Но, пред државата висат и арбитражни постапки кои можат да ги чинат граѓаните и над две милијарди евра. Од она што е познато од последно објавениот Извештај на Државниот завод за ревизија, над 1,3 милијарди евра изнесува потенцијалната отштета што државата ќе ја плати доколку загуби во споровите во меѓународна арбитража. Заводот констатираше дека актуелните судски спорови во коишто е тужена државата би имале финансиски импликации врз буџетот во наредните неколку години.

Освен постоечките пет арбитражни постапки кои се водат против државата во надлежните судови ширум светот, против Македонија се заканува и нова тужба од над една милијарда евра. Станува збор за инвеститорот во рудникот за бакар во „Иловица“, односно компанијата „Еуромакс ресоурсес“. Инвеститорот веќе информираше дека правната основа за евентуално покренување спор пред меѓународните судови, е билатералната спогодба за заштита на инвестиции меѓу Македонија и Швајцарија, потпишана уште во 1996-тата година. Оттаму појаснија дека нивен мнозински акционер е Групацијата Трафигура, која како правно лице подлежи на правото на заштита во согласност со наведената билатерална спогодба.

Изминативе денови менаџментот на компанијата најави дека тужбата против државата е сѐ поизвесна, бидејќи Управниот суд не ја прифати нивната тужба. Компанијата покрена тужба пред овој суд откако Владата реши да ја повлече одлуката за спојувањето на концесиите за рудникот. Владата ја поништи одлуката за спојување на концесиите и покрај позитивното мислење од Министерството за економија и судските пресуди во корист на инвеститорот. Дел од експертите претходно алармираа за правниот основ за поништувањето на една ваква одлука и предупредија дека евентуалната арбитража може скапо да ја чини државата.

Тогаш, министерот за економија Крешник Бектеши истакна дека владината одлука само ја враќа ситуацијата во статус кво и дека ја изложува Македонија на потенцијална арбитражна постапка, која може македонските граѓани во иднина да ги чини милионски суми како оштета.

– После 5-6, 10 години, моите и вашите деца и на сите граѓани од денешните одлуки можат да патат во иднина и да плаќаат милионски суми за административни – технички пропусти – изјави Бектеши.

Според министерот, сите правници, во Министерството и надворешни адвокатски куќи велат дека одлуката на Владата не ја менува суштината и концесионерот „Еуромакс“ ќе продолжи да има сопственост на двете концесии, а оттаму и право да го повтори барањето за спојување на концесиите. Ваквиот став на економските власти можат дополнително да одат во полза на меѓународната арбитража на инвеститорот.

Од компанијата истакнаа дека покренувањето на меѓународна арбитража никогаш не им била примарна цел, но компанијата ќе биде принудена да го активира процесот доколку оцени дека тоа е единствен начин за да се заштити од несоодветниот третман на државните институции.

Исто така, Заводот за ревизија порача да се утврдат причините поради кои против Македонија се покренуваат арбитражни постапки и да се побара одговорност. За петте спорови од 2018 година па навака се одлеваат пари на граѓаните. Исплатени се 15,6 милиони евра на повеќе адвокатски фирми. Претходно од Владата информираа дека соработуваат со адвокатските фирми „White&Case“, „Orrick, Herrington& Sutcliffe“ и „McDermott Will&Emery“, поради нивниот добар рејтинг на глобалната листа. Само во текот на една година, односно 2021, Генералниот секретаријат на Владата потрошил 3,8 милиони евра за ангажирање на адвокатски друштва за застапување во арбитражни постапки во странство. Според математиките, ако државата ги загуби споровите пред странските судови, секој македонски државјанин ќе биде задолжен за скоро две илјади евра.

Инаку, освен што веќе се ризикува зголемување на државниот долг, со одолговлекувањето на проектот за рудникот за бакар во Иловица, но и со неизвесниот исход од целиот процес, државата веќе загуби сериозен прилив во буџетот. Неколку стотици милиони евра приходи не се слеани во Буџетот само по основ на ненаплатени надоместоци за концесијата и по основ на даноци кои инвеститорот ќе имаше обврска да ги исплати ако започнеше изградбата на рудникот.

The post ВЛАСТИТЕ ИТААТ КОН РАСТ НА ДРЖАВНИОТ ДОЛГ Милијарди евра се бараат преку меѓународни арбитражи?! appeared first on plusinfo.mk.

Според сознанијата кои надлежните сѐ уште избегнуваат да ги потврдат, пресудата од меѓународната арбитража во Вашингтон е во полза на концесионерот. Државата го загубила спорот, а домашните власти тактизираат со тајмингот на објава на правниот исход. Владината коалиција на СДСМ и на ДУИ наводно успеала да излобира пресудата да биде објавена следната есен, а не сега, во период на предизборие, кога може да стане тема во кампањата на која ќе губат политички поени.

До меѓународната арбитража предметот дојде откако поранешниот премиер Зоран Заев на 27 март 2018 година ја потпиша одлуката за едностран раскин на договорот, велејќи дека има цврсти правни аргументи.

„Владата е посветена на здравјето на граѓаните, здравјето е поважно од било кој приватен интерес и ова е порака до граѓаните на општините Валандово, Богданци и Дојран“, изјави тогаш Заев, додавајќи дека компанијата била обврзана „во рок од две години да изгради постројка за експлоатација на катоден бакар, а Владата нема да плаќа пенали, бидејќи во овој случај концесионерот не го испочитувал договорот“.

