Претседателот на ЗНАМ, Максим Димитриевски, изјави дека е подобро да се донесе Изборен законик отколку воопшто да не се постигне договор, нагласувајќи дека за тоа е потребен консензус меѓу сите политички чинители во земјата.

Одговарајќи на новинарско прашање во Штип дали наскоро може да се очекува усвојување на Изборниот законик, Димитриевски истакна дека ЗНАМ нема дилеми околу правото на глас на дијаспората на парламентарни и претседателски избори.

– Многу подобро е да донесете нешто, отколку да не донесете ништо – рече Димитриевски.

Тој нагласи дека правото на глас на македонските државјани кои живеат или работат во странство е уставно загарантирано.

– За нас како ЗНАМ, воопшто не е спорно гласањето на нашите граѓани кои живеат или работат привремено во странство, бидејќи тоа право им е дадено со Устав и им е загарантирано. Само треба да се изнајде формата и начинот како тие да го остварат тоа право. Зборувам за учество на парламентарни и претседателски избори. Во делот на локалните избори, лицата кои се резиденти на други држави, според нас, не треба да гласаат и не даваме согласност за таква мерка – изјави лидерот на ЗНАМ.

Во однос на предлогот Македонија да биде една изборна единица, Димитриевски рече дека неговата партија целосно го поддржува ваквиот модел.

– Како мал и нов политички субјект апсолутно го поддржуваме предлогот за една изборна единица. Доколку тој биде прифатлив и за останатите политички субјекти, секако дека ќе ја дадеме нашата поддршка – истакна тој.

На прашањето дали очекува политички договор за измените на Изборниот законик, Димитриевски рече дека тоа зависи од сите партии, а не само од ЗНАМ.

– Изненаден сум што оние кои најмногу зборуваа за потребата од измена на законот денеска повеќе ги гледаме по најлуксузните летувалишта во регионот, од каде испраќаат политички пораки дека не се согласуваат со измените и практично го блокираат процесот – рече Димитриевски.

Караванот „Европска ЗНАМ, Европска иднина, Европска Македонија“ продолжи во Штип

Димитриевски денеска присуствуваше и на третата панел-дискусија од караванот „Европска ЗНАМ, Европска иднина, Европска Македонија“, која се одржа во Штип.

Во своето обраќање тој порача дека европската иднина на државата не зависи од политички ветувања, туку од силни институции, владеење на правото и одговорни политики.

– Европа не е само политичка цел, туку начин на кој треба да ја организираме државата. Тоа значи институции што функционираат, правда што важи за сите, администрација што им служи на граѓаните и економија што создава можности. Македонија нема потреба да биде копија на никого. Треба да биде успешна држава што самоуверено ќе ги брани своите национални интереси и достоинствено ќе чекори кон Европа – изјави Димитриевски.

Тој додаде дека довербата на граѓаните се гради со конкретни резултати, а не со политички слогани.

– Политиката мора повторно да стане служба на граѓаните. Луѓето не очекуваат големи зборови, туку сигурност, подобри услуги, праведни институции и можност со својот труд да обезбедат достоинствен живот. Токму затоа ЗНАМ го избра потешкиот пат – патот на одговорноста, реформите и конкретната работа – нагласи претседателот на ЗНАМ.

На панел-дискусијата се обратија и генералниот секретар на ЗНАМ, Горан Минчев, и претседавачот на Централниот одбор, Игор Филков, кои зборуваа за реформите во јавната администрација, правосудството и владеењето на правото.

The post ДИМИТРИЕВСКИ СО СТАВ ЗА ИЗБОРНИОТ ЗАКОНИК Подобро е да се донесе Изборен законик отколку да нема решение appeared first on plusinfo.mk.

ВМРО-ДПМНЕ им предложило на опозициските партии во Парламентот да состават и да договорат текст и да им го дадат, а дека ВМРО-ДПМНЕ ќе ги прифати сите предлоги кои вклучуваат гласање на дијаспората со вклучени препораки од ОБСЕ и ОДИХР.

