Девет европски земји побараа од Европската комисија да ја продолжи привремената флексибилност за новиот Систем за влез/излез (EES), предупредувајќи дека државите сè уште не се целосно подготвени за негова целосна примена.

Во заедничко писмо од 7 јули, во кое увид имал Политико, Белгија, Франција, Германија, Грција, Италија, Малта, Холандија, Португалија и Швајцарија му порачуваат на еврокомесарот за внатрешни работи Магнус Брунер дека првите месеци од функционирањето на системот покажале „значителни потешкотии“ кои не смеат да се потценат.

Иако ја поддржуваат имплементацијата на новиот Систем за влез/излез, министрите бараат Европската комисија да им овозможи на земјите и по 6 септември 2026 година да продолжат да го користат итниот механизам, кој според сегашните правила тогаш истекува.

Овој механизам им овозможува на граничните служби, во исклучителни ситуации, привремено да го суспендираат земањето отпечатоци од прсти и скенирањето на лицето за да се намалат гужвите на граничните премини, додека и натаму се евидентира секој патник што влегува или излегува од Шенген-зоната.

Во писмото министрите бараат Европската комисија навреме да достави и писмени гаранции дека оваа можност ќе остане во сила и по истекот на сегашниот рок.

Портпаролот на Европската комисија, Маркус Ламерт, изјави дека Комисијата ја поздравува „експлицитната посветеност“ на земјите за целосна примена на системот и систематска регистрација на сите патници кои не се државјани на Европската Унија.

Тој потсети дека законодавството веќе предвидува одредени флексибилности, меѓу кои и можноста привремено да се прекине собирањето биометриски податоци во периоди на голем метеж, и нагласи дека Комисијата останува во „близок и конструктивен контакт“ со земјите кои имаат проблеми на одделни гранични премини.

– Постои силна заедничка волја системот успешно да профункционира насекаде – изјави Ламерт.

Писмото доаѓа во време кога аеродромите, авиокомпаниите и фериботските оператори предупредуваат дека новиот систем предизвикува долги редици и оперативни проблеми во екот на летната туристичка сезона. Според претставниците на индустријата, техничките и оперативните предизвици најверојатно нема да бидат целосно надминати до почетокот на септември.

Засега Европската комисија не најавува дека планира да го продолжи рокот за користење на сегашните флексибилности по 6 септември 2026 година.

The post НОВИТЕ ГРАНИЧНИ КОНТРОЛИ ПРЕДИЗВИКУВААТ ХАОС Девет земји бараат повеќе време за новите шенгенски проверки appeared first on plusinfo.mk.

Европската комисија воведува „флексибилен ЕЕС“ за да ги ублажи застојот и долгите чекања на дел од границите и аеродромите. Националните власти ќе можат привремено да ја суспендираат биометриската регистрација во случаи кога редиците ќе станат предолги, но без укинување на стандардните гранични контроли.

Портпаролот на Европската комисија, Маркус Ламерс, соопшти дека Брисел веќе работи со земјите-членки за надминување на оперативните проблеми што се појавија по воведувањето на системот за влез и излез (EES).

Тој најави и технички состанок со претставници на воздухопловната индустрија за да се разгледаат предизвиците што ги создава новиот режим на контрола.

1.000 лица оценети за ризични, не влегле во ЕУ

Според Ламерс, новиот систем веќе покажал конкретни резултати во областа на безбедноста.

– Имаме нов систем што ни овозможува идентификација и вкрстена проверка на биометриските податоци. Во изминатите неколку месеци идентификувавме околу 1.000 лица кои биле оценети како безбедносен ризик и поради тоа не влегле во Европската Унија – изјави Ламерс.

Тој нагласи дека ваква проверка не била можна со стариот систем базиран на печати во пасошите.

Што значи „флексибилен ЕЕС“?

Најважната новина е што локалните власти ќе можат привремено да ги запрат дополнителните биометриски процедури, како фотографирањето и земањето отпечатоци од прсти, кога ќе се појават прекумерни доцнења.