Од Сардич тогаш одговорија дека не се исполнети ниту законските, ниту договорните услови за еднострано раскинување од страна на Владата на Договорот за концесија за експлоатација за рудникот „Казандол“. Според конзорциумот, надлежните државни институции никогаш не утврдиле ниту една неправилност, а концесионерот воопшто не бил ниту опоменуван, ниту пак казнуван. Пред да ја покрене меѓународната арбитража компанијата побара да се пристапи и кон пријателско решавање на спорот, а реагираше и украинската амбасада во земјава. Оттаму истакнаа дека Македонија и Украина имаат потпишано спогодба за поттикнување и заемна заштита на инвестициите во двете држави и спорот треба да се реши со пријателски преговори.

Сепак, шест години подоцна скоро половина милијарди евра народни пари ќе треба да легнат на контото на Сардич. Првичната инвестиција на англиско-украинската компанија Сардич беше проценета на 25 милиони евра и беа предвидени 250 вработувања.

Од Државниот завод за ревизија претходно порачаа да се обрне внимание поради импликациите врз буџетот од страна на судските пресуди во меѓународна арбитража, а притоа никој не презема одговорност за фактот што Македонија плаќа милионски суми отштети во арбитражни спорови.

Компаниите кои сакаат да инвестираат посочуваат дека најголем проблем претставува правната несигурност, која пак е предизвикана поради притисоци од дел од јавноста. Изминатиов период во правните лавиринти заглави инвестицијата за рудник за бакар во Иловица, а инвеститорот „Еуромакс ресоурцес“ е сѐ погласен во најавите за покренување меѓународна арбитража, откако Владата лани реши да ја поништи Одлуката за спојување на концесиите, а Управниот суд деновиве не ја прифати нивната тужба.

„Загрижувачки е да се види таков модел на судски надзор, особено кога правата на меѓународните инвеститори се доведени во прашање. Постојаното непочитување на законите од страна на Владата и релевантните државни институции е алармантна, и во таков случај меѓународната арбитража се наѕира како неизбежна последица доколку овој тренд продолжи. Со значителното зголемување на цените на бакарот и златото во последните години, потенцијалните економски импликации од таквите активности не можат да се пренагласат“, информира Тим Морган-Вин, извршниот претседавач на Бордот на директори на компанијата.

Неофицијално, евентуалната отштета кон „Еуромакс ресоурцес“ преку арбитража може да достигне и над една милијарда евра. Во тој случај, заедно со веќе покренатите меѓународни арбитражи, странски инвеститори од државава би имале побарувања во вредност од над две милијарди евра. Последно, Владата загуби во меѓународна арбитража за купопродажниот договор за рафинеријата ОКТА, па државата сега треба да ѝ плати 21 милион евра на грчката компанија „Хеленик Петролеум“, бидејќи не го испочитувала договорот потпишан во 1999 година. Со него земјава се обврзала годишно да купува по 500.000 тони грчки мазут, иако немала потреба од толкава количина.

The post ЗНААТ ЛИ ВЛАСТИТЕ ДЕКА ЗА КАЗАНДОЛ ГИ ЧЕКА ОТШТЕТА ОД ПОЛОВИНА МИЛИЈАРДА ЕВРА? Пресудата ќе задоцни за да не биде тема на изборите appeared first on plusinfo.mk.

Од Македонската рударска асоцијација претходно информираа дека учеството на рударската индустрија во вкупниот БДП на земјата се движи околу 2 проценти, што е релативно скромно во споредба со високо развиените индустриски земји како Австралија, Германија, САД и Полска, каде придонесот на рударството во вкупната економија е далеку поголемо.

Една од поголемите најави од изминативе години беше вложувањето во изградба на рудникот за бакар „Казандол“ во Валандово. Првичната инвестиција на англиско-украинската компанија „Сардич“ беше проценета на 25 милиони евра и беа предвидени 250 вработувања. Сепак, Владата реши да го раскине договорот. Понатаму, канадската компанија „Резервоар минералс“ исто така се соочи со голем број предизвици, а по одржаниот референдум во Гевгелија во 2017 година, воопшто и не беше продолжена концесијата за рудник за злато во Кожув. Последно, правната несигурност се одрази и на инвестицијата во рудник за бакар во Иловица, на канадската групација „Трафигура“, преку домашната фирма „Еуромакс ресоурсес“. Во овој случај, остануваат нереализирани нови 360 милиони евра првична инвестиција и околу две илјади директни и индиректни вработувања.

Сепак, според дел од меѓународните истражувачки центри и медиуми, за ваквата состојба во позадина се кријат политичко-економски интереси, а не цели за заштита на животната средина. И тоа не било чии, туку директно на Москва. Рускиот медиум „Инсајдер“ го поврзува делувањето на дел од активистите кои се против отворањето на рудниците со блокадата за западните инвестиции.

„Еден од најактивните на ова поле беше Крум Велков, кој е отворен промотор на руските интереси во Македонија. Велков и неговиот соработник Ангел Наков водат кампања против западните рударски компании како канадската Reservoir Minerals или украинско-британската Sardich. Тој ги поддржува и локалните невладини организации што го напаѓаат проектот за рудник за бакар Иловица. Сите овие проекти моментално се во мирување. Крум Велков е автор на антизападни написи на заговор на веб-страниците на ‘Геополитика’ и на веб-страницата на ‘аналитичкиот центар’ Катехон, кој е раководен од Константин Малофеев, Сергеј Глазиев и генерал Решетников“, пишува Инсајдер.

