„Дијалог постојан има, од моментот кога е формирана оваа Влада до денес. Имало период кога дијалогот бил поинтензивен или помалку интензивен, но нема момент во кој ние не сме дискутирале за изнаоѓање соодветно праведно решение во рамките на позициите кои ние ги имаме“.

Вака изјави министерот за надворешни работи и надворешна трговија Тимчо Муцунски на денешната прес-конференција, одговорајќи на новинарско прашање дали има дијалог за надминување на проблемот со Бугарија што ја блокира евроинтеграцијата на земјава.

Прашан дали има придвижување и сигнали од Софија дека може да се повлече од некои свои ставови, кои се нашите позиции и дали македонската страна е подготвена за одредени отстапки, Муцунски истакна дека „црвените линии на нашата држава се поврзани со нашата историја, идентитет, јазик и култура“.

– Тоа се нашите лини кои ние ги преставуваме во рамките на сите разговори што ги водиме. Едноставено не е праведно нашите преговори постојано да заглавуваат на тема поврзана со нашиот идентитет, јазик, историја и култура. Тоа се нашите позиции кои повеќепати ги имаме преставено и пред домашната јавност и пред сите наши меѓународни фактори. Очекуваме систем на гаранции од европските институции. Очекуваме почитување на реципроцитетот кога се во прашање човековите права и очекуваме решение што ќе биде насочено кон заштита на нашите позиции поврзани со идентитетот, јазик, култура и историја – рече Муцунски.

За тоа како се одвива дијалогот на ЕУ, тој истакна дека во последните неколку недели немало поконокретни разговори поради колективните годишни одмори и во земјите членки на Унијата и кај европските институции.

– Но верувам дека во периодот којшто следи има најави за повеќе посети, еве ни доаѓа министерот за надворешни работи на Чешка. Чешка е наш принципиелен поддржувач. Сигурен сум дека една од темите коишто ќе ги отвориме е и ова прашање. Така да, нормално е тој дијалог да биде постојан, да тече и ние тој дијалог го водиме низ призмата на позициите коишто ги имаме претставено – додаде Муцунски на прес-конференција во Владата. 

The post ДИЈАЛОГОТ СО БУГАРИЈА ПРОДОЛЖУВА, ЦРВЕНИТЕ ЛИНИИ ОСТАНУВААТ Македонија бара гаранции од Брисел и реципроцитет во преговорите appeared first on plusinfo.mk.

Министерот за надворешни работи и надворешна трговија Тимчо Муцунски во контекст на уставните измени и почетокот на преговори за влез во ЕУ, вечерва повтори дека за нас се значајни суштински две работи – првата е да имаме јасни гаранции што или ќе бидат проточени во нашиот правен систем — уставни измени со одложена примена или ќе има гаранции од европските институции.

– И исто така, за нас е значаен концептот на меѓународно-правен реципроцитет во делот на човековите права. Односно, кога Бугарија очекува од нас ние бугарското малцинство да го внесеме во нашиот Устав, најмалку што може да направи е да ги почитува пресудите на Европскиот суд за човекови права во делот на почитувањето на основните човекови права на Македонците коишто живеат на територија на Бугарија – рече Муцунски во интервју за Тема на денот на ТВ Сител.

Во рамките на тие наши позиции, нагласи тој, веруваме дека може да се најде не само рационално решение, туку решение коешто ќе биде одржливо бидејќи нашата цел дефинитивно е без никаква дилема да се најде решение.

– Но, нашата цел е да се најде решение коешто нема да нè стави во истата позиција во којашто сме денес за неколку недели или неколку месеци. Затоа ние велиме: ова решение коешто сега го има на масата, коешто ни е претставено, коешто претходната Влада за жал како такво го прифати, е неодржливо и решение коешто ќе создаде дополнителна криза во нашите европски интеграции. И за нас нема никаква дилема дека вакво решение е неприфатливо во овој момент – рече Муцунски.

Во врска со информациите дека се моделира новиот пристап за проширување на ЕУ и дека тоа би било презентирано на ЕС во октомври, Муцунски кажа дека динамиката за ваквите разговори се забрза по неколкуте објавени нонпејпери, а еден доби најголемо внимание – „оној на францускиот претседател и германскиот канцелар пред самитот во Тиват“, но потоа и неколку други што беа презентирани од групи на земји со различни гледишта.

