Напредокот во реализацијата на тековните проекти за техничка помош во областите на управување со јавниот долг, развој на пазарот на државни хартии од вредност, даночната и царинската администрација, како и зајакнување на системите за финансиски надзор и борба против финансиски криминал биле во фокусот на разговорите на министерката за финансии, Гордана Димитриеска-Кочоска со претставници на Министерството за финансии на САД (U.S. Department of the Treasury), Канцеларија за техничка помош (Office of Technical Assistance – OTA).

Средбата, како што информираат од Министерството за финансии се одржала во рамки на пролетните средби на Меѓународниот монетарен фонд (ММФ) и Светската банка (СБ) во Вашингтон.

На средбата била потврдена континуираната и конструктивна соработка помеѓу Министерството за финансии и Трезорот на САД , насочена кон унапредување на управувањето со јавните финансии, јакнење на капацитетите на институциите и модернизација на финансиските системи.

Посебен акцент беше ставен на активностите поврзани со развоjот на новата платформа за аукции на државни хартии од вредност, при што беше истакната важноста од понатамошна координација со сите релевантни институции и партнерите од Трезорот на САД, со цел навремена и успешна имплементација на современо, ефикасно и транспарентно решение.

– Техничката соработка со Трезорот на САД е клучна за модернизацијата на јавните финансии и унапредувањето на пазарите на капитал во земјата. Заеднички работиме на конкретни решенија, од нова платформа за аукции на државни хартии од вредност до зајакнување на даночната и царинската администрација, со цел поголема ефикасност, транспарентност и стабилност на системот – изјавила министерката.

Исто така, бил разгледан напредокот во реформите во даночниот и царинскиот систем, унапредувањето на управувањето со ризици, дигитализацијата на процесите, како и јакнењето на институционалните капацитети преку обуки и пренос на меѓународни добри практики.

На средбата беше истакната заедничката заложба за продлабочување на соработката, како и поддршката на реформските процеси кои придонесуваат за поголема фискална стабилност, ефикасност на јавните финансии и економски раст.

Димитриеска-Кочоска нагласила и дека стратешкото партнерство со Трезорот на САД претставува значаен поттик за унапредување на јавните финансии и институционалните капацитети во земјата.

The post САД ЌЕ ЈА ПОМОГНАТ ИЗВЕДБАТА НА НОВАТА ПЛАТФОРМА ЗА АУКЦИИ НА ОБВРЗНИЦИ Димитриеска-Кочоска во американскиот Трезор реферираше и за другите проекти appeared first on plusinfo.mk.

Министерството за финансии денеска објави дека е завршена исплатата на главницата и каматата за втората година од Првата граѓанска обврзница, издадена во 2023 година. На сметките на 1448 граѓани се исплатени вкупно 1,4 милијарди денари (околу 23,5 милиони евра), заедно со камата во висина од 72,4 милиони денари (околу 1,2 милиони евра).

„Ова е првпат државата директно да соработува со граѓаните како инвеститори, што претставува нов пристап и ја потврдува довербата што тие ја имаат во фискалната стабилност“, соопштија од Министерството за финансии.

Првата граѓанска обврзница беше издадена на 13 јули 2023 година, со рок на достасување од две години и каматна стапка од 5% годишно. Исплатата на каматата се реализираше во два наврати во јули 2024 и сега, во јули 2025 година, секоја година со по 72,4 милиони денари.

Овој тип на обврзница беше прв ваков продукт понуден од страна на државата и беше дизајниран исклучиво за граѓаните. Целта, како што истакнуваат од Министерството, била унапредување на домашниот пазар на хартии од вредност, зголемување на вклученоста на физичките лица во финансискиот систем, како и подобрување на структурата на инвеститорската база.

„Резултатите покажуваат дека оваа понуда беше добро прифатена и потврдува дека граѓаните сакаат сигурни, но и исплатливи начини за да ги пласираат своите заштеди“, потенцираат од Министерството.

Според податоците, државата досега има издадено две емисии на граѓански обврзници во вкупна вредност од 41,1 милион евра. Втората обврзница беше издадена на 7 ноември 2023 година во износ од 17,6 милиони евра и ќе доспее во ноември 2025 година.

Министерството најавува дека во наредниот период ќе следуваат нови финансиски инструменти, наменети исклучиво за граѓаните, со цел да се зголеми квалитетот на понудените опции и да се зајакне вклученоста на населението во финансиските текови на земјата.

„Планираме нови, иновативни механизми кои ќе ја доближат државната финансиска политика до секој поединец. Обврзниците се само почетокот“, велат од финансии.

The post ДРЖАВАТА ИМ ВРАЌА ПАРИ НА 1448 ГРАЃАНИ Од Првата граѓанска обврзница се исплатени над 24 милиони евра appeared first on plusinfo.mk.

СВБ е родена пред четири децении, во срцето на регионот познат по својата технолошка моќ и паметното одлучување. Банката со седиште во Калифорнија порасна и стана 16-та најголема банка во САД, која им служи на финансиските потреби на технолошките компании ширум светот. Но, серијата несреќни инвестициски одлуки доведе до нејзин колапс, анализира Гардијан.

Бидејќи технолошкиот сектор ја претпочиташе оваа банка, услугите на СВБ беа многу барани за време на пандемијата. Почетниот пазарен шок предизвикан од ковид-19 во почетокот на 2020 година, брзо му отстапи место на златниот период за стартапи и за основаните технолошки компании, бидејќи потрошувачите трошат на уреди и на дигитални услуги.

Многу технолошки компании ги користеа услугите на СВБ за чување готовина за плати и за други деловни трошоци, што доведе до голем прилив на депозити. Банката инвестираше голем дел од депозитите, како што тоа обично го прават банките.

