Годинашното 47. издание на Интернационалниот филмски фестивал „Браќа Манаки“ носи рекорден број филмови, гости и едукативни содржини. Фестивалот се отвора утре во Битола со македонскиот филм „Скејтањето не е за девојчиња“ во режија на Дина Дума.

На денешната прес-конференција беше најавено дека на фестивалот ќе присуствуваат голем број автори од светската кинематографија. Покрај годинашните лауреати Ден Лаустсен и Џеф Кроненвет, во Битола ќе гостуваат и Јануш Камински, Семи Капланоглу, Воли Фистер, Тимо Салминен и други познати имиња од филмскиот свет.

Директорот на ИФФК „Браќа Манаки“, Димитрија Доксевски, рече дека фестивалската програма годинава е особено богата и дека бројот на гости е еден од белезите на ова издание.

– Годинава имаме импресивна програма со рекорден број филмови и едукативни содржини. Морам да потенцирам дека имаме прекрасни автори и огромна бројка на гости на ова издание. Покрај лауреатите Ден Лаустсен и Џеф Кроненвет, во Битола доаѓаат Јануш Камински, Семи Капланоглу, Воли Фистер, Тимо Салминен и ред други истакнати имиња од светската кинематографија – рече Доксевски.

Кино на отворено во Музејот на Битола

Една од новините на годинашното издание е киното на отворено, кое ќе се одржува во Музејот на Битола. Проекциите таму ќе бидат бесплатни, а публиката ќе може да ја следи Макпоинт-програмата.

Макпоинт повторно е дел од фестивалската програма, со повеќе македонски филмови, што организаторите го издвојуваат како значаен простор за домашната кинематографија и за претставување на македонските филмски автори пред публиката.

Главната селекција ќе се прикажува во Центарот за култура во Битола. За фестивалот е обезбедено ново платно и нов проектор, кои ќе се користат за проекциите и треба да придонесат за подобар технички квалитет и подобро фестивалско доживување за публиката.

Соработка со Европската филмска академија

Новина во програмата е и соработката на Друштвото на филмски работници со Европската филмска академија, преку нејзиниот Cinematographers Chapter, кој е посветен на кинематограферите и нивната промоција.

Претседателката на ДФРМ Марија Димитрова најави дека соработката ќе започне со серија панели на кои ќе се разговара за работата на кинематограферите, техничките услови во кои работат, но и за други прашања поврзани со професијата.

– Оваа година како Друштво на филмски работници започнуваме соработка со Европската филмска академија. Нивниот Cinematographers Chapter се грижи за кинематограферите и нивната промоција. Заедно со Европската филмска академија започнуваме серија панели на кои ќе разговараме за битни прашања поврзани со работата на кинематограферите, техничките услови во кои работат и ред други аспекти на нивната работа – рече Димитрова.

Првиот панел ќе се одржи на 21 септември во рамките на фестивалот, а меѓу гостите ќе бидат Тимо Салминен и Јануш Камински.

The post ГОДИНАШНИОТ „БРАЌА МАНАКИ“ СО РЕКОРДНА ПРОГРАМА И БРОЈНИ ГОСТИ Новина е и киното на отворено appeared first on plusinfo.mk.

„Тристан засекогаш“ на Тобијас Ноле и Лоран Бонардо ја освоиглавната награда на 17. „МакеДокс“. Жирито едногласно му го доделило „Кромидот“ за најдобар долгометражен документарен филм.

Одлуката ја донела комисијата во состав Алфонсо Ривера, Маја Крајнц и Рахул Џаин.

Жирито оценило дека „Тристан засекогаш“ го разоружува гледачот уште од почетокот. Особено го издвоило балансот меѓу психолошката изолација и чувството на припадност.

Фестивалот заврши со доделувањето на наградите во Куршумли ан. Седум од осумте фестивалски вечери беа со распродадени билети, истакна извршниот директор Дарко Набаков.

Седумнаесеттото издание на „МакеДокс“ се одржа од 20 до 27 август под мотото „Само сонот е стварност“.

Наградата за најдобри етички идеи ја доби „Од црвени фенери до рефлектори“ на Бипулџит Басу. Посебно признание во оваа категорија доби „Земјата Кикују“ на Беа Вангондју и Ендру Браун.

„Млад кромид“, наградата за најдобар филм во категоријата „Нови автори“, му припадна на „Кон запад, во Запата“ на Дејвид Бим. Посебно признание доби „Имаго“ на Дени Умар Пицаев.