– Велеа сакаме една изборна едница ние велиме прифаќаме бланко, договорете се прифаќаме една изборна единица. Тоа е прво, второ им требале повеќе средства за финансирање на кампањата еве и тоа им прифаќаме, нема проблем, ние ќе се откажеме од нашиот дел делумно и тоа ќе го префрлиме кај опозициските партии. Начинот на гласање, како тие ќе одлучат тоа ќе им го прифатиме – рече премиерот истакнувајќи дека во моментот проблем е што опозициските партии немаат заеднички става.

Мицкоски кажа дека слуша разни информации и лаги и конструкции во јавноста од опозицијата, претежно од Левица кои, како што вели, како да сакаат да се оправдаат пред оние малкумина кои го давале гласот за нив затоа што учествувале во преговори и се договарале.

– И затоа што сега во суштина не изгледа Робеспјер, како што тие кажуваат, туку парите се проблем. Тоа е суштината – рече Мицкоски.

The post МИЦКОСКИ СО ПОРАКА ДО ОПОЗИЦИЈАТА Договорете текст за Изборниот законик, ќе прифатиме и релокација на пари за кампањите appeared first on plusinfo.mk.

Координаторот на пратеничката група на Левица, Борислав Крмов, најави дека Левица во понеделник официјално ќе ги покани опозициските партии на средба за Изборниот законик, со цел да се излезе со заеднички предлог за една изборна единица, стои во соопштение на Левица, кое МИА го пренесува интегрално.

– Прво и основно, ова е бегање од одговорноста на ВМРО-ДПМНЕ. Нема потреба да се состанува само опозицијата, треба сите. Но, во ред, ако веќе ни ја префрлаат топката, ние го прифаќаме предизвикот, ќе свикаме средба на опозициските партии. Планираме од понеделник официјално и да ги поканиме опозициските партии – истакна пратеникот Крмов.

The post ЛЕВИЦА ЌЕ ГИ ПОКАНИ ПАРТИИТЕ НА СРЕДБА ЗА ИЗБОРНИОТ ЗАКОНИК „Сите да најдат решение за една изборна единица“ appeared first on plusinfo.mk.

Претседателот на Левица во видео-интервју порача дека партијата е подготвена да прифати гласање на дијаспората по пошта, но исклучиво доколку се прифати воведување на една изборна единица.

Според него, доколку власта навистина сака политички компромис околу измените на Изборниот законик, тогаш компромисот треба да биде заемен:

– Еве му фрлена ракавица. Ајде, да изгласаме една изборна единица, ние ќе се сложиме на гласање на дијаспората по пошта за претседателски избори, како експериментален модел – изјави Димитар Апасиев.

Апасиев потсети дека Левица го покренала прашањето за една изборна единица уште на лидерската средба по Божиќ, оценувајќи дека тоа е хроничниот проблем на македонското изборно законодавство.

Според него претседателските избори се единствените избори што бараат цензус на излезност, како и дека претседателот ја претставува државата во меѓународните односи, поради што, според него, постои логика дијаспората да учествува токму во изборот на шефот на државата.

Лидерот на Левица тврди дека актуелната дебата за гласањето на дијаспората не била дел од четиримесечните преговори за измените на Изборниот законик, туку подоцна била наметната како едно од главните прашања.

The post AПАСИЕВ СО ПРЕДЛОГ ДО МИЦКОСКИ Една изборна единица и дијаспората да гласа по пошта appeared first on plusinfo.mk.

СДСМ го блокира процесот на изборни реформи, обвини пратеникот од Левица, Борислав Крмов, критикувајќи ја партијата поради отсуството од работната група за измени на Изборниот законик.

Крмов посочи дека работната група продолжила со работа и без присуството на СДСМ, а во фокусот ги стави предлозите за една изборна единица и препораките на ОБСЕ/ОДИХР.

„Ајде баш да видиме дали СДСМ ќе ги блокира предлозите од ОБСЕ/ОДИХР и една изборна единица. Дали целосно ќе се разоткријат како најобични опортунисти и политички позери без став“, напиша Крмов на Фејсбук.

Тој оцени дека работната група продолжила најконструктивно и без учество на претставниците на СДСМ кои поради незадоволство од укинувањето на Пржинската влада го бојкотираат процесот.

„СДСМ, многу ‘увредени’ од укинувањето на Пржинската влада, со нивното отсуство го блокираат процесот“, наведе пратеникот од Левица.

