Ќе се воведува дуален концепт и во високото образование, најави денеска министерката за образование и наука, Весна Јаневска. Со новиот закон, како што објасни, првпат се предвидени втор и трет циклус стручни студии, како и кратки студии за специјализација во одредени професии.

Со академското дуално образование, рече Јаневска, ќе бидат опфатени главно техничките струки.

Според министерката, овој принцип на школување се воведува и на факултетите не само зашто тоа го бараат некои од нив и бизнис заедницата, туку и затоа што дуалното образование, како модел, дало одличен резултат во средните стручни училишта.

Првиот циклус стручни студии трае три години и носи 180 кредити.

– Поучени од одличните резултати што ги даваат дуалното образование и учењето преку работа, но и на барање на одредени факултети, се одлучивме на ова што постои во ЕУ, а кај нас го немало. Очекуваме одлични резултати -рече Јаневска по настанот „Револуција во образованието: моќта на дуалното образование во Македонија“ што го организираше Стопанската комора.

Досега, додаде, можност да учат во реална работна средина и теоретските знаења да ги дополнуваат со трајни вештини, имаа само средношколците.

– Следниот чекор е продолжување на дуалниот концепт и во високото образование. Факт е дека дуалното стручно образование е наш успешен образовен модел што го градиме последниве неколку години и дава одлични резултати. Тие се мерат со сé поголемиот број ученици кои го бираат, како и со постојаниот раст на компаниите кои се вклучуваат, што е разбирливо, зашто е најдобар начин да добијат млад кадар што сами го обучиле – рече Јаневска.

Таа информира дека и во новиот конкурс за упис во средно образование, за учебната 2026/2027, фокусот ќе биде на дуалното образование, а постојните и новите профили ќе бидат димензионирани во договор со локалните самоуправи и компаниите.

Таа очекува истиот успех да се постигне и во високото образование, со стручните студии.

– Академската заедница е подготвена да воведе студиски програми кои ќе бидат продолжение на средното дуално образование, како и интердисциплинарни студии со странски универзитети, студентска размена и заеднички проекти. Со новиот Закон за високо образование ова и системски се уредува. Зад сé ова што го говорам, стои одлучноста на Владата и мојата лична решеност да им помогнеме на младите да добијат квалитетно образование и да заврши времето кога нив ги гледавме само како потенцијал што не успевавме овде, во земјата, да го искористиме. Учење низ пракса, можности доколку сакаат после средното образование да работат, проодност кон високото образование за оние што сакаат да продолжат да се надградуваат, сето ова е градено според најдобрите европски практики и верувам дека младите ќе бидат успешни и задоволни овде, во својата држава, каде нивната енергија, креативност и труд се потребни и вредни – рече Јаневска.

Пред неа се обрати и претседателот на Комората, Бранко Азески, напоменувајќи дека дуалниот концепт е симбиоза меѓу бизнисот, неговите потреби за кадар и образованието.

The post СЕ ВОВЕДУВА ДУАЛНО ВИСОКО ОБРАЗОВАНИЕ Стручни студии ќе траат 3 години appeared first on plusinfo.mk.

Партнерството меѓу двете страни е особено значајно за имплементација и развој на дуалното образование во државата, каде што овие студенти покрај нивните студии на престижниот Хајделберг Факултет во Скопје ќе имаат уникатна и непроценлива можност, да го дополнат своето образование со развој на професионални вештини стекнати од финансиските експерти во Сава пензиско друштво кои ќе бидат нивни ментори преку работа на реални проекти.

Ова партнерство, како и другите, како што кажа проф. д-р Цајтел, претставува одличен почеток за факултетот во Скопје, затоа што, Сава пензиско друштво е една од водечките институции во управување со пензиски фондови, со капитал од ЕУ (Република Словенија), а Хајделберг Факултет во Скопје е германски бренд – поттик за вистинска промена и иновативност во македонскиот образовен систем, во насока на отпочнување на дуалното високо образование. Следејќи го искуството на Германија, каде што компаниите имаат професионална пензиска шема за вработените, Хајделберг Факултет во Скопје ќе биде поддржувач на таквата пракса, додаде проф. д-р Цајтел.

Во оваа насока, претседателот на Управниот Одбор на Сава пензиско друштво Снежана Станковиќ, истакна дека целта на друштвото е да се вклучи во сите активности со значителен импакт врз иднината на младите, како што се инвестирање во развој на компетенции на вработените и вложување за развој на нивните таленти, како и од друга страна – пренесување на искуствата за професионална пензиска шема од Германија, тука дома. Затоа, преку ова партнерство, се дава исклучителна поддршка на младите студенти преку нивното образование на Хајделберг Факултетот.

