Веста дека кај судијата Ѓоко Ристов се најдени 350 илјади евра пари осомничени за корупција, не е само индивидуален скандал, туку е вест која ја уништува дури и последната доверба што граѓаните ја имаа во правосудниот систем – оцени Движењето Вреди на денешната прес-конференцијата одржана од портпаролот Дритон Сулејмани.

– Вреди е убедена дека ова не е изолиран случај, туку врв на ледениот брег на еден скапан систем, кој со години ги штити силните, а ги угнетува обичните граѓани. Она што ја прави ситуацијата уште поалармантна е фактот дека Ѓоко Ристов не е непознато име за правдата – рече Сулејмани.

Затоа, рече портпаролот Сулејмни, денеска поставуваме неколку конкретни прашања:

– Во колку други случаи бил вклучен судијата Ѓоко Ристов?

– Во колку случаи бил дел од одлуки за притвор, финансиски гаранции или одложувања на постапките?

– Кои конкретни одлуки доведоа до ослободителни пресуди и избегнување на одговорност за моќници?

– Главното прашање што останува е кој ги држел овие луѓе на овие позиции толку години и зошто?

– Вреди е свесна дека работата што претстои е огромна. Но, едно е нешто што не може да се преговара: целосни и независни истраги. Конкретна одговорност, со имиња и презимиња. И радикално чистење на систем скапан до срж – рече Дритон Сулејмани на пресконференцијата на Вреди.

The post ВО КОИ ДРУГИ СЛУЧАИ СУДЕЛ СУДИЈАТА РИСТОВ, КОЈ СОЅИДА 350.000 ЕВРА? Вреди бара целосни и независни истраги за корупција во судството appeared first on plusinfo.mk.

Судскиот совет вчера го разрешил апелациониот судија Енвер Беџети, кој од декември лани е на црната листа на американскиот Стејт департментот.

Како што пишуваат медиумите, Беџети од март годинава не доаѓал да даде исказ пред комисијата по повод отворената постапка за разрешување и поставањето на црната листа, кажувајќи дека е болен.

Стејт департментот на САД во декември 2024 година донесе одлука на црната листа да ги стави поранешниот вицепремиер на Македонија, Артан Груби, неговото семејство и судијата Енвер Беџети од Апелациониот суд, поради нивно учество во значителна корупција.

Според Стејт департментот, тие примиле мито со цел да ги поткопаат судските процеси поврзани со кривичната пресуда на Сашо Мијалков, поранешниот директор на Управата за безбедност и контраразузнавање (УБК).

За Беџети се води и предистражна постапка во Основното јавно обвинителство.

За разрешување на судијата Беџети вчера гласале девет членови на Судскиот совет.

The post РАЗРЕШЕН Е СУДИЈАТА ЕНВЕР БЕЏЕТИ Лани беше ставен на црната листа на Стејт департментот appeared first on plusinfo.mk.

Шефот на Делегацијата на Европската Унија во земјава Михалис Рокас, денеска одговорајќи на новинарско прашање во врска со американската црна листа на која се ставени поранешниот вицепремиер Артан Груби и апелацискиот судија Енвер Беџети, рече дека сега е важно судството во земјава да ги преземе сите можни активности поврзани со овој случај, но и со сите други случаи каде што е присутна корупцијата во државата.

– Соединетите Aмерикански Држави презедоа значаен чекор во борбата против корупцијата, со ставање на поранешниот вицепремиер Артан Груби и апелацискиот судија Енвер Беџети на американската црна листа. Меѓутоа, она што е важно е дека судството во државата треба да ги преземе сите активности не само во врска со овој последен случај, туку и сите други видови на корупција кои се присутни, со цел да имаме независно судство – рече Рокас.

Тој додаде дека ЕУ има преземено значајни активности и напори за обезбедување механизми за зајакнување на судството.

– Тука можам да ја споменам оценската мисија на ЕУ, која што издаде 40 препораки за судството во Северна Македонија, така што мислам дека најважно е судството да стане независно тело. Професионално и независно судство останува клучен приоритет за идниот интегративен процес на Северна Македонија во ЕУ. Со постоење на независно судство, ќе се зголеми довербата во општеството и се надеваме дека ова ќе се случи многу поскоро – додаде Рокас.

