Критичарите на американската помош веднаш почнаа да коментираат дека парите се злоупотребени или испрани преку корупција.

„(Зеленски) штотуку ја фрли целата операција на перење пари во Украина под автобус … со изјавата дека добил помалку од половина од преку 177 милијарди долари помош испратена од Соединетите држави“, се вели во една објава на Фејсбук.

Милијардерот Илон Маск, сподели слично тврдење, кое доби повеќе од 25 милиони прегледи.

„Што ако 58 отсто од доларите на американските даночни обврзници испратени до Зеленски никогаш не стигнале во Украина? Каде отидоа парите? Дали ЦИА зеде дел?“, се вели во објавата што ја сподели на 2 февруари.

Но, изјавите на Зеленски дадени во интервјуто на Асошиејтед Прес не се доказ за перење пари, туку се совпаѓаат со податоците за јавните податоци за трошењето на САД, пишува ПолитиФакт.

„Голем дел од парите што САД ги посветија за помошта во Украина се трошат во САД за домашни производители на оружје и за операции на американската војска и влада. Директната воена поддршка за Украина изнесуваше околу 70 милијарди долари од 175 милијарди долари што Конгресот ги присвои. Парите не се перат, туку се трошат како што планира Конгресот“, се вели во анализата а порталот.

Објавата на Фејсбук со коментарот за „перење пари“ беше означена како дел од напорите на Мета да се бори против лажните вести и дезинформациите на почетната страница на Мета.

Маск, кој има водечка улога во администрацијата на претседателот Доналд Трамп, ја критикуваше американската помош за Украина и на други места.

Водејќи го Одделот за владина ефикасност, невладина советодавен одбор кој Трамп го задолжи за намалување на федералните трошоци, Маск доби пристап до платниот систем на американското Министерство за финансии и работи на затворање на американската Агенција за меѓународен развој, независна владина организација кодифицирана со закон која обезбедува хуманитарна помош и помош при катастрофи во странство.

– Замрзнувањето на најголемиот дел од странската помош не ја запре американската воена помош за Украина – рече Зеленски на 25 јануари.

Но, хуманитарните организации во Украина мораа да ги прекинат услугите бидејќи нивното финансирање престана, напиша „Њујорк Тајмс“.

Колкав дел од парите се за воени пратки, а колку за буџетска поддршка?

ПолитиФакт во својата анализа дава подетален преглед пишувајќи дека тврдењата за перење пари во Украина не држат вода.

„Откако Русија ја нападна Украина во февруари 2022 година, Конгресот усвои пет нацрт-закони за помош на воените напори на Украина, во вкупна вредност од речиси 175 милијарди долари. Дополнителни средства беа обезбедни преку извршни наредби.

Сепак, тие пари не беа директно доставени до владата на Украина. Aнализата на американскиот Совет за надворешни односи покажува дека од 175 милијарди долари што Конгресот ги присвоил, околу 100 милијарди долари помош ѝ се испраќаат на Украина“, се вели во написот.

Најголемиот дел од парите се трошат во САД

Советот за надворешни односи соопшти дека и со остатокот се финансираат активностите на САД поврзани со војната и со другите земји во регионот.

„Помошта за Украина доаѓа главно како пратки со оружје и друга воена поддршка. Само околу 33 милијарди долари беа посветени на директна буџетска поддршка“, објави Советот за надворешни односи.

Околу 70 милијарди долари од вредноста што оди директно во Украина е во оружје, опрема и друга воена поддршка.

„Голем дел од парите за поддршка на воените напори на Украина се трошат во САД“, напиша Марк Кансијан, аналитичар од Центарот за стратегиски и меѓународни студии, во анализата од 2023 година.

Целата сума или парите што досега биле исплатени?

Во истиот напис тој вели дека „сомашните производители на оружје одат да произведуваат оружје за Украина и да ја заменат опремата што веќе била испратена од американските резерви. Финансирањето на американските агенции, поголемиот дел од финансирањето на американските воени сили, најголемиот дел од воената опрема и купувањето на украинска опрема, како и дел од хуманитарната помош остануваат во Соединетите држави“.

Исто така, сè уште не се потрошени сите пари посветени на Украина, а Зеленски на снимката се чини дека разговара за финансирањето што земјата го добила до денес. Според „Special Inspector General for Operation Atlantic Resolve“, збирот на агенции кои вршат надзор на финансирањето на Украина, 86,7 милијарди долари од 130 милијарди долари обврзани за Украина биле исплатени до 30 септември 2024 година.

Што рече Зеленски во интервјуто?

Во интервјуто за Асошиетед Прес, Зеленски рече дека вистинската воена помош што Украина ја доби во борбата против војната е помала од највисоката бројка за долар во пакетите за помош. АП објави делови од интервјуто, но канцеларијата на Зеленски го објави целото едночасовно видео на својата страница на Јутјуб на украински.