„Сечкан кромид“ за најдобар краток документарен филм го освои„Роење птици“ на Ксавиер Марадес. Жирито му доделило посебно признание на „Отворено поле“ на Тебохо Едкинс.

Студентската награда „Кокарче“ ја доби филмот „Здраво ново тело, како си денес?“ на Лаура Канси.

Статуетките за наградените автори ги изработил уметникот Глигор Кузмановски. Вечерта била посветена на Влатко Милев – Циги, љубител на документарниот филм и пријател на „МакеДокс“.

The post „ТРИСТАН ЗАСЕКОГАШ“ ГО ОСВОИ „КРОМИДОТ“ Главната награда на „МакеДокс“ за филмот на Ноле и Бонардо appeared first on plusinfo.mk.

Српскиот претседател Александар Вучиќ го угостил во Белград белгискиот актер Жан-Клод Ван Дам, кој е во Србија поради филмскиот фестивал во Ниш, а средбата завршила и со малку необична борба меѓу двајцата.

Вучиќ на социјалните мрежи откри дека со холивудскиот актер се натпреварувал во соборување на рака – и изгубил.

– Што се однесува до соборувањето рака, изгубив, но тоа задоволство да го видите на видео нема да ви го приредам – се пошегува Вучиќ во објавата на Инстаграм. Тој додава дека не побарал од Ван Дам да ја демонстрира својата прочуена „шпага меѓу две столчиња“, бидејќи актерот бил облечен во одело.

– Некои дипломатски ризици сепак не треба да се преземаат – напиша српскиот претседател.

Средбата се одржала по повод престојот на Ван Дам во Србија. Познатиот белгиски актер е гостин на Меѓународниот филмски фестивал во Ниш, а Вучиќ нагласи дека неговото учество ќе придонесе за промоција на Ниш и на Србија во светот.

 

View this post on Instagram

 

A post shared by Aleksandar Vučić (@buducnostsrbijeav)

Ван Дам во Србија не дошол случајно. Неговото појавување е поврзано со новото издание на филмскиот фестивал во Ниш, кој оваа година е организиран како меѓународен фестивал. Српскиот магазин „Vreme“ пишува дека фестивалот предизвикува внимание и поради контроверзиите околу неговата организација и односот кон традицијата на поранешните „Филмски средби“ во Ниш.

Но средбата со Вучиќ не е единствената причина поради која престојот на Ван Дам во Србија привлекува внимание. Српските медиуми потсетуваат и на неговата долгогодишна поврзаност со пејачката Драгана Мирковиќ, која живее во Австрија и со која актерот со години е во пријателски односи. „Vreme“ пишува дека токму Мирковиќ во минатото му помогнала кога Ван Дам имал сериозни здравствени проблеми и му овозможила лекување во престижна клиника во Виена.

The post 🎥 ВУЧИЌ СИ ГИ ОДМЕРИ СИЛИТЕ СО ЖАН-КЛОД ВАН ДАМ Холивудската ѕвезда го победи српскиот претседател во соборување на раце appeared first on plusinfo.mk.

„Ткајачи на филм“ е темата на постерот за годинашното, 47. издание на Интернационален фестивал на филмска камера „Браќа Манаки“ и се осврнува на првиот кадар снимен со филмска камера на Балканот од браќата Манаки. Авторка на визуелниот идентитет на годинашното издание на ИФФК е уметницата и графички дизајнер Вања Штркова, која е дел од тимот на маркетинг-агенцијата „Њу Момент“.

Во визуелното решение е инкорпорирано дело од светски познатиот уметник Киро Урдин и фотографии од Горан Тачевски, кој живее и работи во Прага и во 50-годишната кариера има соработувано со познати магазини, агенции и славни личности.

Според Димитрија Доксевски, директор на ИФФК „Браќа Манаки“, македонската кинематографија е родена од слика на жена која преде.

– Од Баба Деспина и првите кадри на браќата Манаки, па сè до денес, нашите филмски автори ткаат приказни што го чуваат нашето минато, но истовремено го отвораат погледот кон светот. Токму затоа, темата „Ткајачи на филм’“ не е само визуелен идентитет на годинашното издание, туку потсетување на една голема и богата традиција на раскажување. Особено е симболично што се доближуваме до 2027 година, кога ќе одбележиме 75 години од „Фросина“, првиот македонски долгометражен игран филм, чиј насловен лик исто така е ткајачка. Од првиот кадар до „Фросина“ и до современите филмски автори, нишката продолжува, а фестивалот „Браќа Манаки“ останува местото каде таа традиција се среќава со најзначајните „ткајачи на филм“ од целиот свет – вели Доксевски.