Прашан за претресите кои се случуваат во Судскиот совет, Рокас рече дека Јавното обвинителство треба да ги направи сите можни пребарувања во случаи кога постојат сомнежи за постоење на корупција во одредена институција.

– Мислам дека канцеларијата на Јавното обвинителство секогаш треба да ја има можноста да ги направи сите можни пребарувања во случаи кога постојат сомнежи за постоење на корупција во одредена институција. Без разлика дали станува збор за индивидуални или општи акти, во едно демократско општество на Јавното обвинителство треба да му бидат ставени на располагање сите механизми за да може да изврши истрага за можна корупција – додаде Рокас.

Евроамбасадорот денеска е во посета на Тетово.

The post НЕ СЕ САМО ГРУБИ И БЕЏЕТИ, СЕКАДЕ ТРЕБА ДА СЕ ИСПИТУВА КОРУПЦИЈА Рокас за проширувањето на американската црна листа appeared first on plusinfo.mk.

Амбасадорката на САД во земјава, Ангела Агелер денеска на прес-конференција информираше дека поранешниот вицепремиер Артан Груби и апелацискиот судија Енвер Беџети се ставени на американската црна листа поради политичко мешање и обиди за оцрнување на судството во државата. Таа подвлече дека на нив и на нивните најблиски им е забранет влезот во САД, а во Вашингтон во меѓувреме се разгледуваат и дополнителни санкции.

– Стејт департментот на Соединетите Aмерикански Држави вчера презедоа значаен чекор во борбата против корупцијата, со ставање на поранешниот вицепремиер Артан Груби и апелацискиот судија Енвер Беџети на американската црна листа, поради политичко мешање во судството. Затоа, на нив и на нивните најблиски членови на семејството им е забранет влезот во САД. Во Вашингтон во меѓувреме се разгледуваат и дополнителни санкции – рече Агелер.

Како што рече, се надева оти со ова ќе покажат дека САД ги користи сите можни алатки за повикување на одговорност кон овие лица, чии криминални активности ја нарушуваат безбедноста, стабилноста и доброто владеење во Северна Македонија.

– Согласно законот во САД, мора да ги ставиме на црната листа лица за кои постојат докази дека се вклучени во корупција, без оглед на нивните минати или сегашни функции. Велиме дека правдата е слепа, но таа мора да биде непристрасна и обејктивна за сите, без разлика на политичка партија, пол или етничката припадност – додаде Агелер.

Таа смета дека корупцијата во ниедна форма не треба да се толерира во оваа држава.

– Оние кои го поткопуваат владеењето на правото заради лична добивка, а на сметка на народот во Северна Македонија, треба да разберат дека корупцијата има последици. САД ќе продолжи да повикува на одговорност за сите инволвирани во коруопција, и се надевам дека судството и оние кои го спроведуваат законот во оваа држава ќе го направат истото. Граѓаните на оваа тоа го заслужуваат – додаде Агелер.

The post „МОЖЕ И ВИЕ ДА НАЈДЕТЕ ДОКАЗИ, ШТОМ НИЕ МОЖЕВМЕ“ Агелер очекува проактивност од институциите за Груби и за Беџети appeared first on plusinfo.mk.

– САД испраќа јасна порака дека во политиката и во институциите, вклучувајќи го и Судот, мора да се води сметка за допрен глас, а ова е допрен силен глас заснован на факти и докази. Не смееме како досега да останеме мирни и да ги оставиме лицата кои се нашле на црната листа да си продолжат со своите редовни активности. Ако јавните обвинители треба да постапуваат по допрен глас, треба да постапуваат и во овој случај. Во меѓународното право постојат начини како да се дојде до тие докази и да се започне постапка овде.  Очекувам ЈО да почне да постапува – рече претседателката Сиљановска Давкова.

Редно е надлежните да постапуваат, додаде таа.

