Украинскиот претседател Володимир Зеленски со остар тон ја прозва Унгарија да престане да купува руска нафта.

Во присуство на повеќе од 50 лидери на на самитот на Европската политичка заедница во Копенхаген, меѓу кои и домаќинката Мете Фредериксен, тој подвлече дека повикот на Доналд Трамп кон Унгарија треба да се сфати сериозно, посебно во Будимпешта, јави Ројтерс.

– Треба да го поддржиме повикот на американскиот претседател Доналд Трамп да се престане со купување руска нафта… Момците од Унгарија мора јасно да го чујат тоа – изјави Зеленски.

Меѓутоа, ова не бил единствениот удар упатен кон Кремљ. Украинскиот лидер инсистира на уште построги санкции насочени кон приходите од руска енергија.

– Тоа мора да престане – нагласи тој, додавајќи дека американската енергија може да биде соодветна замена.

„Мирот се добива со сила“ – тврдата порака на Фредериксен

Данската премиерка Мете Фредериксен, копретседателка на самитот заедно со шефот на Европскиот совет Антонио Коста, беше уште поексплицитна во својата анализа на конфликтот.

– Мирот со Русија може да се постигне само преку сила. Мораме да ја зајакнеме Украина и да ја ослабнеме Русија со дополнителни санкции – изјави Фредериксен.

Во нејзиниот говор, таа остро ги осуди тактиките на Кремљ и објасни дека војната претставува „јасен неуспех на Путин“.

– Сакал да го освои Киев, да ја собори украинската влада и да ја подели Европа. Не успеал во ништо од тоа – децидна е премиерката.

Хибридни напади и дезинформации – новиот фронт

Фредериксен предупреди дека Москва не се откажала од притисок врз Европа, туку дека сега користи и хибридни алатки.

– Соочени сме со непријател кој користи секакви алатки. Еден ден тоа се беспилотни летала, следниот ден ги туркаат мигрантите кон границите, ја таргетираат критичната инфраструктура, се бориме со дезинформации и обиди за влијание врз избори – истакнала таа.

Од друга страна, шефот на Европскиот совет Антонио Коста подвлекол дека поддршката за Украина не значи „поддршка за војна, туку за траен и праведен мир“.

The post „МОМЦИТЕ ОД УНГАРИЈА“ КУПУВААТ, ЗЕЛЕНСКИ ОСТРО ГИ ИСКАРА Стоп за руската нафта, порача украинскиот лидер appeared first on plusinfo.mk.

Деновиве сме дел од Самитот на Европската политичка заедница. Тука сме заедно со потпретседателот на Владата, Изет Меџити и министерката за енергетика, рударство и минерални суровини, Сања Божиновска, објави премиерот Христијан Мицкоски на неговиот фејсбук профил.

– Во текот на утрешниот ден ќе бидам активно вклучен во настаните коишто ќе се случуваат на Самитот и ќе зборувам за предизвиците коишто следат во делот на енергетиката и економијата од аспект на регионалното поврзување за балканските држави – вели Мицкоски во видеообраќањето и додава:

– Мислам дека ќе има многу работи кои ќе бидат кажани како план и нешто што ќе треба тој дел од Европа и светот да се развива во годините што доаѓаат. Исто така, на маргините од самитот ќе имам неколку билатерални средби. На тие средби сакам да ги повторам ставовите на македонската влада, она коешто претставува заштита на интересите на македонските граѓани и она што претставува борба за идентитетот и за се она што изминатите години беше загрозено.

Домаќин на самитот на Европската политичка заедница е британскиот премиер Кир Стармер, а ќе се одржи во историскиот амбиент на палатата Бленхајм во Оксфордшир, Англија.

ЕПЗ е меѓувладин форум за политички и стратешки дискусии за иднината на Европа, основан во 2022 година по руската инвазија на Украина, во кој учествуваат 47 европски држави од кои 27 членки на ЕУ.

The post ЌЕ ЗБОРУВАМЕ ЗА ЕНЕРГЕТИКАТА И ЗА МАКЕДОНСКИТЕ ИНТЕРЕСИ Мицкоски ќе учествува на самит на ЕПЗ, ќе оствари и билатерални средби appeared first on plusinfo.mk.

