Германскиот канцелар Фридрих Мерц изјави дека останува на својот предлог за воведување придружно членство во Европската Унија за Украина и земјите од Западен Балкан, меѓу кои и Македонија, оценувајќи дека Унијата мора да ја зачува довербата кај државите на кои со години им ветува европска перспектива.

Мерц посочи дека неговата иницијатива во Украина наишла на поделени реакции поради внатрешнополитички причини, но дека кај останатите европски лидери била позитивно прифатена.

– Веќе 13 години Европската Унија нема примено ниту една нова членка, иако на голем број европски држави им беше ветено членство – изјави германскиот канцелар.

Тој нагласи дека ЕУ има две можности – или јасно да соопшти дека проширувањето повеќе не е можно, што според него би било најлошото решение, или постепено да го придвижува процесот преку конкретни чекори.

– Можете да го наречете поинаку, но ако го изгубиме кредибилитетот, губиме многу повеќе. Ќе ги изгубиме тие земји, а геополитички тоа би било најлошото нешто што може да ѝ се случи на Европа – порача Мерц.

Тој призна дека процесот на пристапување во ЕУ останува сложен и дека нема да се одвива толку брзо колку што очекуваат некои кандидати, но истакна дека Унијата мора да остане доследна на ветувањата за членство.

Предлогот, кој Мерц го испрати до лидерите на Европската Унија во форма на нон-пејпер на 18 мај, предвидува забрзана интеграција преку воведување преодни статуси за земјите кандидати пред нивното полноправно членство.

Според документот, земјите од Западен Балкан и Молдавија би добиле статус на набљудувачи во институциите на ЕУ, како и привилегиран пристап до единствениот европски пазар уште пред формалното членство.

За Украина, пак, се предлага статус на придружна членка, што би ѝ овозможило учество на состаноците на Европската Унија и отворање на преговарачките поглавја, но без право на глас.

The post МЕРЦ НЕ СЕ ОТКАЖУВА ОД ПЛАНОТ Македонија со земјите од Западен Балкан и Украина да добијат придружно членство во ЕУ appeared first on plusinfo.mk.

ЕУ и Украина потпишаа договор за заедничко производство на беспилотни летала – иницијативата чија цел е да ја комбинира индустриската база на ЕУ со борбеното искуство што Украина го стекна во повеќе од четири години одбрана од руската агресија, објави „Euronews“.

Договорот беше претставен денеска, среда, во Киев од претседателката на Европската комисија, од Урсула фон дер Лајен, и украинскиот претседател Володимир Зеленски.

– Европа веќе има огромни технолошки и индустриски капацитети што можат да се користат. Исто така, имаме безбедни производствени капацитети што можат да помогнат во зголемувањето на производството. Но, она што го немаме е борбеното знаење и експертиза што Украина го стекна. Затоа треба да ги здружиме силите. Заедно можеме да работиме на заедничко производство – изјави Фон дер Лајен во својот говор.

Беспилотните летала се покажаа како клучни во напорите на Киев да го пополни недостигот од воена сила и да изврши напади со долг дострел врз руските рафинерии за нафта, што предизвика криза со горивото во Русија.

– Произведуваме 10 милиони беспилотни летала годишно, а ќе произведуваме 20 милиони. Украина фундаментално го промени бојното поле за прв пат – рече Зеленски за време на церемонијата по повод Денот на украинската државност на плоштадот Свети Михаил во Киев.

Финансирањето на проектот ќе дојде од два извори во рамките на ЕУ: заем од 90 милијарди евра за Украина и програмата за одбрана SAFE, на која ѝ остануваат околу 10 милијарди евра.

Иако неколку земји-членки на ЕУ веќе потпишаа индивидуални договори со Украина за да ја искористат нејзината технолошка инвентивност, овој договор дава поширока димензија на соработката со тоа што ја отвора за сите членови на блокот.

The post ЕУ И УКРАИНА ЗАЕДНО ЌЕ ПРОИЗВЕДУВААТ 20 МИЛИОНИ ДРОНОВИ ГОДИШНО! Потпишан договор за соработка во Киев appeared first on plusinfo.mk.

Европа денес има потреба од Западен Балкан колку што и ние имаме потреба од неа, а можеби и повеќе. Нашиот регион е во многу подобра позиција отколку пред неколку години и време е политички да стане дел од европското семејство, изјави албанскиот премиер Еди Рама во интервју за „Еуроњуз Србија“.

Тој смета дека земјите од Западен Балкан повеќе не треба да бидат оставени настрана од европските процеси.