Крмов во објавата упати и иронична забелешка кон функционерите на СДСМ, Оливер Спасовски и Јован Митрески, поради нивно патување во Швајцарија.

„Тоа не го спречи двоецот Спасовски и Митрески да се прошетаат до Швајцарија каде ќе разгледуваат тешки ‘етички’ проблеми и дилеми. Може и тука требаше некое бесплатно патување да им понудиме, па можеби и ќе останеа“,  вели Крмов.

The post АКО ИМАШЕ НЕКОЕ ПАТУВАЊЕ, СДСМ ЌЕ ОСТАНЕШЕ ВО РАБОТНАТА ГРУПА ЗА ИЗБОРНИОТ ЗАКОНИК Да видиме дали ќе блокираат една изборна единица appeared first on plusinfo.mk.

ЗНАМ се залага да се воведе една изборна единица со изборен праг од 2 до 3 проценти, со што ќе се овозможи правична застапеност и на помалите политички субјекти и на независните пратенички листи, рече потпретседателката на движењете ЗНАМ, Весна Бендевска, на првата конститутивна седница на работната група за реформи во изборното законодавство.

Таа ја потврди заложбата на ЗНАМ за суштински и системски измени на изборниот модел во Македонија.

– Една изборна единица, всушност, беше и барање во одлуката на Уставниот суд – истакна Бендевска.

Таа нагласи дека цврст став на ЗНАМ е да се намали бројот на пратеници во законодавниот дом на 90, бројка што, како што посочи, ќе соодветствува на реалната големина на популацијата во државата.

– Го афирмирам односно реафирмирам ставот на Движење ЗНАМ за намалување на бројот на пратеници на 90 со што ќе се придонесе за рационализација на трошоците, материјални, финансиски и човечки, и ќе значи значителна придобивка за Буџетот на државата. Воедно, ќе се добие пофункционално, поефикасно и поконсолидирано законодавно тело, кое ќе биде во служба на побрз, поквалитетен и посериозен законодавен процес – потенцираше Бендвска.

Во врска со гласањето на дијаспората, таа потсети дека воведувањето на ваквиот модел беше проследено со зголемување на бројот на пратеници на 123, што, како што нагласи, отвори низа прашања за финансиската оправданост и за ефикасноста на изборниот процес во странство.

– Сведоци сме колку чини изборната постапка која подразбира испраќање избирачки одбори во дијаспората, при што бројот на гласачи во повеќе случаи не соодветствуваше со првичната намера и очекувањата – вели Бендевска.

ЗНАМ ќе продолжи да се залага за изборен модел што гарантира еднаква вредност на секој глас и институции што работат ефикасно, транспарентно и во интерес на граѓаните на Република Македонија, соопшти паријата.

The post ЗНАМ ПРЕДЛАГА ЕДНА ИЗБОРНА ЕДИНИЦА СО ИЗБОРЕН ПРАГ ДО 3 ОТСТО Да се намали бројот на пратениците на 90 appeared first on plusinfo.mk.

Во однос на законот за техничката влада, ставот на ЗНАМ е јасен, таа треба да биде укината. Вака изјави координаторот на пратеничката група на ЗНАМ Бобан Карапејовски по лидерската средба која денеска се одржа во просториите на Клубот на пратеници.

– Пржинската, техничка влада беше воведена како привремено решение во еден специфичен временски политички контекст со цел да се воведат фер демократски избори во политичка криза. Тие времиња се зад нас. По неколку успешни изборни циклуси се покажа дека државата има капацитет да организира фер и кизбори. Затоа, пржинската техничка влада веќе ја има отслужено својата цел – вели Карапејовски.

Тој истакна дека ЗНАМ смета дека иницијативата на премиерот Мицкоски за одржување лидерска средба е одговорен државнички чин на зрелост и, како што вели, ваквиот пристап е показател дека политичките актери ги ставаат во прв ред интересите на државата.

Карапејовски ја коментираше и идејата за една изборна единица на која се разговарало на средбата.

