Данокот за приходите остварени во странство не е нова обврска и не станува збор за ретроактивно оданочување, порача директорката на Управата за јавни приходи, Елена Петрова, по средбата со стопанствениците во Сојузот на стопански комори на Македонија.

Петрова објасни дека обврската за пријавување и оданочување на ваквите приходи постои уште од 2020 година, но призна дека дел од граѓаните денес се соочуваат со сериозни проблеми – особено при обезбедување документи за веќе платен данок во странство.

– Свесни сме дека некои граѓани тешко доаѓаат до потврди од странските институции, па затоа УЈП ќе им излезе во пресрет – истакна Петрова, додавајќи дека ќе се прифаќаат различни видови докази, а паралелно ќе се воспостави и административна соработка со даночните власти во други држави.

Најмногу случаи има кај граѓаните кои работеле во Авганистан и во Ирак. Од околу 1.100 лица, документи досега доставиле приближно 200, додека за останатите УЈП побарала податоци и листи од компаниите преку кои биле ангажирани, со цел службено да ги провери информациите.

Дополнителни проверки ќе се вршат и за македонските државјани кои биле дел од мировни мисии, каде што, како што беше посочено, данокот бил платен преку Министерството за одбрана.

Петрова најави дека аконтациските решенија за 2020 година ќе бидат заменети со конечни, а процесот на корекции привремено ќе мирува сè додека не се обезбедат сите потребни податоци.

The post НЕМА РЕТРОАКТИВЕН ДАНОК ЗА РАБОТЕЊЕТО ВО СТРАНСТВО Од УЈП уверуваат дека ќе им се излезе во пресрет на граѓаните appeared first on plusinfo.mk.

Не е разговарано за евентуално укинување на „Мој ДДВ“, но треба да се анализира дали мерката ги дава резултатите за кои беше воведена, вели директорката на Управата за јавни приходи (УЈП), Елена Петрова.

Таа вели дека не може да каже дека има одлука за укинување на мерката.

–  Меѓутоа, кога се работи за таква мерка за која се трошат јавни средства, секако дека треба да се погледне и да се разговара за ефикасноста на мерката и дали мерката ги дава целите заради кои што била воспоставена. Преку оваа мерка, на квартално ниво за 2025 година, се издвојуваат околу 14,5 милиони евра за, во просек, околу 502.000 корисници. И овој износ секоја година се зголемува во однос на претходните години. Се зголемува и бројот на корисници, но поради тоа што се зголемува и наплатата на приходот, во просек можеме да кажеме дека за оваа мерка се издвојуваат околу 4% од годишната наплата на ДДВ приход или тоа е еквивалентно на приближно половина месечен ДДВ приход – рече Петрова во гостување на телевизија Телма.

Таа рече дека мерката, која беше воведена во 2019 година, требаше да доведе до намалување на сивата економија преку фактот што секој граѓанин го поставува во улогата на даночен инспектор.

-Ако од тој аспект сакаме да ја процениме мерката, состојбите кои што ги гледаме на терен и состојбите кои што можеме да ги забележиме и внатре, врз основа на сите податоци со кои што располагаме, јасно водат до заклучок дека мерката не го дала посакуваниот ефект- нагласи Петрова.

The post ЗАСЕГА НЕ СЕ УКИНУВА МОЈДДВ Петрова оцени дека мерката не ги дала очекуваните резултати appeared first on plusinfo.mk.

Незадоволни кумановци кои работеа за американски компании во базите во Ирак и Авганистан и денеска протестираа пред зградата на Управата за јавни приходи Куманово. Тие најавија дека протести ќе има цела работна недела, секој ден од 14 до 16 часот. Причината, како што посочуваат засегнатите, е неправедното утврдување на даночната резидентност и обврската за плаќање данок за приходи остварени надвор од државата, неземајќи ги предвид реалните околности на нивниот престој и работа во странство.

Кумановци побараа надлежните да ги земат предвид доставените докази, пасошите и нивната отсутност од државата 183 дена.

