Почната е постапката за претквалификација на изведувачи за првата линија на брзиот автобуски превоз (БРТ) во Скопје. Градоначалникот на Скопје Орце Ѓорѓиевски го соопшти ова по средбата со делегација на Бордот на директори на Европската банка за обнова и развој (ЕБОР).

На средбата се разговарало и за пречистителната станица за отпадни води во Трубарево, како и за реализацијата на Зелениот акциски план за Скопје.

„Веќе е започната постапката за претквалификација на изведувачи за Линија 1, а паралелно продолжуваат активностите за обезбедување стручна поддршка за реализација на проектот“, напиша Ѓорѓиевски во објавата.

Според градоначалникот, БРТ треба да овозможи побрз и посигурен јавен превоз, со помал сообраќаен метеж и со помало загадување.

„Скопјани заслужуваат побрз, посигурен и поквалитетен јавен превоз“, порача тој во писмената објава.

Ѓорѓиевски наведе дека со делегацијата на ЕБОР разговарал за стратешките инвестиции и за продолжување на соработката со банката.

„Секој проект мора да решава вистински проблем, а секоја инвестиција да носи конкретна придобивка за скопјани“, напиша градоначалникот.

Посебна тема била пречистителната станица за отпадни води во Трубарево. Ѓорѓиевски ја посочи како значајна инвестиција за заштитата на водите, животната средина и за здравјето на граѓаните.

Разговорите со ЕБОР ја опфатиле и модернизацијата на градската инфраструктура, како и подобрувањето на енергетската ефикасност.

„Ја потврдив и определбата за понатамошна соработка во модернизацијата на инфраструктурата, енергетската ефикасност и реализацијата на Зелениот акциски план за Скопје“, напиша Ѓорѓиевски.

Градоначалникот ѝ се заблагодарил на делегацијата на ЕБОР за посетата и за досегашната поддршка на проектите во Скопје.

The post ПОЧНА ПОСТАПКАТА ЗA ИЗБОР НА ИЗВЕДУВАЧИ ЗА БРТ Ѓорѓиевски со ЕБОР ги отвори и проектите за Трубарево и за Зелениот акциски план appeared first on plusinfo.mk.

Ветерните електрани обично се проектираат според едноставен принцип: лопатките се поставуваат на места каде што дува најсилен ветер, а роторот се користи за да се извлече што е можно повеќе енергија.

Но, инженерите од Политехничкиот универзитет во Лоѓ, Полска, испитувале поинаков пристап. Наместо роторот да остане изложен на воздушниот проток, тие го опкружиле со специјално обликуван дифузор, кој завршува со проширен прстенест раб.

Според истражувањето објавено во научното списание International Journal of Numerical Methods for Heat & Fluid Flow, ветерна турбина со дифузор (DAWT) била тестирана во аеродинамички тунел. Во исти услови, таа произвела до 70–75 отсто повеќе енергија од идентичен ротор без насочувач на воздухот.

Овој резултат, сепак, не значи дека едноставното додавање голем прстен на која било ветерна турбина автоматски ќе го зголеми производството на електрична енергија за три четвртини.

Експериментот бил спроведен со мал модел во контролирани лабораториски услови. Сепак, резултатите покажале дека внимателно насочениот воздушен проток потенцијално може да ја зголеми ефикасноста на компактните турбини, особено во подрачја со релативно слаби ветрови.

Идејата зад необичниот насочувач на воздухот

Целта на инженерите била да ја зголемат количината воздух што минува низ работната зона на турбината. За да го постигнат тоа, роторот го поставиле во дифузор кој, во суштина, формира краток аеродинамички канал околу лопатките.

Каналот се проширува кон задниот дел и завршува со прстенест раб, односно прирабница, што е клучна карактеристика на дизајнот. При минувањето на воздухот низ дифузорот се создава зона со понизок притисок зад роторот.

Во истражувањето, објавено во списанието Renewable Energy, научниците ги споредиле перформансите на самостоен ротор со оние на истиот ротор опремен со дифузор и проширен раб. Притоа ги мереле брзината на вртење, вртежниот момент и оптоварувањето на лопатките.

Експериментите покажале дека дифузорот го менува воздушниот проток што стигнува до роторот и влијае врз однесувањето на лопатките.