– За ЗНАМ е потребно ново модерно решение со една изборна единица што ќе обезбеди поголема еднаквост на гласот на секој граѓанин и пофер политичка застапеност. Истовремено мора јасно и прецизнод ас е регулира финансирањето на политичките партии особено оние застапени во собранието со цел да се обезбеди транспарентност.

ЗНАМ исто така дава силна поддршка на законите од реформската агенда, вели Карапејовски. Движењето смета дека потребен е политички консензус за овие закони бидејќи, како што вели тој, ЗНАМ верува дека стратешката цел на сите политички фактори мора да биде членството на Македонија во ЕУ.

– Особено го поддржуваме примената на законот „Сејф Сити“. Шт побрзо се донесе тој закон ќе бидат спасени човечки животи.

За народниот правобранител ЗНАМ смета дека функцијата мора да ја отслужува висококвалификувано лице со долгогодишно искуство. ЗНАМ охрабрува што побрзо избирање народен правобранител.

На прашањето зошто лидерот на ЗНАМ Максим Димитриевски не присуствуваше на средбата, Карапејовски вели дека Димитриевски имал закажани обврски надвор од државата и дека се работи за техничка работа.

– Но, битно е што движењето ЗНАМ учествува на средбата во координација со својот лидер – дециден е Карапејовски.

The post СТАВОТ НА ЗНАМ Е ЈАСЕН, ТЕХНИЧКАТА ВЛАДА ТРЕБА ДА СЕ УКИНЕ Движењето дава поддршка за една изборна единица и за сите реформски закони appeared first on plusinfo.mk.

Лидерот на Левица Димитар Апасиев очекува конструктивен дијалог на денешната лидерска средба што се одржува во Клубот на пратениците.

Како што изјави пред средбата, ќе ги изнесе веќе искажаните барања на Левица – измени на Изборниот законик, една изборна единица и укинување на Пржинската влада.

Левица, додаде Апасиев, има и други, економски барања, поврзани со барањата на синдикатите кои, исто така ќе бидат изнесени.

– Левица е прв пат поканета да учествува на лидерска средба. Ова ги задоволува нашите претходни барања – дека ние ќе учествуваме на лидерска средба само ако е во рамки на институциите, а не во хотели во Маврово, во европски или американски амбасади. Нашите барања веќе ги кажавме – промена на Изборниот законик неминовно за следните избори зашто Левица е единствената досега цензурирана партија во овие 35 години плурализам. Бидејќи првпат доаѓаме, не очекуваме ништо, знаејќи го досегашниот лицемерен однос на властодршците од ДПМНЕ, но секогаш има прва шанса, па така ние како веќе опозициска профилирана партија која единствена е во раст во минатите локални избори, очекуваме дека ќе има конструктивен дијалог и дека во наредните месеци ќе се променат законите што ние ги бараме – нагласи Апасиев.

За Левица, дополни, нема никакви дилеми кога станува збор за укинување на Пржинската влада.

– Што се однесува до Пржинската влада, кажавме дека немаме никаков проблем да ја укинеме зашто сметаме дека е бирократски остаток од едно време кога Македонија беше третирана како протекторат и оттука ни е сеедно дали се ДПМНЕ или СДСМ на власт. Ние секако „го јадеме стапот“ па не ни е неприфатливо да ја укинеме Пржинската влада и по тоа прашање немаме никакви дилеми, но за другите прашања ќе инсистираме комплетно да се прифатат нашите барања особено при шпекулациите дека ќе се распишуваат предвремени избори. Доколку се распишат со овој Изборен законик ние повторно ќе бидеме цензурирани и оттука е нашиот интерес да присуствуваме на оваа средба – истакна Апасиев.

На лидерската средба во Клубот на пратениците, што ја иницира премиерот и претседател на ВМРО-ДПМНЕ, Христијан Мицкоски, покрај Апасиев, учествуваат и лидерот на ДУИ Али Ахмети, генералниот секретар на ЗНАМ и министер за јавна администрација Горан Минчев, како и градоначалникот на Тетово, Биљал Касами од коалицијата „Вреди“.

Претседателот на СДСМ, Венко Филипче, кој го одби повикот на Мицкоски, не дојде на средбата.