На претходно одржаните два протести кумановци побараа признавање на доказите (пасоши, печати, потврди од работодавци), ревизија на решенијата, запирање на присилната наплата и усогласување на даночната пракса, укажувајќи дека не бегаат од плаќање на даноци и дека бараат правична и законска примена. Денеска, јавно ги повикаа на средба претседателот на Владата, Христијан Мицкоски, директорката на УЈП Елена Петрова и градоначалникот на Куманово, Максим Димитриевски, за да се утврдат нејаснотиите и да се признаат доставените докази, укажувајќи дека имале неофицијална средба со нив.

– Јавно го повикаме премиерот Мицкоски, госпоѓата Петрова и градоначалникот Димитриески да ни ги ислушаат нашите барања и да видиме што понатаму, бидејќи ние имаме докази. Имавме неофицијална средба со премиерот и директорката како што знаете, сигурно се слушнале за таа средба на која ни беа кажани многу работи. Ни посочија дека во секоја подрачна единица ќе се отвори канцеларија каде што ќе имаат тимови, организирани и обучени за овој проблем, дека ќе бидат сослушани сите граѓани не само на Куманово, туку од цела Македонија дека ќе го проолонгираат плаќањето до 31 мај, дека ќе ни бидат признаени сите докази што ги носиме, затоа бараме средба – кажаа Жикица Миланов и Зоран Наковски.

Кумановци кажаа дека побарале од американските компании докази за платен данок, но дека УЈП засега не ги признава доставените докази, ниту пак го признава нивното отсуство. Дел од граѓаните побарале докази и од властите во Ирак, кои им кажале дека како странски државјани не можат да им обезбедат таков доказ. Кумановци побараа институциите самите по службен пат да обезбедат докази за платените даноци. Дел од нив имаат од 200, но и прилично високи суми за плаќање на данок кои се движат и до неколку илјадници евра.

Незадоволството почна пред празниците кога на голем број кумановци им стигна известување по електронска сметка, но не и официјални решенија од УЈП дека треба да платат данок за заработените пари од работниот ангажман во компаниите во базите од Ирак и Авганистан. Вакви известувања, како што самите посочија, добиле околу 4.000 кумановци.

The post КУМАНОВЦИ КОИ РАБОТЕЛЕ ВО ИРАК И ВО АВГАНИСТАН СО БАРАЊЕ ДО УЈП Повикаа да им се преиспита ретроактивното оданочување appeared first on plusinfo.mk.

Директорката на Управата за јавни приходи Елена Петрова вели дека на граѓаните кои платиле данок на доход во странство, а на кои сега им е дојдено даночно решение и од УЈП, имаат уште време да ги приложат доказите до канцелариите на УЈП.

Петрова тврди дека не може да се изврши двојно оданочување, а доколку има случаи во кои граѓаните веќе го платиле данокот на доход во странство, а сега постапиле и по решението од УЈП, ќе бидат разгледани сите докази и ќе се изврши оданочување само на едно место.

– За оние кои платиле во странство и сега платиле во земјава, ќе бидат земени предвид сите докази. Зависно од меѓународниот договор – доколку со земјата имаме склучено меѓународен договор, каде треба да се плати данокот, а каде да се изврши поврат или доколку е возможно, платениот данок во странство да се прифати како даночен кредит, а за уплатата која е извршена овде да се изврши враќање или да се прифати за друг долг за следна година – појасни Петрова на денешната прес-конференција.

Таа вели дека како институција се свесни за реакциите на граѓаните, но додава дека морале да го почитуваат законот и да ги достават решенијата во законскиот рок, односно пет години по истекот на годината кога доходот е остварен.

