Институциите континуирано комуницираат со концесионерот на комплексот „Македонско село“ со цел објектот успешно да функционира и да не биде затворен, изјави директорот на Службата за општи и заеднички работи (СОЗР), Ивица Томовски, во гостување во „Ноќно студио“ на 4ТВ.

Томовски истакна дека државата обезбедува логистичка и институционална поддршка и додаде дека комплексот веќе околу една година работи стабилно.

– Постојано комуницираме со концесионерот и стоиме како логистика и поддршка. Целта е објектот да функционира и да не се затвори. Во моментов сметам дека работи добро. Периодов подобро функционираат ресторанските услуги, додека хотелските капацитети имаат потреба од дополнителна поддршка – рече Томовски.

Тој посочи дека за подобро искористување на сместувачките капацитети во комплексот е потребна поголема поддршка и од туристичките агенции и од институциите.

– Овие објекти не се класични хотелски капацитети и не можат да учествуваат во одредени јавни набавки како хотели. Тие се водат како апартманско сместување и затоа им е потребна поголема промоција и поддршка, за да се развие тој сегмент и да се испочитува договорот – додаде тој.

Во однос на пристапноста, Томовски истакна дека до комплексот може да се стигне и со автобуски превоз на ЈСП, а веќе се разговара за воведување почести линии. Тој додаде дека државни институции сè почесто организираат настани таму, а странските посетители, како што рече, се воодушевени од амбиентот.

Томовски се осврна и на пријавите од граѓани за наводни злоупотреби на службени возила, нагласувајќи дека секој случај се проверува.

– Граѓаните сè почесто пријавуваат. Наша задача е да побараме одговор од институцијата и да утврдиме дали станува збор за злоупотреба или за службена задача – рече тој.

Тој информираше и дека СОЗР започнал со чистење на возниот парк од нефункционални возила, при што досега се расходувани над 100 возила кои со години биле надвор од употреба.

The post „МАКЕДОНСКО СЕЛО“ СЕ ОДРЖУВА ВО ЖИВОТ Томовски најави институционална поддршка и нови линии на ЈСП appeared first on plusinfo.mk.

Од 9 декември 2025 година, државата и државните институции ќе можат да плаќаат и да примаат средства во евра, согласно стандардите на СЕПА, во 40 земји кои се опфатени со системот.

Имајќи предвид дека 80% од вкупните одливни плаќања и 90% од вкупните приливи на државата се во евра, пониските надоместоци директно ќе овозможат поголеми заштеди за државата и за државните органи. Наместо досегашните просечни трошоци од 14 евра за плаќање преку кореспондентните банки, плаќањата преку СЕПА ќе чинат 3 евра за електронските налози и 5 евра за хартиените налози, а сите приливи преку СЕПА ќе се наплатуваат 3 евра.

Плаќањето, како што сооопшти Народна банка, ќе се реализира преку  НЛБ банка за што е потпишан договор меѓу гувернерот Трајко Славески и претседателот на Управниот одбор на НЛБ д.д. Љубљана, Блаж Бродњак и членот на Управниот одбор на НЛБ д.д. Љубљана, Антонио Аргир. Договорот  ѝ овозможува на Народната банка да започне со плаќања преку СЕПА.

– Со овој значаен чекор Народната банка, покрај регулаторната и надзорната улога во платежната сфера, ја потврдува и својата оперативна улога во обезбедувањето подобри и поквалитетни услуги за државата и за државните органи во извршувањето на прекуграничните плаќања – изјави Славески.

Според Бродњак, пак, ова претставува значаен чекор кон подлабока интеграција со платниот систем на Европската Унија и ја поддржува пошироката цел за интеграција во ЕУ.

– Оваа пресвртница се надоврзува на нашето неодамнешно воведување на услугата „Епл пеј” (Apple Pay) за сите наши клиенти во ЈИЕ и успешното влегување на „НЛБ банка” Скопјe во шемата на кредитниот трансфер преку СЕПА, дополнително зајакнувајќи ја посветеноста на Групацијата НЛБ за поттикнување на финансискиот развој и иновациите во Северна Македонија – рече тој .