Овој концепт не е целосно нов. Јапонски истражувачи претходно развиле слични решенија, познати како „ветерни леќи“ (wind lens), со цел да ја зголемат количината воздух што минува низ турбината. При тестирањето на ветерна турбина со дифузор од три киловати, истражувачите го испитувале однесувањето на лопатките при брзина на ветерот од 6,9 до 11,6 метри во секунда.

Што се случило во аеродинамичкиот тунел?

Тестирањето било спроведено во мал подзвучен аеродинамички тунел во Институтот за турбомашини при Политехничкиот универзитет во Лоѓ. Роторот бил анализиран со и без насочувач на воздухот, а коефициентот на моќност бил прикажан во зависност од брзината на врвовите на лопатките.

Зголемувањето на моќноста било поврзано со поголемиот проток на воздух низ дифузорот. Мерењата покажале и дека распределбата на притисокот и брзината на воздухот во близина на проширениот дел влијаат врз работењето на целиот систем.

Подоцнежни истражувања испитувале како обликот на прстенестиот раб влијае врз овој ефект. Во студија од 2017 година, објавена во списанието Alexandria Engineering Journal, научниците користеле компјутерска динамика на флуиди за да испитаат различни агли на работ.

Тие утврдиле дека вртлозите што се создаваат зад прстенестиот раб можат да формираат зона со уште понизок притисок зад дифузорот, со што се поттикнува вовлекување поголема количина воздух низ уредот.

Симулациите покажале дека промената на геометријата на работ директно го менува протокот на воздух низ дифузорот и областа околу роторот. Наодите укажуваат дека прстенестиот насочувач не служи само како заштита за роторот, туку со својот облик активно влијае врз околниот воздух и ја зголемува количината воздух што минува низ лопатките.

Перспективна идеја со практични ограничувања

Истражувањето ја разгледувало и можноста за примена на овој концепт кај малите ветерни турбини. Во тој период, на институтот се развивала турбина со дифузор од три киловати, наменета за работа во услови на послаб ветер.

Таквата турбина би можела да биде корисна во подрачја каде што конвенционалните турбини потешко ја претвораат енергијата на слабите ветрови во електрична енергија.

Со создавање разлика во притисокот околу насочувачот, дифузорот го засилува протокот на воздух кон роторот. Така, во соодветни услови, и мал ротор би можел да произведува значително количество енергија.

Сепак, овој дизајн има и недостатоци. Прстенестиот насочувач значително ја зголемува тежината и вкупните димензии на турбината. Поради проширениот облик, тој е изложен и на поголеми аеродинамички сили и оптоварувања од ветерот.

Турбините во реални услови мора да се приспособуваат на променливи правци на ветерот, турбуленции и механички оптоварувања што не можат целосно да се пресликаат во лабораторија.

И покрај овие ограничувања, експериментот укажува на интересна можност: наместо само да ги зголемуваат лопатките или брзината на вртење, инженерите можат активно да го обликуваат воздушниот проток околу роторот.

Лабораторискиот тест покажал дека проширениот прстенест насочувач може значително да го зголеми протокот на воздух и да го подобри производството на енергија. Колкав би бил ефектот во реални услови, сепак, треба дополнително да се утврди.

The post ДОДАЛЕ ОБИЧЕН ПРСТЕН НА ВЕТЕРНИЦА И ДОБИЛЕ 75 ОТСТО ПОВЕЌЕ СТРУЈА Инженери тестираа нов начин за искористување на ветерот appeared first on plusinfo.mk.

ФЕРО ИНВЕСТ и ЕМС (Energy Maintenance Solutions) учествуваа на Меѓународната конференција „ЕНЕРГЕТИКА 2026“ на ЗЕМАК во Струга, каде дел од стручниот придонес на компаниите беше насочен кон една од најактуелните области во енергетиката – батериските системи за складирање на електрична енергија и нивната интеграција со производството од обновливи извори.

Во рамките на конференциската програма, Стефани Георгиевска, електроинженер во Сектор Солар во ФЕРО ИНВЕСТ, го презентираше стручниот труд „Интеграција на систем за складирање на електрична енергија во фотоволтаична централа – техничка и економска анализа“.

Трудот беше базиран на конкретен проект реализиран од ФЕРО ИНВЕСТ – изведена фотоволтаична централа со интегриран батериски систем, и преку практичен пример ја анализираше интеграцијата на батериските системи од два клучни аспекта – технички и економски.

На тој начин беа претставени реални инженерски искуства и податоци од имплементирано решение, особено значајни во услови на зголемено производство на електрична енергија од обновливи извори и сè поголема потреба од нејзино ефикасно складирање и користење во периодите кога е најпотребна.

