Четириесет и двегодишна жена од Штип пријавила дека била измамена за 4.713 евра, откако лице кое се претставило како директор на финансиско друштво ја убедило да уплаќа пари на различни сметки во странство.

Случајот жената го пријавила во СВР Штип, а според пријавеното, таа контактирала со лицето преку мобилна апликација со цел да ѝ помогне при подигнување кредит во име на нејзин пријател.

Како што соопшти СВР Штип, лицето со прикажување лажни факти побарало од жената по различни основи да врши уплати на различни сметки во странство.

Откако ги реализирала уплатите, за што бил запознаен и нејзиниот пријател, жената дознала дека била измамена.

„Како што е пријавено, со прикажување на лажни факти, од неа барал по разни основи да врши уплата на различни сметки во странство, а откако ги реализирала уплатите, за што бил запознаен пријателот, дознала дека била измамена. Се преземаат мерки за расчистување на случајот“, соопшти СВР Штип.

Случајот е уште еден пример за измами во кои сторителите се претставуваат како лица со одредена професија или функција за да стекнат доверба кај жртвите и да ги убедат да им дадат или уплатат пари.

Претходно, во Штип биле регистрирани и измами во кои сторители се претставувале како лекари и од граѓани барале пари наводно за медицински интервенции на нивни блиски.

Во еден од таквите случаи, 77-годишна жена од Штип пријавила дека била измамена за 700.000 денари, откако лице што ѝ се јавило телефонски се претставило како лекар и ја известило дека нејзината сестра е во болница и дека ѝ е потребна операција.

МВР во повеќе наврати апелира граѓаните да бидат особено внимателни кога непознати лица од нив бараат пари, особено кога тоа го прават со измислени приказни, лажни идентитети или под изговор дека средствата се потребни за кредит, медицинска интервенција или друга итна потреба.

Од полицијата апелираат сомнителните случаи веднаш да се пријават, а граѓаните да не уплаќаат пари на непознати сметки без претходно да ја проверат информацијата.

The post СЕ ПРЕТСТАВИЛ КАКО ДИРЕКТОР И ИЗМАМИЛ ШТИПЈАНКА ЗА 4.713 ЕВРА Жртвата му уплаќала пари на сметки во странство appeared first on plusinfo.mk.

НЛБ Банка предупредува на лажни СМС пораки во кои се злоупотребуваат името и брендот на банката, а од примателите се бара да внесат или потврдат лични податоци преку линк.

Од банката апелираат граѓаните да не отвораат непознати линкови и да не внесуваат лични, картични или податоци за електронско и мобилно банкарство.

„НЛБ никогаш нема да побара од вас лозинка, ПИН или други доверливи податоци преку СМС-линк“, предупредуваат од банката.

Од НЛБ советуваат, пред споделување какви било податоци, граѓаните внимателно да ја проверат пораката и нејзиниот извор, со цел да се заштитат од злоупотреба на личните податоци и финансиски средства.

The post НЛБ ПРЕДУПРЕДУВА НА ЛАЖНИ СМС ПОРАКИ Некој ги злоупотребува името и брендот на банката appeared first on plusinfo.mk.

Триесет и двегодишен жител на Битола пријавил дека бил измамен за 340.000 денари од лице кое се претставило како директор на компанија за тргување со криптовалути.

Според неговата пријава во полиција, комуникацијата започнала преку електронска пошта во периодот од јануари до средината на февруари годинава. Измамникот постепено ја стекнал неговата доверба и го убедил да му овозможи пристап до компјутерот, по што во неколку наврати му биле префрлени пари.

Случајот бил пријавен во СВР Битола, од каде информираат дека се преземаат мерки за расчистување на измамата и откривање на сторителот.

Полицијата апелира граѓаните да бидат внимателни при онлајн комуникација со непознати лица, особено кога станува збор за финансиски инвестиции и пристап до лични уреди.

The post КРИПТО ИЗМАМА ВО БИТОЛА Mаж останал без 340.000 денари appeared first on plusinfo.mk.

Кавадрачанка била измамена со телефонски повик од лице кое се претставило како лекар. Верувајќи дека нејзината ќерка е тешко повредена и дека мора итно да плати операција, таа му предала 300.000 денари на непознат маж пред нејзиниот дом.

Подоцна сфатила дека станува збор за измама.

„На 05.03.2026 во 21:00 часот во ОВР Кавадарци, 81-годишна жителка на Кавадарци пријавила измама“, се вели во полицискиот билтен.

The post СТАРА ИЗМАМА, НОВА ЖРТВА Лажен лекар собрал 300.000 денари од кавадарчанка appeared first on plusinfo.mk.

Триесет и двегодишен скопјанец останал без 800 евра откако бил измамен од непознато лице кое му продало лажен златен накит.

Според пријавата во полиција, измамата се случила на 18 февруари околу 15:30 часот. Додека управувал автомобил, оштетениот застанал на знак од непознат маж кој му побарал пари за гориво за да стигне до одредена дестинација.

Двајцата се договориле непознатиот да му продаде личен златен накит, по што скопјанецот му исплатил 800 евра. Сепак, кога подоцна отишол во златарница, дознал дека накитот воопшто не е златен.

Од полицијата велат дека се преземаат мерки за пронаоѓање на сторителот и целосно расчистување на случајот.

The post ЛАЖНО ЗЛАТО „ОЛЕСНИ“ СКОПЈАНЕЦ ЗА 800 ЕВРА Наседнал на приказна за гориво appeared first on plusinfo.mk.

Малиот баварски град Румансфелден е потресен од морничава приказна која со години останала незабележана. Во куќа покриена со бршлен и со испукана фасада, полицијата на почетокот на февруари го пронашла мумифицираното тело на жена родена во 1922 година.

