Новото законско решение ќе доведе до повисок квалитет на високото образование, вели министерката за образование и наука Весна Јаневска.

Наскоро ќе има јавни расправи на кои сите засегнати ќе можат да ги дадат своите забелешки, додаде таа.

– Во однос на коментари, тоа се релативно минорни забелешки. Но, како што реков, ние на секој универзитет ќе имаме јавна расправа, со почеток од следната недела, каде што академската заедница ќе може јавно да ги даде своите примедби или коментари или дискусии. Секако, ќе водиме сметка, сè што е издржано да биде вклопено во законот. Без оглед дали се млади или стари универзитетите, ние квалитетот на високото образование мора да го поткренеме и не може да постои дискриминација во однос на годините на постоење на универзитетот. Сите наставници и сите студенти треба да бидат рамноправни и да ги исполнуваат одредбите и условите предвидени за сите на целата територија – вели Јаневска.

Таа нагласи дека автономијата на универзитетите со овој закон, никако не е чепната.

– Не се навлегува во автономијата, но, отсега натаму ќе се бара отчетност. Ние во овој момент бараме само да заживее отчетноста без никакво мешање во нивната академска слобода – вели министерката.

The post НЕМА ДА СЕ ЧЕПКА ВО АВТОНОМНОСТА НА УНИВЕРЗИТЕТИТЕ, АМА ЌЕ СЕ БАРА ОТЧЕТНОСТ Новиот закон ќе донесе повисок квалитет на високото образование appeared first on plusinfo.mk.

Проектот „Никогаш повеќе сама“, кој компанијата dm drogerie markt го реализира со цел унапредување на менструалната правда и обезбедување бесплатни хигиенски влошки за студентките на државните факултети, продолжува и во вториот семестар од студентската 2025/2026 година.

Врз основа на досегашните резултати и утврдените потреби, проектот влегува во следната фаза со проширен обем и дополнително зајакнати активности.

Во рамки на вториот семестар веќе се распределени повеќе од 6 000 пакувања Jessa влошки, односно повеќе од 200 000 поединечни хигиенски влошки, во вкупна вредност од 655 000 денари.

Оваа донација се надоврзува на активностите од првиот семестар, кога во октомври 2025 година беа доделени 3 850 пакувања, односно повеќе од 120 000 поединечни Jessa влошки, во вредност од 420 000 денари.

Со вкупната донација во двата семестри, во текот на студентската 2025/2026 година се обезбедени повеќе од 320 000 поединечни хигиенски влошки, чија вредност надминува 1 милион денари.

Поддршката претставува продолжение на активностите започнати во октомври 2024 година, кога проектот „Никогаш повеќе сама“ беше воспоставен на сите државни факултети низ земјата преку поставување на повеќе од 220 диспанзери со бесплатни хигиенски влошки. Во текот на студентската 2024/2025 година, во двата семестри, беа донирани и 230 000 поединечни Jessa влошки, со што вредноста на донацијата беше 1,8 милиони денари.

„Многу ме радува што продолжуваме со полна пареа да го реализираме проектот ‘Никогаш повеќе сама’. Овој проект за нас не е само донација или краткорочна акција, туку долгорочна заложба да бидеме вистинска поддршка таму каде што е најпотребно. Затоа нашата цел е трајно да придонесуваме кон намалување на менструалната сиромаштија и создавање услови во кои секоја млада девојка може да студира со повеќе сигурност и мир. Остануваме посветени овој проект да продолжи да расте и да допира до сè поголем број студентки низ државата.“ – изјави Кристина Дуранска, менаџер за маркетинг и комуникација во dm.

Главниот лик на ,,Никогаш повеќе сама“ е Bestie  – виртуелна најдобра другарка на секоја студентка. Со цел унапредување на квалитетот на имплементацијата и обезбедување навремено и редовно полнење на диспанзерите, од ноември 2025 година е отворен повик за пријава на Bestie амбасадорки наменет за студентки на сите факултети кои континуирано ќе ја проверуваат состојбата на диспанзерите и ќе ја информираат компанијата. Нивната улога е да придонесат кон подобра координација на проектот и одржување на континуитетот на поддршката на терен.

Со реализацијата на проектот „Никогаш повеќе сама“, компанијата продолжува да го гради својот пристап кон општествено одговорното работење, насочен кон намалување на бариерите поврзани со менструалната сиромаштија и создавање подостојни услови за студирање. Вкупната вредност на донациите во рамки на проектот досега изнесува повеќе од 2,8 милиони денари.

