„Нè газат, нè влечат од патот, нè удираат и насилно не задржуваат“ – коментира активист на „Последна генерација“ на видео на кое се прикажани напади од лути возачи на автопатот пред граничниот премин Бренер на австриско-италијанската граница.

Полицијата потврди дека на местото на блокадата дошло до „нарушување“, но ги раздвоила конфликтните страни.

Според австриските медиуми, активистите од движењето „Последна генерација“ нешто пред пладне го блокирале автопатот, кој претставува една од главните врски меѓу Северна Европа и италијанскиот полуостров, и тоа на денот кога почнува најфреквентниот викенд во годината.

По само 20 минути полицијата успеала да ослободи една лента од патот од активистите кои лежеле на асфалтот, а набргу потоа и другата, но и покрај тоа поради интензитетот на сообраќајот кон југ, се создале километри сообраќаен метеж. Против дванаесет активисти се поднесени кривични пријави.

Ова е вторпат летово еколошките активисти да го блокираат најважниот пат во Австрија кон југ.

„Јужна Европа гори и низ целиот свет се бележат рекордно високи температури“, се вели во соопштението за печат на „Последна генерација“ во кое се повикува на зголемени мерки со цел запирање на климатските промени.

The post КИЛОМЕТАРСКИ КОЛОНИ НА АВСТРИСКО-ИТАЛИЈАНСКАТА ГРАНИЦА Еколошки активисти го блокираа сообраќајот, возачите ги нападнаа appeared first on plusinfo.mk.