Милано, финансискиот мотор на Италија, сè поотворено се позиционира како европска алтернатива на Дубаи во трката за супербогатите. Но, за разлика од блискоисточниот модел на нула даноци, италијанскиот пристап е поинаков – и, според многумина, попривлечен за оние што бараат стабилност, а не само профит.

Привлечен даночен режим за странци

Клучниот адут е специјалниот даночен режим за странци, воведен во 2017 година со фиксен износ од 100.000 евра за приходи остварени надвор од Италија. Но, оваа бројка веќе е историја. Денес, за новите доселеници, данокот достигнува 300.000 евра годишно, додека за членовите на семејството се плаќа дополнителен паушал. И покрај зголемувањето, интересот не опаѓа – напротив.

Според анализи на лондонски Гардијан, токму оваа комбинација од предвидлив данок и европска правна сигурност е клучната причина поради која богатите го избираат Милано наместо Дубаи. За многумина, плаќањето 300.000 евра е прифатлива цена за пристап до европскиот пазар и стабилен правен систем.

Бројките го потврдуваат трендот. Во последните години, Италија бележи значителен прилив на милионери и милијардери, особено од Велика Британија по Брегзит. Дел од нив се селат поради зголемените даноци дома, но и поради неизвесноста во британскиот економски модел.

Милано нуди нешто повеќе

Милано нуди нешто што Дубаи тешко може да го реплицира – историска и културна тежина. Градот е светски центар на модата, дом на брендови како „Армани“, „Версаче“ и „Прада“, и место каде што се креираат глобалните трендови. Истовремено, неговата локација е стратешка – на дофат се Швајцарија, Алпите и Азурниот брег, што му дава дополнителна вредност за богатите семејства.

Но, овој бум има и своја темна страна. Пазарот на недвижности во Милано експлодира – во престижните делови цените пораснаа и за повеќе од 20% во краток период. За локалното население, особено средната класа, центарот на градот станува сè понедостапен.

Социјалните разлики се продлабочуваат

Критичарите предупредуваат дека Милано ризикува да стане „европски Дубаи“ – град во кој богатството диктира сè, а социјалните разлики се продлабочуваат. Ова веќе е дел од политичката и јавната дебата во Италија.

Од друга страна, поддржувачите на политиката велат дека приливот на богат капитал носи конкретни бенефити – инвестиции, нови работни места и оживување на економијата. За Италија, која долго време се бори со слаб раст, ова е шанса што тешко се игнорира.

Трката веќе е почната

Во суштина, Милано нуди порафиниран модел од Дубаи – не нула даноци, туку предвидливи правила, институции и квалитет на живот. Прашањето е дали овој баланс може да се одржи.

Трката веќе е почната. Милано не станува Дубаи – туку се обидува да биде негова европска верзија. Но, дали ќе ја задржи својата душа додека ги привлекува најбогатите во светот, останува отворено прашање.

The post МИЛАНО ГО ПРЕДИЗВИКУВА ДУБАИ Данок од 300.000 евра за супербогатите – Европа нуди нов модел на луксуз appeared first on plusinfo.mk.

Страшна бура, проследена со силен дожд и грмотевици вчера го погоди Дубаи. Силната бура во Емиратите предизвика голема материјална штета, а бројни улици беа целосно под вода.

Според локалните медиуми, бурата во Дубаи донесе поплави во некои области, прекини во сообраќајот и доцнења во јавниот превоз.

Времето нема да биде ништо подобро ниту денес, поради што предупредувањето на Националниот центар за метеорологија останува на сила, со најава дека се очекуваат силен дожд и ветрови, како и облаци од прашина.

Иако сцените од улиците во четвртокот изгледаа апокалиптични, жителите и туристите сепак имаа уникатен поглед на хоризонтот на Дубаи за време на бурата, со драматични слики од громови што ги поплавија социјалните мрежи.

الحمد لله pic.twitter.com/gSrWR3PKIB

— Ibrahim Ahmad El_ssalami (@al_ssalamy) March 26, 2026

Знаменитостите како што се Бурџ Калифа, Бурџ Ал Араб, Атлантис, Палм и Часовната кула Деира беа фотографирани наспроти морничаво темно небо, со удари од громови.

