За да им се олесни изборот на деветтоодделенците при уписите во средно образование, Министерството за образование и наука и Центарот за развој на стручното образование со поддршка од Швајцарската амбасада подготвија онлајн водич за квалификации – kvalifikacii.crso.gov.mk, кој ќе им овозможи да донесат правилна одлука за струката во која ќе продолжат да се едуцираат.

Со овој водич првпат сите информации за стручното образование се централизирани на едно место и систематизирани на начин што овозможува лесно пребарување по сектори, квалификации, региони, училишта…

– Водичот има информативна и советодавна улога и ќе им помага на учениците и нивните родители подобро да ги согледаат образовните насоки, перспективите за понатамошно образование, како и можностите за вработување и кариерен развој. Верувам дека младите ќе го користат и ќе си го олеснат изборот на средно училиште кога ќе дојде моментот за тоа – рече Јаневска.

Mинистерката посочи дека имаме квалитетен систем на средно стручно образование и ефикасен модел на дуално образование.

– Ме радува што овој тип на образование не е само алтернатива за учениците, туку веќе неколку учебни години е прв избор, па така во оваа тековна учебна година од 17 илјади ученици запишани во прва година, околу 12 илјади се запишани во стручни училишта – нагласи министерката Јаневска.

За новата учебна година конкурсот нуди 25 илјади слободни места од кои 17 илјади се во стручните училишта, а од нив скоро седум илјади во дуалните паралелки каде практичната настава ќе ја реализираат над 1000 компании.

– Овие резултати, поволни за нашата економија и за намалување на јазот меѓу понудата и побарувачката на пазарот на работна сила, ги остваривме со поддршка на повеќе домашни и меѓународни партнери, а особено голем поддржувач е Швајцарската влада и нејзините агенции, така што верувам дека за нови достигнувања во иднина, соработката ќе ја издигнеме на уште повисоко ниво – рече Јаневска.

Ажурирањето на онлајн водичот за квалификации ќе го прави Бирото за развој на стручното образование. Според директорот на оваа институција Бесник Зендели, ако информацијата не е јасна и достапна – изборот не е вистински.

Онлајн водичот за квалификации е изработен со поддршка од Швајцарската амбасада од каде оценуваат дека оваа платформа е значаен чекор напред во начинот на кој јавните институции комуницираат со граѓаните.

Според заменик-амбасадорката на Швајцарија, Михал Харари, оваа платформа претставува премин од еднонасочна комуникација кон кориснички ориентиран пристап, кој придонесува за градење доверба, поголема транспарентност и доближување на институциите до граѓаните.

The post KОЈА СТРУКА НОСИ ИДНИНА? Деветтоодделенците добија нов онлајн водич за уписи appeared first on plusinfo.mk.

Министерството за образование и наука засилено ги спроведува реформите во образованието. Согласно Реформската агенда, до декември 2026 година имаме обврска да стигнеме до бројка од 700 компании вклучени во дуалното образование. Веќе сега таа бројка е надмината и над 800 компании се вклучени во стекнување практично знаење на учениците директно кај работодавач. И, оваа бројка дополнително ќе расте, затоа што компаниите го гледаат бенефитот од учеството во квалитетното образување кадри според свои потреби, рече денеска министерката за образование и наука Весна Јаневска.

Како што истакна таа во обраќањето по повод доделувањето на грантот од 500.000 евра за УГД – Штип, училиштето „Кочо Рацин“ од Свети Николе и три компании, и учениците ја препознаваат предноста да влезат на пазарот на труд или во високото образование подготвени не само со теоретско, туку и со практично знаење од конкретни работни места.

– Затоа и бројот на ученици во дуалните паралелки во средните стручни училишта, од година во година е сѐ поголем. Во стручно образование се запишани 66 отсто од средношколците. Од нив, околу 30 проценти се запишани во дуално образование. Јасен е интересот на компаниите за раст на овие бројки – ним им се потребни квалификувани работници, кои знаат да ракуваат со опрема и ја познаваат технологијата. Тоа, меѓу другите предности, значи и намалување на трошоците за обука по вработувањето. Дополнително, дуалното образование го издигнуваме и на ниво на високото образование. Со новиот Закон за високото образование, што наскоро ќе биде пред пратениците, се дава можност практичната настава во задолжителните наставни предмети, за подрачјата каде што е тоа применливо, да се изведува како дуално образование под менторство на стручни лица од реалниот сектор и ментор од соодветната студиска програма на универзитетот. Оваа измена е согласна со европското разбирање на стручното образование не само како одговор на недостигот на вештини на пазарот на трудот и несовпаѓањето на вештините, туку и како двигател на социјалната инклузија, дигиталната трансформација, територијалната кохезија и долгорочната општествена отпорност – истакна министерката.

