Со 1,5 милијарди евра државата самостојно ќе ги гради „Чебрен“ и „Галиште“, за кои моментално се работи на физибилити студија, откако во изминатите триесетина години пропаднаа дури 14 тендери за изградба на овие значајни енергетски капацитети.

Ова денес на брифинг со медиумите го соопшти Претседателот на Владата, Христијан Мицкоски.

„Чебрен“ се наоѓа во клисурниот дел на Црна Река, оддалечено 81 км спротиводно од нејзиното устие во реката Вардар, во близина на селото Манастир, а околу 7 км спротиводно од Расимбегов Мост. На овој потег веќе е изградена ХЕ „Тиквеш“ со нормална кота на акумулацијата 265,00 м.н.в., додека за останатиот клисурен дел на Црна Река анализирани се повеќе решенија и варијанти за нејзино енергетско искористување. Воедно, во претходната студиска фаза на проектирање, усвоено е да се изградат две прибрански хидроелектрани со значаен акумулационен простор, и тоа: ХЕ „Галиште“ со нормална кота на акумулацијата 392,00 м.н.в., и ХЕ „Чебрен“ со кота на акумулацијата 565,00 м.н.в.

Во февруари 2016 година, е објавен јавен повик во  Фајненшл тајмс (Financial Times) и на веб-страницата на МЖСПП за пројавување интерес за проектирање, изградба и концесионирање на ХЕ „Чебрен“ и ХЕ „Галиште“, при што се пристигнати 11 техничко-економски решенија од заинтересирани компании. Во февруари 2017 година изработена е Префизибилити Студија за испитување на оптимално енергетско искористување на потегот на Црна река узводно од ХЕ Тиквеш.

Расположливиот потенцијал на Црна Река досега е искористен само со изградбата на високата брана „Тиквеш“, а тоа е всушност долниот дел од клисурниот потег на Црна Река. Спротиводните акумулации „Галиште“ и „Чебрен“ имаат исклучиво енергетско значење, со услови за формирање на големи акумулации, (особено акумулацијата „Чебрен“ ) и за израмнување на протечните води на Црна Река, сè со цел нивно целосно искористување.

„Галиште“ е во средишниот дел на клисурниот потег на Црна Река, се наоѓа на самиот почеток на постојната акумулација „Тиквеш“, односно 54 км спротиводно од вливот на Црна Река во реката Вардар. ХЕ Галиште е проектирана со инсталирана моќност од 193,5 MW. Ќе работи како вршна електрана, при што волуменот на акумулацијата дозволува сезонско префрлање на протекувањата на вода. Во согласност со анализите што произлегуваат од  физибилити студијата ХЕ „Галиште“ годишно е предвидено да произведува 262,5 GWh. Со изградба на браната „Галиште“ ќе се формира акумулација со вкупен волумен од 344 х 106 м3. Хидроенергетската постројка „Галиште“ е предвидено како прибранска, а високата брана се предвидува да биде од типот камено-насипана со централно глинено јадро.

Премиерот додаде дека се планира и изградба на гасни когенеративни централи за производство на електрична и топлинска енергија. Мицкоски откри дека се планира овие когенеративните централи да имаат приклучоци до секој дом за снабдување со енергија, но не откри локации каде би се наоѓале првите централи.

Со 400 милиони евра веќе се гради ветерниот парк кај Штип кој е најголемиот енергетски проект од обновливи извори во Северна Македонија. Паркот ќе се протега на територијата на општините Штип, Карбинци и Радовиш, а ќе произведува електрична енергија за снабдување на околу 100.000 домаќинства.

Премиерот соопшти дека се преговара за изградба на уште еден ваков ветерен парк на североистокот од државата, кој доколку се одобри ќе биде инвестиција од околу 800 милиони евра и значаен енергетски капацитет за овој регион од државата.

The post ДРЖАВАТА ГИ СЛУША ЕКСПЕРТИТЕ, САМА ЌЕ ГИ ГРАДИ „ЧЕБРЕН“ И „ГАЛИШТЕ“ Мицкоски најави инвестиција од 1,5 милијарди евра appeared first on plusinfo.mk.