На темата за батериските системи се дискутираше и во рамки на панелот „Од обновлива кон сигурна енергија: Како складирањето ја менува енергетската иднина“, на кој учествуваше Војдан Андонов, раководител на Сектор Солар во ФЕРО ИНВЕСТ. Во фокусот беа улогата на складирањето на електричната енергија, интеграцијата на батериските системи со обновливите извори и нивното значење за поголема флексибилност и сигурност на електроенергетскиот систем.

ФЕРО ИНВЕСТ во изминатиот период го развива својот инженерски капацитет во областа на батериските системи, со пристап кој го опфаќа целиот процес – од анализа и проектирање, избор и димензионирање на системот, до изведба, интеграција, пуштање во работа, мониторинг и одржување. На тој начин, батериските системи се третираат како интегрален дел од енергетското решение, а не само како дополнителна опрема на фотоволтаичната централа.

На конференцијата ФЕРО ИНВЕСТ и компаниите од групацијата беа претставени и преку изложбен штанд, додека ЕМС (Energy Maintenance Solutions) беше и спонзор на настанот. ЕМС е македонска компанија од групацијата ФЕРО ИНВЕСТ специјализирана за изведување на енергетски објекти, како и за технички прегледи, испитување, анализа и одржување, обезбедувајќи стручна поддршка во различни фази од нивниот животен циклус.

Со учеството на „ЕНЕРГЕТИКА 2026“, инженерите на ФЕРО ИНВЕСТ беа дел од стручната размена на знаење и искуство за прашања кои стануваат сè позначајни со забрзаниот развој на обновливите извори на енергија и потребата од нивна сигурна и ефикасна интеграција во електроенергетскиот систем.

The post БАТЕРИСКИТЕ СИСТЕМИ ВО ФОКУСОТ НА СТРУЧНИОТ ПРИДОНЕС НА ФЕРО ИНВЕСТ НА „ЕНЕРГЕТИКА 2026“ appeared first on plusinfo.mk.

Енергетската заедница позитивно го оцени напредокот на земјава во спроведувањето на Националниот план за енергија и клима, а до 2030 година е предвидено обновливите извори да учествуваат со 38 отсто во финалната потрошувачка на енергија

Македонија го забрзува развојот на обновливите извори на енергија, а динамиката на зголемување на инсталираните капацитети веќе е над националната цел и индикативната траекторија предвидени со Националниот план за енергија и клима (НПЕК).

Ова е нотирано во последниот извештај на Енергетската заедница за спроведувањето на националните планови за енергија и клима и напредокот кон енергетските и климатските цели во 2025 година.

Енергетската заедница е меѓународна организација во која членуваат ЕУ и девет земји што не се членки на ЕУ, меѓу кои е и Македонија. Основана е со Договорот за основање на Енергетската заедница, потпишан во 2005 година, а целта е земјите членки постепено да ги усогласат своите енергетски пазари и правила со оние на ЕУ.

Сонцето и водата со сè поголема улога

Најголем придонес во зголемувањето на производството од обновливи извори имаат фотонапонските и хидроенергетските капацитети. Со нивниот развој, расте и учеството на чистата енергија во домашното производство на електрична енергија.

Според НПЕК, Македонија до 2030 година треба да достигне 38 отсто удел на енергијата од обновливи извори во бруто финалната потрошувачка на енергија. Целта опфаќа три клучни сектори – производство на електрична енергија, греење и ладење и транспорт.

Националните цели, според оценката на Енергетската заедница, се усогласени со нејзината рамка и ги исполнуваат минималните барања во четирите категории опфатени со НПЕК.

Фокусот се префрла и кон складирање

Покрај изградбата на нови капацитети за производство на зелена енергија, во следниот период приоритет ќе бидат и намалувањето на примарната потрошувачка на енергија и зголемувањето на енергетската ефикасност.

Министерството за енергетика, рударство и минерални суровини најавува и мерки за модернизација на енергетскиот систем, меѓу кои пазарно поврзување, поголемо учество на потрошувачите, сопствено производство и потрошувачка на електрична енергија, како и развој на енергетски заедници.

Во фокусот се и системите за складирање електрична енергија и паметните мерни системи, кои треба да овозможат поголема флексибилност на мрежата и подобро искористување на производството од обновливи извори.

