Три ертрактори и тројца пилоти ќе бидат активни за наредното лето во справување со евентуални пожари. Во ноември годинава уште тројца пилоти за овие летала ќе бидат испратени на обука, најави директорот на Дирекцијата за заштита и спасување Стојанче Ангелов.

Пет-шест лица изразиле интерес за пилоти на овие летала и со нив дополнително ќе се разговара.

– Во наредниот период ќе се состанам внимателно со сите нив, се работи за искусни луѓе, и би рекол дека имаат потенцијал лесно да ја завршат обуката, истакна Ангелов во интервју на ТВ Канал 5.

Според него, интересот за ова работно место во ДЗС се зголемил благодарение на зголемените плати во авиоодделението на Дирекцијата.

– Кога дојдов на позицијата директор на ДЗС првата работа што ја направив, побарав двојно зголемување на платата на сите вработени во авиоделението. Кога зборувам „сите“, мислам на 12 лица, да не мислите дека таму има 100 луѓе и нивната плата е двојно зголемена. Двојно е зголемена платата и на единствениот пилот на ертрактор, професионално вработен во Дирекцијата, и сега тој е изедначен со платите на пилотите на хеликоптери во полицијата и во армијата – појасни Ангелов.

Ангелов кој воедно е и претседател на Достоинство, прашан за законот за бранители рече дека посегнувањето по темата за бранителите во овој момент, ќе биде во корист на ДУИ односно на криминогените структури во партијата.

– Наша цела како Влада и претходно како коалиција, предводена од ВМРО-ДПМНЕ, беше елиминација на криминогените структури во ДУИ, за кои што многу се зборуваше во јавноста. Овде не зборувам за целата партија, зборуваме за некои личности, за кои што има и отворени постапки, и во овој момент, нашата цела е да не се дозволи да воскреснат таквите криминогени структури. Затоа и ние треба да бидеме внимателни во овој период. Секое посегнување по оваа тема носи политичка корист на ДУИ. Мојот став како политичар, како председател на Достоинство, како неформален лидер на дел од македонските бранители, е да се стрпиме да завршат локалните избори – истакна Ангелов и нагласи дека после изборите верува дека ќе има значајно поместување напред.

Според Ангелов законот кој беше предложен во времето на поранешната министерка за одбрана Славјанка Петровска не е добар бидејќи се однесува само за 15 семејства кои не биле обесштетени и дека потребно е со законот да ги опфати и не повредените бранители.

The post СЛЕДНОТО ЛЕТО ЌЕ ИМАМЕ УШТЕ 3 ЕР ТРАКТОРИ И 3 НОВИ ПИЛОТИ Интересот за обуки се зголемил откако биле покачени платите appeared first on plusinfo.mk.

Екипите и службите од 5 часот утрово работат на гаснење на пожарот во Јасен, после кој денеска, 13 август, нема пријавени други пожари, информираше директорот на Дирекцијата за заштита и спасување, Стојанче Ангелов.

Тој вели дека пожарот ги менува брзината и правецот, што дополнително го отежнува гаснењето во кое учествуваат ер трактори на ДЗС, специјалци од полицијата и армијата, екипи на Јавното претпријатие Јасен и од Национални шуми.

– Хеликоптерот дејствува исклучително прецизно, но теренот е тежок, на некои места не може да се даде подршка од земја, постојано дува ветер, којшто ги менува брзината, но и правецот, што дополнително го отежнува гаснењето на овој пожар. На самото место овде се наоѓаат и 4 пинц-гауери на Дирекцијата за заштита и спасување, како и 2 хeрмелинa со 6-тонска и 8-тонска цистерна.

Според директорот на ДЗС 32 од пријавените 33 пожари во текот на минатиот ден се изгаснати, а нови нема пријавено освен жариштето во Јасен.

– Рано наутро, после 5 часот на самото место, дојдоа екипи специјалци од ЕБР на МВР, како и од армиските волци и ренџери. Исто така, овде се наоѓат и неколку екипи на јавното претпријатие Јасен и на Национални шуми, но и пожарникари од Кавадарци.Исто така имаме повеќе возила на локалните територијални противпожарни единици, но и на Национални шуми и на ЈП Јасен. Возилото коешто е зад мене, на армиските волци, со коешто се префрлаат луѓе на гасење, високо горе, на едно место каде што има репетитор, каде што пожарот има силно дејствие, односно силно горе – објаснува Ангелов.

The post ВЕТРОТ ГО ОТЕЖНУВА ГАСНЕЊЕТО НА ПОЖАРОТ КАЈ ЈАСЕН Од рано изутрина вклучени се службите, eр тракторите, ренџерите, армиските волци appeared first on plusinfo.mk.

Во моментот ниту еден од трите „ер трактори“ не е во функција, но до почетокот на летото се очекува тие повторно да бидат оперативни за гаснење пожари, изјави денеска новоименуваниот директор на Дирекцијата за заштита и спасување (ДЗС), Стојанче Ангелов.

Ангелов ја презеде функцијата еден ден откако Владата го именуваше, а на новото место доаѓа од позицијата директор на Центарот за управување со кризи (ЦУК).

