На денешната прес-конференција по повод промоција на филмот, Сотир Сотировски од продукцијата „ТриСтар“, информираше дека документарниот филм е изработен во две продолженија, а на него работела, како што кажа, „млада, мотивирана, искусна екипа.

– Идејата за филмот доаѓа од уредникот на порталот за кошарка „кош.мк“, Љубомир Ошавковски и останатата екипа, а со несебична поддршка на Олимпискиот комитет на Северна Македонија, Kошаркарската федрација, како и други спонзори кои ја препознаа идејата, креиравме едно дело кое треба да остане запаметено и да го презентира огромниот национален успех и радост која што се случи во 2011 година, рече Сотировски.

Претседателот на Олимпискиот комитет, Даниел Димевски, изрази огромна благодарност за иницијаторите и реализаторите, на, како што рече „овој фантастичен проект“, како и на можноста да придонесе кон истиот.

– Тоа беше почеток на нова ера на македонскиот спорт, која нè ослободи сите, ни го даде она што ни беше неопходно да се почувствуваме дека сме и ние достојни за врвни спортски резултати. Мислам дека оттогаш навака, спортска Македонија е различна, многу посамоуверена. Впрочем, после тоа дојдоа и сите поголеми успеси и на репрезентативен, и на клубски, и дај боже сега и на олимписки план – кажа Димевски.

Поранешниот селектор на репрезентацијата, Марин Докузовски, истакна дека ова е еден прекрасен филм кој што ќе нè потсети на сето она што се случуваше тогаш.

– Драго ми е, многу сум среќен што е направен овој документарец и што тука има ситуации кои што обичните луѓе не можеа да ги видат на малите екрани. Имаше некои интересни моменти од нашите подготовки, од нашите тренинзи и од натпреварите, што мислам дека ќе направи да биде уште поинтересно гледањето на овој филм – рече Докузовски.

Тодор Гечевски, кој своевремено беше дел од репрезентативниот тим на Македонија изрази благодарност за реализацијата на оваа идеја и посочи дека смета дека со овој документарец младите ќе можат да видат дека и ние можеме да бидеме квалитетни и да имаме врвни резултати.

– Ова треба да остане засекогаш и да ги мотивира следните генерации да направат поголем успех од она што го имаме ние направено – заклучи Гечевски.

Документарниот филм „Леле луѓе што направивме, радувај се Македонијо“ ќе биде промовиран викендов, 13-ти и 14-ти ноември, на Телевизија 24 од 20:45 часот.

The post „ЛЕЛЕ ЛУЃЕ ШТО НАПРАВИВМЕ, РАДУВАЈ СЕ МАКЕДОНИЈО“ Премиера на документарен филм посветен на блескавиот упех на кошаркарите appeared first on plusinfo.mk.