Предизвиците во најголемата енергетска криза да ги претвориме во наша можност и да видиме што можеме заедно како Западен Балкан да испорачаме за Европа, за нашиот заеднички континент, порача денеска премиерот Христијан Мицкоски, во обраќањето на регионалниот форум за клима, енергетска транзиција и одржлив развој во Западен Балкан – МЕФ 2026, што се одржува во Скопје.

Денеска, посочи, ние го живееме токму тоа време на глобален енергетски предизвик и затоа овој форум денеска, со својот полн потенцијал, треба да даде идеи и заклучоци како понатаму и како овие предизвици да ги претвориме во наша можност.

– Западен Балкан во моментов (Босна и Херцеговина, Србија, Косово, Црна Гора, Албанија и Македонија) можат да понудат отприлика годишно производство од 260 терават-часови нови производни капацитети во делот на обновливата енергија. Или ако ова го помножиме со некои, да речеме, стотина евра по мегават-час, тоа значи дека на годишно ниво можеме како Западен Балкан да акумулираме бизнис, којшто е само една петтина од потребите на Европа, вреден 26 милијарди евра годишно. Кога на тоа ќе се додадат средствата потребни да се изградат овие капацитети, кога на ова ќе се додадат инвестициите во дистрибутивната и преносната мрежа, слободно оваа бројка триплирајте ја. Ова е тоа што можеме на годишно ниво да го понудиме за Европа и потребите на Европа – рече Мицкоски.

Тоа, оцени, е неповратен процес и само од нас зависи дали ние ќе го препознаеме и дали ќе успееме да се вклучиме во него.

– Дали ние како Западен Балкан ќе останеме да бидеме препознаени како регион којшто можеби понекогаш бара и милост, дали ќе ја заслужиме таа милост или не, тоа не зависи секогаш од нас, тоа е двонасочна улица, но ајде ние како Западен Балкан да ги понудиме овие можности – рече Мицкоски, најавувајќи дека за оваа нова енергетска иницијатива ќе зборува на самитот во Тиват на 4 и 5 јуни.

Имаме, посочи, знаење, капацитет, добро сме поврзани и можеме ова да го понудиме.

Идејата за иницијативата, како што рече, е од изјавата од претседателката на Европската комисија Урсула фон дер Лајен  на инвестицискиот форум во 2025 ЕУ-Западен Балкан, кога таа потенцираше дека „земјите од Западен Балкан можат да станат центри за производство, складирање и споделување чиста енергија со останатиот дел од Европа“.

Според премиерот Мицкоски, оваа иницијатива ќе даде одговор на сите предизвици со коишто се соочуваме и  ќе ни создаде можност да се развиваме.

Зборувајќи за енергетскиот потенцијал што ќе недостига во Европа и во светот, нагласи дека е важно дали ќе успееме тоа да го препознаеме и да привлечеме дел од ова парче бизнис.

Предвидувањата, наведе премиерот, се дека потребите од електрична енергија на европскиот континент до 2040 година ќе се зголемат за 22 проценти, отприлика 1.000 терават-часови годишно дополнително повеќе.

– И ова ќе недостига и ова ќе треба некој да го изгради, произведе и да го однесе до крајните потрошувачи. Но, само по себе изградбата на производните капацитети не е доволна. Туку треба да сте подготвени, треба покрај тоа што ги градите производните капацитети, да инвестирате и во преносната мрежа. Дистрибутивната и високонапонската преносна мрежа којашто, просекот вели, на европскиот континент во 40-тина, 50-тина проценти е постара од 40 години. Сето тоа има глад и жед за инвестиција, за нов капитал, така што кога сето ова ќе го заокружите и ќе го додадете на оние производни капацитети, тогаш слободно овие бројки за коишто јас денеска зборувам од аспект на пари, од аспект на бизнис, триплирајте ги. Тоа е отприлика потенцијалот со којшто денеска ние мораме да се справиме, односно претставува предизвик на човештвото – рече Мицкоски.