Тоа нема да значи укинување на контролите, туку прилагодување на темпото на регистрација за да се избегне колапс на премините и терминалите.

Одлуката за таков чекор ќе ја носат националните служби директно на терен.

– Ако времето на чекање ги надмине вообичаените рамки, тогаш надлежните ќе треба да проценат дали е потребно привремено суспендирање на биометриската регистрација – објасни Ламерс.

Брисел ги отфрла критиките

Иако медиумите во повеќе европски земји објавија дека ЕЕС значително ги продолжува редиците и создава дополнителни проблеми за патниците, Европската комисија не се согласува со таквите оценки.

Од Брисел тврдат дека дел од проблемите на границите постоеле и пред воведувањето на новиот систем и дека придобивките за безбедноста се далеку поголеми од привремените тешкотии.

Сепак, одлуката за воведување „флексибилен ЕЕС“ покажува дека Комисијата признава оти новиот систем бара дополнителни прилагодувања за да функционира без сериозни последици за патниците.

The post ХАОСОТ СО ЕЕС СИСТЕМОТ ГО НАТЕРА БРИСЕЛ ДА ВОВЕДЕ „ФЛЕКСИБИЛНОСТ“ Земјите ќе можат привремено да ја прескокнат биометриската регистрација appeared first on plusinfo.mk.

На најпрометниот граничен премин на пат кон Грција, „Богородица“ – „Евзони“, утрово туристите чекаат околу еден час, при што не сите поминуваа низ системот EES, јави Фокус.

Патниците кои ја преминале границата во раните утрински часови денеска известуваат дека доцнењето на граничниот премин кон Грција било помеѓу 40 и 65 минути.

Фотографирањето се прави главно само за оние кои сè уште не се во системот EES, другите поминуваат побрзо, обично со отпечаток од десната рака, велат туристите кои ја преминале грчката граница.

Целосната имплементација на системот EES на шенгенските граници официјално започна на 10 април, но грчките власт најавија негова привремена суспензија кога бројот на возила на граничниот премин е преголем.

The post ЧЕКАЊЕТО НА „БОГОРОДИЦА“ ОД 40 МИНУТИ ДО ЧАС Дигиталните проверки се забрзуваат appeared first on plusinfo.mk.

Министерот за надворешни работи и надворешна трговија Тимчо Муцунски денеска нагласи дека на највисоко ниво, и билатерално и во форматите поврзани со Европската Унија, се водат разговори за Европскиот систем за влез/излез (ЕЕС) и се бара решение, особено за летниот период, при тоа потенцирајќи дека не се точни информациите за индивидуално исклучување на одредени земји од овој систеем.

– Имаме разговори и со институциите на Европската Унија и со земјите членки, за во летниот период, кога ќе настанат најголемите гужви, да постои некаков систем преку кој ќе има олеснувања. Во моментот, бидејќи ништо не ни е официјално потврдено, за жал, и јас ништо не можам официјално да потврдам, но очекуваме како регион, соработувајќи и со земјите членки, кои и самите не сакаат вакви гужви, да има подобри услови од тие што ги имаше во последниот период – рече Муцунски на собраниската седница, посветена на опозициски пратенички прашања, одговарајќи на прашање на пратеничката од СДСМ Сања Лукаревска за тоа каков одговор добиле во врска со одложувањето на EЕС-системот за нашата држава.

Тој посочи дека во текот на претходната недела бил на состанок на министрите за надворешни работи на земјите-членки на ЕУ со земјите од Западен Балкан, при што лично тој го отворил ова прашање.

– Присуствував и на состанок на министрите за надворешни работи во форматот „Пријатели на Западен Балкан“ во Братислава. Лично бев првиот министер од регионот кој го отвори ова прашање. Исто така, разговарам и билатерално со земјите од регионот. Како еден пример, министерот за внатрешни работи Тошковски пред неколку недели исто така беше во Грција, каде што разговаравме и дискутиравме како да се најде решение колективно за целиот регион. Зошто велам колективно? Затоа што веста што излезе дека граѓаните на Србија се исклучени од ЕЕС, е лажна вест, неточна информација. Точно е дека се појави во неколку медиуми, но јас наредниот ден таа информација ја нареков политички естраден настап, затоа што е апсолутно неточна – рече Муцунски.

