Во политичките системи каде моќта е концентрирана во една функција, секогаш се поставува истото прашање: што се случува кога таа моќ ќе излезе од контрола?

Во Соединетите Американски Држави, ова прашање не е само теоретско. Напротив, во одредени периоди особено во контекст на владеењето на претседатели како Доналд Трамп станува дел од секојдневниот јавен дискурс. Тогаш, во фокусот се појавуваат два механизма: импичментот и амандманот XXV.

На прв поглед, овие два механизма изгледаат како различни патишта кон иста цел, отстранување на претседателот. Но, нивната вистинска улога е многу посуптилна. Тие не се само алатки за справување со кризи, туку дел од внимателно дизајниран систем што треба да спречи институционалните и политичките кризи да ескалираат.

Систем што не ѝ верува и не дозволува апсолутната моќ

Американскиот политички систем, утврден во Уставот на САД, се темели на принципот на „checks and balances“ или со наш јазик кажано „систем на кочници и рамнотежа“. Неговата основна логика е едноставна, но суштинска: моќта мора да биде ограничена за да не стане злоупотребена.

Затоа, власта е поделена на три гранки: извршна (претседателот); законодавна (Конгресот) и судска (судовите). Ниту една од нив не е апсолутна. Секоја постои и за да управува, и за да контролира. Во таа рамка, импичментот и амандманот XXV не се исклучоци туку конкретни алатки на овој систем.

Две прашања што го дефинираат системот

За да се разберат овие механизми, доволно е да се постават две основни прашања:

1). Дали претседателот смее? и 2). Дали претседателот може?. Импичментот одговара на првото, а амандманот XXV на второто прашање. Оваа поделба не е формалност, туку суштинска линија што го одделува прашањето на одговорност од прашањето на способност.

Каде е границата меѓу „не смее“ и „не може“?

Во теорија, разликата изгледа јасна. Но во пракса, таа понекогаш се замаглува.

Однесување што јавноста го смета за ризично или непромислено може да се толкува на два начина: како прекршување што бара политичка одговорност или како сигнал за неспособност за рационално управување. Токму во овие „сиви зони“ се отвора простор за дебата и тоа не само политичка, туку и институционална.

Импичмент: кога се доведува во прашање однесувањето

Импичментот е алатка на законодавната власт односно на Конгресот, кој е составен од два дома: Претставнички дом и Сенат. Претставничкиот дом (Долен дом) брои вкупно 435 пратеници. Бројот на претставници на една држава зависи од бројот на населението. За покренување импичмент потребно е просто мнозинство (50% + 1) што значи најмалку 218 гласови ако сите се присутни. За разлика од него Горниот дом или Сенатот брои вкупно: 100 сенатори. Секоја држава е застапена со по 2 сенатори (без разлика на големината односно на бројот на население во неа). За импичмент потребни се 2/3 од присутните сенатори, односно најмалку 67 гласови ако се присутни сите 100 сенатори.

Тој се активира кога постои сомнеж дека претседателот: ја злоупотребил функцијата; прекршил закон или ја нарушил јавната доверба. Станува збор за процес што е истовремено правен и политички, и се одвива во две јасно дефинирани фази.

Првата фаза започнува во Претставничкиот дом, кој има овластување да покрене импичмент. За тоа е потребно просто мнозинство од присутните пратеници. Со оваа одлука, претседателот формално се „обвинува“, но не се отстранува од функцијата.

Втората фаза се одвива во Сенатот, кој функционира како суд. Таму се одржува постапка слична на судење, по што сенаторите гласаат за конечната одлука. За отстранување на претседателот е потребно двотретинско мнозинство (2/3) од присутните сенатори, што претставува висок праг и значи дека е потребна широка политичка согласност. Важно е да се нагласи дека и во двата случаи станува збор за висок праг на одлучување (2/3 мнозинство), што во пракса значи дека без широка политичка согласност, ваквите одлуки не можат да се донесат. Токму поради ова: импичментот не значи автоматско отстранување, туку отворање на процедура што може да доведе до тоа, но само ако постои доволно силен и широк консензус.

Историјата покажува дека овој механизам се користи ретко и внимателно. Претседатели како Ендрју Џонсон, Бил Клинтон и Доналд Трамп (во два наврата) беа импичирани, но не беа отстранети од функцијата. Во овој контекст би го споменал и случајот на Ричард Никсон (во аферата со прислушување „Вотергејт“) кој поднесе оставка пред да дојде до финална одлука во Сенатот.