Иницијативата „Никогаш повеќе сама“ претставува симбол на инспирација, охрабрување и заедништво. Таа ја нагласува важноста од заедничка поддршка и солидарност, при што Bestie и dm заедно придонесуваат кон создавање општество во кое секоја жена има непречен пристап до основни хигиенски производи. На тој начин се гради средина во која се почитуваат достоинството, слободата и еднаквоста, а чувството на сигурност и припадност станува заедничка вредност.

The post ПОВЕЌЕ ОД 320.000 БЕСПЛАТНИ ХИГИЕНСКИ ВЛОШКИ ЗА СТУДЕНТКИТЕ Вредноста на проектот на компанијата dm надминува милион денари appeared first on plusinfo.mk.

На Универзитетот „Св. Кирил и Методиј“ – Скопје денеска започна првиот рок за пријавување на кандидати за запишување во прва година додипломски студии за академската 2025/2026 година. Пријавувањето ќе трае два дена, денеска и утре (19 и 20 август).

Според конкурсот на УКИМ, на 23-те факултети во состав на Универзитетот се нудат вкупно 9.719 места. Од нив:

– 4.683 места за редовни студенти финансирани од државниот буџет,

– 4.081 места за редовни со кофинансирање,

– 955 места за вонредни студенти.

И оваа година најголем број слободни места има на Факултетот за информатички науки и компјутерско инженерство – ФИНКИ (1.020), Природно-математички факултет (910), Филозофски факултет (880), Филолошки факултет (810), Медицински факултет (760), Економски факултет (700), Правен факултет (610) и Факултетот за електротехника и информациски технологии – ФЕИТ (590).

Редовните студенти кои ќе бидат финансирани од државниот буџет ќе плаќаат партиципација од 200 евра, додека студентите со кофинансирање и вонредните ќе треба да издвојат по 400 евра.

Сите заинтересирани кандидати задолжително треба да се регистрираат на www.upisi.ukim.mk и да ја пополнат електронската пријава преку iKnow-системот. Во конкурсот детално се наведени условите за запишување, критериумите, роковите и потребната документација.

Првиот уписен рок трае денеска и утре (19 и 20 август). Вториот рок ќе се одржи на 11 и 12 септември, а третиот, доколку има преостанати слободни места, е закажан за 24 септември 2025 година.

The post ЗАПОЧНА ПРВИОТ УПИСЕН РОК НА УКИМ Речиси 10.000 места за идните студенти appeared first on plusinfo.mk.

Министерството за образование и наука на Украина објави дека по завршувањето на пролетниот семестар, значителен број мажи над 25 години ќе бидат исклучени од универзитетите.

Оваа информација ја потврди заменик-министерот Михаило Виницки во интервју за „Џеркало тижња“, нагласувајќи дека во тек се инспекции на повеќе од 100 високообразовни институции.

Проверки на факултетите: „Физичко присуство“ и преглед на документи

Според Виницки, инспекторите проверуваат дали мажите кои формално се запишуваат на факултети всушност посетуваат настава. Контролите се спроведуваат директно во училниците, со преглед на документацијата и резултатите од испитите.

– Веќе е јасно дека многу студенти ќе бидат исклучени врз основа на испитите во мај-јуни – рече Виницки.

Примерни студенти и иднината на „човечкиот капитал“

Иако се очекува голем број исклучување, заменик-министерот истакна дека има и примерни студенти меѓу постарите мажи – оние кои ја разбрале важноста на образованието и се посветиле на учењето.

– Овие луѓе го претставуваат идниот човечки капитал на нашата земја и ние сакаме да ги поддржиме – додаде тој.

Намалување на буџетските места за постдипломци

Оваа вест доаѓа во време кога се очекува да се намалат буџетските места за постдипломски студии. Додека минатата година имаше 7.000 места, оваа година ќе има околу 5.000.

Откако студентите над 25 години ќе бидат исклучени од факултетот, тие можат да бидат мобилизирани според украинскиот закон за мобилизација бидејќи повеќе немаат причина за одложување.

Оваа вест доаѓа во исто време кога рускиот претседател Владимир Путин изјави дека Русија регрутира 50-60.000 волонтери месечно, додека Киев насилно регрутира 30.000 нови војници „како кучиња“ од улиците.