Медиумската канцеларија на Дубаи објави неколку од најпознатите обележја на градот на своите официјални канали на социјалните медиуми.

Во меѓувреме, жителите на Дубаи и туристите беа повикани да ги следат советите за безбедност за време на бурата. Властите ги повикаа луѓето да се држат подалеку од долините, областите склони кон поплави и местата каде што може да се акумулира дождовница.

„Држете се подалеку од планинските области. Избегнувајте одење на море. Бидете внимателни додека возите и намалете ја брзината. Следете ги официјалните канали и владините органи за точни информации и навремени ажурирања“, се вели, меѓу другото, во предупредувањата на властите.

The post 📽️ 📷 НЕБОТО СЕ ОТВОРИ НАД ДУБАИ, ГРАДОТ Е ПОД ВОДА Апокалиптични сцени од бисерот на Емиратите appeared first on plusinfo.mk.

Македонската Амбасада во Обединетите Арапски Емирати ги известува сите македонски држајани кои во моментов се наоѓаат во Обединетите Арапски Емирати, дека во вторник ќе се реализира уште еден лет за евакуација на граѓани на релација Дубаи – Скопје.

-Имајќи предвид дека се финализираат подготовките и деталите за неговата реализација, сите граѓани кои имаат неопходна и приоритетна потреба од евакуација потребно е во најкус можен рок да се пријават во Амбасадата на Република Северна Македонија во Абу Даби, наведуваат од Амбасадата.

Евидентирањето, посочуваат од Амбасадата, може да се изврши на следните контакти – Амбасада на Република Северна Македонија во Абу Даби, телефон: +971 56 441 7532 и е-пошта: abudabi@mfa.gov.mk.

Досега се реализирани четири организирани летови за евакуација на граѓани од регионот на Блискиот Исток, со кои се превезени вкупно 458 патници. 

The post ПРОДОЛЖУВА ЕВАКУАЦИЈАТА НА МАКЕДОНСКИ ГРАЃАНИ ОД БЛИСКИОТ ИСТОК Во вторник уште еден лет од Дубаи appeared first on plusinfo.mk.

Експлозии одекнале изутринава во централниот дел на Дубаи, а над дел од градот бил забележан густ црн чад. Според првичните информации од властите во Обединети Арапски Емирати, противвоздушната одбрана пресретнала проектил или дрон, при што остатоци паднале врз објект во делот на финансиската четврт.

Оштетена била фасада на зграда во близина на Дубаи Интернешнл Фајненшл Центар, еден од главните деловни и финансиски центри во градот. Засега нема информации за загинати или повредени, а штетата се опишува како ограничена.

Инцидентот доаѓа во време на засилени тензии на Блискиот Исток, при што повеќе земји во регионот пријавуваат пресретнати ракети и дронови. Властите во Емиратите засега не соопштуваат дополнителни детали за потеклото на нападот.

Претходно западни медуми известија дека заканите на Иран, упатени кон банки и финансиски институции поврзани со САД и Израел на Блискиот Исток, доведоа до евакуација на дел од финансискиот кварт во Дубаи.  Дел од компаниите им наложиле на вработените привремено да работат од дома, како мерка на претпазливост.

Explosions rattled buildings in Dubai and a large cloud of smoke hung over a central area of the financial hub on Friday, AFP correspondents report.

Sirens could be heard coming from the direction of Sheikh Zayed Road, the United Arab Emirates city’s main artery pic.twitter.com/M945PQl7un

— AFP News Agency (@AFP) March 13, 2026

ЕВАКУИРАН ФИНАНСИСКИОТ КВАРТ НА ДУБАИ Банки ги испразнија канцелариите поради безбедносни ризици

The post 🎥 ЕКСПЛОЗИИ ОДЕКНАА ВО ФИНАНСИСКИОТ ЦЕНТАР НА ДУБАИ Се крена голем облак од чад appeared first on plusinfo.mk.

Заканите на Иран упатени кон банки и финансиски институции поврзани со САД и Израел на Блискиот Исток доведоа до евакуација на дел од финансискиот кварт во Дубаи, објави Скај њуз.

Според медиумот, неколку банки и финансиски канцеларии ги испразниле своите деловни згради откако вработените добиле предупредувања да се евакуираат. Дел од компаниите им наложиле на вработените привремено да работат од дома, како мерка на претпазливост.

