43-годишна жена од Кавадарци стана жртва на измама и остана без скоро 30.000 денари.

Според пријавата во ОВР Кавадарци, на 20 јануари таа добила електронска порака, која наводно била испратена од Одделот за моторни возила при МВР, со обвинување за сторен сообраќаен прекршок и упатства за електронско плаќање на казната. Верувајќи дека е легитимна, жената ги внесла своите лични податоци и се регистрирала според инструкциите.

Подоцна таа добила известување дека од нејзината банкарска сметка биле повлечени 29.930 денари, и тогаш сфатила дека била измамена.

Полицијата презема мерки за расчистување на случајот, а граѓаните се повикуваат да внимават на сомнителни пораки и да не ги споделуваат своите лични податоци преку интернет.

The post КАВАДАРЧАНКА ИЗМАМЕНА ПРЕКУ Е-ПОШТА Жена остана без 30.000 денари по лажна порака од МВР appeared first on plusinfo.mk.

Според податоците, во третиот квартал лани  споредено со истиот квартал од претходната година е забележан раст од 12,8% бројот и 10% кај вредноста на трансакциите со платежни картички издадени во земјава.

-Притоа, значителен годишен раст од 15,1% е забележан кај употребата на картичките за плаќање производи и услуги во земјата,  којшто се должи на посилниот раст на плаќањата на физичките места на продажба од 15,9%, но и солиден раст од 9,0% на плаќањата на виртуелните (интернет) продажни места – велат од Народна банка.

Во истиот период забележан е годишен раст од 9,3% на вредноста  и од 5% кај бројот на остварени трансакции извршени со кредитни картички. И кај овие плаќања расте бројот на трансакции извршени електронски.

-Бројот на електронски иницираните платни налози во третиот квартал од 2023 година забележа годишен раст од 16,1%, што е повеќе за 10,8 п.п. од годишниот раст во третиот квартал од 2022 година (5,3%) – велат од Народна банка.

Лани споредено со претходната година, е зголемено и  плаќањето преку апликациите на мобилните телефони каде што годишен раст изнесува  19,5%, како и кај употребата на компјутерите за извршување на плаќањата (11,8%).

The post КЕШОТ ИЗЛЕГУВА ОД МОДА Граѓаните повеќе сакаат да плаќаат со картички и со мобилни телефони appeared first on plusinfo.mk.

Значително се зголемува користењето на електронското банкарство од страна на физичките лица, што во овој период е и во функција на заштита на здравјето. Бројот на плаќања иницирани преку електронското банкарство во март е зголемен за околу 30% на годишна основа, што е многу повеќе во споредба со трендовите во претходниот период.

Ова го истакна гувернерката на Народната банка, Анита Ангеловска-Бежоска, во вчерашното издание на емисијата „Топ тема“ на телевизија Телма. Притоа посочи дека според првичните податоци од платежната статистика, чијашто обработка е во тек, зголемено е користењето и на компјутерите и на мобилните телефони за извршување на плаќања.

Во март, годишниот раст на плаќања извршени преку компјутер изнесува околу 26,4%, додека претходно, минатата година во споредба со 2018 година, растот изнесуваше 5,4%. Истовремено, како што кажа гувернерката, бројот на плаќања преку мобилен телефон е зголемен за околу 45,5% на годишна основа.

Од друга страна, забележан е пад од околу 7% на годишна основа кај плаќањата иницирани на хартија. За ваквите трендови придонесоа и активностите коишто ги презедоа банките по започнувањето на корона-кризата, заради заштита на јавното здравје.

– Според првичните податоци, особено е изразен порастот на користењето на платежните картички за купување преку интернет, при што во март, бројот на трансакции е зголемен двојно во однос на истиот месец минатата година, а позитивни се трендовите и кај користењето на картичките на физичките места на продажба. – посочи Ангеловска-Бежоска.

Во емисијата, акцент беше ставен и на најновите макроекономски проекции на Народната банка, при што меѓу другото беше истакнато дека се очекува падот на економската активност заради корона-кризата да биде најголем во вториот квартал од оваа година, а потоа да следи постепено опоравување и следната година да има раст на македонската економија од 4,7%. Како што посочи гувернерката, ваквите очекувања се темелат на претпоставката дека шокот од ковид-19 ќе биде краткорочен.

Одделно се дискутираше и за депозитната база и за состојбите на девизниот пазар, при што гувернерката нагласи дека овојпат притисоците беа значително помали во споредба со претходни кризни епизоди.

– Податоците за март покажуваат дека нема пад на депозитите. Ме радува што веќе во текот на април состојбите се стабилизираа – депозитната база е стабилна и таквата состојба продолжува и на почетокот на овој месец.“ – истакна Ангеловска-Бежоска.

Од средината на април, како што посочи таа, значајно е стабилизирана и состојбата и на девизниот пазар.

Во емисијата се коментираше и за мерките што по избувнување на корона-кризата ги презеде Народната банка. Гувернерката посочи дека постојано се следат состојбите и ако е потребно, Народната банка е подготвена да преземе и дополнителни мерки во согласност со своите надлежности, ако тоа е потребно.

The post Ангеловска-Бежоска: Значително се зголемува користењето на електронското банкарство appeared first on plusinfo.mk.