The post УКРАИНА ЌЕ ГИ МОБИЛИЗИРА СТУДЕНТИТЕ Сите над 25 години ќе бидат избркани, инспекции на над 100 високообразовни институции appeared first on plusinfo.mk.

Таа вели дека предлозите што стигнале до Бирото за развој на образованието се однесувале, генерално, на зголемен број на часови на секој од предметите и дополнување на дополнителни предмети. Доколку би се зеле предвид тие предлози, учениците би останувале на училиште и до 11 часови.

– Кога Бирото го направи распоредот на часови, според барањата на стручната јавност, здруженијата на наставниците, излезе дека учениците секоја година, од прва до четврта, треба да бидат на училиште најмалку 10 до 11 часа. За да нема забуна, 10 до 11 часа во работниот ден. Тоа не е можно и жал ми е што нема да можеме баш така како што поединечно замислуваат да го остваруваме. Сето тоа ќе треба да се изанализира, искомбинира. Да, нашите деца да бидат подолго на училиште, тоа што Владата како проект го предлага, но тие не може да бидат 11 часа во денот на часови – истакна министерката, додавајќи дека покрај наставни часови учениците треба да имаат и воннаставни активности.

Одговарајќи на новинарски прашања по отворањето на клубот „Иноваториум“ во Титан УСЈЕ министерката рече и дека наставните програми ќе се менуваат од септември и дека учениците од септември ќе имаат нови учебници за средно гимназиско.

– За концепцијата ќе имаме приближно една година време за да ја стокмиме така како што треба да изгледа и да биде соодветна на програмите од Европска Унија за нашите гимназијалци, кои ќе го продолжуваат школувањето овде, а дел од нив и во странство, да се подготвени на соодветното ниво за понатамошното образование.

Јаневска одговори и на прашања во врска со трошоците за упишување семестар на државните факултети, на реагираше Универзитетското студентско собрание на Универзитетот „Кирил и Методиј“.

– Комуницирав со сите декани од УКИМ и цената е секаде спуштена на минимум. Некаде изнесува нула, некаде изнесува 2.000 денари за цела година. Освен на два факултета, каде што е навистина неопходно да се обезбедат дополнителни средства за подобрување на студиските програми. Денеска имаме состанок, ќе видиме како ќе заврши сето тоа – рече министерката и рече дека ќе биде разговарано и за други теми.

На прашање кога би профункционирал електронскиот индекс како најавен проект, Јаневска одговори дека е „можеби преамбициозно да биде на сите факултети“. Како што рече, „имаме добра шанса и важно е да почнеме, а потоа продолжуваме“.

Притоа посочи дека мобилната апликација за Е-дневник која МОН ја промовираше завчера, била попосетена и од апликацијата ТикТок.

– Изработена е од стручниот тим во МОН и со гордост го соопштувам тоа – додаде министерката.

The post НАЈМНОГУ ПРЕДЛОЗИ ИМА ЗА ЗГОЛЕМУВАЊЕ НА БРОЈОТ НА ЧАСОВИ Ќе продолжи дебатата за гимназиското образование appeared first on plusinfo.mk.

Во последниот период, Министерството за образование и наука (МОН) донесе одлука за затворање на шест приватни научни институти во Македонија поради неисполнување на основните законски услови и неактивност.

Како што нѐ информира Министерството, два од затворените института се суспендирани поради неактивност во текот на подолг временски период, додека останатите четири не ги исполнувале основните критериуми за работа.

Меѓу нив се Институтот за бизнис економија во Скопје, Институтот за геобиологија, археологија, подземни води и екологија во Скопје, Институтот за мода Фешн Дизајн од Тетово, Институтот за одржлив развој и управување со климатски промени МИЛИЕУКОНТАКТ МАКЕДОНИЈА, Институтот за наука, алтернатива, култура и уметност – Скопје и Институтот за научни истражувања – ЛАОР Тетово.

Овие институти не успеале да ангажираат соодветен научен кадар, вклучувајќи истражувачи со висок степен на образование – докторанти и магистри, како што налага Законот за научно-истражувачка дејност.