Министерството навреме го доставило извештајот за напредокот во спроведувањето на НПЕК до Енергетската заедница, што е дел од обврските на земјата. Од министерството оценуваат дека досегашните активности го насочуваат енергетскиот сектор кон поголема енергетска сигурност, зголемено домашно производство од обновливи извори и поефикасен систем.

The post МАКЕДОНИЈА ГИ НАДМИНА ПЛАНОВИТЕ ЗА ЕНЕРГЕТСКА ТРАНЗИЦИЈА КОН ОБНОВЛИВИ ИЗВОРИ Констатација на меѓународната Енергетска заедница appeared first on plusinfo.mk.

Новата централна зграда на Стопанска банка е првиот објект во земјата што доби LEED Gold сертификат, една од најпрестижните светски сертификации за одржливост во градежништвото.

„Постигнувањето го позиционира овој проект како пример за одржлив развој во нашата земја и ја демонстрира долгорочната посветеност на Банката кон заштитата на животната средина, иновациите и благосостојбата на вработените и клиентите“, велат од Стопанска банка.

LEED претставува кратенка за „Leadership in Energy and Environmental Design“ (Лидерство во енергетски и еколошки дизајн) и е глобално признат систем за сертификација, а развиен од Американскиот совет за зелени градби (U.S. Green Building Council). Неговата цел е да промовира поздрави, поефикасни и еколошки објекти.

„Со оглед на тоа што изградениот простор е одговорен за речиси 40 отсто од глобалните емисии на јаглерод диоксид и значителна потрошувачка на суровини, одржливата градба повеќе не е исклучок, туку неопходност за иднината на нашите градови и заедници“, се вели во соопштението.

Според написот, седиштето на Стопанска банка ги отсликува овие принципи, поставувајќи нови стандарди за начинот на кој се проектираат, градат и управуваат објектите во Скопје.

„Проектот постигна високи резултати во повеќе категории на LEED, вклучувајќи: ефикасност на искористување на водата, енергијата и атмосферата, материјали и ресурси, квалитет на внатрешната средина, одржливи локации, локација и транспорт, иновации и регионален приоритет.

Преку стратегии, како значително намалување на потрошувачката на вода во затворен и надворешен простор, висока оптимизација на енергетската ефикасност, примена на обновливи извори на енергија и одговорно управување со градежниот отпад и рециклирањето, зградата значително го намалува својот еколошки отпечаток, истовремено создавајќи поздрава и поудобна внатрешна средина за вработените на Стопанска банка“.

Одржливите принципи во објектот биле интегрирани уште од најраните фази на проектирање.

„Ефикасните системи за греење, вентилација и климатизација (HVAC), осветлувањето, еколошки одговорните материјали, производите со ниски емисии, водоефикасните инсталации и внимателно избраните градежни решенија беа координирани во согласност со LEED барањата. Постигнувањето на оваа сертификација бараше блиска соработка меѓу архитекти, инженери, технички консултанти, изведувачи, производители и LEED консултанти во текот на сите фази од проектот – од концепт до финална изведба и пуштање во употреба“, соопшти Банката.

По повод ова постигнување,  Хрисула Кутуди, генерален извршен директор и претседател на Управниот одбор на Стопанска банка, изјави:

– Развојот на нашето ново седиште, покрај градежниот проект, го означува и нашиот пат на трансформација. Заедно со сите наши партнери и со вредната и значителна поддршка на NBG Групацијата, поставивме цел да изградиме објект што ги исполнува највисоките меѓународни стандарди, а воедно ги одразува и нашите вредности како одговорна институција. Добивањето на LEED Gold сертификацијата е доказ за посветеноста, експертизата и соработката на сите инволвирани страни. Исклучително сум горда на проектниот тим на Стопанска банка, чија посветеност беше непоколеблива и клучна за оваа визија да стане реалност.

Банката порачува дека новото седиште лоцирано во срцето на Скопје претставува повеќе од само сертифицирана зграда, туку уште повеќе, симболизира визија насочена кон иднината на градот.

„Проектот ја одразува посветеноста на Банката кон одговорни инвестиции, грижа за животната средина и благосостојбата на вработените, клиентите и пошироката заедница, зацврстувајќи ја позицијата на Стопанска банка како лидер, не само во банкарството, туку и во одржливите корпоративни практики.

Како прва LEED-сертифицирана зграда во Скопје, таа поставува значаен пример за идните проекти и придонесува за подигање на свеста за одржливите градежни практики во регионот“, порачува Стопанска банка.

