Професорот Тито Беличанец, поранешен потпретседател на преодната влада во периодот 1989–1991 година, преку јавна објава остро им одговори на функционерот на СДСМ Аднан Џаферовски и на други членови на партијата кои го обвинија дека е „поткупен“ за да ги брани актуелното раководство и политиките на СДСМ, објави порталот Експрес.мк.

Во својата реакција, Беличанец наведува дека таквите обвинувања се најголемата навреда што ја добил од човек од СДСМ, но нагласува дека партијата ја следи уште од нејзините почетоци и дека почнал активно да ја поддржува со доаѓањето на Зоран Заев.

– СДСМ го следам од почетокот. До доаѓањето на Заев, партијата луташе во идеолошка и организациона магла и не донесе една државничка одлука. Дури и кога немаше опозиција, ѝ ја предадовте власта на ВМРО-ДПМНЕ на чело со Груевски да владее 12 години – наведува Беличанец.

Тој оценува дека токму Заев ја претворил СДСМ во државотворна партија, носејќи, како што наведува, најтешки државнички одлуки и компромиси. Според него, наместо да добие поддршка, Заев бил тргнат од партијата, што довело до подоцнежните поделби и слабеење на СДСМ.

Во објавата, Беличанец ги критикува и поранешните партиски функционери, оценувајќи дека наместо да помогнат во консолидацијата на партијата под водство на Венко Филипче, започнале да бараат нови реформи и идеолошки платформи.

Тој смета дека дел од нив со своите лични амбиции ја ослабнале партијата и за време на локалните избори.

Беличанец се осврнува и на критиките дека СДСМ води премногу агресивна кампања околу внесувањето на Бугарите во Уставот. Според него, кампањата е дури и недоволно силна и треба уште поотворено да се бара политичка одговорност од премиерот Христијан Мицкоски.

– Јас имам 80 години и немам претензии за функции или било што, но сакам моите внуци и сите други внуци да бидат граѓани на ЕУ – наведува Беличанец.

На крајот од објавата, Беличанец признава дека можеби бил престрог во своите оценки, но додава дека бил испровоциран од ставовите на своите критичари. Воедно, ги потсетува дека Статутот на СДСМ се менува на конгрес, на кој тие самите учествувале, но не предложиле измени.

Објавата на Беличанец доаѓа во период кога во СДСМ се водат внатрепартиски дебати околу идниот политички курс, евроинтеграциите и стратегијата на партијата, пренесува Експрес.мк.

Цела објава

ЈАВНА ОБЈАВА КОН АДНАН ЏАФЕРОВСКИ И ДРУГИТЕ СДСМОВЦИ КОИ СМЕТААТ ДЕКА СЕ „ЗИМЗЕЛЕНИ“ КОИ МИ УПАТИЈА НАВРЕДА ДЕКА СУМ ПОТКУПЕН ЗА ДА ЈА БРАНАМ АКТИВНОСТА НА АКТУЕЛНОТО РАКОВОДСТВО НА СДСМ ЗА ВЛЕЗ НА ЗЕМЈАТА ВО ЕУ!

Поголема навреда од СДСМОВЕЦ не сум добил. Благодарам.

СДСМ го следам од почеток зошто учествував во преодниот период во периодот 1989/1991 како потпретседател на ИС/Влада. До доаѓањето на Заев СДСМ луташе во идеолошка и организациона магла и не донесе една државничка одлука , дури кога и немаше опозиција зошто ВМРО ДПМНЕ го бојкотираше Собранието. Затоа му ја предадовте власта на ВМРО ДПМНЕ на чело со Груевски да владее 12 години.

Дури со Заев почна историјата на социјалдемократската партија како државотворна партија. Од тогаш почнав да го подржувам СДСМ. Посебно Заев кој ги донесе најтешките државотворни одлуки со сериозни компромиси кои беа изнудени заради тоа што Вие кои го водевте СДСМ до 2017 година не донесовте ниедна. И што е најтрагично дозволивте да го тргнете и Заев, наместо да го подржите да ја избори битката до крај. Потоа следеше дебакалот и поделба на партијата и доведување во најтешката состојба кога како како лидер ја презеде Филипче кој храбро се избори за значајна консолидација. И наместо старите кадрови кои ја сносите вината за состојбата во која се најде СДСМ да му помогнете почнавте еден по еден да се јавувате и да барате „реформи“ и нови идеолошки платформи.
Го блокиравте СДСМ во текот на локалните избори со бројни подтови и амбиции за враќање на фунции.
Го слушам Петров ќе правел реформиран „СДСМ во сенка“ како подршка на СДСМ. Го напаѓа Филипче и пропагандата на СДСМ дека била премногу агресивна зошто барала од Мицковски да ги внесе Бугарите во уставот за да почнат преговорите за влез во ЕУ. По мене сеуште недоволно е активна и агресивна. Од Мицкоски треба да се побара одговорност и оставка со масовни мирни демонстрации зошто не само што не го исполни ветувањето дека ќе ги поништи „предавничките“ одлуки на СДСМ туку подолго од две години не нуди решение и земјата тапка во место за влез во ЕУ.

