Копретседателот на Вреди Изет Меџити соопшти дека досегашниот вицепремиер задолжен за добро владеење Арбен Фетаи ќе биде именуван за специјален претставник на Владата во Брисел.

Според Меџити, Фетаи поднел оставка од функцијата вицепремиер за да може да го преземе новиот ангажман, кој ќе биде насочен кон претставување на владините позиции во европските институции.

Во изминатиот период Фетаи речиси два месеци не присуствуваше на владините седници и немаше јавни активности поврзани со ресорот што го водеше, што предизвика бројни реакции во јавноста.

Меџити истакна дека коалициските партнери во Владата начелно се согласиле дека е потребна реконструкција на владиниот состав, но додаде дека сè уште не се отворени конкретни разговори за распределбата на ресорите и идните кадровски решенија.

Најавата за новата функција на Фетаи доаѓа во период кога се очекуваат промени во извршната власт и дополнителни разговори меѓу коалициските партнери околу идната организација на Владата. Новата улога на Фетаи во Брисел треба да биде поврзана со комуникацијата и координацијата со европските институции во процесот на евроинтеграциите.

Според Канал 77, со новата функција, Фетаи практично се враќа дома. Иако е роден во Куманово, Фетаи од својата шеста година живее во Белгија. Поседува македонско и белгиско државјанство. Во Белгија има бизнис со издавање на станови кои ги поседува. Завршил политички науки и е добар познавач на европското право, а извесно време работел и во кабинетот на премиерот на Косово, како и за познати фондации и донатори.

ВИЦЕПРЕМИЕРОТ АРБЕН ФЕТАИ ПОДНЕСЕ ОСТАВКА Тврди дека заминува со крената глава и со чиста совест

The post ОТКАКО СЕ ДОКАЖА НА ТАЈЛАНД, СЕГА ЌЕ СЕ ОПРОБА ВО БРИСЕЛ!? Арбен Фетаи ќе биде специјален владин претставник во столицата на ЕУ appeared first on plusinfo.mk.

Мислам дека целиот проблем околу корупцијата на високо ниво се состои во правосудниот систем. Затоа е и покрената иницијативата за разрешување на јавниот обвинител. Мислам дека судскиот систем треба да се реформира. Работиме во таа насока со нашите партнери, изјави денеска заменик-претседателот на Владата задолжен за политики за добро владеење, Арбен Фетаи, одговарајќи на новинарски прашања за време на Регионалниот форум „Од политика до импакт: Унапредување на интегритетот и институционалните реформи во Западен Балкан“.

– Знаете дека имавме проблем и со Антикорупциската комисија, сега веќе имаме нов претседател таму и верувам дека во блиска соработка со сите институции – Владата, Собранието, антикорупциските тела и со правосудниот систем, ние ќе се бориме против корупцијата на високо ниво. Исто така, ќе бараме да има судски разрешници, конфискација на имот. Се надевам дека со новата стратегија што треба да се усвои против корупцијата ќе имаме подобри резултати, ќе имаме тримесечни известувања, за на крај да добиеме позитивен извештај од Европската комисија – одговори министерот Фетаи на новинарско прашање.

Прашан околу разрешувањето на јавниот обвинител Љупчо Коцевски тој посочи дека одлуката за тоа е донесена на Владина седница, дека е таа добро образложена и очекува да биде усвоена во Собранието.

– Да, на одржаната владина седница, ние донесовме одлука за започнување на постапката за разрешување на јавниот обвинител заради добро познати причини. Значи има добро образложение што е испратено како предлог до Собранието. Сега топката е кај Собранието и се надевам дека во одредените законски рокови, Собранието ќе постапи за негово разрешување – одговори Фетаи.

Владата на вчерашната седница го усвои предлог за разрешување на државниот јавен обвинител Љупчо Коцевски, кој што ќе го достави до Собранието. Портпаролката на Владата Марија Митева вчера изјави дека со предлогот за разрешување на Коцевски од функцијата, Владата ја продолжува постапката која согласно законските ограничувања била привремено стопирана за време на изборниот период.