Семето на пропаста

Семето на пропаста беше посеано кога СВБ инвестираше многу во долгорочните државни обврзници на САД, вклучувајќи ги и оние поддржани со хипотеки. Ова се прилично сигурни инвестиции. Но, обврзниците имаат обратна врска со каматните стапки – кога стапките растат, цените на обврзниците паѓаат. Така, кога Федералните резерви почнаа нагло да ги зголемуваат стапките за борба против инфлацијата, портфолиото на обврзници на СВБ почна значително да ја губи вредноста.

Ако СВБ можеше да ги задржи тие обврзници неколку години до доспевањето, тогаш ќе го вратеше капиталот. Меѓутоа, како што се влошија економските услови во текот на изминатата година, а особено беа погодени технолошките компании, многу од клиентите на банката почнаа да ги повлекуваат своите депозити.

SVB немаше доволно готовина, па почна да продава дел од своите обврзници со огромни загуби, плашејќи ги инвеститорите и клиентите. Од моментот кога беше откриено дека банката го продала имотот, до неговото пропаѓање, поминаа само 48 часа.

Што го предизвика стампедото на банката?

Бидејќи банките чуваат само дел од нивните средства како готовина, тие се ранливи на ненадејна побарувачка од клиентите. Иако проблемите на свб произлегуваат од претходните одлуки за инвестирање, алармот беше вклучен на 8 март, кога банката објави зголемување на капиталот од 1,75 милијарди долари. Банката им кажа на инвеститорите дека мора да ја затвори дупката предизвикана од продажбата на нејзиното портфолио на обврзници со загуба.

„Одеднаш, сите се загрижија дека банката има недостиг од капитал“, рече Фариборз Мошириан, професор на УНСВ и директор на Институтот за глобални финансии.

Клиентите станаа свесни за длабоките финансиски проблеми во СВБ и почнаа масовно да повлекуваат пари. За разлика од банка ориентирана кон граѓаните која им служи на бизнисите и домаќинствата, клиентите на СВБ генерално имаа многу поголеми сметки. Ова значеше дека стампедото беше брзо.

Два дена откако објави дека ќе собере капитал, компанијата од 200 милијарди долари пропадна. Тоа беше колапс на најголемата банка во САД по глобалната финансиска криза.

Дали е ова почеток на банкарска криза?

Непосредната загриженост за широко распространета зараза беше содржана со брз одговор од американската влада која ги гарантираше сите депозити на клиентите на банките.

Финансиските фјучерси, кои им овозможуваат на инвеститорите да шпекулираат за идните движења на цените, се зголемија за американскиот технолошки сектор како одговор на гаранциите.

Имаше загриженост дека сопствениците на сметките на СВБ нема да можат да ги платат вработените доколку не се активира гаранцијата, што испрати бранувања низ економијата. „Во однос на стабилноста, негативните ефекти се избегнати“, изјави Моширијан за Гардијан.

Владите и регулаторите ширум светот, вклучително и во Велика Британија и во Австралија, ја истражуваат изложеноста на СВБ во нивните корпоративни и банкарски сектори. Долгорочното прашање е дали ранливоста на СВБ на зголемените каматни стапки е споредлива со ризиците на другите банки од прекумерна изложеност на падот на цените на обврзниците.

Федералните резерви ги спасуваат банките

За да се спротивстави на ризикот, Федералните резерви претставија нова програма, која им овозможува на банките да позајмуваат средства поддржани од државни хартии од вредност, за да ги задоволат барањата на клиентите. Ова е дизајнирано да ги спречи банките принудно да ги продаваат државни обврзници кои ја изгубиле вредноста поради зголемените каматни стапки.

Сепак, има повеќе непосредни проблеми за технолошкиот сектор. СВБ обезбедуваше банкарски услуги во Силиконската долина, поддржувајќи стартапи и други технолошки компании од кои традиционалните банки би можеле да се оддалечат.

Последниве месеци овој сектор го намалува бројот на вработени поради влошување на економските услови. Во моментот кога им треба финансиска поддршка пропадна еден од најголемите спонзори.

Дали СВБ доби финансиска помош?

Владата на САД не ја спаси СВБ. Банката останува во банкрот, а нејзините преостанати средства ќе бидат поделени меѓу доверителите – освен ако купувачот не ја врати во живот.

Меѓутоа, во неделата американските власти ја продолжија гаранцијата за сите депозити во оваа банка, како и за клиентите на Signature Bank, помала банкарска институција која пропадна за време на викендот. Ова значи дека клиентите во СВБ можеле да пристапат до нивните пари во понеделникот наутро.

Акционерите на банките и некои необезбедени доверители не се заштитени со гаранции.

Дали ова ќе влијае на каматните стапки?

Централните банки ширум светот ги зголемуваа стапките во текот на изминатата година за да ја скротат високата инфлација, при што САД брзо премина од близу 0 на над 4,5 проценти. Повеќето прогнозери очекуваат стапките да се зголемат во САД, во Велика Британија и во Австралија, пред да се стабилизираат.

Апетитот за понатамошни зголемувања на каматните стапки ќе биде тестиран, доколку централните банки се загрижени дека проблемите на СВБ укажуваат на поширока слабост во билансите на корпорациите предизвикани од зголемувањето на каматните стапки, пишува Индекс.

The post КАКО МОЖЕ МОЌНА БАНКА ДА ПРОПАДНЕ ЗА 48 ЧАСА? Се полакоми по државните обврзници, ја „отепаа“ високите камати appeared first on plusinfo.mk.