваат совесно и согласно законските прописи, со цел да придонесат кон зајакнување на даночната усогласеност и унапредување на даночната дисциплина во државата. Управата за јавни приходи врз основа на извршените контроли согласно Закон за регистрирање на готовински плаќања, ќе врши вкрстени проверки со цел да ја провери веродостојноста на искажаните приходи кај даночните обврзници. Издавањето фискални сметки и користењето мобилни фискални апарати не претставува само законска обврска туку и клучен чекор кон правично, транспарентно и одговорно деловно опкружување – велат од Управата и додаваат дека остануваат цврсто посветени на доследна примена на законите и обезбедување еднаков третман за сите даночни обврзници.

The post ЕДНА ТРЕТИНА ОД КОНТРОЛИРАНИТЕ ФИРМИ НЕ ИЗДАВАЛЕ ФИСКАЛНИ СМЕТКИ Изречени 52 казни и привремено затворени 5 објекти appeared first on plusinfo.mk.

Даночните инспектори во текот на јуни и првата половина од јули 2025 година спровеле вкупно 883 теренски контроли кај даночни обврзници на територијата на цела Македонија. Утврдени се неправилности кај 294 субјекти на кои им се определени и законски предвидени казни.

Управата за јавни приходи (УЈП) соопшти дека на 212 трговци им е изречена глоба за неиздавање фискални сметки; 49 глоби се определени за неводење книга за дневни финансиски извештаи; 20 глоби за фискални сметки без пропишани елементи; 8 глоби за нерегистрирана резервна фискална апаратура; 2 глоби за неисправен фискален апарат; 1 глоба за неиздавање парагон-блок; 1 глоба за некористење одобрен фискален апарат и 1 глоба за неводење итна сметководствена книга

Од УЈП велат дека контролите биле насочени кон трговци, угостители низ целата држава и кај субјекти кои вршат дејност во туристички места и локации со зголемена фреквенција на посетители, како што се угостителски објекти, аква – паркови, плажи, базени и објекти за изнајмување спортско-рекреативна опрема.

Управата за јавни приходи потсетува на обврската за почитување на Законот за регистрирање на готовински плаќања (ЗРГП), согласно кој секој остварен промет мора да биде регистриран преку одобрен фискален уред.

– Овие обврски важат за сите субјекти – вклучително и за оние кои не се обврзници за ДДВ, како и за субјектите кои вршат сезонска дејност. Целта на овие мерки е зајакнување на даночната усогласеност, создавање на фер и транспарентно деловно опкружување и обезбедување еднаков третман на сите даночни обврзници- велат од УЈП.

The post ДАНОЧНИТЕ ИНСПЕКТОРИ ПОЧНАА ПРЕСМЕТКА СО ТРГОВЦИТЕ КОИ НЕ ИЗДАВААТ ФИСКАЛНИ СМЕТКИ Први на удар трговците во туристичките центри appeared first on plusinfo.mk.

Изречени се 80 глоби за сторен прекршок неиздавање фискални сметки за извршениот промет на добра, 29 глоби за неводење книга за дневни финансиски извештаи, 16 глоби за незакупени и нерегистрирани резервни фискални апарати, осум глоби за прекршок за некоористење на одобрен фискален систем на опрема за регистрирање на готовинските плаќања, една глоба за неиздавање парагон – блок за извршениот промет на добра, односно на услуга.

Изречени се и две глоби за тоа што не прикажувале промет од македонски производи, две глоби за неистакнување на видно место соопштение со кое го информира купувачот на добро, односно корисникот на услуга за неговата обврска да бара фискална сметка, и две затоа што не ги чувале и одржувале фискалните апарати во исправна состојба.

Кај 13 физички лица, пак, е констатирано вршење на нерегистрирана дејност и за нив се преземени понатамошни постапки. При контролите 31 деловен објект бил затворен/или објектите не биле најдени на наведената адреса/не вршеле дејност во моментот на вршење на контролата.

УЈП апелира до сите даночни обврзници да ја почитуваат и да работат согласно законската регулатива.

– Даночната усогласеност не е само законска обврска, туку и основа за создавање на фер и праведен деловен амбиент кој ги поттикнува растот и развојот на економијата – наведуваат од УЈП.

The post 80 ФИРМИ КАЗНЕТИ ЗА НЕИЗДАВАЊЕ ФИСКАЛНИ СМЕТКИ Ќе се преземат мерки за 17 граѓани кои вршеле нерегистрирана дејност appeared first on plusinfo.mk.

„Сепак, кај 126 даночни обврзници УЈП  утврди неправилности, кои се однесуваат на различни прекршоци и издаде прекршочни платни налози, како и решенија за привремена забрана за вршење на дејност на дел од нив“, информира Управата.

Како што наведува во соопштение, 93 глоби биле изречени за неиздавање фискални сметки за извршен промет на добра и услуги; 10 глоби за неводење или непоседување книга за дневни финансиски извештаи; 16 глоби за непоседување резервен фискален систем на опрема; четири глоби за непоседување одобрен фискален систем на опрема; две лоби за неиздавање парагон блокови и една глоба за неприкажување промет од македонски производи.

УЈП напоменува дека во овие случаи, „целта не е само санкција, туку укажување и поддршка во правилната примена на законот и даночно усогласување на обврзниците“.

„Беа констатирани три  случаи на нерегистрирана дејност. За три даночни обврзници дадена е препорака во однос на неможноста за скенирање фискални сметки од страна на купувачите со цел подобрување на нивното работење“, се наведува во соопштението.