– Во овој момент во државата нема ниту еден функционален „ер трактор“, но сум оптимист дека набргу ќе ги имаме сите три, заедно со посадите. Се наоѓаат на сервис и очекувам наскоро да бидат вратени – рече Ангелов.

Тој најави и неколку „изненадувања“ што, како што вели, ќе помогнат полесно да се справиме со евентуални пожари ова лето.

Ангелов откри дека во институцијата се наталожени бројни проблеми и додаде дека токму заради тоа е поставен на функцијата – со цел Дирекцијата конечно да профункционира како што треба.

Во исто време, во Владата функционира работна група која работи на системска трансформација на моделот за справување со кризи.

– Мојот фокус е формирање на нова институција во која ќе се спојат ДЗС и ЦУК – најави Ангелов.

The post НИТУ ЕДЕН АВИОН ЗА ПОЖАРИ НЕ Е ФУНКЦИОНАЛЕН Сите „ер трактори“ се на сервис, Ангелов вети дека до лето ќе ги врати appeared first on plusinfo.mk.

Министерот за внатрешни работи, Панче Тошковски, денеска по состанокот на Управувачкиот комитет за координација и управување со кризи изјави дека државата сериозно размислува за формирање на Центар за обука на пилоти во Македонија. Овој центар се гледа како дел од пошироките системски решенија за ефикасно справување со кризи како пожари, поплави и земјотреси.

– Државата има нефункционален систем кој треба да одговори на кризи. Ги задолжуваме институциите со нови превентивни мерки за да бидеме поспремни, но факт е дека таков нефункционален систем сме наследиле од претходниците. Размислуваме за создавање на Центар за обука на пилоти, нешто што порано постоело, но е уништено поради некадарност – изјави Тошковски.

Формирањето на Центарот за обука на пилоти е дел од напорите за воспоставување функционална институција која ќе одговори на потребите за справување со кризни ситуации и ќе ја подобри координацијата на сите нивоа.

НАЈАВЕНИ СИСТЕМСКИ РЕШЕНИЈА ЗА ПРИРОДНИТЕ КАТАСТРОФИ Македонија ќе има систем за управување со кризи во следните 3 години

The post ПИЛОТИ ЌЕ СЕ ОБУЧУВААТ ВО МАКЕДОНИЈА Тошковски најави дека центарот за обука ќе биде клучен за идните предизвици appeared first on plusinfo.mk.

Поранешниот директор на Дирекцијата за заштита и спасување, Беким Максути нема да одговара за несервисираните „ер трактори“ кои не беа во функција за време на големите пожари летото 2021 година.

Обвинителството, постапувајќи по кривичната пријава поднесена од „Левица“, не нашло елементи за кривично дело ниту за постапките за јавни набавки за поправка и сервисирање на авионите, ниту дека Максути несовесно работел.

– Пo поднесената пријава од една политичка партија, постапуваше јавен обвинител ОЈО ГОКК кој во предистражна постапка прибави материјални докази од кои произлезе дека во дејствијата преземени од директорот на Дирекцијата за заштита и спасување нема елементи на законско битие на кривично дело што е во надлежност на Основното јавно обвинителство за гонење на организиран криминал и корупција, бидејќи прибраните докази упатуваат на фактот дека постапките за јавните набавки за поправка и сервисирање на авионите во 2020 и 2021 година биле спроведени во согласност со одредбите од Законот за јавните набавки. Во однос на евентуално постоење на кривичното дело Несовесно работење во служба од чл. 353 – в од КЗ предметот беше доставен на надлежност на ОЈО Скопје, каде јавен обвинител утврди дека во дејствијата на пријавениот не се содржани елементи на наведеното кривично дело – потврдуваат за МИА од Обвинителството.

Од Обвинитлество, исто така, информираат дека во Основното јавно обвинителство Скопје е оформен предмет врз основа на извештај Ревизија на успешност „Систем за управување со кризи и заштита од пожари“ од Државниот завод за ревизија, кој е во фаза на предистражна постапка.

– Предметот е во фаза на предистражна постапка, а надлежен јавен обвинител има издадено наредба до Управата за финансиска полиција за да изврши соодветни проверки. По наредбата се уште се постапува. Во однос на актуелните пожари, надлежните јавни обвинителства постапуваат по сите поднесени кривични пријави од надлежни органи кои откриле конкретни сторители кои што намерно предизвикале пожар – информираат од Обвинителство.

Авионите „ер трактор“, со кои може да се дејствува од воздух за гаснење на шумските пожари, останаа приземјени во 2021 година. Тогаш Максути откри дека канадерите не биле во функција две години зашто немало кој да ги сервисира, односно немало фирма што е овластена за да им направи сервис.

Проблемот со „Ер тракторите“ беше актуелен и годинава, кога тие беа сервисирани, но немаше пилоти, поради пензионирање на двајца. Со одлука на Влада, тие беа повторно ангажирани со договор на дело.

The post НЕМА ВИНА КАЈ МАКСУТИ ЗА НЕСЕРВИСИРАНИТЕ „ЕР ТРАКТОРИ“ Обвинителството ја отфрли кривичната на Левица за поранешниот директор appeared first on plusinfo.mk.