Додека западните инвестиции кај нас тапкаат во место, Европската Унија реши од 2024 година да ги олесни процедурите во рударството и бара засилено да се истражуваат геолошките ресурси. Брисел веќе изготви и листа на критични минерални суровини, за кои не сака да биде премногу зависна од трети страни, како Кина и Русија. Со овие минерали Унијата очекува забрзано да се реализира зацртаната зелена агенда. Меѓу критичните суровини се најдоа бакарот, магнезиумот, алуминиумот, титаниумот, кобалтот и други. Покрај тоа што кај нас континуирано се забележува дека инвестициите во рударството се попречуваат, власта со Декларацијата од Самитот ЕУ-Западен Балкан се заложи дека ќе се придржува до новите правила на Брисел кои ќе започнат да се имплементираат од наредната година.

„Во врска со интеграцијата на Западниот Балкан во индустриските синџири на снабдување, го поздравуваме интересот изразен од партнерите од Западен Балкан да им се приклучат на партнерите за вредносниот синџир на ЕУ за критични суровини и да добијат поддршка за развој на релевантните индустрии, во согласност со потребите и стандардите на единствениот пазар на ЕУ“, пишува во Декларацијата од Самитот, која доби поддршка и од македонските власти.

Дел од домашните експерти потенциираат дека изградбата на рудниците е прашање на иднината од кое зависи и економската стабилност на државата. Според металуршкиот инженер Виктор Грозданов, оваа тема не треба да се политизира, а државата не смее никого да дискриминира или ограничува при повикувањето на државните регулативи за инвестиции.

„Изградбата на нови рударски капацитети во Македонија е прашање на иднината кое надминува еден политички мандат на Собрание, Влада, Претседател на Републиката, градоначалници и локални совети. Ова прашање не смее да се става во контекст на дневно-политичка агенда и предизборни калкулации. Едноставно, долгорочната економска стабилност на нашата татковина зависи од правецот кој ќе го фатиме токму по прашањето на индустријализацијата“, пишува Грозданов.

Во земјава во последните 40 години е отворен само еден рудник.

The post ДО КОГА ИНВЕСТИЦИИТЕ ВО РУДАРСТВОТО ЌЕ БИДАТ ЖРТВА НА ПОЛИТИКАТА? Европската Унија се освести, економската стабилност во Македонија во сенка на туѓи интереси appeared first on plusinfo.mk.

Во писмото, потпишано од највисоките членови на раководниот тим на „Еуромакс ресорсис“, Тимоти Морган Вин, претседател на Одборот на директори и главен извршен директор и Николас Треанд, извршен директор, компанијата нагласува дека во процесот на експлоатација на минералните суровини во рудникот нема да се користи цијанид, ниту било каква цијанидна супстанца. Компанијата се залага да инвестира во најсовремени технологии кои овозможуваат управување со отпадот според методологијата за „суво јаловиште“, односно јаловината би била со слична текстура на обичната почва, како и плановите за инвестирање во нов водоводен систем за локалните села и населението.

– Во ова писмо ја нагласуваме нашата заложба дека во процесот на експлоатација нема да има употреба на цијанид. Повторувам, нема да има употреба на цијанидна супстанца во која било форма. Што се однесува до загриженоста за управувањето со јаловина, веќе имаме исклучително безбеден дизајн за управување со јаловина. Сепак, со оглед на неодамнешните важни технолошки подобрувања, ќе нарачаме студија за спроведување на капацитет за управување со „сува јаловина“. Доколку е остварливо, тоа значи уште едно постепено подобрување на безбедноста, дополнително намалување на ризикот од дефекти на браната, загадување на околните води или оштетување на околниот биодиверзитет и елиминирање на потенцијалното прелевање на јаловината. Во секој случај, нема да има брана со висок ѕид што ќе задржува огромна количина (загадена) вода. За да обезбедиме безбедно и стабилно водоснабдување за домаќинствата, ние се обврзуваме да инвестираме во нов водоводен систем за локалните жители да имаат чиста вода. Се обврзуваме да изградиме цевковод од акумулацијата Турија до Иловица, обезбедувајќи сигурно снабдување со вода за жителите да не останат без вода во текот на топлите лета – уверува Тимоти Морган Вин, претседател на Одборот на директори и главен извршен директор на „Еуромакс ресорсес“ Лтд.

Николас Треанд, извршен директор на „Еуромакс ресорсес“ Лтд изрази уверување дека планот за отворање на рудникот не само што ќе придонесе позитивно за економскиот раст, туку и ќе се усогласат со целите на еколошките активисти кои се залагаат за транзиција кон зелена енергија.

– Нашата примарна цел е да ги ублажиме стравувањата околу спроведувањето на нашиот проект. Според Светската банка, зголемената побарувачка за „зелена“ технологија и производство на обновлива енергија, заедно со софистицираните решенија за складирање енергија, се предвидува да доведе до пораст од 500% на производството на критични минерали и метали потребни до 2050 година, вкупно околу 3 милијарди тони. Според сегашниот проект, рудникот Иловица Штука ќе произведува 24.000 тони бакар годишно. Нагласувајќи ја важноста на нашиот проект за рударство, од витално значење е да се забележи дека во текот на неговиот животен век, тој ќе игра клучна улога во исполнувањето на овие растечки глобални барања. Рударската индустрија значително еволуираше во последниве години, водена од принципите на одговорно рударство. Ние се придржуваме до современите технологии кои даваат приоритет на заштитата на животната средина, ги подобруваат работните услови и поддржуваат значителна општествена одговорност. Ќе го повторам она што Тим веќе го кажа многу јасно, рудникот Иловица Штука ќе биде без цијанид, со методологија на сув талог за управување со јаловина, нема да има опасност од прелевање, сегашното водоснабдување нема да биде во опасност и ќе инвестираме во нов цевковод кој обезбедува побезбедно и стабилно снабдување со вода за локалното население – истакна извршниот директор Николас Треанд.