The post НОВОТО СЕДИШТЕ НА СТОПАНСКА БАНКА Е ПРВ LEED GOLD ОБЈЕКТ ВО ЗЕМЈАТА Скопје добива симбол на екоодржлива градба appeared first on plusinfo.mk.

Владата го усвои Интегрираниот национален план за енергија и клима 2025–2030 – стратешки документ што ја поставува државата на јасна патека кон енергетска трансформација, одржлив развој и целосно усогласување со европските политики, информира Министерството за енергетика, рударство и минерални суровини.

Планот претставува клучен инструмент за модернизација на енергетскиот сектор и исполнување на обврските од Енергетската заедница и европската регулатива. Тој содржи 61 мерка во чиј фокус се намалување на емисиите на стакленички гасови, зголемување на обновливите извори на енергија и значително подобрување на енергетската ефикасност.

– 26 мерки се за декарбонизација, 20 за енергетска ефикасност,3 за енергетска безбедност, 11 за внатрешен пазар на енергија и1 за истражување, иновации и конкурентност – појаснуваат од Министерството.

Оттаму додаваат дека во наредниот период ќе се преземат конкретни чекори за засилени инвестиции во сончева, ветерна и хидроенергија, за воведување систем за цена на јаглерод, согласно европските стандарди, развој на складирање на енергија и модерна енергетска инфраструктура, како и за  постепено напуштање на јагленот како енергенс.

– Паралелно, се зајакнува енергетската безбедност преку диверзификација на изворите, регионална соработка и нови интерконекции, како и понатамошна либерализација и интеграција на пазарот на електрична енергија – велат од Министерството.

Планот е резултат на широк и транспарентен процес во кој учествуваа институции, експерти, академската заедница, приватниот сектор и меѓународни партнери. Во неговата подготовка се вградени и препораките на Секретаријатот на Енергетската заедница, како и најновите европски политики.

За документот е спроведена и Стратегиска оцена на влијанието врз животната средина, која ги анализира ефектите врз воздухот, водите, почвата, биодиверзитетот, климатските промени и здравјето на граѓаните. Извештајот е прифатен од надлежните институции, по спроведени јавни расправи и консултации, вклучително и со соседните држави.

Со имплементацијата на Планот се очекува значително подобрување на квалитетот на животната средина, поголема енергетска стабилност и независност, нов инвестициски циклус во енергетиката, забрзана зелена транзиција и економски развој.

The post 61 МЕРКА ЗА ЕНЕРГЕТСКА НЕЗАВИСНОСТ НА ЗЕМЈАТА Усвоен е Национален план за енергија и клима до 2030 година appeared first on plusinfo.mk.

Над половина од ваучерите за инвертер клими веќе се подигнати, а процесот се одвива со засилена динамика низ цела држава, информираа од Министерството за енергетика, рударство и минерални суровини.

Од вкупно 4.070 доделени ваучери, во периодот од 18 до 25 март подигнати се 2.084, што претставува повеќе од 50 проценти од предвидените, покажуваат податоците добиени од меѓуопштинските центри за социјална работа.

„Процесот на подигнување на ваучерите се одвива непречено и со засилена динамика на терен. Дневната динамика покажува континуиран интерес и зголемена активност кај граѓаните во сите општини низ државата“, информираат од Министерството.

Оттаму посочуваат дека податоците потврдуваат ефикасна реализација без застои и во согласност со предвидената динамика.

Граѓаните кои се наоѓаат на објавениот список можат да ги подигнат ваучерите во меѓуопштинските центри за социјална работа во општината каде што живеат најдоцна до 17 април 2026 година. По подигнувањето, тие ќе може да се искористат кај компаниите со кои Министерството има склучено договори.

„Со ваучерот граѓаните добиваат можност за набавка и вградување на инвертер клима уред со моќност од 3,5 kW и најмалку енергетска класа А+, во вредност до 28.000 денари, без дополнителна доплата“, наведуваат од Министерството.

https://energy.gov.mk/mk-MK/odnosi-so-javnost/rezultati-i-spisoci

Ваучерите може да се искористат најдоцна до 15 октомври 2026 година, а мерката е дел од Програмата за заштита на ранливи потрошувачи на енергија.

„Продолжуваме со интензивна реализација на мерките за поддршка на ранливите категории граѓани, со цел намалување на трошоците за енергија и подобрување на енергетската ефикасност во домаќинствата“, додаваат од Министерството.