Тој додаде дека согласно правилата на Европската Унија, таков тип на индивидуален исклучок, прво, не може да се направи, а второ, ако се погледнат условите на граничните премини, таква одлука не може да се имплементира. Додаде дека кога ќе се создаде гужва, не може да се направи една лента со колона само за граѓани на одредена земја.

– Информацијата за индивидуално исклучување на одредени земји е неточна, односно лажна вест, што се пласираше во одредени медиуми. Јас тоа го видов од медиуми во соседна Србија, затоа секогаш треба да бидеме внимателни кога читаме вакви информации и да ги следиме официјалните податоци и информации што доаѓаат од ЕУ, од земјите членки на ЕУ, но и од македонските институции – нагласи Муцунски.

Тој рече дека се согласува со пратеничката дека изминатиот месец, особено во викендите, нашите граѓаните се соочуваат со големи предизвици на граничните премини со земјите-членки на ЕУ и тоа не само во нашата држава, односно на излез или влез од нашата држава, туку и во целиот регион.

– Слична ситуација како што имаше на македонско-грчката граница, имаше и на границите помеѓу Црна Гора и Хрватска, помеѓу Србија и Хрватска и да не ги набројувам другите гранични премини – рече тој и додаде дека овие метежи влијаат и врз граѓаните на земјите-членки кои патуваат во овој период.

The post НИ ЗА СРБИ НИ ЗА НИКОГО НЕМА „ПОШТЕДА“ ОД БИОМЕТРИСКИОТ ШЕНГЕН Муцунски вели дека се шират лажни вести за паузирање на ситемот летово appeared first on plusinfo.mk.

Туристичката комора при Сојузот на стопански комори на Македонија (ССКМ) официјално упати барање до Министерството за туризам на Република Грција за привремено одложување на примената на новиот Entry/Exit System (EES) на граничните премини за македонските државјани во периодот од 1 јуни до 1 септември 2026 година.

Иницијативата доаѓа по реакциите и укажувањата од туристичкиот сектор во земјава, кој предупредува дека евентуалната примена на системот во шпицот на летната туристичка сезона може да предизвика значителни застои на граничните премини, со чекања од повеќе часови. Ова, како што посочуваат туристичките работници, директно би влијаело врз квалитетот на туристичкото искуство, но и би можело да резултира со откажување на веќе резервирани аранжмани за летување во Грција.

– Грција е традиционално најзначајна туристичка дестинација за граѓаните на Македонија, а непречениот проток на патници е од суштинско значење за одржување на стабилноста и развојот на туристичката индустрија. Затоа, бараме разбирање и разгледување на можноста за временско одложување на имплементацијата на системот во текот на најфреквентниот период, посочуваат од Туристичката комора при ССКМ.

Нагласуваат дека иницијативата е во насока на зачувување на добрососедските односи и поддршка на економската соработка меѓу двете земји, особено во делот на туризмот, кој претставува значаен сегмент за регионалната економија.

Туристичката комора очекува позитивен одговор од грчките институции, со цел обезбедување непречено движење на туристите и успешна реализација на претстојната летна сезона.

Ослободување од ЕЕС проверки при патување во Грција во текот на летните одмори, побара и Националното здружение на туристички агенции на Србија (JUTA). Повеќе од еден милион српски туристи, кои секое лето одат на одмор во Грција, се надеваат дека ќе ги избегнат километарските редици на граничните премини.

Грчката влада веќе одлучи дека британските граѓани нема да мора да поминуваат низ биометриски проверки при влегување во земјата како дел од имплементацијата на новиот европски ЕЕС за да се избегне можниот метеж на границите и аеродромите. Грција минатата година ја посетиле речиси пет милиони британски туристи.

The post ГРЦИЈА ДА ГО ПАУЗИРА ГРАНИЧНИОТ ЕЕ-СИСТЕМ ЗА МAКЕДОНСКИTE ГРАЃАНИ Официјално барање од Туристичката комора до Атина appeared first on plusinfo.mk.