Дамиан Петровски, извршен директор на „Еуромакс ресоурсес“ ДОО Скопје рече дека меѓу највисоките приоритети на компанијата останува и одржувањето на соработката и комуникацијата со локалното население.

– Реализацијата на овој проект не значи сценарио „или-или“. Сосема спротивно, напредокот во современите технологии го отвора патот за соживот и истовремен развој и на рударската индустрија и на земјоделството под поволни услови.

Во согласност со оваа визија, нашата компанија се обврзува да биде поддршка за локалното земјоделство. Нашата посветеност планираме да се материјализира преку различни начини, вклучително и финансиска помош за набавка на напредни земјоделски машини. Ја препознаваме клучната улога на технологијата во современото земјоделство и, како дел од нашите заложби, имаме за цел да го олесниме пристапот до најсовремените алатки и знаења кои можат значително да го подобрат локалното производство – рече Петровски.

Од овие причини компанијата повикуве властите да го разгледаат нивното писмо и очекува во најскоро време соодветна одлука за нивното барање за спојување на концесиите.

– Предметот предолго е заглавен во управните и во судските постапки. Сметаме дека во најдобар интерес на жителите, државата и проектот е да се донесе брза одлука за иднината на овој проект – или регионот ќе добие мега инвестиција што ќе го поттикне економскиот развој во годините што доаѓаат, или ќе бидеме принудени да разгледаме други решенија за заштита на нашата инвестиција – порача претседателот на Одборот на директори и главен извршен директор, Морган.

Реализацијата на планот за изградба на рударскиот комплекс „Иловица – Штука“ означува значителна инвестиција во износ од 340 милиони евра. Оваа иницијатива ветува дека ќе генерира приближно 1.000 директни работни места во фазата на изградба и 500 директни работни места за време на работата на рудникот. Покрај неговото непосредно влијание врз вработувањето, проектот ќе даде значителен придонес во бруто домашниот производ на земјата, вбризгувајќи средства и во државниот и во општинскиот буџет. Позитивен ефект ќе има врз локалните бизниси, кои ќе имаат значителни придобивки. Проекциите сугерираат годишен прилив од околу 74 милиони евра во овие локални претпријатија.

The post МЕНАЏМЕНТОТ НА „ЕУРОМАКС РЕСУРСЕС“ ЛИЧНО ДОЈДЕ ВО СКОПЈЕ ЗА ДА Ѝ ДАДЕ ГАРАНЦИИ НА ШУКОВА ДЕКА НЕМА ДА СЕ КОРИСТИ ЦИЈАНИД Ќе изградат нов водовод и суво јаловиште, сега власта е на потег appeared first on plusinfo.mk.

Сторијата се осврнува и на секторот рударство и тврди дека Русија се обидува да манипулира со пазарот и да влијае при одлучувањето на властите во секторите за кои има интерес.

Конкретно за Македонија се посочува делувањето на компанијата Солвеј Инвестмент Груп, која е сопственик на рудникот за бакар Бучим во Радовиш. Во текстот се вели дека оваа компанија официјално е швајцарска, но дека потекнува од Русија.

Кон крајот на 2022 година економскиот директор на рудникот Бучим Дмитриј Кудрјаков беше поставен на црната листа на САД. Во рудникот во Радовиш тој беше назначен по работата на Гватемала, каде според американските власти, учествувал во поткуп на администрацијата, политичарите и судиите за да оствари руски интерес, преку рудникот на Солвеј во земјата.

Во написот на мрежата „Белингкет“ уште се наведува дека групацијата „Солвеј“ е вклучена во многу проекти кои ги унапредуваат руските интереси – до тој степен што дури и владата во Москва лобира во нивно име, нарекувајќи ја „руска инвестиција“. Дополнително, во текстот се забележува, дека власта во рударството откажувала концесии на четири западни компании од 2017 година досега.

Во оваа насока во написот директно се споменуваат и имиња на „еко-активисти“ кои силно лобираат против најавите за инвестиции во рударството од страна на западни компании. Меѓу нив е и името на активистот Крум Велков од „Здрава котлина“. Во обвинувањата насочени кон реализацијата на проектот за рудник во Иловица-Штука, зад кој стои канадскиот рударски гигант „Трафигура“ преку домашната фирма „Еуромакс Ресоурсес“, тој дури и најавува создавање „општомакедонски еколошки фронт“.

Во една од своите објави на социјалните мрежи Велков дури споделува и оценка за евентуални „немили настани“ ако рудникот во Иловица-Штука се реализира.

– Сум укажал, всушност, дека револтот на народот од тоа што го прави „Еуромакс Ресурсис“ е толкав, што може да дојде до немили настани во случај на отворање на рудникот, бидејќи тој егзистенцијално ќе ги загрози сите жители. И порано сум предупредувал и сум ја повикувал владата да стави крај на ова – напиша Велков.

Во меѓувреме профилите на социјалните мрежи на еко-активистот од „Здрава котлина“ изобилуваат со објави во кои се велича руското државно раководство, особено по инвазијата во Украина.

– Русија ги отвора картите. Овде не се работи само за декларативна желба, туку за реален проект за ослободување на Европа од англо-американскиот геополитички режим – напиша Велков.

Според него, со војната во Украина започнал „официјалниот крај на униполарниот свет доминиран од Западот“. Во поткрепа на своите геополитички тези, еко-активистот Велков дополнително зборува дека пандемијата била „димна завеса која отпорот на слободниот човек ја развеал“.

