Министерството за образование и наука по завршување на локалните избори ќе продолжи со контроли во високообразовните установи, најави денеска ресорната министерка Весна Јаневска.

По извршениот увид во градежни активности на спортска сала во ОУ „Димитар Поп Георгиев Беровски“ во Ѓорче Петров одговарајќи на новинарско прашање за затворањето на приватната висока стручна школа – Факултет за бизнис економија во Скопје, министерката рече дека увидот покажал неправилности.

– МОН формираше комисии кои прават увид во работењето на високообразовните институции, со цел подигање на квалитетот на високото образование. Направен е увид и во оваа институција, каде се утврдени бројни неправилности, од кадар, опременост. Им дадовме еден месец рок да ги поправат тие неправилности, но, бидејќи воопшто не изреагираа, а дополнително ги изгубија и просторните можности, се обративме до Агенцијата за квалитет во високо образование, која потврди дека овој т.н факултет е нефункционален. Според законот, ние вчера издадовме решение за привремен престанок на работа на оваа високо образовна установа – појасни Јаневска.

Таа посочи дека досега се затворени 14 приватни научни институти, а ова е првата високо образовна приватна установа која нема повеќе да работи.

– Се надевам дека по урнекот на приватните универзитети и дел од високо образовните установи кои навистина не ги исполнуваа условите, самите ќе пристапат кон процес на затворање, ако не ние ќе ги затвориме – изјави Јаневска.

МОН вчера информираше дека поради констатирани нерегуларности во работењето и непостапување по задолжение за нивно отстранување била донесена одлука за привремено запирање на работата на приватната висока стручна школа – Факултет за бизнис економија во Скопје.

The post КОНТРОЛИТЕ НА ФАКУЛТЕТИТЕ ЌЕ ПРОДОЛЖАТ ПОСЛЕ ИЗБОРИТЕ Факултетот за бизнис економија е затворен оти не ги исполнуваше условите appeared first on plusinfo.mk.