Најновиот извештај на Државниот завод за ревизија за работењето на Фондот за пензиско и инвалидско осигурување во 2024 година открива сериозни финансиски и административни слабости, а ревизорите дале неповолно мислење и за финансиските извештаи и за законитоста на работењето.

Државниот завод за ревизија во извештајот објавен денеска констатира дека и покрај растот на приходите од придонеси, пензискиот систем и натаму не може самостојно да ги покрива расходите за исплата на пензии и останува силно зависен од трансфери од државниот буџет. Ревизорите изразиле неповолно мислење за вистинитоста и објективноста на финансиските извештаи на Фондот на пензиското и инвалидското осигурување (ПИОМ) за 2024 година, како и за усогласеноста на неговото работење со законските прописи.

Според ревизорскиот извештај, приходите од придонеси за пензиско и инвалидско осигурување во 2024 година пораснале за 14 проценти во однос на претходната година и достигнале 71,4 милијарди денари. Сепак, тие не биле доволни за покривање на расходите за пензии, кои изнесувале над 90,2 милијарди денари и продолжуваат да растат од година во година.

Поради овој јаз меѓу приходите и расходите, Фондот и понатаму се потпира на средства од државниот буџет. Во 2024 година трансферите од Буџетот учествувале со 36,71 проценти во вкупните приходи на ПИОМ, што претставува зголемување од 4,14 процентни поени во однос на 2023 година. Ревизорите оценуваат дека ова покажува оти пензискиот систем останува структурно зависен од буџетска поддршка.

Извештајот укажува и на влошување на односот меѓу бројот на осигуреници и бројот на пензионери. На крајот на 2024 година во државата имало 556.294 осигуреници и 343.048 пензионери, што значи дека на еден пензионер доаѓале само 1,63 осигуреници. Една година претходно овој однос бил 1 спрема 1,70, што укажува на дополнителен притисок врз одржливоста на пензискиот систем.

Меѓу позначајните забелешки е и доцнењето на уплатите кон вториот пензиски столб. Иако Фондот навремено ги пресметува и доставува обврските, средствата не се префрлаат навреме кон приватните пензиски друштва. Во текот на 2024 година просечното доцнење било околу два месеца, а заклучно со 27 февруари 2026 година бил евидентиран долг од речиси 2,6 милијарди денари по основ на нераспределени придонеси.

Ревизорите констатирале уште посериозен проблем во однос на здравственото осигурување на пензионерите. Според извештајот, ПИОМ не ги уплаќал навреме придонесите кон Фондот за здравствено осигурување, иако има законска обврска за тоа. Во текот на 2024 и 2025 година исплатите доцнеле по неколку месеци, а до крајот на февруари годинава доцнењето достигнало осум месеци. Неподмирените обврски за периодот од јуни 2025 до јануари 2026 година изнесуваат 8,4 милијарди денари, односно околу 136,4 милиони евра.

Во извештајот се наведува дека ваквата состојба им овозможува на пензионерите непречено да користат здравствени услуги, но истовремено негативно влијае врз ликвидноста на Фондот за здравствено осигурување.

Покрај финансиските проблеми, ревизорите укажуваат и на хроничен недостиг од стручен кадар во ПИОМ. Недостигаат вработени во клучните сектори, подрачните единици, информатичките служби и внатрешната ревизија, што, според извештајот, директно се одразува врз квалитетот на работењето на институцијата.

Ревизијата открила и низа административни и сметководствени слабости. Меѓу нив се неевидентиран движен и недвижен имот стекнат преку стечајни постапки, нецелосен попис на земјиште, побарувања за кои не е утврден правниот основ и застареноста, недоволна евиденција за дел од приходите од акцизи, слабости при издавање деловен простор под закуп, како и пропусти во јавните набавки и во управувањето со домовите за сместување на пензионери. Ревизорите забележуваат и дека на сметката за уплата и распределба на придонеси на крајот на секоја година остануваат неискористени парични средства кои не се насочуваат за исплата на пензии.

Во делот на останатите прашања, Државниот завод за ревизија посочува и на неусогласеност меѓу Законот за пензиско и инвалидско осигурување и Законот за административни службеници во начинот на пресметка на платите на вработените. За надминување на утврдените состојби, ревизорите дале препораки по кои надлежните институции имаат обврска да постапат.

Целиот извештај може да го прочитате на следниот ЛИНК.