По пристапувањето на  нашата земја кон СЕПА, со што за граѓаните и за компаниите веќе се овозможени побрзи, побезбедни и поевтини плаќања во евра, Народната банка како банкар на државата им овозможува и на државните институции да ги користат придобивките од СЕПА. На овој начин, ќе се овозможат значителни заштеди за државата и за државните институции при извршувањето на прекуграничните плаќања во евра со четириесетте земји членки на СЕПА.

The post ОД 9 ДЕКЕМВРИ И ДРЖАВНИТЕ ИНСТИТУЦИИ ЌЕ ПЛАЌААТ ПРЕКУ СЕПА Еве преку која банка ќе се реализираат трансакциите appeared first on plusinfo.mk.

Државата ќе реконструира 14 згради на јавни институции со цел да ги намали енергетски трошоци, да ги подобрени услови за работа и да се намалат емисиите согласно европските стандарди.

Зградите имаат  вкупна корисна површина од 102.992 m²,а во нив се сместени 33 институции, што секојдневно ги користат повеќе од 5.000 лица.

Индикативната вредност на Планот изнесува околу 11,11 милиони евра, вклучувајќи технички контроли, проекти, надзор и изведба.

Планот за реконструкција на згради кои ги користат лицата од јавниот сектор на државно ниво за периодот 2025–2028 го усвои неодамна владата, а го подготви Министерството за енергетика.

Со него е планирано да се реконструираат зградите на:Министерството за здравство (заедно со Институтот за јавно здравје и ДСЗИ), зградата на Државниот завод за статистика, објектот на Агенцијата за катастар на недвижности и главната зграда на Управата за хидрометеоролошки работи. Потоа зградите на Министерството за економија и труд, зградата во која се сместени Агенцијата за администрација, Државниот инспекторат за енергетика, рударство и минерални суровини, како и големиот административен блок на МИОА, МОН, МЛС, ДИК, Агенцијата за лекови, УМЕ и Секретаријатот за законодавство (НИП „Нова Македонија“) ако и уште 8 други згради кои претходно биле реконструирани и имаат потреба од енергетска надградба и современи системи.

Секоја зграда ќе мине низ енергетска контрола, по што ќе се дефинираат конкретните мерки – од топлинска изолација на фасади и замена на прозорци, до поставување соларни системи за топла вода, фотоволтаици на покривите и модерни системи за греење, осветлување и автоматска контрола на потрошувачката.

Овие интервенции се насочени кон драстично намалување на трошоците за енергија во јавниот сектор, кои традиционално се високи и го оптоваруваат буџетот на институциите.

Паралелно, планот ги намалува емисиите на CO₂ за 29%, односно за 1.091 тони годишно, што претставува значајна придобивка за квалитетот на воздухот во урбаните средини.

Паралелно, Планот претставува важен чекор во транспонирањето на европското законодавство во делот на енергетската ефикасност (Директивата 2018/2002/EU и Регулативата 2018/1999/EU) и е директно усогласен со обврските кон Енергетската заедница.

The post ЌЕ СЕ РЕКОНСТРУИРААТ 14 ЗГРАДИ НА ДРЖАВНИ ИНСТИТУЦИИ До 2028 година ќе станат енергетско ефикасни appeared first on plusinfo.mk.

Владата размислува за нов сет на мерки за намалување на загадувањето пред почетокот на зимската грејна сезона. Премиерот Христијан Мицкоски денеска најави дека на владина седница ќе биде разгледана иницијативата за поставување филтри на оџаците на домаќинствата и државните институции што се греат на фосилни горива.

– За еден месец започнува грејната сезона. Денеска на владина седница ќе отворам значајна точка. Гасификацијата ќе трае подолго, затоа треба да разгледаме можност, како што субвенционираме клими и топлотни пумпи, да обезбедиме филтри на оџаците за 5 до 10 илјади домаќинства. Лично работев на оваа проблематика и видов дека во голем дел од градовите на тој начин е намалено загадувањето – изјави Мицкоски.

Покрај граѓаните, мерките ќе ги опфатат и околу 500 државни објекти, кои според Владата најчесто користат дрва како енергенс.

– Постои можност и таму да се инсталираат филтри. Очекувам повторно од ноември невладини организации да се активираат и да се борат за почист воздух, иако во изминативе седум години ги немаше. Оваа мерка би била вонредна, но мора да видиме како законски да ја реализираме, бидејќи сме во изборен период – додаде премиерот.

