Европската комисија испрати една од најпозитивните пораки за Македонија во последните години, оценувајќи дека земјата покажува сериозен напредок во спроведувањето на реформите поврзани со европскиот План за раст за Западен Балкан. Во документот објавен од Брисел, Македонија практично е издвоена како еден од најподготвените партнери во регионот кога станува збор за исполнување на реформските обврски и користење на европските фондови.

Станува збор за механизмот „Reform and Growth Facility”, тежок 6 милијарди евра, преку кој Европската Унија сака да го забрза економското приближување на Западен Балкан кон европскиот пазар. За разлика од претходните инструменти, овој механизам е строго условен: парите се исплаќаат само ако државите навистина ги реализираат реформите што ги ветиле.

Токму тука Македонија добива високи оценки, бидејќи според анализите на Европската комисија, македонската реформска агенда е меѓу најструктурираните и најконкретните во регионот.

Одобрен нов пакет финансиска поддршка

Дополнителна тежина на позитивните оценки им дава и фактот што Европската комисија деновиве одобри нов пакет финансиска поддршка во рамките на Планот за раст за Западен Балкан, при што Македонија се најде меѓу трите држави што успешно ги исполниле условите за нова исплата.

Станува збор за пакет вреден 158,9 милиони евра за Македонија, Албанија и Црна Гора, што Брисел го толкува како доказ дека овие земји покажуваат конкретен напредок во реализацијата на реформските обврски.

Од овие пари, 65,7 милиони евра се наменети за Македонија, при што 30,6 милиони евра ќе бидат префрлени во државниот буџет, додека останатите фондови ќе бидат достапни за инвестициски проекти преку Инвестициската рамка за Западен Балкан.

За споредба, Албанија ќе добие 49 милиони евра, додека Црна Гора 44,2 милиони евра.

За Македонија, ова е уште еден сигнал дека европските институции ја сметаат за една од поуспешните држави во регионот кога станува збор за техничката и институционалната подготовка на реформите.

38 клучни реформи и 136 конкретни мерки

Во Брисел посебно се нагласува дека реформската агенда на Македонија опфаќа 37 клучни реформи и 136 конкретни мерки, распоредени во области како владеење на правото, јавна администрација, енергетска транзиција, дигитализација, борба против корупцијата и развој на приватниот сектор. Европската комисија уште минатата година официјално ја одобри македонската програма, што ѝ отвори пристап на земјата до стотици милиони евра европски средства.

Особено значајно е што Македонија беше меѓу првите држави од Западен Балкан што почнаа да добиваат средства од новиот европски инструмент. Според податоците поврзани со имплементацијата на Планот за раст, земјата може да добие околу 750 милиони евра до 2027 година, а првите исплати веќе се реализирани.

Успешна подготовка, мерливи резултати

Во европските анализи се забележува дека македонските институции покажале поголема подготвеност од дел од соседните држави кога станува збор за техничката подготовка на реформите.

Тоа е важно бидејќи во Брисел сè повеќе доминира ставот дека проширувањето нема да се води само од политички ветувања, туку од конкретни резултати и мерливи реформи.

Практично, Европската комисија испраќа сигнал дека Македонија може да стане пример за тоа како една кандидатска држава може да напредува дури и во сложена политичка атмосфера.

Но, документот носи и предупредување. Европската комисија јасно наведува дека целиот механизам е „performance-based”, односно дека секое доцнење или блокада на реформите може да доведе до замрзнување или губење на европските пари.

Брисел веќе предупреди дека дел од државите од регионот ризикуваат да изгубат стотици милиони евра ако реформите не се реализираат навреме.

Повеќе од дипломатски комплимент

За Македонија, ова отвора и една поширока политичка димензија. Во период кога европските интеграции често се заложници на билатерални спорови и блокади, Брисел очигледно сака да ја награди техничката и институционалната подготвеност на државите што реално работат на реформите.

Со други зборови, Европската комисија индиректно порачува дека реформскиот капацитет на Македонија не е спорен.

Во исто време, реформската агенда е тесно поврзана и со економскиот интерес на граѓаните. Планот за раст има амбиција постепено да ги интегрира државите од Западен Балкан во делови од европскиот единствен пазар уште пред формалното членство.

Тоа подразбира побрзи плаќања, полесна трговија, подобра транспортна интеграција, дигитален пазар и постепено отворање на европските економски механизми за регионот.