The post ФОНДОТ ЗА ПЕНЗИСКО, ЕМ НЕ РАБОТЕЛ ЗАКОНСКИ ЕМ НЕМАЛ ДОВОЛНО ПАРИ!? Ревизорски извештај открива многу слабости и незаконитости во минатото работење на ПИОМ appeared first on plusinfo.mk.

Македонија останува на проекцијата за економски раст повисок од 3,5 проценти годинава, порача премиерот Христијан Мицкоски, оценувајќи дека резултатите од првиот квартал се охрабрувачки.

–  Ние остануваме на оние проекции коишто ги имавме, дека ќе биде над 3,5 проценти. Имајќи предвид дека во првиот квартал остваривме реален раст од 3,1 процент, а со усогласени вредности 3,3 проценти, што во однос на бруто домашниот производ претставува еден од најдобрите резултати во Европа во овој момент – изјави Мицкоски.

Премиерот истакна дека, и покрај критиките и различните толкувања на економските показатели, Владата останува уверена во насоката по која се движи економијата.

– Колку и да сакаат поединци да ја извртуваат вистината или сатирично да го пренесуваат сето тоа, за нив имам лоша вест. Македонија забрзува, Македонија победува и Македонија, како многу пати во историјата, ќе победи – порача Мицкоски.

Тој не најави промени во економските проекции и оцени дека досегашните показатели се во согласност со очекувањата на Владата.

Владината проекција предвидува раст на бруто-домашниот производ од над 3,5 проценти, што би било повисоко од остварувањата во повеќе европски економии во истиот период.

The post РЕАЛНО Е МАКЕДОНИЈА ДА ОЧЕКУВА ЕКОНОМСКИ РАСТ ОД 3,5% Владата останува уверена во своите политики appeared first on plusinfo.mk.

Семејството на претседателот на САД Доналд Трамп заработило најмалку 2,3 милијарди долари од криптовалутни проекти што ги промовирало по изборите во 2024 година, покажува истражување на Ројтерс. Според агенцијата, повеќе од 1 милион инвеститори истовремено забележале нето-загуби од приближно ист износ. Наодите се темелат на анализа на блокчејн записи, корпоративни документи и јавни изјави.

Ројтерс навел дека истражувањето било разгледано од повеќе од 10 експерти за сметководство и криптовалути. Тие ги оцениле проценките како разумни. Агенцијата разговарала и со претставници од криптоиндустријата.

Токени растеле, инвеститорите губеле

Во центарот на истрагата се четири проекти. Тоа се „Ворлд либерти фајненшл“, мем-криптовалутата „$TRUMP“, „Американ биткоин“ и „АИ фајненшл корп“.

Според Ројтерс, моделот бил сличен кај сите проекти. Семејството Трамп вложувало малку или воопшто не вложувало сопствени средства. Потоа ги промовирало проектите преку своето име и политичко влијание. Добивката останувала кај промоторите. Малите инвеститори често останувале со загуби.

Ројтерс го издвојува примерот на 29-годишната Фатима Елргдави од Санта Барбара. Таа во јануари 2025 година вложила 2.000 долари во „$TRUMP“. До крајот на мај вредноста на инвестицијата паднала на помалку од 120 долари.

Најголемиот профит доаѓал од еден проект

Најголема заработка, според истражувањето, донел проектот „Ворлд либерти фајненшл“. Компанијата почнала да продава токени во октомври 2024 година. Меѓу главните промотори биле Ерик Трамп и Доналд Трамп Помладиот.

Ројтерс проценува дека преку договор за лиценцирање на името Трамп, повеќе од 1,6 милијарди долари завршиле кај субјект поврзан со семејството. Загубите на инвеститорите во овој проект се проценуваат на околу 674 милиони долари.

Мем-криптовалутата „$TRUMP“ наводно донела околу 616 милиони долари за семејството Трамп. Истовремено, инвеститорите изгубиле повеќе од 700 милиони долари. Според агенцијата, токенот изгубил 97 % од вредноста во однос на врвот достигнат во јануари 2025 година.

Судир на интереси или легален бизнис?

Осум експерти за владина етика изјавиле за Ројтерс дека ваквото збогатување отвора сериозни прашања за можен судир на интереси. Според нив, станува збор за ситуација без преседан во современата американска историја.

Белата куќа не ги коментирала директно наодите. Портпаролката Ана Кели изјавила дека сите постапки на претседателот и на неговата администрација се преземаат во интерес на американскиот народ.