Амандманот XXV: кога се доведува во прашање способноста на претседателот

За разлика од импичментот, амандманот XXV не се занимава со вина, туку со способноста на претседателот да ја извршува функцијата. Тој предвидува процедура за ситуации кога претседателот не е способен да ја извршува својата функција, односно кога не може ефективно да функционира или да донесува одлуки. Неговата цел е јасна: да обезбеди континуитет на власта, дури и во услови на криза. Амандманот предвидува два начина на примена: доброволен и присилен.

Во првиот случај, претседателот сам ја известува законодавната власт дека привремено не е способен да ја врши функцијата. Во тој период, потпретседателот станува вршител на должност претседател, сè додека претседателот не извести дека повторно е способен.

Вториот случај е посложен и чувствителен. Доколку претседателот не може или не сака да ја признае својата неспособност, потпретседателот може заедно со мнозинство од кабинетот формално да го извести Конгресот дека претседателот не е способен. Со оваа одлука, потпретседателот веднаш ја презема функцијата како вршител на должност.

Доколку претседателот се спротивстави и изјави дека е способен, започнува институционален спор. Потпретседателот и кабинетот имаат рок од четири дена повторно да ја потврдат својата одлука односно барањето до Конгресот. Ако тоа се случи, конечната одлука преминува во Конгресот (Претставничкиот дом и Сенатот) кои мораат да се изјаснат во рок од 21 ден. За претседателот да биде отстранет од функцијата, потребно е двотретинско мнозинство (2/3) во двата дома на Конгресот. Доколку ова мнозинство не се постигне, претседателот си ја враќа односно останува на функцијата.

Во пракса, амандманот XXV се користел ограничено и технички. Роналд Реган и Џорџ В. Буш привремено ја пренеле функцијата на потпретседателот за време на медицински интервенции. Вториот начин односно можност (присилна примена на овој амандман) никогаш досега не се случила.

Зошто овие механизми ретко се користат до крај?

Иако постојат, овие инструменти речиси никогаш не доведуваат до целосен исход.

Причините се повеќеслојни: потребен е широк политички консензус; одлуките носат сериозни последици и поради постоење внимателност да не се создаде опасен преседан. Поради тоа, тие често функционираат не само како крајни мерки, туку и како сигнал дека системот реагира.

Перспектива за македонскиот читател

Во системи како македонскиот, каде владите зависат од парламентарно мнозинство, смената на власт може да биде релативно брза, американскиот модел, пак, е: побавен; покомплексен и потежок за промена. Причината е суштинска: стабилноста на системот има предност пред брзината.

Заклучок: контролата како темел на стабилноста

Прашањето поставено во насловот на оваа стручно-аналитичка колумна „кој навистина го контролира претседателот?“ нема едноставен одговор и токму тоа е поентата. Во американскиот систем, контролата не е концентрирана во една институција, туку е распределена: меѓу гранките на власта; низ процедури и преку високи прагови на одлучување. Импичментот и амандманот XXV се само дел од таа поширока архитектура.

Тие не се создадени за честа употреба, туку за исклучителни моменти кога системот мора да покаже дека има механизми да се заштити себеси. И токму во тоа лежи нивната вистинска вредност: не во тоа колку често се користат, туку во тоа што постојат.

Затоа, нивното присуство не е знак на слабост, туку доказ за систем што не се потпира на поединци, туку на правила и на рамнотежа што треба да опстои дури и во најтешките моменти за државата.

The post Кој навистина го контролира претседателот на САД? Вистината за импичментот и амандманот XXV appeared first on plusinfo.mk.

Прашањето за воведување „Уставна жалба“ и евентуални измени на Уставот е чисто политичко прашање за кое е потребен консензус од две третини од пратениците, смета претседателот на Собранието, Африм Гаши.

– Ова е сензитивно прашање. Штом ќе се отвори Уставот, секој сака да ја постигне својата политичка цел. Тоа може да доведе до правење поголем проблем отколку корист. Не мислам дека Уставот треба да се отвора ад-хок. Ако сакаме подлабока реформа, не треба да се отвора парцијално, туку преку поширока политичка и општествена дебата. Знаете дека во Собранието треба двотретинско мнозинство од пратениците за да се договорат да го отворат Уставот. Сега не би коментирал, би оставил политичките партии да донесат одлука за тоа кога е потребно да се направи и околу кои прашања – истакна Гаши на денешниот брифинг со новинарите.

