Граѓаните на Скопје добиваат нова можност за пријавување диви депонии, проблеми со контејнерите и други еколошки проблеми преку дигиталната платформа „ЕкоСкопје“. Градоначалникот Орце Ѓорѓиевски ја промовираше платформата, која треба да им овозможи на градските служби полесно да ги лоцираат проблемите и поорганизирано да постапуваат по пријавите.

Преку веб-страницата ekoskopje.skopje.gov.mk, граѓаните ќе можат да испратат пријава со точна локација, фотографија и краток опис на проблемот. По поднесувањето, ќе можат да го следат и статусот на пријавата.

Ѓорѓиевски вели дека платформата треба да ја подобри комуникацијата меѓу граѓаните и градските служби, но и да ја зголеми одговорноста на институциите. Според него, нејзината вредност нема да се мери само според бројот на поднесени пријави, туку пред сè според решените проблеми и промените што скопјани ќе ги почувствуваат во своите населби.

– Зад секоја пријава стои наш сограѓанин кој очекува решение – порача градоначалникот, повикувајќи ги граѓаните да ја користат платформата и да доставуваат точни информации за проблемите што ги забележуваат.

Покрај дигиталните алатки, Град Скопје најавува вложувања и во опрема за одржување на јавната чистота. Според Ѓорѓиевски, набавени се 3.300 нови контејнери, што тој ја оценува како најголема ваква набавка во историјата на градот. Набавени се и нови камиони за собирање смет, цистерни и метларки.

Во тек е и постапката за воведување видеонадзор, кој, според најавата на градоначалникот, треба да помогне во откривањето на лицата што создаваат диви депонии и во преземањето мерки против нив.

Ѓорѓиевски нагласува дека одржувањето на јавната чистота е заедничка одговорност на институциите и граѓаните. Градот, како што наведува, треба да обезбеди услови и да постапува по пријавите, а граѓаните да придонесуваат за зачувување на јавните површини.

За создавањето на „ЕкоСкопје“, градоначалникот им се заблагодари на Европската Унија за финансиската поддршка, на ЛЕАД, како и на младиот Андреј и тимот што работел на идејата. Тој порача дека Град Скопје ќе продолжи да поддржува иницијативи на младите што можат да придонесат за развојот на градот.

The post СКОПЈАНИ ЌЕ ПРИЈАВУВААТ ЕКОЛОШКИ ПРОБЛЕМИ ПРЕКУ АПЛИКАЦИЈА „ЕкоСкопје“ ги вклучува граѓаните во борбата за почист град appeared first on plusinfo.mk.