Царинската управа минатата година поднела вкупно 213 кривични пријави против 443 физички и 160 правни лица до Основното Јавно Обвинителство и до Обвинителството за гонење организиран криминал и корупција. Во 196 случаи е утврдена штета врз Буџетот од 102 милиони денари или околу 1,6 милиони евра.

Бројот на поднесени кривични пријави поднесен од Одделението за истраги при Секторот за контрола и истраги е зголемен за повеќе од двојно споредбено со 2024 година, кога била поднесена 91 кривична пријава, при што најголем дел од поднесените кривични пријави, дури 80 проценти, биле евидентирани од октомври.

За неовластено производство и пуштање во промет наркотични дроги се спроведени истраги и поднесени се 7 кривични пријави, за криумчарење 40 пријави, за царинска измама 39, за фалсификување исправа 85, а за недозволено тргување со оружје поднесени се седум кривични пријави. Поднесени се и кривични пријави за злоупотреба на службена положба и овластување, вршење меѓународен јавен превоз без поседување лиценца, како и за избегнување плаќање акциза. Дури 103 од поднесените кривични пријави се поднесени за сторени кривични дела со 232 возила.

Во текот на предистражните дејствија од страна на службата против економски криминал при проверка на докази за потекло, до странски служби испратени се 450 барања, при што во 223 случаи е утврдено дека доказите за потекло се невалидни.

Со странски служби извршена е и 71 проверка на увозни фактури. Службата за финансиски истраги отворила 15 финансиски истраги против 19 физички и девет правни лица, при што целта е детекција и конфискација на нелегално стекнат имот, а со тоа и дестабилизација на криминалните групи.

The post ЦАРИНАТА ЛАНИ ПОДНЕЛА 213 КРИВИЧНИ ПРИЈАВИ Буџетот е оштетен за 1,6 милиони евра appeared first on plusinfo.mk.

Во моментов се водат над 50 предмети за висока корупција, кои претходно биле затскривани, одложувани или целосно игнорирани од институциите – истакна премиерот Христијан Мицкоски во обраќање на денешната конститутивна седница на Националниот совет за финансиски истраги и конфискација на имот. Мицкоски порача дека државата повеќе нема да толерира случаи што со години биле чувани „во фиока“.

Националниот совет за финансиски истраги и конфискација на имот се конституира како централен механизам во најавената засилена борба против криминалот и корупцијата. Според Мицкоски, станува збор за тело кое ќе овозможи системски пристап и реални резултати, а не формално исполнување на законски обврски.

– Оваа Влада ја започна борбата против криминалот и корупцијата не со декларации, туку со дела. Повеќе од 50 предмети за висока корупција се во постапка, случаи кои со години биле затскриени, одложувани или игнорирани – рече Мицкоски.

Тој најави дека ова не е крај на процесот, туку почеток на отворање нови случаи и спроведување темелни истраги, со цел враќање на довербата на граѓаните во државата и институциите. Премиерот потенцираше дека нема да има селективност во постапувањето и дека никој нема да биде заштитен.

– Нема селективна правда. Нема заштитени. Нема недопирливи – нагласи Мицкоски.

Во тој контекст, тој посочи дека клучен предуслов за успешна борба против корупцијата е јакнење на судството и обвинителството – институционално, кадровски и функционално. Според него, само независни и професионални правосудни институции можат да обезбедат ефикасна и правична правда.

Посебен акцент беше ставен на финансиските истраги и конфискацијата на незаконски стекнатиот имот, како завршна и најважна фаза во борбата против криминалот. Мицкоски порача дека кривичната постапка не е доволна доколку криминалот остане исплатлив.

– Борбата мора да заврши со одземање на незаконски стекнатиот имот. Затоа што криминалот не смее да се исплати. Украденото мора да се врати кај народот – рече тој.

Стратегијата за периодот 2025–2028 година, како што беше посочено, предвидува три приоритети: пронаоѓање и следење на незаконски стекнатиот имот и во земјата и во странство, негово брзо и законито привремено обезбедување и конфискација, како и ефикасно управување со одземениот имот, вклучително и негова повторна употреба за социјални цели.

Националниот совет, кој ќе функционира под водство на потпретседателот на Владата задолжен за добро владеење, ќе има координативна и надзорна улога во целиот процес. Од неговите членови, Мицкоски побара професионалност, интегритет и конкретни резултати.

– Денеска поставуваме темели на систем во кој правдата не е декларација, туку пракса, а борбата против корупцијата не е политички слоган, туку државна политика – истакна премиерот.
На крајот од обраќањето, Мицкоски порача дека оваа борба е суштинска за правната држава, довербата во институциите и достоинството на граѓаните, нагласувајќи дека Владата нема да отстапи од тој курс.

The post 🎥 МИЦКОСКИ НАЈАВИ КРАЈ НА ЧУВАЊЕТО ИСТРАГИ ВО ФИОКА, АКТИВНИ СЕ 50 ПРЕДМЕТИ НА ВИСОКА КОРУПЦИЈА Се формираше Национален совет за финансиски истраги и конфискација на имот appeared first on plusinfo.mk.

Владата на Република Северна Македонија усвои Одлука за формирање на Национален совет за финансиски истраги и конфискација на имот, како дополнителна алка на врвот на координациската структура. Со советот ќе раководи заменик претседателот на Владата за политики за добро владеење, Арбен Фетаи.

Членови на новоформираниот Совет ќе бидат министерот за внатрешни работи, министерот за правда, министерот за финансии, јавниот обвинител, претседателот на Врховниот суд, раководителот на Канцеларијата за поврат на имот, директорот на Бирото за јавна безбедност, директорот на Царината, директорот на Управата за финансиска полиција, директорот на Агенцијата за управување со одземен и конфискуван имот, како и претседателот на Националната комисија за финансиски истраги и конфискација на имот.

Кабинетот на вицепремиерот Фетаи ќе продолжи да обезбедува политичка, административна и техничка поддршка за работата на Комисијата.

Владата нагласува дека процесите и стратешките одлуки кои континуирано се реализираат ја покажуваат посветеноста на институциите во градењето капацитети за спроведување финансиски истраги, конфискација и поврат на имот, како и ефикасно управување со конфискуваниот имот.

„Државата се гради секој ден, а граѓаните мора да бидат сведоци на конфискација на нелегално стекнатата имотна корист и да имаат можност истата да ја користат преку нејзина социјална пренамена“, се наведува во соопштението од Кабинетот на Фетаи.

The post ВЛАДАТА СО НОВ АТАК ПРОТИВ КРИМИНАЛОТ Фетаи го предводи националниот совет за финансиски истраги appeared first on plusinfo.mk.