Вкупно 28 пожари на отворено го одбележаа изминатиот ден. Најсериозно е во Старо Нагоричане, Кратово, Македонски Брод и Свети Николе. На помош се очекуваат уште шест хеликоптери и четири „ер трактори“ кои се дел од Механизмот за цивилна заштита на Европската Унија. Во меѓувреме, власта вели дека добро се справува со пожарите, додека, опозицијата обвинува за колапс.

Директорот на Центарот за управување со кризи, Стојанче Ангелов, ја оценува ситуацијата како сериозна и апелира граѓаните да не учествуваат во гаснењето, освен доколку не бидат прифатени од локалните командири.

Во текот на вчерашниот ден, според информациите од директорот на Цук, Ангелов, имало 28 пожари на отворено.

– Бројот значително падна, тој е преполовен. Во овој момент десет од нив се активни. Тоа значи дека 18 изгаснавме, односно неколку од нив се ставени под целосна контрола. Состојбата е сериозна бидејќи од овие десет околу половина горат во високи квалитетна шума, а најмалку два зафаќа борова шума – изјави Ангелов во вчерашното гостување на Сител телевизија.

Во врска со активираниот механизам за цивилна заштита на ЕУ, Ангелов информираше дека денеска, евентуално утре, ќе имаме шест хеликоптери и четири ер трактори. Два хеликоптери од Србија, два од Унгарија, еден од Словенија и еден од Чешка, и четири ер трактори, два од Германија и два од Шведска.

Ангелов во видео изјава вчера апелира до граѓаните да не излегуваат со непотребни апели за собирање на луѓе за да одат да помагаат во гаснењето на пожарите.

– Како држава имаме доволно припадници на Армијата и полицијата и ако тоа некаде го побараат локалните авторитети кој командуваат со гаснењето на пожарите – градоначалниците, ние можеме да испратиме онолку војска или полиција колку што тие ќе побараат. Граѓаните не секаде можат да бидат од корист, напротив, некаде можат да сметаат во работењето на професионалните служби, на пожарникарите, војската, полицијата, на „Национални шуми“, на пожарникарите доброволци или на самите летала. Граѓаните можат да бидат корисни во одбрана на населените места кога огнот загрозува некое село или како во синоќешниот случај кога постоеше мала можност огнот да дојде до градот Пехчево. Во гаснењето на пожарите, граѓаните не треба да учествуваат, освен доколку не бидат прифатени од локалните командири на територијалните противпожарни единици – рече Ангелов и апелира да не се создава непотребна паника.

Тој информира дека вчера седница одржувал Управувачкиот комитет, на која донеле одлука да им предложат на Владата за ангажирање на НАТО механизмот за помош.

Според Ангелов, во моментов како најсериозни се пожарите на територијата на Старо Нагоричане, Општина Кратово, Македонски Брод и Свети Николе.

Синоќа беше локализиран и големиот пожар кој пред два дена избувна над пехчевското село Негрево. Гасењето на пожарот траеше речиси два дена, а пожарот се закануваше да го зафати и градот Пехчево.

Премиерот Христијан Мицкоски вчера изјави дека има историски незапаметен број на пожари на отворено. Како што рече, некои се од невнимателност, некои со намера, и потенцираше дека има доволен кадар за справување со истите.

– Имаме доволен број на пожарникари и доволен број припадници на Армијата и на МВР за да се справиме со пожарите, иако станува збор за огнена стихија која е на својот историски пик. Само вчера имавме 66 активни пожари на отворено, 40 успеавме успешно да ги изгасиме. Имајќи ја предвид температурата која што следи, ќе продолжиме со ваквите предизвици да се бориме и во август. Не очекувам големи промени – изјави премиерот вчера по потпишување на договор за франшиза на Тиквеш инвест со хотелот Холидеј Ин во Кавадарци.

На новинарско прашање за обвинувањата на СДСМ поврзани со пожарите, напомена дека нема да коментира политичари и политички партии коишто, како што рече, имаат некрофилски намери.

Министерот за внатрешни работи, Панче Тошковски, пак, изјави дека државата е во многу лоша состојба околу справувањето со пожари.

– Државата во оние услови кои ги наследи од претходната власт е моментално во многу лоша состојба во однос на справувањето со пожари од аспект на технички услови, кадар, оперативно, системска поставеност, начин на брзо и соодветно реагирање, начин на откривање – истакна Тошковски.

Соопшти дека пожарите најчесто ги предизвикува човечкиот фактор и оти оперативната акција „Пожар 2024“ за справување со пожарите е веќе отворена. Информира дека во изминатиот период се пронајдени, лоцирани и лишени од слобода повеќе лица во врска со конкретни пожари.

Во однос на обвинувањата на СДСМ кои бараат негова смена во Управувачкиот тим поради несоодветно справување со пожарите, Тошковски рече дека тој досега три пати бил на терен да ги увиди пожарите.

The post ВКУПНО ВЧЕРА ИМАЛО 28 ПОЖАРИ НА ОТВОРЕНО 6 хеликоптери и 4 „ер трактори“ доаѓаат од Механизмот за цивилна заштита на ЕУ appeared first on plusinfo.mk.

Пожарникари со неколку противпожарни возила, екипи на јавното претпријатие „Македонски шуми“, Армијата, граѓани на терен… Штетите непроценливи. Се бара помош од соседите, пријателските држави, збратимените општини. Пожарите кои во изминатите десетина дена беснееја низ државата повторно ги извадија на виделина сите пропусти.