Според истражителите, телото било пронајдено во подрумот и било во напредна фаза на распаѓање, што го отежнало утврдувањето на точниот датум и причината за смртта. Засега, обвинителството наведува дека нема индикации за насилна смрт.

Сомневањата се појавиле дури кога соседите, по долгото отсуство на сопственичката, почнале да се прашуваат дали таа повеќе е жива. Тогаш полицијата извршила проверка и ги потврдила најлошите претпоставки.

Но, случајот добива нова димензија, се истражува можноста ќерката на починатата, која има 82 години, да ја примала пензијата на мајка ѝ години по нејзината смрт. Според германскиот таблоид Билд, ќерката цело време живеела во куќата, но била повлечена и ретко комуницирала со соседите. Една сосетка изјавила дека повремено носела храна, но никогаш не ѝ било дозволено да влезе во куќата, намирниците биле оставани пред вратата.

Во меѓувреме, ќерката е сместена во специјализирана медицинска установа, додека баварските власти го третираат случајот како можна долгорочна злоупотреба на државните бенефиции. Доколку се потврди дека пензијата била примена без законска основа, станува збор за долгорочна финансиска измама со сериозни правни последици.

Иако нема докази за насилство, мистеријата околу точното време на смртта и како телото останало неоткриено со години продолжува да вознемирува во овој обично мирен град.

The post МУМИФИЦИРАНО ТЕЛО НА ЖЕНА ОТКРИЕНО ВО ГЕРМАНИЈА Ќерката примала пензија години по нејзината смрт appeared first on plusinfo.mk.

Државјанин на Турција пријавил дека бил измамен за 6.650 евра откако преку социјална мрежа стапил во контакт со лице кое му ветувало документи за работа и престој во Македонија.

Како што пријавил во СВР Скопје, измамата започнала во октомври минатата година, кога лицето се претставило како посредник кој може да му помогне во регулирање на неговиот престој во земјава. Во текот на неколку месеци, оштетениот во повеќе наврати му исплаќал пари, дел лично, а дел преку банкарска трансакција.

Освен тоа, Турчинот платил и за договор за закуп на стан, кој бил заверен кај нотар, што дополнително ја зајакнало неговата доверба дека станува збор за легална постапка.

Откако подолг период не успеал да стапи во контакт со лицето и не добил никакви документи, сфатил дека е измамен и случајот го пријавил во полиција.

Надлежните служби преземаат мерки за расчистување на случајот и за идентификување на сторителот.

The post ИЗМАМА ПРЕКУ СОЦИЈАЛНИ МРЕЖИ Турчин останал без 6.650 евра за документи за престој appeared first on plusinfo.mk.

Гостиварецот С.А. (34) пријавил во Полициската станица Гостивар дека добил СМС порака со линк за наводна достава од „Пошта на Северна Македонија“, информираше Министерството за внатрешни работи. Линкот водел до лажна интернет страница која изгледала идентично на официјалниот портал на Поштата.

По внесување на податоците од својата дебитна картичка, од неговата сметка биле направени неовластени трансакции во неколку наврати, во вкупен износ од 89.106 денари кон сметки во странство.

Полицијата извести дека се преземаат мерки за откривање на сторителите и дека случајот е предмет на дигитална форензика.

The post МУ СОБРАЛЕ 1.500 ЕВРА СО КОПИЈА НА ВЕБ-СТРАНИЦАТА НА „ПОШТА“ Гостиварец добил лажна смс порака appeared first on plusinfo.mk.

Двајца браќа од тетовско село пријавиле дека биле измамени за вкупно 15.000 евра, откако маж од Тетово им ветил дека ќе им „среди“ странска пензија.

Како што пријавил 70-годишниот оштетен, измамата се случувала во текот на 2024 година. Осомничениот, идентификуван со иницијалите Л.Н., им понудил помош за остварување право на пензија од странство, тврдејќи дека двајцата имаат работен стаж кој може да им донесе месечни примања.

Под изговор дека е потребен депозит за побрзо завршување на постапката, во повеќе наврати им биле земани пари. Притоа, браќата потпишувале бланко листови, празни полномошни и непополнети уплатници, верувајќи дека постапката е легална.

Откако поминало подолго време без никаков резултат и без да им биде одобрена пензија, тие сфатиле дека се измамени и случајот го пријавиле во полиција.

Од СВР Тетово информираат дека се преземаат мерки за целосно расчистување на случајот.

The post ИМ ВЕТИЛ СТРАНСКА ПЕНЗИЈА И ИМ ЗЕЛ 15.000 ЕВРА Двајца браќа од тетовско пријавиле измама appeared first on plusinfo.mk.

Триесет и шестгодишен маж пријавил во полиција дека бил измамен за сума од 600 евра од лице со кое стапил во контакт преку социјална мрежа.
Според пријавата поднесена во СВР Скопје, оштетениот на 19 септември 2025 година контактирал лице кое се претставило како управител на приватна фирма од Тетово. Двајцата се договориле за достава и монтажа на собна врата, при што пријавителот му исплатил аванс од 600 евра на друго лице, кое се претставило како техничар вработен во фирмата, преку каса-прими.
Откако поминал договорениот рок за монтажа, лицата престанале да одговараат на телефонските повици, по што пријавителот сфатил дека е измамен. Полицијата презема мерки за расчистување на случајот.

The post НАМЕСТО ДА МУ НАМЕСТАТ ВРАТА, ГО „НАМЕСТИЛЕ“ ЗА 600 ЕВРА Ги најмил преку социјални мрежи appeared first on plusinfo.mk.