Таа изрази задоволство што образованието и бизнис заедницата продолжуваат да создаваат можности за младите и да градат конкурентен човечки капитал.

– Со поддршка од нашите меѓународни партнери: Германската и Швајцарската влада, преку Регионалниот фонд за предизвици, Земјоделскиот факултет при Универзитетот „Гоце Делчев“ во Штип и средното општинско училиште „Кочо Рацин“ од Свети Николе, заедно со шест претпријатија, добиваат грант од речиси 500.000 евра за реализација на проектот „Паметна обука во преработката на производи од млеко и месо“. Ќе се изгради и опреми современ Центар за обука за преработка на млеко и месо, ќе се изработат наставна програма и материјали за учење, со што ќе бидат поддржани две квалификации: млекопреработувач и преработувач на месо и месни производи. Во Македонија, со гордост говориме за успешноста на моделот на дуално образование, во рамки на средното стручно образование. Во овој грант се препознаваат сите негови добри практики: можноста за партнерство меѓу средни училишта и факултетите, активната улога на компаниите, вклученост на стопанските комори, практичната обука на учениците со ментори, како и соработка со меѓународни партнери. Заедничка цел е директно решавање на структурните предизвици на пазарот на труд, како што се младинската невработеност и недостигот на вештини, како и зголемување на конкурентноста на локалните компании – подвлече Јаневска.

На настанот присуствуваа и претседателот на Стопанската комора, Бранко Азески, германската амбасадорка, Петра Дрекслер, заменик амбасадорот на Швајцарија, Михал Харари, директорот на Германската развојна банка за Македонија и Косово, Мориц Реме, како и проектниот координатор на Регионалниот фонд на предизвици, Балша Чулафиќ.

Регионалниот фонд за предизвици е финансиска институција која има за цел зголемување на конкурентноста на претпријатијата во Западен Балкан преку финансирање инвестиции во опрема и инфраструктура за проекти за дуално и стручно образование изработени во партнерство на установи за стручно образование и претпријатија. Грантовите се доделуваат по пат на конкурентен регионален предизвик.

Германското сојузно министерство за економска соработка и развој додели 73,4 милиони евра на РЦФ, а швајцарската влада застапувана од страна на Швајцарската агенција за соработка и развој (SDC) кофинансираше дополнителни 10 милиони евра. Средствата беа доделени на kfW Развојната банка, а реализирани од страна на Коморскиот инвестициски форум на Западен Балкан 6 (ЗБ6–КИФ), како заедничка иницијатива на стопанските комори од регионот. Фондот е имплементиран од страна на консталтинг конзорциуми.

По четири отворени повици, Регионалниот фонд за предизвици се обврзува да поддржи вкупно 17 проекти со 91 партнер претпријатие во Северна Македонија во износ од 7,63 милиони евра. На четвртиот повик за предлог проекти, пристигнаа 187 изјави на интерес од земјите на Западен Балкан, од кои 14 беа од Северна Македонија. Комисијата за избор одлучи да финансира еден најуспешен проект од Северна Македонија со вкупен износ од 495,350 евра.

The post ПОВЕЌЕ ОД 800 КОМПАНИИ СЕ ВКЛУЧЕНИ ВО ДУАЛНОТО ОБРАЗОВАНИЕ Учениците и фирмите најдоа заеднички јазик преку овој модел appeared first on plusinfo.mk.

„Работното искуство е високо ценето од страна на компаниите и токму затоа недостатокот од работна пракса претставува голема пречка за оние кои првпат бараат работа. Многу млади луѓе се заробени во маѓепсан круг: тие тешко можат да најдат прва работа, затоа што често во огласите се бара кандидатите да имаат работно искуство“.

Вака се вели во анализата за дуалното образование на познатиот Хајделберг Факултет во Скопје.