Авторката на плакатот, Вања Штркова, е илустраторка и графичка дизајнерка, чиј визуелен израз се препознава по силната употреба на боја, слободната креативна енергија и раскажувањето преку слика.

Според неа, секој креативен процес започнува со една нишка, со идеја што на почетокот, како што вели, можеби е одвај видлива, но постепено се поврзува со други слики, чувства и искуства.

– Како и во предењето и во ткаењето, потребни се ритам, трпение и интуиција за од поединечните нишки да се создаде целина. Токму во таа паралела го пронајдовме јадрото на визуелниот идентитет: авторите на филмот се ткајачи кои од светлина, движење и време создаваат приказни. Камерата е нивниот творечки инструмент. Таа не само што ја забележува реалноста, туку овозможува да биде преобликувана, почувствувана и раскажана на нов начин. Затоа во постерот камерата и роданот се „претопени“ еден во друг, односно се поврзани со иста нишка. Тоа е нишката на човечката потреба да создава и да раскажува – вели Штркова.

„Њу Момент“ во своето 33-годишно постоење има изработено дел од најпознатите постери за Скопскиот џез фестивал, Млад отворен театар и Охридско лето. Агенцијата во своето големо портфолио на награди има и Титаниумски и Сребрен лав од фестивалот на креативноста во Кан.

Фотографот Горан Тачевски, пак, има повеќе од 50 години професионално искуство во документарната, модната, портретната и комерцијалната фотографија. Во својата кариера соработувал со светски брендови, агенции, познати личности и изданија како „Vogue“, „Elle“, „Harper’s Bazaar“, „Le Monde“ и „The New York Times“, а неговата работа е наградувана на повеќе меѓународни фестивали.

„Тачевски е дел од визуелниот идентитет на ИФФК „Браќа Манаки“ преку својот фотографски приказ на Македонија, доловена низ неговиот објектив како простор на силни карактери, автентични моменти и приказни со филмска атмосфера“, информира ИФФК „Браќа Манаки“.

Четириесет и седмото фестивалско издание ќе се одржува од 19 до 25 септември во Битола, во организација на Друштвото на филмските работници на Македонија и со поддршка од Агенцијата за филм, Општина Битола и Кинотеката на Македонија.

The post ФЕСТИВАЛОТ ГО ОТКРИ ПОСТЕРОТ „Ткајачи на филм“ ќе ја одбележат филмската есен во Битола appeared first on plusinfo.mk.

Анџелина Џоли и Роберт де Ниро се меѓу холивудските ѕвезди чии контакт-податоци наводно биле изложени по безбедносен пропуст, тврди експерт за сајбер-безбедност за The Sun.

Според неговите наводи, личните телефонски броеви и приватните адреси за електронска пошта на актерите станале јавно достапни откако неколку бази на податоци поврзани со филмскиот фестивал Трајбека биле поставени на интернет.

Меѓу познатите личности чии податоци наводно биле компромитирани се и режисерите Мартин Скорсезе, Џорџ Лукас и Дени Бојл, како и актерите Морган Фримен, Џенифер Лоренс и Винона Рајдер.

Експертот за сајбер-безбедност Џеремаја Фаулер, кој прв ја објавил информацијата за инцидентот, изјавил дека минатиот месец го контактирал фестивалот Трајбека откако случајно наишол на протечените податоци.

Според него, четирите компромитирани бази содржеле околу 666.000 записи од периодот меѓу 2019 и 2026 година, поврзани со годишниот филмски фестивал во Њујорк, основан од Роберт де Ниро.

Најголемиот дел од документите биле маркетиншки материјали, но една од базите содржела телефонски броеви и адреси за електронска пошта на познати личности, што, според Фаулер, укажува дека станува збор за нивни лични контакти.

Таквиот пропуст би можел да ги изложи славните личности на фишинг-измами, малициозен софтвер и пораки од измамници кои би се претставувале како нивни пријатели или членови на семејството.

Фаулер, истражувач во американската компанија за информатичка безбедност Black Hills Information Security, за британскиот весник „Сан“ изјавил дека станува збор за „најголемата колекција на податоци за славни личности што некогаш ја видел“.

Тој додал дека особено загрижувачки биле информациите за уредите што ги користеле лицата чии податоци биле изложени.

– Имаше папка во која беа наведени информации за нивните уреди врз основа на адресите за електронска пошта. Се гледаше која верзија на Ајфон користат, дали користат веб-прелистувач Сафари и која верзија на софтверот ја имаат. Тоа може да им даде многу дополнителни информации на сајбер-криминалците – изјавил тој.