Примената на новиот систем за биометриска регистрација и контрола на патници од трети земји, согласно европската директива „Систем за влез/излез (Entry/Exit System)“, доведе до срамни сцени: редици, метеж, нервоза и на крај, изливи на гнев кон оние кои не се виновни-полицајците, кои уште еднаш функционираат како „вреќи за бокс“, пишува во соопштението од Унија на полицајци од Килкис (Кукуш), кои посочуваат дека е неприфатливо она што се случува последниве денови на влезно-излезните пунктови на Грција, јави дописничката на МИА од Атина.

Од синдикатот на полициските службеници од општината во чии рамки е и граничниот премин Евзони кон нашата земја, коментираат дека „уште еднаш, полицајците и граѓаните стануваат сведоци на импровизацијата, неорганизираноста и бесчувствителноста што често ја карактеризираат грчката држава“.

Посочуваат дека иако примената на конкретниот систем беше позната со години, не биле преземени никакви мерки од Грција за: „суштинско, правилно и навремено просторно унапредување на граничните премини Евзони и Дојран, за да се овозможи непречено спроведување на биометриските проверки и регистрација“; за надградба и на застарените интернет линии и на инфраструктурата, но и дека земјата не презела мерки, алтернативно да побара одложување на примената на системот сè додека не се унапредат потребните инфраструктури и мрежи.

– Ништо од ова не беше реализирано. Резултатот: веќе имаме срамни сцени на границите. Чекање, тензии, граѓани кои ги напуштаат своите возила за да се заврши регистрацијата, па дури и бебиња кои полицајци ги поставуваат пред камерите за земање податоци на самите сообраќајни ленти. И сето тоа, пред почетокот на туристичката сезона, кога колони возила и патници, во мнозинството државјани на трети земји, ќе пристигнат во земјата, соопштија од Унијата.

Велат дека потребно е итно дополнително зајакнување на граничните премини и нагласуваат дека ќе продолжат динамично да го истакнуваaт овој проблем.

Паралелно објавија и фотографии од граничниот премин Евзони со редици возила, но и редица туристи кои чекаат да бидат регистрирани преку новиот ЕЕС систем на ЕУ за државјани на трети земји.

Претседателот на Унијата на полициски службеници од Килкис Христос Карјотудис во разговор со дописничката на МИА од Атина, непосредно пред почетокот на пилотската имплементација на системот во октомври минатата година, предупреди дека ЕЕС може дополнително да го отежне функционирањето на преминот и оцени дека може да донесе и дополнителни доцнења и зголемување на времето на чекање на границите.

Фото: Унија на полицајци од Килкис

Минатата седмица, на 10 април започна целосна примена на ЕЕС системот на надворешните граници на Европската Унија, откако делумно почна да се применува од 12 октомври лани.

Влезот и излезот за државјани на трети земји се евидентира електронски, а системот ќе овозможи обработка на основни биометриски податоци (отпечатоци од прсти и фотографија) сè со цел побрза идентификација и поефикасно следење на дозволениот престој во согласност со правилото 90 дена во период од 180 дена.

The post 📷 „ЗА СРАМОТА СМЕ, НИШТО НЕ ФУНКЦИОНИРА, А НИЕ СМЕ ВРЕЌИ ЗА БОКСИРАЊЕ!“ На грчките полицајци им прекипе од новиот систем за гранична контрола appeared first on plusinfo.mk.

Европската Унија влегува во нова фаза на контрола на патувањата, со значајни промени што директно ќе ги засегнат милиони граѓани од земјите со безвизен режим, меѓу кои и Македонија. Од последниот квартал на 2026 година, секој патник кој планира краткорочен престој во Шенген-зоната ќе мора претходно да обезбеди одобрение преку системот ETIAS, додека веќе од 10 април започнува целосната примена на EES, кој ќе го евидентира секое влегување и излегување од Унијата.