– Европа денес има потреба од нас исто колку што и ние имаме потреба од неа. Ние сме важен дел од сложувалката што треба да го надополни европскиот мозаик. Не е одржливо да нè држи надвор од својата куќа и да не сме присутни на масата каде што се носат одлуките. Треба политички да бидеме обединети, како едно семејство – рече Рама.

Тој предложи седумте држави што активно преговараат за членство во Европската Унија да учествуваат на заеднички политички состаноци, иако самото членство, како што нагласи, ќе остане индивидуален процес заснован на заслуги.

За да ја објасни идејата, Рама употреби семејна аналогија, според која претседателката на Европската комисија Урсула фон дер Лајен е „мајката“, а нејзините „седум деца“ се Албанија, Црна Гора, Србија, Северна Македонија, Босна и Херцеговина, Украина и Молдавија.

– Не зборувам за членството, туку за политичко единство. Треба сите да седнеме на иста маса, како семејство – порача тој.

Рама оцени дека руската инвазија врз Украина ја направила Европската Унија поодлучна.

– Благодарение на Владимир Путин, ЕУ стана похрабра, а НАТО посилен. Европа конечно сфати дека мора побрзо и поодлучно да дејствува. Прашањето е само дали ќе го задржи тој ритам или повторно ќе се врати на старите навики – рече албанскиот премиер.

Тој додаде дека светот се наоѓа во период на геополитичка и економска нестабилност, но смета дека Европа се обидува токму во такви услови да ја зајакне својата индустрија и економскиот раст.

Осврнувајќи се на односите со Русија и Кина, Рама рече дека Албанија нема практична соработка со Москва, а ниту блиски врски со Пекинг.

– Имаме дипломатски односи со Русија, но не и практични. Со Кина ситуацијата е малку поинаква, но ниту таму немаме блиски односи. Ние цврсто сме определени за западниот пат и не чувствуваме дека нешто ни недостига. Во тој поглед ние Албанците сме некој вид прозападни Талибани – изјави Рама.

Говорејќи за протестите против туристичкиот проект на Џаред Кушнер, наречени „Револуција на фламингата“, тој рече дека тие се доказ дека Албанија влегла во нова развојна фаза.

– Луѓето денес бараат повеќе и тоа веднаш. Порано се радувавме на првиот парк во градот, денес секој сака парк во своето маало. Порано беше успех ако имаше вода 15 часа дневно, денес се очекува 24 часа. Тоа е цената на успехот и на растечките очекувања – рече Рама.

На прашањето дали протестите претставуваат обид за дестабилизација, тој одговори дека додека се мирни се легитимен дел од демократијата, а насилството би било „сосема друга приказна“.

Како еден од најголемите предизвици за современите демократии, Рама ги посочи социјалните мрежи.

– Тие имаат моќ да влијаат врз размислувањето на луѓето. Демократиите ја помешаa слободата на говор со можноста секој да допре до секој ум и да шири секакви бесмислици. Тоа е сериозен проблем. Лагите се забавни, а вистината е здодевна – заклучи албанскиот премиер.

The post УРСУЛА ДА НЕ ГИ ЗАБОРАВИ СВОИТЕ СЕДУМ ДЕЦА! Еди Рама смета дека е време Западен Балкан да се најде во ЕУ appeared first on plusinfo.mk.

Пратеникот на ВМРО-ДПМНЕ, Бојан Стојаноски, на денешната прес-конференција истакна дека опозициските партии со неусвојувањето на Изборниот законик не ја оштетија само дијаспората, туку и граѓаните што живеат во државата.

– Денеска е 15 јули, последниот рок кога требаше да биде усвоена изборната реформа. Во исто време, додека е закажана оваа прес-конференција во 11 часот, започнува пленарната седница на која има 24 точки, но точката за Изборниот законик нема да биде на дневен ред. Со што станува јасно дека обврската што Македонија имаше, да го усвои Изборниот законик, нема да биде исполнета. Четири месеци преговарање во рамки на Министерството за правда, средби во Собранието, отворена понуда од владиното мнозинство кон опозицијата и повторно, опозицијата не смогна сили да седне, да го договори Изборниот законик, онака како што на нив им одговара и да го поднесеме во Собранието, за да може денес да го усвоиме. Оваа коалиција не ја оштети само дијаспората, ги оштети и граѓаните кои живеат во нашата држава, но покажа и дека изјавите на Кос и Рокас, коишто се европски претставници, не значат ништо пред нивниот политички интерес – рече Стојаноски.