– Причините за оваа иницијатива се јавни, познати, и Владата досега повеќепати ги има образложено, доследно, транспарентно и во интерес на заштита на институционалниот интегритет и одговорност. Нашата цел останува недвосмислена – јакнење на правната држава и обезбедување непречено функционирање на органите на прогон во служба на граѓаните – рече Митева.

The post ПРЕДЛОГОТ ЗА РАЗРЕШУВАЊЕ НА ОБВИНИТЕЛОТ КОЦЕВСКИ Е ДОБРО АРГУМЕНТИРАН Министерот Фетаи очекува дека Собранието без пробелем ќе го усвои appeared first on plusinfo.mk.

Во Коалицијата Вреди сме согласни и го делиме мислењето дека по изборот на Изет Меџити за градоначалник на општина Чаир, на неговото место треба да дојде нашиот предлог – Беким Сали – изјави денеска вицепремиерот задолжен за политики за добро владеење Арбен Фетаи, одговарајќи на новинарско прашање за реконструкција на Владата.

– Изет Меџити имаше две функции во Владата, министер за животна средина и заменик-премиер. Ние сметаме дека треба да предложиме едно име плус, министер за животна средина и заменик-премиер. Оваа недела верувам дека ќе седнеме со премиерот како мандатар најдоцна до утре и ќе најдеме заедничко решение – рече Фетаи.

На новинарско прашање за вчерашното соопштение на Вреди во кое имало критика за министерката за образование и наука Весна Јаневска поради настанот што се случи во Тетово и како напредува со изучување на македонскиот јазик, Фетаи вели дека министерката сама се обратила до јавноста во однос на овој настан.

– Таа кажа дека тоа беше моментална реакција и се извини за истиот настан. Јас можам да кажам дека 35 години живеев надвор и затоа не го знам македонскиот јазик, не сум го учел во училиште, но немам никаков проблем кога ќе го научам македонскиот јазик да се обратам на тој јазик. Мене не ми смета ниту еден јазик, течно говорам четри до пет јазици – додаде Фетаи, кој потврди дека почнал со изучување на македонскиот јазик.

Прашан каква е состојбата во Македонија во моментов и како државата се справува со корупција и кои се најголемите закани, Фетаи изјави дека главните проблеми кои, како што рече, исто така се дел од Извештајот на ЕК се во однос на криминалот и корупцијата, односно судството кое со години нема кредибилитет во однос на решавање на судските процеси за криминал и корупција на високо ниво.

– Вториот предизвик со кој се соочуваме е кризата во Државната комисија за спречување на корупцијата на Република Македонија (ДКСК), односно настаните што се случија таму и кои не можевме да ги решиме додека не завршат локалните избори. Трет предизвик со кој се соочуваме на кој треба да работиме е реформите во правосудниот систем. Реформи во правосудството, во судството, промена на Кривичниот законик, на начин што ќе се доближиме до добрите пракси на ЕУ – изјави Фетаи.

The post НА МЕСТОТО НА МЕЏИТИ, ДВАЈЦА ОД „ВРЕДИ“ ТРЕБА ДА ВЛЕЗАТ ВО ВЛАДАТА Коалициска математика на вицепремиерот Арбен Фетаи appeared first on plusinfo.mk.

Денес се соочуваме со нов бран на популизам и лажен национализам од ДУИ, партија која 22 години ветуваше еднаквост и напредок, но донесе само корупција, угнетување и стагнација, изјави денеска на прес-конференција вицепремиерот Арбен Фетаи, се вели во соопштението на Вреди, коешто ви го пренесуваме интегрално.

Нивната нова реторика, предводена од Али Ахмети и Бујар Османи, е очаен обид да се одвлечат вниманието на гласачите од нивните неуспеси и да се манипулираат граѓаните со страв и поделба.

Кога Али Ахмети вели „ќе се случи, народот“, тој оживува опасна, озлогласена фраза, првпат употребена од Слободан Милошевиќ во 1988 година за поттикнување омраза и конфликт во поранешна Југославија.

Ова не е само реторика. Ова е опасен повик што го загрозува мирот и единството што, заедно со меѓународните партнери, макотрпно ги изградивме во Северна Македонија.