Инспекторите сметаат дека проблемите со научните институти се длабоки и вклучуваат не само недостиг на кадар, туку и недоволна посветеност на истражувачките активности и слабата организација на институциите. Министерството за образование, пак, истакнува дека ова е дел од напорите да се унапреди квалитетот на научната дејност во земјата и да се елиминираат неправилностите кои влијаат на кредибилитетот на образовниот систем. Во неколку државни универзитети веќе се одземени неправилно стекнати звања и одредени луѓе се отпуштени од работа.

Министерката Весна Јаневска, која активно се залага за подобрување на високото образование и на научната сцена во Македонија, посочува дека научните институти мора да се фокусираат на истражувачка работа.

– Неопходно е да имаат јасни програми за работа, редовно да објавуваат резултати и да ги покажат ефектите од своите истражувања. Важно е да се подигне нивото на стручност и квалитет во овие установи за да се овозможи подобар развој на науката и иновациите во Македонија – рече министерката.

Заедно со затворањето на шесте институти, МОН најави дека 15 други институти имаат добиено насоки за подобрување на нивните активности во рок од три месеци. Тоа значи дека ако не ги исправат забелешките и не ја зголемат нивната ефикасност, можат да се соочат со слична судбина.

Оваа „чистка“ не се однесува само на приватните институти, туку и на државните универзитети. Министерството за образование продолжува со мониторинг на изборите на кадар и процесите на акредитација, а во последниве месеци утврдени се нерегуларности во изборите на академски звања на некои државни универзитети.

Јаневска истакна дека не само што научните институти мора да ги исполнат законските услови, туку треба да работат во согласност со стандардите што се наметнуваат во европски рамки, за да се обезбеди нивната ефикасност и релевантност на меѓународен план. Тие не можат да бидат само форми за стекнување финансиски средства, туку треба да играат клучна улога во унапредување на научната и образовната сцена.

– Приватните и јавните научни институти кои не се подготвени да ги исполнат овие основни стандарди и обврски ќе продолжат да се соочуваат со затворања и санкции, кои ќе бидат последица на неуспехот да обезбедат квалитетна научна дејност. Одлуките на Министерството за образование и наука се јасен сигнал дека се бара повеќе од само формално исполнување на прописите. За успешна научна институција, потребно е не само да има кадар, туку и да го има вистинскиот кадар што ќе работи на високо ниво и ќе донесе вистински резултати – истакна министерката.

The post НЕ Е САМО ДА ОТВОРИШ НАУЧЕН ИНСТИТУТ, ТРЕБА ДА НАЈДЕШ И НАУЧНИЦИ Затворени 6 институти, на уште 15 им виси катанец appeared first on plusinfo.mk.

– Наскоро преку „Мој термин“ ќе овозможиме специјализантите кои што специјализираат во сите наши универзитети на медицинските факултети, да имаат пристап и тие да можат да пдоготват извештај со нивно име и презиме. Очекуваме тоа наскоро да го направиме заедно со Лекарската комора – рече Таравари на денешната прес-конференција во одговор на новинарско прашање.

Директорот на Клиника за детски болести Реџеп Мемеди изјави дека на оваа Клиника има дежурни лекари специјализанти кои работат во тим, но напомена дека постои недостиг на кадар.

-На Клиниката за детски болести имаме дежурни лекари 24 часа, кои работат во тим, како во сите други специјални здравствени институции. Недостатокот на кадар постои и на нашата клиника, како и на сите други клиники. Министерството прави напори да се ублажи недостатокот на лекари, со новите вработувања. Во однос на зголемување на бројот на лекари специјалисти на дежурства, тоа е системски проблем кој треба да се решава. Специјализантите се лекари со лиценца и тие се компетенти да лекуваат пациенти, додаде Мемеди.

The post ТАРАВАРИ НАЈАВУВА ПРОМЕНИ Специјализантите ќе можат да издаваат извештаи преку „Мој термин“ appeared first on plusinfo.mk.

„Почитувани граѓани и граѓанки на Србија, ние, наставниците, соработниците и истражувачите на универзитетите низ Србија, одлучно стоиме со нашите студенти во заедничката борба за подобро општество“, велат универзитетските професори во Србија.

Тие ги осудија обидите на власта да ги заплаши колешките и колегите студентки и студенти преку јавно споделување на нивните приватни податоци, со ширење невистини за нив, како и со испраќање полицајци и агенти на Безбедносно-информативната агенција на нивната и на адресата на нивните родители.

„Повторно апелираме до надлежните органи совесно и одговорно да си ја вршат работата“, порачаа професорите.