Токму затоа позитивните оценки за Македонија имаат поголема тежина од класичен дипломатски комплимент. Тие се индикатор дека земјата во моментов е перцепирана како еден од посериозните кандидати во рамките на новата европска стратегија за Западен Балкан.

А во услови кога ЕУ бара успешни приказни од регионот, Македонија очигледно се обидува да се позиционира токму како таков пример.

The post МАКЕДОНИЈА СО НАЈСИЛНА РЕФОРМСКА АГЕНДА ЗА ЕУ Од Брисел стасаа фалби, а ќе стасаат и 65,7 милиони евра appeared first on plusinfo.mk.

Потребен ни е дијалог со Бугарија и во тој контекст јас побарав билатерална средба со мојата колешка од Бугарија на состанокот на министри за надворешни работи на земјите членки на НАТО алијансата, што ќе се одржи во Шведска за околу десетина дена.

Вака изјави шефот на македонската дипломатија на прес-конференција во врска со последните случувања со новата министерка за надворешни работи на Бугарија Весислава Петрова Чамова.

– И покрај сѐ тоа што се случи во последните денови, мојот став беше прилично јасно артикулиран и јавноста го слушна за онаа несекојдневна и навистина непријатна епизода од пред некој ден – изјави Муцунски запрашан за кратката средба со Петрова Чамова на која таа го искористи навредливиот термин „северномакедонци“.

На новинарско прашање дека ставот на опозицијата дека прашањето за Бугарија е европски, а не билатерален проблем, Муцунски рече дека се чуди оти ставоите на Софија и на главната опозициска партија се совпаѓаат.

– Прво на кое што не можам да се изначудам е колку се совпаѓаат ставовите на Софија и на главната опозициска партија, но граѓаните нека судат на крајот на денот. Моја улога како министер за надворешни работи и улогата на Владата е секогаш да стои на линија на заштита на тоа што е наш национален интерес и приоритет на државата, што значи да не молчиме кога има обиди за понижување на државата, туку да си стоиме цврсто на тие позиции кои што на нас ни се значајни, но исто така и да преземаме чекори да правиме сѐ тоа што е потребно да ја движиме напред државата кон европскиот пат – рече Муцунски.

• ДЕМАРШ ОД МНР ЗА БУГАРСКИОТ АМБАСАДОР Остра реакција за „северномакедонски“ на Петрова Чамова

Според него, дијалогот со Софија ни е потребен, прво, како што рече бидејќи ни е сосед со кој што, покрај оваа блокада на нашата европска иднина, имаме и други предизвици, но и други проекти кои што ни се значајни во билатералните односи.

– За околу десетина дена сме во Шведска на состанок на министри за надворешни работи на земјите членки на НАТО алијансата, и побарав на моја иницијатива да остварам билатерална средба официјална со мојата колешка од Бугарија, каде што меѓу другото, една од темите кои што ќе ги дискутираме е и темата за овие неевропски услови кои што ни се наметнуваат на нашата држава – рече Муцунски.

Додаде дека засега нема одговор од бугарска страна, но изрази оптимизам дека ќе добиеме позитивен одговор.

– Како што со оптимизам сакам да верувам дека опозицијата по денешната прес-конференција ќе развие зрелост, исто така сум оптимист дека ќе добиеме позитивен одговор. Ние мораме да имаме дијалог, колку и да не се согласуваме, колку и некогаш да имаме дијаметрално спротивставени ставови по различни теми. Прво како луѓе, а второ како претставници на држави кои што делат граници, кои што имаат клучни проекти меѓу себе. Ние мораме да имаме дијалог. Тоа не значи дијалогот не треба да значи и попусливост по секоја тема. Има, тоа се две сосема различни работи. Но дијалог мораме да имаме – заклучи Муцунски.

На новинарско прашање дали ќе го донесат изборниот законик со оглед дека опозицијата излезе од работната група, како што беше случајот со техничката влада само со консензус, тој рече дека европските закони имаме обврска да ги донесеме од повеќе причини – прво тие се насочени кон институционално подобрување на системот на државата и второ, неносењето на тие закони значи дека државата ќе губи средства од европските фондови.