Од Белата куќа ги отфрлиле оценките за судир на интереси. Порачале дека ниту претседателот ниту неговото семејство не се впуштиле, ниту ќе се впуштат во такви активности.

Поранешниот министер за трговија Вилбур Рос застанал во одбрана на семејството Трамп. Тој изјавил дека политичарите и нивните семејства имаат право да заработуваат, додавајќи дека инвеститорите во шпекулативни средства мора да бидат свесни за ризиците.

The post ТРАМПОВИ ЗАРАБОТУВАЛЕ, ВЛОЖУВАЧИТЕ ВО КРИПТО ГУБЕЛЕ Над милион инвеститори останале со тенки џебови appeared first on plusinfo.mk.

The post ММФ ПОТВРДИ, МАКЕДОНСКАТА ЕКОНОМИЈА Е СТАБИЛНА Стопанството расте, долгот полека се намалува appeared first on plusinfo.mk.

Челзи пријави загуба од 262,4 милиони фунти за сезоната 2024/25, што претставува најголем финансиски минус во една година во историјата на англискиот фудбал.

Со тоа лондонскиот клуб го надмина претходниот негативен рекорд на Манчестер Сити, кој во сезоната 2010/11 пријави загуба од 194,9 милиони фунти.

Зголемувањето на приходите на Челзи на 490,9 милиони фунти не беше доволно за да се намали минусот. Приходите пораснаа благодарение на освојувањето на УЕФА Конференциска лига и пласманот на четвртото место во Премиер лига, со што клубот обезбеди настап во Лига на шампиони во тековната сезона.

Од клубот објаснуваат дека оперативните трошоци значително се зголемиле, главно поради враќањето во европските натпреварувања.

„Оперативните трошоци се зголемија првенствено поради враќањето во европските натпреварувања, што значително ги зголеми трошоците за натпревари“, соопштија од Челзи.

The post ЧЕЛЗИ СО РЕКОРДНА ЗАГУБА ОД 262 МИЛИОНИ ФУНТИ „Сините“ од Лондон во голем минус appeared first on plusinfo.mk.

Управа за јавни приходи соопшти дека нема нови даночни обврски за студентите кои работеле во странство, ниту пак се воведува двојно оданочување на веќе оданочени приходи.

Реакцијата доаѓа по медиумски написи дека студентите се „на удар“ и дека им се бара плаќање данок за сезонска работа во Германија во последните пет години. Од УЈП велат дека станува збор за редовна примена на законските правила и информирање на граѓаните.

„УЈП не наметнува нови обврски, ниту бара исполнување на обврски кои не се законски регулирани. Активностите се насочени кон воспоставување ред во оданочувањето и еднаква примена на законските правила за сите даночни обврзници“, соопштија од Управата.

Од институцијата додаваат дека целта не е санкционирање, туку поттикнување на доброволно пријавување на приходите.

„Со овие активности никој не е ‘на удар’, туку станува збор за мерки насочени кон подигање на свеста за законските обврски и обезбедување поддршка за нивно правилно и навремено исполнување“, наведуваат од УЈП.

Во соопштението се нагласува дека не може да има двојно оданочување, бидејќи меѓународните договори прецизно утврдуваат каде се плаќа данокот. Сепак, секој резидент на Македонија има обврска да го пријави доходот остварен во странство.

„Секое физичко лице – македонски даночен резидент има обврска да го пријави доходот остварен во земјата и во странство, согласно Законот за данокот на личен доход“, појаснуваат од УЈП.

Од Управата посочуваат дека студентите кои работеле во Германија пократко од 183 дена се сметаат за даночни резиденти на Македонија и имаат обврска да го пријават доходот преку системот за е-даночни услуги. Данокот, според важечките прописи и договорот за избегнување двојно оданочување меѓу двете земји, се плаќа во Македонија.

УЈП информира дека до граѓаните биле испратени и персонализирани известувања со цел навремено да бидат информирани за законските рокови, нагласувајќи дека целта е транспарентност и правилна примена на правилата.

The post НЕМА НОВИ ДАНОЦИ ЗА СТУДЕНТИТЕ Демант од УЈП за обврските од работа во Германија appeared first on plusinfo.mk.

Државниот завод за ревизија утврди сериозни неправилности во работењето на Државната изборна комисија за 2024 година, изразувајќи неповолно мислење и за финансиските извештаи и за усогласеноста со законската регулатива. Според ревизорите, извештаите не ја прикажуваат објективно финансиската состојба, а дел од активностите не се спроведени согласно прописите.