Во однос на дебатите за примена на Бадентеровиот принцип во Уставниот суд, тој рече дека на тоа треба да се гледа и од политичка и од експертска димензија, без ништо, како што посочи, да не се пречекува на нож, но со фокус на основната улога на Судот.

– Во однос на воведување „Бадентер“ во Уставниот суд, можам да кажам дека сепак тоа не треба да биде табу тема. Треба да се разговара, но од два аспекта според мене – од аспект на политичка димензија и од професионален аспект. Треба да го имаме предвид фактот дека Уставниот суд треба да ја одигра својата улога како што му е пропишана во Уставот, а тоа е да го брани Уставот и уставноста при донесувањето на законите во државата. Затоа не треба да имаме предрасуди кон темите кои водат кон квалитетно одлучување. Пред сè треба да имаме на ум каков Уставен суд сакаме да имаме – таков што ќе биде во најдобра можна ситуација да одлучува во однос на заштитата на Уставот и уставноста на законите во државата – рече Гаши.

Тој информира дека Собранието работи максимално експедитивно на реформската агенда и досега нема застој во гласањето на законите што пристигнуваат во архивата. Според него, брзината на процесот зависи од капацитетите на министерствата и комуникацијата со Европската комисија.

– Собранието работи експресно на реформската агенда. Процесот е посложен бидејќи министерствата ги изготвуваат законите, ги праќаат во ЕК на сугестии, па ги инкорпорираат забелешките пред да стигнат кај нас. Штом ќе се достават во Собранието, ние ги решаваме многу ефикасно. Моментално во Собранието имаме два закона – едниот за јавни обвинители, другиот за Советот на јавни обвинители. Очекуваме од Владата набрзо да дојдат повеќе закони, бидејќи знам дека таму се работи интензивно и има зголемен фокус во однос на ова прашање. Очекуваме дека во текот на годинава ќе имаме поголема ефикасност во однос на носење на законите од реформската агенда – рече Гаши.

Изнесувајќи го, како што кажа, својот личен став како дел од коалицијата, а не како претседател на Собранието, тој истакна дека кадровските решенија во извршната власт ќе бидат предмет на разгледување откако ќе заврши процесот на внатрешно окрупнување на коалицијата.

– Коалицијата Вреди се наоѓа во финална фаза на воспоставување на една политичка партија. Штом ќе се финализира овој процес, тогаш партиските органи ќе решаваат за своите претставници во извршната и во сите други гранки на власта. Во овој момент не треба да прејудицираме дали некој е прифатлив или не – одговори Гаши на прашањето за статусот на министрите Арбен Фетаи и Фатмир Лимани.

Во однос на тоа дали во Собранието се дискутира за нови пратенички групи или нови политички движења, Гаши нагласи дека не е известен за такво нешто.

– Кога кој пратеник или пратеничка група ќе се изјасни поинаку, го информира претседателот на Собранието, а јас ги информирам сите пратеници и јавноста. Така што, во моментот кога ќе бидам известен, ќе биде известена и јавноста околу секакви промени во пратеничките групи во Собранието – рече Гаши.

Претседателот на Собранието изрази оптимизам дека долгогодишниот проблем со паркирањето околу законодавниот дом ќе биде решен до крајот на 2026 година. Веќе е објавена постапка за партерно уредување на катната гаража.

– Процедурата трае 30 дена. Ако сѐ биде во ред, очекуваме во мај да почнат работите на терен, а до крајот на годината објектот да биде во функција – информираше Гаши.

Тој соопшти дека еден член за Судскиот совет е повлечен бидејќи комисијата констатирала дека не ги исполнува условите, поради што ќе биде распишан нов конкурс. На 8 април се очекува пратениците да одлучуваат за новите вицегувернери, додека предлогот за нов уставен судија сѐ уште не е пристигнат.

The post ГАШИ СМЕТА ДЕКА УСТАВОТ НЕ ТРЕБА ДА СЕ ОТВОРА ПАРЦИЈАЛНО За отворањето треба да одлучат политичките партии appeared first on plusinfo.mk.