Дека е сето ова точно, вчера ни потврди никој друг туку францускиот претседател, Макрон, којшто, во недостаток на соодветен германски колега, самиот е водач на Унијата. Рече: „Ризикот е да мислиме дека можеме да се прошириме без реформи. Можам да посведочам дека на Европа ѝ е доволно тешко да напредува на чувствителни теми со 27 членки. Со 32 или 35 членови, нема да биде полесно. Треба да  се размислува за Унија со повеќе брзини“. Практично, Макрон стави крај на проширувањето. Ќе биде – на свети никогаш!

Исто така вчера (28/8/2023), на форум во Блед, претседателот на ЕУ (на Европскиот совет), Мишел, без да трепне, излажа дека – „Унијата мора да биде спремна за проширување во 2030 година“! Тоа не го обврзува бидејќи следната година ќе има избори во Унијата и по нив, тој ќе биде добро платен пензионер. Со празното ветување, им помага на некадарните лидери во земјите кандидати, ама ги остави во небрано Црна Гора и Србија, коишто преговараат веќе 10 години.

За нас, пак, клучно е да се сфати дека со сегашната преговарачка рамка, НЕМА НИКОГАШ ДА ВЛЕЗЕМЕ ВО УНИЈАТА! Таа е така формулирана, со сите крајно максималистички бугарски небулози, што не остава ни теоретски можности да го пробиеме патот до Брисел. Радев јасно ни порача дека уставните промени се само ситница на патот кон ЕУ. Сопките ќе бидат секојдневни, од разни страни.

Македонија е доведена во тунел без излез, и решението мораме да го бараме сами. Тоа што ни се нуди е срамно, понижувачко и самоуништувачко. Кога длабински ќе се анализираат очигледните факти, повеќе е од јасно дека Бугарија нема никогаш да дозволи наше членство, сѐ додека целосно не се откажеме од македонизмот. Поточно, од самите себе. Впрочем, тоа и не го кријат. Потребни ни се радикални промени и целосен пресврт во нашето дипломатско однесување. Излезот е можен само со откажување на договорот за (не)пријателство со Бугарија и понижувачките протоколи, коишто следуваа. Тие се главниот столб на небиднината со којашто сме соочени.

Единствен начин, за надминување на оваа катастрофална ситуација, е да го срушиме тој столб. Само така ќе отвориме нова и реална процедура за евентуално членство во Унијата, или за тоа што ќе се понуди како алтернатива. Неспорно е дека сите ќе бидат против нас, дека Бугарија ќе дивее, ама истото го правеше таа и до сега, а ќе го прави и понатака. А, ако не ја земеме судбината во наши раце, македонскиот народ ќе заврши на ѓубриштето од историјата.

Неодамна, токму за Илинден, Софија отворено и безобразно го присвојуваше Илинденското востание. Најново е дека и браќата Миладиновци биле чисти Бугари. Ако веднаш не покажеме заби, нивната листа само ќе се проширува. Безмилосно ќе продолжат да нѐ притискаат со ултиматуми и уцени, како и до сега – ако сакате во ЕУ, мора да прифатите дека вашето потекло е бугарско. Во спротивно, патот кон Брисел ќе ви биде затворен. Имаат и основа за тоа. Со вториот протокол, преку заедничката историја, ама и со бројни други поразителни формулации, ние сето тоа го прифативме. А Софија, сите наши мизерии ги реализира во пракса.

Изборот е наш. Ако веќе сме потпишале, мораме и да отпишеме. Трето – нема. Инаку, отидовме јабана. Со оглед дека проширување уште долго нема да има, имаме време за да ги исправиме сите сопствени глупости и капитулации.

Унијата е во сериозна криза. Најдобар доказ за тоа е прекинатото проширување. Од првите шест, во 1958, за 37 години, до 1995, ЕУ стигна само до 15 членки. Арно ама, за три години, во 2004 и во 2007, беа примени 12 нови, плус Хрватска во 2013. Тоа беше златниот период на Унијата. Приемот на Бугарија и Романија (2007) се покажа како преран, со сите последици коишто следуваа и ќе траат.

Тоа создаде отпор кон проширувањето. Веќе 10 години нема нови членки. Созреа и оценката дека Унијата мора прво да се реформира, и тоа длабински, што е процес којшто неизбежно долго ќе трае. Можеби 10 и повеќе години. Ќе се реформираат основните права на членките, и брзи промени не се реални.