Клип од тоа интервју се прошири на социјалните мрежи со натписи на англиски јазик. Видеото има етикета од „@Smotri_Media“, руска група на Телеграм. Во преводот на клипот на англиски, Зеленски рече дека земјата добила „нешто над“ 75 милијарди долари воена помош. Тој истакна дека и други институции освен војската добиле помош од САД.

– Сто милијарди (долари) од овие 177, или 200, некои луѓе дури велат, ние никогаш не сме добиле. Зборуваме за конкретни работи, бидејќи не го добивме со пари, туку со оружје. Добивме 70 милијарди долари од тоа. Има обука, има дополнителен транспорт. Нема само цени за оружје, имаше хуманитарни програми, социјални и така натаму – рече Зеленски, ако се суди според преводот на клипот.

Парите се трошат како што сака Конгресот

Политифакт пишува дека „не е јасно што точно вклучил Зеленски во неговата пресметка за воената поддршка што Украина ја добил, но неговите коментари се усогласуваат со јавните податоци за тоа како се троши помошта за Украина. Парите не недостасуваат, ниту се испрани, како што тврдеа некои објави“.

Понатаму во анализата се вели:

„Парите се трошат како што сакаше Конгресот: за производство на оружје на САД, невоена поддршка во Украина и поддршка на други места во регионот. Сепак, тоа не значи дека украинската помош никогаш не е присвоена.

Во 2024 година, безбедносните служби на Украина ги испитуваа украинските службеници од одбраната за наводна корупција при купување оружје од 40 милиони долари. Но, изјавите на Зеленски не се доказ за широко распространета измама или за перење пари во помошта за Украина“.

Што покажаа ревизиите на институциите во САД за помошта?

Генералните инспектори од одбранбените и државните департмани и Американската агенција за меѓународен развој ја надгледуваа помошта за Украина и објавија десетици ревизии и проценки на програмите за финансирање од 2022 година.

Нивниот преглед не откри широко распространета злоупотреба на помошта за Украина. Стејт департментот на САД во август соопшти дека „нема веродостојни докази за недозволено пренасочување на одбранбената опрема обезбедена од САД, директна буџетска поддршка или хуманитарна помош од Украина“.

Работната група за истрага за измама и корупција, под надзор на специјалниот генерален инспектор за Украина, отвори 61 истрага и затвори 30 од нив од јули до септември 2024 година.

Дали држат вода коментарите на изјавата на Зеленски?

Во објавите на социјалните мрежи се тврди дека Зеленски „ја фрлил целата операција на Украина за перење пари под автобус“. Зеленски рече дека Украина добила само околу 75 милијарди долари воена помош од 175 милијарди долари што САД ги посветија на помошта за Украина.

Според Политифакт, „тоа е во согласност со она што го забележале истражувачите кои го надгледуваат финансирањето на Украина. Голем дел од парите останале во САД, а помал дел отишле во други земји во регионот. Ние ги оценуваме како лажни тврдењата дека коментарите на Зеленски се доказ за операција за перење пари“.

The post КАДЕ СЕ 100 МИЛИЈАРДИ ДОЛАРИ АМЕРИКАНСКА ПОМОШ ЗА УКРАИНА ШТО НЕ СТАСАЛЕ ВО КИЕВ? Изјавата на Зеленски ги крена фактчекерите на нозе appeared first on plusinfo.mk.

На почетокот на тричасовниот разговор, Закерберг му рекол на Роган дека „генерално е за воведување вакцини“ и дека, ако го прашате него, тие се „повеќе корисни одошто штетни“.

– Но, мислам дека додека тие се обидуваа да ја промовираат таа програма, тие се обидуваа и да го цензурираат секој што се спротивставуваше – рекол Закерберг.

ЗАКЕРБЕРГ ЌЕ ГИ ОТКАЧИ ФАКТ-ЧЕКЕРИТЕ, СМЕТА ДЕКА БИЛЕ ПРИСТРАСНИ Нови големи промени на Фејсбук и на Инстаграм

Закерберг се појави кај Роган само неколку дена откако „Мета“ објави дека повеќе нема да користи трети страни за проверка на содржината, објавена на нејзините популарни апликации, туку наместо тоа ќе се потпира на белешките од заедницата, дозволувајќи им на корисниците да додаваат коментари за вистинитоста. Оваа стратегија ја прави „Мета“ послична на платформата Икс, чијшто сопственик Илон Маск стана еден од најблиските луѓе на новоизбраниот американски претседател, Доналд Трамп, и беше еден од главните донатори на неговата кампања.