Собранието денеска со 81 глас „за“, 19 „против“ и без воздржани ги изгласа измените и дополнувањата на Законот за прекршоците, по скратена постапка. При гласањето беа присутни 100 пратеници, 20 беа отсутни.

За усвојување на законските измени беше потребно гласање од двотретинско мнозинство.

Со ова, се отвора патот да се стави во функција системот за автоматско снимање и санкционирање на сообраќајните прекршоци „Безбеден град“ од 1 февруари.

По барање на координаторката на Европскиот фронт, Рина Ајдари, гласањето беше повторено, односно секој пратеник гласаше поединечно.

Законот го поддржаа пратениците од ВМРО-ДПМНЕ, Вреди, ЗНАМ, Левица и дел од независните пратеници. Против гласаа пратениците од СДСМ и од ДУИ.

Законот предвидува зајакнување на безбедноста во сообраќајот преку воведување посебна постапка за прекршоци утврдени со помош на технички средства и уреди за снимање. Брзото и ефикасно санкционирање на прекршителите и изрекување санкции, се очекува да влијае на генерална превенција во областа на безбедноста на сообраќајот.

За сторените прекршоци возачите ќе добиваат записник и казна по СМС и по мејл.

Во првата фаза системот ќе регистрира прекршоци како: брзо возење, минување на црвено светло, истечена важност на сообраќајната дозвола и непрописно паркирање. Во следната фаза ќе се прошири спектарот на прекршоци што ќе се казнува на овој начин.

Кога системот ќе биде целосно пуштен во употреба, сопствениците на возилата за кои е утврден прекршок ќе добиваат СМС-порака и е-пошта со линк за преземање на записник со платен налог. Прекршоците ќе може да се платат електронски, а при навремено плаќање нема да се наплаќаат дополнителни трошоци. За одредени прекршоци за кои е пропишана и мерка забрана за управување со возило, МВР ќе поднесува барање за поведување постапка до надлежен суд.

Камерите на „Сејф сити“ засега се инсталирани во Скопје, Куманово и во Тетово, како и на делови од автопатите на Коридор 8 и на Коридор 10.

Министерстото за внаѕрешни работи најави дека во текот на оваа година целата територија на Македонија ќе биде покриена со камерите на „Сејф сити“.

The post СО 81 ГЛАС УСВОЕНИ ИЗМЕНИТЕ НА ЗАКОНОТ ЗА ПРЕКРШОЦИТЕ, СДСМ И ДУИ ГЛАСАА ПРОТИВ „Сејф сити“ ќе почне да се применува од февруари appeared first on plusinfo.mk.

Собранието на Македонија денеска треба да ги донесе измените на Законот за прекршоците, последен од пакетот закони што се потребни за да почне да се применува системот Сејф сити, со кој возачите на мејл и преку СМС пораки ќе добиваат записници и казни за сторени прекршоци во сообраќајот.

За изгласување на овие законски измени е потребно двотретинско мнозинство од пратениците во Собранието. До скоро немаше согласност од 81 пратеник, затоа што опозициската ДУИ од политички причини не даваше согласност за усвојувањето, но, по лидерската средба што се одржа минатата недела на иницијатива на премиерот Христијан Мицкоски, оваа партија се согласи да ги поддржи законските измени.

За овој закон, чија цел е да се подобри безбедноста во сообраќајот, според најавите, ќе гласаат сите пратенички групи – на владејачките ВМРО-ДПМНЕ, Вреди и ЗНАМ, како и на опозициските Левица и ДУИ, освен на СДСМ.

Претседателот на СДСМ, Венко Филипче завчера рече дека партијата нема да го поддржи законот затоа што тој парцијално ќе се имплементира и во него „не се регулирани сериозни аспекти, односно огромната база на податоци за којашто никој во законот не укажува како ќе се контролира“. Координаторот на пратеничката група, Оливер Спасовски вчера потврди дека денеска ниту еден пратеник на СДСМ нема да гласа за законските измени.

По усвојувањето на измените, системот „Сејф сити“ ќе профункционира во трите града каде што се инсталирани камерите за регистрирање на прекршоците, во Скопје, Куманово и во Тетово, како и на одредени делници од автопатиштата на Коридор 8 и на Коридор 10, каде што во изминатиов период камерите работеа пробно, а возачите добиваа опомени.