Најавените мерки се дел од напорите на Владата за подобрување на квалитетот на воздухот, кој традиционално е најзагаден токму во зимските месеци.

The post ЗАГАДУВАЊЕТО ЌЕ СЕ НАМАЛУВА СО ФИЛТРИ Владата ќе помогне на 10.000 семејства и 500 државни објекти appeared first on plusinfo.mk.

Министерот за внатрешни работи Панче Тошковски најави нова мерка за поврзување на образованието и безбедносниот систем во државата. На 16-та меѓународна научна конференција „Системска корупција – најголемата безбедносна закана: Безбедносно-стратешки пристапи за решавање на сложените предизвици“, што се одржува во Скопје, тој најави можност за потпишување меморандуми за соработка на МВР со Факултетот за безбедност, како и со други факултети – Правниот, Економскиот и други кои имаат допирни точки со областа на безбедноста.

– Имаме исклучително добра соработка со Факултетот за безбедност и таа е една од клучните соработки кои ги развиваме со високообразовните институции. Согласно новиот Закон за внатрешни работи, ќе можеме со сите универзитети кои таргетираат на безбедноста да потпишеме меморандум, со кој најквалитетните кадри ќе можат да станат дел од безбедносните институции, таму каде што им е местото – истакна Тошковски.

Министерот објасни дека целта е на најдобрите студенти да им се овозможи директен пристап до институции како МВР, а во иднина и во други тела поврзани со безбедноста – АНБ, Царината и слични.

– На ваков начин најуспешните студенти, оние кои дале максимум од себе во текот на студиите, ќе добијат мотив и можност да се вклучат во институциите што се темел на една современа демократска држава – додаде Тошковски.

Тој нагласи дека темата на годинешната конференција е особено актуелна за Балканот, бидејќи системската корупција претставува сериозна безбедносна закана. Според него, со дискусиите и предлозите на експертите ќе се создадат насоки за полесно справување со предизвиците.

На отворањето на конференцијата обраќања имаа и ректорот на Универзитетот „Св. Климент Охридски“ од Битола, проф. д-р Игор Неделковски, како и деканот на Факултетот за безбедност – Скопје, проф. д-р Јонче Ивановски. Своите излагања ги презентираа и експертите од областа: проф. д-р Миодраг Лабовиќ, проф. д-р Углеша Звекиќ од Глобалната иницијатива против транснационалниот организиран криминал, и проф. д-р Филип Ејдус од Факултетот за политички науки во Белград.

The post МВР ЌЕ ГИ ВРАБОТУВА НАЈДОБРИТЕ СТУДЕНТИ Тошковски најави меморандуми со факултетите appeared first on plusinfo.mk.

Премиерот Христијан Мицкоски смета дека треба да се почитуваат законите, вклучително и Законот за јазиците, а за непочитувањето на овој закон во делот на веб страниците и соопштенијата од министерствата, смета дека треба да се зголемат капацитетите затоа што во минатото продукцијата на вести била 10 пати помала од сега.

– Мислам дека треба да се зголемат капацитетите затоа што во минатото продукцијата на вести и активности било 10 пати помала од денеска и можеби било полесно да се работи и да се испорачува нешто кое што е во согласност со Законот за употреба на јазиците. Законот мора да се почитува, но треба да се зголемат капацитетите и во фаза сме на вработување на луѓе кои 10 пати поголемата активност на министерствата апсолутно ќе ја испорачуваат до медиумите – рече Мицкоски, одговарајќи на новинарски прашања по денешното потпишување на два договори за државна помош со компанијата „Бреинчајлд“.

Вели дека нема интерес за вработување во државните институции поради висината на платата и дека тоа е сериозен проблем.

– За жал, нема интерес за таа плата што е во моментот и овде во Владата и во институциите. Тоа претставува сериозен проблем и не е атрактивно за младите, но ќе продолжиме да бараме сѐ додека не го испорачаме тоа што им е потребно на граѓаните без разлика на етничката припадност, без разлика дали се Македонци, Албанци, Турци, Срби, Роми, Власи, Бошњаци… Се надеваме дека наскоро ќе се доекипираме и дека сѐ ќе биде како што треба да биде – рече Мицкоски.

