Европските текстилни и модни компании денес предупредија дека кинеските платформи како што се „Шејн“, „Тему“ и „АлиЕкспрес“ го преплавуваат пазарот со евтини и нискоквалитетни производи, создавајќи нелојална конкуренција, штети врз животната средина и придонесувајќи за лоши услови за работа.

Во заедничко писмо до Европската комисија, индустријата бара итна акција против појавата на „експресна мода“ – бизнис модел на копирање на најновите трендови во високата мода, масовно производство по ниска цена и брзо пласирање во малопродажба кога побарувачката е најголема.

За да се спречи „невиденото зголемување на текстилниот отпад“ и „неподносливиот притисок врз европските компании“, потписниците ја повикуваат ЕУ „веднаш“ да ги зајакне царинските бариери и да ги забрза тековните истраги против платформи како што се Тему или Шејн.

Претставничкото тело Еуратекс (Европска унија за облека и текстил), како и здруженијата на производители од Франција, Италија, Шпанија, Германија, Грција, Швајцарија, Белгија и Португалија, пишуваат дека „со длабока загриженост го набљудуваат зголемувањето на моќта“ на компаниите во електронската трговија, со 4,5 милијарди пакети увезени во ЕУ во 2024 година.

Тие посочуваат дека овој бизнис модел е спротивен на важечките правила во ЕУ, вклучувајќи измами со ДДВ, повреда на правата од интелектуална сопственост и погрешни тврдења.

Затоа, тие бараат реформа на Европскиот царински законик со укинување на ослободувањето од царина за пакети со вредност помала од 150 евра, што сега им користи на азиските гиганти за е-трговија кои испраќаат вакви пакети од Кина.

Потписниците бараат забрзување на истрагите и примената на санкции против платформите, како и принудување на овие кинески компании да назначат претставници во Европската Унија кои би можеле да бидат законски одговорни.

The post КИНЕСКИ ЕВТИН ТЕКСТИЛ ЈА ПРЕПЛАВИ ЕВРОПА Текстилната индустрија бара мерки од ЕУ за борба против копирањето облека appeared first on plusinfo.mk.