Кога Бујар Османи, постојаниот министер на ДУИ, ни зборува за „референдум“, тој има за цел да го дефокусира вниманието на јавноста од неговото корумпирано минато за кое никогаш не дал отчет.

ДУИ, која некогаш се прогласи за „зелена“ или „мултиетничка“ партија со огранок во Делчево на границата со Бугарија каде што нема Албанци, сега се свртува кон измамнички популизам, кон лажен национализам, прогласувајќи  кризи што самата ги создаде за време на нејзините две децении на власт.

Проблемот со Али Ахмети како кум на Отворениот Балкан и Бујар Османи, кој до вчера се однесуваше како да е министер за надворешни работи на Шведска, најдобро го објаснува Арбен Џафери.

Арбен рече дека „Главниот проблем не е политичка личност која се обидува да ја препише историјата според денешните потреби, туку политиката што означува продолжување на концептите и атавизмите што претходно ја распуштија Југославија“.

ДУИ имаше секоја можност 22 години да го спроведе Охридскиот договор, целосно да го официјализира албанскиот јазик и да изгради вистинска рамноправност.

Но што направија тие?

Тие го претворија Охридскиот договор од чин на мир во алатка за клиентелизам и вазалство. Ја направија државата продолжение на интересите на елитата поврзана со организираниот криминал, додека Албанците останаа маргинализирани, осиромашени и безнадежни.

Зошто ДУИ сега зборува за „презир“ или „деградација“ на Албанците, кога самата ги исклучуваше и ги тргаше настрана од можностите за време на своето владеење? Зошто ги „открија“ недоследностите на Охридскиот договор, кои ги оставаа нерешени со децении, дури сега кога се во опозиција?

Одговорот е јасен: тие сакаат да избегнат одговорност за нивната корупција и стагнација што ја предизвикаа.

Истите луѓе што денес зборуваат за „вазалство“ беа робови на Никола Груевски и Сашо Мијалковиќ. Две децении, тие ги правеа Албанците вазали на клиентелистички систем, каде што работата и меритократијата беа заменети со партија и врски.

И знаете ли каква е стратегијата на ДУИ?

Денес, оваа партија, потоната во корупција, се обидува да ја претвори кампањата за локални избори во фиктивен национален референдум.

Наместо да нудат решенија за населбите, селото, градот, за водата, патот и канализацискиот систем што не ги изградиле, ДУИ и нејзините кандидати познати по корупциски афери се обидуваат да избегнат одговорност за своите неуспеси и за својата корупција.

Ова е манипулативна, истрошена тактика.

Мораме отворено да го кажеме тоа. ДУИ нема морал да зборува во име на „народот“. Ги претворија Албанците во сопственост на партијата, додека нивната елита се збогати преку меѓуетничка корупција. 22 години ги полнеа своите џебови, оставајќи ја Северна Македонија последна во регионот по економија и демократски стандарди.

Драги граѓани, народот јасно се изјасни на изминатите избори.

Ја отфрливте корупцијата, невработеноста и бегството на нашата младина. Побаравте промена, промена што ДУИ немаше ниту визија, ниту храброст, ниту морал да ја донесе.

Денес, ја отфрламе нивната популистичка, опасна и манипулативна реторика. Го отфрламе лажниот национализам како покритие за криминал и корупција.

Сакаме европска Северна Македонија, каде што правдата, развојот, доброто владеење и достоинството за секој граѓанин се примарни.

Затоа, апелирам до сите. Да им кажеме доста на популизмот на ДУИ и да продолжиме напред, кон силна, обединета и праведна држава!

The post АХМЕТИ ОЖИВУВА ОПАСНА ФРАЗА ОД ВРЕМЕТО НА МИЛОШЕВИЌ Вицепремиерот Фетаи предупредува на нов бран национализам од ДУИ appeared first on plusinfo.mk.

Група поранешни функционери и членови на Алијансата за Албанците кои не се согласуваат со политичкиот курс на Арбен Таравари, денеска одржаа прес-конференција, на која порачаа дека граѓаните сакаат продолжување на промените, а не враќање на стариот режим.

Меѓу говорниците беше и поранешниот министер Азир Алиу, кој истакна дека тие ја слушнале базата, разговарале со активистите и се убедиле дека „Албанците сакаат стабилност, одговорно владеење и продолжување на промените“.