Каде е нашиот одбранбен систем, зошто не можевме сами да се справиме со пожарите, колку време беше потребно да се активираат „Ер тракторите“? Зошто грешките од пожарите во 2021 година во Малешевијата не нè научија како да се заштитиме? Колку од ветеното дека ќе ги зајакнеме територијалните противпожарни станици како со човечки потенцијал, така и со соодветна заштитна опрема е реализирано? На сите овие прашања МИА побара одговори од повеќе релевантни институции.

Иако по големиот пожар што пред три години ја зафати Малешевијата каде изгореа 5.000 километри квадратни шума, а во гаснењето помагаа пожарникари од Словенија, Австрија, Романија, Унгарија, Србија…се ветуваше засилување на територијалните против пожарни единици, набавка на нова опрема, сепак и во 2024 година државата сеуште не одвојува доволно пари за пожарникарите, за возниот парк, а нема набавено ниту нова заштитна опрема. Најголем дел од опремата што ја имаат територијалните противпожарни единици е добиена преку донации.

За гаснење на шумски пожари во непристапен терен во моментот државата располага со три „Ер трактори“ на Дирекцијата за заштита и спасување, од кои само два се исправни и се на терен. За гаснење на пожари се активираат и два хеликоптери на Армијата и на полицијата.

Грешките од големиот пожар во Малешевијата, можеби ги разбудија некои институции да почнат со зајакнување на сопствените противпожарни капацитети, но годинава повторно подметна одбранбениот систем за интервенција на големи шумски пожари.

Иако државата има три „Ер трактори“, едниот не е во возна состојба, а со другите два немаше кој да управува. Двата „Ер трактори“ не беа веднаш испратени на терен по дојавата за големиот пожар на планината Серта кај Неготино, а причината за тоа беше немањето кој да управува со нив, па Дирекцијата за заштита и спасување потпиша договор со двајцата пензионирани пилоти по што тие активно се вклучија во гаснењето на пожарите.

Ниту екипите на „Национални шуми“, кои треба први да интервенираат при гаснење на шумски пожари, немале можност да го сторат тоа поради празните резервоари во возилата и блокираната сметка.

И повторно, беше побарана меѓународна помош. Во гаснењето од воздух се вклучија еден хеликоптер од Србија кој имаше носивост од пет тона вода, два хеликоптера од Словенија, два авиони и еден хеликоптер од Турција, еден канадер од Хрватска и еден авион од Романија.

Итна трансформација на системот за управување со кризи

Управувачкиот комитет за управување кризи донесе одлука за итна реорганизација на целокупниот систем за соодветно да се справи со секоја криза која би настанала во земјава. Трансформацијата подразбира спојување на Центарот за управување со кризи и Дирекцијата за заштита и спасување и постоење на специјална единица за заштита и спасување која за почеток би броела околу 120 луѓе.

Првиот човек на Центарот за управување со кризи Стојанче Ангелов вели дека системот за гаснење пожари има низа слабости, кои очекува за брзо да бидат отстранети.

Специјалната единица за заштита и спасување, според Ангелов, треба да биде мултифункционална, обучена за потрага, пребарување и спасување, односно во лето да гасне пожари, а во зима да спасува луѓе од планина, а во случаи на земјотреси, да помага во пронаоѓање на затрупани под урнатините.

– Нас ни е потребна една ваква единица, бидејќи во овој момент ние немаме вакви сили, иако ДЗС има декларирано сепак тие се на друго ниво. ДЗС соработува со доброволни противпожарни друштва, кои се извонредни луѓе, но е далеку од она што јас го имам како замисла. Еден доброволен пожарникар е одличен и дејствува само кога е најтешко. Но, сепак ќе има разлика меѓу една професионална единица, која ќе биде во ранг на специјална единица со млади, здрави физички подготвени и обучени луѓе, кои ќе отскокнуваат од просечните против пожарни единици и ќе настапуваат само онаму каде што е најтешко. Имаме се, координатор, старешини,
раководители, но немаме луѓе што гаснат на терен, забележува Ангелов.

За поголема ефикасност при гаснењето на шумските пожари и пожарите на отворено смета дека е потребна централизирана команда.

– Кога има пожар, градоначаникот треба сам да бара помош од соседните општини, а тоа го успорува целиот процес. Кога би имале централна координација, од еден центар ќе се испратат онолку пожарникари колку што се потребни. Бирократизираната процедура одзема време. Секоја задоцнета интервенција го отежнува гаснењето и последиците се потешки, нагласува Ангелов.

И министерот за одбрана Владо Мисајловски во изјава за МИА посочува дека во периодот што следува ќе се
разгледаат сите предлози од работните групи кои во изминатите неколку години работеле на изработка на нов Закон за пожарникарство и оти Министерството во најбрз можен рок ќе излезе со предлог до Владата.

Во изјава за МИА, тој најави и дека осумте хеликоптери од компанијата „Леонардо“, коишто во земјава треба да пристигнат кон средината на 2026 година, ќе бидат опремени и со систем за гаснење пожари.