Откако дел од домашните медиуми ја споделија сторијата на „Белингкет“ Крум Велков најави тужби, а новинарите од меѓународната истражувачка мрежа ги нарече „британски платеници“.

Претходно, од иницијативата „И здравје и работа“ која ја сочинуваат жители од југоистокот кои го поддржуваат проектот за изградба на рудникот за бакар Иловица-Штука, обвинија дека поради неколкумина добро мотивирани гласни противници на изградбата на рудникот, локалното население и генералната македонска јавност нема еднаков пристап до сите релевантни информации. Тие прашаа „кој, колку и од кого има добиено пари на рака преземајќи обврска за регрутирање критична маса за ширење паника меѓу населението“ и најавија дека допрва ќе споделуваат повеќе детали.

The post КОИ СЕ АКТИВИСТИТЕ КОИ СЕ ПРОТИВАТ НА НОВИТЕ РУДНИЦИ? Поддржувачи на Путин најгласни противници на западни инвестиции во Македонија appeared first on plusinfo.mk.

„Солвеј инвестмент груп“, преку компанијата „Бучим“ во Радовиш, во 2019 година испратилa понуда до компанијата „Еуромакс рисорсис“, зад која стои канадскиот рударски гигант „Трафигура“, да се вклучи во проектот. Тогаш „Солвеј“ јавно соопшти дека нивната понуда е „единствената остварлива краткорочна можност да се добие проектот Иловица-Штука одобрен од Владата на Македонија и да биде поддржан од локалната заедница и еколошките групи“. Тие ветиле „изводливо решавање на еколошките и социјалните прашања со кои се соочи проектот“ преку обработка на јаловината од Иловица во Бучим.

Еден од менаџерите на „Солвеј“, Ден Бронстеин, син на Александар Бронстеин, тогаш вети „нова македонска успешна рударска приказна“. Понудата брзо била одбиена, а засега инвестицијата во рудникот за бакар Иловица-Штука на канадската компанија „Трафигура“ и натаму се соочува со административни предизвици и протести на еколошките здруженија.

Од ДПТУ Бучим ДООЕЛ Радовиш за МКД.мк потврдиле дека ваква понуда навистина имало.

– Нашата матична компанија „Солвеј инвестмент груп“ пред неколку години изрази интерес за проектот Иловица Штука и тогаш се обрати со јавна понуда која остана неодговоренa. Денес валидноста на оваа понуда не е актуелна – одговориле кратко од „Бучим“.

Од „Еуромакс рисорсис“ ја квалификуваат понудата од руската компанија како непријателска. Во март 2019 година на берзата во Торонто било објавено дека е договорена трансакција за издавање дополнителни акции на подружницата на „Трафигура групација“, и со реализација на оваа трансакција „Трафигура“ би се стекнала со индиректна контрола врз работењето на „Еуромакс рисорсис“.

– Меѓутоа во периодот од објавата до финалната реализација на трансакцијата, постојните акционери, вклучувајќи ја и „Трафигура групацијата“, добија непријателска понуда од „Солвеј групацијата“, сопственикот на рудникот „Бучим“, за отфлање на веќе договорената трансакција за издавање на дополнителни акции на подружницата на „Трафигура групацијата“, нудејќи притоа заедничко вложување каде што постојните акционери би имале 25% од вредноста на проектот Иловица-Штука, додека „Солвеј групацијата“ би имала 75% од проектот Иловица-Штука. Во врска со оваа понуда, заседаваше бордот на директори и ја одби истата земајќи го предвид фактот дека веќе е договорена трансакција со „Трафигура групацијата“, како и тоа дека со поддршка на „Трафигура“, со оглед нејзиниот глобално препознаен имиџ – со вкупни приходи над 300 милијарди долари остварени низ целиот свет, може да се обезбеди стабилност и извесност при изработката и реализацијата на идниот рударски комплекс согласно најдобрите расположливи светски практики за изградба на еден модерен рудник – изјавиле од „Еуромакс рисорсис“ за порталот МКД.мк

The post И БУЧИМ САКАЛ ДА БИДЕ ДЕЛ ОД ИЛОВИЦА-ШТУКА Какви игри се кријат зад рударскиот бизнис? appeared first on plusinfo.mk.

„Почитувани,

Изненадени од леснотијата со која од Ваша страна се игнорира економско-правната битка на Еуромакс ресоурцес ДОО за реализација на инвестицијата во рударскиот комплекс Иловица-Штука, решивме да Ви се обратиме со ова писмо.

Се надеваме дека барем вам не треба да ве потсетуваме дека Euromax Resources Ltd. е проектна компанија регистрирана во Ванкувер, Канада и листирана на престижната Берза за хартии од вредност – Toronto Stock Exchange TSX, каде што во мултинационалната структура на капиталот главен инвеститор е деловен гигант – Trafigura Grоup. Преку Еуромакс ресоурцес ДОО Скопје, компанијата е активно присутна во РСМ од 2007 (веќе полни 17 години) работејќи професионално на развој на проектот за современ рударски комплекс Иловица – Штука, како ‘role model’ за најсовременото одржливо рударство на 21-от век, примена на најуспешни технологии, практики и највисоки стандарди за заштита на здравјето и животната средина. Во долгиот процес на геолошки истражувања, подготовка и експертска изработка на обемните стручни документи, проекти и студии, досега се инвестирани повеќе од 50 милиони евра.

Но тоа веќе би требало добро да ви е познато затоа што Еуромакс ресоурцес ДОО е легитимен и полноправен дел од овие три бизнис асоцијации со кои вие раководите и никако не заслужува да биде целосно игнориран!