Новиот режим носи суштинска промена во начинот на кој се контролираат патниците, бидејќи проверките повеќе нема да се вршат само на граница, туку уште пред патувањето. Апликацијата за ETIAS ќе се поднесува онлајн, достапна 24 часа дневно, а системот автоматски ќе ги анализира внесените податоци, вклучително лични информации, податоци од биометриски пасош и историја на патувања. За првпат, како дел од овој процес, ќе се применуваат и автоматизирани здравствени проверки, чија цел е рано откривање на потенцијални епидемиски ризици.

Европските власти нагласуваат дека системот не собира детални медицински досиеја, туку работи со индикатори за ризик поврзани со глобални здравствени предупредувања и движења на патници од ризични региони. Податоците што ќе ги доставуваат патниците ќе се споредуваат со бази на информации што ги користат европските институции, под надзор на European Commission и граничните служби на земјите членки.

Во рамки на апликацијата, патниците ќе треба да одговорат и на прашања поврзани со претходни патувања, евентуални проблеми со имиграциски власти, како и посети на региони погодени од конфликти, нестабилност или здравствени кризи. Овие информации служат за проценка дали постои потенцијален ризик пред лицето воопшто да пристигне на европска територија.

За повеќето апликанти, процесот ќе биде брз и автоматизиран, со одобрение што се издава во рок од неколку минути. Сепак, доколку системот детектира одредени ризични индикатори, апликацијата може да биде проследена на дополнителна проверка од националните власти, што може да значи подолг процес или барање за дополнителни информации. Во ограничен број случаи, можно е и одбивање на барањето.

Одобрението преку ETIAS ќе чини 20 евра и ќе важи за повеќе патувања, сè додека пасошот на патникот е валиден. Но, и покрај тоа што претставува предуслов за патување, ова овластување не гарантира автоматски влез во Европската Унија, бидејќи конечната одлука останува во надлежност на граничната полиција на самите гранични премини.

Паралелно со ова, системот EES, кој започнува со работа со полн капацитет на 10 април, ќе функционира непрекинато и ќе ги заменува традиционалните печати во пасошите со дигитална евиденција. Овој систем ќе овозможи попрецизно следење на времетраењето на престојот и ќе помогне во спречување на злоупотреби на дозволениот престој во Шенген-зоната.

The post ПРЕД СЕКОЕ ПАТУВАЊЕ ВО ЕУ ЌЕ МОРА ДА БАРАТЕ ОДОБРЕНИЕ ОН-ЛАЈН Новите правила предвидуваат и здравствена контрола appeared first on plusinfo.mk.

Новиот систем на ЕУ за влез и излез (ЕЕС), чија етапна имплементација на надворешните граници на Шенген-зоната започна лани во октомври, „предизвика значителна непријатност кај патниците“ на кои им се земаат биометриски податоци, предупреди Европскиот огранок на Меѓународниот совет на аеродроми (АЦИ Европа).

Според ЕЕС, државјаните на земји кои не се членки на ЕУ при првото преминување на Шенген-границата по почетокот на имплементацијата мора да бидат фотографирани и да им се земат отпечатоци од прсти, со цел електронско регистрирање на податоците. Имплементацијата на системот трае шест месеци и треба да заврши на 10 април 2026 година, кога ЕЕС ќе се применува на сите гранични премини, а печатите во пасошите ќе бидат целосно заменети со електронски записи.

Постепената имплементација од утре влегува во нова фаза, во која електронски треба да бидат регистрирани најмалку 35 проценти од државјаните на трети земји кои ја минуваат границата на Шенген-зоната. Според аеродромите во ЕУ, ова може да предизвика застои и значителни одложувања во движењето на патниците.

АЦИ Европа предупредува дека стапувањето во сила на ЕЕС во октомври веќе создаде проблеми на голем број аеродроми, а од утре се очекуваат уште поголеми оптоварувања.

– Воведувањето на ЕЕС доведе до зголемување на времето потребно за гранични проверки на аеродромите и до 70 проценти, со чекање што во шпиц-периодите достигнува и до три часа. Новиот модел што стапува на сила сигурно ќе создаде уште полоши услови – изјави генералниот директор на АЦИ Европа, Оливие Јанковец.