Меѓу институциите што презеле вакви мерки се и големи меѓународни банки како Citigroup и Standard Chartered, кои, според извештаи на светските медиуми, ги евакуирале дел од своите канцеларии во финансискиот центар на Дубаи поради безбедносни ризици.

Слична мерка била преземена и во Катар, каде што филијалите на банката HSBC биле евакуирани и привремено затворени.

Во последните денови се зголемува бројот на вработени во меѓународни компании, особено во финансискиот сектор, кои ја напуштаат земјата заедно со своите семејства, додека некои канцеларии целосно се испразнети.

Можноста финансиските центри да станат цели на напад укажува дека Иран, покрај нафтената инфраструктура, размислува и за удари врз финансискиот сектор со цел да предизвика пошироки економски потреси на меѓународно ниво.

Според Скај њуз, ваквата стратегија би можела да има за цел да изврши притисок врз американскиот претседател Доналд Трамп за намалување на тензиите или продолжување на преговорите.

И покрај евакуациите, засега нема информации за конкретен напад, а повеќето мерки се преземаат превентивно поради зголемен безбедносен ризик во регионот.

The post ЕВАКУИРАН ФИНАНСИСКИОТ КВАРТ НА ДУБАИ Банки ги испразнија канцелариите поради безбедносни ризици appeared first on plusinfo.mk.

Министерот за надворешни работи и надворешна трговија Тимчо Муцунски денеска информира дека е во тек координирана евакуација на македонски државјани од повеќе земји на Блискиот Исток и дека се очекува процесот да заврши до крајот на неделата.

На прес-конференција во Владата, Муцунски изјави дека веднаш по ескалацијата на безбедносната криза бил активиран кризен механизам преку Министерството и дипломатско-конзуларните претставништва.

— Од првиот момент на ескалацијата на безбедносната криза на Блискиот Исток воспоставивме постојан кризен механизам. Преку кризен штаб и дипломатско-конзуларните претставништва бевме во 24-часовна комуникација со нашите државјани во погодените подрачја, со јасна цел, нивна безбедна и навремена евакуација – рече Муцунски.

Тој посочи дека во изминатата година ова е трета голема операција од ваков тип.

– Во последните 12 месеци ова е трета сложена операција од ваков обем, по трагедијата со пожарот во Кочани и првата ескалација на ккнагласи министерот.

Муцунски информира дека од Израел веќе се евакуирани сите македонски државјани кои изразиле желба да ја напуштат земјата по копнен пат.

– Шест лица беа евакуирани со владиниот авион преку Шарм Ел Шеикa, додека за уште шест лица нашите дипломатско-конзуларни претставништва во Тел Авив и Каиро помогнаа во организирањето на нивното враќање со комерцијални летови. Останува уште едно лице чија евакуација ќе се реализира веднаш штом се создадат безбедни услови – изјави Муцунски.

Од ОАЕ вчера бил реализиран лет со 151 патник, меѓу кои и странски државјани. Според министерот, во оваа земја во моментов се евидентирани околу 430 македонски државјани, а од Dubai во текот на неделата се планирани уште два лета.

Тој посочи дека 14 лица кои претходно побарале евакуација не се појавиле на аеродромот, по што биле контактирани други граѓани за да се искористи целиот капацитет на летот.

Во Доха се евидентирани 162 лица, од кои 89 изразиле подготвеност за евакуација. Во Кувајт се пријавени 36 лица, во Бахреин 15, а во Саудиска Арабија пет лица.

За нив е предвиден организиран транспорт до Ријад од каде што во текот на неделата ќе биде организиран директен лет.

Министерот се осврна и на евакуацијата на македонскиот фудбалер Стефан Ашковски од Иран, посочувајќи дека процесот бил особено сложен.

– Најкомплексниот дел беше преминувањето на границата од иранска кон турска страна. Постапката траела неколку часа, но нашата амбасада во Ankara успешно ја координираше операцијата и тој безбедно премина на територијата на Tуцик –   рече Муцунски.

Тој апелираше до македонските државјани кои сакаат евакуација навреме да ги контактираат дипломатско-конзуларните претставништва, нагласувајќи дека евакуацијата се организира без финансиски трошоци за граѓаните.