Во следната фаза од планираните две години за изградба ќе бидат инвестирани уште 350 милиони евра. За текот на целиот период од оперативното функционирање на рударскиот комплекс ќе се исплаќаат кумулативно по околу 75 милиони евра секоја година на повеќе домашни компании од диверзифицирани дејности. Оваа мега-странска инвестиција ќе генерира потреба од околу 3.200 нови директни и индиректни работни места од најразлични професии со што значително ќе помогне на државата за ефикасно намалување на долгогодишниот девастирачки тренд на економски мотивирана миграција. Овој индустриски капацитет со своето работење ќе овозможи раст на ИЗВОЗОТ, во просек над 200 милиони евра годишно со што значително ќе се зголемат приливите на девизни средства, подобрување на националната структура на билансот на плаќања и олеснето одржување на стабилниот курс на денарот… согласно актуелните законски прописи, секоја година ќе се уплаќаат приближно по 25 милиони евра во државниот буџет и над 3 милиони евра директно ќе се слеваат во буџетите на локалните управи на општините Босилово и Ново Село.

Како одговорни раководители на најрепрезентативните и највлијателни бизнис-асоцијации во нашата држава, сигурно ви е добро познато дека посакуваната глобална транзиција кон ‘зелена економија’, ‘чисти’ технологии и производство на енергија од обновливи извори (ветер, сончева и геотермална) ќе резултира со побарувачка од околу 3 милијарди тони минерали и метали, односно потребно е 500% зголемување на производството на критични минерали и метали до 2050 година (бакар, алуминиум, цинк, литиум, никел..)

Неизбежно се наметнува заклучокот дека современото одржливо рударство на металични минерални суровини е клучната алка без која општо прифатената програма за глобална транзиција во ‘зелена економија’ би останала само обична декларативна желба! Токму затоа за европска држава како РСМ која докажано има наоѓалишта на овие критични метали и минерали, тоа претставува ‘golden opportunity’ но за жал дури ни вие не го препознавате и поддржувате, приклучувајќи се индолентно кон овој своевиден ‘економски и социјален мазохизам'(!?).

Со неразбирлива леснотија, незаинтересираност и безгласно цели 7 години ја проследувате оркестрираната манипулативна ‘анти – рударска’ хајка која започна во втората половина на 2016 година во Гевгелија каде брутално се спречи странскиот инвеститор да ги комплетира геолошките истражувања на концесискиот локалитет, па преку Валандово до Струмичко. Сериозни индиции укажуваат дека ваквата организирана црна кампанја, преку небулозните слогани како ‘рудници на смртта’ или ‘спас за југо истокот’ е подготвена во хибридни центри на блендирани политички и бизнис интереси во и надвор од нашата држава, а се спроведува на терен преку неколкумина самопрогласени лидери на еко-активизмот на југо истокот. Ваквите центри во континуитет добро ги ‘мотивираат и наградуваат’ овие ликови за нивните актерски улоги на (лажно) загрижени еко-активисти. Во сите овие 7 години целата јавност може да согледа дека нивната задача е брутално да ги сатанизираат и стигматизираат странските инвестиции. Преку сеење дезинформации целта е да се создава чувство на страв и загриженост кај нивните сограѓани, да се креираат немири и да ги повикуваат на народен бунт и борба со ‘жив штит’ на живот или смрт по секоја цена (???). Преку социјалните мрежи, протестите и нивните јавни настапи, тие затскриени под ‘наметката’ на легитимниот граѓански активизам, непречено користат говор на омраза и потикнуваат јавен ‘линч’ на ‘клетите профитери’ (странските инвеститори во овој случај!?). Во нивните пораки има елементи на дискриминација, примитивни лични навреди, нативизам, парохијализам и ксенофобија.

Проблемите со кои се соочуваат инвеститорите, посебно во рударскиот сектор ги присилуваат засегнатите компании да покренуваат високо профилни меѓународни арбитражни постапки и нашата држава веќе се соочува со финансиски оштетни побарувања од неколку милијарди евра! Вие, како лидери на најголемите и најреспектабилните бизнис асоцијации во земјата добро знаете дека големиот капитал е ‘плашлив’ и многу сензитивен на јасни показатели кога некоја промовирана бизнис дестинација има евидентни проблеми со владеењето на правото и обврската за заштита на инвеститорските права. Во случајот со Еуромакс ресоурцес и неговите глобално реномирани инвеститори и акционери, факт е дека и самиот чин на евентуално покренување на меѓународен арбитражен спор ќе привлече големо внимание и гласно ќе одекне во деловните и финансиските кругови со што директно ќе се руинира меѓународниот имиџ на државата која како полноправна членка на НАТО и држава претендент за полноправно членство во ЕУ помеѓу другото има и обврска да обезбеди правна сигурност и ефикасност во спроведување на законите како за домашните така и за странските инвеститори.

Длабоко жалиме што, вие како раководни лидери на овие бизнис асоцијации пролонгирано манифестирате бирократски конформизам со крајно селективни, би рекле дискриминаторски ангажмани и пристап кон проблемите со кои се соочуваат дел од полноправните членки, посебно дел од големите странски инвеститори во рударството на металични минерални суровини. Со неодговорното игнорирање, молчење и без јасен став и активност вие во неразбирливо долг период невешто се обидувате да се задржите на, за вас, комфорна дистанца. Обична хипокризија е што за значењето на рударството се зборува во суперлативи само на ’28 август – Денот на Рударите’ селективно коментирајќи и посетувајќи ги парадно само постојните ‘стари’ рудници кои започнале во минатиот век и во претходната државна заедница. Притоа лицемерно е да си доделувате различни признанија и благодарници ‘за посебен придонес во развојот на рударската индустрија’ кога ноторен факт е дека во последните 40 години во земјава е отворен само еден нов коп за метали (бакар) во склоп на стариот рударски комплекс (!?).