Од Министерството за внатрешни работи најавуваат дека во текот на оваа година системот ќе биде воведен на целата територија на државата.

– Во моментов системот „Безбеден град“ функционира на територијата на Скопје, Куманово и Тетово. Опремата е поставена веќе и на Коридорите 8 и 10 и во секој момент се очекува да започне детектирањето на сообраќајните прекршоци и таму. Во моментов сме во пробен период во кој граѓаните добиваат само опомена за сторениот сообраќаен прекршок. Системот веќе покажува континуирана тенденција на намалување на регистрираните прекршувања, што укажува на тоа дека граѓаните се прилагодуваат и дека предупредувањата имаат ефект врз подигнување на нивото на сообраќајна дисциплина. Превидено е од 1.02.2026 година системот целосно да функционира и да се почне со санкционирање на граѓаните кои направиле прекршок детектиран од камерите – велат од Министерството за внатрешни работи.

The post СОБРАНИЕТО ЌЕ ДАДЕ ЗЕЛЕНО СВЕТЛО ЗА „СЕЈФ СИТИ“ Цела Македонија до крајот на годината ќе биде покриена со камери appeared first on plusinfo.mk.

Премиерот Христијан Мицкоски информира дека во текот на вчерашниот ден во Собранието се одржал состанок на ниво на координатори на пратенички групи на ВМРО-ДПМНЕ и ДУИ во врска со Законот за прекршоци и оти некои работи кои биле нејасни за ДУИ биле разјаснети поради што очекува тој да биде донесен на следната собраниска седница и „Безбеден град“ да почне непречено да се применува од 1 февруари.

Мицкоски не прецизира кога би имал средба со претседателот на ДУИ Али Ахмети, како што беше најавено по лидерската средба што се одржа во средата, туку само кусо изјави дека одржува средби со лидери на повеќе политички партии и оти во тие рамки би се одржала и средбата со Ахмети.

– Тоа што беше договорено на лидерската средба, беше безусловно кажано дека ќе биде поддржано. Беше споменато дека постоеле некои амандмани, за што потоа во разговор со министерот за внатрешни работи, беше констатирано дека такви амандмани не постојат. Но, и покрај тоа, се договоривме во текот на вчерашниот ден практично, на ниво на координатори на пратенички групи, да има состанок и сите тие нејасни теми да бидат разјаснети. Таков состанок, колку што сум информиран, во текот на вчерашниот ден се случи, бидејќи е отсутен министерот за внатрешни работи од Македонија, беше вклучен преку телефонски повик, беа разјаснети сите нејасни работи, и очекувам Законот за прекршоци веќе на следната собраниската седница да помине – рече Мицкоски во одговор на новинарско прашање по посетата на целосно реконструираната голема спортска сала во Кратово.

Премиерот потсети дека за да биде донесен овој закон е потребно само двотретинско мнозинство, без потреба од Бадентер. Тој очекува „Безбеден град“ да почне да функционира од 1 февруари.

– Јас во една прилика кажав дека ако се спореди декември месец на територијата на градот Скопје 2015 година со истиот месец 2024 година, ќе дојдеме до заклучок дека имаме нула жртви, како резултат на сообраќајни несреќи во декември лани, а истиот месец во 2024 година имаме пет. Тоа значи нула и пет. Јас им благодарам на граѓаните кои го почитуваат овој проект и очекувам да бидат спасени многу човечки животи. Затоа не очекувам политичко калкуланство кога станува збор за човечкиот живот – рече Мицкоски.

Прашан дали покрај одржаната средба во Собранието на ниво на пратенички групи ќе има и тет-а-тет средба со Ахмети, Мицкоски не прецизираше дали и кога ќе се случи такво нешто.

– Јас во моето редовно политичко функционирање се среќавам со лидери на политички партии, така што, во рамките на тие средби претпоставувам дека ќе се сретнам и со господинот Ахмети – рече Мицкоски.

The post ТОШКОВСКИ ГИ РАЗЈАСНИЛ СИТЕ ДИЛЕМИ ПРЕКУ ТЕЛЕФОНСКИ ПОВИК Мицкоски очекува Законот за прекршоци да помине на следната седница во Собранието appeared first on plusinfo.mk.

