Елиот Пејџ откри дека по улогата во „Одисеја“ на Кристофер Нолан сè уште нема договорено нов актерски ангажман, иако неговата изведба во филмот наиде на одлични реакции.

39-годишниот актер во филмот го толкува Синон, грчки војник од Итака, а во епската адаптација на Нолан глуми покрај Мет Дејмон, Том Холанд, Ен Хатавеј и Роберт Патинсон. Филмот е еден од најголемите хитови годинава, па водителот на емисијата „On Film… With Kevin McCarthy“ го праша дали по премиерата постојано му ѕвони телефонот со нови понуди.

– Не, Кевин, не ми ѕвони. Значи, ако некој сака да ми се јави… – се пошегува Пејџ.

На прашањето дали сериозно сè уште нема договорено нов проект, актерот вели: „Всушност, немам“.

Пејџ би сакал повторно да работи и вели дека во моментов особено сака да избира квалитетни проекти. Тој смета дека сега е во период од кариерата кога би можел да ги оствари некои од своите најдобри актерски улоги.

– Навистина би сакал да работам на квалитетни проекти. Тоа е она што би сакал да го правам – рече актерот.

Пејџ смета дека начинот на кој го доживува филмската индустрија денес е поинаков од порано и признава дека можеби ќе мора самиот да преземе поактивна улога во барањето ангажмани.

– Претходно ме гледаа на одреден начин, а сега е поинаку. Можеби треба да им се јавувам на луѓето и на тој начин да создавам проекти и контакти – рече тој.

Пејџ, кој во 2020 година јавно објави дека е трансродова личност, зборуваше и за тоа како се чувствувал додека ги снимал своите постари филмови.

Се присети на филмот „Почеток“ (“Inception) од 2010 година, првата соработка со Нолан, и признал дека иако уживал во работата, лично се чувствувал непријатно.

– Одлично си поминав во тој филм и одлично ми беше да работам со Кристофер, но се чувствував многу непријатно сам со себе – рече Пејџ.

Денес, според него, таа внатрешна непријатност повеќе не е присутна и тоа му овозможува поинаку да пристапува кон актерството.

– Имам чувство дека сега би можел да ги направам некои од најдобрите улоги во кариерата – рече актерот.

Повторната соработка со Нолан во „Одисеја“ за Пејџ имала и силна емотивна страна. Тој откри дека по завршувањето на снимањето заплакал и го опишал моментот како затворање на еден важен животен круг.

Тој објасни дека денес, бидејќи се чувствува поповрзано со себе и посигурно во сопственото тело, може полесно да ѝ се препушти на актерската игра.

The post 🎥 ПО „ОДИСЕЈА“, ЕЛИОТ ПЕЈЏ ОСТАНА БЕЗ НОВИ ПОНУДИ ЗА РАБОТА Трансродниот актер призна дека тешко добива улоги appeared first on plusinfo.mk.