Тој нагласи дека тоа кое што го гледаме денес во јавноста е театар на свесна блокада, која што треба да им служи како алиби за наредниот изборен пораз апсурд.

– Не се сретнаа ниту еднаш, иако кажаа дека тоа ќе го направат. Немаше во рамките на Собранието никакви преговори и тоа директно оди во штета на она што беше и нашиот интерес, тоа што го укажуваа и дипломатите од Европската унија, конкретно амбасадорот Рокас и комесарката Кос. Сето ова што се направи, се направи само за да не гласа дијаспората, како што тие ги нарекуваат, „антидржавниот елемент“, и оваа одговорност, зашто Македонија нема да ги исполни обврските, коишто се десет на број, и нема да го заокружи процесот со исполнети десет од десет обврски и зошто нема да ги земе тие 4,2 милиони евра, кои што доаѓаа со исполнувањето на оваа обврска, има име и презиме, тоа е коалицијата ДУИ, СДСМ и Левица – рече Стојаноски.

Тој истакна дека усвојување на овој закон не беше само за да ги детерминира и реорганизира изборните процеси во Македонија. Со усвојувањето на овој закон, рече тој, граѓаните на државата ќе добиеја 4,2 милиони евра, средства кои требаше да се искористат за подобрување на животните услови во оваа држава.

– Покрај тоа што нема да имаме подобрување на изборниот модел, граѓаните ќе останат без 4,2 милиони евра. Кога ќе поднесуваат амандмани за подобрување на некои животни услови, треба да знаат кои се одговорни зошто 4,2 милиони евра нема да легнат во државниот буџет и да бидат искористени за проекти и за подобрување на животните услови на граѓаните – рече Стојаноски.

Најави дека во наредниот период ќе разговараат за оваа прашање, но потенцира дека опозициските партии не сакаат да се договаарт.

– Секако дека ќе разговаме и останува простор во наредниот период. Важно е она што јас не знам повеќе од ова што да направиме, бидејќи сите услови кои што тие ги имаа ние ги прифативме. Останува уште еднаш да им дадеме можност да се договораат како што нема да се договораат бидејќи не сакаат да се договораат, затоа што се свесни дека им е потребно алиби бидејќи за две години ќе има избори и на нив им е потребно алиби – нагласи пратеникот Стојаноски.

The post ОПОЗИЦИСКИТЕ ПАРТИИ ГИ ОШТЕТИЈА ДИЈАСПОРАТА И ГРАЃАНИТЕ ВО ЗЕМЈАВА Стојаноски за неусвојувањето на Изборниот законик appeared first on plusinfo.mk.

Полската компанија за производство на бакар и сребро „KGHM“ најави дека до 2030 година се обврзува на инвестиции тешки над 32 милијарди злоти (8,55 милијарди долари), со цел да се постигнат нови долгорочни цели во производството и во профитот. Планот, наречен „Стратегија 2055+“, има за цел постигнување на прилагодена основна добивка од производство на бакар од 730.000 тони до 2030 година.

Македонија, иако поседува бакар не може да се пофали со инвестиции. Долг период сериозна е само најавата за ископ на бакар од наоѓалиштето во Иловица и Штука. Од компанијата „Еуромакс ресоурцес“ најавија инвестиција од околу 350 милиони евра само во текот на изградбата, а со тоа проектот би претставувал најголема гринфилд инвестиција во државата. Очекуван е и просечен годишен приход од 180 милиони евра, кој ќе придонесе во зголемување на БДП за дополнителни 3%, а силно влијание ќе има и врз македонскиот извоз. Просечната годишна вредност на извозот за време на 23-годишното работење би изнесувало над 180 милиони евра годишно што претставува зголемување од околу 4% на македонскиот извоз.

Засега единствен активен рудник за бакар е „Бучим-Боров дол“, кој ги исцрпува своите капацитети, а претходно нереализирани остануваа повеќе инвестиции, меѓу кои и за рудници за бакар на Кожуф и во Казандол.

Инаку, амбициозните планови во Полска предвидуваат и KGHM да обезбеди снабдување со руда поблиску до своите полски топилници и да ги намали трошоците за логистика. Компанијата очекува околу 80% од производството на бакар да доаѓа од домашни ресурси, а остатокот од рудници во странство.

„По 2035 година, сакаме KGHM да биде модерна индустриска групација за повеќе суровини“, изјави извршниот директор Ремигиуш Пашкевич, додавајќи дека компанијата планира да изгради нов рудник наречен „KGHM 2.0“ во Полска.

