Долго најавуваниот европски систем за електронска авторизација за патување ЕТИАС повторно нема да започне според досегашните најави. Европската Унија засега не објави нов конкретен датум за неговото активирање, а патниците од земјите чии граѓани можат да патуваат без виза во Шенген-зоната сè уште не треба да поднесуваат барања или да плаќаат такса.

ЕТИАС, односно Европскиот систем за информации и авторизација за патување, ќе се однесува на државјани на земји што имаат безвизен режим со Шенген-зоната, меѓу кои е и Македонија, како и Србија, Велика Британија, САД, Канада и Австралија.

По воведувањето на системот, патниците од овие земји ќе треба пред патувањето да добијат електронско одобрение, но тоа нема да биде виза.

Системот сè уште не е активен

Новото одложување, според информациите што ги пренесуваат регионалните медиуми, е поврзано и со техничките предизвици при воведувањето на новите европски системи за гранична контрола.

Најважната информација за граѓаните во моментов е дека ЕТИАС не е оперативен. Тоа значи дека за патување во Шенген-зоната во моментов не треба да се поднесува ЕТИАС-барање и не треба да се плаќа никаква такса.

Европската Унија на својата официјална веб-страница предупредува дека системот сè уште не е во функција и дека барањата за патни дозволи во моментов не се прифаќаат.

Конкретниот датум на започнување на ЕТИАС ќе биде објавен однапред, неколку месеци пред системот да стане оперативен.

Тоа значи дека граѓаните кои во периодов планираат патување во земјите од Шенген-зоната не треба да плаќаат на интернет-страници што нудат „ЕТИАС апликации“, бидејќи официјалниот систем сè уште не прима барања.

Што ќе се промени кога ќе започне ЕТИАС?

Кога системот ќе стане активен, патниците од Македонија ќе треба да поднесат електронско барање пред патувањето. Авторизацијата ќе биде поврзана со патната исправа, а патникот ќе мора да патува со истиот пасош со кој ја поднел апликацијата.

Важно е да се нагласи дека ЕТИАС не е виза. Станува збор за претходна електронска проверка за патници кои и понатаму имаат право на безвизно краткорочно патување.

За граѓаните на Македонија, воведувањето на системот значи дополнителен чекор пред патување, но не и укинување на безвизниот режим.

The post НЕ ПЛАЌАЈТЕ ЗА ЕТИАС, СИСТЕМОТ СÈ УШТЕ НЕ РАБОТИ Македонците засега не треба да аплицираат за патување во Шенген appeared first on plusinfo.mk.