Фаулер тврди дека го известил фестивалот Трајбека за проблемот само неколку дена пред почетокот на годинашното 12-дневно издание на манифестацијата.

Од фестивалот тогаш му одговориле дека „многу сериозно ги сфаќаат прашањата поврзани со безбедноста на податоците“ и дека активно го истражуваат случајот. Воедно соопштиле дека базите во меѓувреме биле отстранети.

Засега не е познато колку долго информациите биле јавно достапни, ниту кој можел да им пристапи. Исто така, нема докази дека самиот фестивал Трајбека е одговорен за наводното протекување на податоците.

Фаулер своите сознанија ги објавил во блог за една компанија што нуди ВПН-услуги, повеќе од еден месец откако, како што тврди, првпат ги открил податоците.

Во текстот нагласил дека како етички истражувач не ги презема податоците што ги пронаоѓа, туку проверува ограничен број записи за да ја потврди природата на изложеноста и одговорно да ги извести засегнатите страни.

Во последниве години бројни славни личности беа мета на сајбер-напади. Меѓу најпознатите случаи е хакирањето на повеќе од 100 профили на Твитер во 2020 година, пред платформата да биде преименувана во Икс.

Тогаш беа компромитирани профили на Илон Маск, Канје Вест, Ким Кардашијан, Барак Обама, Џо Бајден, Бил Гејтс и Џеф Безос, кои биле искористени за промоција на измама поврзана со биткоин.

Главниот организатор на нападот, американски тинејџер кој во тоа време имал 17 години, подоцна ја признал вината, а уште неколку лица биле обвинети и осудени во врска со случајот.

The post ПРИВАТНИТЕ КОНТАКТИ НА АНЏЕЛИНА ЏОЛИ И РОБЕРТ ДЕ НИРО ПРОТЕКОА ВО ЈАВНОСТ Голем сајбер напад на филмскиот фестивал „Трајбека“ appeared first on plusinfo.mk.

Актерот Елајџа Вуд кој пристигна во Кан, за да му ја додели почесната Златна палма на Канскиот филмски фестивал, на режисерот на „Господар на прстените“ Питер Џексон, беше снимен како позира за селфи со неколку други гости и покрај експлицитната забрана.

Забраната за селфи на црвениот тепих во Кан официјално е во сила од 2018 година и беше воведена за да се спречи метежот и да се обезбеди непречен проток на гости, пишува LADbible. Првиот обид за забрана се случи во 2015 година, кога директорот на фестивалот Тиери Фремо рече: „Никогаш не изгледаш толку грдо како на селфи“.

Иако неговата иницијатива не се прошири целосно во тоа време, три години подоцна правилото стана задолжително, а обезбедувањето на фестивалот е одговорно за предупредување, а понекогаш и отстранување на оние што го прекршуваат.

Elijah Wood takes a selfie on the #Cannes red carpet, where selfies are not allowed.https://t.co/gJcrM69HTZ pic.twitter.com/sT3LV3nmvQ

— Variety (@Variety) May 12, 2026

Вуд му оддаде почит на режисерот Питер Џексон во Кан, доделувајќи му почесна награда. Во својот говор, тој го истакна придонесот на Џексон во филмската уметност.

– Му откривте на светот нешто што никогаш порано не беше видено, после што ништо веќе  не беше исто. Помогнавте да се изгради сосема нова филмска култура на другиот крај од  светот – рече Вуд.

И покрај кршењето на правилото, Елајџа Вуд се чини дека се извлекол без никакви последици. Откако го направи контроверзното селфи, тој продолжи по својот пат непречено, а подоцна му ја додели наградата на Џексон. Ова сугерира дека обезбедувањето не ги применило построгите мерки што понекогаш се споменуваат во врска со овој прекршок.

Иако фестивалот склопи партнерство со Мета, организаторите не ја ублажија забраната за селфи за да се прилагодат на содржината популарна на социјалните мрежи. Сепак, фестивалот покажува знаци на прилагодување кон новите времиња. Така, на пример, на ТикТокерот Рис Фелдман ќе му биде дозволено да снима интервјуа на црвениот тепих користејќи ги своите Мета очила. Кан се чини дека полека се отвора кон технологијата, но сепак цврсто брани некои од своите традиционални правила.

Со оглед на тоа што Елајџа Вуд има репутација на исклучително пристапен актер, неговиот потег на црвениот тепих веројатно бил само безопасен момент, а не намерно кршење на протоколот.