Студентите пред повеќе од еден месец почнаа да блокираат повеќе од 60 факултети низ Србија, како и две универзитетски централи. Тие бараат објавување на комплетната документација поврзана со урнувањето на настрешницата на Железничката станица во Нови Сад, што се случи на 1 ноември, при што загинаа 15 лица, отфрлање на кривичните пријави против студентите и активистите уапсени на протестите, како и прекинување на постапката.

Српската влада ги осудува протестите и блокадите што повеќе од еден месец се одржуваат во градовите низ државата.

The post ПОВЕЌЕ ОД 2.000 ПРОФЕСОРИ ВО СРБИЈА ГИ ПОДДРЖАА СТУДЕНТСКИТЕ ПРОТЕСТИ Испратија писмо до јавноста appeared first on plusinfo.mk.

Министерката додаде дека оваа Влада е посветена на дигиталната трансформација, што е неопходна.

– Владата формира и Министерство за дигитална трансформација, бидејќи тоа е еден од приоритетите. Сите студенти ќе добијат ваучери за да им се овозможи пристап до новата технологија. Ваквите состаноци се исклучително корисни и Министерството ќе биде партнер на оние, кои сакаат да се вклучат во позитивните промени на државата – подвлече министерката.

На новинарско прашање, таа одговори дека различно се дигитализирани универзитетите, но, различни се и состојбите по факултети. Цел ќе биде, нагласи таа, тоа да се унифицира.

– Според моите сознанија, универзитетот во Штип е во напредна фаза – рече министерката.

Запрашана околу извештајот за Тетовскиот универзитет, каде биле констатирани прекршоци од Инспекторатот, таа одговори дека тоа е точно и оти тоа ќе биде јавно објавено, останал уште мал дел од процедурата, што завршувал, утврдени биле неколку неправилности.

Бленди Ходаи од Форум за образовни промени рече дека дигитализацијата не треба да е луксуз, туку неопходност за студентите.

– Дигитализацијата на државните универзитети не треба да биде луксуз, туку е неопходност за сите студенти да не трчаат по шалтери и да не чекаат предолго за бирократски работи, како потврда за редовен студент. Во светот, тоа може да се направи со еден клик. Овој настан ќе придонесе за идентификување на сите проблеми со што универзитетите се соочуваат, ќе се изготви документ и ќе се бара забрзување на процесот на дигитализација на државните универзитети. Студентите имаат многу проблеми, чекањето по шалтери не треба да биде еден од тие проблеми – дециден беше Ходаи.

Притоа, Ходаи нагласи дека на студентите на државните универзитети воопшто не им треба фитнес карта, бидејќи, наместо тоа, тие трчаат по професори да земат потпис, оценка, индекс, чекаат во редици на шалтер.

Александар Николовски, претседавач на Националното студентско тело и претседател на Студентското собрание на УКИМ, рече дека што се однесува до УКИМ, од овој семестар дигитализирале два обрасци, за упис и за заверка на семестар. Тековно работеле со Државниот завод за статистика за уште три документи да бидат дигитализирани, од следниот семестар уште три, потврдата за редовен студент, уверението за упис и уште еден образец. Од Министерството побарале да се промени правилникот што утврдувал дека индексот мора да биде во книжна форма.

Конференцијата е во организација на Форумот за образовни промени, Институтот за добро управување и евроатлантски перспективи и Асоцијацијата за младинско зајакнување.

Настанот има за цел да ги обедини ректорите на сите државни универзитети, претставници од Комисијата за образование и наука при Собранието на Република Северна Македонија, пратеници на Клубот за млади пратеници, како и други релевантни засегнати страни, со цел заеднички да бидат разгледани предизвиците со што се соочува процесот на дигитализација на државните универзитети и развивање конкретни препораки за забрзување на истиот во нашата земја, беше појаснето пред почетокот на конференцијата.

The post ДИГИТАЛИЗАЦИЈАТА НА ФАКУЛТЕТИТЕ ДОЦНИ, НО ЌЕ БИДЕ ПРИОРИТЕТ Јаневска вели дека владата посветено работи на проблемот appeared first on plusinfo.mk.

За последните десет години, бројот на студенти во земјава се намалил за 7.043, односно за 12 проценти, покажува истражувањето на Центарот за граѓански комуникации (ЦГК). Најголем пад од 11.150 студенти, односно 22 отсто има на државните универзитети. Наспроти тоа, на приватните има 4.054 или 56 проценти студенти повеќе. Кај верските високообразовни установи има 53 или 20 отсто повеќе студенти.