Целокупниот менаџмент, бордот на директори и инвеститорите на Еуромакс ресоурцес се непоколебливо одлучни да продолжат со сите легитимни и законски предвидени активности неопходни за реализација на оваа мега-странска инвестиција и функционално оперирање на современиот рударски комплекс за бакар Иловица – Штука!

Со почит,

Живко Груевски“

The post „ОД КОМФОРНА ДИСТАНЦА ЈА ГЛЕДАТЕ ХАЈКАТА КОН ЕУРОМАКС РЕСОУРСЕС И МОЛЧИТЕ!“ Отворено писмо од странскиот инвеститор до Комората и до Рударската асоцијација appeared first on plusinfo.mk.

Една од водечките светски компании во рударската индустрија Групацијата „Трафигура“ се јавува како покровител на инвестицијата во рудникот Иловица. Меѓудругото оваа Групација се занимава и со трговија со метали и други суровини. Оваа компанија е еден од клучните акционери во „Еуромакс ресоурсес“, која пак во Македонија ги застапува правата кои произлегуваат за рударските концесии во Иловица.

„Трафигура“ е мултинационална компанија со регионални центри на повеќе континенти. Главното седиште за Европа е во Женева, Швајцарија, а потоа следуваат и Хјустон, САД, како и Монтевидео за Јужна Америка, но и Мумбаи во Индија. Компанијата, освен со метали, се занимава и со енергенси, а е основана во 1993 година. Набрзо прераснала во компанија која има клучни сопственички удели во изградбата и активностите на голем број рудници, топилници, нафтоводи, пристаништа и терминали за складирање во светот. Паралелно „Трафигура“ се наметнува и како најголемиот приватен трговец со метали во светот и втор по големина трговец со нафта, која опстојува во економиите на 36 земји, со отворени преку 65 канцеларии.

Во портфолиото на компанијата е истакнато дека тие „најмногу инвестираат во решенија кои придонесуваат за производство на зелена енергија, која пак е најпотребна за енергетската транзиција со нула емисии на јаглерод“. Оттаму велат дека за постигнување на своите цели, инвестирале во повеќе компании и проекти. Меѓу нив се „Пума енерџи“, која контролира пренос на горива, како и „Импала терминали“, која се занимава со складирање на стоки и логистика. Третата покрупна инвестиција е во „Nyrstar“, меѓународен производител на метали и минерали неопходни за постигнување на енергетската транзиција. Покрај тоа, „Трафигура“ е мнозински сопственик на TFG Marine, како и во H2 Energy. „Galena Asset Management“ од друга страна е целосно во сопственост на „Трафигура“ и претставува нејзина инвестициска подружница.

Од компанијата „Еуромакс ресоурсес“ неодамна соопштија дека правните можности за покренување меѓународна арбитража против државата произлегуваат од билатералната спогодба за заштита на инвестиции меѓу Македонија и Швајцарија, потпишана уште во 1996 година. Тие постојано потенцираат дека нивен мнозински акционер е Групацијата „Трафигура“, која како правно лице подлежи на правото на заштита во согласност со наведената билатерална спогодба.

„Спогодбата предвидува дека инвеститорот може да поднесе барање за решавање на спорот до Меѓународниот центар за решавање на инвестициски спорови (ICSID) или Ад-хок Судот воспоставен во согласност со арбитражните правила на Комисијата за меѓународно трговско право на Обединетите Нации (UNCITRAL)“, соопштија од „Еуромакс ресоурсес“.

Од „Еуромакс Ресоурсес“ истакнаа дека ги информирале своите акционери за неодамнешното поништување на претходната Одлука за одобрување за спојување на концесиите од страна на Владата.

„Ваквата нова владина одлука не содржи и не е базирана врз правни аргументи за спротивно одлучување од одлуката со која беше потврдено спојувањето. Компанијата ќе побара од Владата повторно да ја разгледа одлуката за спојување на концесиите со оглед на големата важност за развој на регионот и државата во целина. Земајќи ги предвид актуелните политички околности со кои е прекриена изненадувачката спротивна одлука на првично донесената од Владата, Компанијата со посебно внимание ги проценува следните чекори и ќе ги преземе сите неопходни активности со цел заштита и обезбедување на правата за сите акционери“, соопштија од „Еуромакс ресоурсес“.

Оттаму додадоа дека сите инволвирани страни, што може да се протолкува и дека се однесува и за дејствија на поединечни министри, може да бидат предмет на директни правни дејствија доколку во легална процедура се покаже дека новата одлука е во спротивност со позитивните законски прописи на Република Северна Македонија, или е политички мотивиранa. Според проценките, евентуалната меѓународна арбитража може да ја чини државата најмалку една милијарда евра, не вклучувајќи ги затезните камати од спорот.

The post ПОНИШТУВАЊЕТО НА КОНЦЕСИИТЕ ЗА ИЛОВИЦА ЌЕ ЈА СООЧИ МАКЕДОНИЈА СО ГИГАНТОТ „ТРАФИГУРА“ Пропаднатата инвестиција може да одекне како финансиска бомба во македонската економија appeared first on plusinfo.mk.

На берзата во Торонто вчера осамна информација дека компанијата која е носител на концесииите за рудникот Иловица-Штука веќе презела конкретни правни дејствија за активирање на правните инструменти за меѓународна арбитража.