Министерот за внатрешни работи Панче Тошковски очекува поддршка од пратениците за измените на Законот за прекршоци и на Кривичниот законик, коишто се последните од пакетот законски измени за официјалната примена на системот „Безбеден град“, што од почетокот на месецов е во пробна функција.

Тошковски синоќа во гостување на ТВ Канал 5 рече дека останува најавата за официјален старт на „Безбеден град“ од 1 февруари, но треба да помине за уште два закона, односно да се изменат Законот за прекршоци и Кривичниот законик.

– За измените на Законот за прекршоци, којшто е во втора фаза во Собранието потребно е двотретинско мнозинство, а за Кривичниот законик просто мнозинство. Се надевам дека сериозноста на ова ќе биде препознаена од сите пратеници и ќе дадат поддршка за да може да почне примена на овој круцијален проект  рече Тошковски.

Тој потврди дека примената на системот ќе се пролонгира доколку Собранието не даде поддршка на Законот за прекршоци.

– Верувам дека овој закон би требало да го поддржат сите пратеници. Целта е спасување на човечки животи – истакна министерот Тошковски.

Според него, во пробниот период на примената на системот од 15 дена во Скопје, граѓаните покажале дека можат да бидат поинакви учесници при уравувањето на возилата.

На Клиниката за трауматологија намален е бројот на пациенти со тешка телесна повреда за 15-20 проценти.

Тошковски уверува дека техничките проблеми детектирани во пробниот период ќе бидат надминати до 1 февруари.

Тој најави дека со подзаконски ќе се утврди дозволеното пречекорување на брзината согласно европските параметри кои се движат од три до десет над дозволеното, како и дека со граѓаните ќе бидат споделени локациите на кои ќе има камери, бидејќи, истакнува, крајната цел да се намали брзината на движење во насока на помалку жртви и повредени во сообраќајки.

– Се ревидираат и знаците. Секаде каде што има камера за констатирање на зголемена брзина задолжително ќе биде ревидиран знакот согласно важечки сообраќаен проект – рече Тошковски.

Видео записите од прекршоците ќе се чуваат во временски период утврден согласно законите во рамки на истражните дејствија, како и дека МВР ќе пушти во употреба апликација на која граѓаните ќе добиваат информации за сторени прекршоци.

The post „БЕЗБЕДЕН ГРАД“ ВЕЌЕ ГИ НАМАЛИ ПОВРЕДИТЕ ЗА 20% Двотретинско мнозинство е потребно за да се прифати Законот за прекршоци appeared first on plusinfo.mk.

Претседателот на Уставниот суд, Дарко Костадиновски, изјави дека е неопходно да се донесе Закон за Уставниот суд, што, според него, ќе придонесе за зголемена транспарентност и поголема доверба кај граѓаните.

Тој ја коментираше претстојната подготвителна седница за Законот за употреба на јазиците, која ќе се одржи на 19 јуни, нагласувајќи дека општеството не треба да стравува од одлуките на Судот и оти не станува збор за напад врз ничии права.

Во однос на потребата од закон за Уставен суд, Костадиновски во гостувањето на емисија „Трилинг“ изјави дека прво треба да се смени Уставот, за, како што рече, да се постави основ за двотретински закон, или законодавецот да донесе уставен закон, исто така, со двотретинско мнозинство.

– Бенефити од Закон за Уставен суд се повеќе. Прво, може да се објективизира и конкретизира терминот истакнат правник, со тоа ќе знаеме кој сѐ може да биде уставен судија, потоа начинот на избор на уставни судии. Јас сум еден од оние кој се залага седниците на Уставен да се пренесуваат во живо, нема друга можност освен сите граѓани да видат кои им се уставни судии – рече Костадиновски.

Претседателот на Уставен најави дека подготвителната седница за законот за јазици ќе се одржи на 19 јуни.

– На 19 јуни ќе ја организираме подготвителната седница, по неа ќе ни требаат до два месеци да се подготви нов реферат и да се сублимираат сите мислења на сите ученици. Моја проценка е дека конечната улога ќе биде донесена после изборите – рече тој.

Според него, непотребно се создаде, како што рече „толку голема фама со давање на етнички и политички димензии на постапувањето на судот“.