The post НЕ ПРИФАЌААТ ДА РАБОТАТ ЗА МАЛИ ПЛАТИ Младите не се јавуваат на огласите за работа во министерствата appeared first on plusinfo.mk.

„РЕС во текот на минатиот месец даде најповолни понуди за снабдување на УЈП, Државниот завод за статистика, Заводот за ревизија, Агенцијата за катастар, Општина Велес, како и на реномираните стопански субјекти ОКТА, Скопски пазар, челичарница Железник и други компании“, соопшти компанијата РЕС.

Со ова, балансната група на РЕС достигна над 300 субјекти, со вкупна годишна потрошувачка од над 400 GWh електична енергија, што гарантира стабилно снабдување и сигурност за клиентите.

– Тоа ја потврдува водечката улога на РЕС како најдобар партнер на слободниот пазар, како при снабдувањето, така и при откупувањето на електричната енергија од производителите од обновливи извори – велат од РЕС.

The post НАЈПОВОЛНА ПОНУДА Уште 17 државни институции и приватни компании избраа РЕС да ги снабдува со струја appeared first on plusinfo.mk.

Според Гир, прво и најважно е да се бориме со корупцијата преку државните институции. Тие, како што вели, мора да дејствуваат и да го намалат просторот за корупција.

– Тоа значи преку закони и кодекси на однесување, тоа значи стимулации за промоција на услугите и сериозни санкции за коруптивното однесување. Тоа значи спроведување. Тоа значи, кога некој незаконски ќе заземе некое земјиште и ќе гради обвинителството мора да дејствува, а судовите да реагираат брзо без разлика кој е тој човек и колку и да е влијателен, колку и да е поврзан – нагласи Гир.

Борбата против корупцијата, нагласи тој, е да се создаде средина што ќе биде непријателски настроена кон лошите навики поврзани со коруптивното однесување.

– Се работи за зацврстување на клучните системи за интегритет преку реформи на системите за набавка и финансиско управување во државата. Поголема транспарентност и развој на капацитетите на државните институции за ревизии и антикорупција. Се работи за партнерство со бизнисите, како и партнерство со слободните и професионални медиуми кои ќе ги следат највисоките стандарди кои ќе бидат ослободени од закани, навреди или поткуп во каква било форма – рече Гир.

Евроамбасадорот на прес-конференцијата ја нагласи важноста на напорите за борба против корупцијата.

– Ова е предизвик во секоја земја. Во секоја земја напорите за борба против корупцијата постојано се обновуваат и приспособуваат на новите предизвици и можности со коишто се соочуваат нашите општества без разлика дали е тоа дигитална или зелена револуција, дали е тоа глобална пандемија, глобална енергетска транзиција или, пак, влијанието на руската војна против Украина – посочи Гир.

Проблемот, нагласува Гир, е огромен, но, како што кажа, има и напредок во изминативе години.

– Извештајот за напредок од октомври покажа дека државата задржа еден добар чекор во борбата со корупцијата. Некои институции покажаа одлучност да се справат со корупцијата. Граѓанското општество продолжува да игра улога буквално како чувар кој наметнува одговорност на јавните институции и на функционерите. И бизнисот може да игра битна улога како и медиумите коишто секогаш играат клучна улога. И тука не мислам на повторувањето на сензационални обвинувања, мислам особено на мачното исражувачко новинарство што го спроведоа неколкумина новинари во земјава и кои расветлија коруптивни и криминални однесувања и структури. И тие треба да бидат пофалени за тоа – заклучи Гир.

Всушност, додаде Гир, „во интерес е на оние кои имаат полза од корупцијата да ве тераат да мислите дека работите не можат да се применат, дека сите политичари, сите институции, сите судии, сите обвинители, целата полиција сите се корумпирани”.

– Да ве натераат да мислите дека е тоа природен тек на нештата и затоа дека е на некој начин прифатливо. Но, не е. И го немаме тој луксуз да размислуваме така ниту тука, ниту во ЕУ – потенцира Гир.

The post ГИР БАРА ВКЛУЧУВАЊЕ НА ИНСТИТУЦИИТЕ Или ќе се справуваме со корупцијата или таа ќе се вкоренува повеќе! appeared first on plusinfo.mk.