The post ДА ГРАДИМЕ КАПАЦИТЕТИ И ДА Ѝ ПРОДАВАМЕ СТРУЈА НА ЕВРОПА Со енергетика Западен Балкан може да добие бизнис вреден 26 милијарди евра годишно appeared first on plusinfo.mk.

Просечната цена на струјата на HUPX берзата за 28 мај 2026 изнесува 118,22 евра за мегават час, на МЕМО 106,25 евра за мегават час.

Согласно податоците за движењето на цените на берзата HUPX во Унгарија за 28 мај 2026 просечната часовна цена на еден мегават час електрична енергија (baseload) изнесува 118,22 евра/mwh, додека на MEMO цената е 106,25 евра/mwh.

Цената на електричната енергија во текот на дневните часови (9:00 – 15:00) (Power solar peak) на HUPX постигна ниво од 29,02 евра за мегават час, а на MEMO 16,26 евра.

Цена на Storage MAX, индекс кој ја покажува разликата помеѓу часовните берзански цени помеѓу 12 и 14 часот наспроти часовните берзански цени во периодот помеѓу 18 и 20 часот, изнесува 152,40 евра за мегават час.

Цената на природниот гас пак на унгарската берза CEEGEX изнесува 47,10 евра, додека цената според индексот на холандската берза, TTF Dutch е 46,19 евра.

Информациите за движењето на цената на електрична енергија и на природниот гас може да помогнат во попрецизно планирање на буџетите за потрошувачката на електрична енергија, да се заштеди на сметките за струја, како и компаниите да носат информирани деловни одлуки со кои што ќе ги намалат своите трошоци и поуспешно ќе ги реализираат своите бизнис планови.

The post МЕГАВАТ ЧАС СТРУЈА НА УНГАРСКАТА БЕРЗА ЧИНИ 118,2 ЕВРА На македонската берза МЕМО цената изнесува 106,25 appeared first on plusinfo.mk.

Во услови на глобални кризи, енергетиката повеќе не е само економско прашање, туку прашање на безбедност, стабилност и стратешка отпорност на државите, изјави во своето обраќање министерката за енергетика и рударство Сања Божиновска на Евроазискиот економски самит што се одржува во Истанбул, Турција..

-Изолацијата не е стратегија. Соработката е -рече Божиновска нагласувајќи дека земјава активно работи на диверзификација на енергетските извори, регионално поврзување, инвестиции во обновливи извори и модернизација на енергетската инфраструктура.

Според Божиновска, регионалната енергетска поврзаност на Балканот денес претставува геополитичка неопходност, а не само инфраструктурно прашање, а зелената транзиција мора да биде реална, праведна и социјално одговорна.

– Зелената транзиција не може да успее, ако создава енергетска сиромаштија и ги продлабочува нееднаквостите. Потребна е транзиција што ќе биде истовремено и одржлива и праведна -рече Божиновска.

Таа се осврна и на важноста од регионална соработка, стабилни партнерства и забрзана интеграција, потенцирајќи дека малите држави не смеат да бидат пасивни набљудувачи на глобалните промени, туку активни учесници во нивното обликување.

Годинешниот Евроазиски економски самит се одржа под мотото „Global Responsibility – The Post-War World with War, Terrorism, Conflict, and Involuntary Migration“, а во фокусот на дискусиите беа глобалната енергетска безбедност, новите геополитички односи, климатските предизвици, недостигот на вода и зеленило, како и економските и социјалните последици од светските конфликти и миграции.

Самитот во Истанбул собра политички лидери, министри, дипломати, академици, претставници на бизнис секторот и граѓански организации од повеќе континенти, со цел отворање нов дијалог за поодржлива, постабилна и покооперативна иднина.

The post МАКЕДОНИЈА ДЕЛ ОД ГЛОБАЛНАТА ДЕБАТА ЗА НОВИОТ СВЕТСКИ ПОРЕДОК Енергијата не е само економско прашање, туку основа за стратешка отпорност на земјите appeared first on plusinfo.mk.