– Верувам дека одредени граѓани не стигнале да ги завршат активностите во однос на собирањето и доставувањето на доказите и тоа е разбирливо бидејќи се работи за пет години наназад, меѓутоа нашиот рок за завршување на постапката беше до 31 декември и тоа е законскиот рок. Имајќи предвид дека граѓаните мора да обезбедат докази за работа што се случила пред пет години, а доказите ги обезбедуваат од странски земји, ќе им овозможиме да го сторат тоа. Ги повикувам сите да ги достават доказите, ќе ги разгледаме и што може да се прифати, ќе прифатиме – рече Петрова.

Според Петрова, оваа активност на УЈП не била брза и изненадувачка, туку опсежна активност во која биле собрани податоците од банките, била направена  опсежна анализа и околу 11.000 граѓани персонално биле повикани да го подмират данокот на доход.

За протестите на овие граѓани и за нивните најави дека ќе поднесат тужби пред Управниот суд, директорката на УЈП вели дека тоа се легитимни права на граѓаните.

– Тоа ниту можеме, ниту сакаме да ги спречиме граѓаните да поведат управен спор доколку имаат докази за тоа. Сепак, повикани се и кај нас да ги достават доказите за да видиме дали имаат платен данок во странство – рече Петрова.

Министерката за финансии Гордана Димитриеска-Кочоска, напомена дека не се работи за законска измена и дека граѓаните треба да ги знаат нивните обврски кон државата.

– Ние досега не сменивме ниту еден закон. Даночните обврзници треба да ги знаат законите и да ги почитуваат. Кога станува збор за потврдите за остварување на доход во странство, секој од нас треба да знае дека кога го остварува доходот во странство, во исто време треба да обезбеди и потврда во годината во која го остварил со цел да го поднесе до Управата за јавни приходи односно во месецот. Што значи дека ова не е нова давачка која ние ја сменивме во Собранието. Станува збор за почитување на законите – нагласи Димитриеска-Кочоска.

Од 11.000 граѓани, утврден е данок за 6.600 граѓани за 2020 година. За останатите е коснтатирано дека доходот не подлежи на одданочување. Од овие 6.600 граѓани, 2.200 граѓани самите го имаат поднесено и платено данокот, а за 4.400 граѓани донесени се решенија по службена должност. Вкупно утврдениот данок е околу три милиони евра за 2020 година.

Најавите од УЈП се дека ќе се проверуваат и останатите години.

The post УЈП ЌЕ ГИ ЧЕШЛА И ДРУГИТЕ ГОДИНИ ЗА НЕПЛАТЕН ДАНОК НА ДОХОД ОД СТРАНСТВО Продолжен е рокот за докажување дека данокот е платен во друга земја appeared first on plusinfo.mk.

Заклучно со 30 ноември годинава во државниот буџет по основ на даноци и придонеси се собрани 3,97 милијарди евра што е повеќе за 268 милиони евра во однос на истиот период лани, рече денеска директорката на Управата за јавни приходи (УЈП), Елена Петрова.

Како што информира Петрова, има пораст на приходите од даноци за 6,5% и пораст кај придонесите за 8,7% во однос на истиот период минатата година.

-Трендови на пораст во однос на лани има и во декември, но уште течат приливите и исплатите од уплатните сметки за даноци. Денеска ги сумираме податоците од вчерашниот ден, даночниот ден за ДДВ и по истекот на месецот ќе ги имаме конечните податоци за цела година – рече Петрова.

Во врска со проектот е-фактурирање, напомена дека од 1 јануари ќе почне пилот-имплементацијата.

– Се наоѓаме пред клучен исчекор. Во првата фаза ќе го објавиме комуникацискиот механизам преку кој ќе се врши автоматската размена на податоци меѓу компаниите, меѓу нивните софтверски системи за фактурирање и меѓу државната централизирана платформа за е-фактурирање. По новогодишните празници ќе биде објавена техничката документација врз основа на што фирмите ќе можат да почнат со прилагодување на своите софтверски решенија и техничката интеграција, како и со тестирање на изготвување е-фактура во контролирана тест околина – објасни Петрова.