Воедно, министерот изрази загриженост поради ширењето непроверени информации во дел од медиумите.

– Во вакви околности точната и одговорна информација е клучна. Лажните вести создаваат непотребна паника и можат да ја поткопаат довербата во институциите – изјави Муцунски.

The post ПРОДОЛЖУВА ЕВАКУАЦИЈАТА НА НАШИТЕ ОД БЛИСКИОТ ИСТОК Операцијата ќе заврши до крајот на неделата, вели Муцунски appeared first on plusinfo.mk.

По синоќешното евакуирање на 151 лице од Дубаи кои пристигнаа Скопскиот аеродром, се очекува следен авион со сличен број патници да има во вторник. Третиот лет се планира за средината на неделата, но се чека да се види дали ќе се зголеми интересот на македонските граѓани од ризичните подрачја, за да биде целосно искористен потенцијалот за извлекување што го организира државата.

Министерот за надворешни работи и надворешна трговија, Тимчо Муцунски, рече дека се работи и на евакуација на наши граѓани кои се во Бахреин, Катар и во Кувајт. Тие ќе бидат однесени во Саудиска Арабија од каде се очекува во среда да бидат донесени со еден авион.

– Веројатно авионот ќе мора да слета на територија на Косово, но ние ќе го организираме превозот од Приштинскиот аеродром до Скопје. За сето тоа навреме ќе информираме. Од Израел ги извлековме сите што бараа евакуација, освен еден државјанин, но тоа лице инсистираше извлекувањето да биде од територијата на Израел. Две групи извлековме преку Египет и тој процес успешно заврши. Има уште еден државјанин кој бара асистенција и за него бараме начин како да го евакуираме, не исклучувам дека во следните денови таа бројка ќе биде променлива. Нашите линии остануваат 24 часа отворени за нашите граѓани, во секое време, секој што смета дека не се безбедни условите, ние правиме сѐ во следниот период да ги извлечеме. Мојата цел како министер е до крајот на оваа недела сите наши граѓани од погодените подрачја што побарале евакуација да бидат во државава. Клучна и најбитна е безбедноста на граѓаните и тука не смееме да правиме компромис. Затоа, некогаш некои процеси можеби ќе траат подолго и ќе бидат посложени, но не смееме да дозволиме ниту еден наш граѓанин да биде ставен под ризик – рече Муцунски кој синоќа лично ги пречека патниците од Дубаи.

Министерот апелира македонските граѓани кои се наоѓаат во ризичните подрачја и се пријавиле за евакуација, ако одлучиле да не бидат евакуирани, тоа да го пријават, за да не останат празни места во авионот.

– Вкупно 14 граѓани кои требале да бидат на денешниот лет од Дубаи за Скопје до последен момент најавувале дека ќе дојдат, но не се појавиле на аеродромот. Ги повикуваме нашите државјани, кога одлучуваат да не ја користат оваа услуга, на евакуирање, да нѐ информираат навреме за тоа. Среќа што бевме подготвени и што се ангажираше нашата Амбасада со листа на чекање, да ги пополниме тие 14 места со граѓани што требаше да бидат на летот во вторник. Замолувам и апелирам на максимална одговорност зашто се трошат буџетски средства. Кога е во прашање безбедноста, нашата цел е секој лет да биде пополнет до последното возможно место – рече Муцунски.

Тој потсети дека за целокупната оваа операција на евакуирање македонските граѓани нема да треба ништо да платат.

– Во минатото сме имале пракса за репатријација да плаќаат спрема државниот буџет. Граѓаните плаќаат даноци, да знаат дека државата во моментот на криза, кога има вакви ситуации, таа секогаш ќе работи на обезбедување најбезбедни услови за нив. Ние сме една од ретките држави која го прави ова на ваков начин, но сметаме дека системот колку и да има свои предизвици, секогаш, во вакви сложени моменти, мора на граѓанинот да му даде сигурност, да знаете, дека кога сте македонски државјани, институциите стојат позади вас – подвлече министерот.

Со синоќешниот чартер лет од Обединетите Арапски Емирати пристигнаа повеќе македонски државјани, но и еден од Црна Гора, еден од БиХ, еден од Србија, двајца од Косово, четворица со холандско државјанство.