„Докажано е дека практиканството има големо влијание врз промоцијата на вработувањето на младите и е главна причина за ниските нивоа на невработеност кај младите во некои европски земји.

Слично е и со пазарот на труд во Македонија, кој сè повеќе се соочува со недостиг од кадар кој веднаш може да се вклучи во работните процеси. Компаниите бараат луѓе кои покрај диплома ќе имаат и практично искуство – нешто што традиционалниот образовен систем ретко го обезбедува“, велат од Хајделберг Факултетот во Скопје.

Оттаму, дуалното образование, модел што Хајделберг Факултет во Скопје го воведе како прв и единствен во земјава, е одговор токму на оваа потреба, се вели понатаму во текстот.

„Студентите уште за време на студиите се вклучени во платена пракса во големи компании во земјава и по завршувањето на факултетот тие зад себе веќе ќе имаат три години работно искуство.

Со овој пристап, компаниите можат да добијат кадар кој е веќе запознаен со нивната работа и процеси и наместо дополнителни месеци за обука, младите веднаш се подготвени да преземат одговорности. Освен тоа, дуалниот модел им овозможува да развијат и т.н. ‘soft skills’ – комуникација, работа во тим и решавање проблеми, кои се клучни за продуктивноста“, истакнуваат од Хајделберг Факултетот.

Хајделберг Факултет во Скопје веќе соработува со петнаесетина реномирани компании од банкарскиот и од производствениот сектор.

Според факултетот, овие партнерства ја потврдуваат важноста на новиот образовен пристап – за компаниите тоа е можност да инвестираат во идните професионалци, а за студентите гаранција дека нивното образование има директна практична примена.

Хајделберг Факултет – Скопје минатата година ја пречека првата генерација студенти кои во текот на студирањето два дена неделно работат во реномирани компании, а 3 дена во неделата студираат според германски стандарди.

Студентите по завршувањето на тригодишните студии се стекнуваат со двојна диплома – македонска и германска, а платената пракса им овозможува месечна плата која ја покрива школарината.

„На тековниот конкурс за прием на студенти за академската 2025/26 година на Бизнис администрација – банкарство, осигурување и контролинг од предвидените 30, останати се уште мал број места за упис на бруцоши“, потсетуваат од Хајделберг Факултетот во Скопје.

The post КОМПАНИИТЕ БАРААТ ПРАКТИЧНИ ВЕШТИНИ Зошто студентите со дуално образование се иднината на пазарот на труд? appeared first on plusinfo.mk.

Пазарот на труд во Македонија со години се соочува со извесен парадокс: компаниите бараат млади кадри со искуство, додека студентите дипломираат без практични вештини што веднаш можат да ги применат. Оваа празнина меѓу теоријата и праксата не е само личен предизвик за младите, туку и стратешки проблем за економијата. Решението, како што покажува германското искуство, лежи во дуалното образование.

Германски модел – македонска перспектива

Дуалното образование не е нов концепт во Европа, но за Македонија претставува вистинска револуција. Toa комбинира академска настава со практична работа во различни компании, овозможувајќи им на студентите да учат и во исто време да градат кариера. На овој начин, дипломците веќе при излегување од факултет имаат стекнато работни навики, вештини и контакти што ги прават конкурентни на пазарот на труд.

Токму оваа формула ја спроведува Хајделберг Факултет во Скопје, кој го донесе германскиот образовен модел во Македонија. Со тоа, младите повеќе не мора да заминуваат од земјата за да се стекнат со европско образование и германска диплома.

Компаниите и факултетите се партнери, а не паралелни светови

Она што го прави Хајделберг уникатен е системот на партнерства со компании. Студентите уште од прва година се вклучуваат во пракси, каде што се соочуваат со реални задачи и работни процеси. На тој начин, компаниите добиваат млади луѓе што веќе го разбираат системот на работа, а студентите добиваат искуство и финансиска независност.

Овој пристап ја менува бизнис климата: наместо да чекаат години за да добијат подготвена работна сила, компаниите директно учествуваат во нејзиното создавање. Истовремено, се гради нова култура на соработка меѓу академијата и економијата.