– Во овој турбулентен политички период, кога стариот режим прави последни обиди да ја затемни надежта за промени, ние не реагиравме импулсивно. Разговаравме со партнерите и делувавме со смиреност и одговорност – изјави Алиу.

На настанот присуствуваше и Арбен Фетаи, кој вчера беше разрешен од страна на Таравари од функцијата претседател на партиското собрание. Тој е дел од осумтемина членови на Претседателството кои јавно изразија несогласување со политиките на актуелното раководство на Алијансата.

Незадоволните членови истакнаа дека не прифаќаат соработка со ДУИ за претстојните локални избори, како што најави Таравари, и порачаа дека нема да ја напуштат битката „на половина пат“.

– Алијансата не е создадена да биде ничија алатка. Таа е гласот на граѓаните, на промените и еднаквоста – порачаа тие, потенцирајќи дека остануваат посветени на реформите и на процесот на интеграција, како дел од коалицијата Вреди.

Во однос на последните состаноци организирани од крилото на Таравари, кои беа наречени „партиски конгреси“, тие изразија незадоволство од, како што рекоа, „ширење поделби и етикетирања“. Осудија и навреди упатени кон младите и жените Албанки, кои, според нив, не го претставуваат духот на Алијансата за Албанците.

Од другата страна, Таравари изјави дека се разрешени само лица кои јавно делувале против интересите на партијата, а за Мимоза Муса дополни дека не е јасно дали таа останува со Алијансата или со коалицијата Вреди.

The post ТАРАВАРИ ОСТАНА БЕЗ ПОДДРШКА ОД ДЕЛ ОД ПАРТИЈАТА Поранешни соработници го обвинија за предавство и враќање кон стариот режим appeared first on plusinfo.mk.

На вонредното собрание на Алијансата за Албанците од крилото на Арбен Таравари беше разрешен шефот на Собранието на партијата, Арбен Фетаи. Состанокот на Собранието, како што рече Таравари, го иницирале 2/3 од членовите, а доаѓа неколку дена откако дел од високите функционери на оваа партија се спротивставија на неговата одлука да ја напушти Владата и коалицијата. За нов претседател на Собранието на АА е избран Назим Таипи.

– Исклучивме и некои членови на претседателството кои веќе јавно се изјаснуваат против Алијансата за Албанците. Членовите на претседателството кои беа исклучени се вкупно осум од 46 членови на Централното претседателство, така што тоа продолжува со мнозинството членови, а собранието со апсолутно мнозинство во Централното собрание. За Мимоза Муса не беше донесена одлуката, бидејќи не беше добро дефинирана пораката, дали останува со Алијансата за Албанците или останува со Вреди, немаме јасна порака – рече Таравари.

Оцени дека партијата сега била почиста, бидејќи според него, оние што ја напуштиле не мислеле на народот. Таравари во моментов работи само со тројца пратеници, откако и пратеничката Мимоза Муса најави дека ќе остане дел од коалицијата Вреди во Владата.

– По заминувањето на оние кои беа заинтересирани само за власт, Алијансата за Албанците ќе расте силно и ќе стане водечка политичка сила во иднина – изјави Таравари.

Тој најави дека на Собранието била потврдена одлуката партијата да ја напушти Владата и да оди сама на локалните избори во октомври. Тој најави дека на локалните избори ќе соработува и со ДУИ и со Вреди.

– Во Битола, во Кичево, во Брвеница, во Чашка, во Преспа, во Бутел ќе соработуваме и со ДУИ и со Вреди, бидејќи само така можеме да им помогнеме на Албанците и тоа е од албански интерес, во другите општини ќе видиме….Немаме дефинитивна одлука. Не исклучуваме соработка со која било опозициска политичка партија, освен со Левица. Да сте сигурни дека со Левица нема да соработуваме – рече Таравари.

The post АРБЕН ФЕТАИ ИСКЛУЧЕН ОД ПАРТИЈАТА Таравари најави соработка за изборите и со ДУИ и со Вреди appeared first on plusinfo.mk.