– Мое длабоко уверување е дека ние во овој стадиум на нашето општество немаме проблем во меѓуетничките односи, имаме проблем со злоупотреба на меѓуетничките односи во политички цели. Никој не треба да стравува од нашето постапување. Ниту едно право што секој еден граѓанин го ужива од нашиот Устав, нема да биде ускратено. Нашите правни стојалишта за кој било закон ќе го натераат законодавецот да направат подобар закон – потенцираше тој.

Костадиновски предупреди дека недонесувањето на измените на Законот за електронски комуникации може да доведе до крах на безбедносниот систем.

– Станува збор за тема која допира до прашање на национална безбедност. И тие мета податоци се важни за нашите безбедносни служби – изјави тој.

Костадиновски вели дека е во комуникација со спикерот на Парламентот, Гаши, и дека му е најавен одговор за фазата во која се наоѓа законот.

– Доколку Собранието не постапи во согласност со нашите правни стојалишта, ние немаме избор, ќе мора да интервенираме, но последиците ако настанат, ние не сносиме одговорност – додаде тој.

Во однос на Изборниот законик, Костадиновски изјави дека конечната одлука се очекува на седницата на 14 мај.

За хашките случаи, тој рече дека предметот сѐ уште не е предаден кај него како судија и дека се појавуваат дилеми во поглед на пристапот до класифицирани податоци.

На прашањето дали му тежи ореолот дека бил политички активен, Костадиновски одговори „политичка одлука е да ве номинираат, изборот е политичка одлука. Јас служев за тројца претседатели и воопшто не ми тежи ореолот, јас сум поставувал професионално. Не сум бил член на политичка партија. Сум давај стручни и експертски мислења“.

The post НЕОПХОДЕН Е НОВ ЗАКОН ЗА УСТАВЕН СУД ПОДДРЖАН СО ДВОТРЕТИНСКО МНОЗИНСТВО Костадиновски смета дека има бенефити од ваквата идеја appeared first on plusinfo.mk.

Новата Влада, во која коалицијата Вреди е одговорен и активен партнер, е цврсто посветена на ЕУ агендата и активно работи на достоинствено исполнување на условите за динамизирање на процесот што води кон полноправно членство во Европската Унија, соопшти денеска коалициата Вреди.

Коалицијата се изјасни во врска со, како што се вели во соопштението, шпекулаиите за рокот од шест месеци за уставните измени, како чекор кон продолжување на патот кон ЕУ!

„Ние, министрите од Вреди, секогаш сме демонстрирале највисока посветеност кон европските интеграции – не само со зборови, туку и со дела. Рокот од шест месеци не е само временска рамка, туку е обврска која ја разбираме и ја почитуваме. Сепак, мора да постои политичка логика и реалност. Дали има двотретинско мнозинство во Собранието без пратениците на ВМРО-ДПМНЕ? Не, нема. И тука лежи суштината: процесот на интеграција бара соработка, зрелост и одговорност од сите политички субјекти. Вреди не ги заборава обврските, но потсетуваме дека решението не може да биде еднострано“, се вели во соопштението.

Владата има јасен план, стратегија и акциски чекори кои се преземаат секојдневно, додава Вреди.

„Нашата поддршка, не само сега, туку и во минатото, спасуваше клучни процеси. Со еден таков чекор обезбедивме старт на преговорите со ЕУ. Апелираме до сите општествени чинители, вклучувајќи ги политичките партии, да престанат со ситни политички манипулации на сметка на ЕУ интеграциите. Европската иднина е над политиката на дневни калкулации“, соопшто владејачката коалиција Вреди.

The post БЕЗ ПРАТЕНИЦИТЕ НА ВМРО-ДПМНЕ НЕМА 80 ПРАТЕНИЦИ ЗА УСТАВНИ ИЗМЕНИ Вреди не ги заборава обврските, ама решението не може да биде еднострано appeared first on plusinfo.mk.

– Од 90-тите досега немало постабилна влада и немало поголемо мнозинство од ова – 78 пратеници. Мнозинството расте и сигурно за кратко време ќе надмине и 80 пратеници, што е две третини од Собранието. Тоа е доволен коментар. За државата и за граѓаните кога имаш мнозинство од 80 пратеници непотребно е да се размислува за предвремени избори, бидејќи тоа само е трошок за државата и губење време – рече Меџити во одговор на новинарско прашање при денешната посета на депонијата Дрисла.