– Замислете, опозицијата којашто ни зборува за Европа и европски фондови ја става државата во ситуација да губи средства за проекти за капитални инвестиции коишто треба да ги привлечеме од европските фондови. А истовремено јавноста треба да знае дека, посебно за Изборниот законик, Деловникот за работа на Собранието, инаку Деловник изработен заедно со ЕУ, предвидува можност за таканаречен филибастеринг. Значи, многу мал број на пратеници може да го блокираат тој закон. Изборниот законик треба да го носиме со консензус, затоа што тоа е законик којшто е значаен за процеси многу битни коишто и следат за државата. Дали ние како Влада одговорно размислување, размислуваме за начини на коишто е потребно да се создадат соодветни мнозинства за да се носат европските закони? Секако, размислуваме. Но апелираме, денес апелираме кон зрелост поврзан со европската интеграција, со европската иднина и зрелост поврзана со носење на подобри закони, каде што, коишто, ќе повторам, не се подготвени само од тимовите на Владата, туку закони коишто ги работиме со европски експерти и закони коишто носат финансирање на проекти преку европските фондови. Се надеваме на зрелост. Досега, за жал, морам да бидам искрен, не сме ја виделе, но имаме сепак обврска ние да работиме проактивно за да ги обезбедиме тие соодветни мнозинства – рече Муцунски.

The post ДИЈАЛОГ МОРА ДА ИМА, ПОПУСТЛИВОСТ НЕ Муцунски побара средба со бугарската колешка на иден состанок на НАТО appeared first on plusinfo.mk.

„Почнете да мислите деке е време за некои болни отстапки“.

Вака му рекла италијанската премиерка Џорџија Мелони на украинскиот претседател Володимир Зеленски за време на нивната средба во Рим, открива „Кориере дела Сера“. Разговорот, што траел 90 минути, бил далеку понапрегнат отколку што изгледало пред камерите, и според италијанските извори, зад затворени врати излегле на виделина сериозни разлики меѓу Италија и Украина.

За да се подготви за средбата Мелони претходно одржала консултации со министрите за одбрана и надворешни работи, Гвидо Кросето и Антонио Тајани. Додека тие разговарале со украинските колеги, италијанската премиерка се подготвувала да испрати поинаков сигнал, дека времето за безрезервна поддршка на Киев полека истекува.

Мелони отворено му рекла на Зеленски дека неговата позиција е ослабена поради, како што рече, „сигнали за корупција“, и дека доколку Украина сака да го задржи вниманието на Западот, мора да покаже флексибилност во мировните преговори.

Украинскиот претседател, пак, го барал спротивното. Според изворите, тој инсистирал Италија да се обиде да влијае врз Доналд Трамп, чиј став кон мировниот процес е сè потврд, а планот што го предлага не мора да ги следи максималните украински барања.

Во текот на средбата збор зел и шефот на украинската дипломатија Андриј Сибиха, кој пред италијанската делегација го изложил целиот „список на очекувања“ од Киев: активна улога на Италија во одмрзнување на руските средства во Белгија, поддршка за европската програма „Purl“, приклучување кон европската набавка на американско оружје и пренасочување дел од средствата од Европскиот фонд Safe за воена помош.

Но Италија, потсетуваат италијанските медиуми, е една од четирите земји кои одбиваат да го сторат тоа на чело со Белгија.

Напнатоста дополнително пораснала кога Зеленски изјавил дека е подготвен да размисли за нови избори во Украина, изјава што во Рим ја протолкувале како знак дека Киев се соочува со внатрешен политички притисок.

И покрај разликите, и Рим и Киев потврдиле дека разговорите за мировниот план ќе продолжат во координација со европските партнери и Соединетите Држави.

The post МЕЛОНИ МУ ПЛЕСНАЛА НЕКОИ РАБОТИ НА ЗЕЛЕНСКИ В ЛИЦЕ На тензичен состанок биле спомнати Донбас, избори, промени… appeared first on plusinfo.mk.

СДСМ ќе ја повика главната европска обвинителка, Лаура Ковеши, да ја посети Македонија и лично да се запознае со малверзациите што ВМРО-ДПМНЕ ги прави со европските фондови, меѓу кои и ИПАРД програмата, велат од СДСМ во соопштение до јавноста.

„Не сакаме државата да остане без финансиска поддршка поради злоупотребите на ВМРО-ДПМНЕ. Немаме доверба во нашите институции, прво затоа што врз нив секојдневно се врши притисок од страна на Мицкоски а второ и затоа што власта прави се за да ги заштити своите од прогон.

Имајќи предвид дека злоупотребите биле вршени од страна на власта, и дека директорот на Агенцијата за финансиска поддршка за земјоделството и руралниот развој е уапсен токму за корупција поврзана со европските пари, сметаме дека должност ни е да ја информираме европската јавност и Европското јавно обвинителство (EPPO).