Со помош на општините и донации, некои ТППЕ во добра кондиција

Согласно Законот за пожарникарство во општините со над 24.000 жители, на 1.500 лица треба да има еден пожарникар, но ретки се територијалнте противпожарни единици што го исполнуваат овој критериум. Речиси во сите, состојбата е далеку под законските норми.

Министерството за одбрана преку наменски дотации издвојува пари за плати и додатоци на плати за 734
пожарникари, а за останатите, финансиите се обезбедуваат од општинските буџети.

Податоците покажуваат дека од 2019 до 2024 година речиси двојно се зголемиле средствата за наменски дотации. Така, во 2019 година одобрени се 331,755,000 денари, во 2020 година тој износ се зголемува на 401,000,000 денари, а во 2021 година на 403,500,000 денари. Во 2022 година биле одобрени 421,500,000 денари, лани 500,000,000 денари, а за 2024 година за наменска дотација биле планирани 527,700,000 денари.

Претседателот на ЗЕЛС, Орце Ѓорѓиевски во изјава за МИА посочува дека со министрите за одбрана и за финансии бараат начин како да се надмине проблемот.

– Дека се’ ќе биде брзо решливо, не верувам, затоа што ова не е едноставен проблем, не е мал проблем и не е проблем што се решава многу едноставно од страна на централните институции. Потребни се повеќе средства за да се партиципира, но има расположение од централната власт и верувам дека во догледно време ќе бидат зголемени блок дотациите, вели Ѓорѓиевски.

Според него, скоро сите општини го имаат истиот проблем. Најголем број пожарникари финансиски покрива Општина Штип, но слична е состојбата и во Тетово, Куманово, Гостивар…

-Во малку подобра кондиција е Општина Велес, каде градоначалникот помалку покрива од страна на општинскиот Буџет за пожарникарите, но генерално земено практично во секоја општина или во секој град, каде што постои противпожарна единица има недостатоци од овој аспект. Дополнителен проблем е тоа што средствата што се инвестираат од општините за подобрување на условите на пожарникарите, не можат да бидат ефектуирани, бидејќи завршуваат за покривање на нивните плати, нагласува првиот човек на ЗЕЛС.

Посочува дека противпожарните единици во државата поседуваат многу стари возила, потребни се униформи за пожарникарите и заштитна опрема за на терен, но оти недостасуваат и пожарникари.

– Генерално земено, можевте и минатиот период, но и сега, кога сме соочени со пожарите да видите во каква состојба се возните паркови на противпожарните единици ширум Македонија. Имаме слабости и во тој дел и треба да работиме најпрво на опремување на пожарникарите, а подоцна и на обезбедување на соодветни возила, вели Ѓорѓиевски.

Иако пожарникарите имаат можност да посетуваат обуки надвор од државата, смета дека потребен е центар за обука во земјава.

Штип меѓу десетте најоштетени општини, државата плаќа само шестмина пожарникари

Штип е меѓу десетте општини, кои се оштетени од централната власт за исплата на наменски дотации за платите на пожарникарите во Територијалната противпожарна единица.

Градоначалникот Иван Јорданов вели дека ТППЕ-Штип има 33 пожарникари, а од Министерството за одбрана добиваат средства преку наменски дотации за само шест пожарникари, додека за останатите 27, платата се обезбедува преку буџетот на Општината.

Јорданов забележува дека за оваа неправична распределба на средствата за платите на пожарникарите реагирале градоначалниците на оштетените општини, имале и средби со ресорните министри од претходната власт, но дека решение на проблемот нема.

– Некои од општините имаат поголема финансиска помош, други имаат помала и тоа независно од бројот на жители. Штип, како поголема општина компаративно со друга локална самоуправа има помал износ на наменски дотации, без разлика што има број на пожарникари согласно Законот за пожарникарство, вели Јорданов.

Општина Штип месечно само за платите на пожарникарите издвојува дополнителни над два милиони денари, но не се само овие средства, туку од општинската каса се плаќаат и сметките за струја и комуналии, одржување на Противпожарниот дом, опремата, возилата, набавка на нафта.

На годишно ниво од општинскиот буџет се издвојуваат околу половина милион евра за ТППЕ-Штип, средства коишто доколку државата ги обезбедува би биле инвестирани во нова опрема, униформи и возила.

Според пресметките на Општината, со овие пари секоја година би се набавувале по седум нови Противпожарни возила со различна опрема.

Преку донации во Штипската пожарна изминатите две и пол години обезбедени се две возила, од кои едно теренско преку Дирекцијата за заштита и спасување и едно возило за гаснење шумски пожари преку Програмата за меѓугранична соработка со Бугарија. Пожарникарите добија нова заштитна униформа за гаснење на пожари во шумски предели, но и во урбана средина преку донација од Амбасадата на САД.

Кавадаречката противпожарна единица најопремена 

За разлика од Штипската, кавадаречката Територијална противпожарна единица, според градоначалникот Митко Јанчев, е една од најопремените во државата, со кадар и со опрема.

– Урбано, како Територијална противпожарна единица сме 100 проценти опремени. Вработените активно се вклучени во најразлични интервенции и имаат успех во секакви интервенции, не само при пожари, истакна Јанчев.

Според него, во државата е потребно да се набави опрема за гаснење шумски пожари, бидејќи, нагласува, отворените пожари се многу различни од оние во урбана средина.