Јас имам 80 години и немав и немам претензии за функции или било што но сакам моите внуки и внуци и сите други внуци да бидат граѓани на ЕУ!

Толку од мене. Можеби заради лутината бев престрог кон Вас но ме провоциравте со некои Ваши ставови. А дел сте од кадрите пред Заев кои ја водеа СДСМ!

А статутот се менува на конгрес. На многу конгреси бевте учесник и можевте да го измените за да не биде „најобична чорба“!.

The post ТИТО БЕЛИЧАНЕЦ ВОЗНЕМИРЕН, БИЛ НАВРЕДЕН ОД АДНАН ЏАФЕРОВСКИ Сдсмовците во нови кавги appeared first on plusinfo.mk.

Привремено е одложена финалната пресметка меѓу таканаречените Скопско и Струмичко крило во Социјалдемократскиот сојуз, тврдат партиски извори кои себе си се лоцираат во неутралните сили на партијата, пишува Експрес.мк.

Според нив планот на Скопското крило бил до Нова година од највисоки партиски и владини позиции да се повлечат сите луѓе кои имаат врска со партијата а се во блиски релации со кланот Заеви.

За повод да се расчисти со кадрите кои се уште се под директна контрола на Зоран и Вице Заев требало да биде искористена изјавата на американската амбасадорка Ангела Агелер која индиректно ја обвини владата дека е тотално корумпирана или дека намерно замижува пред криминалот и корупцијата.

Веднаш потоа следуваше и изјавата на шефицата на Антикорупциската комисија Билјана Ивановска според која владините институции спровеле само 20 проценти од мерките од акциониот план за Антикорупциската стратегија кои владата сама ги одобрила.

Меѓу најкрупните ѕверки од тие што треба да си заминат наскоро а се блиски на кланот Заеви и во СДСМ веќе се сметаат за штетни, се најмалку двајца министри кои во последниве недели водат високо интензивни кампањи за своите активности на социјалните мрежи.

Двајцата министри и во партијата и во јавноста се доживуваат како значително корумпирани а за едниот има и конкретен предмет во Обвинителстовото за организиран криминал.

Кампањите на овие двајца највисок соработници на Заев кои се уште се во владата меѓу сопартијците на шега се коментираат како ,,Последните денови”.

Планот на Скопското крило е да направи чистки во врвот на партијата и пред јавноста да прикаже дека се расчистува со корумпираното крило под контрола на кланот Заеви по што би можела да започне подготовка за предвремени избори.

На сите во СДСМ им е јасно дека со ваков тренд во јавноста и без големи ,,метли” избори во редовниот термин мај 2024 ќе значат катастрофален пораз, тврдат партиски извори кои раните избори временски ги лоцираат во периодот кога ќе заврши чистката на ,,заевистите” односно мај-јуни идната 2023 година.

Спроведување на планот по кратка постапка привремено го спречиле дел од луѓето кои станале високи партиски функционери во времето кога партијата и владата ја водеше Зоран Заев кои барале промените да не бидат радикални. Меѓу медијаторите кои учествувале во одложувањето на пресметката е и еден крупен бизнисмен.

Пресметката меѓу двете моќни крила засега е одложена но не и целосно откажана и може да се случи веднаш по нова година, тврдат изворите на expres.mk кои се дел од поголемата групација во која се одвива конфликтот.

Колкав е судирот меѓу посочените две крила според истите извори најдобро може да се види преку нападот на вицепремиерката за добро владеење Славица Грковска на државниот јавен обвинител Љубомир Јовески, преку интервјуто на директорката на УЈП Сања Лукаревска која јавно критикуваше низа чекори на владата во финансиите и економијата, преку смената на директорката на Државниот пазарен инспекторат која беше заменета со човек кој студирал 18 години но и преку изборот на новиот директор на АНБ.

Средината на јануари по божиќните празници е следниот термин кога повторно може да дојде до ескалација меѓу двете сега веќе непомирливи фракции во СДСМ.

The post ЕКСПРЕС ОТКРИВА Одложена финалната пресметка на Скопското и Струмичкото крило во СДСМ appeared first on plusinfo.mk.

Тврдењата изнесени деновиве во написот објавен во порталот Expres.mk, под наслов „Владата призна дека Преспанскиот договор го урива македонскиот национален идентитет“, ја допираат таа проблематика, но во исто време претставуваат груба манипулација и конструкција на факти, со цел да се освојат ситни политикантски поени.

Не повикувајќи се на никакви извори, преку споменатиот напис, чиј автор е Горан Момироски, се пласира вест во јавноста дека станува збор за некаков „скандалозен допис до македонски организации во дијаспората“, во кој “македонската влада бара Македонците во странство да реагираат и да ги надминат катастрофалните последици на Преспанскиот договор по кој Македонците во многу случаи станаа Северномакенци, а македонската нација Северномакедонска“.