Ова не е темен вилает на ВМРО-ДПМНЕ и Мицкоски за да си играат со судбината на Македонија и да ги крадат граѓаните“, обвинува СДСМ.

Партијата вели дека Ковеши, е надлежна за истраги поврзани со злоупотреби на ИПАРД-фондовите, во рамките на нејзината улога како прв човек на Европското јавно обвинителство (EPPO – European Public Prosecutor’s Office).

The post СДСМ ЌЕ ЈА ВИКНЕ НАПОМОШ ЛАУРА КОВЕШИ „Брисел мора да знае за скандалот со ИПАРД“ appeared first on plusinfo.mk.

За резолуцијата на Европскиот парламент за ситуацијата во Србија по изборите гласаа 461 пратеник; против биле 53, а воздржани 43.

„Европскиот парламент повикува на независна истрага од страна на почитувани меѓународни правни експерти и институции за нерегуларности на парламентарните, покраинските и локалните избори, со посебен осврт на изборите за собранието на град Белград, бидејќи одредени обвинувања се прошируваат, вклучително и оние за организирана миграција на гласачите на локално ниво надвор од опсегот опфатен во извештаите на ОБСЕ/ОДИХР“, се вели во изгласаната резолуција.

The post ЕУ БАРА МЕЃУНАРОДНА ИСТРАГА ЗА МОЖНА ИЗБОРНА ИЗМАМА Европскиот парламент изгласа резолуција за Србија appeared first on plusinfo.mk.

Европските фондови за Унгарија ќе останат замрзнати и покрај договорот за помош за Украина што го договорија земјите-членки, изјави дипломат на ЕУ веднаш по објавувањето на договорот, пренесуваат британските медиуми.

Лидерите на ЕУ денеска едногласно се согласија да и дадат на Украина дополнителни 50 милијарди евра помош, надминувајќи го неколкунеделното противење од Унгарија.

Според дипломатот, Унгарија мора да ги исполни своите обврски за исполнување на условите за добивање средства од ЕУ.

The post ОРБАН ИЗВИСИ НА СОСТАНОКОТ НА ЛИДЕРИТЕ НА ЕУ Унгарија останува со замрзнати европски фондови appeared first on plusinfo.mk.

Наместо за европски проекти, огромни европски средства ги јадела корупцијата и ова не е возможно да се случувало без знаење, согласност, па дури и директна вмешаност на високи владини функционери.

„ДУИ и СДС имаат полна уста со европски вредности, а во реалноста нивните џебови се полни со украдени европски пари. Зошто јавноста во Македонија за криминалот и корупцијата на власта освен од ВМРО-ДПМНЕ дознава од Брисел и Вашингтон. Јавното обвинителство трае дури власта криминалот го прави. Наместо тие да ги гонат арамиите од власта, странски извештаи, мисии, комисии, институции го истражуваат криминалот во Македонија. Тоа само говори колку е уништен правосудниот систем во Македонија со оваа власт на ДУИ и СДС“ – велат од ВМРО-ДПМНЕ.

The post ПОЛНА УСТА СО ЕВРОПСКИ ВРЕДНОСТИ, А ЏЕБОВИТЕ ПОЛНИ СО УКРАДЕНИ ЕВРОПСКИ ПАРИ Опозициската ВМРО-ДПМНЕ со обвинувања за власта appeared first on plusinfo.mk.

Ако истрагите на Европската служба против измами резултираат со сомнеж за криминални активности, тие случаи ќе бидат проследени во Јавното обвинителство и во тој случај очекуваме јавниот обвинител да преземе навремени активности и тие активности ние ќе ги следиме одблиску, најави Гир во изјава за МИА.

– Ова покажува колку сериозно ЕУ пристапува и го проверува начинот на кој парите од европските даночни обврзници се трошат во Северна Македонија. Сакам да потенцирам дека ОЛАФ е многу сериозно тело, кое спроведува истраги за тоа како се трошат парите на ЕУ. Ја потврдувам бројката, но не ги знам деталите во врска со самите истраги. Можам да потврдам дека има различни субјекти кои се дел од тие истраги. Ако истрагите на ОЛАФ резултираат со сомнеж за криминални активности, тие случаи ќе бидат проследени во Јавното обвинителство, и во тој случај очекуваме јавниот обвинител да преземе навремени активности и тие активности ние ќе ги следиме одблиску – изјави Гир.

