Заканите на Иран упатени кон банки и финансиски институции поврзани со САД и Израел на Блискиот Исток доведоа до евакуација на дел од финансискиот кварт во Дубаи, објави Скај њуз.

Според медиумот, неколку банки и финансиски канцеларии ги испразниле своите деловни згради откако вработените добиле предупредувања да се евакуираат. Дел од компаниите им наложиле на вработените привремено да работат од дома, како мерка на претпазливост.

Меѓу институциите што презеле вакви мерки се и големи меѓународни банки како Citigroup и Standard Chartered, кои, според извештаи на светските медиуми, ги евакуирале дел од своите канцеларии во финансискиот центар на Дубаи поради безбедносни ризици.

Слична мерка била преземена и во Катар, каде што филијалите на банката HSBC биле евакуирани и привремено затворени.

Во последните денови се зголемува бројот на вработени во меѓународни компании, особено во финансискиот сектор, кои ја напуштаат земјата заедно со своите семејства, додека некои канцеларии целосно се испразнети.

Можноста финансиските центри да станат цели на напад укажува дека Иран, покрај нафтената инфраструктура, размислува и за удари врз финансискиот сектор со цел да предизвика пошироки економски потреси на меѓународно ниво.

Според Скај њуз, ваквата стратегија би можела да има за цел да изврши притисок врз американскиот претседател Доналд Трамп за намалување на тензиите или продолжување на преговорите.

И покрај евакуациите, засега нема информации за конкретен напад, а повеќето мерки се преземаат превентивно поради зголемен безбедносен ризик во регионот.

The post ЕВАКУИРАН ФИНАНСИСКИОТ КВАРТ НА ДУБАИ Банки ги испразнија канцелариите поради безбедносни ризици appeared first on plusinfo.mk.

Дигитализацијата на финансискиот сектор претставува клучен процес за создавање одржлива платформа за раст, а развојот и имплементацијата на нови дигитални алатки и иновации продолжуваат целосно да го менуваат обликот на финансиските услуги. Мобилните апликации, според учесниците на годинешното издание на „Finance Talks by EOS“, ќе станат главната алатка во секторот, а токму во нивниот развој треба најмногу да се инвестира.

Преку дигитални алатки и примена на вештачка интелигенција, финансиските институции успеале да ги намалат загубите за 20%. Истовремено, приходите се зголемиле за 15% како резултат на воведување персонализирани дигитални услуги.

Извршната директорка на EOS Матрикс за Македонија и Косово, д-р Катерина Бошевска, отвори дискусија за водечките трендови во глобалната финансиска индустрија поврзани со дигиталната трансформација.

– Сведоци сме на клучни промени во финансискиот сектор, поттикнати од дигитализацијата, употребата на вештачката интелигенција и бројните иновации. Овие процеси создаваат многу нови можности, но носат и предизвици чие решавање бара силна соработка меѓу сите чинители, особено на мал пазар како нашиот. Мора да ја спроведуваме дигиталната трансформација со забрзано темпо, но паралелно и да ги оптимизираме трошоците. Токму размената на искуства и соработката ќе бидат основа за идниот дигитален развој кој мора да ги задоволи растечките очекувања на корисниците – истакна Бошевска.

На панелот учествуваа Евангелија Калуптси, генерален директор за трансформација и стратегија и член на Управен одбор на Стопанска банка АД Скопје; Александар Џорџевиќ, член на Управниот одбор на Шпаркасе Банка АД Скопје; Дане Крстевски, директор за информатичка технологија во Народна банка на Македонија; и Владо Митев, главен извршен директор на IWConnect.

Калуптси истакна дека дигитализацијата е трансформативен процес што „ги менува работите од корен“.

– За овој процес да биде успешен, неопходно е луѓето да бидат подготвени, информирани и активно вклучени во неговата имплементација. Без соодветна поддршка од луѓето, дигиталната трансформација не може да се доведе до крај – нагласи таа.

Иако само 6% од граѓаните досега добиле кредит преку онлајн-постапка, Џорџевиќ смета дека дигитализацијата мора сериозно да се интензивира.

– Тоа значи да го промениме целиот концепт што го познаваме денес. Мораме да го смениме начинот на размислување и начинот на делување – додаде тој.

Крстевски објасни дека Народната банка работи на дигитализацијата на две нивоа – внатрешно и надворешно – што претставува сложен процес кој бара соодветни човечки ресурси, технологија и инвестиции, што на мал пазар е значителен предизвик.