Се размислува за некаква „втора лига“, каде „новите“ не би имале свои комесари, право на вето… туку само економски права. Европската политичка заедница, пак, ќе ја компензира политичката димензија, како празен дебатен клуб.

И премиерот на Унијата, Фон дер Лајен, на безбедносната конференција во Братислава (јуни, 2023) доволно јасно кажа дека нови членки – нема да има! Објасни дека, како замена, имаат „развоен план“ од четири столба: Балканот да биде донесен поблиску до единствениот европски пазар; да се продлабочи регионалната економска интеграција; да се забрзаат фундаменталните реформи; и да се подотворат фондовите на Унијата.

Проширувањето не го ни спомна! Намерата е да фрлат некое ситно морковче, ама без членство. Нудат повеќе „заеднички пазар“, за стоките коишто ги немаме, а тоа е и соочување со конкуренцијата, којашто тешко ќе ја издржиме. Ќе пружат повеќе од ИПА фондовите, а немаме капацитети за нивна апсорпција. Огромните структурални фондови, пак, и понатака нема да ни бидат достапни. Тие се за на крајот од преговорите за членство. Демек, по 20, 30… и повеќе години.

ЕУ не е беспрекорна организација. Во Брисел има политиканство, двојни стандарди, непринципиелности, тежок бирократизам, неефикасност, непотребна зависност од Вашингтон… Сепак, тоа е одличен пример на соработка, голем пазар, развој, помош, решавање на проблемите…

Македонија треба да прави сѐ што е во рамките на можното, ама и нормалното, за да се приклучи во ЕУ или на тоа што ќе се понуди. Тоа не е спорно. Меѓутоа, стриктно мораме да следиме што се случува во Унијата, да го чуваме своето достоинство, и да не удираме со глава во ѕид, како со бесмислените уставни промени. Максимално мораме да бидеме внимателни, особено со оглед на начинот на кој Брисел нѐ третираше до сега. Да не забораваме дека така е од самиот почеток, што значи дека ништо не е случајно.

Да не се залажуваме дека името ни го смени Грција, или дека Бугарија национално нѐ обезличува. Ноторна вистина е дека зад сето тоа се кријат интересите на САД, следени од ЕУ.

Не смееме да забораваме дека, на патот на меѓународното етаблирање, по распадот на Југославија, независна Македонија наиде на жесток меѓународен бојкот. Веднаш започнаа невидени активности и мерки за дефинитивно затворање на „Македонското прашање“. Поточно – за бришење на македонскиот народ. Истата политика продолжува цело време, 30 години, а сега и – финализира.

Македонија никогаш не се спротивстави на овие негаторски политики. Напротив, на крајно непринципиелен начин, цело време голташе сѐ поголеми кнедли. Не покажа дека никој не може, и не смее, да си игра со иднината на македонскиот народ. Последниве седум години се катастрофални.

Во Брисел не се стигнува со ултимативно менување на уставот, со виткање на ‘рбетот, со прифаќање на нелегални и понижувачки диктати, услови, дури и уцени, со капитулантска психологија… Тоа е целосно погрешен пристап, којшто води во неповрат. Мораме да ги откажеме понижувачките документи коишто сме ги потпишале, коишто срамно нѐ обврзуваат на неприфатливи нешта, и да тргнеме по нова патека. Друг избор немаме.

Балканските кандидати, нема да може да избираат околу членството. Унијата ќе ги стави пред свршен чин во некаква „втора лига“. Тоа е повод да се активираат сите наши дипломатски капацитети, да се следи што се случува и да се избориме за нашите долгорочни интереси. Со главите горе, да ги постигнеме нашите цели. Ги имаме сите услови и, во целина, од нас зависи дали ќе го постигнеме максимумот.

The post Во Унијата – на свети никогаш! appeared first on plusinfo.mk.

Пендаровски рече дека е разбирливо што во изминатите месеци сите зборуваат за безбедносната состојба во Украина поради руската агресија таму, но дека темата за безбедност е доста позната за Западниот Балкан со оглед на неговата модерна историја.

