Љубљана ќе биде град-партнер на Скопје и ќе му понуди експертска помош во сите области, особено во планирањето и спроведување европски проекти, откри кандидатот за градоначалник на Скопје на ВМРО-ДПМНЕ Орце Ѓорѓиевски,

Ѓорѓиевски на својот Фејсбук профил објави дека се сретнал со актуелниот градоначалник на Љубљана Зоран Јанковиќ.

„Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ. Средбата помина во пријателска атмосфера, при што разменивме значајни искуства и визии за идната соработка помеѓу Скопје и Љубљана. Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.

Посебен акцент ставивме на најголемите предизвици со кои се соочува нашиот град – јавниот превоз и чистотата. Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.

Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти. Верувам дека преку ова партнерство ќе изградиме поефикасен и поевропски град Скопје, достоен за своите граѓани.

Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, напиша Ѓорѓиевски.

The post ГРАДОНАЧАЛНИКОТ НА ЉУБЉАНА МУ ВЕТИ ЕКСПЕРТСКА СОРАБОТКА НА ОРЦЕ ЃОРЃИЕВСКИ Да изградиме поефикасно Скопје, вели кандидатот за градоначалник на ВМРО-ДПМНЕ appeared first on plusinfo.mk.