„Иако непоколеблив приоритет за Компанијата останува развој и изградба на рударскиот комплекс во целосна согласност со современите домашни и меѓународни еколошки стандарди, согласно правилата на Меѓународниот центар за решавање на инвестициски спорови Компанијата веќе има дадено ‘Формално известување’ за спор до Владата и сега може да покрене меѓународна арбитража во секое време. Сите инволвирани страни може да бидат предмет на директни правни дејствија доколку во легална процедура се покаже дека новата одлука е во спротивност со позитивните законски прописи на Република Северна Македонија, или е политички мотивиранa“, се вели во информацијата објавена на Берзата во Торонто од компанијата во која најголем инвеститор е групацијата „Трафигура“, компанија која важи за најголем светски трговец со минерални суровини и енергенси.

– Компанијата разбира дека оваа одлука е чувствителна за сите засегнати страни, но ќе ги преземе сите неопходни активности законски и на друг начин за да ги заштити своите легитимни права и нејзината значајна историска инвестиција. Додека Владата може да има се обиде да добие дополнително време за да се постигне внатрешно усогласување, ваквите произволни политички одлуки, надвор од преовладувачката правна рамка, ќе алармираат до меѓународните институции и инвеститори и ќе фрлат сомнеж за транспарентноста и правната сигурност во Република Северна Македонија – изјави извршниот претседател на компанијата Тим Морган – Вин.

Последната владина одлука беше донесена откако дел од министрите во Владата побараа дополнително појаснување од министерот за економија, Крешник Бектеши, за документацијата поврзана со концесиите за рудникот „Иловица“, а дел од нив и излегоа со јавни изјави дека лично се против отворање на рудникот и присуствуваа на протестот што се одржа во Струмица. Дека овие изјави, но и стенограмите од владините седници на кои се одлучувало за концесиите за рудниците, може да бидат употребени во правни постапки против државата предупреди и министерот за економија, Крешник Бектеши, на прес конференцијата по одлуката за повлекување на спојувањето на концесиите.

Имајќи го ова предвид и најавата на компанијата, можно е и овие министри да бидат повикани на одговорност поради јавни изјави  против инвестиција и покрај обемната документација со позитивни мислења од надлежните државни органи и судските одлуки донесени во полза на компанијата.

ПОВЛЕКУВАЊЕТО НА КОНЦЕСИИТЕ ЗА ИЛОВИЦА-ШТУКА ОБЈАВЕНО НА КАНАДСКА БЕРЗА Еуромакс ресоурсес размислува за чекори со кои ќе ги заштити своите акционери

The post ДАЛИ ЕУРОМАКС РЕСОУРСЕС НАЈАВУВА И ПОСТАПКИ ПРОТИВ МИНИСТРИ? И Бектеши предупреди дека нивните изјави може да бидат употребени против државата appeared first on plusinfo.mk.

Компанијата ќе побара од Владата повторно да ја разгледа одлуката за Спојување на концесиите со оглед на големата важност за развојот на регионот и државата во целина.

„Ваквата нова одлука не содржи и не е базирана врз правни аргументи за спротивно одлучување од одлуката со која беше потврдено спојувањето на концесиите.

Земајќи ги предвид актуелните политички околности со кои е прекриена изненадувачката спротивна одлука на првично донесената од Владата, компанијата со посебно внимание ги проценува следните чекори и ќе ги преземе сите неопходни активности со цел заштита и обезбедување на правата за сите акционери, што покрај другите ги вклучува и Европската банка за обнова и развој (еден од водечките институционални инвеститори во Република Северна Македонија), Galena Resource Equities Ltd (компанија контролирана од Trafigura Групацијата, која е една од водечките компании за тргување и логистика на метали и други стоки), ND Group (приватна финансиска и инвестициска групација од Холандија), Equinox Partners (хеџ фонд лоциран во Њујорк), како и Royal Gold (компанија од САД која инвестира во права и инструменти за инвестициско злато).

Иако непоколеблив приоритет за компанијата останува развој и изградба на рударскиот комплекс во целосна согласност со современите домашни и меѓународни еколошки стандарди, согласно правилата на Меѓународниот центар за решавање на инвестициски спорови компанијата веќе има дадено Формално известување за спор до Владата и сега може да покрене меѓународна арбитража во секое време. Сите инволвирани страни може да бидат предмет на директни правни дејствија доколку во легална процедура се покаже дека новата одлука е во спротивност со позитивните законски прописи на Република Северна Македонија, или е политички мотивиранa“, пишува Еуромакс ресоурсес во најновата формална објава доставена до „TSX“ денеска пред отворање на Берзата.

– Компанијата разбира дека оваа одлука е чувствителна за сите засегнати страни, меѓутоа ќе мора да ги преземе сите неопходни правни мерки и сите други неопходни чекори сѐ со цел да ја заштити својата инвестиција и да ја заштити вредноста и интересот на секој акционер. И покрај тоа што со оваа одлука Владата си додели дополнително време да ги разгледа пошироките импликации, таквата арбитрарна политичка одлука која е надвор од позитивната правна рамка, ќе го активира алармот до меѓународни институции и инвеститори, што ќе резултира со сериозни сомнежи во врска со транспарентноста и правната сигурност во Република Северна Македонија – изјави Tim Morgan-Wynne, извршен претседавач на Бордот на директори.

The post ПОВЛЕКУВАЊЕТО НА КОНЦЕСИИТЕ ЗА ИЛОВИЦА-ШТУКА ОБЈАВЕНО НА КАНАДСКА БЕРЗА Еуромакс ресоурсес размислува за чекори со кои ќе ги заштити своите акционери appeared first on plusinfo.mk.