Но, не станува збор за никаков допис од Владата, туку за допис испратен до Агенцијата за иселеништво на РСМ од страна на Македонскиот сојуз во Шведска. Дописот е испратен согласно заклучоците од Годишното изборно собрание на Македонскиот сојуз во Шведска (МС), одржано во април годинава, на кое како гостин присуствуваше и директорот на Агенцијата за иселеништво Слободан Близнаковски. Проблематиката што се посочува во дописот на Сојузот на македонските друштва и клубови во Шведска, се однесува на примената на придавките и идентитетските одредници што произлегуваат од Преспанскиот договор. Во дописот, меѓу другото, се вели: Четири години по потпишувањето на Преспанскиот договор се забележува, не само во Скандинавија, туку и пошироко, дека термините и одредниците од Договорот од Преспа се проследени со интересна пракса на нивно користење и толкување во меѓународни рамки, гледано токму од аспектот на острите спротивставувања околу тврдењата дека Договорот не задира во прашањата на националниот идентитет.

По потпишувањето на Договорот, шведскиот Институт за јазик и народна меморија укажа дека со употребата на новото (слеано) име на државата, Nordmakedonien (Северна Македонија), ќе се јавуваат нејаснотии во однос на придавката и ознаката за националност. Како што беше забележано од страна на овој институт, можеше да се очекува скандинавските медиуми, без посуштинско и попрецизно познавање на одредбите во Договорот за името, да ги употребуваат слеаните ознаки – nordmakedonsk (северномакедонски/-ска) и nordmakedonier (Северномкедонци).

А тоа и се случува. Медиумите во Скандинавија  често известуваат со користење токму на придавката „северномакедонски “ политичари, уметници или спортисти, или пак кога се повикуваат на „северномакедонски медиуми“. Некои туристички агенцији во Данска, Норвешка и Шведска нудат аранжамни со посети на „северномакедонски винарии“, викенд-тури за Скопје и разгледување на спомениците со „сцени од северномакедонската историја“.

Македонскиот сојуз во повеќе наврати реагираше до медиумите по повод ваквата пракса на известување, по што уследија и извинувања од страна на Шведската телевизија и други медиуми, проследени со ветувања дека ќе се води сметка да не се повторуваат вакви и слични лапсуси и несоодветни идентитески термини во однос на македонскиот јазик и Македонците.

Токму затоа, имајќи го предвид гореизнесеното, се чини дека се отвора голем простор за македонската дипломатија, не само во однос на овие земји, туку и пошироко во слични околности во други земји и региони, да го покаже својот капацитет за да даде свој придонес во читањето и толкувањето на термините и идентитетските одрединци и нивната соодветна имплементација во секојдневниот вокабулар на странските медиуми, со кој директно и ефикасно се комуницира со пошироката јавност. Тоа несомнено би можело да биде и предизвик за дејствување и за бројните организации во дијаспората“, се констатира во дописот на Македонскиот сојуз од Шведска, кој Агенцијата за иселеништво деновиве го дистрибираше на адресите на иселеничките друштва, клубови и црковни оштини со кои располага во својата база на контакти.

Тоа е вистинскиот бекграунд зад споменатиот допис, кој апослутно не е напишан во кабинетот на македонската Влада, туку во канцеларијата на Македонскиот сојуз во Шведска. Можеме да се согласиме дека не е спорно оти станува збор за исклучително важна проблематика што бара голем и интензивен ангажман, координиран, пред сè, од страна на македонската Влада и надлежните министерства, и дека дефинирање на една таква рамка на активности, со која би биле опфатени и поттикнувани да дадат свој придонес и македонските организации во дијаспората, несомнено би било од полза.

Но сосема е јасно и тоа дека порталот Express.mk со својот напис пласира паушални, непроверени и неточни тврдења, настојувајќи да изнеси оценки во јавноста дека станува збор за „скандалозни“ политики на Владата, која наводно, како што се истакнува во објавениот напис, „преку Агенцијата за иселеништво бара Македонците во дијаспората, кои никогаш не го поддржаа и прифатија договорот со Грција, да ги елиминираат катастрофалните последици по македонскиот национален идентитет“.

Со таков пристап Express.mk само ја потврдува востановената практика на силни клиентелистички врски меѓу одредени политички партии и медиуми во Македонија, односно практика што добива потврда токму преку ваков вид изнесување (не)проверени факти во јавноста.

Но, во крајна линија, останува нејасно на каков начин со вакви написи ù се помага на дијаспората? Ефектот е пред сè предизвикување на штета и правење мечкина услуга на македонската дијаспора, преку ишкање на „Северџаните“, во чии редови во последните години се засилија недоразбирањата и разидувањата поради општата политизација и политичките подлеби во татковината, а што многумина самоповикани „борци за вистината“, според примерот на авторот на објавениот напис во Express.mk, го злоупотребуваат за постојано да го стеснуваат контекстот во чии рамки македонските организации во дијаспората настојуваат да ги задржат и сочуваат своите контакти и соработка со институциите во татковината.

The post Ишкање на „Северџаните“ appeared first on plusinfo.mk.