Поранешниот генерален директор на АД МЕПСО, Куштрим Рамадани, кој доаѓа од редовите на ДУИ, во емисијата „Бизнис21“ на ТВ21, околу проектот Интерконекција Северна Македонија – Албанија и договорот со компанијата Енергоинвест од Босна и Херцеговина, беше категоричен, изјавувајќи:

– Немаа активности на терен. Во договорните услови нема простор за зголемување на цената; договорот е lump sum, со фиксни и непроменливи цени, затоа ниту сум им дал простор на компанијата Енергоинвест за разговори за зголемување на цените – договорот не дозволува такво нешто.

Компанијата од Босна и Херцеговина имала само мала канцеларија, со еден вработен и контакт телефон на кој никој не се јавувал, вели тој и додава:

– Со длабоко убедување велам дека јас би го раскинал тој договор!

The post „И ЈАС БИ ГО РАСКИНАЛ“ Поранешен директор на МЕПСО од ДУИ сведочи за спорниот договор за интерконекцијата со Албанија appeared first on plusinfo.mk.

Унапредувањето на соработката во енергетскиот сектор, со акцент на енергетската безбедност и стабилност на снабдувањето, диверзификацијата на енергетските извори, како и развој на стратешки инфраструктурни проекти од заеднички интерес, биле дел од разговорот што министерката за енергетика, рударство и минерални суровини Сања Божиновска го имаше со  Jarrod Agen, заменик-советник на претседателот Доналд Трамп и извршен директор на Националниот совет за енергетска доминација на САД.

Како што соопшти министерството за енергетика, Божиновска ја истакнала подготвеноста на земјава за продлабочување на соработката и реализација на конкретни иницијативи, нагласувајќи дека партнерството со САД претставува значаен фактор за долгорочна стабилност и развој на енергетскиот сектор.

Извршниот директор на Националниот совет за енергетска доминација на САД, Аген, пак истакнал дека меѓу двете земји постојат толку многу можности за соработка што можат да го променат енергетскиот пејзаж во регионот.

Соговорниците се согласиле дека постои јасен потенцијал за интензивирање на соработката, со фокус на проекти кои ќе донесат конкретни резултати и ќе придонесат за економски развој и енергетска сигурност на двете земји.

Jarrod Agen е висок функционер со значајна улога во креирањето и координацијата на енергетските политики на САД, со директен увид во стратешките приоритети и развојните процеси во секторот. Неговото искуство и познавање на глобалните енергетски текови претставуваат важна основа за развој на идни партнерства и проекти.

Средба е дел од серијата билатерални средби на министерката Божиновска, која како дел од високата владина делегација на втората сесија од Стратешкиот дијалог меѓу двете земји, каде се разговара за унапредување на соработката со САД во повеќе клучни области: енергетика, економија, безбедност и технологија.

The post МОЖЕ ЛИ ДА СЕ ПРОМЕНИ ЕНЕРГЕТСКИОТ ПЕЈЗАЖ НА РЕГИОНОТ? Божиновска ги презентира енергетските приоритети на средбите во САД appeared first on plusinfo.mk.

Просечната цена на електричната енергија на регионалните берзи останува над 100 евра за мегават-час, покажува најновиот извештај на Energy Delivery Solutions (ЕДС). Според компанијата, на унгарската берза HUPX цената за 3 април 2026 година изнесува 108,30 евра за мегават-час, додека на македонската берза МЕМО достигнува 116,17 евра.

Од ЕДС информираат дека, согласно податоците за движењето на цените, просечната часовна цена на електрична енергија (baseload) на HUPX изнесува 108,30 евра за мегават-час, додека на МЕМО цената е повисока и достигнува 116,17 евра за мегават-час.

Во дневните часови, во периодот од 9 до 15 часот, кога се бележи таканаречениот „power solar peak“, цената на HUPX паднала на 58,56 евра за мегават-час, додека на МЕМО изнесувала 92,68 евра.