Алијансата за Албанците (АА) продолжува да биде дел од Владата, бидејќи огромното мнозинство функционери продолжуваат да одат на работа. Ова го изјави вицепремиерот Арбен Фетаи во емисијата „Клик Плус“ на ТВ 21, според кого оставката на само неколку поединци од нивните должности и на Арбен Таравари од Министерството за здравство не ја води АА во опозиција.

– Делот на AА во Владата го сочинуваат околу 50 државни функционери кои се назначени на одредени позиции, најмалку 50, а можеби и повеќе. Гледам дека од нив, само тројца досега поднеле оставки, за тројца се знае дека јавно се изјасниле, за останатите не знам никого што ја напуштил Владата. Знам дека сите други продолжуваат да одат на своите работни места – вели Фетаи.

Вицепремиерот Фетаи, кој е претседател на Собранието на Алијанса за Албанците, состанокот на претседателството на партијата што се одржал токму за ова прашање го нарече циркус. Тој посочува дека не му рекол „не“ на Арбен Таравари, туку рекол „не“ на план кој, според него, не е план на Алијансата за Албанците.

– Реков „не“ на одлука што не е одлука, бидејќи не добила форма на одлука во партиските тела. Како прва точка, тоа не беше состанок на раководството, туку измислен формат на кој присуствуваа членови на партиското раководство, функционери и раководители на ограноци. Овој формат не постои никаде во статутот на партијата. Партиското собрание е единственото тело одговорно за донесување такви одлуки во АА. Па затоа решив да не легитимирам циркус – изјави Арбен Фетаи.

Вели дека не тргнале по Таравари, бидејќи како што наведе, тој одлучил оди во ДУИ.

The post „НЕ ЛЕГИТИМИРАМ ЦИРКУС ОДЛУКА“ Фетаи тврди дека Алијанса за Албанците останува во влада appeared first on plusinfo.mk.

Лидерот на едно од двете партиски крила на Алијанса за Албанците и доскорешен министер за здравство Арбен Таравари преку објава на социјалните мрежи ја коментираше видео-пораката на членот на Алијанса и вицепремиер, Арбен Фетаи, но и оставката на пратеникот Салим Сулејмани.

Таравари, меѓу другото, пишува дека „патот до достоинството не поминува со напуштање на партијата за министерска позиција“.

„Патот на Арбен Џафери не поминува покрај Владата повикувајќи 20%. Патот на промените не поминува со заканување на Албанците со затвор. Патот на промените не поминува со продажба на позицијата на пратеникот да стане амбасадор во Саудиска Арабија. Патот на достоинството не поминува со заминување од партијата во замена за министерско место. Се гледаме во октомври!“, напиша Таравари на Фејсбук.

Фетаи вчера нагласи дека партијата не е само политички субјект, туку движење кое брани непоколеблива кауза и идеал.

Тој изјави дека стои зад секој член кој бара правда и не прифаќа враќање на ДУИ без соочување со вистината.

– Нема да дозволиме ДУИ да се врати како ништо да не се случило. Тие мора да се соочат со вистините што ги избегнуваа две децении. Не станува збор за поединецот. Станува збор за нашето колективно достоинство. Мојот глас е ваш глас. Гласот на Алијансата што не се предава, кој не се продава и кој не се плаши. Ние сме гласот на патот, а тој пат никогаш не поминува покрај Али Ахмети – порача меѓу другото довчерашниот поддржувач на Таравари во видео-обраќањето.

Тој ја осуди политиката на понижување и компромиси на сметка на достоинството на Албанците, потенцирајќи дека гласот на членството е јасен и упатен кон правда и чист пат.

Премиерот Христијан Мицкоски денеска повтори дека Таравари избрал да се приклучи на криминалниот блок.

– Едниот е блок од минатото, блокот на криминал, корупција, срам, пљачка, блок кој тесно коалицираше со криминални банди. Повремено спортуваше во своите кабинети, играше фудбалчиња, баскет. Често пати се однесуваше, безобзирно кон граѓаните и знаеше да го збогати својот возен парк или возниот парк на своите најблиски со по некој ‘мајбах’, автомобил кој вреди неколку стотици илјади евра, додека граѓаните едвај врзуваа крај со крај во месецот – кажа Мицкоски.