The post БЕЗ ДОПЛАТА ДО НОВА КЛИМА Над 50 проценти од ваучерите веќе подигнати appeared first on plusinfo.mk.

Започна распределбата на ваучерите за набавка и вградување на инвертер клима уреди за граѓаните кои се стекнале со право по Јавниот оглас за 2025 година. Од денеска до 17 април 2026 година, лицата кои се наоѓаат на списокот ќе можат да ги подигнат ваучерите во меѓуопштинските центри за социјална работа во општината каде што живеат.

Ваучерот овозможува набавка и вградување на инвертер клима уред со моќност од 3,5 киловати и најмалку енергетска класа А+, а може да се искористи најдоцна до 15 октомври годинава. Вредноста на ваучерот изнесува до 28.000 денари, без дополнителна доплата од страна на корисниците.

На веб-страницата на Министерството за енергетика, рударство и минерални суровини (МЕРМС) објавени се сите детали за потребната документација и постапката за подигнување, како и списокот на компании со кои се склучени договори, од кои граѓаните ќе можат да ги набават инвертер клима уредите користејќи го ваучерот.

– Станува збор за втора фаза од веќе завршената постапка, во која право на поддршка имаа исклучиво домаќинствата кои најдоцна до 5 октомври 2025 година поднеле барање, доставиле комплетна документација и ги исполниле условите утврдени во Програмата за заштита на ранливи потрошувачи на енергија – информира прес-службата на МЕРМС.

Списокот на граѓани кои се стекнале со право, како и списокот на компании, се достапни на веб-страницата на Министерството: https://energy.gov.mk/mk-MK/odnosi-so-javnost/rezultati-i-spisoci

Министерството нагласува дека оваа фаза се однесува исклучиво на граѓаните кои веќе аплицирале во 2025 година и претставува финализација на постапката, во рамки на која се доделуваат вкупно 4.070 ваучери.

– Со оваа мерка државата продолжува со конкретна поддршка на ранливите категории граѓани, обезбедувајќи пониски трошоци за енергија и повисока енергетска ефикасност во домаќинствата – информира МЕРМС.

The post ПОЧНА ПОДЕЛБАТА НА ВАУЧЕРИ До 28.000 денари за инвертер клима без доплата appeared first on plusinfo.mk.

Премиерот Христијан Мицкоски, придружуван од висока владина делегација, од утре ќе учествува на 56 годишен состанок на Светскиот економски форум (WEF) во Давос, Швајцарија.

Овогодишниот форум, кој се одржува под мотото „Во духот на дијалог“, обединува над 65 шефови на држави и влади, со цел изнаоѓање решенија за најгорливите глобални предизвици.

Мицкоски, како што е најавено, ќе оствари серија билатерални средби со претставници на водечки светски корпорации и финансиски институции, презентирајќи ги поволностите за инвестирање во македонската економија, со посебен фокус на енергетиката и технологијата.

На панел дискусиите поврзани со одржливиот развој, во кои ќе учествува македонската делегација, како што информираат од владината прес-служба, ќе ги презентира стратешките планови за енергетска трансформација и инфраструктурно поврзување на регионот.

За време на самитот, премиерот Мицкоски е предвидено да учествува на затворени сесии за лидери, како и на јавни дебати фокусирани на вештачката интелигенција, енергетиката и новите патишта за економски раст во Европа.

Владината делегација во Давос ќе оствари средби и со високи државни претставници и претставници на меѓународните организации, со цел забрзување на реформските процеси и обезбедување поддршка за клучните национални проекти.

The post МИЦКОСКИ НА СВЕТСКИОТ ЕКОНОМСКИ ФОРУМ ВО ДАВОС Предвидени се билатерални средби и затворени сесии со светски лидери appeared first on plusinfo.mk.

Ќе се зголеми прагот за електраните на домаќинствата или потрошувачите-производители на 10 kW и истовремено ќе се скрати рокот за издавање дозволи за инсталација на кровни фотоволтаици. За првпат во законската регулатива се предлага да се воведе законски рок за административната постапка за издавање дозволи за поставување кровни фотоволтаици за потрошувач – производител. Овие измени се предвидуваат во предлозите за изменување и дополнување на Законот за енергетска ефикасност што Министерството за енергетика, рударство и минерални суровини (МЕРМС) ги објави на ener.gov.mk

Рокот од еден месец ќе се однесува на постапката за издавање дозвола за поставување соларна опрема со капацитет до 100 kW, како и за потрошувач-производител на обновлива енергија и за заедници на обновлива енергија. Со измените, потрошувачите-производители добија повисоки прагови за своите електрани и тоа за домаќинствата лимитот е до 10 kW, а за компаниите 70 kW.