Одлуката е согласно донесената измена за Законот за поштенски услуги во врска со одлагањето на либерализацијата на поштенските услуги до 31.12.2023 година, а со цел подобрување на финансиското работење на АД Пошта.

Владата им препорача и на сите општини и на Град Скопје да ги користат услугите на АД Пошта.

The post ДРЖАВНИТЕ ИНСТИТУЦИИ ДА КОРИСТАТ УСЛУГИ НА АД ПОШТА Владата ги задолжи и општините и Град Скопје appeared first on plusinfo.mk.

Во вториот квартал во споредба со првиот општините успеале да намалат дел од долгот, но раст на долговите има во здравството, на јавните претпријатија и фирми во државна сопственост, на голем дел од буџетските корисници, судовите.

Државните долгови се зголемија и во вториот квартал од годинава – пораст има и во однос на првиот квартал, но и во однос на истиот период лани. На новата должничка листа на Министерството за финанасии се наоѓаат 1.180 институции од здравството, образованието, културата, јавни претпријатија на централно и локално ниво, регулаторни тела, агенции, центри за социјална заштита кои пријавиле милионски доспеани, а неплатени обврски.

Податоците покажуваат дека вкупниот пријавен долг на се што значи државна институција на централно и на локално ниво изнесува 332.000.000 евра. Во споредба со првиот квартал од годинава тој е зголемен за 20 милиони евра, а во споредба со лани истиот период за 51,5 милиони евра.

       Доспеани а неплатени обврски

2 квартал 2021                                      332.000.000 евра

1 квартал 2021                                      312.000.000 евра

2 квартал  2020                                     280,5 милиони евра

Забележително е дека општините и општинските јавни претпријатија на квартално ниво успеале да го намалат долгот во споредба со првиот квартал, но и натаму оваа група котира високо според износот на долговите, над 61 милион евра.

      Доспеани неплатени обврски  – јуни 2021

Општини                                                                          61,4 милиони евра

Ј.П и државни фирми                                                    127,7 милиони евра

Општински јавни претпријатија                                  48,5 милиони евра

Јавни здравствени установи                                         60,8 милиони евра

Голем број на училишта, агенции, јавни претпријатија, речиси сите општини, болници, министерства се на новата листа на должници – со доспеани, а неплатени обврски.

Порталб направи анализа на долговите според видот на институциите. Меѓу државните Агенции со поголеми износи на долгови се Агенција за храна и ветеринарство со скоро 95 000 евра, Агенција за млади и спорт со долг од скоро 50 000 евра, а приближно толку должи и Агенцијата за лекови. Доспеани, а неплатени обврски повисоки од 50 000 евра пријавил и скопскиот  Државен санитарен и здравствен инспекторат.

На листата должници се и затворите – со поголеми долгови се КПД Идризво со 388 000 евра и КПУ затвор Скопје-Шуто Оризари 686 000 евра.

Доспеани, а неплатени обврски имаат и министерствата, а со поголем износ на долг се Министерството за култура, Министерството за транспорт, МНР.

     Досепани неплатени обврски – министерства

Министерство за транспорт и врски                                1 500 000 евра

Министерство за култура                                                       858 000 евра

Министерство за надворешни работи                                488 000 евра

Министерство за образование и наука                                386 000 евра

Милионски доспеани, а неплатени обврски пријавиле и болниците односно јавните здравствени установи речиси од цела држава. На листата се наоѓаат и клинички центри, медицински институти, но и здравствени домови од двесеттина градови – од Охрид, Тетово, Штип, Велес, Валандово, Скопје, Куманово.

      Здравствени установи – долгови

ГОБ   8-ми септември                                                                   4 500 000  евра

Завод за нефрологија-Струга                                                         800 000 евра

Институт за трансфузиона медицина                                       3 104 000 евра

Институт по белодробни заболувања кај децата-Козле      3 339 000 евра

ЈЗУ Клиника за гинекологија и акушерство                              3 240 000 евра

ЈЗУ Клиника за детска хирургија                                                 1 700 000 евра

ЈЗУ Клиника за неврологија                                                          1 300 000 евра

ЈЗУ Клиника за радиотерапија и онкологија                             2 565 000 евра

The post НОВА ДОЛЖНИЧКА ЛИСТА Кои Минстерства, агенции, болници најмногу должат? appeared first on plusinfo.mk.