Македонскиот театарски фестивал „Војдан Чернодрински“ – Прилеп објави отворен повик за учество на второто издание на пичинг-форумот „Драмолетање“, кое ќе се одржи за време на 60. издание на фестивалот во јуни 2026.

„Драмолетање“ претставува платформа посветена на откривање и поддршка на нови драмски гласови, развивање и презентација на оригинални драмски текстови, поттикнување креативен дијалог меѓу авторите, режисерите и театарските професионалци, како и создавање можности за сценска реализација на нови македонски драми.

На повикот може да се пријават драмски автор(к)и – државјани на Република Северна Македонија со оригинални и неизведени драмски текстови. Секој автор може да пријави еден драмски текст.

Пријавите треба да содржат: кратка биографија на авторот (до 150 збора); контакт-информации (телефон, е-пошта); краток синопсис/резиме на драмата (до 1 страница); целосниот драмски текст и мотивациско писмо (до 1 страница).

Пријавите се испраќаат на e-пошта: dramoletanje@mtf.com.mk, со назнака во Subject: „Пријава за Драмолетање 2.0 – [име и презиме на авторот и наслов на драмата]“.

Рокот за пријавување е до 1 март 2026 година. Резултатите од повикот ќе бидат објавени на www.mtf.com.mk најдоцна до 15 мај 2026 година.

Пичинг-форумот ќе се одржи за време на МТФ „Војдан Чернодрински“ (13-14.6.2026). Апликациите ќе бидат оценети од страна на стручна комисија која ќе одбере драми врз основа на нивната оригиналност, релевантност и продукциски потенцијал. Избраните автори ќе имаат можност да учествуваат во менторска подготовка за својата презентација, да ги претстават своите драми пред стручна публика, режисери, драматурзи и продуценти, како и да воспостават контакти за понатамошна продукциска реализација.

По форумот, дел од избраните драми ќе бидат објавени во второто издание на книгата „Драмолетање“ во издание на МТФ „Војдан Чернодрински“ со цел да се обезбеди видливост и поддршка на современата македонска драма.

Како резултат на „Драмолетање 1.0“, неодамна беше издадена книга во која се поместени четири драми избрани на првото издание на „Драмолетање“. Изданието е достапно електронски на www.mtf.com.mk.

The post ПОВИК ЗА ДРАМСКИ АВТОРИ Фестивалот „Војдан Чернодрински“ отвори втор конкурс за „Драмолетање“ appeared first on plusinfo.mk.

Секој од четирите текстови поместени во книгата „Драмолетање“ носи специфичен авторски глас и отвора простор за ново сценско истражување – од интимни прашања, преку социјални и политички теми, до хумор и апсурд. Со оваа книга не само што ја претставуваме новата генерација драмски автори, туку и поставуваме темели за идни соработки и нови претстави, рече Петар Антевски, приредувач на изданието „Драмолетање“, во продукција на Македонскиот народен театар, што беше промовирано завчеравечер на Факултет за драмски уметности во Скопје.

Низ читачка промоција, што ја режираше Шенај Мандак, на публиката ѝ беа доближени четирите драми. Ова издание е резултат на желбата за осовременување на најстариот македонски театарски фестивал. Комисијата судејќи според три критериуми – релевантност, оригиналност и продукциска вредност, а во состав од Шенај Мандак (режисерка), Ангела Стојановска (глумица) и Петар Антевски (продуцент) избра четири текста: „Голи души“ од Иван Додовски, „Ложа“ од Марио Стојаноски, „Хитлер е жив“ од Ева Камчевска и „Чудесен лек“ од Коста Бојчески.

– Современата македонска драма е најзапоставениот сегмент во македонскиот театар. Иако постои силен творечки потенцијал, голем дел од новите драмски текстови ретко стигнуваат до сцената. Затоа решивме да направиме конкретен чекор и да создадеме простор каде што авторите ќе се сретнат со режисери, продуценти и театри – и каде нивните текстови ќе добијат реална можност за живот. Така се роди програмата „Драмолетање“. Во  јуни 2025 година го имавме првиот пичинг-форум каде четворицата автори имаа можност да ги претстават своите драмски текстови пред професионалната публика меѓу кои и директори на театри и режисери. Првиот повик покажа колку е ова потребно – пристигнаа 14 драми со различни теми и стилови – рече Антевски.
Идејата беше книгата да биде во дигитално издание, достапна е на нашата интернет-страница www.mtf.com.mk, имаме малку испечатени примероци и за да не слушаме изговори од типот „Не ја најдовме книгата“ – посочи Ана Стојаноска, директорка на МТФ „Војдан Чернодрински“ и професорка на ФДУ.