За време на посетата на Битола, амбасадорот Гир предочи дека луѓето кои што ги злоупотребуваат парите на европските даночни обврзници тие всушност ги мамат и граѓаните на Македонија.

Европската служба против измами, одговорна за ревизија на фондовите за земјите членки на Европската Унија и за други држави кориснички на фондовите, во последните пет години отворила 36 истраги за земјите од Западен Балкан за злоупотреба или неправилности поврзани со европските фондови, од кои 18, како што пренесе Еуроњус Албанија, се однесуваат на злоупотреба на европските фондови во земјава.

ОЛАФ подготвила седум препораки за европските институции и за македонските власти. Од службата нема дополнителни информации за конкретните истраги, но објавено е дека за европските фондови, кои се потрошени целосно или делумно на национално или на регионално ниво во 2022 година, во Македонија биле отворени четири истраги, а три се затворени со соодветни препораки.

The post ЕУ ВЕЌЕ НЕ ГИ ОСТАВА НА СЛУЧАЈОТ ЗЛОУПОТРЕБИТЕ НА НЕЈЗИНИТЕ ПАРИ Ако открие криминал ќе му виси над глава на Јавното обвинителство appeared first on plusinfo.mk.

Таа на Фејсбук напиша дека од вкупно 36 истраги на ОЛАФ за злоупотреба на ЕУ-фондови дадени на земјите од Западен Балкан, дури 18 се однесуваат на фондовите дадени на Македонија.

„Истрагите се однесуваат за период од 2017-2022 година и дадени се препораки земјата корисничка да ги врати злоупотребените средства. За евидентираните злоупотреби на соодветните власти во земјата, предметите се предаваат за да се отворат истраги за криминал“, напиша Илиеска.

Втората земја со најголем број на истраги започнати во регионот е Србија, при што ОЛАФ отвори 9 истраги и состави четири препораки.

Во Босна и Херцеговина се покренати 3 истраги, а поднесени се две препораки, додека на Косово се покренати 3 истраги и една препорака.

Во однос на Албанија отворени се вкупно две истраги, меѓу кои и онаа од 2021 година за земјоделски фондови. На дното на листата на ОЛАФ, со само една истрага, е Црна Гора.

„Еуроњуз Албанија“ пишува дека исто како што истрагата може да се заклучи без да се идентификуваат виновниците, исто така може да доведе до тоа земјата-корисничка да мора да го врати сомнителниот злоупотребен дел од средствата.

The post НИЕ СМЕ ШАМПИОНИ ЗА ЗЛОУПОТРЕБА НА ЕВРОПСКИТЕ ФОНДОВИ Од 36 истраги за Западен Балкан, 18 се отворени за Македонија appeared first on plusinfo.mk.

Неименуваните високи ЕУ дипломати специјално ја истакнаа клучната улога која граѓанското  општество во следните месеци ќе ја има, директно поврзана со евроинтегративниот процес, додека во РСМ тече техничкиот скрининг. Тие бараат поголема  инволвираност во граѓанските организации и целокупното општество во овој процес со недвојбена посветеност кон ЕУ агендата и користење на ЕУ фондовите за граѓанските организации и за медиумите, со цел дополнително зацврстување на улогата што ја имаат овие општествени групи и заедници.