– Се разбира дека преумпцијата на невиност важи, но страшно е во политиката да има такви луѓе, особено со статус на копремиер. Кога прочитавме и име на судија, треба особено да сме загрижени, затоа што Судот треба да е синоним за правото и правдата. Неправдата и владеењето напресилни луѓе ги направиле сите институции слаби. Во тој случај, во духот на оценската мисија, се потребни итни чекори во сите органи – рече претседателката.

Оние 2 проценти доверба од граѓаните, додаде таа, всушност значат целосна недоверба, затоа што 2 е ниво на статистичка грешка.

– Сериозно треба да размислиме дали се креирал еден партизиран и политизиран судски систем. Треба да се тргне не само од конкретниот случај, туку да види како сите во судскиот систем се нашле на одредени позиции. Најголемиот дел од вината е во оние два најважни органи, Судскиот совет и Советот на јавни обвинители. Тие треба да се чуварот на независноста на правосудството, да бидат филтерот, лакмусот, микроскопот, рендгенот и не смеат да дозволуваат определен профил на луѓе кои се огрешиле и придонеле директно или индиректно на недовербата во судскиот систем, да бидат на позиции кадешто  не смеат да бидат – рече претседателката Сиљановска Давкова.

The post ОБВИНИТЕЛСТВОТО ДА ПОСТАПУВА ЗА АРТАН ГРУБИ И ЗА ЕНВЕР БЕЏЕТИ Ако не реагираме, го толерираме беззаконието appeared first on plusinfo.mk.

„Криминалот и влијанието врз судовите не е само самостојна определба и одлука на Артан Груби и на Енвер Беџети, туку зад сите овие мафијашки однесувања стои лидерот на ДУИ Али Ахмети. Демократскиот сојуз повикува Парламентот да усвои закон за политичка одговорност за сите што се на црната листа на САД, за да се создаде законска основа за поведување постапка за кривична одговорност“, соопшти Демократски сојуз.

Соединетите Американски Држави, се додава во соопштението, покажаа дека лажните бранители на албанскиот јазик во суштина продаваат магла и манипулираат со чувствата на Албанците за да си ја спасат сопствената кожа.

„Водството на ОНА наместо во ХАГ, 20 години ја ограбува Македонија и нејзините граѓани и Албанци и Македонци. Очекуваме оставки и акција од државата“, соопшти партијата на Павле Трајанов.

The post ДЕМОКРАТСКИОТ СОЈУЗ БАРА ОСТАВКИ ОД КОРУМПИРАНИТЕ ПОЛИТИЧАРИ И АКЦИЈА ОД ДРЖАВАТА Да се усвои закон за крививчна и политичка одговорност за оние што се на црната листа на САД appeared first on plusinfo.mk.

Политичкото мешање во судството не може, и нема да се толерира, напиша во официјален статус амбасадорката на САД во Северна Македонија, Анџела Агелер, по објавата дека поранешниот прв вицепремиер Артан Груби и судијата Енвер Беџети се новите две имиња на „црната листа“ на Стејт департментот.

– Денешното назначување на Артан Груби и Енвер Беџети е доказ дека политичкото мешање во судството не може, и нема да се толерира. САД ќе продолжат да ги именуваат оние кои се вклучуваат во значителна корупција која ги поткопува демократските институции. Никој не е над законот, а одговорноста е суштинска за напредок – истакна амбасадорката Агелер.

Today’s designation of Artan Grubi and Enver Bexheti is evidence that political interference in the judiciary cannot – and will not – be tolerated. The United States will continue to name those who engage in significant corruption that undermines democratic institutions and…

— Ambassador Angela Aggeler (@USAmbNMacedonia) December 9, 2024

The post „НЕМА ДА СЕ ТОЛЕРИРА ПОЛИТИЧКО МЕШАЊЕ ВО СУДСТВОТО“ Ниту Артан Груби не е над законот, се огласи Агелер appeared first on plusinfo.mk.

Стејт департментот на САД донесе одлука на „црната листа“ ги стави поранешниот вицепремиер на Македонија, Артан Груби, неговото семејство и судијата Енвер Беџети од Апелациониот суд, поради нивно учество во значителна корупција.