The post „СЕ ГЛЕДАМЕ ВО ОКТОМВРИ“ Таравари им одговори на Фетаи и на Мицкоски appeared first on plusinfo.mk.

Порталот Фокус открива дека Фетаи била задолжена од страна на Вишото јавно обвинителство да го застапува предметот пред Апелациониот суд Скопје, каде што првостепената пресуда на Основниот кривичен суд Скопје била обжалена.

Фатиме Фетаи, според Фокус, поднела предлог да се одбие жалбата на Јованов, а да се уважи жалбата на скопското јавно обвинителство, кое побарало построга кривична санкција за осудениот, кој пред неколку дена ја прегази и ја усмрти 22-годишната неготинчанка Фросина Кулакова.

Како што дознава Фокус, обвинителката Фетаи смета дека првостепениот суд, одмерувајќи ја казната, ги ценел олеснителните околности на Јованов (дека бил млад, дотогаш неосудуван, студент), но ги занемарил отежителните околности.

„При изборот на видот на санкцијата, наоѓам дека судот требало да ја цени личноста на обвинетиот, кој, за жал, е со ниска морална свест во смисла на неговата возраст, општествен статус и држење пред судот. Во текот на целата главна расправа обвинетиот покажал манипулативно однесување и негирање на материјалните, така и на вербалните докази, а самиот факт дека истиот не ја признал својата вина пред судот и доброволно да ги прифати последиците од своето однесување, со кое нешто би покажал сериозно каење за стореното, доволно зборува за неговата свесност и истрајност како млада личност да се занимава со продажба на наркотична дрога, во станови специјално изнајмени за таа намена, каде таргет е младата популација, што е доволна слика за неговата ниска морална свест и лукративни побуди на лесен начин да дојде до профит на незаконит начин“, истакнала Фетаи.

The post И ФАТИМЕ ФЕТАИ СМЕТА ДЕКА СУДОТ ЗГРЕШИЛ ВО ИЗБОРОТ НА КАЗНАТА НА ВАСИЛ ЈОВАНОВ На дилерот местото му е во затвор, а не во дом appeared first on plusinfo.mk.

Вицепремиерот Арбен Фетаи вели дека Обвинителството треба да го повика на распит првиот човек на ДУИ, Али Ахмети, бидејќи во изјава за косовските медиуми кажа дека знаел за локацијата на којашто се крие поранешниот прв вицепремиер Артан Груби.

Според Фетаи, Обвинителството има законска обврска да го повика Ахмети на распит.

„Али Ахмети изјави дека има сознанија за локацијата на Артан Груби, по кого има меѓународна потерница. Јавното обвинителство, врз основа на оваа јавна изјава, има законска обврска да го повика г. Али Ахмети да го праша каде се наоѓа лицето кое го гони правдата на државата“, напиша Фетаи.

Инаку, првиот човек на ДУИ, Али Ахмети вели дека Артан Груби не е во бегство, бидејќи се наоѓа на албанска територија, давајќи му етничка конотација на бегството на поранешниот втор човек на партијата.

Ахмети вети дека Груби ќе се врати и ќе се појави пред органите на прогонот, „но правдата не смее да биде одмаздничка и селективна“.

– Господинот Груби, според информациите што ги имам, не сум го сретнал, но е во ред. Неговата локација е секако на албанска територија, тоа е процес на кој мора да има епилог. Тој не побегнал од Македонија, подготвен е да се појави пред органите на правдата за да ги почитува законите, но не во одмазничка и селективна правда – вели Ахмети.

ГРУБИ ЌЕ СЕ ВРАТЕЛ, АМА САМО АКО НЕ МУ СЕ СПРЕМАЛА „ОДМАЗДНИЧКА ПРАВДА“ Ахмети потврди дека бегалецот се наоѓа на албанска територија

The post ОБВИНИТЕЛСТВОТО ИМА ЗАКОНСКА ОБВРСКА ДА ГО ПОВИКА АХМЕТИ НА РАСПИТ Ќе ја открие ли лидерот на ДУИ точната локација на Груби? appeared first on plusinfo.mk.