Бројот на студенти во земјава го достигнал најниското ниво во пандемиската 2020/21, само малку повеќе од 50 илјади. По порастот во следните две учебни години, вкупниот број студенти повторно паднал во последната учебна година.

Бројот на студенти на државните факултети постојано се намалува во последните десет години и од некогашните скоро 52 илјади студенти, сега е сведен на едвај нешто повеќе од 40 илјади. Најголем губитник воопшто е најголемиот државен универзитет, скопскиот УКИМ, каде за десет години има скоро 5 илјади студенти помалку.

Во тие рамки, во апсолутни бројки, најмногу студенти загубиле Економскиот факултет во Скопје, 2.273, Филолошкиот факултет 1.844 студенти и Градежниот факултет, 689.

Во однос на процентуалните загуби, најмногу студенти од УКИМ загубил Шумарскиот факултет – 69 %, потоа Филолошкиот кој загубил 64 % од студентите, потоа Градежниот со загуба од 62 %, Земјоделскиот со 60 % и Правниот факултет, 55 %.

Спротивно, од сите 23 факултети на УКИМ, само на четири има повеќе студенти, споредено со бројот од пред десет години. Најголем пораст има на ФИНКИ, 3.081 студент или 188 % повеќе студенти. Следи Медицинскиот факултет со 1.037 или 55 % студенти повеќе, па Фармацевтскиот факултет со 106 или 18 % повеќе студенти, и Факултетот за дизајн со 43 или 10 % повеќе студенти.

Вкупниот број на студенти на приватните високообразовни установи, осцилира од година во година, иако збирно, во последната учебна година имало 4.054 студенти што е 56 % повеќе отколку пред десет години. Таму, најмногу студенти имало претходната учебна година, 2022/23, кога имало и најголем годишен пораст, додека најмалку имало во учебната 2018/19.

Убедливо најмногу студенти во земјава има на медицинските науки, повеќе од 10 илјади или дури 20 % од студентите се запишани на некоја од медицинските високообразовни установи. Од другите струки, покрај медицинскиот, втора струка со најмногу студенти е информатичката, со вкупно 6.655 студенти, а трета, со приближно исто толку студенти, односно 6.065 е економската.

Најмногу студенти по одделни факултети има на скопски ФИНКИ (4.722), на трите државни медицински факултети, во Тетово (3.354), Штип (3.186) и Скопје (2.915), како и на скопскиот Економски факултет (2.022).

Соодветно на генералното намалување на бројот на студенти во земјава, се намалува и бројот на запишани студенти на прва година во високото образование.

Ако пред десет години имало без малку 19 илјади бруцоши, сега бројот на новозапишани студенти изнесува околу 15 илјади. Имено, само за десет учебни години, вкупниот број запишани студенти во прва година е намален за 3.612, односно за 19 %.

Најмалку бруцоши имало во пандемиската 2020/21 година, малку повеќе од 12 илјади. Оттогаш наваму, односно во последните три години е забележан постојан пораст на бројот на студенти што се запишале на прва година на некоја од високообразовните установи во земјава.

Во однос на бројот на студенти во прва година, има најголеми разлики меѓу државното и приватното високо образование.

Прво, во последните десет години, бројот на запишани студенти во државните високообразовни институции бележи пад од 4.168 студенти или 26 %, додека таа бројка е во пораст кај приватните високообразовни институции и тоа за или 550 студенти или 19,4 %.

Второ, за разлика од државните универзитети кои во пандемиската учебна година имале рекордно најнизок број на новозапишани студенти, прв пат под 10 илјади, приватните таа година имале пораст на студенти во прва година.

Трето, државните универзитети почнаа да привлекуваат повеќе студенти минатата година, кога бројот на новозапишани се врати на нивото од пред пандемијата, додека на приватните има благо намалување на бројот на бруцоши во однос на досега рекордната 2022/23 учебна година.

Во однос на верските факултети, и кај двата, Православен богословски и за Исламски науки има пораст на вкупниот број студенти во изминатите десет години, но кај Православниот само за 2,5 %, додека кај Исламскиот за 27 %. Во однос на бројот на новозапишани студенти, десетгодишната споредба вели дека на Православно богословскиот факултет има намалување на бруцоши за 17 %, додека на тој за Исламски науки има зголемување на интересот за студирање за 21 %.