Според информациите, тие примиле мито со цел да ги поткопаат судските процеси поврзани со кривичната пресуда на Сашо Мијалков, поранешниот директор на Управата за безбедност и контраразузнавање (УБК).

Сашо Мијалков веќе ставен на црната листа на Стејт департментот во 2022 година за корупција, а Канцеларијата за контрола на странски имоти (OFAC) го санкционираше согласно Извршната наредба 14033.

„Дел од акцијата на Стејт департментот вклучува и означување на членовите на потесното семејство на Артан Груби. Оваа мерка претставува јасен сигнал за поддршка на владеењето на правото и борбата против корупцијата во Северна Македонија“, пишува во соопштението од Стејт депарментот.

The post ГРУБИ, НЕГОВОТО СЕМЕЈСТВО И СУДИЈАТА БЕЏЕТИ НА „ЦРНАТА ЛИСТА“ Стејт департментот ги обвини за земање мито за судењата на Мијалков appeared first on plusinfo.mk.

Активностите на Заевите инсталации во оваа област деновиве се интензивирани. Добро упатените тоа го толкуваат како последен обид на Заев да ги подеси „нишанските справи“ пред завршната битка за остварување доминација во СДСМ. Во оваа драма се препознава уште еден пиаровски обид на поранешниот премиер да ги убеди Американците – откако тие веќе и јавно ја дефинираа борбата против корупцијата како клучен приоритет за Македонија во периодот што претстои – дека токму Заев е најдоследниот борец против криминалот, корупцијата и особено против неказнивоста на судените и несудени криминалци.

Затоа неговите „камшикарки“ во Судскиот совет први добија задача да извршат груба атака врз судиите од Апелациониот суд во Скопје, за да испратат порака дека Советот е камп за превоспитување на судиите кои одбиваат да извршуваат политички нарачки.

Каква е улогата на Заевите „камшикарки“?

Но, да одиме со ред. Како што е познато, приказната за „камшикарот“ датира некаде од септември 2018 година. Тогаш поранешниот премиер Зоран Заев посака „камшикар“ од ЕУ и од НАТО, кој би дошол и би ги „подсредил“ сите од него па надолу. Камшикар од ЕУ и од НАТО тогаш не стигна, Заев потоа абдицираше поразен од граѓаните на локалните избори, но затоа почнаа да излегуваат на површина „камшикари“ во сите институции и насекаде околу нас, кои сега се обидуваат да ги „потсредат“ сите кои размислуваат со своја глава и одбиваат да спроведуваат политички нарачки.

Веднаш по одлуката на скопска Апелација, со која предметот „Таргет-тврдина“ се врати во прв степен, со свој коментар се јави токму Зоран Заев, кој од познавање на правото нема ниту „п“, освен ако за тоа не се смета периодот кога седна на обвинителна клупа како амнестиран за криминал во „Глобал“, потоа како обвинет за земање поткуп од по едно евро за квадрат и најпосле обвинет за аферата „Пуч“.

„Со двете поништени пресуди, директно се упатува на враќање, а со тоа и повторување на грозоморните дејствија на режимската врхушка и секако се мотивираат и други чинители да прават исти вакви грозоморни дејствија, со кои масовно се газат човекови права и сите вредности за кои се бореше целиот македонски народ пред само неколку години преку Шарената револуција. Што е следно, Мијалков да стане директор на АНБ, а Груевски да се врати невин на бел коњ? Па и утре да станеме членка на ЕУ, тоа нема да го испере овој срам и блам. Ги повикувам сите надлежни од и околу правосудството, сите со грам одговорност за иднината на нашата земја и нашиот народ, да не дозволат да застарат делата на Мијалков и да направат сѐ виновниците да одговараат, бидејќи за нивните злодела има докази чисти како ден“, напиша Заев на својот Фејсбук профил.