Дополнително, индексот „Storage MAX“, кој ја покажува разликата меѓу часовните берзански цени во периодот од 12 до 14 часот и од 18 до 20 часот, достигнал 64,83 евра за мегават-час.

Во извештајот се наведува и дека цената на природниот гас на унгарската берза CEEGEX изнесува 52,23 евра, додека според индексот на холандската берза TTF Dutch цената е 50,08 евра.

Од ЕДС посочуваат дека овие информации, подготвени од нивниот експертски тим, можат да помогнат во попрецизно планирање на буџетите за потрошувачката на електрична енергија, оптимизација на сметките за струја, како и носење информирани деловни одлуки за намалување на трошоците и поуспешна реализација на бизнис плановите.

The post МЕГАВАТ ЧАС СТРУЈА ВО МАКЕДОНИЈА ЧИНИ 116,17 ЕВРА На унгарската берза цената е 108,30 евра appeared first on plusinfo.mk.

Премиерот Христијан Мицкоски, одговарајќи на собраниската седница за пратенички прашања за состојбите и плановите во енергетскиот сектор, потсети на моментите во енергетскиот сектор кога новата Влада ја презема извршната власт, оценувајќи ја како алармантна и катастрофална состојба.

– Катаклизмична состојба во август, септември 2024 година, со акумулации на некои 7 до 8 проценти, јаглен на депонија во РЕК Битола од 20-30 тони доволни за еден блок да работи 5-6 дена, неремонтирани рударски машини, незавршени јавни набавки, неремонтирани производни блокови, Осломеј Кичево запуштен и запоставен како споменик од некое транзициско време. Една катастрофална состојба. Денес во услови на криза, не цели две години потоа, година и половина, имаме 150-160 илјади тона јаглен депонирани на двете депонии во Битола и во Кичево, имаме акумулации на околу 40 проценти количина на вода, обезбедени количини на гас заклучно со месец април потребен за затоплување на Скопје, и во моментов АД ЕСМ, поранешно ЕЛЕМ, извезува во ноќните часови во вредност којашто носи на компанијата околу 100 до 150 илјади евра на ден, во зависност од количината и цената на берзите во денот. И ова е состојбата во услови на најголемата енергетска криза за којашто експертите велат дека е поголема од онаа енергетска криза во седумдесеттите години на минатиот век, кога дневно недостасувале околу 8 до 10 милиони барели нафта, а денес меѓу 11 и 12 милиони барели нафта. Волуменот на кризата е сличен. И ние во пикот на оваа криза не само што сме стабилни туку и извезуваме стабилност во регионот, нешто што до сега е невидено од нашата држава во услови на криза – потенцираше Мицкоски.

Мицкоски оцени дека со тоа репутацијата на Македонија е променета до степен дека се бара помош од нас.

– Во услови на епска криза ние, компанија од Македонија, снабдуваме неколку аеродроми со керозин. Замислете сега ние да донесеме одлука на Влада, да нема изнесување. Тие аеродроми ќе се снајдат, но со поинаква цена. Но тоа директно ќе влијае на картите авионски, на транспортните трошоци, директно ќе влијае на инфлацијата во тие држави. Тоа го прави оваа Македонија денес. Не онаа којашто правеше свадба на граничен премин за донација од 5.000 вакцини, туку оваа Македонија денес – посочи Мицкоски. Тој ги искоментира и предлозите од опозицијата во врска со надминување на енергетската криза, како популизам и предлози коишто и самите тие кога имаа можност, не ги применуваа во кризни периоди.

Мицкоски во одговорот ги посочи и плановите за предлог за заеднички настап на регионот пред светските инвеститори, а во врска со светските состојби и потреба од електрична енергија.