Тоа е, исто така, последниот во низата потези и изјави на Закерберг кои, по изборната победа на Трамп, се чини дека се обиди да му се приближи на новиот претседател. Минатата недела „Мета“ го замени својот претседател за глобални прашања, Ник Клег, со Џоел Каплан, актуелен потпретседател за политика на компанијата и поранешен вработен во Републиканската партија.

ФАКТЧЕКЕРИТЕ ПОЧНАА ДА ЛЕАТ КРОКОДИЛСКИ СОЛЗИ А море Закерберг, до вчера нè фалеше, сега не ти чиниме!

„Мета“ е една од неколкуте големи технолошки компании кои објавија дека донирале 1 милион долари за инаугурацијата на Трамп.

Закерберг го критикуваше управувањето на администрацијата на Бајден со содржината поврзана со Ковид-19 во минатото.

Во писмото до Одборот за правосудство на Претставничкиот дом, предводен од Републиканците во август, Закерберг рече дека администрацијата ѝ „вршела притисок“ на „Мета“ да ја „цензурира“ содржината за Ковид-19, додавајќи дека жали за некои од одлуките што компанијата ги донела како одговор на тие барања. Тој објаснил дека процесот на проверка на фактите на неговата компанија бил „нешто од 1984 година“ и довел до широко верување дека проверувачите на факти, што ги вработува неговата компанија, „биле премногу пристрасни“.

– Станува збор за лизгава патека и ова штотуку дојде до точка во која се намалува толку големата доверба, особено во САД – додал Закерберг.

Тој рекол дека бил загрижен од самиот почеток „да стане ваков вид одлучувач за тоа што е вистина во светот“.

– Тие силно нè притискаа да ги отстраниме работите кои, искрено, беа вистинити. Тие ни рекоа дека мораме да отстраниме сè што споменува дека вакцините може да имаат несакани ефекти – му рекол Закерберг на Роган.

Закерберг не прецизираше кој во Белата куќа ги упатил овие барања, признавајќи дека „не бил директно вклучен во овие разговори“. Сепак, тој рече дека одговорот на компанијата е дека нема да ја отстрани содржината што е „непобитно вистинита“.

Тој ја пофали програмата „белешки на заедницата“ (community notes) на Икс како супериорна во однос на моделот на Фејсбук.

Тука можете да го погледнете видеото од гостувањето на Марк Закерберг на поткастот на Џо Роган.

The post 🎥 ЦЕНЗУРАТА ЗА ВРЕМЕ НА КОВИД-19 НАЛИКУВАШЕ НА „1984“ Закерберг откри детали за притисоците од администрацијата на Бајден appeared first on plusinfo.mk.

Според британскиот весник „Гардијан“, Закерберг најавил дека овие промени ќе стапат на сила, почнувајќи од САД, со фокус на зајакнување на слободата на говор.

Во видео порака, Закерберг објаснил дека овие чекори ќе бидат преземени за да се одговори на критиките дека „фактчекерите се политички пристрасни и создаваат недоверба наместо да ја градат“.

На нивно место, компанијата ќе воведе механизми за ангажман на корисниците за да обезбедат контекст и информации за спорните објави, слично на пристапот што го користи платформата Икс, сопственост на Илон Маск.

Закерберг потврдил дека тимовите за модерирање на содржини ќе бидат преселени од Калифорнија во Тексас, каде што, според него, има помалку притисоци за работењето на компанијата. Притоа, тој призна дека новите политики може да доведат до помала ефикасност во отстранувањето на несоодветни содржини, но ја истакнал важноста на „послободен дискурс“ на платформите.

„Мета“ ќе ги олабави рестрикциите за теми како имиграцијата и родовите прашања, кои, според Закерберг, се подалеку од мејнстрим дискурсот. Компанијата ќе соработува со претседателот Доналд Трамп за да се спротивстави на законските ограничувања на слободата на говор во различни делови од светот.

Закерберг ја критикувал Европа за „растечки број закони кои институционализираат цензура“, што, според него, ја отежнува иновацијата и развојот на дигиталните платформи.

„Мета“ моментално има повеќе од три милијарди корисници на глобално ниво. Со овие промени, компанијата очекува да го зајакне својот отпор кон ограничувањата што ги наметнуваат владите и да го поттикне плурализмот на своите платформи.

Новите политики се дел од пошироките напори на Закерберг да го реобликува дигиталниот пејзаж, поставувајќи ја „Мета“ како лидер во поддршката на слободниот говор.

The post ЗАКЕРБЕРГ ЌЕ ГИ ОТКАЧИ ФАКТ-ЧЕКЕРИТЕ, СМЕТА ДЕКА БИЛЕ ПРИСТРАСНИ Нови големи промени на Фејсбук и на Инстаграм appeared first on plusinfo.mk.