Заев не беше заинтересиран за образложението на скопска Апелација, дека пресудата за „Таргет-Тврдина“ е укината поради сторени суштествени повреди на одредби на постапката, како и повреди на кои Судот внимава по службена должност, повреди кои влијаеле и врз правилно утврдување на фактичката состојба и врз правилната примена на материјалното право. Советот на Судот тогаш образложи дека утврдил неусогласеност меѓу изречената пресуда и она што е наведено во нејзиниот писмено подготвен примерок, односно дека во изворникот на пресудата нема опис на противправните дејствија за секој од обвинетите. Апелациониот суд Скопје информираше дека фактите кои што ги зел за утврдени првостепениот суд, а по однос на дејствијата на извршување на обвинетите, не соодветствуваат со доказите изведени на главната расправа пред првостепениот суд, по однос на наодите и мислењета на вештите лица на Јавниот обвинител и на одбраната, како во делот на дејствијата по однос на следењето на комуникациите, така и по однос на вредноста на уништената опрема.

Иако дел од стручната јавност која е надвор од влијанието на Заев оцени дека Апелација правилно ја укинала пресудата како неодржлива по повеќе основи, веднаш по Заев се јави и претседателот Стево Пендаровски и буквално на невидено изрази шокираност и ја прогласи пресудата на Апелација за пораз на државата. Во секоја нормална држава во која постојат демократски стандарди и доследна поделба на трите власти (законодавна, извршна и судска), ваков притисок на главните лостови на извршната власт врз судската би бил невозможен, а кога сепак би се случил, би наишол на остар притисок од „четвртата власт“, од јавноста.

И веројатно затоа беше дадено зелено светло за активирање на „камшикарките“ во Судскиот совет поставени токму од Заев и од Пендаровски, за дисциплинирање на оние кои носат одлуки што не им се по волја. Тие добија директива да ја оправдаат довербата од тие што ги поставиле и битката да ја добијат на свој терен, а не само со фејсбук-објавите на Заев и со кампањата покрената во дел од медиумите.

Хајка врз скопска Апелација

Прва за збор се јави новоизбраната претседателка на Судскиот совет, Весна Дамева, која се истрча да му излезе во пресрет на шефот кој ја поставил и го најави притисокот врз судиите од Апелација кои не се под контрола на Зоран Заев. Нејзе ѝ се придружија уште неколкумина „камшикари“ од Судскиот совет, кои единствениот начин за просперитет го гледаат во слепото следење на партиските директиви.

Судскиот совет на вчерашната седница го разгледа и го усвои извештајот од работната посета на Апелациониот суд Скопје. Премиерот Димитар Ковачевски, како носител на извршната власт, одби да го коментира извештајот, во кој се вели дека не биле запазени законските рокови за постапување на Апелација по предметите „Таргет-Тврдина”, „Трезор”, „Транспортер” и „Алфа”. Тања Чачарова-Илиевска, еден од членовите на Судскиот совет и кoординатор на работната група која го испитуваше постапувањето на судиите, рече дека за тоа, како образложенија, биле наведени сложеноста и обемноста на предметите, како и боледувања и одмори. Во дел од медиумите на тапет е судијата известител за предметот „Таргет-Тврдина“, Енвер Беџети, за кого се тврди дека решавал нови предмети, а овој најважен предмет, за кој Апелација ја укина пресудата и го ослободи Сашо Мијалков, го чувал во фиока девет месеци.

И пред Беџети да добие можност да се брани или да каже штогоде, во рубриката „кој е кој во Апелација“ отворена му е биографијата и му се бара црно под ноктите. Но, тоа и не оди баш лесно, бидејќи неговата долгогодишна кариера по дипломирањето во Приштина во 1990 година оди прилично нормално и би рекле дури и здодевно праволински: секретар во општина Боговиње, управител на приватна фирма, генерален секретар на Тетовскиот универзитет, адвокатски приправник, адвокат, судија во Основниот суд Скопје 1 и на крајот судија во скопска Апелација. Единствениот наводно „спорен“ момент е наводно брзото напредување од Основниот суд во Апелација за период од две години.