Клучните наоди покажуваат системски слабости во управувањето со средствата и организацијата на изборните процеси. Меѓу нив се издвојува фактот дека пописот на имотот и обврските не е спроведен согласно законските правила, што директно влијае врз точноста на финансиските податоци.

Дополнително, дел од недвижностите со кои располага Комисијата воопшто не биле проценети, па не се ниту евидентирани во сметководствените книги. Ова отвора прашања за реалната вредност на државниот имот со кој управува институцијата.

Ревизијата утврди и дека планирањето на буџетските средства за изборите не било во согласност со законски утврдениот сооднос. Наместо пропишаната распределба, значителен дел од средствата биле пренасочени, при што над 129 милиони денари биле прелеани кон трошоци за политичко рекламирање.

Проблеми се забележани и во начинот на кој изборните органи ја доставувале документацијата за трошоците. Во повеќе случаи извештаите биле некомплетни, без основни документи како фискални сметки, патни налози или записници, што го отежнува следењето на трошењето на јавните пари.

Во делот на јавните набавки, ревизорите констатирале дека се набавувале стоки и услуги без да се спроведе законска постапка, како и недоследна примена на Законот за јавни набавки. Ова, според извештајот, го нарушува принципот на транспарентност и еднаков третман на понудувачите.

Посебно е посочена и спорната набавка на софтвер за обработка на изборни резултати, каде што условите не биле јасно дефинирани, а договорот бил потпишан пред да се обезбеди банкарска гаранција.

Ревизорите укажуваат и на организациски слабости, меѓу кои и фактот дека во текот на најголемиот дел од 2024 година институцијата немала генерален секретар, што влијаело врз координацијата и управувањето со административните процеси.

Дополнителен ризик претставува и нерешеното прашање со складирањето на изборниот материјал. Комисијата долго време немала соодветен магацин, што отвора можност за несоодветно чување и потенцијално оштетување на чувствителна опрема, вклучително и уредите за биометриска идентификација.

И покрај утврдените слабости, ревизорите нотираат дека дел од претходно дадените препораки остануваат неспроведени или само делумно реализирани, што укажува на континуитет на проблемите во работењето. Од вкупно девет препораки од претходната ревизија, само една е целосно исполнета.

Во насока на надминување на состојбите, Државниот завод за ревизија дал повеќе препораки, меѓу кои усогласување на законската рамка за финансирање на изборите и преиспитување на моделот за распределба на средствата за политичко рекламирање.

Целосната ревизија за работата на ДИК може да ја читате на следниот ЛИНК.

The post ГРЕШКИ ВО ТЕНДЕРИТЕ И ТРОШЕЊЕТО ПАРИ, СКАПА ОПРЕМА „СКАПУВА“ Ревизорите најдоа куп неправилности во работата на ДИК appeared first on plusinfo.mk.

Првиот човек на македонскиот фудбал, Масар Омерагиќ, во своето обраќање изнесе сериозни обвинувања за работењето на претходното раководство на Федерацијата, откривајќи, како што рече, шокантни финансиски и организациски состојби што ги затекнал по преземањето на функцијата.

Тој посочи дека во период од само еден месец – од ноември до декември 2024 година, непосредно пред новото раководство да стапи на должност – биле потрошени околу пет милиони евра од средствата наменети за развој на фудбалот.

– За само еден месец се потрошени околу 5 милиони евра. Ние ја затекнавме таа состојба и не баравме изговори, туку веднаш почнавме да воведуваме ред. Само кај трошоците за хотели, чартер летови и авионски билети успеавме да намалиме над еден милион евра. Секој денар го следиме каде оди, бидејќи овие средства не се ничии приватни, туку припаѓаат на фудбалот – изјави Омерагиќ.

Покрај финансиските нерегуларности, тој алармираше и за сериозни проблеми во евиденцијата на играчи, обвинувајќи дека во времето на претходниот претседател Муамед Сејдини постоел систем со фиктивни фудбалери.

Според него, последната пререгистрација спроведена од поранешното раководство евидентирала 44.996 фудбалери, додека по новата пререгистрација, бројката е сведена на 14.210.