– Зошто сме фокусирани на македонската драма и театар? Не затоа што го предавам овој предмет, не затоа што и самата сум авторка чии драми не се поставени на сцена, освен една радиодрама, туку сметам дека е важно зашто нема ниту еден национален театар без национална драма. Таа максима многу е релевантна само кога има некаква си програма политичка, па така добро звучи. И сè е супер, ама тоа лебди во воздухот. Лично мојата мисија е колку можам да ја промовирам македонската драма, без разлика што и да работам и како директорка на најзначајниот театарски фестивал, којшто не само со мене, тука е и Катерина Коцевска, сите ние некако се бориме да има повеќе македонски драми. Ама проблемот не е до нас во процесот на селекција, туку што тие драми не се поставени. Идејата на „Драмолетање“ беше да се премости тој момент, односно да не останат драмите во некоја фиока, туку да може да се претстават пред оние кои можат да ги постават – режисерите, продуцентите, директорите на театрите. Се надевам дека оваа мисија ќе продолжи и конечно можеби ќе здосадиме и ќе некој ќе реши да ги постави на сцена. Смачено ми е кога се зборува дека не сме имале драми. Тоа не е точно, имаме одлични автори кои пишуваат, го имаме Дејан Дуковски кој и вечерва е со нас, имаме автори што поминале низ овој факултет, ама треба да го направиме тој мост меѓу нас. Ова е мојот апел до јавноста за репертоарната политика, дека мора да се внимава многу за тоа дали ќе се постави домашен текст на театарските сцени. Благодарна сум на сите што испратија текстови. Намерно ги вклучив младите луѓе во селекцијата на драмите, затоа што сметам дека тие се релевантни, оти тие го живеат денешниот театар. Се надевам драмите нема да останат само помеѓу кориците на оваа книга – истакна Стојаноска.

Менторските работилници ги водеше м-р Јанко Љумовиќ, професор на Факултетот за драмски уметности во Цетиње и еден од најистакнатите  регионални експерти за театарска продукција. Неговото искуство и пристап им овозможија на авторите не само да стекнат важни вештини за нивна професионална презентација пред стручна публика.

Дизајнот на книгата го направи Ема Велковска, а лектурата е на Ивана Кузманоска.

Читаа актерите: Ирена Димеска, Давид Димоски, Милан Петровски, Озан Идрис и Ангела Пејковска.

„Храбриот нов театар“ е слоганот што Ана Стојаноска го најави за 60. јубилејно издание на фестивалот „Војдан Чернодрински“, што ќе се реализира од 12 до 19 јуни 2026 година во Прилеп.

The post МАКЕДОНСКИТЕ ДРАМИ ТРЕБА ДА СЕ ВРАТАТ НА ТЕАТАРСКАТА СЦЕНА Промовирани 4 драми во програмата „Драмолетање“ appeared first on plusinfo.mk.

Омажот со првенците на Драмски театар е и во чест на наградените на годинашниов Фестивал, а најдобрите остварувања и најдобрата претстава фестивалското жири во состав на Ѕвездана Ангеловска, актер и режисер, Бајруш Мјаку, актер и театрологот од Србија, Александар Милосављевиќ, ќе ги соопшти денеска напладне.

На програмата на фестивалот беа 13 претстави, помеѓу кои „Мој термин“ на МНТ, „Вечера за глупаци“ на театар „Комедија“, „Глембаеви“ на Прилепскиот театар, „Вообразен болен“ на Кумановскиот, „Мојот маж“ на Драмски театар, „Мурлин Мурло“ на Албански театар, „И коњите ги убиваат, зар не?“ на Битолскиот, „Страст и алчност“ на Тетовскиот, „Едип коментари“ на Штипскиот, „Славната Флоренс“ на Турски театар, „Крик за љубов“ на Охридскиот „Едвард раце ножици“ на Театарот за деца и младинци и претставата на Велешкиот театар „Херои 04:33“.

Публиката не можеше да ја види само претставата на Кумановскиот театар која беше одложена поради болест на актер.

Фестивалот понуди и промоции и трибина за Театарот во ковид ситуација, проблемите и решенијата. Токму поради ковидот, Фестивалот лани не се одржа, а годинава е со протоколи и во друг термин. Од Фестивалот се надеваат дека в година оваа престижна манифестација ќе се одржи во редовниот термин во јуни.

The post СЕ СПУШТААТ ЗАВЕСИТЕ НА ФЕСТИВАЛОТ „ВОЈДАН ЧЕРНОДРИНСКИ“ Омаж „Драмски за Конески“ во чест на наградените appeared first on plusinfo.mk.