Со предлог измените се поедноставува и постапката за приклучување на електродистрибутивната мрежа на потрошувач-производител кој користи обновливи извори на енергија (ОИЕ). Доколку при анализа на условите за приклучување се утврди дека не е можно приклучување на предложената локација, операторот на електродистрибутивниот систем е должен во рок од 15 дена од денот на поднесување на барањето за приклучок, писмено да го извести барателот и да му предложи алтернативна точка за приклучување, врз основа на технички и безбедносни причини или некомпатибилност на компонентите на системот. Операторот на електродистрибутивниот систем е должен да го приклучи енергетскиот објект на електродистрибутивната мрежа во рок од еден месец од официјалното потврдување на комплетноста на поднесената документација. Доколку операторот на електродистрибутивниот систем не се произнесе во рокот од мрежните правила се смета дека согласноста за приклучување е дадена.

Со ова предложено законско решение се прави решителен чекор кон енергетска независност и интеграција на обновливите извори на енергија, намалување на потрошувачката на енергија, емисиите на јаглерод диоксид, на азотни оксиди (NOx), неметански јаглеводороди и честички и усогласување со ЕУ стандардите.

Пакетот мерки истовремено ја јакне енергетската ефикасност и создава стабилна рамка за обновливите извори на енергија со директни економски и еколошки придобивки за граѓаните и бизнисите.

Документот е изработен по принципот енергетска ефикасност на прво место и со него се отвора јасен и практичен пат за побрза транзиција до почиста животна средина без да се загрози стабилноста на системот.

Министерството предлага и 20-годишна стратегија за реновирање на станбени, јавни и комерцијални згради со енергетски ефикасни решенија. Владата, на предлог на МЕРМС донесува и долгорочна стратегија за реконструкција на станбени, јавни и комерцијални згради, со која овие градби и станбени и деловни објекти ќе ги трансформира во високо енергетски ефикасни објекти со речиси нулта потрошувачка, со можност за широка интеграција на обновливи извори на енергија, како што се соларните системи.

Со имплеметација на обновливите извори на енергија ќе се намалуваат стакленичките гасови и се штити животната средина и се постигнува и климатската неутралност.

Тројно ќе се зголеми и заштедата во јавниот сектор, односно МЕРМС во соработка со Службата за општи и заеднички работи при Владата подготвува и предлог план за реконструкција на згради кои се користат во јавниот сектор, и тоа со реконструкција на најмалку 3% од корисната подна површина на зградите годишната заштеда на енергија се зголемува од 1% на 3%. Ова се однесува на објекти со вкупна корисна подна површина над 250 квадратни метри кои не ги исполнуваат минималните барања за енергетски карактеристики, а кои се користат од страна на лицата од јавниот сектор на државно ниво.

Инсталацијата на соларни колектори за топла вода во новите јавни објекти или при значајна реконструкција на објекти станува задолжителна, доколку е технички и економски изводливо.

МЕРМС воспоставува и финансиски механизми, јавни повици и едношалтерски систем за поддршка на проекти за енергетска ефикасност и ОИЕ, овозможувајќи инвестиции во соларни панели, геотермални системи и паметни технологии, како механизми за постигнување на целите на Стратегијата за реконструкција.

Јавниот сектор се обврзува да набавува производи, возила и згради со највисоки енергетски и еколошки стандарди, вклучувајќи сертификати за енергетски карактеристики, промовирајќи технологии со низок јаглероден отпечаток.

Измените влијаат и креирање можност за меѓуопштинска соработка за локален развој во општини со помалку од 15.000 жители. Тие можат да формираат заеднички тела за програми за енергетска ефикасност, и со усвојување на програма за енергетска ефикасност ќе добијат пристап и до Фондот за енергетска ефикасност.

The post ВО РОК ОД 1 МЕСЕЦ ЌЕ СЕ ИЗДАВААТ ДОЗВОЛИ ЗА КРОВНИ ФОТОВОЛТАИЦИ Се зголемува прагот за домаќинствата до 10 kW, а за компаниите 70 kW appeared first on plusinfo.mk.