Новата Стратегија, исто така, става нов акцент на операциите во странство. Од KGHM изјавија дека речиси 80% од планираните инвестиции ќе одат во нејзиниот основен бизнис во земјата, но остатокот ќе биде наменет за инвестиции во Чиле, САД и Канада. Се очекува да бидат потпомогнати рудникот „Сиера Горда“ во Чиле, во кој KGHM поседува 55% удел, и рудникот „Робинсон“ во Невада.

– Сакаме позицијата на нашите средства во странство да расте, бидејќи тоа го гради глобалниот кредибилитет на компанијата и отпорноста на структурните промени – рече заменик-извршната директорка Ана Собиерај-Козакиевич.

Претходно Европската Унија утврди над 47 стратешки проекти на тлото на Унијата, односно голем број рудници, во 13 земји-членки: Белгија, Франција, Италија, Германија, Шпанија, Естонија, Чешка, Грција, Шведска, Финска, Португалија, Полска и Романија, за ископ на критични минерални суровини и за нив се предвидени забрзани процедури за дозволи. Забрзана процедура е предвидена и во нацрт законот кај нас, а од критичните минерали по кои трага ЕУ, Македонија може да се пофали со бакар, никел, антимон и други.

The post ПОЛСКА ВЛОЖУВА 8,55 МИЛИЈАРДИ ДОЛАРИ ЗА ИСКОП НА БАКАР Кај нас уште не се реализира ниту инвестицијата од 350 милиони евра во Иловица appeared first on plusinfo.mk.

Додека седеше меѓу светските лидери на парадата во Париз, украинскиот претседател се обиде да отвори шише вода. Неколку секунди подоцна, капачката заврши откината, а видеото ги преплави социјалните мрежи.

Токму тој момент стана вирален. Снимката брзо се прошири на социјалните мрежи, каде илјадници корисници коментираа дека се препознале во неговата реакција.

Zelensky struggles with a plastic water bottle, fully detaching the screw cap, and setting it aside.

Under the EU’s Single-Use Plastics Directive, bottle caps must stay physically attached. pic.twitter.com/ZrBRLiS2LR

— Clash Report (@clashreport) July 14, 2026

„Треба да го уапсат. Ја уништи најголемата европска иновација на 21 век“, се пошегува еден корисник.

„Не можам да ги поднесам овие капачиња. Секоја ја кинaм“, напиша друг.

Меѓу коментарите имаше и шеги поврзани со европските интеграции на Украина.

„Како што гледаме, Украина сè уште не е подготвена за Европската Унија“, гласеше една од најсподелуваните реакции.

Зеленски присуствуваше на традиционалната воена парада по повод Денот на Бастилја, заедно со сопругата Олена Зеленска и бројни европски лидери.

Прославата се одржа на Шанзелизе, каде француската армија ги претстави своите копнени, воздушни и поморски капацитети. Моментот со шишето траеше само неколку секунди. На интернет, сепак, траеше многу подолго.

The post 📽️ ЗЕЛЕНСКИ ПОКАЖА КАКО СЕ КИНЕ КАПАЧЕ НА „БАЛКАНСКИ“ НАЧИН! „Требаше да го уапсат, во ЕУ важат други правила“ appeared first on plusinfo.mk.

Српскиот претседател Александар Вучиќ смета дека Европската Унија треба да се откаже од сегашниот модел на проширување, според кој земјите кандидати напредуваат поединечно, и наместо тоа да го прими целиот Западен Балкан како единствена целина.

Во интервју за „Фајненшл тајмс“, Вучиќ оцени дека таквиот пристап би спречил создавање нови поделби во регионот.

„Што сакате да изградите? Посилни граници меѓу сите? Ако сите одиме заедно, нема да има граници меѓу Приштина, Белград и сите други. На регионот му е потребно заедничко членство“, рече Вучиќ.

Според него, заедничкиот прием во Европската Унија би придонел за поголема стабилност на Западен Балкан.

„Ни треба регионот да биде обединет. За да не стане нова зона на конфликт меѓу луѓето што влегуваат во ЕУ и другите што се далеку од неа“, истакна српскиот претседател.

Изјавите на Вучиќ дојдоа во пресрет на денешните состаноци во рамки на процесот на проширување на Европската Унија, на кои Украина и Молдавија треба да отворат нов кластер од преговорите, додека Црна Гора и Албанија продолжуваат со затворање на преговарачки поглавја во пристапниот процес.

The post ЗАПАДЕН БАЛКАН ДА ВЛЕЗЕ ВО ЕУ КАКО ЦЕЛИНА Вучиќ со смела идеја за проширувањето appeared first on plusinfo.mk.