До крајот на првиот квартал ќе биде објавена клиентската апликација – бесплатни решенија за помалите компании, до крајот на вториот квартал ќе биде поставена продукциската околина, а до крајот третиот квартал од 2026 година се планира да заврши тестирањето.

The post ОД 1 ЈАНУАРИ СТАРТУВА ПИЛОТ-ПРИМЕНА НА Е-ФАКТУРАТА Даночната управа до крајот на ноември собра 3,9 милијарди евра од даноци appeared first on plusinfo.mk.

Од 1 јануари стартува пилот фазата за проектот е-фактура со којшто ќе се минимизира ризикот од злоупотреби и фиктивни фактури, најавува директорката на Управата за јавни приходи (УЈП) Елена Петрова.

Петрова денеска во дискусија на панелот „Дигитална трансформација на јавниот сектор“ на третата годишна конференција за дигитализација на АмЧам,  рече дека е избран модел со модерно решение усогласено со меѓународни стандарди и барања, кое за компаниите ќе биде лесно за примена и интеграција со нивните системи, како и дека се спроведуваат мерки кои ќе овозможат максимално да се минимизираат ризиците.

Според неа, со оваа реформа ќе се подобри управувањето со јавните финансии, ќе се подобри даночната усогласеност, брзо и лесно ќе се детектираат несоодветните одлуки на влезен ДДВ, несоодветно декларирани расходи кои не се признаваат за стопанската дејност,  ќе се намали сивата економија, ќе има и поефикасна даночна контрола.

Како што рече Петрова, е-фактура е меѓу најзначајните дигитални реформи на УЈП и за целата бизнис заедница, а се спроведува многу внимателно за да се обезбеди подготвеност на економските оператори кои ќе бидат корисници на новиот систем.

Петрова соопшти дека активностите почнале на 1 јули годинава и оти завршена е набавката на современата ИТ опрема која треба да обезбеди стабилна инфраструктура.

– Се наоѓаме пред клучна фаза, целосно сме фокусирани на стартот на пилот имплементацијата од 1 јануари 2026 година. Тогаш ќе го објавиме комуникацискиот механизам  кој треба да обезбеди автоматска и безбедна размена на податоците меѓу системите на компаниите и системот за е- фактура. Ќе биде поставена техничката документација, врз основа на која компаниите ќе можат да почнат да ги прилагодуваат своите софтвери, да ја спроведат техничката интеграција и да започнат со тестирање на испраќање и издавање фактури во контролирана тест околина. Оваа фаза ќе биде наменета за ИТ компании и тимови кои работат на развој и одржување на ваквите и слични системи, како и економски оператори кои имаат свои ИТ решенија – рече Петрова.

Според неа, до крај на првиот квартал 2026 година ќе бидат објавени клиентската и веб апликацијата кои ќе бидат наменети за помалите компании кои немаат сопствени фактурирачки системи, а до крајот на  вториот квартал ќе биде поставен продукцискиот сервер.

-Планирано е до крај на третиот квартал да заврши тестирањето и да почне имплементацијата – рече Петрова.

Појаснувајќи ги функционалностите, таа рече дека е избран модел на централизиран државен систем со кој ќе комуницираат компаниите.

– Комуникацијата и доаѓањето на податоците ќе биде во реално време бидејќи преку тој систем ќе се врши издавањето на фактурите.  Овој модел е најблиску до ОЕЦД концептот – Даночна администрација 3.0., кој се однесува на висока интеграција  на системите на даночната администрација со системите на компаниите и други страни и создавање на интероперабилен даночен систем. Карактеристично за овој модел е и тоа што со Министерството за финансии се договоривме во овој систем покрај фактурите да поминуваат и да се издаваат и пропратните документи како испратници, приемници, времени ситуации, итн., … со што системот ќе обезбеди целосна документирана деловна трага за еден деловен настан. Се прави со цел да се минимизира ризикот од злоупотреби и фиктивни фактури – рече Петрова.