– По 15 години, конечно се става крај на еден застарен и нефункционален систем и се воведува ред преку нов Статут изработен со УЕФА и ФИФА, кој не остава простор за импровизации. Да бидеме искрени, досега не зборувавме за реален фудбал, туку за бројки што не постојат. Разликата од речиси 30 илјади играчи не е мала грешка, туку системска манипулација. Со новите правила тоа завршува – нема повеќе клубови што постојат само на хартија, нема лажни записници и нема фиктивен систем – потенцираше Омерагиќ.

The post ОМЕРАГИЌ РАСПАЛИ ПО СТАРОТО РАКОВОДСТВО НА ФФМ Потрошиле 5 милиони за месец, имало 30.000 фантомски играчи? appeared first on plusinfo.mk.

Управата за јавни приходи (УЈП) ги потсетува граѓаните кои во 2025 година оствариле доход од работа во странство дека крајниот рок за поднесување на електронската пресметка и доставување на соодветни докази е 31 март 2026 година.

Сите физички лица кои примиле плата или друг вид доход од странство се должни да ја пополнат пресметката преку системот е-Даночни услуги: https://e-ujp.ujp.gov.mk/ureg/login.seam. Обврската важи без разлика дали данокот во странската држава е платен или не.

Заедно со пресметката, граѓаните мора задолжително да достават и докази – потврда од исплатувач, извод од банка, договор за извршени услуги, платни листи или друга документација што ја потврдува висината, видот и периодот на доходот, како и евентуално платениот данок во странство.

Детални насоки за пријавување, пресметка на данокот и примена на договорите за избегнување двојно оданочување се достапни на веб-страницата на УЈП и преку следните линкови:

– Соопштение УЈП

– е-Даночни услуги

– Список на држави со договор за избегнување двојно оданочување

– Упатство за пополнување на електронската пресметка

Во рамки на редовната меѓународна соработка, УЈП информира дека во 2025 година биле поднесени 203 барања до странски даночни органи за проверка на документацијата од граѓани кои преку американски компании работеле во Авганистан и Ирак. Овие активности се дел од механизмите за обезбедување точност и транспарентност во даночниот систем.

Управата апелира навремено да се извршат сите обврски за да се избегнат дополнителни постапки и санкции и за правилно утврдување на даночната обврска.

The post НЕ ЧЕКАЈТЕ ПОСЛЕ 31 МАРТ, ПОТСЕТУВА УЈП Даночните обврзници кои работеле во странство мора да достават документи appeared first on plusinfo.mk.

Речиси милион трансакции и околу 42 милиони евра во оптек – ова е билансот од првите 48 часа по официјалното воведување на еврото како платежна валута во Бугарија, покажуваат податоците на националниот систем за картички и платежна инфраструктура „Борика“.

Во првите два дена од 2026 година, граѓаните интензивно ги користеле банкоматите и ПОС терминалите, при што преку националната инфраструктура биле реализирани повеќе од 933.000 трансакции, со вкупна вредност од околу 42 милиони евра.

Податоците покажуваат дека безготовинските плаќања доминираат по број, сочинувајќи повеќе од 86 проценти од сите операции, но кога станува збор за вредноста на трансакциите, повлекувањето готовина и депонирањето пари преку банкомати учествуваат со над 52 проценти од вкупниот износ.

Само во првите 48 часа, системот обработил повеќе од 804.000 ПОС трансакции, односно директни плаќања со картички на продажни места, со вкупна вредност поголема од 20 милиони евра. Просечниот износ на едно плаќање изнесувал околу 25 евра, што укажува на масовна употреба на картички за секојдневни набавки.

Истовремено, граѓаните масовно подигале готовина. Забележани се околу 125.000 подигнувања од банкомати, со вкупна вредност над 18 милиони евра, при што просечниот износ по трансакција бил 144 евра.

Значителна активност е регистрирана и кај депозитите преку банкомати. Реализирани се речиси 3.500 депозитни трансакции, со вкупна вредност од околу 3,8 милиони евра, а просечниот износ по депозит достигнал 1.100 евра.

Според „Борика“, интензитетот на користење на платежниот систем во овој период бил исклучително висок – во просек 19.446 трансакции на час, односно 324 трансакции во минута, што укажува на брза адаптација на граѓаните на новата валута уште од првиот ден.

The post „ГОРЕА“ БАНКОМАТИТЕ И ПОС-ТЕРМИНАЛИТЕ ВО БУГАРИЈА За два дена 933.000 трансакции и 42 милиони евра во оптек appeared first on plusinfo.mk.