Како и да е, овие небитни детали, од кои денеска се прави наратив за некоја нова медиумска приказна за евентуално да се подготви терен за отстрел на „спорниот“ судија Беџети, ги спомнуваме само како шлагворт за нашиот скромен попис на Зевите „камшикарки“ во Судскиот совет. Велиме скромен, зашто списокот на луѓето под директна или посредна контрола на поранешниот премиер во правосудниот систем е многу побогат. Но, за тоа во некоја следна прилика.

Значи, одиме сега на главната тема – кои се главните „камшикарки“ на Зоран Заев во Судскиот совет? Какви се нивните биографии? Што содржат анкетните листови за нивните имоти, кои се информации од јавен карактер?

Весна Дамева – најбогатата приправничка на СДСМ

Пред нејзиното именување во судскиот совет, Весна Дамева во правната фела беше „тера инкогнита“. По нашки, никој и ништо. Тешко ќе се најде правник или новинар кој ја знаел дека постои. Без потенцијал за судија или соодветен квалитет за да стане јавен обвинител или адвокат, врвен дострел во кариерата на Дамева е приправник, а потоа и стручен соработник во Основниот суд Скопје 1. Единствената работа со којашто може да се пофали во биографијата е дека била распоредувана во повеќе одделенија на Судот, а одреден период била и стручен соработник на претседателот на Судот, овластено лице за постапување по претставки и поплаки и овластено лице за посредување со информации од јавен карактер.

Посиромашна и посрамна биографија за еден претседател на Судскиот совет досега не била објавена.

Единствена работа по која ја знае јавноста е фотографијата од штабот на владеачката СДСМ каде што насмеана позира токму со Зоран Заев. После тоа, Дамева се правдаше дека случајно се нашла во штабот и не била член на СДСМ, туку како експерт му помагала на Заев.

Во нејзината биографија нема баш ниту една референца поради која таа би била предложена од страна на претседателот Пендаровски како член на Судскиот совет. Освен блискоста со Заев. Затоа единствената работа со која што може да се пофали во официјалната биографија е дека „на ден 12.12.2019 година е избрана за член на Судскиот совет на Република Северна Македонија по предлог на претседателот на државата, а функцијата започна да ја обавува на 27.12.2019 година. На ден 05.12.2022 година е избрана за претседател на Судскиот совет на Република Северна Македонија“.

Нејзиниот анкетен лист од друга страна не ја одразува нејзината сиромашна правна кариера.

Дамева е побогата од 99% од судиите на кои им била приправник, а сега треба да ја оценува нивната работа.

Заедно со сопругот поседуваат благородни метали, златен и друг накит, со вредност од околу 20.000 евра, како и уметнички слики од нецели 10.000 евра. За нив не е објавен податок во имотниот лист на кој начин се стекнати. Сопругот пријавил и скапоцени часовници, кои вредат 24.000 евра, како и моторно возило „Ауди А6“, со вредност од околу 16.000 илјади евра, за кои исто нема податок на кој начин се стекнати. Брачниот другар пријавил и акции чија вредност не е наведена, како и удели од по 33 и 50 отсто во одредени фирми. Сопругот на Дамева поседува и две побарувања по основ на даден заем, и тоа едното од 1,7 и второто од 3 милиони денари.

Децата на Дамева им конкурираат на децата на Драги Рашковски и како нивен имот таа пријавила и 3.612 евра и 206 долари, како подарок, како и орочен денарски депозит од 87.985 евра, стекнат со договор за подарок. Децата поседуваат и трансакциски сметки. Брачниот другар на новата претседателка на Судски совет поседува и банкарски сеф во кој има 2,2 милиони, но не е наведено во која валута, а таа лично има кредит од 320.000, исто така непознато во која валута.

Тања Чачарова Илиевска – советничка на Заев за отварање на судството како пупка

Тања Чачарова Илиевска, која важи за десна рака на приправничката Дамева, нема поминато ниту еден ден како судија или обвинител, а и таа треба да ги оценува судиите. Нејзината адвокатска канцеларија не важи за позната, а тоа колку добро работела се гледа по фактот дека се отворала или се затворала во зависност од тоа дали Чачарова-Илиевска имала државен ангажман.