Најважните предизвици се однесуваат на обезбедување систем кој, како што појасни, ќе биде соодветно димензиониран и ќе има соодветна брзина во функционирањето. Се работи и на заштита на податоците, автентичноста на фактурата, да нема можности за промени, заштитата од разни напади, блокирања на системот и слично.

The post ОД 1 ЈАНУАРИ ПОЧНУВА ПРОБНИОТ ТЕСТ ЗА Е-ФАКТУРАТА Се стартува со компаниите кои имаат свои ИТ решенија appeared first on plusinfo.mk.

– Заклучно со 30 ноември планот е целосно исполнет и натфрлен со 2 проценти. Сега се наоѓаме во период од месец декември кога сѐ уште не поминале клучните датуми кога се роковите за плаќање на обврските, тоа се 15-ти и 25-ти во месецот, но еве до крајот на годината останува да се наплати уште 5 проценти од годишниот план и споредбено со тоа какви се историските тенденции колку приходи или колкав дел од годишниот план се наплаќа во текот на декември секоја година, сосема е извесно дека овие 5 проценти ќе ги наплатиме до крајот на годината – изјави Петрова во одговор на прашање пред почетокот на презентацијата на најновиот Извештај на Светска банка за земјава.

Прашана дали има потреба да се зголеми ДДВ-то, како што предлага бизнис заедницата, Петрова рече дека нема потреба од зголемување на ставката на ДДВ и додаде дека со други методологии, со други пристапи може да се подобри даночната усогласеност и да се мобилизираат даночните приходи со задржување на ниски даночни стапки.

– Ние работиме во рамките на политиките на Владата и на фискалната стратегија, тоа се политики за одржување ниски даночни стапки, а собирањето или мобилизацијата на даночните приходи треба да ја обезбедиме во тие услови на ниски даночни стапки со проширување на даночната база, со интегрирање на сивата економија во формалната економија и со разни други мерки коишто ќе се однесуваат на намалување на сите други даночни гафови, односно загуби на даночни приходи поради даночна евазија поради нецелосно и неточно плаќање на даноците – рече Петрова.

The post МОРА ДА СЕ НАМАЛАТ ЗАГУБИТЕ НА ДАНОЧНИТЕ ПРИХОДИ Годинава се наплатил данок според очекувањата appeared first on plusinfo.mk.

– Средствата што во Буџетот за 2023 година биле испланирани од претходното раководство за исплата за Мој ДДВ во најголем дел се потрошени или, со други зборови кажано, не биле испланирани доволно средства за овие исплати за цела 2024 година, па треба да се обезбедат средства со ребалансот на Буџетот. За прашањето дали ќе има измени во спроведувањето на оваа мерка до сега слушнавме појаснувања и од премиерот и од министерката за финансии, и тоа дека оваа мерка ќе остане и ќе се надгради со други исплати кон таргет групи граѓани. Toa прашање не може да се адресира на УЈП, затоа што исплатата на буџетски средства на граѓаните врз основа на скенирање на фискални сметки преку систем Мој ДДВ по својата суштина е економско-социјална мерка – вели Петрова.

Таа вели дека граѓаните се доволно свесни дека нема дисциплина во издавањето фискални сметки.

– Очигледно е, ноторен факт е дека многу регистрирани трговци и угостители не издаваат фискални сметки, како и лица кои нерегистрирано вршат некаква дејност. Има и појави на издавање сметки кои не се фискални и сл. Ова потврдува дека мерката Мој ДДВ од даночен аспект е далеку од најавата дека секој граѓанин ќе биде даночен инспектор и дека оваа мерка ќе помогне во сузбивањето на сивата економија, а непријавувањето на готовинскиот промет е една, но по обем најголема појавна форма на сивата економија – вели Петрова.

The post МОЈ ДДВ ЌЕ СЕ ИСПЛАЌА ПО РЕБАЛАНСОТ НА БУЏЕТОТ Претходната власт не испланирала доволно пари за поврат appeared first on plusinfo.mk.