– САВА пензиско друштво како институција има потреба од едуцирање млади кадри во насока на стекнување знаења и вештини од портфолио менаџментот, управувањето со ризиците, како и едуцирање на младите во контекст на развој на финансиската писменост, веднаш после матурирањето – истакна проф. д-р Петар Талески, член на УО на Сава пензиско друштво.

Целта на ваквото партнерство, како што истакнаа двете страни, претставува развој на дуалното високо образование, а со цел – најдобрите студенти да бидат поддржани и да работат во Сава пензиско друштво.

Супервизор на капитално финансирано пензиско осигурување е Агенцијата за супервизија на капитално финансирано пензиско осигурување (МАПАС) (02) 3224 229, www.mapas.mk.

The post САВА ПЕНЗИСКО ДРУШТВО ЌЕ СТИПЕНДИРА СТУДЕНТИ НА ФАКУЛТЕТОТ ХАЈДЕЛБЕРГ Можност за вработување на најдобрите appeared first on plusinfo.mk.

Крстевска ја истакна како исклучително позитивна започната дебата за реформи во образовниот систем кои ќе го вклучат токму дуалниот модел на високо образование. Хајделберг Факултет во Скопје е предводник на концептот на дуално високо образование, како единствен факултет што спроведува додипломски студии по овој модел во Балканскиот регион, за кој модел веќе се водат сериозни дебати во земјите од овој регион.

Суштината на дуалниот образовен концепт во високото образование кој е нов во земјата, но во Германија се применува уште од 1971 година, се сведува на системски пристап што ќе овозможи хармонизација помеѓу теоријата и праксата. За разлика од досегашниот модел, кога праксата на студентите беше сведена на активност на која посветува мал дел од времето, Крстевска појасни дека во дуалниот модел платена пракса започнува буквално од првиот ден на студиите, и трае паралелно со теоретската настава во текот на целите додипломски студии. Притоа, компаниите во кои се спроведува праксата се сметаат за дуални партнери на Факултетот, и студентот секоја недела поминува по 3 дена на пракса во компанијата, каде што ги согледува и применува практичните аспекти на стекнатото теоретско знаење.

На прашањето кои се повеќекратните придобивки од дуалното високо образование, како најважни беа потенцирани наоѓањето млади таленти, нивно обликување во креативни идни вработени со изразен претприемачки дух, критичко и аналитичко размислување, проактивност и организациска визија.

Стекнувањето на германска диплома по завршување на додипломските студии на Хајделберг Факултет во Скопје, покрај македонската, е потврда за квалитетни студии, согласно заедничка наставна програма со партнерскиот универзитет од Франкфурт, СР Германија во сферата на Податоци и компјутерски науки и Бизнис администрација.

Дебатата за реформи во високото образование во Македонија треба да понуди стратешки и системски пристап со цел прогресивно и иновативно образование во чекор со бизнис заедницата. Во таа насока, беше констатирано дека е потребно дуално високо образование кое ќе ги земе предвид позитивните резултати што со години ги дава германскиот дуален концепт.

The post 3 ДЕНА НА РАБОТА, 2 ДЕНА НА ФАКУЛТЕТ Хајделберг – предводник на дуалното високо образование appeared first on plusinfo.mk.

Во Франкфурт, Германија, успешно се заокружи работната седмица, со официјален состанок меѓу Управата на Хајделберг Факултет во Скопје и еден од најголемите дуални универзитети во Франкфурт – Провадис.

Главниот фокус во оваа завршна фаза на кооптираните високообразовни институции беше дефинирање на детали за вмрежување на германските и македонските компании, со особен осврт на: компаниите од ИТ индустријата, банките, германските фабрики и останатите компании во зоните, телекомуникациските компании, банките, осигурителни друштва и сите оние стопански субјекти, на кои, им недостасува млада, продуктивна и квалификувана работна сила. Имено, целта на посетата беше да се круниса со долгорочен договор за партнерство, осуммесечното работење на македонско-германската работна група, а во насока на целосно усогласување за започнување на двојна акредитација на универзитетските студии за прв циклус студии, додипломски на Хајделберг Факултет  во Скопје – во Германија и Македонија.