The post АПАСИЕВ ОЧЕКУВА КОНСТРУКТИВНА ЛИДЕРСКА СРЕДБА Прифаќа да се укине Пржинската влада, има барања за Изборниот законик и за една изборна единица appeared first on plusinfo.mk.

Левица е за укинување на т.н. Пржинска влада и непотребните дополнителни заменици-министри со право на вето, зашто смета дека таа нема смисла и дека се претворила во алатка за меѓупартиско пазарење.

„Техничката влада функционира како фасада и привид на фер, демократски избори и плурализам, зад кој продолжуваат суштинската политичка нееднаквост, селективноста и цензурата. Затоа, укинувањето на техничката влада за нас е прифатливо само доколку оди рака под рака со вистински, а не декларативни демократски реформи. За почеток, воведување на една изборна единица, како единствен начин за секој глас да вреди подеднакво“, се наведува во соопштението од Левица.

Втор услов што го поставува оваа партија е „укинување на политичката цензура и обезбедување еднаков пристап до медиумско претставување за политичките субјекти“.

Партијата потсетува дека на последните избори, Левица беше единствената на која, поради „правна празнина“, ѝ беше оневозможено било какво политичко рекламирање.

„Прецизираме дека не сметаме дека институциите се созреани, ниту пак дека постојната пракса на ‘технички влади’ донесе фер, демократски и избори без институционални злоупотреби. Напротив, техничката влада се покажа како механизам за дополнителни злоупотреби и параван зад кој се задоволуваат апетитите на владејачките и коалициските структури на естаблишмент партиите“, се наведува во соопштението на Левица.

Оттаму порачуваат дека нема да учествуваат во шминкање на системот без да се испорачаат нужни реформи.

Левица потсетува дека „една изборна единица“ е и ветување на ВМРО-ДПМНЕ за овој мандат.

The post ЛЕВИЦА ПРИФАЌА ДА СЕ УКИНЕ ПРЖИНСКАТА ВЛАДА За возврат бара да се воведе една изборна единица appeared first on plusinfo.mk.

Пропадна обидот на либералката Моника Зајкова да се смени изборниот модел така што Македонија да биде една изборна единица, а да се гласа отворени листа. Предлогот-измените на Изборниот законик, предложени од ЛДП, доби поддршка од само 19 пратеници од опозицијата.

– Не е фер гласовите на околу 30.000 до 40.000 граѓани да одат во вода, само поради изборниот модел. Ова не е само политичка неправда, туку е уставна повреда на начелото за еднаквост на гласот – рече пратеничата Зајкова во образложение на законските измени.

Според Зајкова, демократијата ќе се унапреди ако постои можност граѓанинот да го бира директно својот пратеник преку отворени листи.

– Има страв од отворените листи кај оние кои со години ја градат својата моќ на неотчетност, на контролирани листи – рече Зајкова.

Пратениците на ВМРО-ДПМНЕ не гласаа „за“ за предлогот. Претседателот на партијата и премиер, Христијан Мицкоски денеска изјави дека тие поддржуваат изборите да се одржуваат во една изборна единица, а во неа да се влеваат и гласовите на дијаспората.

– Ние сме за тоа да имаме една изборна единица и да може и иселениците да учествуваат во еден таков изборен процес. Да немаме трошоци, да немаме повеќе изборни единици… Да има една и во неа да се влеваат сите гласови – и на резидентното население, но и на онаа дијаспора којашто ќе сака да учествува – рече Мицкоски.

Претходно од ДУИ истакнаа дека тие го поддржуваат предлогот за една изборна единица со отворени листи, но бараат да има  изборен праг за избор на пратеници – 3% од регистрираните гласачи или 5% од излезените на изборите.

• ЌЕ СЕ ГЛАСА НИЗ ЦЕЛИОТ СВЕТ, ГЛАСОВИТЕ ЌЕ СЕ ВЛЕВААТ НА ЕДНО МЕСТО Измените на Изборниот законик се во собраниска процедура, ВМРО-ДПМНЕ дава поддршка за една изборна единица

The post НЕ ПОМИНА ПРЕДЛОГОТ НА ЛДП ЗА ЕДНА ИЗБОРНА ЕДИНИЦА Измените на Изборниот законик добија поддршка од 19 пратеници appeared first on plusinfo.mk.