Осврнувајќи се на регионот, тој посочи дека има споделени предизвици, дека демографските трендови не се поволни и притоа порача дека е потребно да се инвестира повеќе за младите луѓе, со цел да имаат повеќе можности за успех дома во своите земји.

Потребно е, нагласи Пендаровски, поголемо европско присуство постојано, а не само кога има кризни случувања.

Пендаровски посочи дека Северна Македонија го отпочна процесот на пристапување кон Унијата и дека е во тек скрининг процесот којшто треба да трае до крајот на идната година, а потоа, нагласи, можеме да зборуваме за следните фази од процесот на пристапување кон ЕУ.

Во однос на Европската политичка заедница, претседателот Пендаровски го повтори неговиот став дека таа треба да биде инструмент што ќе ни помогне во процесот на пристапување кон ЕУ, а не само дебатен клуб или пак замена за членството во Унијата, затоа што веќе се соочуваме со трендови на зголемување на евроскептицизмот и над 20% пад на поддршката за пристапувањето кон ЕУ.

– Членството на Северна Македонија во ЕУ не е потребно само за зајакнување на економијата, унапредување на трговската размена и подобрување на животниот стандард, туку дека е потребна и политичка интеграција во институциите на ЕУ, како и демократски развој, зајакнување на институциите, владеење на правото и слободни медиуми, рече Пендаровски.

Одговарајќи на прашањето за можностите за евроинтеграција на Украина, претседателот истакна дека Северна Македонија дава поддршка за членство на Киев во ЕУ и дека тој својата поддршка ја покажа и со писмо упатено до претседателот Зеленски. Истакна дека и покрај состојбата во која се наоѓа Украина, добивањето на кандидатски статус е силна политичка порака од Унијата, стратешки поглед на ЕУ, солидарност и подготвеност да се демонстрира заедништвото на Унијата со украинскиот народ.

Претседателот Пендаровски, во рамки на учеството на форумот во Париз, имаше и повеќе средби со шефови на држави, учесници на форумот.

The post СПАС ЗА БАЛКАНОТ Е САМО ИНТЕГРАЦИЈА ВО ЕУ Пендаровски на Парискиот мировен форум appeared first on plusinfo.mk.

– На состанокот ќе се бара нов поредок без Русија – изјави Борел.

Самитот на  ЕПЗ е организиран на иницијатива на францускиот претседател Емануел Макрон.

The post НОВ ПОРЕДОК БЕЗ РУСИЈА Борел откри што се спрема на самитот во Прага appeared first on plusinfo.mk.

На шести октомври во Прага ќе се одржи првиот состанокот на шефови на држави и влади на Европската Политичка Заедница, освен 27-те земји членки на ЕУ во ЕПЗ учествуваат и Ерменија, Азербејџан, Босна и Херцеговина, Грузија, Косово, Лихтенштајн, Молдавија, Црна Гора, Северна Македонија, Норвешка, Србија, Швајцарија, Турција, Украина и Обединетото Кралство.

Целта на Европската Политичка Заедница е да се создаде платформа за политичка координација за сите земји на широкиот европски континент, да им се овозможи да се координираат и комуницираат за сите теми за кои имаат заеднички интерес. Сѐ со цел да се обезбедат стабилноста и безбедноста на континентот, велат од ЕУ.

На самитот на ЕПЗ сите лидери ќе имаат еднаква тежина, а дипломатите во Советот се надеваат дека овој формат ќе може да се одржува редовно во иднина, еднаш или два пати годишно.

Дипломатите во Брисел инсистираат дека ЕПЗ во ниеден случај нема за цел да ги замени постоечките организации, структури и процеси на ЕУ и не планира да создава нови. Не се предвидени ниту формални декларации, ниту формални заклучоци на крајот на овој самит.

Состанокот на лидерите на ЕПЗ ќе започне со пленарна седница во еден часот попладне со тркалезна маса во која се поканети да учествуваат шефовите на држави и влади, а се очекува да трае до 4 часот попладне. На тркалезната маса темите ќе бидат безбедноста, енергијата, климата, економијата, миграцијата и мобилноста. Потоа лидерите ќе имаат прилики за билатерални средби, а завршната седница ќе се одржи на заедничка вечера од 19.30 часот.