The post ЗАБРАНЕТО ПРАВЕЊЕ СЕЛФИ НА ЦРВЕНИОТ КИЛИМ Елајџа Вуд прекрши строго правило на филмскиот фестивал во Кан appeared first on plusinfo.mk.

Во Берлин синоќа, со филмот „Нема добри луѓе“ од авганистанскиот режисер Шарбан Садат, беше отворен 76. Меѓународен филмски фестивал („Берлинале“). Во првата вечер, холивудската ѕвезда и „Оскаровка“ Мишел Јео ја доби почесната „Златна мечка“ за животно дело.

Годинава, 22 филма се натпреваруваат за главните награди на фестивалот, „Златната“ и „Сребрената мечка“, а претседател на жирито е германскиот режисер Вим Вендерс. Примајќи го почесното признание, Јео се потсети на своите почетоци и поддршката што ја добивала во германскиот главен град.

– Кога сè уште се барав каде припаѓам, Берлин ме прифати. Тоа рано добредојде беше важно. Покажа дека има место за гласовите од маргините, за уметници кои сè уште се дообликуваат – рече малезиската глумица, држејќи ја наградата в раце.

Претседателот на меѓународното жири, Вендерс, за „Варајети“ (Variety) рече дека филмовите можат да го променат светот, но не директно преку политиката.

– Ниеден филм не го променил мислењето на политичар, но може да го промени начинот на кој луѓето размислуваат за тоа како сакаат да живеат. Уметниците треба да работат во интерес на луѓето, а не на политичарите – изјави Вендерс, дополнувајќи дека филмот е противтежа на политиката.

Тој нагласи дека овој фестивал се издвојува по разноликоста и по тематската разновидност на филмовите, наведувајќи дека публиката може да види „повеќе лица од светот отколку на кој било друг фестивал“ на планетава.

И покрај дождот и студеното време, Бела Ремзи, Нил Патрик Харис, Даниел Брил и Ларс Ајдингер прошетаа по црвениот тепих, додека некои учесници ја искористија можноста да испратат и политички пораки, носејќи транспаренти со натписи против фашизмот и во поддршка на иранскиот народ. Овогодишното издание на „Берлиналето“ трае до 22 февруари, а членовите на жирито, предводени од Вендерс, ќе го објават добитникот на „Златната мечка“ за најдобар филм на свеченото затворање на 21 февруари.

The post ОСКАРОВКАТА МИШЕЛ ЈЕО ДОБИ „ЗЛАТНА МЕЧКА“ ЗА ЖИВОТНО ДЕЛО Филмот „Нема добри луѓе“ го отвори Берлинале 2026 appeared first on plusinfo.mk.

Под слоганот „Се гледаме од другата страна“ од 3 до 10 декември во Скопје ќе се одржи Фестивалот на европски филм CINEDAYS.

Осумте селекции, повеќе од 60 филмови, кои ја одбележаа тековната европска филмска година и врвната работилница „Маркетинг на филм“, се фактографски белег на годинешниот CINEDAYS.

– Оваа година публиката не ја водиме на филмско патување туку ја водиме низ премин. Типично за Дејвид Линч, на кого му го посветуваме ова издание, надреално, сонувачки, убаво и контрастно. Тој премин и покрај сѐ, е богат со најновите и најнаградуваните филмови. Свесни сме дека во земја како Македонија, со мал продукциски импакт, филмот се докажа како најголем амбасадор. И за да можат да виреат такви креативци, но и на таква префинета публика, должни сме да ѝ го дадеме најдоброто што знаеме да го правиме, а тоа е фестивал – вели Маргарита Арсова, програмски координатор на CINEDAYS.

Два филма се на почетокот на фестивалот, „Тоа беше само несреќа“ во режија на Џафар Панахи, добитник на наградата Златна палма на Канскиот фестивал и „Човек лавина“ на Слободанка Рудин, филм за еден од најдобрите музичари и тапанари во поранешна Југославија, Драгољуб Ѓуриќиќ.

– Ова издание на CINEDAYS ги носи и „Тајниот агент“ на Мендонса Фило, „Домот на младата мајка“ на браќата Дарден, и двата номинирани за Златна Ппалма, „Татко Мајка Сестра Брат“ на Џим Џармуш кој е добитник на наградата Златен лав во Венеција и досега не е прикажан во кината во Европа. Потоа филмови во кои македонските филмски екипи се копродуценти, како „Оче наш“ на Горан Станковиќ, „Ера“ на Парта Келменди, „Павиљон“ на Дино Мустафиќ…. А ќе гледаме и филмови на Сорентино, Парк Чан-Вок. Особено сме благодарни што годинава и Македокс ни се придружува со своја селекција, победници од нивниот фестивал. Многу гости, музика и филмски завршеток на годинава за МКЦ – додава Арсова.