– Токму затоа мислам дека е добро за целиот регион, бидејќи прашавте за идните планови, а за тоа ќе зборувам на следниот Самит ЕУ, Западен Балкан во Подгорица во јуни, да се организираме регионално. Преносните мрежи, далекуводните, гасните конектори и цевководи немаат Шенген, тие се интегрирани во европскиот систем. Нема преговори или Уставни измени. И тоа е наша предност како регион, нема да бидеме препознаени ако одиме секој сам, индивидуално нема да бидеме препознаени од светските инвеститори. Го зборував ова во едно интервју, каде ја гледам шансата. Директорот на светската енергетска агенција, Фатих Бирол, со мене беше на панел во Давос, вели, во следната деценија во светот ќе недостасуваат 40 илјади теравати инсталиран капацитет. Како регион ако си поставиме цел, здружено да се претставиме пред потенцијалните инвеститори, и од тие 40 илјади теравати, да донесеме 0,01 процент. Тоа е 4 теравати, тоа се 4 трилиони американски долари инвестиции. Поделено на 10 години тоа се 400 милијарди долари годишно. Потенцијални инвестиции во делот на енергетиката, регионална иницијатива. Ако успееме ова како држави од регионот да го направиме, верувајте ќе бидеме препознаени од инвеститорите и ќе го трансформираме нашето општество, бидејќи, вкупните наши вредности на номинален БДП се околу 250 милијарди долари. А замислете да донесеме 0,01 процент ако ги донесете тука, а имаме можност тоа да го направиме. Второ е прашањето дали имаме доволно градежна оператива, преносни врски, логистика за сето тоа, тоа е прашање на организација. Но прво треба сите ние да сме свесни дека ова е проект којшто нас не обединува и прави трансформација на нашите економии и на нашите системи – оцени премиерот Христијан Мицкоски во одговор на собраниската седница посветена на пратенички прашања.

The post МАКЕДОНИЈА ОД ДРЖАВА ЗА ПОТСМЕВ ВО КРИЗА, СЕГА Е ФАКТОР НА ЕНЕРГЕТСКА СТАБИЛНОСТ Мицкоски во одговор на пратеничко прашање appeared first on plusinfo.mk.

Сеумнаесетина инвестиции во енергетиката се во завршна фаза, во почетна или во некоја фаза на реализација коишто треба да креираат до кај пет илјади нови работни места, изјави денеска премиерот Христијан Мицкоски.

Мицкоски говореше и за иницијативата за регионално здружување за заеднички настап пред инвеститорите во енергетиката, бидејќи како што рече, иднината на регионот се инвестициите во енергетиката.

– Ако сами настапуваме, се плашам дека нема да бидеме препознаени од инвеститорите. Би рекол сумата којашто ја имаме на располагање во следниве 10 години, е огромна. И ако целиме на 0,01% од таа сума, тоа се отприлика четири трилиони американски долари. Тоа е отприлика 4.000 милијарди во следниве 10 години, коишто регионот ако се обедини може да понуди проекти за да бидат реализирани, ако добро се организираме, се разбира. Тоа е некаде отприлика по 400 милијарди годишно, замислете каква трансформација на општествата ќе настане -рече тој.

Тој направи споредба на овие бројки со вкупниот номинален БДП на шесте земји Западен Балкан.

-Ако имаме предвид дека сите 6 земји од Западен Балкан, коишто се во групата, вкупниот номинален бруто домашен производ им е околу 250 милијарди долари. Значи ова е многу над тоа што претставува вкупен номинален бруто домашен производ, а зборуваме само за 0,01%. Замислете што значи тоа за нашите економии и за нашите граѓани. Мислам дека треба да сме умни како регион, да се поврземе и да покажеме и докажеме дека можеме да соработуваме и дека знаеме да соработуваме и да понудиме заеднички проекти – рече Мицкоски.

Тој додаде дека Македонија се подготвува за ова сериозно.