Идеите за Европска Политичка Заедница интензивно почнаа да се подготвуваат по почетокот на војната во Украина и апликацијата за членство на оваа земја, како и на Грузија и Молдавија, во ЕУ. Со оглед на бавноста на процесот на проширување, голем број лидери и дипломати оценија дека воспоставувањето на нов формат како ЕПЗ ќе овозможи подобра и побрза координација на сите земји на континентот.

The post МАКЕДОНИЈА ПОКАНЕТА НА САМИТОТ НА „ВТОРАТА ЛИГА“ За Европската политичка заедница во Прага ќе дискутираат над 30 земји appeared first on plusinfo.mk.

Говорејќи на сослушувањето во Комисијата за надворешна политика на Долниот дом на британскиот Парламент, Трас ги негираше извештаите од Елисејската палата во кои се сугерира дека британскиот премиер Борис Џонсон покажал интерес за Европската политичка заедница во разговор со францускиот претседател.

Џонсон и Макрон разговараа на маргините на самитот на Г7, на 26 јуни во Германија.

Макрон предложи формирање на Европска политичка заедница која ќе биде отворена за европските држави кои споделуваат заеднички збир на демократски вредности, без разлика дали се членки на Унијата или не, дали сакаат да ѝ се приклучат или ја напуштиле.

Според некои аналитичари, идејата на Макрон може да биде средство за идните британски влади да ги обноват поблиските односи со ЕУ.

Трас, меѓутоа, кажа дека приоритетите на Велика Британија се зајакнување на улогата на НАТО и Г7, јави Еуроактив

The post НА БРИТАНЦИТЕ НЕ ИМ СЕ ЧЛЕНУВА ВО НОВАТА ЗАЕДНИЦА НА ЕУ Министерката го отфрли предлогот на Макрон appeared first on plusinfo.mk.

– Северна Македонија ја има поддршката од европските партнери кои сметаат дека мора веднаш да ги започнеме преговорите за членство во ЕУ, а Владата секако го продолжува дијалогот со соседна Бугарија за изнаоѓање достоинствено и европско решение кое ќе го крене ветото и ќе го даде долгоочекуваниот датум за отпочнување на преговорите со Унијата – изјави Арсовски, одговарајќи на новинарско прашање дали изјавата на францускиот претседател Емануел Макрон за воспоставување на европска политичка заедница, ќе влијае врз спорот меѓу Скопје и Софија.

Тој истакна дека овој предлог е поттикнат од потребата да се даде еден вид заштита на европската перспектива и можности за поврзување и соработка на Украина, Молдавија и Грузија со Унијата, без притоа да чекаат да ги исполнат сите критериуми што се потребни за земјите кандидатки за членство.

Францускиот претседател Макрон повика да се формира „Европска политичка заедница“ за зајакнување на соработката на ЕУ со другите европски земји, поради тоа што членството на тие земји во Унијата не е реално во блиска иднина. Укажувајќи дека треба да се преуредат основачките договори на ЕУ, Макрон истакна дека во наредните недели би можеле да се одржат разговори за институционални реформи и дека за нив би можело да се дискутира на следниот Самит на лидерите на ЕУ.

Германскиот канцелар Олаф Шолц оцени дека идејата на Макрон за формирање „Европска политичка заедница“ е интересна, но и дека тоа не треба да ги спречува да го завршат она што е започнато со земјите од Западен Балкан кои донеле храбри одлуки, при што, како пример ја наведе Северна Македонија.

The post ПРЕДЛОГОТ НА МАКРОН Е ОДЛИЧНА МОЖНОСТ ЗА МАКЕДОНИЈА Владата гледа шанса во оваа нова идеја appeared first on plusinfo.mk.

По предлогот на францускиот претседател Емануел Макрон во неговиот говор од Стразбур дека за да се интегрира побрзо Украина потребна е Европска политичка заедница, затоа што до полноправно членство Киев ќе треба да чека уште долги години, Европската комисија денеска порача дека не може да го коментира овој став додека не го види целосно формулиран.

– Слушнавме вчера, но тој самиот рече дека ќе го презентира предлогот со повеќе детали пред неговите колеги во Европскиот совет. Ќе чекаме да видиме што има на ум, но што се однесува до нас имаме европски процес на зачленување кој е во тек со одреден број земји и ништо не се менува што се однесува до овие процеси – изјави Ерик Мамер, портпарол на Европската комисија.