Портпаролката на бриселскиот аеродром „Завентем“, Ихсане Лехли, изјави дека воведувањето на ЕЕС директно влијае врз времето на чекање и ја зголемува потребата од доволен број вработени на граничната контрола.

– Максималното време на чекање при пристигнување може да достигне и до три часа, а забележавме и зголемување на чекањето при заминување – нагласи Лехли.

Од друга страна, Европската комисија ги отфрла тврдењата дека ЕЕС предизвикува сериозни застои, наведувајќи дека системот „во голема мера функционира без проблеми“.

– Од самиот почеток, системот работи стабилно, дури и за време на празничните шпицови. Почетните предизвици, типични за вакви нови системи, беа навремено решени. Со ЕЕС точно знаеме кој, кога и каде влегува во ЕУ – изјави портпаролот на Европската комисија за внатрешни работи, Маркус Ламерт.

Сепак, практиката покажува одредени слабости. За време на божиќните и новогодишните празници, португалските власти привремено го суспендираа ЕЕС на аеродромот „Умберто Делгадо“ во Лисабон и ангажираа воен персонал за зајакнување на граничната контрола.

Проблеми беа пријавени и на римскиот аеродром „Фјумичино“, каде што аеродромската управа оцени дека оперативните услови се многу сложени и доведуваат до значително продолжување на времето за проверки.

Шпанската конфедерација на хотели и туристички сместувачки капацитети (Асхотел) побара од Министерството за внатрешни работи да го зголеми бројот на гранични полицајци за да се избегнат „тесни грла“ при контролите.

– Неразумно е туристите, по неколкучасовно патување, да чекаат уште еден или повеќе часови за влез во земјата – изјави претседателот на Асхотел, Хорхе Маричал.

Шпанското Министерство за внатрешни работи, пак, соопшти дека ЕЕС се применува на целата територија без пријавени редици или сериозни инциденти.

И операторот на двата најголеми аеродрома во Париз – АДР – соопшти дека засега нема забележано проблеми, наведувајќи дека „не е регистриран хаос или зголемено време на чекање“.

The post ДО 3 ЧАСА СЕ ЧЕКА ЗА РЕГИСТРИРАЊЕ ВО ШЕНГЕН ЗОНАТА Од утре се очекуваат уште поголеми редици на аеродромите appeared first on plusinfo.mk.

Европската комисија денеска соопшти дека донела одлука од 12 октомври 2025 година да започне постепената примена на новиот Систем за влез и излез (ЕЕС) на надворешните граници на Шенген зоната.

Како што се наведува во соопштението, ЕЕС е напреден технолошки систем кој дигитално ќе ги евидентира влезовите и излезите на државјани на трети земји, вклучително и македонски граѓани, кои патуваат на краток престој во некоја од 29-те држави од Шенген зоната.

ЕЕС ги регистрира биометриските податоци, како што се отпечатоци од прсти и фотографија од лицето и други информации за неговото патувањето, со што постепено ќе се заменува сегашниот систем на удирање печат во пасошите.

Според ЕК, ЕЕС системот ќе придонесе за модернизација и подобро управувањето со надворешните граници на ЕУ, ќе обезбеди сигурни податоци за граничните контроли, систематски ќе укажува лица кои го пречекориле дозволениот престој во земјите од Шенген зоната и ќе овозможи откривање на случаи на измами со документи и идентитет.

– ЕЕС на тој начин ќе придонесе за спречување на нерегуларната миграција и заштита на безбедноста на европските граѓани. Дополнително, со зголемената употреба на автоматизираните гранични проверки, патувањето ќе стане полесно и побезбедно за сите. Новиот систем ги исполнува највисоките стандарди за заштита на податоците и приватноста, осигурувајќи дека личните податоци на патниците остануваат заштитени и безбедни, се додава во соопштението.