Производството на торти и колачи во домашни услови, изработката на накит, поставувањето кафемати, како и онлајн шопингот ќе се оданочуваат паушално, најави директорката на Управата за јавни приходи Елена Петрова во интервју за порталот Република.

Пред да се воведе данокот, Петрова вели дека ќе се оди со информирање на даночните обврзници.

– За овие дејности има законски начин на оданочување, односно т.н. паушално оданочување на дејности од времен карактер. Но, очигледно затаиле некои механизми штом има толку многу неоданочени даночни обврзници. Прво ќе се оди кон информирање на даночните обврзници и нивните обврски. Паушалот ќе биде различен, ќе се прават пресметки, во зависност од местото каде што се врши дејноста, бројот на часови, односно сразмерно на приходите што може да се остварат од вршењето на дејноста – вели Петрова.

Таа најавува дека ќе оданочуваат и сите што продаваат производи преку Фејсбук и Инстаграм.

– Сега сивата економија од пазарите и улиците се префрли на интернет и оваа област бара засилен фокус на УЈП преку информирање кои се нивните законски обврски а потоа и контроли. Како едно среднорочно решение за онлајн трговијата е планирано во рамките на системот за е-фактура да бидат приклучени сите тие продавачи преку законска обврска. Документите што ќе се издаваат за еден таков реализиран промет да бидат фискализирани, што значи дека пред да бидат издадени на купувачот да поминат низ системот на УЈП – вели Петрова.

Овие активности на УЈП, според Петрова, се дел од најавената борба со даночните затајувања и криминалните даночни измами.

– Надлежните служби во УЈП ми обезбедија податоци кои покажуваат дека повеќе од 2.500 даночни обврзници немаат поднесени даночни пријави за ДДВ за првите 5 месеци од годината. Имаме повеќе од 800 даночни обврзници кои не поднеле даночни биланси за 2023 година. За секој месец од почетокот на годината има над 5.000 работодавачи кои не поднеле месечна пресметка за интегрирана наплата. Тоа значи дека во тие случаи данокот (ДДВ, данок на добивка, данок на личен доход за плата) и придонесите не се пресметани, не се пријавени и не се платени. Друга индикација дека има данок или приходи што се губат и не влегуваат во државниот трезор ни покажува и самата структура на прометите што се прикажани во ДДВ пријавите. Ако ги сумираме податоците од сите ДДВ пријави и ги гледаме како една збирна пријава на ниво на цела држава, повеќе години наназад во таа вкупна пријава речиси секој месец имаме вишок ДДВ за враќање/поврат, наместо ДДВ долг за плаќање. Тоа се нарекува негативен даночен ефект. Да го појасниме ова поедноставно. Во ДДВ пријавите во првиот дел се искажува реализираниот промет и ДДВ што се должи за тој промет, а во вториот дел се искажува влезниот промет, набавките за кои е платен ДДВ. Разликата меѓу ДДВ што се должи и платениот ДДВ за влезниот промет на крајот на месецот или кварталот е или разлика за доплата/долг, или повеќе платен ДДВ за поврат. Значи, повеќе години наназад, во сите региони и на ниво на цела држава, збирната даночна пријава покажува дека завршуваме со вишок ДДВ за поврат. Вишок ДДВ за поврат вообичаено имаат компаниите кои извезуваат, компаниите кои се во инвестиции и сл. Но ако е ваква вкупната состојба на ниво на држава, тоа изгледа како нашата економија, нашето стопанство да не создава додадена вредност за оданочување – вели таа.

Петрова вели дека оваа состојба е сериозна индикација на која треба да се посвети значајно внимание, индикација и прашање дали прометот и данокот во ДДВ пријавите се пријавени точно и целосно, или имаме помалку пресметан, непријавен и неплатен ДДВ и помалку собрани даночни приходи во државниот трезор.

– Оваа информација особено треба да се земе во контекст на случувањата во блиското минато кога имаше злоупотреби и измами со ДДВ повратот и оштетување на буџетот. Едноставно вкрстување на податоци во даночните биланси покажа дека има една група даночни обврзници кои во минатите години искористиле даночни олеснувања повеќе отколку што можеле и со тоа платиле помалку данок на добивка – вели директорката на УЈП.