– Приоритизација правиме според одредени категории граѓани за кои беше најпотребна итна евакуација. Над 600 македонски државјани вкупно се очекува да бидат евакуирани оваа недела, иако оваа бројка може да биде променлива. Ова за нас како институција е третпат во последната година да имаме ваква сложена операција, првата се случи по трагедијата во Кочани кога се носеа повредени граѓани надвор од државата, а потоа се организираше и нивно враќање. Пред неколку месеци имаше исто така судири меѓу Израел и Иран и беше потребна репатријација. Сметам дека успешно и ефикасно го реализираме целиот овој процес кој не е нималку наивен. Нагласувам дека при изработката на сите овие планови и протоколи, клучен е ангажманот на нашите ДКП-а. За конкретниот лет, од Дубаи, од огромно значење беше работата на нашиот амбасадор во Емиратите и неговиот тим. Беа максимално ангажирани тие и нашата амбасада во Израел, во Каиро, во Катар и во Турција, која помогна да се извлече еден државјанин од територија на Иран – истакна Муцунски.

Граѓаните кои пристигнаа во Скопје беа исклучително среќни и изразија голема благодарност до Владата за организацијата на целиот процес на евакуација.

– Бевме во еднонеделен престој на Дубаи, во сопствена режија.  Првиот ден кога стигнавме почна ситуацијата, прилично безбедно беше, но непријатно, посебно кога си во туристичка посета, со мали деца, одлична организација, одличен лет, благодарност до Владата, Министерството и до Амбасадата во Абу Даби, беше се одлично организирано. Имаше аларми, известувања и предупредувања што ни стигнуваа на мобилните телефони додека бевме таму, зашто имаше остатоци од ракети и дронови што паѓаа, но генерално беше безбедно иако во таква ситуација не знаете никогаш што може да се случи – изјави една патничка.

И друг патник рече дека е многу среќен што стигнал дома.

– Се организиравме преку Амбасадата која претходно ја контактиравме, среќни сме, стигнавме дома. Додека бевме во Дубаи се слушаа експлозии, аларми преку ноќ не будеа од спиење, не беше баш пријатна ситуацијата. Блиску не слушнавме експлозија, ниту видовме повредени, но, сепак, воопшто не беше пријатно – изјави патникот.

The post ТИЕ ШТО ЌЕ СЕ ПРЕМИСЛАТ ЗА ЕВАКУАЦИЈА ДА СЕ ПРИЈАВАТ ЗА ДА НЕ ОСТАНАТ ПРАЗНИ МЕСТА ВО АВИОНОТ Се планираат уште два лета кон Блискиот Исток appeared first on plusinfo.mk.

Авиокомпанијата „Емирати“ соопшти дека сите летови до и од Дубаи се суспендирани на неодредено време поради случувањата на Блискиот Исток.

Во објавата на веб-страницата на националниот авиопревозник на Обединетите Арапски Емирати, се наведува дека летовите ќе бидат во прекин до „понатамошно известување“.

Сепак, по кусиот прекин утрово авиокомпанијата „Емирати“ соопшти дека ги продолжува летовите до и од Дубаи.

Привремениот прекин на летовите беше поради известување за ирански воздушен напад на Меѓународниот аеродром во Дубаи.

„Емирати“ во моментов извршува ограничен број летови од Дубаи и од Абу Даби преку безбедни воздушни коридори.

The post „ЕМИРАТИ“ НА КРАТКО ГИ СУСПЕНДИРА ЛЕТОВИТЕ ДО ДУБАИ Известување за напад на аеродромот ги сопре летовите appeared first on plusinfo.mk.

Инфлуенсерите кои живеат во Дубаи се предупредени дека може да се соочат со затворска казна доколку на социјалните мрежи објавуваат материјали поврзани со конфликтот со Иран.

Обединети Арапски Емирати ѝ порачаа на заедницата на инфлуенсери во Дубаи дека секоја содржина што се смета за штетна за „јавниот ред, националното единство и угледот на државата“ може да доведе до казни до 77.000 долари или затвор.

Една инфлуенсерка изјавила дека избришала видео на кое се гледаат остатоци од ракета што гореле пред нејзината зграда, бидејќи корисниците на социјалните мрежи „треба да бидат многу внимателни што зборуваат“, објави британскиот весник „The Telegraph“.