Од 12 октомври земјите членки ќе започнат со постепено воведување на ЕЕС во наредните шест месеци, период во која граничните власти прогресивно ќе ги зголемуваат бројот на регистрирани податоци на државјаните на трети земји што ги преминуваат границите на Шенген зоната. По истекот на овие шест месеци, во април 2026 година, ЕЕС системот ќе функционира целосно и ќе бидат регистрирани сите преминување на кој било граничен премини.

Целта на постепеното воведување на EEС е да им се овозможи на граничните власти, транспортерите и засегнатите патници да се прилагодат на новите процедури.

– Со лансирањето на EEС во октомври, ЕУ презема значаен чекор кон постигнување на својата цел за создавање побезбеден и поефикасен систем за управување со границите, посочува ЕК.

ЕЕС системот е дел од пакетот „Паметни граници“, кој има за цел да го подобри управувањето со надворешните граници на ЕУ со користење на најсовремена технологија и иновативни решенија. Пакетот ги вклучува EEС, Европскиот систем за информации и авторизација на патувањата (ЕТИАС) и Системите за автоматска гранична контрола (АБЦ).

– Заедно, овие системи ќе овозможат поефикасно, побезбедно и поудобно искуство за сите патници при патување до и од ЕУ, додава ЕК во соопштението.

The post НА 12 ОКТОМВРИ СЕ МЕНУВААТ ПРАВИЛАТА НА ГРАНИЦИТЕ Започнува примената на новиот Систем за влез и излез од Шенген зоната appeared first on plusinfo.mk.

Преговарачите на Советот на ЕУ и на Европскиот парламент постигнаа договор за регулатива со која се отвора патот за постепено воведување на Системот за влез/излез (EES) – заеднички електронски систем што ќе ја замени дотраената практика на ставање печати во пасошите. Откако регулативата ќе биде формално одобрена од двете институции, Европската комисија ќе донесе посебна одлука за почеток на транзицијата, која ќе трае 6 месеци.

EES е централизирана дигитална база на податоци на ЕУ која ќе евидентира и ќе складира информации за датумот, времето и за местото на влез и излез на сите државјани од трети земји кои ја поминуваат надворешната граница на ЕУ.

Системот автоматски ќе го пресметува времетраењето на дозволениот престој (максимум 90 дена во рок од 180 дена) и ќе испраќа предупредувања до земјите-членки кога некое лице го надминува дозволениот период.

Кого ќе опфати новиот систем?

Новиот систем ќе се применува на две категории патници:

• Лица од трети земји на кои им е потребна виза за краткорочен престој;
• Лица ослободени од виза, но кои не се државјани на ЕУ – како што се и граѓаните на Македонија.

Со други зборови, македонските граѓани ќе бидат директно опфатени со новата регулатива при секое патување во Шенген зоната, дури и ако патуваат без виза.

Системот ќе овозможи автоматска и непречеклива проверка дали некој престојува повеќе од дозволеното, со што се укинува простор за манипулации со печати и неевидентирани престои.

Биометриски податоци: фотографирање и отпечатоци

При прв влез во ЕУ, службениците за гранична контрола ќе ги фотографираат патниците или ќе им ги скенираат отпечатоците од прсти. Овие биометриски податоци ќе се чуваат во дигитална архива и ќе се користат за следење на сите понатамошни влегувања и излегувања.

Постепено воведување – прво без биометрија, потоа целосна дигитализација

Поради неподготвеност на дел од земјите, стартот на системот, првично планиран за ноември минатата година, беше одложен. Комисијата сега предвидува постепено активирање:

Првите два месеца: земјите ќе можат да го користат системот без собирање биометриски податоци

По три месеци: најмалку 50% од граничните премини ќе мора да користат биометрија

До крајот на шестмесечниот преоден период: целосна примена на системот на сите гранични премини

Додека трае транзицијата, печатите во пасошите ќе продолжат да се користат, но оваа практика ќе стане минато штом EES се вгради во сите гранични пунктови.

The post НЕМА ВЕЌЕ „А КАДЕ Е ПЕЧАТОТ“ НА ГРАНИЦА Новата електронска гранична контрола на ЕУ ќе важи и за Македонија appeared first on plusinfo.mk.