Словачкиот премиер Роберт Фицо го напушти самитот на Европскиот совет во Брисел пред неговото завршување, за да отпатува во Србија и да му даде поддршка на Александар Вучиќ на предизборниот митинг во Нови Сад. Собирот на листата „Александар Вучиќ – Обединета Србија“, предводена од српскиот претседател во заминување е закажан за вечерва на Плоштадот на слободата, во пресрет на предвремените парламентарни избори на 25 октомври.

Вучиќ претходно потврди дека Фицо ќе биде гостин на митингот. Словачкиот премиер најави дека сака да му покаже поддршка на, како што го нарече, важен српски државник, наведувајќи дека суверената политика на Вучиќ отсекогаш му била пример. Поради патувањето, словачкиот премиер ги пропушти дел од разговорите меѓу лидерите на ЕУ за миграцијата, европската одбрана и безбедноста и за развојот на настаните на Блискиот Исток.

Во Нови Сад пристигнаа поддржувачи на владејачката Српска напредна странка (СНС) од различни делови на Војводина. Центарот на градот е затворен за сообраќај, на плоштадот се поставени бината и трибините, а трактори се паркирани долж булеварот Михајло Пупин. Српските медиуми јавуваат и за засилено полициско присуство и дополнителни возови за превоз на луѓето што доаѓаат на собирот.

Собирот има особена политичка тежина затоа што Нови Сад е градот во кој на 1 ноември 2024 година се урна настрешницата на железничката станица, при што загинаа 16 лица. Трагедијата предизвика масовни студентски и граѓански протести низ Србија, со барања за одговорност, транспарентност и борба против корупцијата. Протестното движење прерасна во најсериозниот предизвик за власта на Вучиќ во последните години.

За власта, митингот е можност да покаже дека и натаму има широка поддршка, додека студентите и опозицијата го поврзуваат незадоволството со начинот на кој се води државата, работата на институциите и одговорноста за трагедијата.

Предвремените парламентарни избори во Србија се закажани за 25 октомври. Вучиќ во септември се повлече од претседателската функција и застана на чело на изборната кампања на листата „Александар Вучиќ – Обединета Србија“, со цел повторно да ја преземе премиерската функција.

СНС е на власт околу 14 години, а изборите се одржуваат во атмосфера на длабока политичка поларизација и продолжени протести.

The post ФИЦО СЛЕТА ОД БРИСЕЛ НА МИТИНГОТ НА ВУЧИЌ ВО НОВИ САД Предвреме го напушти самитот на Европскиот совет appeared first on plusinfo.mk.