Кампањската група „Detained in Dubai“ соопшти дека претходно застапувала неколку странски државјани во државите од Персискиот Залив кои биле приведени или казнети поради објави на „Twitter“, „Facebook“, „Instagram“ и пораки на „WhatsApp“.

Активистите од групата предупредуваат дека многумина можеби нема да бидат сигурни дали ја преминале законската граница со објавување информации за тоа како одбранбените системи на ОАЕ пресретнале ракетни напади од Иран.

Дубаи и пошироките Обединети Арапски Емирати беа директно погодени од војната меѓу Иран и Израел, при што остатоци од соборени ракети паднаа над популарната туристичка дестинација во текот на викендот.

Во саботата навечер, остатоци од пресретната иранска ракета го погодија хотелот „Fairmont The Palm“ на „Palm Jumeirah“, популарна туристичка дестинација. Снимките покажаа пламен како се издига од атриумот на хотелот.

„Dubai International Airport“ беше погоден и во недела наутро. Имаше извештаи и за оштетувања од шрапнели на хотелот „Burj Al Arab“ и пристаништето „Jebel Ali Port“, како и на други цивилни локации во градот.

Законите за сајбер криминал во ОАЕ се меѓу најстрогите во светот, а секој коментар за регионалниот конфликт, владината политика или безбедносните прашања може да се толкува како кривично дело.

– Властите во Дубаи сакаат да го контролираат наративот, тоа е сигурно. Постојат строги правила за тоа што можете да кажете тука. Тие не сакаат да се шири паника од луѓе што шират дезинформации. Во нивен интерес е луѓето да бидат мирни и можам да го разберам тоа – изјави инфлуенсер кој побара да остане анонимен.

Инфлуенсерка со милиони следбеници на својот профил на Instagram изјавила дека го снимила видеото пред својот стан откако иранска ракета била пресретната на небото во саботата.

Сепак, таа одлучила да ја избрише снимката и да не ја објави повторно „од почитување на правилата на ОАЕ“.

– Бев изненадена кога ги видов пламените јазици. Не знаев како да се чувствувам бидејќи на почетокот не знаев што гледам. Но, сега работите се смирија, по неколку дена. Луѓето дури и се вратија на плажата. Се чувствувам прилично безбедно – додава таа.

Инфлуенсерката, која требало да лета за Лондон кога нејзиниот лет бил откажан поради судирите, додаде дека иако властите одржуваат строга контрола врз социјалните мрежи, тие обезбедиле брзи и јасни информации за тоа како да се реагира на нападите.

– Ако има каква било причина за загриженост, ќе ви кажат да одите во засолниште или што и да е. Тие знаат дека паниката не помага – рече таа.

Патниците на крузерите предупредени да молчат

На патниците заглавени на крузерите покрај брегот на Дубаи им било кажано да не зборуваат за тековните судири.

– Ни беше кажано да не зборуваме за ситуацијата на бродот. Ги видовме одбранбените авиони и чадот од нападот на аеродромот, но цело време се чувствувавме безбедно. Никој дома не може да поверува во тоа што го кажуваме – изјави Јан Арнот, патник на бродот на компанијата „Celestyal Cruises“.

Активистите од „Detained in Dubai“ наведуваат дека некои луѓе претходно биле обвинети и за фотографирање или позирање пред забранети локации.

Властите во ОАЕ се особено чувствителни на содржини за кои сметаат дека шират „лажни информации“, им штетат на дипломатските односи или ја поткопуваат националната безбедност.

Изјави на заглавени граѓани кои изразуваат страв или фрустрација поради доцнењата во евакуацијата, исто така, може да се сметаат за прекршување на правилата, предупредува групата.

Во соопштение издадено во саботата, неколку часа по почетокот на нападите на САД и Израел врз Иран, канцеларијата на јавниот обвинител на ОАЕ предупреди „против објавување или ширење гласини и информации од непознати извори преку социјалните мрежи или други технолошки средства“.

Во соопштението се додава дека ваквите предупредувања се издадени „поради последиците од ширење конфузија и загрозување на безбедноста и стабилноста на општеството“.