Тој нагласи дека организирањето предвремени избори не е добро, бидејќи најмалку шест месеци пред и после изборите запираат сите постапки, сите јавни набавки и вработувања.

– Тоа влијае многу на економијата и на бизнисот. Затоа мислам дека нема да бидат среќни да има предвремени избори тие што сакаат да работат, односно бизнисот во оваа држава – потенцира Меџити.

The post ГУБЕЊЕ ВРЕМЕ Е СЕГА ДА ИМА ПРЕДВРЕМЕНИ ПАРЛАМЕНТАРНИ ИЗБОРИ Меџити очекува двотретинско мнозинство, не размислува за гласање appeared first on plusinfo.mk.

Пратениците утре ќе го разгледуваат предлогот за измени на Законот за локална самоуправа со кој треба да се избегне одржувањето на предвремени локални избори за градоначалници на општините Аеродром, Гостивар и Сарај, чии градоначалници по последните парламентарни избори во април годинава преминаа во извршната или во законодавната власт. Овој закон треба да се усвои со двотретинско мнозинство, а дополнително, потребно е и Бадентерово мнозинство. Предлог-измените беа доставени до Собранието пред неколку дена по скратена постапка, а предлагачи се координаторите на пратеничките групи на ВМРО-ДПМНЕ, „Вреди“ и на ЗНАМ, Никола Мицевски, Халил Снопче и Горан Карапејовски.

Пратеникот Мицевски вели дека очекуваат поддршка од сите пратенички групи, затоа што законот е рационален и ги намалува трошоците.

– Потребно е двотретинско мнозинство за да се изгласаат овие измени. Очекуваме поддршка од сите пратенички групи, затоа што решението е рационално, во насока на заштеда на средства. Предвремените локални избори би требало да се одржат на почетокот на следната година, а редовните локални избори се при крајот на следната година, па не е рационално во рок од само неколку месеци да имаме двапати локални избори во некои општини. Ова преодно решение ќе важи само за овие три општини и дополнително, доколку до редовните локални избори на уште некој градоначалник му престане мандатот по сила на закон, и со нив до изборите ќе раководи в.д. градоначалник. После следните локални избори на сила ќе биде старото решение, да се организираат предвремени избори ако до редовните има рок подолг од шест месеци, затоа што, пак, ќе нема логика ако некој градоначалник се повлече на почетокот на мандатот до крајот да раководи в.д. градоначалник за кој гласачите не гласале – вели Мицевски за „Плусинфо“.

Извесно е дека Бадинтеровото мнозинство ќе биде обезбедено, затоа што, како што објави ТВ 24, пратениците од ДУИ ќе гласаат за измените на Законот за локална самоуправа, со што ќе се обезбеди и потребното двотретинско мнозинство. Од најголемата опозициска партија од македонскиот блок СДСМ сè уште не се изјасниле дали ќе го поддржат ова законско решение.

Редовните локални избори се во октомври 2025 година. Доколку законските измени не ја добијат потребната поддршка во Собранието, тогаш според актуелното законско решение во општините Аеродром, Сарај и во Гостивар до крајот на годината треба да се одржат вонредни избори за градоначалници. Поранешниот градоначалник на Аеродром Тимчо Муцунски сега е на функцијата министер за надворешни работи и надворешна трговија, поранешниот градоначалник на Сарај Блерим Беџети беше избран за пратеник, а ексградоначалникот на Гостивар Арбен Таравари е министер за здравство. Фукцијата градоначалник е неспојлива со други јавни функции, иато како и функцијата пратеник.

Досега повеќе пати се организирани предвремени избори за градоначалник, најчесто во случаи кога првите луѓе во општините заминувале на друга функција. Предвремени локални избори имаше во 2010 година во Зајас, во 2011 година во Сарај, во 2019 година во Охрид, Ново Село и во Дебар, во 2020 година во Пласница и Штип и во 2022 година во Маврово Ростуше и Центар Жупа.

The post ЌЕ ПОМИНАТ ЛИ АЕРОДРОМ, САРАЈ И ГОСТИВАР БЕЗ ПРЕДВРЕМЕНИ ЛОКАЛНИ ИЗБОРИ За измените на Законот за локална самоуправа се потребни и двотретинско и Бадинтерово мнозинство appeared first on plusinfo.mk.