– Дел од тие подготовки се и дел од овие тековни проекти кои веќе се реализираат. Проектот на „Алказар”, Ветерниот парк, инвестиција вредна од половина милијарда долари. Инвеститорот веќе доби градежни дозволи и очекуваме истиот да почне со теренските работи некаде во месец април, после Велигден. Но не само што ќе го работат тој, туку појавуваат интерес и за нов проект, односно продолжување и надградување на истиот. Не случајно во Давос ги споменав Чебрен и Галиште и повторно ги враќаме во игра. Не случајно го спомнав Бошков Мост. Сите овие проекти претставуваат дел од можностите коишто ние ги имаме за инвестиција. Тука се и оние гасни електрани коишто ги најавивме претходно со турскиот холдинг „Акса”. Тука е оној гасен интерконектор којшто го градиме со Грција и гасниот интерконектор којшто ќе почнеме да го градиме со Србија. Тука е далноводот 400 киловолтен на висок напон којшто започнуваме, односно го рестартираме, којшто треба да се поврзе Битола со Елбасан, односно со Албанија – рече Мицкоски.

Така што, додаде тој , имаме многу проекти коишто се дел од овој план, но јас сум убеден дека, доколку регионално сите се организираме ќе бидеме полесно препознаени од страна на инвеститорите.

-Ако денеска светот зборува само за вештачка интелигенција, таа вештачка интелигенција не може да функционира без дата центри, а дата центри не може да функционираат без електрична енергија. Така што сите заедно мислам дека треба да целиме кон тоа дел од ова инвестициско портфолио да го привлечеме овдека во регионот – рече Мицкоски.”

Тој рече дека веќе има позитивни сигнали од лидерите на другите земји во регионот за оваа идеја.

-Па од некои да. Но мислам дека сега во Подгорица кога ќе се собереме, кога ќе има Самит, подетално ќе влезам во објаснување на идејата. И мислам дека е добро да се разработи подетално и мислам дека ќе биде атрактивна. И потоа треба да се спушти на оперативно ниво за да можеме да се претставиме пред потенцијалните инвеститори – рече Мицкоски.

The post „ЧЕБРЕН И ГАЛИШТЕ“ И „БОШКОВ МОСТ“ МОЖАТ ДА БИДАТ ДЕЛ ОД РЕГИОНАЛНАТА ЕНЕРГЕТСКА ИНИЦИЈАТИВА Мицкоски очекува годишен инвестициски прилив од 400 милијарди евра во регионот appeared first on plusinfo.mk.

Владата денеска напладне ќе одржи седница на која се очекува да донесе вонредни мерки за ублажување на растот на цените на горивата, по новиот бран поскапувања што го зафати и домашниот пазар.

Од Владата информираат дека растот на цените на светските нафтени берзи веќе се одразува и во земјава, а се очекува дополнително поскапување на дизелот и бензините веќе од почетокот на неделата.

– Цените на светските нафтени берзи растат, што се очекува дополнително да се одрази на домашната цена на горивата. Иако на бензинските станици во земјава има убедливо најевтини горива во споредба со регионот се очекува во понеделник да има дополнителен раст на цените на дизелот и на бензините. Заради тоа Владата утре во 12 часот ќе има седница на која ќе се донесат вонредни мерки за борба против високите цени на бензините со кои ќе се ублажи ценовниот скок, брифираа вчера од Владата.

Во меѓувреме, дел од бензинските пумпи веќе нудат пониски цени. Од 18 март, на пумпите на OKTA, Макпетрол и Лукоил горивата се продаваат за два денара поевтино од максималната цена утврдена од Регулаторна комисија за енергетика.

Ова поевтинување следува откако OKTA им понуди пониски цени на дистрибутерите, со цел тие да ја пренесат разликата и кон крајните потрошувачи.

Претходно, министерката за енергетика Сања Божиновска најави дека оваа мерка ќе важи до крајот на март, а директорот на компанијата, Димитриос Пасхос, посочи дека конечните цени сепак зависат од пазарните услови и политиките на трговците.

Инаку, со последните одлуки на Регулаторна комисија за енергетика, дизелот поскапе за 21 денар по литар, а бензините за 12 денари, што предизвика реакции кај граѓаните.

Како главна причина за поскапувањата се наведуваат случувањата на Блискиот Исток и нестабилноста на глобалните енергетски пазари.

The post ЦЕНИТЕ НА ГОРИВАТА ЛЕТААТ НАГОРЕ, ВЛАДАТА РЕАГИРА Седница напладне, се чекаат мерки appeared first on plusinfo.mk.