Иднина во која сите добиваат

Бенефитите од дуалното образование се многубројни. За студентите тоа значи кариера уште за време на студиите. За компаниите е сигурен извор на квалитетен кадар, додека за државата значи задржување на младите во земјата и градење економија што почива на знаење и на иновации. Оттаму, Хајделберг покажува дека европските стандарди може да се изградат и дома и дека дуалното образование не е само академски концепт, туку формула за нова, поразвиена и поконкурентна Македонија.

Конкурсот за прием на студенти на додипломските акредитирани студии со двојна диплома (германска и македонска), за учебната година 2025/26 година веќе е во тек, а голем број од местата се веќе пополнети.

На студиската програма Бизнис администрација: банкарство, осигурување и контролинг има место за 30 студенти, исто колку и на студиската програма Податоци и компјутерски науки.

The post ВО ТЕК СЕ УПИСИТЕ НА ФАКУЛТЕТОТ ХАЈДЕЛБЕРГ Сите имаат корист од дуалното образование appeared first on plusinfo.mk.

Студентите да имаат шанса да добијат образование, а во исто време да бидат дел од компании, да добиваат плата и да станат експерти на одредено поле е уникатна можност, рече на денешната форумска дебата проф. д-р Улрих Цајтел, претседател на Бордот на директори на факултетот Хајделберг во Скопје.

На форумската дебата за дуално образование – конекцијата помеѓу компаниите и студентите, „Прашај го Цајтел“, тој се сретна со идните студенти на Хајделберг Факултет во Скопје, со нивните родители и со сите заинтересирани за дуалниот модел на образование и за германскиот образовен систем. На дебатата присуствуваа повеќе претставници од реномирани компании во земјава кои имаат соработка со Хајделберг и каде што студентите од оваа високообразовна институција имаат можност да одат на пракса, додека студираат.

– Ова е навистина уникатно, можноста за 3 години да се едуцираш и притоа да имаш искуство во компанија. Друга можност е што ќе бидете дел од интернационален пазар, бидејќи дел од професорите доаѓаат од Германија. Со тоа се создава врска меѓу студентот и Германија како една од најголемите светски економии, а со тоа и можност студентите во иднина да работат таму. Ако не си едуциран, помали ти се шансите да успееш на пазарот на труд, толку е едноставно – рече Цајтел, додавајќи дека младите мора да знаат дека образованието е клучот.

На дебатата „Продуктивност и практично знаење – потреба за компаниите“, дискутираа м-р Елизабета Саздовска, помошник директор на човечки ресурси во НЛБ Банка АД Скопје, Билјана Терпини, директор за односи со јавноста и медиумите од Елемент ПР, м-р Костандина Пареска Медарски, раководител на финансии во Валтек во Северна Македонија и Бугарија, м-р Дејан Чуповски, проектен менаџер за дуално стручно образование, МГСЗ, м-р Бобан Попевски, консултант за финансиски услуги, MDN Freight Inc..

Сите тие ги споделија своите искуства од секторот од кој доаѓаат, со посебен акцент на тоа како се балансира креативноста со ефикасноста при мерење на продуктивноста во компаниите во кои работат.

Факултетот Хајделберг од Скопје е единствената образовна институција која што овозможува дуален пристап во високото образование, преку комбинација на студии во Македонија и еден семестар во Германија, со дополнителна пракса во петнаесетина македонски компании. Комбинираниот модел овозможува студентите да се стекнат со двојна диплома од високообразовните институции во двете држави, со што се обезбедува врвно образование според меѓународни стандарди.

Конкурсот за прием на студенти на додипломските акредитирани студии со двојна диплома (германска и македонска), за учебната година 2025/26 година е во тек. На студиската програма Бизнис администрација: банкарство, осигурување и контролинг има место за 30 студенти, исто колку и на студиската програма Податоци и компјутерски науки.

The post ДУАЛНОТО ОБРАЗОВАНИЕ Е МОСТ МЕЃУ СТУДИИТЕ И КОМПАНИИТЕ Дебата на факултетот Хајделберг за шансите и за искуствата на студентите appeared first on plusinfo.mk.

Средното стручно образование во Македонија се профилира како најуспешен модел кој ефективно ја спојува теоријата со практиката, овозможувајќи им на учениците директен влез на пазарот на труд или академско надградување. Оваа образовна насока веќе не се смета за алтернатива, туку станува прв избор на сè поголем број млади во државата, истакна министерката за образование и наука, проф. д-р Весна Јаневска, на конференција посветена на развојот на стручното образование и обука во земјата.