Најголема гордост и достигнување во кариерата ѝ е тоа што во периодот од 05.08.2017 до 30.11.2020 година работи како Посебен советник за правда во Канцеларијата на Претседателот на Владата на Република Македонија. Од 01.12.2020 година, до изборот за член на Судскиот совет на Република Северна Македонија (16.12.2021 година), повторно ја врши адвокатската дејност.

Во јавноста не излегоа нејзини фотографии од штабот на СДСМ или во прегратките на Заев, но затоа немаше демант на информациите објавени во медиумите дека истата во повеќе наврати ги финансирала кампањите на Зоран Заев и СДСМ. Во годишниот извештај за 2018 година е евидентирано дека на сметка на СДСМ уплатила пари во два наврата. Во првата половина од годината 5.540 денари, а во втората – 7.500 денари.

Во годишниот извештај за 2020 година стои дека донирала 17.200 денари. Во извештајот од предизборната кампања за коалицијата „Можеме“, која ја поддржувала и преку својот Фејсбук профил, Чачарова донирала 5.600 денари и 16.000 денари.

Тогаш Чачарова тврдеше дека не е дел од политичка структура и дека секогаш ѝ било чест кога некој од неа барал адвокатски услуги и правни консултации, правдајќи се дека во канцеларијата на премиерот Заев била вработена во постојан работен однос, како што рече, врз основа на стручните достигнувања. Членувањето во судскиот совет ѝ претставува предизвик како на секој адвокат којшто сака напредок во кариера.

Токму во тој период Заев го отвараше судството како пупка, а недовербата во судовите и во обвинителствата го достигна дното. Практично, нејзина заслуга и заслуга на Заев е што поради тогашните „реформи“ и политичките процеси, довербата ги достигна сегашните 4%, со што Македонија е ставена на столбот на срамот.

Лорета Гeоргиева, богатата струмичка судијка на Заев

Сиромашна кариера и напредување само кога СДСМ и Заев се на власт е краткиот опис на биографијата на Лорета Горгиева, чиј најголем успех во кариерата е изборот за основен судија во Судот во Струмица.

На Георгиева ѝ биле потребни 6 години за да положи правосуден испит, но затоа не ѝ требало премногу време за да направи енормно богатство со сопругот државен функционер и да добие шанса да превоспитува судии кои носат одлуки спротивни на волјата на Заев.

Лорета е сопруга на Зоран Ѓоргиев, кој му бил советник и човек од доверба на градоначалникот на Струмица. Георгиева станува судијка по многубројните партиски перипетии во времето кога Судскиот совет беше под целосна контола на СДСМ и на туркање токму од Зоран Заев, тогаш тазе градоначалник.

Професорот Ѓорѓи Марјановиќ за изборот на Лорета Георгиева напиша: „Има ли нешто попонижувачко за една жена, некој да сака да ја направи судија не заради нејзините стручни квалитети туку затоа што му е сопруга на човек кој му помогнал на некојси Зоран Заев да стане градоначалник на Струмица“?

Можеби јавноста и не ја памети по некој судски процес, но затоа Георгиева е добро ситуирана, иако нема доволно образложенија во анкетниот лист, како таа и сопругот се стекнале со богатствата.

Луксузните возила „БМВ“, „Ауди“ и „Инфинити“ се дел од возниот парк на Георгиеви, со кои Лорета се пофалила во анкетниот лист. Нејзините деца, како и децата на Рашковски и на Дамева. исто така имаат богати девизни штедни книшки, но Горгиева не навела дали тие имаат по 15.000 евра или во друга валута. Таа и самата пријавила на своја сметка депозити тешки околу 3 милиони денари, а заедно со сопругот пријавила 9 имоти и куќи на подрачјето на Струмица. Нејзиниот сопруг има дадено на заем околу 10 милиони денари, а истиот зел кредит вреден 200.000 евра. Кому е даден заемот и од кого е земен кредитот не е наведено и осанува дилемата зошто се прикриени овие информации и дали заради нив таа може да има судир на интереси.