Управата за јавни приходи информира дека ќе продолжи со своите активности и „ќе ги преземе сите неопходни мерки со цел  почитување на законските прописи“. Апелира до сите даночни обврзници да ги почитуваат законските обврски  да го регистрираат готовинското плаќање, да издаваат фискални сметки.

„Даночните обврзници кои имаат потреба од помош во процесот на усогласување со законските обврски, може да се обратат директно во Управата за јавни приходи, каде ќе добијат поддршка и стручни совети за правилно спроведување на сите потребни процедури. Нашата цел е да обезбедиме помош и поддршка  за сите даночни обврзници да можат успешно да ги исполнат своите обврски и да бидат усогласени согласно со законите“, соопшти УЈП. 

The post 96 ГЛОБИ ЗА НЕИЗДАВАЊЕ ФИСКАЛНИ СМЕТКИ Во ноември УЈП направила 907 контроли appeared first on plusinfo.mk.

Од УЈП  потсетуваат дека даночните обврзници кои вршат промет на добра и промет на услуги за кој плаќањето се извршува во готово, должни се да го регистрираат готовинскиот промет преку фискален систем на опрема (фискални каси) и да издаваат фискални сметки.

Обврската за воведување фискален систем на опрема за регистрирање на готовински плаќања, не се однесува на:

– даночните обврзници кои данокот од доход за приходите од вршење на дејност го плаќаат според паушално утврден нето приход, освен таксистите;

– лицата кои не се трговци за прометот на непреработено и сопствено земјоделско производство што го вршат на тезги на пазари, како и надвор од пазарите;

– физичките лица кои издаваат под закуп станбен или деловен простор;

– лицата кои вршат дејност во објекти што се наоѓаат во населени места со број на жители под 300 луѓе и кои се сместени во високопланински и тешко достапни места со исклучок на туристички места;

– лицата кои вршат улична продажба на весници и списанија;

– колпортерска продажба;

– лицата кои вршат улична продажба на лозовите што се употребуваат при приредување на игрите на среќа од типот инстант лотарија, како и на картичките што се употребуваат при приредување на игрите на среќа од типот томбола;

– лицата кои извршуваат континуиран промет, за кои издаваат сметки и за кои се предвидени последователни плаќања (испорака на струја, вода, телефонски услуги, греење и ладење и друго);

– продажба на добра или услуги преку автомати за продажба кои работат со монети и книжни пари.

The post УЈП НАЈАВУВА ЗАСИЛЕНИ КОНТРОЛИ ЗА ФИСКАЛИЗАЦИЈА На удар ќе бидат трговците во туристичките центри appeared first on plusinfo.mk.

Лукаревска при презенитација на дел од мерките предвидени во победничката програма на СДСМ, најави дека износот на повратот за МојДДВ до 2028 година ќе се зголеми на 3.000 денари.

– Оваа мерка, која ја воведовме пред речиси 5 години, е уште еден ефикасен механизам за заштита на домашната економија и на државниот буџет, но и мерка преку која вративме близу 150 милиони евра во семејниот буџет на граѓаните МојДДВ продолжува да се бори со сивата економија заедно со граѓаните. Во 2025 година максималниот износ на поврат ќе го зголемиме на 2.400 денари, во 2027 на 2.700 денари, а на крајот на мандатот во 2028 година тој ќе изнесува 3.000 денари месечно – истакна Ликаревска, додавајќи дека во изминатите пет години, со оваа успешна мерка за заштита на домашната економија и на државниот буџет, кај граѓаните се вратени близу 150 милиони евра.

Лукаревска најави ослободување од царина за интернет нарачки до 180 евра по жител, како и уште една даночна придобивка – 0% данок на личен доход за минимална плата, како и воведување на дакон на луксуз.

– Водилка во нашата даночна политика е социјал-демократската правичност. Ние сакаме да му помогнеме на бизнисот, а не да го оптеретуваме.Но, мора да има баланс ! Затоа, по сериозна анализа и широка дебата, воведуваме данок на луксуз и богатство за да постои солидарност и правичност – нагласи Лукаревска.

Заменик-претседателката на СДСМ Сања Лукаревска, во рамките на обраќањето го најави проектот „Грижа за младите” кој подразбира, по 200 евра во првите 12 месеци за секое прво вработување на лица до 26 години и станови за млади брачни парови до 29 години во чија откупна цена, дел од сумата ќе биде субвенционирана од Владата.

– Свесни дека грижата за децата бара пошироко внимание и акција, воведуваме Европска детска гаранција како гаранција за системски одговор за справување со детската сиромаштија. Воведувањето на Европска детска гаранција си го поставивме како статешка цел. Оваа гаранција го скратува и го забрзува патот до благостостојба на најважните, на децата – рече Лукаревска.

Лукаревска најави намалување на административните обврски за наставниот кадар, целосно воведување на дуално образование како систем во кој практичното работење се комбинира со училишната настава како ефикасен начин за создавање на квалитетни кадри потребни на пазарот на труд и стоп за лажните дипломи, најавувајќи ревизија и евалуација на сите стекнати дипломи.

Презентирав само дел од обемната изборна програма на СДСМ. Убедена сум дека она што го предвидовме за наредниот мандат во комбинација со она што го сработевме во претходниот, во исклучително тешки околности, ќе биде избор на граѓаните на 8 мај, порача заменик претседателката на СДСМ и носителка на листата на СДСМ во третата изборна единица Сања Лукаревска.

The post ЌЕ СКЕНИРАМЕ СМЕТКИ ЗА МАКСИМАЛНИ 3.000 ДЕНАРИ Лукаревска откри дел од програмата на СДСМ appeared first on plusinfo.mk.