Примарно целта е, вели Муцунски, да се даде нова димензија на политиката за проширување, но таква каква што е, се смета од страна на институциите и на земјите членки дека не е адаптирана на ова време во кое што живееме.

– И затоа сега целта е да се создаде нов концепт, којшто се надеваме ќе биде попредвидлив. Точно е дека се совпаѓа со дебатата за повеќегодишниот буџет којшто ЕУ ќе треба да го донесе во следниот период – рече Муцунски.

За нас како држава и како земја кандидат во суштина една работа е многу значајна, потенцира министерот за надворешни работи, а тоа е „овој модел да не даде алтернатива за полноправното членство, туку и оние политики коишто ќе се насочени кон засилена соработка со земјите кандидати да бидат паралелни процеси, а крајната цел на сите процеси да биде полноправно членство“.

– Тоа што е значајно за нас, сигналите коишто ги добиваме е дека ова ново моделирање ќе биде во таа насока, дека ќе има одредени придобивки коишто ќе се даваат на земјите кандидати во процесот на преговори, коишто во моментот не се обезбедуваат, но сепак дека крајната цел ќе биде полноправно членство. Јас сакам тука само на крај да нагласам дека ние сепак не сме земја членка. Ние можеме да дадеме наше гледиште, наш импут, но не сме помеѓу оние коишто одлучуваат – рече тој.

Министерот за надворешни работи и трговија Муцунски ги негираше тврдењата дека „за тајни разговори или разговори под радарот“ за деблокада на процесот за почеток на преговори со ЕУ, велејќи дека тој тоа не го кажал.

– Тајни разговори или разговори под радарот — нема – рече Муцуски и додаде дека тоа може да се види од сите негови изјави.

Има разговори, рече министерот, од моментот кога е формирана Владата до денес, кои тој тековно ги обавува со министри за надворешни работи на земјите членки, со европски претставници, разговори на претседателот на Владата, разговори на претседателката на државата. – Постојано во сите разговори коишто ги имаме со претставниците на европските институции и претставниците на земјите членки, да, клучна тема е како да најдеме решение на овој билатерален спор којшто ѝ пречи на нашата земја. Така да, имало и ќе има разговори, рече тој.

Суштинската разлика е дека за нас она што го бараме, потенцира Муцунски, е јасно разграничување на суштински реформи од билатерални прашања и јасно укажување и на европските институции и на земјите – членки дека треба да се стави крај на барања поврзани со нашиот идентитет, историја, јазик и култура бидејќи од Бугарија сè уште ни се презентираат такви форми на барања коишто се поврзани со нашите евроинтеграциски процеси.

– Јас се согласувам дека е многу значајно да ги убедиме сите, но дури постои таа препрека од Бугарија, дури Бугарија не покаже желба јасно да даде поддршка на нашиот европски пат преку европски вредности, ние имаме проблем којшто стои нерешен – дециден е Муцунски.

Одговарајќи на прашање поврзано со довербата на граѓаните во системот и денешниот случај со информациите за бактерија во водата во Скопје, министерот рече дека опозициската СДСМ наметнала „теза дека водата во главниот град е бактериолошки загадена“. Муцуски рече дека според она што му е познато Министерството за внатрешни работи има повикано повеќе лица на информативен разговор во врска со дезинформациите за водата во Скопје.

– Ова е една многу опасна траекторија по којашто се движи нашата главна опозициска партија во државата. Јас потполно се согласувам со вас: 7 години го уништуваа системот за граѓаните да немаат доверба во него. Кога се обидуваме да го изградиме системот на стабилен начин, преку лажни вести и дезинформации шират паника. Јас се согласувам со вас: ова што се случи денес е на ниво некој да влезе и да каже дека во најголемиот трговски центар има бомби. Но, можеби и поопасно — се шири масовна паника. Како што сум информиран, Министерството за внатрешни работи има повикано повеќе лица на информативен разговор. И според мене, мора да има одговорност за ова што се случило! Не може туку-така вие да споделувате таков тип на информации и да ширите масовна хистерија и паника кај нашите граѓани – рече Муцунски.

The post МАКЕДОНИJА БАРА ЈАСНИ ГАРАНЦИИ И РЕЦИПРОЦИТЕТ ВО ПРЕГОВОРИТЕ Нема преговори за идентитетот, јазикот, историјата и за културата appeared first on plusinfo.mk.