– Како држава немаме опрема за гаснење шумски пожари, каква што имаат други земји. Пред две години, дојдоа Австријците со опрема за гаснење шумски пожари. Подвижни базени, пумпи, подвижни агрегати, кај што може да направат линии и до пет километри, да префрлат вода од едно до друго место, потсетува Јанчев.

Големите пожари во Малешевијата ги зајакнаа капацитетите на ТППЕ Берово

Пожарите во Малешевијата, биле опомена за тамошните власти да ја зајакнат Територијалната противпожарна единица. Градоначалникот на Берово, Звонко Пекевски вели дека огнената стихија во Малешевијата била за нив опомена да ја зголемат безбедноста на имотите на граѓаните со зајакнување на капацитетите на ТППЕ.

– Со поддршка од донатори и општествено одговорни компании обезбедени се две нови возила, по едното за урбани и за шумски пожари. Во меѓувреме, набавена е нова заштитна опрема за пожарникарите за шумски пожари, како и опрема за полесно справување на пожарите, нагласува Пекевски, посочувајќи дека пожарникарите биле испраќани и на обуки надвор од државата.

Средствата што ги дотира државата не соодвестуваат и се недоволни за да се исплатат платите согласно закон, вели Пекески, додавајќи дека од општинскиот Буџет се издвојуваат дополнителни средства за да може пожарникарите да ги земаат платите согласно законските обврски. Во ТППЕ Берово вработени се 16 пожарникари и значително е променета старосната граница. Има нови помлади пожарникари наспроти оние кои се во поодмината возраст пред пензионирање.

Сензори и камери за рана детекција помагаат во брзо детектирање на пожарите во Струшко

И Струшката пожарна располага со речиси доволно пожарникари, од потребните 41, моментално има 38 вработени. Во однос на опремата, командирот Фети Мазари, посочува дека иако имаат заштитна опрема, таа е  застарена и потребна е нова, за што од градоначалникот добил ветување дека идниот месец ќе им биде набавена. Возниот парк, каде најстарото противпожарно возило датира од 1993 година, тврди дека е во добра состојба, но покрај двете теренски возила за тешко достапни предели, имаат потреба за уште едно.

За рана детекција на пожарите нагласува дека многу им помогнал проектот IPA CBC за прекугранична соработка со Албанија, партнерство на општина Либражд од Албанија и Дирекцијата за заштита и спасување, преку кој поставени се камери и сензори на неколку локации.

– Поставени се сензори и камери за рано детектирање на пожари на планината Јабланица, во село Богојци и на зградата на ТППЕ Струга, со што е опфатен обемен простор. Од голема помош е и дронот, кој по добиениот сигнал за пожар веднаш го пуштаме за попрецизна локација и таму веднаш се упатува наша екипа. Раното детектирање на пожарите е многу важно за навремена интервенција, нагласува Мазари за МИА.

Кочани со половина од потребните пожарникари, за поголеми интервенции помага доброволно противпожарно друштво

Иако според законскиот минимум за општина Кочани потребни се 32 пожарникари, Територијалната противпожарна единица располага со половина, односно 16. Половината од нив ги плаќа државата преку Министерството за одбрана, а за другата половина финансиските трошоци се на товар на Општината.

– Општина Кочани имаше предвидено средства за вработување двајца пожарникари во 2025 година, но поради зголемување на трошоците за минимална плата, дојде до финансиски импликации за одделување поголеми средства од сопствениот буџет. ТППЕ добива дотации од околу 10 милиони денари, а од буџетот на Општината, според новите пресметки и колективниот договор, со овој интензитет ќе испадне да се издвојуваат уште околу шест – седум милиони денари за плати и надоместоци, истакнува секретарот во Општина Кочани, Драган Ананиев.

Покрај Кочани, Противпожарната единица, целосно ги покрива и териториите на соседните општини Зрновци и Чешиново-Облешево, каде во просек има околу половина од интервенциите на годишно ниво, но од нивните општински буџети не добива средства. Дополнително, од буџетот на Општина Кочани се издвојува финансиска поддршка за работата на Доброволното противпожарно друштво кое има околу педесетина доброволци, од кои соодветна стручна обука имаат 30 лица и тие излегуваат на терен и помагаат во интервенциите.

Големината на теренот на кој делуваат, предизвик за гостиварските пожарникари

Од потребните 80-тина во Гостиварската противпожарна единица има само 48 пожарникари, кои покрај територијата на општина Гостивар ги покриваат и Врапчиште и Маврово – Ростуше, како и двата национални паркови „Маврово“ и „Шар Планина“.

Месечно се издвојуваат околу 2,4 милиони денари за тамошната ТППЕ. Преку блок дотации за плати на пожарникарите има прилив од 1,5 милиони денари, а од општинската каса за оваа намена се издвојуваат по околу 800 илјади денари.

– Притисокот врз малиот број вработени кои делуваат на голема оддалеченост е голем, со оглед дека некои населени места во општина Маврово-Ростуше се на 50 километри, а има и планински села во општина Врапчиште, до каде заради патиштата е потребно и еден час за да се стигне на интервенција. Состојбата се очекува да биде подобрена со отворањето на одделение во селото Градец, општина Врапчиште, што ќе ја зголеми и ефикасноста, посочуваат од Општина Гостивар.

