Имено, жителите на десетина и повеќе споредни улици на патот од Драчево кон Долно Лисиче, кои сите заедно се водат како улица Киро Фетак,  уште од 10 часот изутринава немаат една фаза на струјата, а тие куќи со монофазна струја немаат никакво снабдување. Цел ден граѓани се јавуваат на дежурниот телефон на ЕВН дистрибуција и го добиваат истиот одговор – екипите се испратени на терен, се работи на случајот. Граѓаните веќе ги губат нервите, зашто не можат да се подготват за новогодишната ноќ.

– Цел ден не можам ништо да работам, палиме оган надвор за да зготвиме нешто, зашто немаме никаква струја дома. Ова не е нормално, ни се одмрзнаа фрижидерите, цел ден чекаме да се поправи дефектот. Во мрак ли ќе чекаме Нова година. Срамота! Дојдоа двајца околу 3 попладне, прашаа нешто, и рекоа, ќе биде, работиме на дефектот. Еве поминаа 5 часа, уште ништо. Се јавуваме на телефон и само велат, сега-после, имаме многу јавувања. Подоцна веќе не можеше да се добие никој, велат сите оператори ни се зафатени. Па добро, толку ли се неспособни – вели О.М., 65-годишна драчевчанка, на која, како што вели, прекинот на струјата ѝ го уништил дочекот на Нова година.

Нејзиноот сосед, кој со семејството неодамна се вратил од странство за да ја дочека Новата година во својата земја, вели дека е разочаран од она што го дочекало тука.

– Ова е срамота. цел ден да не може да се отстрани еден дефект!? Вакво нешто само овде се случува. Сакав на моите деца да им ја приближам нивната татковина, па затоа и ги донесов во Македонија, но после ова не знам што ќе мислат, нема да сакаат уште еднаш да дојдеме на гости – вели соседот.

Друг сосед, кој делумно има струја, а делумно не, вели дека ова е срамно.

– Ми дојдоа гости, имаме струја на некои удреди, но една фаза нема, па седиме во мрак. Палиме свеќи како во 19-ти век. Па добро, пријавено е од 11 саатот сабајле, колку време им треба? Се јавуваме и отпрво велеа, знаеме, работиме на случајот, а потоа не дигаат слушалка – вели револтирано драчевчанецот.

Од ЕВН Дистрибуција се обидовме да добиеме одговори дали и кога ќе биде отстранет дефектот, и за каков дефект станува збор, но добивме само одговор дека „екипите се на терен и се работи на случајот“.

The post ДЕЛ ДРАЧЕВЧАНИ ЌЕ ЈА ДОЧЕКААТ НОВАТА ГОДИНА ВО МРАК Цел ден чекаме да се отстрани дефект, велат тие appeared first on plusinfo.mk.