Три неексплодирани гранати од двете светски војни биле пронајдени во изминатите два дена на различни локации во гевгелиско и битолско, а пиротехничари од Дирекцијата за заштита и спасување безбедно ги отстраниле, информира МВР во дневниот билтен.

Во првиот случај, жител на Гевгелија пријавил дека во нива на местото викано „Ќупот“ пронашол граната. По интервенцијата на пиротехничар било утврдено дека станува збор за граната со калибар од 100 милиметри, која потекнува од Првата светска војна.

Истовремено, и жител на селото Давидово, гевгелиско, пријавил дека во нива во атарот на селото пронашол неексплодирана граната. По безбедното подигнување било констатирано дека се работи за граната со калибар од 75 милиметри, исто така од Првата светска војна.

Еден ден подоцна, во битолското село Лавци, 53-годишна битолчанка при чистење на плевна пронашла стара граната. Пиротехничар од Дирекцијата за заштита и спасување – Битола ја подигнал експлозивната направа, а проверките покажале дека потекнува од Втората светска војна.

Полицијата потсетува дека при пронаоѓање неексплодирани експлозивни средства граѓаните не треба да ги допираат или преместуваат, туку веднаш да го пријават случајот на надлежните служби.

The post СТАРИ ГРАНАТИ ПРОНАЈДЕНИ ВО ГЕВГЕЛИСКО И БИТОЛСКО Две од Првата, една од Втората светска војна appeared first on plusinfo.mk.

Министерството за внатрешни работи доби донација од околу еден милион евра од Амбасадата на САД, наменета за Единицата за откривање и демонтирање на експлозивни средства.

Донацијата беше предадена во кругот на МВР, во присуство на министерот за внатрешни работи Панче Тошковски, кој оцени дека станува збор за значајно зајакнување на капацитетите на полицијата.

– Ова е уште една потврда за силното стратешко партнерство и пријателството меѓу Македонија и Соединетите Американски Држави. Со оваа високософистицирана опрема директно вложуваме во заштита на човечки животи и во безбедноста на нашите полициски службеници кои се справуваат со најсложени задачи – изјави Тошковски.

Опремата вклучува роботи за неутрализација на експлозивни направи, специјални бомбашки одела, телескопски манипулативни раце, детектори и рендген-уреди за откривање експлозивни средства, фибер-оптички камери, како и специјализирано возило за транспорт.

Министерот упати благодарност до Амбасадата на САД за континуираната поддршка и обуките што ги добива македонската полиција.

– Продолжуваме заедно да ги јакнеме капацитетите на МВР и да градиме посигурна и побезбедна држава – додаде Тошковски.

Од МВР оценуваат дека новата опрема значително ќе ја зголеми ефикасноста и безбедноста на единицата која интервенира во најризичните ситуации.

The post 📷 НОВИ РОБОТИ И БОМАШКИ ОДЕЛА ЗА СПЕЦИЈАЛЦИТЕ Американска донација од милион евра за македонската полиција appeared first on plusinfo.mk.