Оттаму, додаваат, преку проект на Министерството за локална самоуправа се вклучени три општини – Врапчиште и Боговиње во Северна Македонија и Церик во Албанија и невладината организација Каритас. Со изградбата на противпожарната станица очекуваат дека ќе се реши долгогодишен проблем и честопати задоцнетото интервенирање на терен. Во тек се завршни активности за вработување на девет пожарникари, кои ќе ја опслужуваат територијата на општините Врапчиште и Боговиње. Оваа единица би делувала и на територијата на националниот парк „Шар Планина“ кој зафаќа дел од атарите на двете општини.

ТППЕ Велес со намалени човечки ресурси се справува со пожарите на три општини 

Територијалната противпожарна единица во Велес работи со 31 пожарникар, а согласно законските прописи треба да има 40 пожарникари. Од вработените, 28 се вработени на неопределено време, а тројца на определено.

Секретарот на Општина Велес, Марија Чатмова во изјава за МИА посочува дека ТППЕ Велес работи со намалени човечки ресурси.

Според споледниот Попис спроведен во 2021 година, бројот на жители во Општина Велес изнесува 48.463 жители, во Општина Градско 3.233, а во Општина Чашка 7.942 жители, односно за територијата што ја покрива ТППЕ Велес треба да има вработено 40 пожарникари.

Платите и надоместоците на пожарникарите, како што посочува Чатмова, се исплаќаат од блок дотациите предвидени во државниот Буџет.

– На професионалните пожарникари им се исплаќа плата во согласност со Законот за пожарникарство, а исто така им се исплаќаат и сите надоместоци утврдени во Законот за работни односи, појаснува Чатмова.

Во изминатите две години со донации ТППЕ Велес има добиено две нови противпожарни возила.

Повреден пожарникар и изгорени зелени ридови во Битола и битолско

Битолската Територијална противпожарна единица има 41 вработен, а според стандардите треба да има 65. На располагање, како што информира командирот на ТППЕ-Битола, Горан Димкоски имаме 14 возила и пет дополнителни теренски возила кои може да носат вода на секоја локација.

Битолчани се во очекување и на изградбата на нов објект на Територијалната противпожарна единица и нови вработувања на пожарникари. Локалната самоуправа годинава издвои 52 милиони денари за изградба на нова зграда на пожарникарите кои се носители на традицијата долга 188 години кога во 1836 година по голем пожар во Битола е формирана првата противпожарна единица на Балканот.

Кон средината на месецов реонот на Битола го зафатија серија пожари од кои епилогот е повреден пожарникар, изгорени над 200 хектари шума, како и млади садници од 2007 година.

The post ШТО НАУЧИВМЕ ОД ПОЖАРИТЕ ВО МИНАТОТО? Противпожарните капацитети се зајакнуваат локално appeared first on plusinfo.mk.

Васко Михалчев и Стоје Арсовски, се двајцата пензионирани пилоти кои беа вратени на работа поради недостиг на пилоти обучени за управување со авионите за гаснење пожари „ер трактори“.

Двајцата се вклучени во гаснењето на пожарите кои веќе десетина дена се активни на територија на државата.

На социјалните медиуми секојдневно се објавуваат фотографии со пофални зборови за нив.

Тие беа вратени на работа со одлука на Владата откако им беа понудени нови договори.

Директорот на Дирекцијата за заштита и спасување Беким Максути на 12 јули во изјава за МИА потврди дека договорите со двајцата пилоти се потпишани и дека тие ќе се вклучат во гаснењето на пожарите.

За недостигот на пилоти во Дирекцијата за заштита и спасување, МИА пишуваше уште во април годинава. Под наслов „Критичен недостиг на пилоти во ДЗС – справувањето со шумските пожари ова лето ќе биде дополнителен предизвик“, МИА тогаш во разговор со директорот на ДЗС објави дека од тројца пилоти со кои располагала Дирекцијата, годинава останува само со еден пилот, бидејќи двајца ги исполниле условите за старосна пензија.

– Имавме тројца пилоти до крајот на 2023 година. На почетокот од оваа година, двајца заминаа во пензија и моментално имаме само еден пилот. Правиме напори, да видиме како може нив да ги задржиме, барем уште оваа година, сѐ со цел во меѓувреме да примиме нови пилоти, односно да распишеме нови огласи за пилоти, за кои веќе имаме согласност и чекаме да се завршат некои процедури за да може да го објавиме огласот – изјави тогаш Максути.

The post „ТИЕ СЕ НАШИТЕ ХЕРОИ“ Цела Македонија ги велича двајцата пензионирани пилоти кои се вклучија во гаснењето на пожарите appeared first on plusinfo.mk.

Јорданов посочува дека попладнево пожарникарите и вработените во останатите институции кои се анагажирани во гаснењето на пожарот се во тој дел на планината.

Тој најави дека и вечерва ќе биде свикан кризниот штаб и мобилизација на луѓе и машини кои ќе го спречат огнот да влезе во селото Пиперово.

Утринава во штипскиот дел се гасеше и од воздух. Но, македонските и турските ер трактори, како и хрватскиот канадер заминаа на други пожари во земјава.