Настанот беше организиран од Швајцарската амбасада и проектот Е4Е – „Образование за вработување“, каде министерката ја презентираше визијата и конкретните чекори за унапредување на оваа сфера.

– Целиме кон извонредност во средното стручно образование. Донесовме нов Закон со кој го уредивме концептот на дуално образование, го јакнеме системот преку регионални центри, нови струки и зголемен број на компании вклучени во практичната обука – изјави Јаневска.

Таа информираше дека за учениците кои ќе се запишат во дуални паралелки во новата учебна година се обезбедени 1.570 стипендии во вредност од 50 милиони денари (приближно 812.000 евра), што претставува силен поттик за младите да се насочат кон професии кои се во корелација со реалните потреби на стопанството.

Министерката истакна дека вложувањата веќе даваат резултати – во јунскиот уписен рок, во средните стручни училишта биле запишани повеќе од двојно ученици во споредба со гимназиите.

На конференцијата беше промовирано и пристапувањето на Македонија кон мрежата „WorldSkills Europe“, што ќе овозможи вклучување во меѓународни натпревари, како и размена на знаења и искуства со земјите-членки.

– Ќе ги искористиме можностите што ги нуди мрежата. Ќе ни користат добрите практики и пошироките сознанија за најефикасно насочување на инвестициите во модернизација на објектите за стручна обука – рече Јаневска.

Целта, нагласи таа, е висока младинска вработеност преку образование што ги следи европските стандарди и пазарни потреби.

На настанот се обрати и амбасадорката на Швајцарија во Македонија, Вероник Улман, како и Нино Буиќ од Агенцијата за стручно образование на Хрватска. Тие ја потврдија посветеноста на Македонија кон зголемување на квалитетот на стручното образование, оценувајќи ги реформите како охрабрувачки и во согласност со европските стандарди.

The post СТРУЧНОТО ОБРАЗОВАНИЕ СТАНУВА ПРВ ИЗБОР НА МЛАДИТЕ Министерката Јаневска најави 1.570 стипендии и нови можности преку „WorldSkills Europe“ appeared first on plusinfo.mk.

Преку Министерството за образование и наука за следната учебна 2025/2026 година ќе се доделат најголем број на стипендии за дуалното образование досега, односно 1570 стипендии за учениците кои ќе се запишат во дуални паралелки во средните стручни училишта, соопшти владината прес-служба.

„За тоа дека вложуваме во дуалното образование и ги стимулираме и компаниите за нивна поголема вклученост, покажува и тоа што над 550 компании оваа година директно ќе бидат вклучени во практична обука на учениците што ќе се запишат во дуалните паралелки“, се посочува во соопштението од Владата.

Како што се наведува, ова значи дека учениците со завршување на средно стручно училиште, ќе имаат поголема веројатност за брзо вработување, во најголем дел во компаниите каде посетувале пракса, или пак да продолжат со своето образование на некои од универзитетите во државата.

„Наш приоритет е да ја зголемиме вработливоста на младите лица и да создадеме квалификуван кадри со вештини и компетенции што се потребни на компаниите, а со тоа ќе овозможиме младите својата иднина да ја градат во сопствената држава“, наведуваат од Владата.

Како Влада фокус се реформите во образованието за подобар и поквалитетен образовен процес.

The post РЕКОРДНИ 1570 СТИПЕНДИИ ВО ДУАЛНОТО ОБРАЗОВАНИЕ ЗА СЛЕДНАТА ГОДИНА Повеќе од 550 компании ќе бидат вклучени во праксата на учениците appeared first on plusinfo.mk.

Стручното образование е во фокусот и на годинашниот Конкурс за запишување во средните училишта за учебната 2025/2026 година што го објави МОН.

Од предвидени 27 .600 ученички места за упис во прва година средно образование, 7.900 се слободни за гимназии, а околу 18.000 за стручни училишта, од кои 6.700 за дуалното образование. Останатите слободни места во објавениот конкурс се за уметничките училишта и за Спортската гимназија.

Одговарајќи на новинарски прашања, министерката за образование и наука Весна Јаневска денеска соопшти дека бројот на дуални паралелки во училиштата е зголемен согласно анализата на пазарот на трудот во општините и во зависност од тоа колку компании се заинтересирани.