Тој истакна дека апликацијата на Украина пристигнала до службите во Комисијата и целта е до крајот на јуни оваа институција да објави мислење за кандидатскиот статус на Киев во ЕУ.

The post ЕУ НЕ ГО КОМЕНТИРА ПРЕДЛОГОТ НА МАКРОН Ги чека деталите за да се изјасни appeared first on plusinfo.mk.

Макрон побара од ЕУ да најде нови начини за политичка соработка со државите што не се членки на Унијата и тоа во областите на безбедноста, енергетиката и во транспортот. Предлогот на францускиот претседател веднаш наиде на одобрување кај германскиот канцелар Олаф Шолц, но претставниците на 13 земји-членки на ЕУ го одбија.

– Големите сили во Европската Унија се тие што ќе ја одредат рамката за иднината на Унијата. Една од тие големи сили е Франција. Начинот на одлучување во ЕУ, а тоа е консензусот, им дава сила и на помалите земји, па видовме како тие реагираат. Некои од нив не се спремни на промени. Но големите сили имаат начин како да ги убедат другите за да ги прифатат нивните идеи и ставови – вели за Плусинфо, професорот и прв министер за надворешни работи на Република Македонија, Денко Малески.

Тој посочува дека ќе треба добро да се прочита предлогот на Макрон, пред да се донесе каков било заклучок, но тој не би ја отфрлил туку-така идејата за членување во т.н. Европска политичка заедница.

– Мене ми изгледа прифатлива идејата доколку е тоа обид да се пополни вакуум во односите на ЕУ и аспирантите како Македонија, во процесите за интеграција што траат со децении. Треба да видиме што предвидува планот на Макрон, во делот на предвидувањата околу преговорите за полноправно членство. Треба да се има предвид дека членството во ЕУ се наметнува и како безбедносно прашање, особено во светло на она што се случува во Украина. Предложената Европска политичка заедница значи збивање на редовите меѓу ЕУ и аспирантите, со цел да се избегнат одредени безбедносни ризици – додава Малески.

Политикологот Димитар Христов смета дека ЕУ ја подоотвора вратата за нови членки, пред сè, поради Украина, но тоа би можело да биде шанса и за Македонија.

– Прво мора да разбереме дека членство во т.н. Европската политичка заедница ни близу не е како членство во ЕУ, како што изјави и самиот Макрон. Инцијативата реално е доста добро решение за демократските држави што географски припаѓаат во Европа, вклучувајќи ја и Велика Британија која веќе не е дел од ЕУ, бидејќи од една страна знаеме колку е тешко една држава да добие статус на земја-членка и уште потешко да стане рамноправна членка во ЕУ, а оваа заедница може да им овозможи на тие држави да работат рамо до рамо со другите поголеми држави во Европа. Според мене, сето ова се случува за да ѝсе помогне на Украина во конфликтот што го има со Русија, бидејќи реалноста кажува дека Украина нема да биде членка на ЕУ во скора иднина, па ајде да направиме нешто да ѝ помогнеме и така се раѓа Европската политичка заедница. Исто така, мора да се спомене дека оваа идеја не доаѓа како „гром од ведро небо“, бидејќи уште во минатото Франсоа Митеран се обидел да направи нешто слично на ова во периодот кога се распаѓал Советскиот Сојуз. Таа идеја не успеала поради тоа што било планирано и Русија да стане дел од таа заедница – вели Христов.

И покрај тоа што членството во политичката заедница нема да биде исто како и членувањето во ЕУ, Христов е дециден дека оваа шанса Македонија не смее да ја пропушти.

– Во врска со Македонија, реалноста е дека треба да се искористи оваа шанса и без никакво двоумење да се прифати овој предлог бидејќи може да претставува силен напредок кон аспирациите за членство во ЕУ. Исто така, членството во оваа заедница може да придонесе за стабилност во Западен Балкан како и на целиот континент – додава тој.

The post И ЕВРОПСКАТА „ВТОРА ЛИГА“ Е ДОБРА ЗА МАКЕДОНИЈА Макрон ни дава шанса што не смееме да ја пропуштиме appeared first on plusinfo.mk.