Со ваквиот договор за двојна акредитација на програмите, практично се започнува еден нов начин на едукација во високото образование кај нас, наречен – дуално високо образование. Како што беше речено во Франкфурт, од страна на претседателот на Универзитетот, г-ѓа Уршула, овој начин на образование, за Германија претставува модел за одржлив развој на компаниите. Оттука, како што беше заклучено на средбата, ова, може да претставува одличен пример за развој и на македонските компании, на кои, во континуитет им недостасува млада и продуктивна работна сила. Затоа, ваквиот модел мора да биде имплементиран преку оваа партнерска соработка на Хајделберг Факултет во Скопје и Франкфуртскиот универзитет, смета претседателот на управата на германскиот факултет во Скопје, проф. д-р Цајтел.

Проф. д-р Наумоски, претставник на управата во Скопје, кој беше на состанокот во Франкфурт, смета дека во земјите од Западен Балкан, не постои ваков модел на високо образование. Тој смета дека Македонија ќе биде прва меѓу нив, со амбиција за овој модел во Скопје, да постави подлога за проширување на истата практика во остатокот од регионот, почнувајќи од Србија, а потоа Албанија.

Претставници од Хајделберг Факултет во Скопје беа: проф. д-р Улрих Цајтел, претседател на Одборот на директори, проф. д-р Роналд Глеих, член на Одборот на директори и проф. д-р Синиша Наумоски, претставник на управата во Скопје. Од седиштето на Франкфуртскиот универзитет Провадис, присуствуваа: претседателот на управата, проф. д-р Урсула Ото; проф. д-р Стефан Клингелхофер, декан на факултетот за компјутерски науки и деловна информатика; проф. д-р. Бјорн Хекман од управта; проф. д-р. Томас Кеил, раководител на катедра за бизнис администрација; проф. д-р. Питер Холм, раководител на катедра за дигитализација; и Кирстен Лоу, раководител на оддел за продажба на универзитетот. Г-дин Лук Рудериш, менаџер за развој на универзитетот, беше организатор и модератор на состаноците во Франкфурт.

Беа усогласени сите релевантни прашања и разгледани акредитациите во двете земји, по тој основ, во врска со влезот на дуалните студии на Франкфуртскиот универзитет Провадис, преку платформата на германскиот Факултет во Скопје: Со тоа, конечно, како што беше објавено „HEIDELBERG FACULTY OF SKOPJE“, се стекна со сите потребни акредитации во македонските и германски институции, така што, од оваа учебна година 2024/25 ќе биде објавен, на крајот на мај, за прв пат, Конкурс за прием на првите студенти на додипломските акредитирани студии со двојна диплома (германска и македонска), и тоа:

Бизнис администрација: банкарство, осигурување и контролинг (30 студенти) и Податоци и компјутерски науки (30 студенти).

– Ова е за прв пат во земјите од Западен Балкан да се студира на германски студии, кои, од нас како Универзитет се директно признаени во 75 отсто од целата настава во Скопје. Остатокот од 25 отсто ќе се работи во Германија (Франкфурт и Хајделебрг) на крајот на петтиот семестар, додека пак, во шестиот семестар со изработка на дипломска работа и завршна проектна задача (во Германија), со ментори германски професори, се завршува постапката за студирање. Со тоа, младите од регионот на Западен Балкан ќе можат да се стекнат со диплома за завршено високо образование во С.Р. Германија, но по трошоци за студирање како во македонскиот образовен систем – рече проф. д-р Урсула Ото, претседателката на УО на Франкфуртскиот универзитет.

– После шест и пол години постапки во Скопје, конечно, во оваа академска година 2024/25, високообразовната установа со уникатен пристап ќе ја интегрира теоријата со праксата, по примерот на Франкфуртскиот универзитет и под нивно менторство и вклучување со програми, образовен кадар и директна суервизија на процесот, евалуација и екстерно тестирање за гаранција на квалитетот и дуалноста на студиите. Воедно, планирани се теренски посети, екскурзија и студентски размени, како и финални активности за докомплетирање на едукативните процеси и стекнување на универзитетска германска диплома, покрај македонската – додаде проф. д-р Глеих, член на Одборот на директори во Хајделебрг Факултет во Скопје.

The post СЕ ОТВОРА НОВ ФАКУЛТЕТ СО ДУАЛНО ВИСОКО ОБРАЗОВАНИЕ Факултетот Хајделберг во Скопје е партнер на Франкфуртскиот универзитет appeared first on plusinfo.mk.