Селектор на програмата на 24. CINEDAYS е Бернд Будер.

На 4 и 5 декември во клубот МКЦ, во рамките на СинеМјузик вечерите ќе има специјална селекција од десетина млади европски бендови, поддржани од Лајвјуроп програмата. Влезот за концертите е бесплатен.

Фестивалот ќе се случува во просториите на МКЦ, во кино Фросина и Дансинг салата 25 мај.

Билетите за овогодишното издание на CINEDAYS ќе бидат по цена од 200 денари, за сите филмови, а може да се купат онлајн, преку bileti.mkc.mk (се препорачува онлајн-продажба), како и на самиот влез на МКЦ.

Фестивалот во најголем дел е поддржан од Агенцијата за филм на РСМ. Останати финансиски покровители се Градот Скопје, Делегацијата на ЕУ преку програмата за поддршка на европски филмски фестивали, како и мрежата Лајвјуроп.

The post СИНЕДЕЈС НОСИ ПОВЕЌЕ ОД 50 ФИЛМОВИ Фестивалот на европски филм од 3 до 10 декември во МКЦ appeared first on plusinfo.mk.

Во Домот на културата „Билјана Беличанец“ во Кисела Вода, синоќа, во присуство на бројни филмски работници и љубители на филмската уметност, беа доделени наградите на јубилејното 10. издание на МФФ Киненова.

„Гран при“ доби филмот „Паноптикон“ на Ѓорѓи Сикарулиѕе. Филмот е копродукција на Грузија, Франција и Италија.

„Исклучителна режисерска интуиција во раскажувањето приказни која се базира на клише, но далеку ги надминува границите на очекуваното, внесувајќи нè во светот на личниот, кревкиот и еротскиот универзум на главниот лик. Чувствителноста, чувството, храброста, непредвидливоста и ранливоста на ликовите во филмот создаваат мозаик од необичен и фасцинантен свет на Грузија. Гран при на фестивалот оди кај филмот „Панокптикон“ од режисерот Ѓорѓи Сикаруалиѕе“, се наведува во одлуката на жирито.

Наградата за најдобра режија ја доби српскиот режисер Вук Ршумовиќ за филмот „Помеѓу боговите“, за внимателно осмислен и контролиран мизансцен, исклучителна работа со актери, минималистички режисерски алатки преку кои режисерот создава емоции, интимност и разбирање – силни и моќни, трогателни и убедливи визуелни елементи.

Наградата за најдобро сценарио ја добија Момир Турудиќ и Вук Ршумовиќ за филмот „Помеѓу боговите“.

– Филм за сомнежот, длабокото човечко егзистенцијално преиспитување на животот, прашањето за човештвото и суштината на нашето постоење, со исклучителни ликови, прецизност во нарацијата, кредибилитет на ликовите и јадрото на она што ни го нуди кинематографското раскажување приказни. Наградата за најдобро сценарио оди во рацете на Момир Турудиќ и Вук Ршумовиќ за филмот „Помеѓу боговите“ – пишува во одлуката на жирито.

За најдобар краток филм од 16 филмови кои беа во конкуренција, награден е „Пиратска земја“ на Ставрос Петрополус. Жирито го оцени како многу интересен филм, со храбро истражување и голем режисерски подвиг што креира простор за човечка комуникација во модерното време каде тоа не е многу лесно и не тера да размислуваме подлабоко за нештата.

А special mention за особено визуелно достигнување доби филмот „Затемнување“ од Ахмет Елзогби од Египет. Жирито смета дека станува збор за исклучителен филм со исклучителна кинематографија и креативна игра со светло и ефекти.

Одлуката ја соопшти претседателот на жирито, Срдан Голубовиќ, кој рече дека е среќен што е дел од јубилејното издание на Киненова, фестивал кој се бори за нешто што е уметнички авторски филм и сите овие десет години и носи на оваа средина нешто што се најголеми и најважни наслови од светот на авторскиот филм.

– Се надевам дека овој фестивал ќе ја продолжи борбата за публика која ќе гледа авторски филмови и која во следните години ќе открива што европскиот и светскиот филм ѝ нудат на нашата публика. Во денешно време филмската дистрибуција е ограничена, а фестивалите се места кои ни ги носат најинтересните остварувања кои во овој момент се случуваат во светот – рече Голубовиќ и подвлече дека му е голема чест што е претседател на жирито во кое членува заедно со Хамад Солејманзадех и големиот македонски кинематографер, Владимир Самоиловски.