Жител на Сирково се здобил со изгореници на рацете и на едната нога

Исто така, повреден бил жител на росоманското село Сирково, при гаснење на пожар. Тој се здобил со изгореници на рацете и едната нога, информираше попладнево Стојанче Ангелов, директор на ЦУК.

– Лицето се здобило со изгореници на лице и рака на десната страна. Препратено е на клиниката за пластична хирургија во Скопје – за МИА потврди доктор Ратко Грков, раководител на Итна медицинска помош Кавадарци.

Пожарот кај Сирково избувна во текот на денешниот ден.

Во Калањево пак гори, жителите предупредени да не одат во селото

Неготинско Калањево е повторно под опасност од пожарот, се бара дополнителна поддршка од воздух.  Васе Јованов – Ладна, претседател на месната заедница на село Тремник, кој неколку дена заедно со ловците од ловно друштво Неготино, го гаснат пожарот, за МИА рече дека итно им треба дополнителна помош од воздух.

Дека се загрозени викендичките во селото, за МИА потврди и неготинскиот градоначалник Горан Стојанов. Тој исто така нагласи дека освен од земја, гаснењето треба да има и дополнителна поддршка од воздух.

Прашавме дали се евакуирани луѓето од селото, бидејќи уште пред неколку дена беше упатен апел за нивна евакуација.

– Во селото не треба да има луѓе од безбедносни причини поради пожарот. Но, некои  самоиницијативно одат – одговори Стојанов.

Во Шивец веќе нема опасност, но се разгоре пожар спроти селото

Селото Шивец е одбрането од пожарот, огнот сега е спроти селото, но не го загрозува, рече директорот на ЦУК, Стојанче Ангелов, попладнево во видеоизјава.

– Опасноста по селото е намалена, мислам дека веќе има делумна контрола, најверојатно за кратко ќе биде воспоставена целосна контрола, благодарение на храброто локално население кое се искачи горе на ридот со лопати, а повеќето од нив со гранки, успеаја да ги совладаат пламените јазици, изјави Ангелов.

За жал, рече тој, пожарот продолжува да гори од задната страна.

-Ова ќе биде пожар што ќе биде многу тешко да се изгасне. Но, најважно од се е дека селото е безбедно и немаме загрозени човечки животи. Опасност за селото веќе нема, подвлече Ангелов.

100 припадници на Вториот Пешадиски Баталјон се вклучени кај Серта

И денеска интензивно се одвиваат активности за гаснење на големиот пожар на планината Серта од неготинска страна, информираше градоначалникот на Неготино, Горан Стојанов, на неговата Фејсбук страница.

– До моментот на објавување на ова известување само за кратко се интервенираше од воздух со два хеликоптер, додека изостана вклучувањето во гаснењето на пожарот од други воздухоплови како што се ер трактори и авиони за гаснење пожари. Во најголем дел гаснењето се одвива од земја со механизација и човечки ресурси со вклучување на војници, полиција, пожарникари, ловџии и други доброволци, соопшти тој.

Во текот на денешниот ден во координација со сите надлежни субјекти кои учествуваат во гасењето на пожарите, Армијата со повеќе од 100 директно ангажирани припадници од 2. Пешадиски баталјон учествуваше во гасење на пожарите на неколку локации во поширокиот реон на Серта.

The post НОВО ЖАРИШТЕ, ПОЖАРОТ ОД СЕРТА ОДИ КОН СЕЛО ПИПЕРОВО Се разгоре и кај Калањево, жител на Сирково се здобил со изгореници appeared first on plusinfo.mk.

Во моментов има 13 активни пожари на територијата на Република Северна Македонија, изгаснати се три, информираа вечерва од Центарот за управување со кризи.

Активните пожари се во Скопје во Општините Сарај, Сопиште, Зелениково и Студеничани, а покрај пожарите во Битола и кај планината Серта во Неготино, гори и во Штип, Ново Село, Чашка, Долнени, Гевгелија, Радовиш, Делчево и Липково.

Изгаснати се три пожари и тоа во Општините Македонски Брод, Росоман и Чешиново-Облешево.

Гаснењето на пожарот на планината Серта продолжува утре со сите воздухопловни сили и од копно, е констатирано на вечерашниот состанок на Штабот за заштита и спасување во Неготино.

– Предвидено е утре вклучување на сите воздухоплови- хеликоптери и „ер трактори“ кои се на располагање за гаснење на пожарот од воздух, а паралелно од копно во активностите ќе бидат вклучени припадници на АРМ, 30 припадници на ЕБР, полицајци од СВР Неготино, пожарникари, од Национални шуми, ловџии и волонтери кои со денови даваат несебичен придонес во гаснењето на пожарот – појасни неготинскиот градоначалник Горан Стојанов.

Како и во изминатите денови, така и за утре, Кризниот штаб има обезбедено механизација за поефикасно гаснење на пожарот.

Пожарот во неготинско избувна во средата околу 10.30 часот.

The post 13 ПОЖАРИ СЕ АКТИВНИ, НОВО ЖАРИШТЕ КАЈ РАДОВИШ Гаснењето кај Серта продолжува утре од воздух и од копно appeared first on plusinfo.mk.