• Очекуваме директна и поголема посветеност кон ЕУ агендата и евроинтегративниот  процес. ЕЕАС како и одговорниот директорат DG NEAR посакуваат да видат поголема  посветеност на досегашните партнери и соработници од граѓанското општество и на медиумите во Северна Македонија кон пристапниот процес, инволвираност на кредибилни партнери со watch-dog улога кон владата и кон владините институции.
• ЕУ само во последните неколку години инвестиравме близу 10 милиони евра директна финансиска поддршка кон граѓанското општество и кон медиумите во Северна Македонија. Нашата посветеност кон овие партнери ќе продолжи и во следниот период, но мораме да видиме целосна посветеност кон ЕУ агендата на нашите досегашни партнери и  локални соработници, затоа што граѓаните се уште имаат највисока доверба и поддршка токму за Европската Унија (иако паѓа).
• Програмите ИПА за граѓанските организации и за медиуми дополнително ќе поддржат овозможувачка околина за граѓанските организации и за граѓаните, се со цел граѓаните реално да ги почувствуваат придобивките. За таа цел ЕЕАС ќе ги ревидира своите цели соработка и ќе врши нов due-diligence на организациите и на партнерите поради одредени добиени загрижувачки состојби во дел од организациите на локално на национално ниво.
• Забележуваме дека има одреден (благ) пад во ЕУ поддршката кај граѓаните, ние сме наполно свесни за резигнираност кај организациите и општо кај граѓаните. Сепак, ние продолжуваме да ве поддржуваме затоа што и натаму мнозинство граѓани бараат РСМ да стане полноправен член на ЕУ (над 65%), а политичките елити и вашите најголеми  политички партии и раководства имаат првенствена и најголема одговорност. Вие сте  веќе во техничкиот скрининг, кластерите се отвораат, а напредокот од оваа во следните  фази ќе зависи само и само од вас, односно од вашиот парламент и од политичкиот  консензус. Исполнувањето на неопходните барања и услови се дел од преговарачката  рамка со Европската комисија, а не со земја-членка на ЕУ. Затоа, потребно е медиумите  и граѓанските организации овие важни информации во интегративниот процес  соодветно и правилно да им ги соопштат на јавноста и граѓаните.
• Сериозно сме загрижени, пред се за три главни состојби во вашата земја од аспект на  медиумите и граѓанското општество: сѐ поголемото влијание на хибридните закани со  цел да извршат ерозија на довербата во системот на земјата и го поткопаат ЕУ  пристапниот процес и преговорите; зголеменото ширење на дезинформации и лажни  вести, како и недоволната посветеност на дел од про-ЕУ декларираните организации  кон Европската Унија и интеграцијата на вашата земја; и немањето нивната  транспарентност.
• Во следниот период, ЕУ ќе ја засили поддршката за медиумите и за граѓанските организации преку тековните  и нови дизајнирани краткорочни програми, , како и вршењето на подлабински due-diligence oversight врз нашите програми и партнери во земјата.
• ЕУ обезбеди 80 милиони евра неповранта помош за РСМ за справување со енергетската  криза и високите цени. Во следните месеци мораме да работиме многу повеќе и  директно во таа насока во Владата, но и преку ЕБОР и поволни кредитни линии за  зелена енергија и енергија од обновливи извори за приватниот сектор и малите  потрошувачи.
• Бараме и очекуваме да видиме поголема улога и посветеност на граѓанските  организации и соодветните институции кон Европскиот зелен договор и Зелената  агенда 2030. Организациите од овој сектор мора да покажат реални заложби за  исполнување на целите и вредностите предвидени со зелената агенда. Капацитетите на  овие субјекти ќе се развијат со наша заедничка помош и раскинување на „коалициите“  со одредени политички и бизнис моќници од секторот енергетика. Земјата мора  целосно да ги спроведе препораките од Секретаријатот на Енергетската задница од  Виена (Energy Community Impact Report2022).
• ЕУ институциите со мандат за соодветни истраги за европските проекти и грантови сиот овој период имаат тесен фокус врз Северна Македонија и Албанија. Високата  политичка и институционална корупција станува се поочигледна. Корупцијата  сериозно го „минира“ процесот пред условениот старт на преговорите. Мораме со нашите партнери многу повеќе да се посветиме на овие прашања и создадеме нови механизми за кредибилен мониторинг. Имаме сериозен впечаток дека темелните вредности – владеење на правото и борба со корупцијата – се сериозно поткопани во вашата земја, а бројот на сојузници во враќањето на довербата е флуктуирачки, недоволен, односно  недоволно чесен и кредибилен во намерите.
• Претстојните месеци ќе бидат особено сензитивни од политички аспект, затоа очекуваме робусна проевропска поддршка од нашите локални партнери – граѓанското  општество и медиумите. Повеќе од очигледно е дека на овој пат во процесот сѐ повеќе се појавуваат противници. Затоа морате дополнително да ги реафирмирате заложбите, посветеноста и вредностите, преку конкретни активности на краток и среден рок. ЕЕАС и ЕК прават напори за дополнителна структурна поддршка на повеќе целни групи и сектори, со што веруваме дека ќе се ефектуира поголема политичка волја во процесот кој никако не треба да застане.

(Насловот и поднасловот се редакциски)

The post ДИПЛОМАТИ ОД БРИСЕЛ ИМ ТЕГНАТ УШИ НА ГРАЃАНСКИТЕ ОРГАНИЗАЦИИ И НА МЕДИУМИТЕ КОИШТО ЛАПАА ЕВРОПСКИ ПАРИ За 10 милиони евра требаше да испорачате робустна поддршка за ЕУ, а не вака!   appeared first on plusinfo.mk.