– Потребно е да ги поедноставиме процесите и да ги приспособиме на нашите пазарни услови. Мора да инвестираме паметно и да соработуваме со банките и институциите, особено во критични области како електронската сигурност – додаде Крстевски.

Митев потенцираше дека, од технички аспект, дигитализацијата е прецизна и егзактна наука, но најголемиот предизвик останува едукацијата и создавањето дигитална култура кај корисниците.

– Дигитализацијата креира нови стандарди: брзина, сигурност, доверливост и персонализација. Овие категории и понатаму ќе се развиваат според потребите на пазарот – рече тој.

На „Finance Talks by EOS“ беше заклучено дека речиси 80% од финансиските институции веќе користат вештачка интелигенција за заштита и детекција на измами и злоупотреби. Безбедноста на системите останува приоритет, но потребни се континуирани инвестиции во иновации и развој на пазарот.

The post ДИГИТАЛИЗАЦИЈАТА ГИ РЕДЕФИНИРА ФИНАНСИСКИТЕ УСЛУГИ Главните поенти од „Finance Talks by EOS“ appeared first on plusinfo.mk.

Комитетот, во соопштението, нагласува дека финансиската стабилност е успешно одржана и покрај сложените услови на работење на финансискиот систем.Резултатите од стрес-тестирањето и посебните оценки и симулации за изложеноста на  ризикот од промена на каматните стапки содржани во Извештајот укажуваат дека домашниот финансиски систем има капацитет за справување со шокови од позначаен интензитет.

„Вкупните средства на финансискиот систем продолжија да растат и во 2022 година но со побавни стапки на раст. Вкупниот кредитен раст изнесуваше 9,4%, со што се обезбеди солидна кредитна поддршка и на корпоративниот сектор која забележа раст од 11,5% и на населението со раст за 7.3%. Овие стапки на кредитен раст се значајно повисоки од ЕУ каде тие изнесуваа 4,8%, 6,4% и 3,8% соодветно“, се наведува во соопштението.

Комитетот оценува дека остварувањата на корпоративниот сектор во 2022 година биле солидни, пришто речиси сите дејности ги зголемиле приходите од работењето и ја подобрија профитабилноста.

„Профитабилноста на корпоративниот сектор порасна за 19,8%, по раст од 32,1% во 2021 година“, се додава во соопштението.

Показателите за конкурентноста исто така укажуваат на подобрена продуктивност на корпоративниот сектор која расте и тоа забрзано втора година по ред.

Сепак, Комитетот оценува дека неизвесното макроекономско окружување може да биде извор на ранливости за финансискиот сектор.

„Оттука, и натаму приоритетно е постојаното јакнење на отпорноста на банкарскиот и финансискиот сектор во целина, а во таа насока е и макропрудентниот мандат на финансиските регулатори обезбеден со новиот Закон за финансиска стабилност и макропрудентните мерки кои може да се преземат“, се вели во соопштението.

The post МОЖЕ ДА ИМ ВЕРУВАТЕ НА БАНКИТЕ Народна банка оцени дека финансискиот сектор е отпорен на шокови appeared first on plusinfo.mk.

Како што соопштија од Народна банка, оценето е дека заштитните механизми во нашиот финансиски систем се соодветни и тој ќе продолжи да функционира непречено и да овозможи поддршка на економијата.

„Руски или украински капитал не е присутен во сопственичката структура на нашите банки, така што од тој аспект нема изложеност врз стабилноста на домашниот банкарски систем“, се вели во соопштението.

Советот констатира дека девизните резерви се во сигурната зона и обезбедуваат доволна девизна ликвидност на домашната економија и стабилност на домашната валута.

На седницата беше констатирано дека треба да се продолжи со внимателно следење на ситуацијата, која се менува од час во час.

Советот разгледа и други точки поврзани со редовното работење на Народната банка. Советот ги разгледа и ги усвои Финансиските извештаи на Народната банка и Годишната сметка за 2021 година, коишто беа предмет на ревизија на независно друштво за ревизија.

„Според мислењето на независниот ревизор, Финансиските извештаи ја прикажуваат објективно финансиската состојба на Народната банка, како и резултатите од работењето и паричните текови, во согласност со меѓународните стандарди за финансиско известување“, наведуваат од Централната банка.

The post БАНКИТЕ СЕ СИГУРНИ, НЕМААТ РУСКИ И УКРАИНСКИ КАПИТАЛ Денарот е стабилен, а девизните резерви се во сигурна зона appeared first on plusinfo.mk.