Бугарија се повлекува од коалицијата на земји кои ја поддржуваат Украина во одбраната од руската агресија, објави бугарскиот претседател Румен Радев.

Одлуката претставува ново дистанцирање на Софија од дел од европските сојузници кои продолжуваат да ја поддржуваат Украина со воена и со финансиска помош.

– Ние не учествуваме во коалиција што инсистира на продолжување на финансиската и на воената помош за Украина – изјави Радев.

Бугарскиот претседател, кој со години е критичен кон испраќањето оружје за Киев, повторно нагласи дека не поддржува понатамошна ескалација на конфликтот.

– Решението за овој конфликт не лежи во неговото продолжување со воени средства, туку во силна дипломатска мисија што конечно ќе ја запре ескалацијата – рече Радев.

Иако Бугарија учествуваше на претходните состаноци на коалицијата, земјата не испрати свој претставник на средбата што се одржа во Париз.

Радев и претходно ги отфрлаше обвинувањата дека зазема проруски став, тврдејќи дека се залага за прагматични односи со Москва и за дипломатско решение на војната.

The post БУГАРИЈА СЕ ПОВЛЕКУВА ОД КОАЛИЦИЈАТА ЗА УКРАИНА Радев се залага за мирно решение за крај на војната appeared first on plusinfo.mk.

Европската комесарка за проширување, Марта Кос, изјави дека денеска е „Супер вторник“ за проширувањето на Европската Унија, поради одржувањето пристапни конференции со четири земји кандидати во ист ден.

Кос на платформата „Икс“ објави дека за првпат по повеќе од 20 години се одржуваат толку пристапни конференции во еден ден. На денешните конференции учествуваат Црна Гора, Украина, Молдавија и Албанија.

– Нашите предводнички Украина, Молдавија, Албанија и Црна Гора прават големи чекори напред – наведе Кос, додавајќи дека Црна Гора е на чело на колоната како најнапредна земја во пристапните преговори.

Еврокомесарката посочи дека Украина и Молдавија го отвораат Кластерот 6, што ги опфаќа областите како одбраната и безбедноста каде, според неа, аргументите за нивното членство во ЕУ се особено силни.

– Албанија ќе ги затвори своите први поглавја, а Црна Гора е цврсто во завршната фаза на формалните преговори, со затворени 18 од вкупно 33 поглавја – додаде таа.

Кос нагласи дека денешниот моментум мора да се претвори во „конкретни резултати на терен“.

– Денеска е ден и за славење и за поглед кон иднината. Ја имаме поддршката од земјите членки, но само доколку земјите кандидати ги исполнат условите – заклучи европската комесарка Кос.

The post ЗА МАРТА КОС ДЕНЕСКА Е „СУПЕР ВТОРНИК“ Четири земји кандидати ќе одржат пристапни конференции со ЕУ appeared first on plusinfo.mk.

Премиерот на Албанија, Еди Рама, изјави дека Албанија по пристапувањето во Европската Унија нема да го следи примерот на Бугарија и нема да издава албански пасоши на етничките Албанци кои живеат во Македонија.

– Ние не сме земја која може да прави што сака и како сака кога станува збор за прашања кои се однесуваат на внатрешната хармонија на европското семејство – изјави Рама.

Тој посочи дека Бугарите го сториле тоа дури откако станале членка на ЕУ, „бидејќи нивниот пасош стана многу моќен“.

Рама претходно изјави и дека Албанија нема да ѝ стави вето врз Македонија доколку стане членка на ЕУ. Одговарајќи на прашање на студент од Скопје тој оцени дека тоа е механизам кој може да ја попречи интеграција и додаде дека долго време се залага за нов пристап на Унијата кон земјите кандидати, имено, кандидатите порано да бидат вклучени во процесот на европското одлучување.

Албанија наскоро треба да затвори три поглавја од пристапните преговори. На 14 јули во Брисел ќе се одржи 9. Меѓувладина конференција на Албанија и ЕУ.

Рама порача дека „Албанија не запира“.

АЛБАНИЈА НЕМА ДА Ѝ СТАВИ ВЕТО НА МАКЕДОНИЈА Рама упати јасна порака до Скопје

The post АЛБАНИЈА НЕМА ДА ИЗДАВА ПАСОШИ НА АЛБАНЦИ ВО МАКЕДОНИЈА ПО ВЛЕЗОТ ВО ЕУ Рама отфрла бугарско сценарио и самоволие appeared first on plusinfo.mk.