Директорот на фестивалот, Небојша Јовановиќ, изрази задоволство од содржините и гостите на фестивалот, како и од мастеркласовите.

Гена Теодосиевска, уметнички директор на фестивалот рече дека е задоволна што работела со еден компактен тим, кој заслужува големи пофалби бидејќи се снаоѓал и во време и во невреме.

– Многумина наши гости-автори на прашањето колку филмот може да го промени светот велат малку, но како личности ние сите се менуваме по секој изгледан филм и јас во тоа верувам. По секој филм ние имаме еден друг поглед затоа што авторот ни го овозможува тоа. Авторскиот филм е една бујна река. Но таа треба да стигне некаде. Ако не стигне никаде, ако не дојде на фестивалите, ако не знаеме да го препознаеме, тоа е многу тажно. Ние се обидуваме да го препознаеме авторскиот филм. Онолку колку што ни овозможува буџетот, колку што можеме ние да стигнеме и затоа сме задоволни што имавме годинава одлична селекција, програма во фокус на Унгарија и Австрија и автор во фокус- Срдан Голубовиќ. Имавме извонредни лауреати – Лив Улма, Владимир Самоиловски и Даг Јохан Хагеруд – рече Теодосиевска.

Фестивалот се затвори со проекција на филмот „Прасловен“ на режисерот Слободан Максимовиќ, а по проекцијата пред присутните се претставија Зоран Предин, Барбара Предин, Борис Дежуловиќ, Слободан Максимовиќ.

– „Прасловен“ е еден од најпотентните документарци во последнава година кој на сите фестивали во регионов предизвикува големо внимание. Откако ќе го погледнеме филмот сигурни сме дека во иднина за ниту еден политичар нема да биде снимен ваков филм каков што е снимен за Зоран Предин – рече селекторот на фестивалската програма, Игор Анѓелков.

The post ФИЛМОТ „ПАНОПТИКОН“ НА ЃОРЃИ СИКАРУЛИЅЕ ДОБИ ГРАН ПРИ НА „КИНЕНОВА“ За најдобра режија награден Вук Ршумовиќ за филмот „Помеѓу боговите“ appeared first on plusinfo.mk.

Три документарни и три играни филмови ќе бидат прикажани на 10. Меѓународен филмски фестивал на дебитантски филм Киненова 2025, кој ќе се одржи од 28 септември до 5 октомври.

На отворањето на фестивалот во Македонската опера и балет ќе биде прикажан филмот „Изгубениот сон на југословенскиот дрим тим“ на хрватскиот режисер Јуре Павловиќ. Останатите филмови ќе бидат прикажани во Киноверзумот во Домот на културата „Билјана Беличанец“ во Кисела Вода.

Директорот на Киненова, Небојша Јовановиќ денеска на прес-конференција рече дека Фестивалот ќе биде отворен со еден од најзначајните филмови за овие простори во последните три декади, филмот на еден од најталентираните хрватски млади режисери Јуре Павловиќ, „Изгубениот сон на југословенскиот дрим тим“.

– Се работи за филм во кој учествуваат сите најголеми екс југословенски кошаркарски легенди како што се Јуре Здовц, Дино Раѓа, Тони Кукоч, Владе Дивац, Зоран Ивановиќ, Жарко Паспаљ и останати, а неколку од овие легенди ќе бидат дел од свеченото отворање на македонската премиера на филмот на Киненова во Скопје. Дејството на филмот е за време на натпреварите на Европското кошаркарско првенство кое се одржуваше во Италија, буквално во деновите на почетокот на распадот на Југославија, на големата војна со која живееме особено генерациите кои паметат. Зошто овој филм за отворање на Киненова? Затоа што на еден крајно суптилен уметнички начин од здрава дистанца и крајно непристрасен поглед на нештата ги анализира феномените на колективен успех, колективен неуспех, заедништвото кое постоеше во минатото, а исто така и крајно сурово ги спротивставува другарството наспрема националистичките пориви – рече Јовановиќ.

Фестивалот годинава наградува тројца големи автори во светски рамки меѓу кои и еден Македонец, а тоа е Владимир Самоиловски.

– Годинашен лауреат е една од најголемите и најмаркантните европски филмски диви Лив Улман која ја добива наградата за животно дело, а третиот добитник кој ја добива наградата за особен придонес во филмската уметност е годинашниот победник на Берлиналето, тоа е Даг Јохагн Хагеруд – додаде Јовановиќ.