– Секое лице кое споделува или повторно објавува содржина од непознати извори сноси законска одговорност според важечкиот закон, дури и ако не е оригиналниот автор. Бидете свесни и информирани. Информациите се одговорност, а ширењето гласини е кривично дело – соопшти обвинителството.

Се смета дека строгите правила довеле до самоцензура кај дел од инфлуенсерите кои користат виза преку програмата „Creators HQ“, која им овозможува на креаторите на содржини да живеат во градот без потреба од спонзорство.

– Ако живеете тука, а не сте турист, ви треба дозвола за објавување содржина. Властите се толерантни на многу начини, но строги на други – изјави еден инфлуенсер.

Извршната директорка на „Detained in Dubai“, Рада Стирлинг, предупреди дека законите за сајбер криминал во ОАЕ се меѓу најстрогите во светот.

– Формулацијата на законите е намерно широка, што значи дека речиси секоја критика на владините политики или регионалниот конфликт може да се толкува како кривично дело – рече Стирлинг.

Таа додава дека во време на војна овие закони стануваат уште поопасни.

– Жителите практично се предупредени да молчат на интернет. Посетителите се особено ранливи бидејќи често претпоставуваат дека се заштитени со стандардите за слобода на говор во нивните земји. Но тоа не е случај – предупреди таа.

The post МОЛК ИЛИ ЗАТВОР ВО ДУБАИ Инфлуенсерите бришат видеа од ракетни напади appeared first on plusinfo.mk.

Министерството за надворешни работи и надворешна трговија информира дека заклучно со денеска вкупно 632 македонски државјани побарале информации за евакуација од погодените региони на Блискиот Исток.

„Од нив, 136 лица се пријавени во Доха, додека бројката во Абу Даби континуирано се зголемува и во моментов изнесува околу 477 лица.

Во однос на македонските државјани во Израел, бројката останува непроменета. За дел од нив (вкупно 6 лица), со посредство на Министерството е завршена евакуацијата и тие одлучиле на сопствен трошок со комерцијални летови да заминат кон Скопје. Останатите шест лица, кои изразиле подготвеност за евакуација, во текот на денот ќе бидат транспортирани по копнен пат од Израел во Египет, со асистенција на дипломатско-конзуларните претставништва. Тие ќе бидат сместени на безбедна локација, во хотел на товар на државата, а се очекува во текот на утрешниот ден со владиниот авион безбедно да полетаат кон Скопје.

За македонските државјани во Обединетите Арапски Емирати и Катар, дипломатско-конзуларното претставништво во Абу Даби, во координација со надлежните институции, е во фаза на финализирање на техничките и логистичките детали за организација на чартер-летови. Целта на Министерството е, во координација со властите во Обединетите Арапски Емирати и Катар, да обезбеди неколку чартер-летови за евакуација на пријавените лица.

Истовремено, нашите дипломатско-конзуларни претставништва прават и посебен план за евакуација на граѓаните кои се во Бахраин и Кувајт.

Министерството за надворешни работи и надворешна трговија останува во постојан контакт и целосно на располагање на македонските граѓани, како и во редовна координација со надлежните локални власти, со цел безбедно и навремено спроведување на евакуацијата.

Министерството за надворешни работи и надворешна трговија уште еднаш апелира до сите македонски државјани кои се наоѓаат во погодените региони (Обединетите Арапаски Емирати, Катар, Бахреин и Кувајт), доколку сè уште не го сториле тоа, веднаш да контактираат со надлежното дипломатско-конзуларно претставништво или со СОС бројот на Министерството“ – се вели во соопштението на МНР.

За дополнителни информации и помош, на располагање се:

СОС дежурен телефон (МНРНТ):

075/273-732

Амбасада на Република Северна Македонија во Доха

Тел: +974 50 173 111

Амбасада на Република Северна Македонија во Абу Даби

Тел: +971 56 441 7532

Амбасада на Република Северна Македонија во Тел Авив

Тел: +972 54 500 8566

Тел: +972 54 967 0546

The post ВКУПНО 632 МАКЕДОНСКИ ДРЖАВЈАНИ ПОБАРАЛЕ ЕВАКУАЦИЈА Некои ќе се враќаат со чартер-летови, други со владиниот авион appeared first on plusinfo.mk.