Сите државни универзитети, освен последно основаниот, скопскиот Мајка Тереза, бележат намалување на бројот на новозапишани студенти во однос на бројката од пред десет години.

На УКИМ, во последните десет години, има намалување на бројот на запишани студенти во прва година на сите факултети, освен на два – Медицински и ФИНКИ. Таму, последната учебна година се запишале повеќе студенти, отколку пред десет години. И тоа, на ФИНКИ се запишале 37 % повеќе студенти, а на Медицинскиот факултет 11 % повеќе студенти од пред десет години.

Спротивно, најголем пад во бројот на новозапишани студенти има на Правниот факултет во Скопје, дури 392 бруцоши помалку отколку пред десет години, или намалување од дури 61 %. Следен е Филолошкиот факултет, каде има 372 помалку бруцоши отколку пред десет години, и Економскиот факултет во Скопје со 326 помалку новозапишани. Процентуално, најголем пад на интересот за студирање во последните десет години има на Факултетот за физичко образование, каде бројот на бруцоши за овој период е преполовен.

На битолскиот универзитет „Св. Климент Охридски“ има пад на новозапишани студенти во последните десет години на сите факултети, освен на Педагошкиот каде сега има 33 % повеќе бруцоши од пред десет години. Најголем пад на запишани студенти се бележи на Технолошко-техничкиот факултет – Велес, 86 %, на Правниот факултет – Кичево, 69 % и на Ветеринарниот факултет, 67 %.

На штипскиот „Гоце Делчев“ има два најголеми добитници и губитници. Најголем пад од 666 новозапишани студенти има на Факултетот за туризам и бизнис-логистика, додека најголем пораст на новозапишани студенти во однос на периодот пред десет години има на Медицинскиот факултет, 636 бруцоши повеќе.

Слична е состојбата и на државниот тетовски универзитет. Таму, најмногу нови бруцоши во десетгодишниот период има на Медицинскиот факултет, дури 723 повеќе лани отколку пред десет години. Спротивно, најголемо намалување на бројот на бруцоши сега, во однос на периодот пред десет години, имало на Правниот факултет и тоа за 517 помалку бруцоши.

На приватните факултети, пак, споредено се пред десет години, има 550 бруцоши повеќе, што е зголемување за 19 %. Сепак, состојбата по поединечните факултети и универзитети е различна.

Најмногу новозапишани студенти има загубено Европскиот универзитет, 319, односно 85 %, додека Универзитетот МИТ има запишано 161 студент или 70 % помалку. Од друга страна, пак, на Меѓународниот Балкански универзитет – Скопје запишани се 558 повеќе бруцоши отколку пред десет години, што е двојно повеќе.

И на приватните високообразовни институции, најмногу интерес меѓу средношколците за запишување во прва година привлекуваат медицинските и информатичките науки.

Наспроти намалувањето на бројот на студенти, се зголемува бројот на наставници и соработници. Само за последните десет години, универзитетскиот кадар пораснал за повеќе од илјада луѓе, односно за една третина.

На државните универзитети има за 26 % повеќе кадар отколку пред десет години, односно 786 наставници и соработници повеќе. На приватните, пак, кадарот пораснал за 281 лице, односно за 45 %.

Најголем пораст на бројот на универзитетски кадар од сите универзитети во земјава има на Државниот универзитет во Тетово, каде сега има 453 наставници и соработници повеќе отколку пред десет години, што е пораст од цели 128 %. На истиот овој универзитет, за истиот десетгодишен период има намалување на бројот на студенти за 5 %, а на новозапишани студенти за 23 % помалку.

Од државните универзитети, единствено мало намалување на бројот на кадарот сега во споредба со пред десет години има на битолски УКЛО за 3 % и на охридски „Свети Апостол Павле“ за 38 %. На скопски УКИМ има зголемување на 13 % на кадарот иако во исто време и за истиот период има намалување на бројот на студенти за 19 %, а на новозапишани за 34 %, покажува истражувањето на Центарот за граѓански комуникации, изработено врз основа на податоци добиени од Државниот завод за статистика.

The post МАКЕДОНИЈА СЕРИОЗНО КУБУРИ СО СТУДЕНТИ За 10 години сме изгубиле 7.000 бруцоши appeared first on plusinfo.mk.