Покрај ова една од шемите за неплаќање на даночните обврски е и преку злоупотреби во регулативата и процесите за регистрирање и дерегистрирање на компании и сл.

– Очигледно е дека постојат „дупки“ каде што се губат даночните приходи заради различни состојби кои претставуваат даночно избегнување и затајување преку непријавување или прикривање на приходи и промет, погрешно и извртено толкување и примена на регулативата, користење на празнини во регулативата и сл. Затоа најавив силна борба против сите вакви форми на даночно избегнување и даночни измами. УЈП мора да обезбеди рамноправни услови во кои чесните даночни обврзници нема да го носат товарот на полнење на државниот трезор за сметка на другите кои не го плаќаат својот данок. Оваа борба ќе вклучи различни мерки за зајакнување на програмата за даночната контрола, наплатата на заостанатите долгови и санкциите,  сѐ до одговорност и казни за секој поединец што презема дејства со кои ги оштетува народните пари заради противправно стекнување лична имотна корист – вели Петрова.

The post ЌЕ СЕ ОДАНОЧИ ПРОДАЖБАТА ПРЕКУ ФЕЈСБУК И ИНСТАГРАМ Сивата економија е преселена на интернет – се продава сѐ и сешто, не се плаќа ниту денар данок appeared first on plusinfo.mk.

„Ниту силината на изборниот пораз не ги „заузда” владините функциононери во заминување во трошењето буџетски средства, одење на службен пат во странство, правење гала прослави… До 15 мај 2024 год. поминавме два викенди, три празнични неработни денови и еден изборен неработен ден. Колку потроши Владата во преостанатите седум работни денови, додека треба да се пакува за да ги испразни кабинетите?“.

Вака се огласи заменик-министерката за економија од редовите на ВМРО-ДПМНЕ Елена Петрова на Фејсбук. Таа пишува:

„До 15 мај 2024 година поминавме два викенди, три празнични неработни денови и еден изборен неработен ден. Колку потроши Владата во преостанатите седум работни денови, додека треба да се пакува за да ги испразни кабинетите.

Вкупните буџетски расходи од 367 милиони евра во календарскиот период 01/05-15/05/2024 год. се:

– само за 9% помалку од вкупните буџетски расходи за ЦЕЛ месец мај во 2023 год.

– поголеми во просек за 11% од вкупните буџетски расходи за ЦЕЛ месец мај во 2022 год., 2021 год. и во ковид-годината 2020.

Во овој календарски период 01/05-15/05/2024 год. новосоздадениот буџетски дефицит т.е. негативна разлика меѓу помалку наплатените буџетски приходи и повеќе исплатените буџетски расходи изнесува 189 милиони евра и е:

– во просек за 250% поголем од буџетскиот дефицит создаден во текот на ЦЕЛ месец мај во претходните четири години (2020-2023)

– поголем за околу 170% во споредба со буџетскиот дефицит создаден во текот на ЦЕЛ месец мај во кризната-ковид 2020 год.

Новата политичка влада на ВМРО-ДПМНЕ и коалиционите партнери наскоро ќе биде назначена. Ќе дојдат нови луѓе кои одговорно ќе ги водат државните органи и тела, ќе ги насочат јавните финансии за создавање долгорочни бенефити за македонските граѓани, но и од првиот ден ќе ги „отворат сметките”, ќе ги разоткријат и ќе иницираат сакционирање за сите досегашни незаконски и штетни трошења од Буџетот“, пишува во својата објава Петрова.

The post „НИТУ ПОРАЗОТ НА ИЗБОРИТЕ НЕ ГИ ЗАУЗДА ВО ТРОШЕЊЕТО“ Петрова од ВМРО-ДПМНЕ ја обвини владата во заминување за огромни расходи appeared first on plusinfo.mk.