Селекторот на главната програма Игор Анѓелов рече дека и годинава на фестивалот ќе има вкупно шест возбудливи филмови од различни кинематографии.

– Покрај „Изгубениот сон на југословенскиот дрим тим“ на Јуре Павловиќ, уште еден наслов кој сакам да го потенцирам е словенечкиот филм „Прасловен“ на Слободан Максимовиќ, кој ќе биде прикажан на затворањето на Фестивалот. Третиот документарен филм е од германско-јапонската копродукција „Јохатсу“ („Со малку воздух“) на авторскиот двоец Андреас Хартман и Рата Мори, „Беше некогаш во Газа“ на Араб Насер и Тарзан Насер, „Паноптикон“ на Ѓорѓи Пикарулизе и „Помеѓу боговите“ од Вук Ршумовиќ – додаде Анѓелов.

Уметничкиот директор Гена Теодосиевска рече дека Даг Јохан Хагеруд е ново име во норвешката и во европската кинематографија, бидејќи со своето познавање на литературата тој како да и приоѓа на филмската уметност со една спонтаност, но и со една бунтовност, такви се и неговите филмови.

– Тој за себе вели вака „Јас сум прво библиотекар, потоа сум романописец – писател, потоа сум сценарист, а на крај сум филмски режисер“ – посочи Теодосиевска.

За своите филмови тој е добитник на многу награди. Во 2020 година тој за својот втор долгометражен филм „Чувајте се од децата“ (Beware of the Children) награден е со дури девет Аманда статуетки, додека за филмовите од неговата позната Осло трилогија „Секс“ (Sex), „Љубов“ (Love) и „Соништа“ (Dreams) е награден со највисоката награда на Нордискиот филмски совет и со наградата на Здружението на филмската критика на Норвешка. Последниот „Соништа“ му ја донесе наградата Златна мечка за најдобар филм на годинешното 75. Берлинале и наградата на Fipresci.

Даг Јохан Хагеруд е роден 1964 година, тој се школувал за библиотекар, а подоцна ги завршил Академиите за филм, театар и креативно пишување и драматургија во Стокхолм и во Осло.

Кинематограферот Владимир Самоиловски, кој е добитник на Специјалната награда за особен придонес во филмската уметност, е член на жири комисијата на Киненова.

– Среќни сме што Владимир Самоиловски е наш добитник на специјалната награда „Златна грива“ за исклучителчен придонес во филмската уметност на 10 јубилејно издание на МФФ Киненова. Со него сме горди на македонскиот филм. Неговото професионално портфолио содржи стотина долгометражни играни, документарни, кратки играни филмови, ТВ драми, тв серии, емисии. Потекнува од фамилија на филмски работници, така што веќе доста млад навлегува во тајните на филмската магија и на технологијата на ТВ и филмската камера, мотивиран од својот татко, ветеранот на македонската и југословенската филмска кинематографија, Мишо Самоиловски во чии филмови соработувал како снимател оператор. Роден е во Скопје, во 1953 година. Неговата кариера како филмски работник и професионален соработник на филм ја започнува во 1976 година кога се вработува во продуцентската куќа „Вардар филм“ – посочи Теодосиевска.

Таа се осврна и на годинашниот лауреат норвешката актерка Лив Улман, која, како што рече, е една од најзначајните актерки во минатиот, 20 век, векот на филмската уметност.

– За неа е доволно да се каже дека е „муза“ на големиот Ингмар Бергман, играјќи во десет од неговите, според многумина, најдобри филмови. Но Лив Улман, се разбира, е многу повеќе од тоа. Љубовта кон уметноста безброј пати ја докажала и на театарската сцена, но и на режисерското столче, на кое милува да седи во последните три декади од својата богата кариера. Таа сѐ уште е витална и полна со енергија, и со радост ѝ ја доделуваме највисоката награда за животно дело, заслужено вбројувајќи ја меѓу великаните кои во изминатите години ја добија нашата фестивалска награда. Во 2022 година, Лив Улман ја доби почесната награда „Оскар“ за „храброста и емоционалната транспарентност кои на публиката ѝ подарија длабоко трогателни човечки портрети на екранот“. Лив Улман е родена на 16 декември 1939 година во Токио, Јапонија – додаде Теодосиевска.

The post 3 ДОКУМЕНТАРНИ И 3 ИГРАНИ ФИЛМОВИ НА КИНЕНОВА Фестивалот се отвора со „Изгубениот сон на југословенскиот дрим тим“ на Јуре Павловиќ appeared first on plusinfo.mk.