Двојните аршини на „камшикарките“

Тоа се трите главни „камшикарки“ на судиите кои носат одлуки спротивни од вкусот на Заев, тие тргнаа во пресметка со судиите на скопска Апелација.

Генералниот секретар на Владата на Зоран Заев , Драги Рашковски, уште на почетокот на 2021 година беше осомничен дека набавувал непотребен софтвер со државни пари и со тоа нанел значителна штета на буџетот, а неговите деца прилично се збогатиле. За кратко влезе и во затворски и во куќен притвор, а од тогаш поминаа цели две години и нема никаква пресуда за прилично едноставен предмет.

Тоа што завршницата за овој предмет не е ниту на повидок, за „камшикарките“ од Судскиот совет не е повод да покренат вонреден инспекциски надзор зошто рочиштата за Рашковски се закажуваат еднаш во месецот.

Помина и повеќе од една година откако вториот генерален секретар на Зоран Заев, Мухамед Зекири, беше обвинет за тежок криминал вреден стотици илјади евра. Ни тој предмет не е ниту блиску до завршница. Нема медиумски прозивки, нема згрозувачки реакции од Заев и од Пендаровски за развлекување на предметот и нормално нема реакција од „камшикарките“.

Нема реакција ниту за постапувањето на врховните судии кои со години не носат одлука по барањата за вонреден правен лек од страна на лицата осудени за тероризам за упадот на 27 април. Судскиот совет не помислува да изврши контрола зошто Врховниот суд не се произнесува, иако десетици луѓе со години не може да си ги видат семејствата и го губат здравјето по затвори. За истиот случај судот во Шведска процени дека е политички, а за посериозен инцидент кога во Конгресот во САД имаше и жртви, од тамошните судови беа изречени драстично пониски казни.

Наместо заклучок

Нема да си дозволиме да го оценуваме извештајот на Судскиот совет по работната посета на Апелациониот суд во Скопје. Иако јавноста со право се нарекува „четврта власт“, правосудните институции постапуваат (или би требало да постапуваат) во строго форматирани постапки и така донесуваат пресуди, одлуки, заклучоци, извештаи и други акти. На увид и на оценување на „четвртата власт“, според нашето чувство за фер однос и справедливост, се само оние одлуки во кои спротивставените страни имале фер третман и еднаков пристап до јавноста.

Секогаш кога ќе оцени дека страните во судските постапки не се третирани фер, Плусинфо им овозможува пристап кон јавноста, со цел засегнатите страни да ги изнесат своите аргументи. Затоа нашите анализи на повеќе спорни судски предмети со т.н. висок сензибилитет, како што беа и анализите за „Таргет-Тврдина“, подоцна беа потврдувани со судски пресуди.

Во случајот на „камшикувањето“ на Апелациониот суд во Скопје, во овој момент, без да навлегуваме во материјална расправа за извештајот – уште помалку во оценувањето на интегритетот и во хајката врз еден судија за кој не знаеме дали воопшто има основано сомневање вака да биде изложен на столбот на срамот – можеме само да кажеме дека јасно и недвосмислено се препознава ракописот на големиот манипулатор и „камшикар“ во политиката, Зоран Заев.

Во следните анализи на Заевиот поход на Бихаќка, но и на неговите обиди да пронајде нови сојузници на македонската политичка сцена за да го оствари својот пеколен план, ќе се осврнеме и на причините поради кои тој сѐ уште жестоко притиска врз своите инсталации во правосудството. Но, нашиот впечаток е дека на голем дел од луѓето во фелата сепак им е јасно дека влијанието на Струмичанецот опаѓа и дека тој се помалку ќе биде кадијата што тужи и што суди. Времето на Заев минува. Тоа им е јасно и на неговите „камшикарки“ и „камшикари“ во судството. Освен на оние што не можат да излезат од својата тесна кожа.

The post КОИ СЕ И ШТО ПРАВАТ ЗАЕВИТЕ „КАМШИКАРКИ“ ОД СУДСКИОТ СОВЕТ? Весна, Тања и Лорета ги дисциплинираат судиите appeared first on plusinfo.mk.