– Но, секако, тој процес се подобрува и очекувам оваа година да биде на навистина задоволително ниво. Се зголемува и бројот на компании, над 550 компании веќе се активно вклучени, по завршување на конкурсот ќе видиме уште колку други ќе се вклучат. Но, според информациите кои ги добивам, постои заинтересираност за дуалните паралелки – изјави Јаневска на настан на Машинскиот факултет по повод донирана опрема за лабораторија.

Во минатите две учебни години стручните училишта беа избор за две третини од вкупниот број запишани ученици во прва година. Овој тренд, според Јаневска, нема да има негативен ефект за гимназиското образование.

– Нема да има негативен ефект, напротив, очекувам целото општество да се прилагодува на потребите на државата. Имаме извоз на мозоци и недостиг на работна сила и тоа е проблем кој мора да се решава. Затоа што доколку имаат можност, преку дуалните паралелки, учениците да останат на работа во компаниите, тие и ќе останат во земјава. Со завршување на средно стручно тие веднаш можат да влезат на пазарот на труд или да го продолжат своето образование, додека гимназиското образование генерално се предвидува за оние кои веќе знаат дека ќе го продолжат своето образование. Затоа што пазарот на труд бара помалку такво општо образование откоку што бара стручно образование – рече Јаневска.

Пријавувањето на учениците за упис во средно образование ќе биде електронско преку линк до системот за електронски услуги на МОН https://euslugi.mon.gov.mk/ со посебна најава за средношколци преку сопствените кориснички сметки на schools.mk

Ќе има две пријавувања во јунскиот уписен рок и едно во августовскиот. Првото електронско пријавување на учениците ќе биде од 00:00 часот на 14 јуни до 23:59 часот на 17 јуни 2025. Доставувањето на потребната документација до училиштата ќе биде на 18 и 19 јуни, а конечната ранг-листа со резултатите од запишувањето и слободните места, секое училиште ќе ја објави на 20 јуни 2025.

Второто електронско пријавување во јунскиот рок ќе биде на 30 јуни 2025, доставувањето на документите на 1 јули и објавувањето на конечната ранг-листа и слободните места на 2 јули 2025.

Пријавувањето во августовскиот рок, според објавениот конкурс, ќе се врши на 21 август 2025.

Во објавениот Конкурс се наведени условите за запишување на учениците во прва година, утврдениот минимум број поени за пријавување, потребната документација која учениците ќе треба да ја достават во избраното средно училиште по успешното електронско пријавување, како и насоки за спроведување на конкурсот.

The post СÈ ПОГОЛЕМ Е ИНТЕРЕСОТ ЗА ДУАЛНОТО ОБРАЗОВАНИЕ Две третини од слободните места се за упис во средните стручни училишта appeared first on plusinfo.mk.

Долго време, македонскиот образовен систем и бизнис-секторот функционираа како два паралелни света. Едниот произведуваше кадри, другиот бараше кадри – но ретко кога овие две потреби се среќаваа. Резултатот? Млади кои дипломираат без практични вештини. Компании кои тешко наоѓаат квалификувана работна сила. И економија која тапка во место.

Комората во 2017 година ја презеде иницијативата за воведување на дуално образование. Започнавме како пилот-проект со само две квалификации – од секторите електротехника и машинство. Денес, сликата е сосема поинаква: овој модел се применува на 78 квалификации во рамки на 14 сектори, со активно учество на 560 компании и 69 средни стручни училишта. Имаме импресивна бројка од 259 дуални паралелки во училиштата.

Зошто ова е важно за компаниите? Затоа што времето на чекање – помина. Денес не можете да чекате да се појави идеалниот кандидат. Морате да го создадете. А тоа значи да се вложи во млади кои ќе бидат обучени конкретно за вашите процеси, технологии и потреби. Дуалното образование токму тоа го овозможува. И тоа не е „инвестиција во некое туѓо дете”, туку вложување во сопствената иднина. Секоја компанија знае: иднината не се гради само со машини, туку со луѓе.

Ако сакаме младите да останат тука и да имаат перспектива, мораме да им дадеме образование кое води кон вработување. Мораме да ги подготвиме за пазарот што постои, а не за оној од пред 20 години.