Посетата на претседателот на Европскиот совет Антонио Кошта треба да се анализира во поширокиот контекст на актуелните односи меѓу Европската Унија и Република Македонија, но и во контекст на состојбите на Западниот Балкан и предизвиците со кои се соочува политиката на проширување на Унијата.

Несомнено е дека Кошта и досега, а и денес, останува на ставот дека Македонија треба да ги исполни обврските што произлегуваат од преговарачката рамка усвоена во 2022 година. Тоа подразбира и внесување на Бугарите во Уставот како услов за формално продолжување на пристапниот процес. Не очекувам тој да се откаже од таа позиција, бидејќи тоа би значело доведување во прашање на веќе усвоени одлуки на Европскиот совет и на земјите членки.

Меѓутоа, политичката реалност денес не е иста како пред неколку години. Во меѓувреме се случија неколку важни процеси. Република Македонија продолжи со спроведување на реформите, доби позитивни оценки во одделни сегменти од европската агенда, обезбеди пристап до нови европски фондови и финансиски инструменти, а истовремено Европската Унија се соочува со нови геополитички предизвици кои ја прават политиката на проширување повторно актуелна.

Војната во Украина, засиленото руско влијание во одредени делови од Балканот, кинеското економско присуство и општата потреба за зацврстување на европската безбедносна архитектура го вратија Западен Балкан високо на агендата на Брисел. Во такви околности, прашањето за кредибилитетот на Европската Унија станува сè поважно. Не е случајно што сè почесто во европските кругови се слушаат оценки дека Унијата мора да покаже дека ги исполнува сопствените ветувања кон земјите кандидати.

Токму тука треба да се бара и значењето на средбата меѓу Кошта и Мицкоски. Владата во изминатиот период настојуваше дебатата да не се сведува само на прашањето дали ќе има уставни измени, туку да се отвори и прашањето за гаранциите. Од аспект на Владата, суштината не е само во исполнувањето на една обврска, туку во добивањето уверување дека по евентуалното исполнување на таа обврска нема да следуваат нови барања и нови блокади.

Тоа е прашање што има и внатрешно-политичка и европска димензија. Внатрешно, затоа што по Преспанскиот договор, промената на името, уставните измени и бројните отстапки направени во изминатите години, кај значителен дел од македонската јавност постои сомнеж дали секоја следна концесија навистина го приближува членството во Европската Унија. Европска димензија има затоа што секој нов услов што би се појавил по исполнувањето на договореното дополнително би го нарушил кредибилитетот на европската политика на проширување.

Од тие причини, денес можеби не е најважно прашањето дали Кошта ќе го повтори добро познатиот став за уставните измени. Тоа е речиси извесно. Поважно е дали во неговите пораки ќе има елементи што упатуваат на разбирање на македонските аргументи за потребата од поголема предвидливост на процесот и за потребата европските институции поактивно да гарантираат дека договореното ќе биде почитувано од сите страни.

Секако, треба да се биде реален. Европската Унија нема правен механизам со кој може однапред да гарантира како ќе се однесува која било земја членка во иднина. Ниту Кошта може самостојно да понуди таква гаранција. Но, ЕУ може политички да испрати порака дека нема простор за нови условувања надвор од договорената рамка, може поактивно да посредува во евентуалните спорови и може појасно да го дефинира патот што следува по исполнувањето на преземените обврски.

Оттука, не очекувам посетата да донесе спектакуларен пресврт, нов договор или драматично поместување на позициите. Но, очекувам таа да биде уште еден обид да се намали јазот меѓу две реалности: од една страна, инсистирањето на Европската Унија на исполнување на преземените обврски, и од друга страна, барањето на македонската Влада за политичка и институционална извесност дека процесот нема повторно да биде заложник на билатерални спорови.

Во суштина, клучната дилема повеќе не е дали Европската Унија сака уставни измени. Тоа е одамна позната позиција. Вистинската дилема е дали Европската Унија е подготвена да ја врати довербата во процесот на проширување и да покаже дека исполнувањето на договореното навистина води кон напредок, а не кон отворање на нов круг условувања. Токму низ таа призма треба да се чита и посетата на Антонио Кошта на Република Македонија.

The post Посетата на Антонио Кошта – помеѓу исполнување на обврските и барањето гаранции appeared first on plusinfo.mk.