Граѓаните кои имаат сметки и заштеди во банка која пропаднала ќе имаат рок од пет години да ги подигнат парите од обесштетувањето од Фондот за осигурување депозити. Ако не ги подигнат парите, тие ќе останат во буџетот на Фондот.

Ова е новина која ја предвидуваат предложените измени на Законот за Фондот за осигурување на депозити кои се во собраниска процедура. Актуелниот закон не предвидува рок за подигање на парите од обесштетувањето.

Исклучок од новото правило се парите од заштедата кои се со право на наследство.

„Обврската на Фондот за исплата на обесштетување престанува во рок од пет години од денот на конечноста на решението. Неподигнатите средства за обесштетување, со исклучок на средствата кои се со право на наследство, се пренесуваат во средствата на Фондот за заштита на депозити“, пишува во предложените измени на законот.

Според последниот објавен извештај на Фондот за осигурување депозити од 2023 година, од неговото основање во 1997 година до крајот на  2023 година, пропаднале  5 банки и 7 штедилници. Вкупната пресметана обврска за обесштетување од дванаесетте поранешни членки на Фондот изнесува 5,7 милијарди денари (92,6 милиони евра). Од нив останале неисплатени вкупно 8,27 милиони евра за 226.192 депоненти.

Најголемиот дел од овие средства се однесува на „Еуростандард банка“, каде што останале неподигнати околу 5,86 милиони евра за 124.296 депоненти, и на „Македонска банка“, со околу 2,27 милиони евра за 96.812 депоненти. Останатите средства се однесуваат на други пропаднати банки и штедилници.

За потсетување Македонска банка  престана со работа и влезе во процес на ликвидација во 2007 година, а во 2016 година започна исплатата на обесштетувања за поранешните штедачи.

Во извештајот (кој се однесува на 2023 година) се наведува дека голем дел од неподигнатите обесштетувања се  кај „Еуростандард банка“ и  се однесуваат на многу мали износи.

Според законот за Фонд за осигурување на депозити максималниот износ на влог  што се осигурува изнесува до 30.000 евра по лице во една банка.

Паричните средства во Фондот за заштита на депозити изнесуваат најмалку 4% од вкупните депозити во банките, филијалите на странските банки и штедилниците. Премија за осигурување од најмалку 0,7% од вкупните депозити годишно во Фондот за заштита на депозити плаќаат банките, филијалите на странските банки и штедилниците.

Со новите измени на Законот за Фондот за осигурување на депозити се формира посебен Фонд за решавање банки.

Според измените на законот со двата фонда ќе управува Фондот за осигурување на депозити.

Новиот фонд ќе треба да обезбеди пари за справување со банки кои западнале во сериозни финансиски проблеми, а неговите пари ќе се користат според Законот за решавање на банки.

Според законските правила, парите за решавање банки се обезбедуваат преку годишни уплати од банките, а предвидени се и дополнителни уплати и други начини на финансирање доколку се појави потреба.

Измените предвидуваат, парите со кои располага Фондот за заштита на депозити, кои досега беа наменети за обесштетување на граѓаните и за трошоците на неговото работење, ќе можат под посебни законски услови да се користат и за финансирање на решавањето проблематични банки.

На овој начин, според законодавецот, државата обезбедува повеќе можности за навремено справување со банкарски проблеми, пред тие да предизвикаат пошироки последици.

Предложените измени предвидуваат и промена на надлежноста за одредени прашања поврзани со осигурувањето на депозитите, односно наместо на гувернерот на народна банка, сега тие надлежности се пренесува на Извршниот одбор на Фондот.

The post АКО ПРОПАДНЕ БАНКАТА ВО КОЈА ШТЕДИТЕ ИМАТЕ 5 ГОДИНИ РОК ДА ГО ПОДИГНЕТЕ ОБЕСШТЕТУВАЊЕТО Државата им става крај на бесконечните обесштетувања appeared first on plusinfo.mk.