Дуалното образование не е крајната цел, туку почеток на едно ново разбирање: дека образованието мора да зборува на јазикот на економијата. А Комората е тука – за да биде преведувач, посредник и двигател на тој процес.

Во спротивно и понатаму ќе бидеме сведоци на одливот на мозоци на запад. Македонија нема иднина без да го спречи овој процес. Затоа Комората од денес е во нова офанзива да ја убеди Владата со заедничка платформа да направат пресврт како кај дуалното образование.

Според извештајот на Светска банка за 2023 година Македонија е рангирана на 23 место, во група од 25 земји, со најмногу емигранти. 40% од високообразовниот кадар, во последните 10 години, ја има напуштено државата и според индексот на Глобал економи (Global economy) е рангирана на 5-то место од 41 европска држава.

Но, причината за иселувањето не е само од економска природа:

а) Лоши можности за вработување.

б) Невработеност од 24% кај младите до 29 години.

в) Младите се иселуваат за поквалитетно здравство, социјална заштита и поквалитетен начин на живот.

За да се спречи трендот на иселување на младите образовни лица и враќање на веќе иселените, мора да се направи платформа во која водечко место ќе имаат Владата и Комората, а на која би се приклучиле универзитетите и невладините организации кои ќе понудат соодветни решенија.

„Одамна си заминаа песимистите, тука останаа само оптимистите. Да направиме обид да ги задржиме овде”.

П.С. Даулното образование и вештините

Даулното образование и вештините беа централно прашање до сега. Тоа ќе продолжи и понатаму, но на тоа ќе се додаде и спречувањето на одливот на мозоци. А за извозот и да не зборуваме. Тој ќе биде алфа и омега на нашиот опстанок. Поконкретно за извозот во наредната колумна.

The post Образованието почна да зборува со јазикот на бизнисот appeared first on plusinfo.mk.

Концептот на дуално образование го создава потребниот, добро подготвен кадар за потребите на стопанството и со тоа го намалува јазот помеѓу понудата и побарувачката на пазарот на човечки капитал. Заедно со нашите партнери, овој концепт на образование ќе продолжиме да го спроведуваме и надградуваме, во рамки на проектот „Образование за вработување“ кој пак, овозможи обединување на енергијата и заедничко креирање ефективни образовни политики, истакна министерката за образование и наука проф. д-р Весна Јаневска при денешната посета на компанијата „Ронтис“ во Велес, каде заедно со швајцарската амбасадорка Вероник Улман, извршниот директор на Стопанската комора, Антони Пешев и со проектниот тим лидер, Курт Вутрих извршија увид во спроведувањето на практичната настава директно на работно место за учениците од Регионалниот центар за стручно образование и обука „Коле Неделковски“.

– Има многу компании кои се вклучени во дуалното образование и следат високи стандард за едукација и грижа кон учениците, односно над 550 во оваа учебна година. Организираат практична настава за речиси 4.000 ученици од дуалните паралелки во 62 средни стручни училишта – рече Јаневска, додавајќи дека ова се добри бројки, до кои е дојдено со многу труд на Министерството за образование и наука и голема поддршка од швајцарската амбасада, Делегацијата на ЕУ, бизнис заедницата, граѓанскиот сектор и самите училишта.

Министерката изрази очекувања дека соработката помеѓу сите кои досега се грижеа за унапредување и промоција на средното стручно образование ќе продолжи, не само преку проектот „Образование за вработување“, туку и воопшто низ сите канали кои даваат ефект, додавајќи дека очекува наскоро да се донесе и новиот Закон за стручно образование и обука, кој е во собраниска процедура и со кој всушност системски ќе се уреди концептот на дуално образование.

– Како министерка преземам и конкретна иницијатива за оваа соработка да продолжи, па така веќе Министерството испрати допис до општините и средните стручни училишта кои во координација со компаниите треба да достават информации за реалните потреби од одреден кадар, за да можеме соодветно да ги планираме и квотите за упис на ученици во средно образование во конкурсот за следната учебна година – додаде Јаневска.

The post 550 ФИРМИ И 4.000 УЧЕНИЦИ ГОДИНАВА ВКЛУЧЕНИ ВО ДУАЛНО ОБРАЗОВАНИЕ Конкурсот за идната учебна година ќе се планира според потребите од соодветен кадар appeared first on plusinfo.mk.